၁-၂။ ယောဟန် ၄:၃၅၊ ၃၆ မှာပါတဲ့ စကားတွေကို ယေရှု ဘာကြောင့် ပြောတာ ဖြစ်မလဲ။

ယေရှုဟာ မုယော​ပျိုး​ခင်း​တွေ​ထဲ ဖြတ်လျှောက်​လာတယ်။ (ယော. ၄:၃-၆) မုယော ရိတ်သိမ်း​ဖို့ လေးလ​လောက် လိုသေးတယ်။ ဒါကြောင့် “လယ်ကွင်း​ကို လှမ်း​မျှော်ကြည့်​လိုက်ပါ။ ရိတ်​စ​ရာ​စပါး​တွေ မှည့်ဝင်း​နေပြီ” ဆိုတဲ့ ယေရှု​စကားက အတော်လေး ထူးဆန်း​နေ​ပုံ​ရတယ်။ (ယောဟန် ၄:၃၅၊ ၃၆ ကိုဖတ်ပါ။) ယေရှု ဘာကို ဆိုလိုသလဲ။

^၂ ပုံဆောင် ရိတ်သိမ်းခြင်း​အကြောင်း ယေရှု ပြော​နေတာ။ ဂျူးတွေဟာ ရှမာရိ​တွေ​နဲ့ အပေါင်းအသင်း မလုပ်ကြပေမဲ့ ရှမာရိ အမျိုးသမီး​တစ်ယောက်ကို ယေရှု ဟောပြောတဲ့​အခါ အမျိုးသမီး နားထောင်တယ်။ သူ့​ဆီက​တစ်ဆင့် ယေရှု​အကြောင်းကို ရှမာရိ​လူတွေ ကြား​ပြီး ထပ်​သိချင်​လို့ လိုက်​လာကြတယ်။ “မှည့်ဝင်း” နေတဲ့ လယ်ကွင်း​အကြောင်း ယေရှု ပြောတာ အဲဒီ​အချိန်ပဲ။ (ယော. ၄:၉၊ ၃၉-၄၂) “မှည့်ဝင်း​နေတဲ့ ကောက်နှံ​တွေ​လို​ပဲ ရိတ်သိမ်းချိန်​တန်ပြီ​ဆိုတာ သူတို့ရဲ့ စိတ်ထက်သန်မှု​က ဖော်ပြတယ်” လို့ ကျမ်းပညာရှင်​တစ်ယောက် ပြောတယ်။

၃။ လူတွေကို ယေရှု မြင်​သလို မြင်မယ်​ဆိုရင် ဟောပြောခြင်း​လုပ်ငန်း​အပေါ် ဘယ်လို အကျိုး​သက်ရောက်​မလဲ။

^၃ သင်​ကော။ သတင်းကောင်း ဟောပြောတဲ့​အခါ လူတွေကို ရိတ်သိမ်း​ဖို့ မှည့်ဝင်း​နေတဲ့ ကောက်နှံ​တွေ​အဖြစ် ရှုမြင်​သလား။ ဒါဆိုရင် (၁) အရေးကြီး သဘောထား​နဲ့ ဟောပြောပါ​လိမ့်မယ်။ ရိတ်သိမ်း​တဲ့​ကာလ အကန့်အသတ် ရှိတဲ့​အတွက် အချိန်ဖြုန်း​နေမှာ မဟုတ်ဘူး။ (၂) လူတွေ သတင်းကောင်း နားထောင်တဲ့​အခါ သင် ပျော်ရွှင်​ရပါလိမ့်မယ်။ ‘ရိတ်သိမ်းချိန်​မှာ လူတွေ ရွှင်လန်း​တယ်’ လို့ ကျမ်းစာ ပြောတယ်။ (ဟေရှာ. ၉:၃) (၃) လူတိုင်းကို တပည့်ဖြစ်​လာမယ့်​သူတွေ​အဖြစ် ရှုမြင်​တဲ့​အတွက် တစ်ယောက်စီ​နဲ့ ကိုက်ညီ​မယ့် တင်ဆက်နည်းကို သုံးပါ​လိမ့်မယ်။

၄။ ဒီ​ဆောင်းပါး​မှာ တမန်တော် ပေါလု​ဆီကနေ ဘာ​သင်ယူ​ရမလဲ။

 ^၄ ရှမာရိ​တွေ ဘယ်တော့မှ တပည့်​ဖြစ်လာမှာ မဟုတ်ဘူးလို့ နောက်လိုက်​တွေ တွေး​သလို ယေရှု မတွေး​ဘူး။ သူတို့ကို တပည့်ဖြစ်​လာမယ့်​သူတွေ​အဖြစ် ရှုမြင်တယ်။ ကျွန်တော်တို့လည်း ရပ်ကွက်မှာ​ရှိတဲ့ လူတွေကို ခရစ်တော်ရဲ့ တပည့်ဖြစ်​လာမယ့်​သူတွေ​အဖြစ် ရှုမြင်​ရမယ်။ ဒီ​ကိစ္စမှာ တမန်တော် ပေါလု ပုံသက်သေ​ကောင်း ပြခဲ့တယ်။ ပေါလု​ဆီကနေ ဘာသင်ယူနိုင်သလဲ။ ပေါလုဟာ (၁) ကိုယ်​ဟောပြောမယ့်​သူတွေရဲ့ ယုံကြည်ချက်​အကြောင်း သိအောင် ဘယ်လို လုပ်သလဲ၊ (၂) သူတို့ စိတ်ဝင်စား​ရာတွေကို သိအောင် ဘယ်လို လုပ်သလဲ၊ (၃) လူတွေကို ယေရှုရဲ့ တပည့်ဖြစ်​လာမယ့်​သူတွေ​အဖြစ် ရှုမြင်​ကြောင်း ဘယ်လို ပြသလဲ ဆိုတာ ဒီ​ဆောင်းပါး​မှာ လေ့လာပါ​မယ်။

၅။ တရားဇရပ်မှာ နားထောင်​သူတွေ​အကြောင်း ပေါလု ဘာကြောင့် နားလည်​နိုင်သလဲ။

^၅ ဂျူး​တရား​ဇရပ်တွေမှာ ပေါလု ဟောပြောလေ့​ရှိတယ်။ ဥပမာ၊ သက်သာလောနိတ်​မြို့ တရားဇရပ်မှာ “ဥပုသ်​နေ့ သုံး​နေ့​တိုင်တိုင် ကျမ်းစာ​သုံးပြီး သူတို့ (ဂျူးတွေ) နဲ့ ကျိုးကြောင်း​ဆင်ခြင်တယ်။” (တ. ၁၇:၁၊ ၂) ပေါလုဟာ ဂျူးလူမျိုး​အဖြစ် ကြီးပြင်းလာတဲ့​အတွက် တရားဇရပ်မှာ ဟော​ဖို့ ခက်​မှာ မဟုတ်ဘူး။ (တ. ၂၆:၄၊ ၅) ဂျူးတွေ​အကြောင်း နားလည်တဲ့​အတွက် ယုံကြည်​စိတ်ချမှု အပြည့်​နဲ့ ဟော​နိုင်တယ်။—ဖိ. ၃:၄၊ ၅။

၆။ အေ​သင်​မြို့ ဈေး​က လူတွေနဲ့ တရားဇရပ်​က ဂျူးတွေ ဘာကွာ​သလဲ။

^၆ ညှဉ်းပန်း​နှိပ်စက်​သူတွေ​ကြောင့် သက်သာလောနိတ်​မြို့၊ ဗေရိ​မြို့၊ အေ​သင်​မြို့​တွေ​ဆီ ထွက်ပြေးခဲ့​ရတယ်။ အေ​သင်​မြို့ကို ရောက်တော့ ‘တရားဇရပ်မှာ​ရှိတဲ့ ဂျူးတွေ၊ ဘုရားသခင်ကို ကိုးကွယ်တဲ့​သူတွေနဲ့ ကျိုးကြောင်း​ဆင်ခြင်တယ်။’ (တ. ၁၇:၁၇) ဒါပေမဲ့ ဈေး​မှာ​တော့ နားထောင်​သူတွေ ပြောင်း​သွားပြီ။ အတွေးအခေါ်သမားတွေ၊ လူမျိုးခြားတွေ ဖြစ်နေလို့ ပေါလု ပြောတာတွေကို မကြား​ဖူး​ကြဘူး။ ဒါကြောင့် “အဲဒီ​အကြောင်း​တွေ​က ကျုပ်တို့​အတွက် အသစ်အဆန်း ဖြစ်နေတယ်” လို့ ပြော​ကြတယ်။—တ. ၁၇:၁၈-၂၀။

၇။ တမန်တော် ၁၇:၂၂၊ ၂၃ အရ ချဉ်းကပ်​နည်းကို ပေါလု ဘယ်လို ပြောင်းလဲ​ခဲ့သလဲ။

^၇ တမန်တော် ၁၇:၂၂၊ ၂၃ ကိုဖတ်ပါ။ အေ​သင်​မြို့က လူမျိုးခြားတွေကို ပေါလု ဟောတဲ့​ပုံ​နဲ့ တရားဇရပ်​က ဂျူးတွေကို ဟောတဲ့​ပုံ မတူဘူး။ ‘ဒီ​အေ​သင်​မြို့သားတွေ ဘာ​ယုံကြည်​ကြသလဲ’ ဆိုတာ ပေါလု စဉ်းစား​ခဲ့​မှာ​ပဲ။ ပတ်ဝန်းကျင်​ကို အသေအချာ အကဲခတ်​ပြီး ဘာသာရေး ထုံးစံတွေကို သတိပြု​တယ်။ ပြီးနောက် သူတို့ လက်ခံ​ထားတဲ့ အချက်ကို အခြေခံပြီး ကျမ်းစာ အမှန်တရားကို တင်ဆက်​တယ်။  “ဂျူးနဲ့ ခရစ်ယာန်တွေရဲ့ ‘စစ်မှန်တဲ့’ ဘုရားကို ဂရိ​တွေ မကိုးကွယ်​မှန်း ဂျူး​ခရစ်ယာန်​တစ်ယောက်​အနေနဲ့ ပေါလု နားလည်တယ်။ ဒါပေမဲ့ သူ​ပြောမယ့် ဘုရားဟာ အေ​သင်​မြို့သားတွေ​နဲ့ မ​စိမ်း​ဘူး ဆိုတာ သိစေချင်တယ်” လို့ ကျမ်းပညာရှင်​တစ်ယောက် ပြောတယ်။ ဒါကြောင့် သူ့ရဲ့ ချဉ်းကပ်​နည်းကို ပြောင်းလဲ​ခဲ့တယ်။ မိမိရဲ့ သတင်း​ဟာ အေသင်မြို့သားတွေ “မသိဘဲ ကိုးကွယ်​နေတဲ့ ဘုရားသခင်” ဆီက ဖြစ်တယ်​ဆိုပြီး ပြောတယ်။ ကျမ်းစာ​အကြောင်း လူမျိုးခြားတွေ မသိပေမဲ့ ပေါလု လက်မလျှော့​ဘူး။ ရိတ်သိမ်း​ဖို့ မှည့်ဝင်း​နေတဲ့ ကောက်နှံ​တွေ​အဖြစ် ရှုမြင်​ပြီး တင်ဆက်နည်းကို ပြုပြင်​ပြောင်းလဲ​ခဲ့တယ်။

၈။ (က) ရပ်ကွက်မှာ​ရှိတဲ့ လူတွေရဲ့ ဘာသာရေး ယုံကြည်ချက်ကို ဘယ်လို သိနိုင်​မလဲ။ (ခ) ကိုယ်ပိုင် ဘာသာ ရှိတယ်လို့ ပြောလာရင် သင် ဘယ်လို တုံ့ပြန်​မလဲ။

^၈ ပေါလု​လို မျက်စိရှင်​ပါ။ ရပ်ကွက်မှာ​ရှိတဲ့ လူတွေ ဘာကို ယုံကြည်​သလဲ ဆိုတာ ဖော်ပြတဲ့ အမှတ်အသားတွေကို ရှာပါ။ အိမ် ဒါမှမဟုတ် ကားကို ဘယ်လို အလှဆင်​ထားသလဲ။ နာမည်၊ လိပ်စာ၊ အဝတ်အစား၊ စကားအ​သုံး​အနှုန်း​က ဘယ်​ဘာသာဝင် ဖြစ်ကြောင်း ဖော်ပြ​နေသလဲ။ ကိုယ်ပိုင် ဘာသာ ရှိတယ်လို့ တိုက်ရိုက်​ပြောတာ​လည်း ဖြစ်နိုင်တယ်။ အထူး​ရှေ့ဆောင် ညီအစ်မ​တစ်ယောက် အဲဒီလို ကြုံရတဲ့​အခါ “ဘာသာဆွယ်​ဖို့ လာတာ မဟုတ်ပါဘူး။ ဒီ​အကြောင်း​လေး ပြောပြချင်​လို့​ပါ” ဆိုပြီး ပြန်​ပြောတယ်။

၉။ ဘာသာတရား ကိုင်းရှိုင်းသူ​နဲ့ ဘာ​အကြောင်း​တွေ ဆွေးနွေး​နိုင်သလဲ။

^၉ ဘာသာတရား ကိုင်းရှိုင်းသူ​နဲ့ ဘာ​အကြောင်း​တွေ ဆွေးနွေး​နိုင်သလဲ။ နှစ်ဦးနှစ်ဖက် သဘောတူ​နိုင်မယ့် အကြောင်းကို ရှာပါ။ သူဟာ ဘုရား​တစ်ဆူတည်း​ကို ကိုးကွယ်တာ၊ ယေရှုကို ကယ်တင်ရှင်​အဖြစ် အသိအမှတ်ပြု​တာ၊ ဆိုးသွမ်းမှု​တွေ အဆုံးတိုင်​ခါနီး​ချိန်မှာ အသက်ရှင်နေ​ရ​မှန်း ယုံကြည်တာ ဖြစ်နိုင်တယ်။ နှစ်ဦးနှစ်ဖက် ယုံကြည်တဲ့​အချက်​ပေါ် အခြေခံပြီး ကျမ်းစာ​သတင်းစကားကို သူ​စိတ်ဝင်စား​လာ​အောင် တင်ဆက်​နိုင်တယ်။

၁၀။ ဘာလုပ်ဖို့ ကြိုးစား​သင့်သလဲ။ ဘာကြောင့်လဲ။

^၁၀ လူတွေဟာ ကိုယ့်​ဘာသာရေး​က သွန်သင်ပေး​သမျှကို လက်ခံ​ချင်​မှ လက်ခံ​ကြ​တာ။ ဒါကြောင့် ဘယ်​ဘာသာဝင် ဖြစ်တယ်ဆိုတာ သိ​ပြီးနောက် သူတို့ ဘာကို တကယ်​ယုံကြည်တယ်ဆိုတာ သိအောင် လုပ်ပါ။ “ဒီနေ့​ခေတ်မှာ လူတွေက ဘာသာရေး​နဲ့ အတွေးအခေါ်​တွေ ရော​ထွေးကုန်​ကြပြီ” လို့ ဩစတြေးလျ​က အထူး​ရှေ့ဆောင် ဒေးဗစ် ပြော​တယ်။ အယ်ဘေးနီးယားက ညီအစ်မ ဒို​နယ်​တာ​က​လည်း “လူ​တချို့က ဘာသာ​ရှိတယ်လို့ ဆိုပေမဲ့ ဘုရားကို တကယ် မယုံ​မှန်း နောက်ပိုင်းမှာ ဝန်ခံ​ကြတယ်” လို့ ပြောတယ်။ အာဂျင်တီးနား​က သာသနာပြု ညီအစ်ကို တစ်ယောက်လည်း သုံးပါး​ပေါင်း​တစ်ဆူ​ကို လူတချို့ ယုံပေမဲ့ ခမည်းတော်၊ သားတော်၊ သန့်ရှင်းသော စွမ်းအားတော်ကို ဘုရား​တစ်ပါး​အဖြစ် လက်ခံ​တာ မဟုတ်မှန်း သိရှိခဲ့တယ်။  “အဲဒီလို သိလိုက်​ရလို့ သူတို့နဲ့ စကား​ပြောဖို့ ပိုလွယ်ကူ​လာတယ်” လို့ ပြောတယ်။ ဒါကြောင့် လူတွေ ဘာကို တကယ်​ယုံ​မှန်း သိအောင် လုပ်ပါ။ ဒါဆိုရင် ပေါလု​လို​ပဲ ‘လူအမျိုးမျိုးကို ကူညီ​ပေးဖို့ လုပ်နိုင်တာ​မှန်သမျှ လုပ်’ ပါလိမ့်မယ်။—၁ ကော. ၉:၁၉-၂၃။

၁၁။ တမန်တော် ၁၄:၁၄-၁၇ အရ ပေါလုဟာ လုတ္တရ​မြို့သားတွေ လက်ခံ​နိုင်မယ့်​နည်းနဲ့ ဘယ်လို ဟောပြော​သလဲ။

^၁၁ တမန်တော် ၁၄:၁၄-၁၇ ကိုဖတ်ပါ။ ပေါလုဟာ နားထောင်​သူတွေ ဘာကို စိတ်ဝင်စား​မှန်း သိလာတဲ့​အတွက် တင်ဆက်နည်းကို ပြောင်းလဲ​ခဲ့တယ်။ ဥပမာ၊ ပေါလု​ဟောတဲ့ လုတ္တရ​မြို့သားတွေ​ဟာ ကျမ်းစာ​အကြောင်း မသိကြဘူး။ ဒါကြောင့် သူတို့ နားလည်​နိုင်မယ့်​နည်းနဲ့ ကျိုးကြောင်း​ဆင်ခြင်တယ်။ သီးနှံ​ဖြစ်ထွန်း​တဲ့​အကြောင်း၊ ဘဝကို ပျော်မွေ့နိုင်​စွမ်း​အကြောင်း ပြောတယ်။ နားထောင်​သူတွေ နားလည်​လွယ်​မယ့် စကားလုံးတွေ၊ ဥပမာ​တွေ သုံးတယ်။

၁၂။ လူတစ်ယောက်ရဲ့ စိတ်ဝင်စား​ရာ​ကို ဘယ်လို သိနိုင်​သလဲ။ တင်ဆက်နည်းကို ဘယ်လို ပြောင်းလဲ​နိုင်သလဲ။

^၁၂ ရပ်ကွက်မှာ​ရှိတဲ့ လူတွေရဲ့ စိတ်ဝင်စား​ရာ​ကို ပိုင်းခြား​သိမြင်​ပါ။ တင်ဆက်နည်းကို ပြုပြင်​ပြောင်းလဲပါ။ လူတစ်ယောက်နဲ့ တွေ့တဲ့​အခါ၊ အိမ်​တစ်အိမ် ဝင်​တဲ့အခါ သူ​ဘာ​စိတ်ဝင်စား​မှန်း ဘယ်လို သိနိုင်​သလဲ။ မျက်စိရှင်ရှင် ထားပါ။ အပင်​စိုက်​နေတာ၊ စာဖတ်​နေတာ၊ စက်​ပြင်​နေတာ၊ တစ်ခုခု လုပ်​နေတာ ဖြစ်နိုင်တယ်။ သူ​လုပ်နေတဲ့ အကြောင်းအရာကို အခြေခံပြီး စကား​စပြော​နိုင်တယ်။ (ယော. ၄:၇) သူ​ဝတ်​ထားတဲ့ အဝတ်အစား​ကို ကြည့်ပြီး လူမျိုး၊ အလုပ်အကိုင်၊ အကြိုက်ဆုံး အားကစား​အသင်း စ​တာတွေကို သိနိုင်တယ်။ “နာမည်ကြီး အဆိုတော်​ပုံ​ပါတဲ့ တီရှပ် ဝတ်​ထားတဲ့ ၁၉ နှစ်အရွယ် လူငယ်​တစ်ယောက်ကို တွေ့​တော့ သူ​ဝတ်​ထားတဲ့ တီရှပ်​အကြောင်း​ကနေ စကား​စ​လိုက်တယ်။ အဲဒီ​အဆိုတော်​ကို ဘာလို့ ကြိုက်​မှန်း သူ​ပြောပြတယ်။ အဲဒီကနေ ကျမ်းစာ​လေ့လာမှု စတင်​နိုင်​ခဲ့​ပြီး အခု​ဆိုရင် ညီအစ်ကို ဖြစ်နေပြီ” လို့ ညီအစ်ကို ဂူစတာဘို ပြောပြတယ်။

၁၃။ လက်ခံ​ချင်​စ​ရာ ဖြစ်စေတဲ့​နည်းနဲ့ ကျမ်းစာ​သင်အံမှု ဘယ်လို ကမ်းလှမ်း​နိုင်မလဲ။

^၁၃ ကျမ်းစာ​လေ့လာဖို့ တစ်ယောက်ယောက်ကို ကမ်းလှမ်း​တဲ့အခါ လေ့လာမှု​ကနေ သူ ဘာ​အကျိုး​ရနိုင်သလဲ​ဆိုတာ ပြောပြပါ။ (ယော. ၄:၁၃-၁၅) ဥပမာ၊ စိတ်ဝင်စားသူ  အမျိုးသမီး​က ညီအစ်မ ပေါ်ပီ​ကို အိမ်ထဲ ဖိတ်တယ်။ အဲဒီ​အမျိုးသမီးဟာ ပညာရေး ပါမောက္ခ​ဖြစ်မှန်း နံရံ​မှာ ချိတ်​ထားတဲ့ ဘွဲ့​လက်မှတ်​ကို ကြည့်ပြီး သိလိုက်တယ်။ ဒါနဲ့ သက်သေခံတွေ​လည်း ကျမ်းစာ​လေ့လာမှု အစီအစဉ်​နဲ့ အစည်းအဝေးတွေ​အားဖြင့် လူတွေကို ပညာပေး​နေကြောင်း ပြောပြ​လိုက်တယ်။ အဲဒီ​အမျိုးသမီး ကျမ်းစာ​လေ့လာမှု​ကို လက်ခံ​ပြီး နောက်​နေ့မှာ အစည်းအဝေး လိုက်​တက်တယ်။ မကြာခင် တိုက်နယ်​အစည်းအဝေး လိုက်​တက်တယ်။ တစ်နှစ်​ကြာပြီးနောက် နှစ်ခြင်းခံတယ်။ ဒါကြောင့် ‘ငါ့​ပြန်လည်ပတ်မှု​တွေ ဘာကို စိတ်ဝင်စား​သလဲ။ ကျမ်းစာ​လေ့လာမှု အစီအစဉ်​အကြောင်း လက်ခံ​ချင်​စ​ရာ ဖြစ်စေတဲ့​နည်းနဲ့ ဘယ်လို ပြောမလဲ’ လို့ ကိုယ့်ကိုယ်ကိုယ် မေး​နိုင်တယ်။

၁၄။ သင်သား​တစ်ယောက်စီရဲ့ လိုအပ်ချက်​နဲ့​အညီ သင်အံမှု​ကို ဘယ်လို အလိုက်သင့် ပြောင်းလဲ​နိုင်သလဲ။

^၁၄ ကျမ်းစာ စ​သင်​ပြီးနောက် သင်သားရဲ့ နောက်ခံ၊ စိတ်ဝင်စား​ရာ​ကို ထည့်​စဉ်းစား​ပြီး သင်အံမှု တစ်ခုစီအတွက် သပ်သပ်​စီ ကြိုတင်​ပြင်ဆင်ပါ။ ပြင်ဆင်​တဲ့အခါ ဘယ်​ကျမ်းချက်တွေ ဖတ်​မယ်၊ ဘယ်​ဗီဒီယို ပြမယ်၊ ကျမ်းစာ အမှန်တရားကို ရှင်းပြဖို့ ဘယ်​ဥပမာ သုံးမယ်​ဆိုတာ ကြို​ဆုံးဖြတ်​ထားပါ။ ‘ဘယ်အချက်​က ဒီ​သင်သားရဲ့ စိတ်နှလုံးကို ထိမိ​မလဲ’ လို့ ကိုယ့်ကိုယ်ကိုယ် မေးပါ။ (ပညာ. ၁၆:၂၃) အယ်ဘေး​နီးယားက ရှေ့ဆောင်​ညီအစ်မ ဖလော်ရာ​နဲ့ ကျမ်းစာ လေ့လာ​နေတဲ့ အမျိုးသမီး​က “ရှင်ပြန်ထမြောက်ခြင်း သွန်သင်ချက်ကို လက်မခံ​နိုင်ဘူး” လို့ အပြတ်​ပြောတဲ့အခါ လက်ခံဖို့ ဖလော်ရာ အတင်း ဖိအား​မပေးဘူး။ “ရှင်ပြန်ထမြောက်​ပေးမယ်လို့ ကတိ​ပေးထားတဲ့ ဘုရား​အကြောင်း သူ အရင် သိဖို့ လိုတယ်” ဆိုပြီး ဖလော်ရာ ပြောတယ်။ အဲဒီ​အချိန်​က​စပြီး လေ့လာမှု​တိုင်းမှာ ယေဟောဝါရဲ့ မေတ္တာ၊ ဉာဏ်ပညာ၊ တန်ခိုး​အကြောင်း အလေးပေး​ပြောတယ်။ နောက်ပိုင်း ထမြောက်ခြင်း​ကို အဲဒီ​အမျိုးသမီး ယုံကြည်​လာတယ်။ အခု ထက်သန်တဲ့ သက်သေခံ ဖြစ်နေပြီ။

၁၅။ တမန်တော် ၁၇:၁၆-၁၈ အရ အေ​သင်​မြို့သားတွေရဲ့ ဘယ်​အကျင့်တွေက ပေါလုကို စိတ်​အနှောင့်အယှက် ဖြစ်စေ​သလဲ။ သူတို့ကို ပေါလု ဘာကြောင့် ဆက်​ဟောခဲ့​သလဲ။

^၁၅ တမန်တော် ၁၇:၁၆-၁၈ ကိုဖတ်ပါ။ အေ​သင်​မြို့မှာ ရုပ်တု​ကိုးကွယ်မှု၊ လိင်​အကျင့် ယိုယွင်းမှု၊ အယူမှား အတွေးအခေါ်​တွေ ပြည့်နေ​ပေမဲ့ အေ​သင်​မြို့သားတွေ​ကို ပေါလု လက်မလျှော့​ဘူး။ သူတို့ရဲ့ စော်ကား​ပြောဆိုမှု​ကြောင့် စိတ်ဓာတ်မကျ​ဘူး။ ပေါလု ကိုယ်တိုင်လည်း “ဘုရားကို စော်ကား​ပြောဆိုသူ၊ ညှဉ်းပန်း​နှိပ်စက်​သူ၊ ရိုင်းစိုင်း​သူ ဖြစ်ခဲ့တာ​တောင်” ခရစ်ယာန် ဖြစ်လာ​ခဲ့လို့​ပဲ။ (၁ တိ. ၁:၁၃) ပေါလုကို ယေရှု မြင်​သလို အေ​သင်​မြို့သားတွေ​ကိုလည်း တပည့်ဖြစ်​လာမယ့်​သူတွေ​အဖြစ် ပေါလု ရှုမြင်တယ်။ ပေါလုရဲ့ ရှုမြင်ချက် မမှား​ခဲ့​ပါဘူး။—တ. ၉:၁၃-၁၅။ ၁၇:၃၄။

၁၆-၁၇။ နောက်ခံ​အမျိုးမျိုး​က လူတွေ ခရစ်တော်ရဲ့ တပည့်ဖြစ်​လာနိုင်​မှန်း ဘာက ဖော်ပြသလဲ။ ဥပမာ​ပေးပါ။

^၁၆ ပထမရာစုမှာ နောက်ခံ​အမျိုးမျိုး ရှိတဲ့​လူတွေ ယေရှုရဲ့ တပည့် ဖြစ်လာကြတယ်။ ဂရိ​မြို့​တစ်မြို့​ဖြစ်တဲ့ ကောရိန္သု​မြို့က ခရစ်ယာန်တွေဆီ ပေါလု စာရေး​တဲ့အခါ အသင်းတော်​သား​တချို့ဟာ တစ်ချိန်က ရာဇဝတ်သားတွေ၊ အကျင့်​ပျက်​သူတွေ ဖြစ်ခဲ့တယ်လို့ ပြောတယ်။ အဲဒီနောက် “ခင်ဗျားတို့​ထဲ​က တချို့ဟာ အရင်က အဲဒီလို​လုပ်ခဲ့ကြတယ်။ အခုတော့ ဘုရားသခင်က ခင်ဗျားတို့ကို ဆေးကြော​သန့်စင်ပေး​လိုက်ပြီ” လို့ ဆက်ပြောတယ်။ (၁ ကော. ၆:၉-၁၁) သင်​ဆိုရင်ကော အဲဒီလို​လူတွေကို တပည့်ဖြစ်​လာမယ့်​သူတွေ​အဖြစ် ရှုမြင်​မလား။

^၁၇ ဒီနေ့ လူများစွာဟာ ယေရှုရဲ့ တပည့် ဖြစ်လာဖို့၊ အပြောင်းအလဲ​တွေ လုပ်ဖို့ လိုလိုလားလား ရှိကြတယ်။ ဥပမာ၊ ကျမ်းစာ​သတင်းစကားကို နောက်ခံ​အမျိုးမျိုး​က လူတွေ လက်ခံ​မှန်း ဩစတြေးလျ​က အထူး​ရှေ့ဆောင် ညီအစ်မ ယူကီနာ သတိပြုမိတယ်။ တစ်ခါ​က အင်္ကျီ​ပွပွ​ဝတ်​ထားပြီး တက်တူး​တွေ ထိုး​ထားတဲ့ အမျိုးသမီးငယ်​တစ်ယောက်ကို အကျိုးဆောင်​လုပ်ငန်း ရုံးခန်း​တစ်ခုမှာ တွေ့တယ်။  “ခဏလောက် တွေဝေ​မိ​ပေမဲ့ စကား​စပြော​လိုက်တယ်။ သူ​ထိုး​ထားတဲ့ တက်တူး​တချို့က ဆာလံကျမ်း​ထဲ​က စာသားတွေ ဖြစ်နေလို့ ကျမ်းစာကို စိတ်ဝင်စားသူ ဖြစ်မှန်း သိလိုက်​ရတယ်။ မကြာခင် အဲဒီ​အမျိုးသမီး ကျမ်းစာ စ​လေ့လာပြီး အစည်းအဝေးတွေ လိုက်​တက်တယ်” လို့ ယူကီနာ ပြောတယ်။ *

၁၈။ လူတွေကို ကြိုတင် အကဲဖြတ်တာ​မျိုး ဘာကြောင့် မ​လုပ်သင့်သလဲ။

^၁၈ ရိတ်​စ​ရာ စပါး​တွေ မှည့်ဝင်း​နေပြီ​လို့ ယေရှု ပြောတာက လူများစွာ မိမိ​နောက်ကို လိုက်မယ်​ဆိုပြီး မျှော်လင့်​လို့လား။ မဟုတ်ပါဘူး။ လူ​နည်းနည်း​ပဲ ယေရှုကို ယုံကြည်​မယ်​လို့ ကျမ်းစာမှာ ကြိုပြောထားတယ်။ (ယော. ၁၂:၃၇၊ ၃၈) ဒါ့အပြင် ယေရှုဟာ လူတွေရဲ့ စိတ်နှလုံးကို သိမြင်နိုင်စွမ်း ရှိတယ်။ (မ. ၉:၄) ဒါတောင် ယုံကြည်သူ​ဖြစ်လာမယ့် လူ​အနည်းငယ်​ကို အာရုံစိုက်​ရင်း တစ်ချိန်တည်းမှာ ယောက်​တိုင်း​ကို ထက်သန်​စွာ ဟောပြောတယ်။ ကျွန်တော်တို့​ကတော့ လူတွေရဲ့ စိတ်နှလုံးကို သိမြင်နိုင်စွမ်း မရှိဘူး။ ဒါကြောင့် ရပ်ကွက်​နဲ့ လူတွေကို ကြိုတင် အကဲမဖြတ်​သင့်​ဘူး။ လူတွေကို တပည့်ဖြစ်​လာနိုင်​သူတွေ​အဖြစ် ရှုမြင်​ရမယ်။ ဘာ​ကီ​နာ​ဖာ​ဆို​နိုင်ငံက သာသနာပြု မာ့ခ် ဒီလို​ပြောတယ်– “တိုးတက်လာ​မယ်​လို့ ကျွန်တော် ထင်ထား​သူတွေက လေ့လာမှု​ကို ရပ်​လိုက်ပြီး သိပ်​တိုးတက်​မှာ မဟုတ်ဘူးလို့ ထင်ထား​သူတွေက ပို​တိုးတက်လာ​တာ​မျိုး ရှိတယ်။ ဒါကြောင့် ယေဟောဝါရဲ့ စွမ်းအားတော်ကို ဦးဆောင်​ခွင့်ပြု​တာ​က ပို​ကောင်း​မှန်း သိလိုက်​ရတယ်။”

၁၉။ ရပ်ကွက်မှာ​ရှိတဲ့ လူတွေကို ဘယ်လို ရှုမြင်​သင့်သလဲ။

^၁၉ ဒီ​ရပ်ကွက်မှာ​တော့ ရိတ်သိမ်း​ဖို့ မှည့်ဝင်း​နေတဲ့ ကောက်နှံ​နဲ့​တူတဲ့ လူတွေ သိပ်​မရှိဘူးလို့ သင် တွေးမိ​နိုင်တယ်။ ဒါပေမဲ့ လယ်ကွင်း​မှာ ရိတ်​စ​ရာ စပါး​တွေ မှည့်ဝင်း​နေပြီ​လို့ တပည့်တွေကို ယေရှု ပြောခဲ့​ကြောင်း သတိရပါ။ လူတွေ ပြောင်းလဲ​ပြီး ခရစ်တော်ရဲ့ တပည့် ဖြစ်လာနိုင်တယ်။ သူတို့ကို တပည့်ဖြစ်​လာနိုင်​သူတွေ၊ “တန်ဖိုးရှိတဲ့​အရာတွေ” အဖြစ် ယေဟောဝါ ရှုမြင်တယ်။ (ဟဂ္ဂဲ ၂:၇) ယေဟောဝါနဲ့ ယေရှုရဲ့ အမြင်မျိုး ကျွန်တော်တို့မှာ ရှိမယ်ဆိုရင် လူတွေရဲ့ နောက်ခံ၊ စိတ်ဝင်စား​ရာတွေကို သိအောင် လုပ်ပါ​လိမ့်မယ်။ သူတို့ကို သူစိမ်း​တွေ​အဖြစ် မဟုတ်ဘဲ ညီအစ်ကို/မ ဖြစ်လာ​နိုင်​သူတွေ​အဖြစ် ရှုမြင်ပါ​လိမ့်မယ်။