ဘဝအတ္ထုပ္ပတ္တိ
အခက်အခဲတွေကို ခံရပ်ခြင်းက ကောင်းချီးတွေ ရရှိစေ
“တော်တော်ရက်စက်တဲ့ ဖခင်ပဲ။ ကိုယ်ဝန်ဆောင် ဇနီးနဲ့ လူမမယ် သမီးလေးကို ပစ်ထားရက်တယ်။ သူတို့ကို ဘယ်သူ ကျွေးမွေးစောင့်ရှောက်မလဲ။ မင်းရဲ့လုပ်ရပ်တွေကို စွန့်ပြီး အိမ်ပြန်တော့” လို့ ကေဂျီဘီ * အရာရှိက ကြိမ်းမောင်းတယ်။ “မိသားစုကို ပစ်ထားတာ မဟုတ်ရပါဘူး။ ကျွန်တော့်ကို ဖမ်းထားကြတာကိုး” လို့ပြန်ပြောတော့ အရာရှိက “သက်သေခံ ဖြစ်တာထက် ပိုဆိုးတဲ့ပြစ်မှု မရှိတော့ဘူး” လို့ပြောတယ်။
အဲဒီဖြစ်ရပ်ဟာ ၁၉၅၉၊ ရုရှားနိုင်ငံ၊ အီရကွတ်မြို့ အကျဉ်းထောင်မှာ ဖြစ်ခဲ့တာပါ။ ကျွန်တော်နဲ့ ဇနီး မာရီယာတို့ “ဖြောင့်မတ်သူတွေဖြစ်လို့ ဆင်းရဲဒုက္ခခံရ” ဖို့ ဘာကြောင့် ပြင်ဆင်ထားကြောင်း၊ ဆက်သစ္စာရှိလို့ ဘယ်လိုကောင်းချီးရကြောင်း ပြောပြပါရစေ။—၁ ပေ. ၃:၁၃၊ ၁၄။
၁၉၃၃ ခုနှစ်၊ ယူကရိန်းနိုင်ငံ၊ ဇိုလွတ်နီကီရွာမှာ ကျွန်တော် မွေးဖွားလာတယ်။ ၁၉၃၇ ခုနှစ်မှာ သက်သေခံ အဒေါ်နဲ့ ဦးလေးက ပြင်သစ်ကနေ လာလည်ပြီး ကင်းမျှော်စင်အသင်းထုတ် အစိုးရ နဲ့ လွတ်မြောက်ခြင်း စာအုပ်တွေ ပေးခဲ့တယ်။ အဖေ အဲဒီစာအုပ်တွေ ဖတ်ပြီး ယုံကြည်ခြင်းမှာ နိုးကြားလာတယ်။ ဒါပေမဲ့ ၁၉၃၉ ခုနှစ်မှာ မကျန်းမမာ ဖြစ်လာတယ်။ မသေဆုံးခင် “ဒါ အမှန်တရားပဲ။ ကလေးတွေကို သင်ပေး” လို့ အမေ့ကို ပြောသွားတယ်။
ဟောပြောရမယ့် နေရာသစ် ဆိုက်ဘေးရီးယား
၁၉၅၁၊ ဧပြီလမှာ အာဏာပိုင်တွေက ဆိုဗီယက်ပြည်ထောင်စု အနောက်ပိုင်းက သက်သေခံတွေကို ဆိုက်ဘေးရီးယားဘက် စတင်နယ်နှင်တယ်။ အမေ၊ ညီလေး ဂရက်ဂရီနဲ့ ကျွန်တော် အနောက်ယူကရိန်းကနေ နယ်နှင်ခံရတယ်။ ရထားနဲ့ မိုင် ၃,၇၀၀ (ကီလိုမီတာ ၆,၀၀၀) ကျော် ခရီးနှင်ပြီးနောက် ဆိုက်ဘေးရီးယား၊ တူလွန်မြို့ကို ရောက်လာတယ်။ နှစ်ပတ်ကြာတော့ အစ်ကို ဘော်ဂဒန်က အန်ဂတ်မြို့နားက စခန်းကို ရောက်လာတယ်။ အလုပ်ကြမ်းနဲ့ ထောင်ဒဏ် ၂၅ နှစ် ချမှတ်ခံရတယ်။
အမေ၊ ဂရက်ဂရီနဲ့ ကျွန်တော်တို့ တူလွန်မြို့ပတ်ဝန်းကျင် ရွာတွေမှာ ဟောကြတယ်။ ကြံရည်ဖန်ရည်တော့ ရှိရတယ်။ ဥပမာ၊ “နွားရောင်းချင်တဲ့သူ ရှိလား” လို့မေးတယ်။ ရောင်းချင်တဲ့သူ တွေ့တဲ့အခါ နွားတွေကို အံ့ဖွယ်နည်းနဲ့ ပုံစံပြုထားကြောင်း ရှင်းပြတယ်။ ပြီးတော့ ဖန်ဆင်းရှင်အကြောင်း ပြောကြတယ်။ အဲဒီအချိန်မှာ သတင်းစာက သက်သေခံတွေ နွားအကြောင်း မေးပေမဲ့ သိုးရှာနေကြတာလို့ ရေးတယ်။ သိုးလိုလူတွေကို တကယ် တွေ့ခဲ့ပါတယ်။ ခန့်အပ်မခံရတဲ့ အဲဒီဒေသမှာ နှိမ့်ချ၊ ဧည့်ဝတ်ကျေပွန်သူတွေနဲ့ ကျမ်းစာ လေ့လာခွင့်ရလို့ ဝမ်းသာစရာပဲ။ ဒီနေ့ တူလွန်မြို့မှာ ကြေညာသူ ၁၀၀ ကျော်တဲ့ အသင်းတော်တစ်ခု ရှိနေပြီ။
မာရီယာ ယုံကြည်ခြင်း စမ်းသပ်ခံရ
ဒုတိယကမ္ဘာစစ် ဖြစ်နေချိန်အတွင်း ယူကရိန်းမှာ ကျွန်တော့်ဇနီး မာရီယာ အမှန်တရား သိရှိလာတယ်။ အသက် ၁၈ နှစ်အရွယ်မှာ ကေဂျီဘီအရာရှိက သူ့ကို နှောင့်ယှက်ပြီး အတူနေဖို့ သွေးဆောင်ပေမဲ့ ပြတ်ပြတ်သားသား ငြင်းဆိုခဲ့တယ်။ တစ်နေ့ အိမ်ပြန်လာတော့ အရာရှိက မာရီယာရဲ့ အိပ်ရာပေါ် လှဲနေတယ်။ မာရီယာ ထွက်ပြေးပါလေရော။ သက်သေခံဖြစ်လို့ ထောင်ချမယ်လို့ အရာရှိ ဒေါသတကြီး ခြိမ်းခြောက်တယ်။ တကယ်ပဲ ၁၉၅၂ ခုနှစ်မှာ ထောင်ဒဏ် ဆယ်နှစ် ကျတယ်။ သမာဓိစောင့်ထိန်းလို့ ထောင်ကျခဲ့တဲ့ ယောသပ်လို ခံစားရတယ်။ (က. ၃၉:၁၂၊ ၂၀) တရားရုံးကနေ ထောင်ကို ပို့ပေးတဲ့ ကားသမားက “မကြောက်ပါနဲ့။ ထောင်ထဲကနေ သိက္ခာရှိရှိ ပြန်ထွက်လာတဲ့သူတွေ အများကြီးပဲ” လို့ပြောတယ်။ အဲဒီစကားတွေက မာရီယာကို အားရှိစေခဲ့တယ်။
၁၉၅၂ ကနေ ၁၉၅၆ အထိ ရုရှားနိုင်ငံ၊ ဂေါ်ကီမြို့ (အခု နီဇနီ နိုဂိုရော့) နားက အလုပ်ကြမ်းစခန်းမှာ မာရီယာ နေခဲ့တယ်။ အေးခဲနေတဲ့ ရာသီဥတုမှာတောင် သစ်ပင်တွေ ခုတ်လှဲရတယ်။ ကျန်းမာရေး မကောင်းလို့ ၁၉၅၆ မှာ လွတ်လာပြီး တူလွန်မြို့ကို သွားခဲ့တယ်။
ဇနီး၊ သားသမီးတွေနဲ့ ဝေးကွာ
တူလွန်မြို့က ညီအစ်ကိုတစ်ယောက်က ညီအစ်မတစ်ယောက် လာမယ်ပြောလို့ အထုပ်တွေ ဝိုင်းသယ်ပေးရအောင် ကားဂိတ်ကို ကျွန်တော် စက်ဘီးနဲ့ ထွက်လာတယ်။ မာရီယာကို တွေ့တော့ မြင်မြင်ချင်း ချစ်မိတယ်။ ပြန်ချစ်လာအောင် အတော်ကြိုးစားရပေမဲ့ အောင်မြင်ခဲ့ပါတယ်။ ၁၉၅၇ ခုနှစ်မှာ ကျွန်တော်တို့ လက်ထပ်လိုက်တယ်။ တစ်နှစ်ကြာတော့ သမီး အီရီနာ မွေးလာတယ်။ ဒါပေမဲ့ သိပ်ကြာကြာ မပျော်လိုက်ရဘူး။ ၁၉၅၉ ခုနှစ်မှာ ကျမ်းစာစာပေ ပုံနှိပ်လို့ ဖမ်းဆီးခံရတယ်။ နှစ်ဝက်လောက် တိုက်ပိတ်ခံရတယ်။ အဲဒီအတောအတွင်း စိတ်ငြိမ်သက်ဖို့ ဆုတောင်း၊ နိုင်ငံတော်သီချင်းတွေ ဆိုပြီး ပြန်လွတ်လာရင် ဘယ်လို ဟောမယ်ဆိုတာ စဉ်းစားခဲ့တယ်။
၁၉၆၂၊ အလုပ်ကြမ်းစခန်းမှာ
ထောင်ထဲ စစ်ကြောမေးမြန်းခံရချိန်မှာ မေးမြန်းသူက “မကြာခင် မင်းတို့ကို ကြွက်ရှင်းသလို ရှင်းပစ်တော့မယ်ကွ” လို့ အော်ပြောတယ်။ “နိုင်ငံတော် သတင်းကောင်းကို မြေတစ်ပြင်လုံးမှာ ဟောရမယ်လို့ ယေရှု မိန့်မှာထားတယ်။ ဘယ်သူမှ တားဆီးနိုင်မှာ မဟုတ်ဘူး” လို့ ကျွန်တော် ပြန်ပြောလိုက်တယ်။ အဲဒီအခါ အစမှာ ပြောခဲ့တဲ့အတိုင်း မေးမြန်းသူက ပရိယာယ် ပြောင်းပြီး ကျွန်တော့်ယုံကြည်ခြင်းကို စွန့်လွှတ်ဖို့ သွေးဆောင်ခဲ့တယ်။ ခြောက်မရ၊ ချော့မရတဲ့အဆုံး ဆာရန်မြို့နားက အလုပ်ကြမ်းစခန်းမှာ အလုပ်ကြမ်းနဲ့ ထောင်ဒဏ် ခုနစ်နှစ် ချခဲ့တယ်။ စခန်းကို သွားနေတုန်း ဒုတိယသမီး အိုလဂါ မွေးပြီဆိုတာ သိခဲ့ရတယ်။ ဇနီး၊ သမီးတွေနဲ့ ဝေးနေပေမဲ့ မာရီယာနဲ့ ကျွန်တော် ယေဟောဝါအပေါ် သစ္စာစောင့်သိနေတယ်ဆိုတဲ့ အသိစိတ်ကြောင့် နှစ်သိမ့်မှု ရခဲ့တယ်။
၁၉၆၅ မှာ မာရီယာနဲ့ သမီး အိုလဂါ၊ အီရီနာ
တူလွန်မြို့ကနေ ဆာရန်မြို့ကို ရထားနဲ့ အသွားအပြန် ၁၂ ရက် ကြာပေမဲ့ မာရီယာ တစ်နှစ်တစ်ခါ ကျွန်တော့်ဆီ လာလည်တယ်။ နှစ်တိုင်း ဖိနပ်အသစ်တစ်ရံ ယူလာလေ့ရှိတယ်။ ဖိနပ်ခွာထဲမှာ ကင်းမျှော်စင် အသစ်တွေ ဝှက်ထားတယ်။ တစ်နှစ်မှာတော့ သမီးနှစ်ယောက်ကို ခေါ်လာတဲ့အတွက် အထူးနှစ်ပဲ။ သူတို့ကို တွေ့ခွင့်ရလို့ ဝမ်းသာလိုက်တာ။
နယ်မြေသစ်၊ အခက်အခဲသစ်
၁၉၆၆ ခုနှစ်မှာ အလုပ်ကြမ်းစခန်းကနေ လွတ်လာတယ်။ ကျွန်တော်တို့လေးယောက် ပင်လယ်နက်နားက အာမဗီမြို့ကို ပြောင်းရွှေ့ခဲ့တယ်။ အဲဒီမှာ သား ယာရိုဆလပ်နဲ့ ပါဗယ်တို့ မွေးတယ်။
မကြာခင်မှာပဲ ကေဂျီဘီအရာရှိတွေ အိမ်ထဲ ဝင်စီးပြီး ကျမ်းစာစာပေတွေ ရှာကြတယ်။ နေရာအနှံ့ရှာတာ နွားစားခွက်တောင် မကျန်ဘူး။ အဲဒီတုန်းက ရဲတွေ ပူလွန်းလို့ ချွေးတွေ ရွှဲနေတာပဲ။ ဝတ်စုံတွေလည်း ဖုန်တွေနဲ့။ မာရီယာက သူတို့ကို သနားမိတယ်။ သူတို့လည်း အမိန့်အတိုင်း နာခံနေကြတာပါ။ ဒါနဲ့ ဖျော်ရည်တိုက်ပြီး ဖုန်တွေ ခါဖို့ ဘရွတ်၊ ရေဇလုံ၊ တဘက်တွေ ယူလာပေးတယ်။ ရဲမှူး ရောက်လာတော့ ရဲတွေက သူတို့ကို မာရီယာ ကောင်းကောင်း ဆက်ဆံတဲ့အကြောင်း ပြောပြတယ်။ ပြန်တဲ့အခါ ရဲမှူးက ရယ်ပြီး လက်ပြသွားတယ်။ “အကောင်းနဲ့ တုံ့ပြန်ပြီး အဆိုးကို အမြဲအနိုင်ယူ” တဲ့ရလဒ်ကို မြင်ရလို့ ဝမ်းသာခဲ့ရတယ်။—အဖမ်းအဆီးတွေကြား အာမဗီမြို့မှာ ဆက်ဟောပြောကြတယ်။ အနီးအနား ကူရဂါနစ်မြို့က ကြေညာသူ အုပ်စုလေးကိုလည်း အားပေးနိုင်ခဲ့တယ်။ အခု အာမဗီမြို့မှာ အသင်းတော် ခြောက်ခု၊ ကူရဂါနစ်မြို့မှာ လေးခု ရှိနေတာ မြင်ရလို့ ဝမ်းသာလိုက်တာ။
နှစ်တွေတစ်လျှောက် ယုံကြည်ခြင်း အားနည်းတဲ့အချိန်လည်း ရှိခဲ့တယ်။ ဒါပေမဲ့ သစ္စာရှိညီအစ်ကိုတွေကို သုံးပြီး ယေဟောဝါ တည့်မတ်အားပေးခဲ့လို့ ကျေးဇူးတင်စရာပဲ။ (ဆာ. ၁၃၀:၃) အသင်းတော်တွေထဲ မသိမသာ စိမ့်ဝင်လာတဲ့ ကေဂျီဘီတွေကလည်း တကယ့်စမ်းသပ်မှုပဲ။ အမှုဆောင်လုပ်ငန်းမှာ တက်ကြွထက်သန်တဲ့ပုံ ဖမ်းကြတယ်။ တချို့ဆိုရင် အဖွဲ့အစည်းမှာ တာဝန်ကြီးတွေတောင် ရရှိကြတယ်။ အချိန်တန်တော့လည်း သရုပ်မှန် ပေါ်လာတာပါပဲ။
၁၉၇၈၊ မာရီယာ အသက် ၄၅ နှစ်မှာ ကိုယ်ဝန် ရှိလာပြန်တယ်။ နာတာရှည် နှလုံးရောဂါကြောင့် အသက်အန္တရာယ် ရှိတယ်ဆိုပြီး ကလေးဖျက်ချဖို့ ဆရာဝန်တွေ တွန်းအားပေးကြတယ်။ မာရီယာ မဖျက်ချခဲ့ဘူး။ ဒါကြောင့် ဆရာဝန်တချို့က အချိန်မတန်ဘဲ မွေးလာအောင် ဆေးထိုးဖို့ ဆေးထိုးအပ် ကိုင်ပြီး မာရီယာနောက် တကောက်ကောက် လိုက်ကြတယ်။ မမွေးသေးတဲ့ကလေးကို ကာကွယ်ဖို့ မာရီယာ ဆေးရုံကနေ ထွက်ပြေးခဲ့ရတယ်။
မြို့ကနေ ထွက်သွားဖို့ ကေဂျီဘီ အမိန့်ပေးတယ်။ ဒါနဲ့ ဆိုဗီယက် ပြည်ထောင်စုပိုင်နက် အက်စ်တိုးနီးယားနိုင်ငံ၊ တာလင်းမြို့နားက ရွာလေးကို ပြောင်းရွှေ့ကြတယ်။ ဆရာဝန်တွေ ထင်သလို မဟုတ်ဘဲ ကျန်းမာတဲ့ သားလေး ဗီတာလီကို တာလင်းမြို့မှာ မွေးဖွားခဲ့တယ်။
နောက်ပိုင်း အက်စ်တိုးနီးယားကနေ ရုရှားတောင်ပိုင်းက နီဇလိုနာယာရွာကို ပြောင်းရွှေ့ခဲ့တယ်။ တစ်နိုင်ငံလုံးကလူတွေ လာလည်ပတ်တဲ့ အနီးအနား အပန်းဖြေမြို့တွေမှာ သတိရှိရှိ ဟောပြောကြတယ်။ ကျန်းမာရေးအတွက် ရောက်လာတာ ဖြစ်ပေမဲ့ ထာဝရအသက် မျှော်လင့်ချက်နဲ့ တချို့ ပြန်သွားကြတယ်။
ယေဟောဝါကို ချစ်ဖို့ သားသမီးတွေကို ပျိုးထောင်ခြင်း
ယေဟောဝါကို ချစ်လာဖို့၊ ဝတ်ပြုချင်စိတ် ရှိလာဖို့ သားသမီးတွေကို ကျွန်တော်တို့ သွန်သင်ပေးတယ်။ သားသမီးတွေအပေါ် ကောင်းမွန်တဲ့ဩဇာ သက်ရောက်စေမယ့် ညီအစ်ကိုတွေကို မကြာခဏ ဖိတ်ခေါ်တယ်။ အဲဒီမှာ ၁၉၇၀ ကနေ ၁၉၉၅ အထိ နယ်လှည့်ကြီးကြပ်မှူးအဖြစ် အမှုဆောင်ခဲ့တဲ့ ညီလေး ဂရက်ဂရီလည်း ပါတယ်။ ပျော်ပျော်နေတတ်ပြီး ဟာသဉာဏ်ရှိတဲ့အတွက် သူလာလည်ရင် တစ်မိသားစုလုံး ပျော်ကြတယ်။ ဧည့်သည်တွေ လာတဲ့အခါ ကျမ်းစာဂိမ်းတွေ ကစားလေ့ရှိလို့ ကျမ်းစာသမိုင်းမှတ်တမ်းတွေကို သားသမီးတွေ မြတ်နိုးလာတယ်။
သားတွေနဲ့ ချွေးမတွေ
ဝဲမှ ယာ၊ နောက်တန်း– ယာရိုဆလပ်၊ ပါဗယ်၊ ဗီတာလီ
ရှေ့တန်း– အလီယိုနာ၊ ရာယာ၊ ဆဗက်လာနာ
၁၉၈၇ ခုနှစ်မှာ သားယာရိုဆလပ်က ပိုလွတ်လွတ်လပ်လပ် ဟောပြောနိုင်မယ့် လတ်ဗီးယားနိုင်ငံ၊ ရီဂါမြို့ကို ပြောင်းရွှေ့
သွားတယ်။ ဒါပေမဲ့ စစ်မှုမထမ်းလို့ တစ်နှစ်ခွဲ ထောင်ကျပြီး ထောင်ကိုးခု ပြောင်းခဲ့ရတယ်။ ကျွန်တော် ပြောပြထားတဲ့ ထောင်အတွေ့အကြုံတွေက ခံနိုင်ရည်ရှိဖို့ သူ့ကို ကူညီပေးခဲ့တယ်။ နောက်ပိုင်း ရှေ့ဆောင်အဖြစ် အမှုဆောင်ခဲ့တယ်။ သားပါဗယ်ဟာ ၁၉၉၀၊ အသက် ၁၉ နှစ်အရွယ်မှာ ဂျပန်နိုင်ငံမြောက်ပိုင်း ဆာခါလင်းကျွန်းမှာ ရှေ့ဆောင် သွားလုပ်ချင်တယ်။ အစပိုင်းမှာ ကျွန်တော်တို့ မသွားစေချင်ဘူး။ တစ်ကျွန်းလုံးမှာ ကြေညာသူ ၂၀ ပဲရှိတယ်။ ကျွန်တော်တို့နဲ့ မိုင် ၅,၅၀၀ (ကီလိုမီတာ ၉,၀၀၀) ဝေးတယ်။ နောက်ပိုင်းတော့ သဘောတူလိုက်ပါတယ်။ ဆုံးဖြတ်ချက် မှန်သွားတယ်။ နိုင်ငံတော်သတင်းကို လူတွေ တုံ့ပြန်ကြတယ်။ နှစ်အနည်းငယ်အတွင်း အသင်းတော် ရှစ်ခု ဖြစ်လာတယ်။ ၁၉၉၅ ခုနှစ်အထိ ဆာခါလင်းကျွန်းမှာ ပါဗယ် အမှုဆောင်တယ်။ ဒီလိုနဲ့ အိမ်မှာ အငယ်ဆုံးသား ဗီတာလီပဲ ကျန်တော့တယ်။ ကလေးဘဝကတည်းက ကျမ်းစာဖတ်ရတာကို သူကြိုက်တယ်။ အသက် ၁၄ နှစ်မှာ ရှေ့ဆောင် စလုပ်ပြီး ကျွန်တော်လည်း သူနဲ့အတူ နှစ်နှစ် ရှေ့ဆောင်လုပ်ခဲ့တယ်။ သိပ်ပျော်စရာကောင်းတဲ့အချိန်ပါပဲ။ ဗီတာလီ အသက် ၁၉ နှစ်မှာ အထူးရှေ့ဆောင်အဖြစ် အမှုဆောင်ဖို့ ထွက်သွားတယ်။၁၉၅၂ ခုနှစ်တုန်းက ကေဂျီဘီအရာရှိက “ယုံကြည်ခြင်းကို စွန့်မလား၊ ထောင်ဒဏ် ဆယ်နှစ် ကျခံမလား။ အသက်ကြီး၊ အထီးကျန်တော့မှ ထောင်က လွတ်လိမ့်မယ်” လို့ မာရီယာကို ပြောတယ်။ ဒါပေမဲ့ အဲဒီလို မဖြစ်ခဲ့ပါဘူး။ သစ္စာရှိတဲ့ဘုရား ယေဟောဝါ၊ သားသမီးတွေ၊ အမှန်တရား တွေ့အောင် ကျွန်တော်တို့ ကူညီပေးခဲ့သူတွေရဲ့ မေတ္တာကို ခံစားနေရပါတယ်။ သားသမီးတွေ အမှုဆောင်တဲ့နေရာကို ကျွန်တော်တို့ လည်ပတ်ရတာ ပျော်တယ်။ ယေဟောဝါအကြောင်း သိလာအောင် သားသမီးတွေ ကူညီပေးခဲ့သူတွေရဲ့ ကျေးဇူးသိတတ်မှုကို တွေ့ရတယ်။
ယေဟောဝါရဲ့ ကောင်းမြတ်မှုအတွက် ကျေးဇူးတင်
၁၉၉၁ ခုနှစ်မှာ ယေဟောဝါသက်သေတွေရဲ့ လုပ်ငန်း တရားဝင် အသိအမှတ်ပြုခံရတယ်။ ဟောပြောဖို့ အားသစ်အင်သစ်တွေ ပြန်ရလာတယ်။ စနေ၊ တနင်္ဂနွေနေ့တွေမှာ အနီးအနား မြို့ရွာတွေကို သွားဟောနိုင်ဖို့ ကျွန်တော်တို့အသင်းတော်က ဘတ်စကားတစ်စီးတောင် ဝယ်ထားတယ်။
၂၀၁၁ မှာ ဇနီးနဲ့အတူ
ယာရိုဆလပ်နဲ့ ဇနီး အလီယိုနာ၊ ပါဗယ်နဲ့ ဇနီး ရာယာတို့ ဗေသလမှာ အမှုဆောင်နေပြီး ဗီတာလီနဲ့ ဇနီး ဆဗက်လာနာတို့ တိုက်နယ်လုပ်ငန်းမှာ အမှုဆောင်နေတာ မြင်ရလို့ သိပ်ပျော်တယ်။ သမီးကြီး အီရီနာနဲ့ မိသားစုက ဂျာမနီမှာ နေကြတယ်။ သူ့ခင်ပွန်း ဗလာဒီမာနဲ့ သားသုံးယောက်စလုံး အကြီးအကဲအဖြစ် အမှုဆောင်နေကြတယ်။ သမီးငယ် အိုလဂါက အက်စ်တိုးနီးယားမှာ နေပြီး ပုံမှန် ဖုန်းဆက်တယ်။ ၂၀၁၄ မှာ ချစ်ဇနီး မာရီယာ သေဆုံးသွားလို့ ဝမ်းနည်းခဲ့ရတယ်။ ရှင်ပြန်ထမြောက်လာမယ့်သူ့ကို မြင်ချင်လှပြီ။ အခု ကျွန်တော် ဘယ်လဂိုရော့မြို့မှာ နေတယ်။ ဒီက ညီအစ်ကိုတွေ အများကြီး ကူညီပေးကြတယ်။
ယေဟောဝါကို ဝတ်ပြုခဲ့တဲ့ နှစ်တွေတစ်လျှောက် သမာဓိ စောင့်ထိန်းဖို့ ပေးဆက်ရတာ ရှိပေမဲ့ ယေဟောဝါ ပြန်ပေးတဲ့ စိတ်ငြိမ်သက်မှုကတော့ တန်ဖိုးမဖြတ်နိုင်မှန်း သိရှိခဲ့ရတယ်။ သစ္စာစောင့်သိမှုကြောင့် မာရီယာနဲ့ ကျွန်တော် ရရှိတဲ့ ကောင်းချီးတွေဟာ ထင်ထားတာထက် ပိုများပါတယ်။ ဆိုဗီယက်ပြည်ထောင်စု ပြိုကွဲသွားတဲ့ ၁၉၉၁ ခုနှစ် မတိုင်ခင်က ကြေညာသူ ၄၀,၀၀၀ ကျော်ပဲ ရှိခဲ့တယ်။ အခု ဆိုဗီယက်ပြည်ထောင်စုပိုင်နက် နိုင်ငံတွေမှာ ကြေညာသူ ၄၀၀,၀၀၀ ကျော် ရှိနေပြီ။ ကျွန်တော့်အသက် ၈၃ နှစ် ရှိပြီ။ အကြီးအကဲအဖြစ် အမှုဆောင်နေတုန်းပဲ။ ယေဟောဝါ ပေးတဲ့ ခွန်အားကြောင့် ကျွန်တော် အမြဲ ခံရပ်နိုင်ခဲ့တယ်။ မှန်ပါတယ်၊ ကျွန်တော့်ကို ယေဟောဝါ ကြွယ်ဝစွာ ဆုချပါတယ်။—ဆာ. ၁၃:၅၊ ၆။
^ စာပိုဒ်၊ 4 ကေဂျီဘီဆိုတာ ဆိုဗီယက် အစိုးရလုံခြုံရေး ကော်မတီရဲ့ အတိုကောက်။