ဘုရားသခင်​ဟာ လူသားတွေကို ဖန်ဆင်း​ချိန်​ကစပြီး ကောင်းကင်တမန်​တွေ၊ ပရောဖက်​တွေ​က​တစ်ဆင့် လူတွေနဲ့ ဆက်သွယ်​တယ်။ အဲဒီအပြင် မိမိရဲ့ သတင်း​စကား​တွေ၊ ကတိတော်​တွေ​ကို ရေးသား​ပြီး မှတ်တမ်းတင်​စေတယ်။ ပျော်ရွှင်ဖွယ် အနာဂတ်​ ရှိတယ်လို့ ဘုရား​ ကတိပေး​ထား​တယ်။ ဒါဆို အခု​ချိန်မှာ ဘုရားသခင့်​ကတိ​တွေ​ကို ဘယ်မှာ တွေ့​နိုင်​သလဲ။

ဘုရားသခင့် သတင်း​စကား​တွေ​ကို သမ္မာကျမ်းစာ​ထဲမှာ တွေ့နိုင်တယ်။ (၂ တိမောသေ ၃:၁၆) ဘုရား​ရဲ့​ သတင်း​စကား​တွေ​ကို ပရောဖက်​တွေ ဘယ်လို ရေးသားခဲ့​ကြသလဲ။ (၂ ပေတရု ၁:၂၁) ဘုရားသခင်​က မိမိရဲ့​ အတွေး​တွေ​ကို ကျမ်း​ရေးသူတွေ​စိတ်ထဲ ထည့်​ပေး​ပြီး ချရေး​စေတယ်။ ဥပမာ​ပြော​ရ​ရင် စီးပွားရေး​လုပ်ငန်းရှင် တစ်ယောက်က သူ့ကိုယ်စား အတွင်းရေးမှူး​ကို စာရေး​ခိုင်းတယ်။ အဲဒီ​စာ​ကို စီးပွားရေး​လုပ်ငန်းရှင်​ရဲ့​ စာ​လို့​ပဲ ကျွန်တော်​တို့ သတ်မှတ်တယ်။ အဲဒီလိုပဲ ဘုရားသခင်​က မိမိရဲ့​ သတင်းစကားကို ရေး​ဖို့ လူတွေကို သုံး​ပေမဲ့ ကျမ်းစာ​ရဲ့​ အာဘော်ရှင်​က​တော့ ဘုရားသခင်​ပါ​ပဲ။

ဘုရားသခင့်​ သတင်း​စကား​က သိပ်​အရေးကြီး​လို့ ဘုရား​က လူတိုင်းကို ဖတ်​စေ​ချင်၊ နားလည်​စေချင်တယ်။ အခုချိန်မှာ “ထာဝရ​သတင်းကောင်း” ကို “လူမျိုး၊ လူမျိုးနွယ်၊ ဘာသာ​စကား​အမျိုးမျိုး ပြော​တဲ့​လူတွေ” အလွယ်တကူ ရနိုင်​ပြီ။ (ဗျာဒိတ် ၁၄:၆) သမ္မာကျမ်းစာ​ကို ဘာသာ​စကား ၃,၀၀၀ ကျော်​နဲ့ ဖတ်​နိုင်ပြီ။ ကမ္ဘာ​ပေါ်မှာ အဲဒီလောက်​များတဲ့ ဘာသာ​စကား​နဲ့ ဘာသာပြန်​ထား​တဲ့ စာအုပ် မရှိဘူး။