သမ္မာကျမ်းစာ ပြောင်းလဲသွားပြီလား
သမ္မာကျမ်းစာ ပြောင်းလဲသွားပြီလားလို့ တချို့က စဉ်းစားကြမယ်။ ပရောဖက် ဟေရှာယက “ဘုရားသခင်ရဲ့ နှုတ်ထွက်စကားကတော့ ထာဝစဉ် တည်မြဲတယ်” လို့ ရေးခဲ့တယ်။ (ဟေရှာယ ၄၀:၈) ဘုရားရဲ့ ကတိစကားတွေ အခုချိန်ထိ နဂိုအတိုင်းပဲ မှန်ကန်နေတယ်ဆိုတာ ဘာကြောင့် ယုံကြည်စိတ်ချနိုင်သလဲ။
သမ္မာကျမ်းစာကို အမှားအယွင်းမရှိ နဂိုမူလအတိုင်း ဆက်တည်ရှိစေနိုင်တဲ့ တန်ခိုး ဘုရားသခင်မှာ ရှိတယ်။ ရှေးခေတ်တုန်းက ကျမ်းစာကူးရေးသူတွေဟာ ကျမ်းစာသားတွေ ထပ်မထည့်မိအောင်၊ မပြောင်းမိအောင်၊ မဖြုတ်မိအောင် စာလုံးတွေကို ရေတွက်ခဲ့ကြတယ်။ ဒါပေမဲ့ အမှားမကင်းတဲ့ လူသားတွေ ဖြစ်လို့ ကျမ်းစာကူးရေးသူတချို့က မဆိုစလောက် အမှားလေးတွေ လုပ်မိခဲ့ကြတယ်။
အခုခေတ် သမ္မာကျမ်းစာမှာ ဘုရားရဲ့ မူလသတင်းစကားတွေ ပါတယ်လို့ ဘာကြောင့် အသေအချာ ပြောနိုင်သလဲ
သမ္မာကျမ်းစာ ရှေးဟောင်းလက်ရေးစာမူတွေ ထောင်နဲ့ချီ ရှိတယ်။ စာမူတစ်ခုက နည်းနည်းလေး လွဲနေတယ်ဆိုရင် တခြားစာမူတွေနဲ့ တိုက်ကြည့်လိုက်တဲ့အခါ မှားနေတဲ့နေရာကို သိနိုင်တယ်။—ပိုသိချင်တယ်ဆိုရင် jw.org ထဲက “သမ္မာကျမ်းစာကို ပြုပြင်ပြောင်းလဲခဲ့သလား” ဆောင်းပါးကို ကြည့်ပါ။
ဥပမာ၊ ၁၉၄၇ ခုနှစ်မှာ ဘက်ဒိုဝင်တွေဟာ ပင်လယ်သေအနားက ဂူတွေမှာ ပင်လယ်သေကျမ်းလိပ်လို့ ခေါ်တဲ့ ရှေးလက်ရေးစာမူတွေကို ရှာဖွေတွေ့ရှိခဲ့တယ်။ အဲဒီ ရှေးဟောင်းလက်ရေးစာမူတွေမှာ လွန်ခဲ့တဲ့ အနှစ် ၂,၀၀၀ ကျော်က ကျမ်းစာအပိုင်းတွေ ပါတယ်။ ပညာရှင်တွေက အခုခေတ် ကျမ်းစာနဲ့ အဲဒီရှေးဟောင်းစာမူတွေကို နှိုင်းယှဉ်ကြည့်ခဲ့ကြတယ်။ ဘာတွေ့သလဲ။
ရှေးဟောင်းစာမူတွေကို သေသေချာချာ စစ်ဆေးကြည့်လိုက်တဲ့အခါ အခုခေတ် ကျွန်တော်တို့မှာရှိတဲ့ သမ္မာကျမ်းစာဟာ မူရင်းကျမ်းစာနဲ့ အတူတူပဲဆိုတာ တွေ့ရှိခဲ့တယ်။ * သမ္မာကျမ်းစာမှာပါတဲ့ အချက်တွေကို ဘုရားသခင် သေသေချာချာ ထိန်းသိမ်းထားတယ်ဆိုတာ ယုံကြည်စိတ်ချနိုင်ပါတယ်။
ဒါကြောင့် သမ္မာကျမ်းစာဟာ တိကျမှန်ကန်တယ်လို့ အပြည့်အဝ ယုံကြည်စိတ်ချပြီး ဖတ်ရှုနိုင်ပါတယ်။ ပရောဖက်တွေဆီကနေ ဘုရားသခင်အကြောင်း ဘာသင်ယူနိုင်သလဲဆိုတာကို နောက်ဆောင်းပါးမှာ ဖတ်ကြည့်ကြစို့။
^ အပိုဒ်၊ 7 The Complete Dead Sea Scrolls in English, by Geza Vermes, စာမျက်နှာ ၁၆။