ကျွန်တော်​တို့​ရဲ့ အတွေး​တွေ​ကို ဘုရားသခင် အလေးထားတယ်။ (ယေရမိ ၁၇:၁၀) မုန်းတီးတဲ့​သဘော​နဲ့ ပြော​တာ၊ လုပ်တာကို ရှောင်​ရမယ့်​အပြင် နောက်ထပ် လုပ်စရာ ရှိသေးတယ်။ မုန်းတီးမှု သံသရာ​က စိတ်နှလုံး​ထဲ​ကနေ အစပြု​တယ်။ ဒါကြောင့် မုန်းတီးတဲ့​အတွေး၊ ခံစားချက်​တွေ​ကို စိတ်နှလုံး​ထဲ​ကနေ နည်းနည်းမှ​ မကျန် ထုတ်ပစ်​ရမယ်။ ဒါမှ စိတ်​သဘောကို အမှန်တကယ် “ပြုပြင်​ပြောင်းလဲ” နိုင်​ပြီး မုန်းတီးမှု သံသရာ​ကို ချေဖျက်​နိုင်​မယ်။

အထူးသဖြင့် လူမျိုး​မတူ၊ နိုင်ငံ​မတူတဲ့​သူတွေကို ဘယ်လို သဘောထား​တယ်​ဆိုတာ ကိုယ့်ကိုယ်ကိုယ် ရိုးရိုးသားသား ဆန်းစစ်​ပါ။ ဒီလို​မေးပါ– ‘သူတို့ကို ငါဘယ်လို မြင်သလဲ။ ငါ​ကိုယ်တိုင် သိထားတဲ့​အချက်​အပေါ် အခြေခံ​ပြီး သူတို့ကို ရှုမြင်​သလား။ ဒါမှ​မဟုတ် သူတို့​အပေါ် မလိုမုန်းထား​စိတ် ရှိနေ​သလား။’ မုန်းတီးမှု​နဲ့ အကြမ်းဖက်မှု​အကြောင်း တင်ဆက်​ထား​တဲ့ လူမှု​မီဒီယာ၊ ရုပ်ရှင်၊ ဖျော်ဖြေမှု​တွေ​ကို ရှောင်ပါ။

ကိုယ့်ရဲ့ အတွေး​နဲ့ ခံစားချက်​တွေ​ကို အမှန်အတိုင်း အကဲဖြတ်ဖို့ အမြဲတော့ မလွယ်​ဘူး။ ဒါပေမဲ့ သမ္မာကျမ်းစာ​က ကိုယ့်ရဲ့ “စိတ်နှလုံး​ထဲ​က အတွေး​တွေ၊ အကြံအစည်​တွေ​ကိုလည်း ပိုင်းခြား​သိမြင်” အောင် ကူညီ​ပေး​နိုင်တယ်။ (ဟီဘရူး ၄:၁၂) ကျမ်းစာ​ကို ဆက်​လေ့လာ​ပါ။ ကျမ်းစာ သွန်သင်ချက်​တွေ​နဲ့ ကိုယ့်ရဲ့ အတွေး​တွေ​ကို ယှဉ်​ကြည့်​ပါ။ ပြီး​တဲ့​နောက် ကိုယ့်ရဲ့ အတွေး​တွေ​ကို ကျမ်းစာ သွန်သင်ချက်​နဲ့ ကိုက်ညီ​ဖို့ အတတ်နိုင်ဆုံး ကြိုးစား​ပါ။ စိတ်​ထဲမှာ “အခိုင်အမာ အမြစ်စွဲ” နေတဲ့ မုန်းတီးမှု​ကို ချေဖျက်​ဖို့ သမ္မာကျမ်းစာ​က ကူညီပေး​နိုင်​ပါ​တယ်။—၂ ကောရိန္သု ၁၀:၄၊ ၅။