အခုပဲ ဘဝကို အကောင်းဆုံး မွေ့လျော်ခြင်း
အိုနာသေခြင်း ကင်းတဲ့ဘဝမျိုး သင်လည်း ပိုင်ဆိုင်နိုင်ပါတယ်။ လက်ရှိဘဝကတော့ ကြမ်းတမ်းခက်ခဲလှပါတယ်။ အခုပဲ ဘဝကို အကောင်းဆုံး မွေ့လျော်နိုင်ဖို့ ဘာက ကူညီပေးမလဲ။ ကျေနပ်ပျော်ရွှင်စရာကောင်းတဲ့ဘဝ ပိုင်ဆိုင်နိုင်ဖို့ ကျမ်းစာက လမ်းညွှန်ပေးနိုင်ပါတယ်။ ဘဝအခက်အခဲတချို့ကို ကျမ်းစာ ကူညီဖြေရှင်းပေးနိုင်ပုံအကြောင်း သုံးသပ်ကြည့်ပါ။
ကျေနပ်ရောင့်ရဲခြင်း
ကျမ်းစာအကြံပြုချက်။ “ခင်ဗျားတို့ရဲ့ဘဝမှာ ငွေတပ်မက်တာကို ရှောင်ပါ။ ရှိတာလေးနဲ့ ရောင့်ရဲတင်းတိမ်ပါ။”—ဟီဘရူး ၁၃:၅။
ယနေ့လောကမှာ မရှိမဖြစ်ဆိုတဲ့ ပစ္စည်းတွေ၊ ဝန်ဆောင်မှုတွေ ပြည့်နှက်နေတယ်။ ကျမ်းစာကတော့ “ရှိတာလေးနဲ့ ရောင့်ရဲတင်းတိမ်ပါ” လို့ ဆိုထားတယ်။ ဘယ်လိုနည်းနဲ့လဲ။
“ငွေတပ်မက်တာကို” ရှောင်ပါ။ လူတွေဟာ “ငွေတပ်မက်” တဲ့အတွက် ကျန်းမာရေး၊ မိသားစု၊ မိတ်ဆွေ၊ ကိုယ်ကျင့်တရား၊ ဂုဏ်သိက္ခာကိုတောင် စတေးတတ်ကြတယ်။ (၁ တိမောသေ ၆:၁၀) နှမြောစရာပါပဲ။ စည်းစိမ်ဥစ္စာကို တပ်မက်သူဟာ “ဘယ်တော့မှ . . . ရောင့်ရဲနိုင်မှာ မဟုတ်ဘူး။”—ဒေသနာ ၅:၁၀။
ပစ္စည်းကို မဟုတ်ဘဲ လူကို တန်ဖိုးထားပါ။ ရုပ်ပစ္စည်းတွေဟာ သူ့နေရာနဲ့သူ အသုံးဝင်ပါတယ်။ ဒါပေမဲ့ ကျွန်တော်တို့ကို မချစ်နိုင်ဘူး။ ကျေးဇူးမတင်တတ်ကြဘူး။ လူတွေပဲ ချစ်တတ်၊ ကျေးဇူးတင်တတ်တယ်။ “မိတ်ဆွေစစ်” ရှိခြင်းက ကျေနပ်ရောင့်ရဲတဲ့ဘဝ ပိုင်ဆိုင်စေနိုင်တယ်။—ပညာအလိမ္မာ ၁၇:၁၇။
ကျမ်းစာလမ်းညွှန်ချက်ကို လိုက်နာခြင်းအားဖြင့် အခုပဲ ဘဝကို အကောင်းဆုံး မွေ့လျော်နိုင်တယ်
ကျန်းမာရေးပြဿနာကို ခါးစည်းခံခြင်း
ကျမ်းစာအကြံပြုချက်။ “ရွှင်လန်းတဲ့စိတ်ဟာ ဆေးစွမ်းကောင်းတစ်လက်ပဲ။”—ပညာအလိမ္မာ ၁၇:၂၂။
ရွှင်လန်းမှုက “ဆေးစွမ်းကောင်းတစ်လက်” လိုပဲ ကျန်းမာရေးပြဿနာကို ခံရပ်နိုင်အောင် ကူညီပေးနိုင်တယ်။ ဒါပေမဲ့ ဖျားနာနေချိန်မှာ ဘယ်လို ပျော်ရွှင်နိုင်မလဲ။
ကျေးဇူးသိတတ်ပါ။ ကိုယ့်ရောဂါဝေဒနာအကြောင်းပဲ စဉ်းစားနေရင် “နေ့ရက်တိုင်း” ဟာ ဆိုးရွားပုံပေါက်တယ်။ (ပညာအလိမ္မာ ၁၅:၁၅) ဒါကြောင့် “ကျေးဇူးသိတတ်ကြပါ” လို့ ကျမ်းစာက ဆိုတယ်။ (ကောလောသဲ ၃:၁၅) သေးငယ်တဲ့အရာပဲ ဖြစ်ပါစေ ကိုယ့်မှာရှိထားတဲ့ ကောင်းတဲ့အရာတွေအတွက် ကျေးဇူးတင်ပါ။ နေဝင်ဆည်းဆာအလှ၊ လေပြေလေညှင်း၊ ချစ်ခင်ရသူရဲ့ အပြုံးတို့က ဘဝကို ပြည့်စုံစေနိုင်ပါတယ်။
တခြားသူတွေအတွက် လုပ်ဆောင်ပေးပါ။ ကျန်းမာရေး မကောင်းပေမဲ့ “ရယူခြင်းထက် ပေးကမ်းခြင်းက ပိုပျော်ရွှင်စေတယ်။” (တမန်တော် ၂၀:၃၅) ကိုယ့်လုပ်ဆောင်မှုတွေကို တခြားသူတွေ ကျေးဇူးတင်ကြောင်း ပြောတဲ့အခါ ကျေနပ်ပျော်ရွှင်ကြတယ်။ ကိုယ့်ပြဿနာတွေကို ခဏလောက် မေ့သွားတတ်ကြတယ်။ တခြားသူတွေကို ကူညီခြင်းက ကျွန်တော်တို့ဘဝကိုလည်း ပိုကောင်းမွန်စေနိုင်ပါတယ်။
အိမ်ထောင်ရေး ခိုင်မြဲစေခြင်း
ကျမ်းစာအကြံပြုချက်။ ‘ပိုအရေးကြီးတဲ့အရာတွေကို ပိုင်းခြားသိကြပါ။’—ဖိလိပ္ပိ ၁:၁၀။
တစ်ယောက်ကို တစ်ယောက် အချိန်မပေးနိုင်တဲ့ မောင်နှံစုံတွေဟာ စိမ်းကားသွားတတ်ကြတယ်။ ဒါကြောင့် လင်မယားတွေဟာ မိမိတို့ရဲ့ အိမ်ထောင်ရေးကို ပိုအရေးကြီးတဲ့အရာတစ်ခုအဖြစ် ဦးစားပေးသင့်ပါတယ်။
အတူတူ လုပ်ဆောင်ပါ။ ကိုယ်စိတ်ဝင်စားရာတွေကိုပဲ တစ်ယောက်တည်း မလုပ်ဆောင်ဘဲ အတူတကွ လုပ်ဆောင်ဖို့ စီစဉ်ပါ။ “လူတစ်ယောက်ထက် နှစ်ယောက်က ပိုကောင်းတယ်” လို့ ကျမ်းစာ ဆိုထားတယ်။ (ဒေသနာ ၄:၉) ချက်ပြုတ်တာ၊ လမ်းလျှောက်တာ၊ ဆိုင်ထိုင်တာ၊ ဈေးသွားတာတွေကို အတူတူ လုပ်နိုင်ပါတယ်။
ချစ်မြတ်နိုးကြောင်း ဖော်ပြပါ။ လင်နဲ့ မယား အပြန်အလှန် ချစ်ခင်လေးစားဖို့ ကျမ်းစာက အားပေးထားတယ်။ (ဧဖက် ၅:၂၈၊ ၃၃) နွေးထွေးတဲ့အပြုံး၊ မေတ္တာပါတဲ့ ပွေ့ဖက်မှု၊ လက်ဆောင်လေးတစ်ခုက အိမ်ထောင်ခိုင်မြဲစေနိုင်တယ်။ လိင်ကိစ္စဟာ အိမ်ထောင်သည်တွေအတွက်ပဲ ဖြစ်ရပါမယ်။—ဟီဘရူး ၁၃:၄။