အသက်ကို လေးစားဖို့ ဘာကြောင့် အရေးကြီးသလဲ

• စီးကရက်သောက်တာက ကင်ဆာဖြစ်စေတဲ့အပြင် ရောဂါခုခံကာကွယ်နိုင်စွမ်းကိုလည်း ကျဆင်းစေတယ်။ အဆုတ်ကင်ဆာကြောင့် သေဆုံးသူ ၉၀ ရာခိုင်နှုန်းဟာ ဆေးလိပ်သောက်တာ၊ ဆေးလိပ်ငွေ့ ရှူမိတာကြောင့်ပါ။

• နှစ်စဉ် အကြမ်းဖက်ပစ်ခတ်မှုတွေကြောင့် စိတ်ဒဏ်ရာရသွားသူတွေ အများကြီးပဲ။ စတန်းဖို့ဒ်တက္ကသိုလ်သတင်းတစ်ပုဒ်မှာ အခုလိုဖတ်ရတယ်– “[ကျောင်းတွင်း] ပစ်ခတ်မှုကနေ လွတ်မြောက်လာသူတွေဟာ နှစ်ပေါင်းများစွာ ကြာပြီးနောက်မှာတောင် စိတ်ဒဏ်ရာတွေ ခံစားနေရတုန်းပဲဆိုပြီး လေ့လာမှုတစ်ရပ်က ဖော်ပြတယ်။”

• အရက်သောက်၊ မူးယစ်ဆေးသုံးပြီး ကားမောင်းသူတွေကြောင့် လမ်းပေါ်က ယာဉ်မောင်းတွေသာမက လမ်းဘေးမှာ သွားလာနေသူတွေတောင် ဘေးမကင်းတော့ဘူး။ အသက်ကို ပေါ့ပေါ့တန်တန် သဘောထားသူတွေကြောင့် အပြစ်မဲ့သူတွေ မကြာခဏ ထိခိုက်ရတယ်။

 လုပ်ဆောင်နိုင်ရာ

ကျန်းမာရေး ဂရုစိုက်ပါ။ ဆေးလိပ်သောက်တာ၊ အီးစီးကရက်သောက်တာ၊ အရက်အလွန်အကျွံသောက်တာ၊ အပျော်သဘောနဲ့ မူးယစ်ဆေးသုံးတာ စတဲ့အကျင့်ဆိုးတွေကို ဖြတ်ဖို့ ဘယ်တော့မှ နောက်ကျတယ်ဆိုတာ မရှိပါဘူး။ အဲဒီအကျင့်တွေကို လုပ်နေတာက မိသားစုဝင်တွေနဲ့ ပတ်ဝန်းကျင်ကလူတွေရဲ့အသက်ကို မလေးစားရာရောက်တဲ့အပြင် သင့်ကိုလည်း အသက်အန္တရာယ်ရှိစေတယ်။

ဘေးအန္တရာယ်ကင်းရှင်းရေးကို အမြဲသတိပြုပါ။ အိမ်မှာ မတော်တဆ ဖြစ်စေနိုင်တဲ့အရာတွေရှိရင် ပြုပြင်ပါ။ ယာဉ်ကို အမြဲစစ်ဆေးပြီး ဂရုစိုက်မောင်းနှင်ပါ။ ဆိုးဆိုးဝါးဝါး ဒဏ်ရာရစေနိုင်တဲ့ ဒါမှမဟုတ် အသက်အန္တရာယ်ရှိစေတဲ့ အရာတွေ လုပ်ဆောင်ဖို့ တခြားသူတွေ ဖိအားပေးတာကို မခံပါနဲ့။

တခြားသူတွေကို ကြင်ကြင်နာနာ ဆက်ဆံပါ။ လူမျိုး၊ နိုင်ငံ၊ နောက်ခံအသိုင်းအဝိုင်းပေါင်းစုံက လူတွေကို ကြင်ကြင်နာနာ ဆက်ဆံတာလည်း အသက်ကို လေးစားတာပါပဲ။ တကယ်ဆိုရင် ကမ္ဘာပေါ်မှာ အကြမ်းဖက်မှုနဲ့ စစ်ပွဲတွေ များနေရတဲ့ အဓိကအကြောင်းရင်းဟာ ဘက်လိုက်မှုနဲ့ အမုန်းတရားတွေကြောင့်ပါ။