ကိုယ်​မကြိုက်​တဲ့​ လူမျိုး​ထဲ​က လူတွေကို ရှောင်​နေမယ်​ဆိုရင် မလိုမုန်းထား​စိတ် ပို​ကြီးထွား​လာမယ်။ ကိုယ်​နဲ့​တူ​တဲ့​သူတွေနဲ့​ပဲ မိတ်ဆွေဖွဲ့​မယ်​ဆိုရင် ကိုယ့်ရဲ့ အတွေးအခေါ်၊ ခံစားချက်၊ လုပ်ရပ်တွေ​က​ပဲ မှန်တယ်လို့ ယူဆ​လာနိုင်တယ်။

“နှလုံးသားကို ကျယ်ကျယ် ဖွင့်​ထား​ပါ။” —၂ ကောရိန္သု ၆:၁၃၊ အောက်ခြေမှတ်ချက်။

ဘာကို​ ဆိုလို​သလဲ။ “နှလုံးသား” ဆိုတာ စိတ်​လှုပ်ရှားမှု၊ ချစ်ခင်​စုံမက်မှု​ကို ရည်ညွှန်းလေ့​ရှိတယ်။ ကိုယ်​နဲ့တူ​တဲ့​သူတွေကို​ပဲ ချစ်ခင်​မယ်​ဆိုရင် ကိုယ့်ရဲ့ နှလုံးသား​တံခါး ပိတ်​သွားမယ်။ အဲဒီလို မဖြစ်အောင် ကိုယ်​နဲ့မတူတဲ့သူတွေကိုလည်း မိတ်ဆွေဖွဲ့ဖို့ လိုတယ်။

တခြား​သူတွေနဲ့ ရင်းနှီးအောင် ကြိုးစား​တဲ့​အခါ ကိုယ်​နဲ့​ ဘာကြောင့် မတူ​သလဲ​ဆိုတာ သိလာမယ်။ သူတို့နဲ့ ရင်းနှီး​လာ​လေ ကိုယ်​နဲ့​ တသား​တည်း ဖြစ်လာ​လေ​ပဲ။ သူတို့ကို ပို​တန်ဖိုး​ထား​လာတဲ့အခါ သူတို့ရဲ့ ပျော်စရာ​တွေ၊ ဝမ်းနည်းစရာ​တွေ​ကို ဝေမျှ​ခံစား​တတ်​လာတယ်။

နာ​ဇရင်း​ရဲ့ နမူနာကို စဉ်းစား​ကြည့်​ပါ။ အရင်တုန်းက သူဟာ တိုင်းတစ်ပါး​က ပြောင်းရွှေ့​လာ​သူတွေ​အပေါ် အပျက်သဘောထား ရှိခဲ့တယ်။ သူ ဒီလို​ပြောပြ​တယ်– “ကျွန်မ သူတို့နဲ့ ပေါင်းပြီး အတူတူ အလုပ်​လုပ်တဲ့​အခါ သူတို့​အုပ်စု​နဲ့​ပတ်သက်ပြီး ကျွန်မ​ ကြား​ထား​တာ​နဲ့ လုံးဝ​ မတူတဲ့​သူတွေကို တွေ့ခဲ့​ရတယ်။ ကိုယ်​နဲ့ ယဉ်ကျေးမှု​ မတူတဲ့သူတွေနဲ့ ရင်းနှီး​လာတဲ့အခါ သူတို့​အားလုံး​က ဒီ​ပုတ်​ထဲ​က ဒီ​ပဲ မဟုတ်ဘူးဆိုတာ သိလာတယ်။ သူတို့ကို ပို​ချစ်ခင်​လာတယ်။ တစ်ယောက်ချင်း​စီ​ကို ပို​တန်ဖိုး​ထား​လာတယ်။”

ကိုယ်​နဲ့ နိုင်ငံ၊ လူမျိုး၊ ဘာသာ​စကား မတူတဲ့​သူတွေနဲ့ စကားပြော​ဖို့ အခွင့်အရေး ရှာပါ။ ဒါတွေ လုပ်​ကြည့်​နိုင်တယ်–

• သူတို့​အကြောင်း မေးကြည့်ပါ။

• အတူ​စားသောက်​ဖို့ ဖိတ်ခေါ်ပါ။

• သူတို့​အကြောင်း ပြောပြ​တဲ့​အခါ နားထောင်ပါ။ သူတို့​ အလေးထား​တာတွေကို သိအောင်​ လုပ်ပါ။

သူတို့​ တွေ့ကြုံ​ခဲ့​တာတွေကို သိလာတဲ့​အခါ သူတို့ရဲ့ ဘဝ​အခြေအနေ​ကို ပို​နားလည်​လာတယ်။ အဲဒီအခါ သူတို့ကို အကောင်းမြင်​လာမယ်။