ကုလသမဂ္ဂ​က “ကမ္ဘာ​သူ​ကမ္ဘာ​သား” အယူအဆကို အားပေး​နေတယ်။ အဲဒီမှာ နိုင်ငံတကာ ပူးပေါင်း​ဆောင်ရွက်မှု​ကို အားပေး​ခြင်း၊ လူ့​အခွင့်အရေး​ကို လေးစားခြင်း၊ ကမ္ဘာမြေကို ကာကွယ်ခြင်း​တို့ ပါဝင်တယ်။ ဘာကြောင့်လဲ။ “ရာသီဥတု ပြောင်းလဲမှု၊ ရာဇဝတ်မှု၊ မညီမျှမှု တိုးများ​ခြင်း၊ ဖြေရှင်း​မရတဲ့ ပဋိပက္ခ​များ၊ လူ​အစုလိုက် အပြုံလိုက် အိမ်ရာ စွန့်ခွာ​ထွက်ပြေး​မှု၊ ကမ္ဘာ​တစ်ဝန်း အကြမ်း​ဖက်မှု၊ ကူးစက်ရောဂါ​တို့​က” နယ်​စည်း​မ​ခြား​တော့​ဘူးလို့ ကုလသမဂ္ဂ ခ​ရို​နီ​ကယ် စာစောင်မှာ မဟာ​နေ​ဆာ​က ပြောတယ်။

တချို့​ဆိုရင် ကမ္ဘာ​သူ​ကမ္ဘာ​သား အယူအဆကို ကျော်လွန်​ပြီး ကမ္ဘာ့​အစိုးရ​တစ်ခု တည်ထောင်ဖို့ အားပေးကြတယ်။ အားပေးတဲ့​သူတွေထဲမှာ အီတလီ အတွေးအခေါ်​ပညာရှင်၊ ကဗျာဆရာ နိုင်​ငံ့​ခေါင်းဆောင် ဒန်တေ (၁၂၆၅-၁၃၂၁) နဲ့ ရူပဗေဒ​ပညာရှင် အဲလ်ဘတ် အိုင်းစတိုင်း (၁၈၇၉-၁၉၅၅) တို့ ပါဝင်တယ်။ နိုင်ငံရေး​အရ ကွဲပြား​နေတဲ့ ကမ္ဘာ​မှာ ငြိမ်းချမ်းရေး မတည်မြဲ​နိုင်ဘူး​လို့ ဒန်တေ ယူဆတယ်။ “နိုင်ငံ​တစ်ခုမှာ ပြည်သူတွေ စိတ်ဝမ်းကွဲ​နေရင် အဲဒီ​နိုင်ငံ ပျက်စီး​မှာ​ပဲ” ဆိုတဲ့ ယေရှု​ခရစ်​စကားကို ကိုးကားခဲ့​တယ်။—လုကာ ၁၁:၁၇။

အဏုမြူ​ဗုံး နှစ်လုံး အသုံးပြုခဲ့တဲ့ ဒုတိယ ကမ္ဘာစစ် ပြီးခါစမှာ​ အဲလ်ဘတ်​အိုင်းစတိုင်း​က ကုလသမဂ္ဂ အထွေထွေ ညီလာခံ​ကို အိတ်ဖွင့်​ပေး​စာ ရေးခဲ့တယ်– “တကယ့် ကမ္ဘာ့​အစိုးရ​အတွက် အုတ်မြစ်​ချ​ခြင်းအားဖြင့် အပြည်ပြည်ဆိုင်ရာ လုံခြုံမှု​အတွက် အခြေအနေ​တွေကို ကုလသမဂ္ဂ​က အမြန်ဆုံး ဖန်တီး​ပေးရမယ်။”

ဒါပေမဲ့ အဲဒီလို အင်အား​ကြီးမားတဲ့ အစိုးရ​အဖွဲ့ဝင် နိုင်ငံရေးသမား​တွေ​အနေနဲ့ အကျင့်ပျက် ခြစားမှု၊ စွမ်းဆောင်​ရ​ည် မပြည့်ဝ​မှု၊ ဖိနှိပ်မှု​တို့ ကင်းလွတ်​နိုင်ကြ​ပါ့မလား။ တခြား​အုပ်စိုးရှင်​တွေ​လို​ပဲ ည​ဉ်​ဆိုး​တွေ ရှိနေကြမှာ​လား။ ဒီ​မေးခွန်းတွေ​က ဗြိတိသျှ သမိုင်း​ပညာရှင် လော့​ဒ်​အက်​တန်​ရဲ့ စကားကို သတိ​ရစေတယ်– “တန်ခိုး​အာဏာက အကျင့်ပျက်​စေတယ်။ အကြွင်းမဲ့ တန်ခိုး​အာဏာက အကြွင်းမဲ့ အကျင့်ပျက်​စေတယ်။”

လူ့​မိသားစုမှာ စစ်မှန်တဲ့ သင့်မြတ်​ညီညွတ်မှု ရှိဖို့ စည်းလုံးရမယ်။ ဘယ်လို စည်းလုံး​နိုင်မလဲ။ လက်တွေ့ကျ​သလား။ ကျတယ်​လို့ ကျမ်းစာမှာ ဆိုတယ်။ စည်းလုံး​နိုင်ပါတယ်။ ဘယ်​နည်းနဲ့လဲ။ အကျင့်ပျက်​ခြစား​တဲ့ နိုင်ငံရေးသမား​တွေ ပါဝင်တဲ့ ကမ္ဘာ့​အစိုးရ​အားဖြင့်​တော့ မဟုတ်ဘူး။ ဘုရားသခင် တည်ထောင်​တဲ့ အစိုးရ​အားဖြင့် ဖြစ်တယ်။ ဘုရားသခင့် အစိုးရ​က ဖန်ဆင်းရာတွေ​အပေါ် အုပ်ချုပ်ပိုင်ခွင့် ရှိကြောင်း ဖော်ပြပါ​မယ်။ အဲဒီ​အစိုးရ​က ဘာ​အစိုးရ​လဲ။ “ဘုရားသခင့်​နိုင်ငံတော်” လို့ ကျမ်းစာမှာ ဖော်ပြ​ထားတယ်။—လုကာ ၄:၄၃။

“နိုင်ငံတော် လာပါစေ။ အလိုတော်​ဟာ . . . ကမ္ဘာမြေမှာ​လည်း ပြည့်စုံပါစေ” ဆိုတဲ့ စံပြ​ဆုတောင်းချက်မှာ ဘုရား​နိုင်ငံတော်ကို ယေရှု​ခရစ် ရည်ညွှန်း​နေခြင်း ဖြစ်တယ်။ (မဿဲ ၆:၉၊ ၁၀) ဘုရား​နိုင်ငံတော်​က အာဏာ​ရူး၊ တစ်ကိုယ်​ကောင်း​သမား​တွေရဲ့ အလိုဆန္ဒကို ပြည့်စုံ​စေမှာ မဟုတ်ဘဲ ဘုရား​အလိုတော်ကို ကမ္ဘာမြေမှာ ပြည့်စုံ​စေမှာ​ဖြစ်တယ်။

ဘုရား​နိုင်ငံတော်ကို “ကောင်းကင်​နိုင်ငံ” လို့​လည်း ခေါ်တယ်။ (မဿဲ ၅:၃) ဘာကြောင့်လဲ။ ကမ္ဘာမြေကို အုပ်ချုပ်တဲ့​အခါ ကမ္ဘာပေါ်​ကနေ မ​အုပ်ချုပ်​ဘဲ ကောင်းကင်​ကနေ အုပ်ချုပ်​မှာ ဖြစ်တယ်။ ဘာဆိုလို​သလဲ စဉ်းစား​ကြည့်ပါ။ ဒီ​ကမ္ဘာ့​အစိုးရ​က ရုပ်ပစ္စည်း၊ ငွေကြေး ထောက်ပံ့မှု​တွေ မလိုအပ်ဘူး။ လက်အောက်ခံ​တွေ​အတွက် စိတ်သက်သာစရာပါပဲ။

“နိုင်ငံတော်” ဆိုတဲ့ ဝေါဟာရ​အရ ဘုရား​နိုင်ငံတော်ဟာ ဘုရင်​အုပ်ချုပ်တဲ့ အစိုးရ ဖြစ်မှန်း သိရတယ်။ နိုင်ငံတော်​ဘုရင်​ကတော့ ဘုရားသခင်​ဆီက အာဏာ​ရရှိ​ထားတဲ့ ယေရှု​ခရစ် ဖြစ်တယ်။ ယေရှုနဲ့​ပတ်သက်ပြီး ကျမ်းစာမှာ ဒီလို​ဖော်ပြ​ထားတယ်-

• “အုပ်ချုပ်ခွင့်​အာဏာက သူ့​ပခုံး​ပေါ် ကျရောက်​လာမယ်။ . . . ငြိမ်သက်ခြင်းဟာ အဆုံးမရှိ တိုးများ​မယ်။”—ဟေရှာယ ၉:၆၊ ၇။

•   “သူက အုပ်ချုပ်ခွင့်​အာဏာ၊ ဂုဏ်​ကျက်သရေ​နဲ့ နိုင်ငံ​တစ်ခုကို ရတယ်။ ဒါကြောင့် ဘာသာစကား အမျိုးမျိုး​ပြောတဲ့ လူမျိုးအပေါင်း​ဟာ သူ့​ဆီမှာ အမှုထမ်း​ကြတယ်။ သူ့ရဲ့ အုပ်ချုပ်ခွင့်​အာဏာ​ဟာ မ​ကွယ်ပျောက် . . . ဘူး။”—ဒံယေလ ၇:၁၄။

• “လောက​နိုင်ငံဟာ ဘုရားသခင်ရဲ့ နိုင်ငံနဲ့ ခရစ်တော်ရဲ့ နိုင်ငံ ဖြစ်ပြီ။”—ဗျာဒိတ် ၁၁:၁၅။

ယေရှုရဲ့ စံပြ​ဆုတောင်းချက် ပြည့်စုံ​စေဖို့ ဘုရား​နိုင်ငံတော်​က ကမ္ဘာပေါ်မှာ ဘုရား​အလိုတော်ကို အပြည့်အဝ အကောင်အထည်ဖော်မယ်။ ဘုရား​နိုင်ငံတော်မှာ ကမ္ဘာမြေ ပြန်​ကျန်းမာ​လာပြီး သက်ရှိတွေ ပေါများ​လာ​အောင် လူသား​အားလုံး ပြုစု​စောင့်ရှောက်​တတ်လာ​ကြပါမယ်။

ဘုရား​နိုင်ငံတော်မှာ လက်အောက်ခံ​တွေကို ပညာ​သင်ပေးပါ​မယ်။ စံနှုန်း​တစ်မျိုးတည်းကို သွန်သင်​ပေးမယ်။ သဘောထား​ကွဲလွဲမှု၊ စိတ်ဝမ်းကွဲ​မှု​တို့ မရှိတော့ဘူး။ “သူတို့က . . . ဘာ​အန္တရာယ်​မှ ပေးမှာ မဟုတ်ဘူး။ ဖျက်လိုဖျက်ဆီး လုပ်မှာ မဟုတ်ဘူး။ ပင်လယ်​ဟာ ရေ​တွေ​နဲ့ ဖုံးလွှမ်း​နေ​သလို ကမ္ဘာမြေဟာ ယေဟောဝါကို သိကျွမ်းခြင်းနဲ့ ပြည့်နေမှာ ဖြစ်လို့ပဲ” လို့ ဟေရှာယ ၁၁:၉ မှာ ဖော်ပြ​ထားတယ်။

ကမ္ဘာ​သူ​ကမ္ဘာ​သားတွေ​ဟာ ကုလသမဂ္ဂ ဖြစ်စေချင်​သလို ငြိမ်းချမ်းရေး မြတ်နိုးတဲ့ ကမ္ဘာ​သူ​ကမ္ဘာ​သားတွေ တကယ် ဖြစ်လာကြမယ်။ “များပြား​လှတဲ့ ငြိမ်သက်ခြင်း​ကြောင့် ပျော်ရွှင်​ကြည်နူး​ရလိမ့်မယ်” လို့ ဆာလံ ၃၇:၁၁ မှာ ဆိုထားတယ်။ အချိန်တန်​တဲ့အခါ “ရာဇဝတ်မှု၊” “ညစ်ညမ်းမှု၊” “ဆင်းရဲ​မွဲတေမှု၊” “စစ်မှု” ဆိုတဲ့ စကားလုံးတွေ ပျောက်ကွယ်​သွားမယ်။ ဒါပေမဲ့ ဘယ်တော့ ဖြစ်လာမလဲ။ ဘုရား​နိုင်ငံတော် ဘယ်တော့ အုပ်ချုပ်​မလဲ။ ဘယ်လို အုပ်ချုပ်​မလဲ။ ကျွန်တော်တို့ ဘယ်လို အကျိုး​ခံစားနိုင်​မလဲ။ သုံးသပ်​ကြည့်ရအောင်။