ကမ္ဘာ့ဖြစ်ရပ်အကဲခတ်

၂၀၀၀ ပြည့်နှစ်နှင့် ခရစ်တော်

“၂၀၀၀ ပြည့်နှစ်နှင့် ခရစ်တော် ဆက်စပ်မှုရှိသည်ဟု ဗြိတိန်နိုင်ငံသားမဲပေးထောက်ခံသူမှာ ခြောက်ယောက်တွင် တစ်ယောက်ပင်မရှိ” ဟုအီးအဲန်အိုင်ဘူလေတင်သတင်းကဖော်ပြသည်။ ဂဲလပ်လေ့လာမှုတစ်ရပ်က “လူများစွာသည် အနှစ်တစ်ထောင်နှင့်ပတ်သက်၍ မသိကြကြောင်းတွေ့ရှိခဲ့သည်၊ မြို့သား ၃၇ ရာခိုင်နှုန်းက မည်သည့်အရာအတွက် အထိမ်းအမှတ်ပွဲကျင်းပသည်ကို မသိကြကြောင်း၊ . . . ၁၈ ရာခိုင်နှုန်းက ကျင်းပသည့်ပွဲများသည် ရာစုနှစ်သစ်ကိုအမှတ်ပြုကာ ၁၇ ရာခိုင်နှုန်းက ၂၀၀၀ ပြည့်နှစ်အထိမ်းအမှတ်ဟုဆိုကြသည်။” ၁၅ ရာခိုင်နှုန်းကသာ ၂၀၀၀ ပြည့်နှစ်နှင့် ခရစ်တော်မွေးဖွားခြင်းဆက်နွှယ်မှုကို သိကြသည်။ အက်ဆက်စ်တက္ကသိုလ်မှ ပရောဖက်ဆာ အန်ထော်နီကင်း၏အဆိုအရ လူအများစုအတွက် အနှစ်တစ်ထောင်သည် “ကဖို့၊ ရှန်ပိန်သောက်ဖို့၊ အပေါင်းအသင်းများနှင့်ကြာကြာနေဖို့ သို့မဟုတ် နိုင်ငံရပ်ခြားသို့ခရီးသွားလာဖို့ အခွင့်အလမ်းတစ်ခုအဖြစ်သာ” သဘောထားကြသည်။ အင်္ဂလီကန်ဘီရှော့ဂါဗင်ရိုဒ်က ဤသို့ဆိုသည်– “ကျွန်ုပ်တို့သည် ယဉ်ကျေးမှုနှင့် ဝိညာဉ်ရေးအမှတ်သညာ ပျောက်ဆုံးနေသည့် လူ့ဘောင်တွင် အသက်ရှင်ကြသည်။”

“စူပါဗတ်ပိုးများ” အားထိတ်လန့် မှု

“အာနိသင်အရှိဆုံးပဋိဇီဝဆေးများကို  ‘စူပါဗတ်ပိုးများ’ ၏ခံနိုင်ရည်ရှိမှုသည် ဆေးဘက်ဆိုင်ရာအတတ်ပညာရှင်များကိုသာမက ဝယ်ယူသုံးစွဲသူများကို အထိတ်တလန့်ဖြစ်စေည်” ဟုတောင်အာဖရိကစတားသတင်းစာကဆိုသည်။ ရောဂါဗေဒပညာရှင်မိုက်ဒဗ်က “တစ်ချိန်ကထိန်းချုပ်ထားနိုင်သော သို့မဟုတ် ပပျောက်လုဆဲဆဲရောဂါများသည် ပြောင်းလဲပြီး ပြန်လည်ထလာသည်” ဟုသတိပေးသည်။ ပဋိဇီဝဆေးအလွန်အကျွံသုံးစွဲခြင်းသည် ကုသဖို့ပို၍ခက်ခဲပြီး ခေတ်မီဆေးဝါးများကိုခံနိုင်သည့် အသစ်သော မျိုးကွဲတီဘီ၊ ငှက်ဖျား၊ တိုက်ဖွိုက်၊ ဂနိုညောင်းကျ၊ ဦးနှောက်မြှေးရောင်နှင့် အဆုတ်ရောင်မူကွဲများကိုဖြစ်ပေါ်စေသည်။ တစ်နှစ်လျှင် လူသုံးသန်းကျော်သည် တီဘီရောဂါတစ်မျိုးတည်းကြောင့်သေဆုံးကြသည်။ လူနာများသည် အောက်ပါအချက်များကိုသတိရခြင်းဖြင့် အကူအညီရနိုင်သည်– ဦးဆုံး၊ အရည်များများသောက်ခြင်း၊ အနားယူခြင်းနှင့် လည်ချောင်းနာရှိပါက ဆားနှင့်ရေနွေးတို့ဖြင့်ပလုတ်ကျင်းခြင်းစသည့်တို့ ဖြင့် ကုစားကြည့်ပါ။ သင့်ဆရာဝန်အား ပဋိဇီဝဆေးပေးဖို့ ဖိအားမပေးပါနှင့်—⁠ယင်းတို့အမှန်လိုမလို သူ့ကိုဆုံးဖြတ်စေပါ။ ဆေးပေးခဲ့မည်ဆိုလျှင် အခြေအနေတိုးတက်သည့်တိုင် ဆေးပတ်လည်အောင်သောက်ပါ။ ပဋိဇီဝဆေးများသည် ဘက်တီးရီးယားကြောင့်မဟုတ်ဘဲ ဗိုင်းရပ်စ်ကြောင့်ဖြစ်သော အအေးမိ၊ တုပ်ကွေးတို့ကို ပျောက်ကင်းစေမည်မဟုတ်ကြောင်း သတိရပါ။ “ကျန်းမာရေးကပ်ဆိုက်မှုကြီးကိုဖြစ်စေနိုင်သည့် ဤအလွန်စိုးရိမ်ဖွယ်ကမ္ဘာချီပြဿနာကို လူတိုင်းပူးပေါင်းတိုက်လှန်သင့်သည်” ဟုဒဗ်ကဆိုသည်။

စိတ်ဓာတ်ကျဆင်းခြင်း၏ကြီးမားသောတန်ဖိုး

“ကာယရေးဖျားနာမှုများထက်များစွာသာလွန်သော စိတ်ဓာတ်ကျဆင်းခြင်းသည် ကမ္ဘာတွင်အလုပ်ပျက်ကွက်မှုနှင့် ကုန်ထုတ်လုပ်မှုအရည်အသွေးကျဆင်းမှု၏ အဓိကအကြောင်းရင်းဖြစ်သည်” ဟုဘရာဇီးသတင်းစာ အူးဂလိုဘူးကဆိုသည်။ စိတ်ပိုင်းဆိုင်ရာရောဂါများကြောင့် ၁၉၉၇ ခုနှစ်တွင် လူ ၂၀၀,၀၀၀ သေဆုံးခဲ့ရသည်ဟု ကမ္ဘာ့ကျန်းမာရေးအဖွဲ့မှတ်တမ်းကဖော်ပြသည်။ စိတ်နေသဘောထားပြောင်းလဲမှုများကဲ့သို့သော အငယ်စားစိတ်ရောဂါများသည် အကြားအာရုံပြဿနာများကြောင့် အနှောင့်အယှက်ဖြစ်ရသည့်အလုပ်သမား ၁၂၃ သန်း သို့မဟုတ် လုပ်ငန်းခွင်တွင် မတော်တဆမှုဖြစ်သူ ၂၅ သန်းထက် အရေအတွက်ပိုများသော ကမ္ဘာတစ်ဝန်းမှလူ ၁၄၆ သန်းကျော်၏အသက်မွေးလုပ်ငန်းအပေါ် ဆိုးကျိုးသက်ရောက်ခဲ့ပြီ။ အောက်စ်ဖို့ဒ်တက္ကသိုလ်ပါမောက္ခဂိုင်းဂုဝန်၏လေ့လာမှုတစ်ရပ်အရ စိတ်ဓာတ်ကျဆင်းခြင်းပြဿနာသည် လာမည့်နှစ်များတွင် ပိုတိုးပွားလာပါလိမ့်မည်။ ကုန်ထုတ်လုပ်မှုနှုန်းကျဆင်းပြီး ကုသမှုစရိတ်မြင့်တက်နေသောကြောင့် လူ့ဘောင်အဖွဲ့အစည်းအတွက် ဧရာမဝန်ထုပ်တစ်ခုကိုဖြစ်စေသည်။ ယူနိုက်တက်စတိတ်တစ်နိုင်ငံတည်းတွင် စိတ်ဓာတ်ကျဆင်းမှုကြောင့် ဒေါ်လာ ၅၃ ဘီလီယံခန့် နှစ်စဉ်ဆုံးရှုံးလျက်ရှိနေသည်။

စာရွက်ပေါ်တွင် သာ၍ကောင်း

“ဖန်သားပြင်သည် ပုံနှိပ်စက္ကူလောက် ဖတ်၍မကောင်းပါ” ဟုဂျာမန်ပုံနှိပ်လုပ်ငန်း ဒီပီအေ-ဘေစ္စဒဲန့်စ်ထ်သတင်းကဖော်ပြထားသည်။ ဖန်သားပြင်အစား စက္ကူမှဖတ်ခြင်းသည် အမှားအယွင်းပိုနည်းစေပြီး ဖတ်အားပိုမြန်စေနိုင်သည်။ ဖန်သားပြင်ပေါ်ဖတ်ခြင်းသည် ပျမ်းမျှအားဖြင့် စက္ကူတွင်ထက် ၁၀ ရာခိုင်နှုန်းပိုကြာသည်ဟု စမ်းသပ်ချက်များကဖော်ပြ၏။ ကြည်လင်ပြတ်သားပြီး တုန်ခါမှုနည်းသည့် အရည်အသွေးကောင်းမွန်သော ဖန်သားပြင်များအသုံးပြုသော်လည်း စာရွက်မှဖတ်ရှုခြင်းကိုမမီသေးချေ။ “ဖန်သားပြင်ပေါ်တွင် အလုပ်လုပ်သူမည်သူမဆိုသည် တောက်ပ၍ မှိတ်တုတ်မှိတ်တုတ်ဖြစ်ကာ ရောင်ပြန်ဟပ်သည့်အလင်းရောင်ကို တစ်ချိန်လုံးစိုက်ကြည့်နေရ၏” ဟုဂျာမနီနိုင်ငံ၊ အာခင်မြို့မှ စိတ်ပညာရှင်မာတီနာဇီဖာလ်ကဆိုသည်။ “စာလုံးပုံသဏ္ဌာန်များသဲကွဲမှုမရှိသည့်အပြင် အလင်းအမှောင်ကွဲပြားမှုမှာလည်းနည်းသည်။” ဒီပီအေက ဤသို့ကောက်ချက်ချသည်– “သင်ကွန်ပျူတာတစ်လုံးဝယ်လိုက်သောအခါ ဖန်သားပြင်၏အရည်အသွေးကို ပိုဂရုစိုက်ပေးသင့်သည်။”

အချိန်ကာလ၏နိမိတ်

“ကနေဒါယဉ်ကျေးမှု၏ ရှေးဆန်သောအသွင်အပြင်တစ်ရပ်သည် အပတ်အနည်းငယ်အတွင်း [နယူးဖောင်လန်ရှိ] ရဲတို့ကို ပထမဆုံးအကြိမ်ပစ္စတိုများတပ်ဆင်ပေးသည့်အခါ ခေတ်ကုန်ဆုံးတော့မည်” ဟုသည်တိုရွန်တိုစတားသတင်းစာကဖော်ပြ၏။ ၁၇၂၉ ခုနှစ်တွင် ဖွဲ့စည်းခဲ့သည့် နယူးဖောင်လန်ဘုရင့်ရဲတပ်ဖွဲ့သည် “လက်လှမ်းမီနိုင်သည့်နေရာတွင် သေနတ်မရှိဘဲကင်းလှည့်ရသည့် မြောက်အမေရိကရှိ နောက်ဆုံးရဲတပ်ဖွဲ့ ဖြစ်သည်။” အသစ်ပြဋ္ဌာန်းလိုက်သည့်ဥပဒေက ပေါ်လစီဟောင်းကိုဖျက်သိမ်းခဲ့သည်။ အရာရှိများသည် လက်နက်ကိုင်ဆောင်ခွင့်ရဖို့ ကြီးကြပ်ရေး မှူးထံတောင်းဆိုရမည်ဖြစ်သည်။ ခွင့်ပြုချက်ရရှိမည်ဆိုလျှင် အရာရှိတစ်ဦးသည် ခရူဇာရဲကား၏ပစ္စည်းထည့်သည့်အခန်းရှိ သော့ခတ်ထားသောသေတ္တာတွင် လက်နက်ကိုသိမ်းထားရပေမည်။ သို့နှင့် အရေးပေါ်လိုအပ်သောအခါ ကားကိုရပ်ကာ ပစ္စည်းထားသည့်အခန်းကိုဖွင့်ပြီး သေတ္တာကိုဖွင့်၍ လက်နက်ကိုကျည်ထိုးရ၏။ “ယင်းသည် ရှေးဆန်ပြီး တစ်မူထူးနေသော်လည်း ၁၉၉၈ ခုနှစ်တွင်ရှိ လေ့ကျင့်ထားသောကြေးစားရဲတပ်ဖွဲ့သည် လက်နက်အလွယ်တကူကိုင်ဆောင်ခွင့်မရဟုဆိုခြင်းမှာ လက်တွေ့မကျ” ဟုဝန်ကြီးချုပ်ဘရိုင်ယန်တိုဘင်ကဆိုခဲ့သည်။ ကျောက်ဆောင်ဟုချစ်စနိုးခေါ်ထားသော နယူးဖောင်လန်သည် နိုင်ငံတွင်းရာဇဝတ်မှုဖြစ်ပွားမှုနှုန်းအနည်းဆုံးဖြစ်ခြင်းနှင့် တာဝန်ချိန်တွင် အရာရှိများ ပစ်ခတ်ခံရမှုမရှိခြင်းတို့ဖြင့် မော်ကြွားနေသည်။

ကလဲ့စားချေခြင်းသည် သူတို့၏စီးပွားရေးလုပ်ငန်း

“လုံးဝမပေါက်ကြားစေရ” ဘဲဂျပန်နိုင်ငံရှိမည်သည့်အရပ်တွင်မဆို ဆောင်ရွက်ပေးနိုင်သည်ဟု ကတိပြုကာ တိုကျိုကုမ္ပဏီတစ်ခုက ဤသို့ကြော်ငြာထားသည်– “ကျွန်ုပ်တို့သည် သင့်အတွက်လက်တုံ့ပြန်ပေးပါမည်။” အခြေခံဒဿနိကအတွေးအခေါ်မှာ “အမှုသည်ဖြစ်သူကို နာကျင်စေအောင်စလုပ်သူသည် ထပ်တူနာကျင်မှုမျိုးခံစားစေ” ရမည်ဟုယင်းတွင်အမှုထမ်းသူ အမျိုးသားတစ်ဦးကဆိုသည်။ အဆာဟီညနေခင်းသတင်းတွင်ဖော်ပြထားချက်အရ ကုမ္ပဏီသည် “လူတစ်ဦးအား သူ၏အလုပ်အကိုင်ဆုံးရှုံးစေကာ သူ၏မိသားစုတကွဲတပြားဖြစ်စေ” ခြင်းဖြင့် ပေါင်းသင်းဆက်ဆံမှုပြိုကွဲသွားစေခြင်း၊ “လုပ်ဖော်ကိုင်ဖက်တစ်ဦးအား အလုပ်ဖြုတ်ပစ်ခြင်း သို့မဟုတ် လိင်ဆိုင်ရာအဓမ္မပြုကျင့်သောအလုပ်ရှင်ကို အရှက်ကွဲစေခြင်း” အစရှိသည်တို့ကို “တန်ပြန်ခံရရန် တရားဝင်ဆောင်ရွက်ပေး” မည်ဖြစ်သည်။ နေ့စဉ် လူ ၅၀ ခန့်သည် ကုမ္ပဏီသို့ဖုန်းဆက်ကြပြီး လူ ၂၀ သည် လူသတ်မှုအတွက် ကန်ထရိုက်စာချုပ်များနှင့်ပတ်သက်၍ မေးမြန်းကြ၏; သို့သော် ကုမ္ပဏီ၏ယေဘုယစည်းမျဉ်းမှာ အင်အားမသုံးရန် သို့မဟုတ် ဥပဒေမချိုးဖောက်ရန်ဖြစ်၏၊ “သို့သော် ရံဖန်ရံခါဖြစ်လုနီးနီးဖြစ်တတ်၏။” ထိုလုပ်ငန်းသည် ဒါဇင်နှင့်ချီသောလုပ်သားများကို အလုပ်ခန့်ထားပြီး အလုပ်သမားအများစုသည် အခြားအလုပ်များတွင် အချိန်ပြည့်လုပ်ကြရသည်။ အချို့သည် ကိုယ်တိုင်ခံစားခဲ့ဖူးသူများနှင့် အခြားသူများအတွက် ကလဲ့စားချေပေးရန် ကူညီလိုသူများဖြစ်ကြသည်။ “အတိတ်တွင် သင်ပြုခဲ့သည့်အရာတစ်ခုခုက အခြားသူများသည် သင့်အားရန်ငြိုးသိုထားမထား ကို သင်ဘယ်တော့မျှမသိပေ။ သတိထားနေပါ” ဟုပိုင်ရှင်ကသတိပေးထားသည်။

ကုန်းနေကဏန်းများနှင့် ဂေဟစနစ်

ပုရွက်ဆိတ်များ၊ ခြများ၊ ပိုးကောင်များသည် သစ်တောများအောက်ခြေရှိသောသစ်ရွက်များနှင့် အမှိုက်သရိုက်များကို ပြိုကွဲပျက်စီးသွားစေသည်၊ သို့သော် ရေလွှမ်းမိုးမှုအခါအားလျော်စွာဖြစ်တတ်သော အပူပိုင်းမိုးသစ်တောများတွင် အဘယ်အရာ ဖြစ်ပျက်သနည်း။ ကုန်းနေကဏန်းများက ထိုအလုပ်ကိုလုပ်ကြ၏။ ယူ.အက်စ်.အေ. မီချီဂန်တက္ကသိုလ်မှ ဂေဟဗေဒပညာရှင်တစ်ဦးက ကော့စတာရီကာပစိဖိတ်ကမ်းခြေရှိ ကျယ်ပြောသောသစ်တောဒေသတွင် သစ်ရွက်များအစား ဧရာမအခေါင်းပေါက်ကြီးများရှိနေသည်ကို အံ့သြဖွယ်တွေ့ရှိခဲ့သည်။ ထိုညတွင် ကုန်းနေကဏန်းများ—⁠တစ်ဧကတွင် ၂၄,၀၀၀ ခန့်—⁠သည် ရွက်ကြွေများ၊ အသီးများ၊ ပျိုးပင်များကိုရှာဖွေရန် ပေါ်ထွက်လာကြပြီး သူတို့၏သုံးပေအနက်ရှိသော ကျင်းများ၏အောက်ခြေသို့ သယ်ဆောင်သွားကြသည်ကို စောင့်ကြည့်ခဲ့သည်။ လေရှူရန်ပါးဟက်များပါပြီး သားပေါက်ရန် ပင်လယ်သို့ရံဖန်ရံခါသာသွားတတ်သော ရှစ်လက်မအရွယ်ရှိသော ဤကဏန်းများသည် အမြစ်ရှည်သစ်ပင်များဖွံ့ဖြိုးလာစေရန် ကူညီပေးကြသည်။ သစ်တော၏ဂေဟဗေဒစနစ်တစ်ခုလုံးကို ဤသတ္တဝါများလုပ်ဆောင်ချက်က အဆုံးအဖြတ်ပေးသည်ဟု လန်ဒန်သည်တိုင်းမ်စ်သတင်းစာကဆိုသည်။

အလှမ်းဝေးစွာ အာကာသတွင်း၌

“ဗိုယေဂျာ ၁ သည် အဝေးဆုံးသွားသည့် လူလုပ်ဝတ္ထုဖြစ်ကြောင်း စံချိန်စာအုပ်များတွင် စာရင်းဝင်သွားသည်” ဟုနက္ခတ္တမဂ္ဂဇင်းကဖော်ပြသည်။ “ယခင်စံချိန်ရှင်မှာ ပိုင်အိုးနီယာ ၁၀ ဖြစ်သည်၊ ယင်းသည် သာ၍နှေးသောနှုန်းဖြင့် ဆန့်ကျင်ဘက်အရပ်သို့ ဦးတည်သွား၏။” ဗိုယေဂျာ ၁ သည်မည်မျှဝေးဝေးသွားခဲ့သနည်း။ ၁၉၉၈ ခု၊ ဖေဖော်ဝါရီ ၁၇ ရက်နေ့ဖော်ပြချက်အရ မိုင်ပေါင်း ၆.၅ ဘီလီယံသွားခဲ့သည်။ ထိုအာကာသယာဉ်ကို ၁၉၇၇ ခု၊ စက်တင်ဘာလတွင် လွှတ်တင်ခဲ့သည်; ၁၉၇၉ ခု၊ မတ်လ ၅ ရက်တွင် ဂျူပီတာဂြိုဟ်ကိုဖြတ်ခဲ့သည်; ၁၉၈၀ ပြည့်နှစ်၊ နိုဝင်ဘာ ၁၂ တွင်စေတန်ဂြိုဟ်သို့ပျံသန်းခဲ့သည်။ ယင်းသည် နေမှထုတ်လွှတ်သည့် လေစီးကြောင်းနှင့် သံလိုက်စက်ကွင်းတို့နှင့်ပတ်သက်သည့် အချက်အလက်များကို ဆက်လက်ပေးပို့လျက်ရှိသည်။ “နောက်ဆုံးတွင်၊ ယင်း၏ကိရိယာများသည်—⁠နေ၏သံလိုက်စက်ကွင်းအဆုံးနှင့် ကြယ်တာရာများကြားနယ်တို့၏ နယ်ကြားလိုင်း—⁠ဟီလီယိုပေါ့စ်ကို ရှာတွေ့သည့်ဦးဆုံးအာကာသယာဉ်ဖြစ်နိုင်ပေသည်” ဟုအမျိုးသားလေကြောင်းသိပ္ပံနှင့် အာကာသစီမံခန့်ခွဲရေးရုံးကဆိုသည်။

မှတ်ပုံမတင်သောကလေးများ

“ကလေးသုံးပုံတစ်ပုံသည် မွေးစာရင်းမရှိဘဲဖြစ်နိုင်ရာ သူတို့အားတရားဝင်စွန့်ပစ်ထားလိုက်ခြင်းသည် ပညာရေးဆိုင်ရာအခွင့်အရေးများနှင့် ကျန်းမာရေးစောင့်ရှောက်မှုတို့ကို ဆုံးရှုံးစေနိုင်သည်” ဟုသည်နယူးယောက်တိုင်းမ်စ်သတင်းကဖော်ပြသည်။ မွေးဖွားမှုမှတ်ပုံတင်ခြင်းသည် ဆာဟာရမကျတကျဖြစ်သောအာဖရိကနှင့် ကမ္ဘောဒီးယား၊ အိန္ဒိယ၊ – နှင့် ဗီယက်နမ်စသည့် အာရှနိုင်ငံအချို့တို့တွင် အနည်းဆုံးဖြစ်သည်။ “မွေးဖွားမှုအထောက်အထားလက်မှတ်ရှိမထားခြင်းသည် မွေးဖွားမှုမရှိခြင်းကဲ့သို့ဖြစ်သည်” ဟုကမ္ဘာတစ်ဝန်းလေ့လာမှုပြုလုပ်သည့်အဖွဲ့၊ ကုလသမဂ္ဂကလေးများရန်ပုံငွေ စီမံခန့်ခွဲမှုဒါရိုက်တာကာရောလ်ဘယ်လမီကဆိုသည်။ နိုင်ငံများစွာသည် ကလေးတစ်ဦးကျန်းမာရေးဌာနတွင် ကုသမှုမခံယူနိုင်မီ သို့မဟုတ် ကျောင်းမအပ်မီ မွေးဖွားမှုမှတ်ပုံတင်ခြင်းပြုရန်တောင်းဆိုပြီး ကလေးများအထောက်အထားလက်မှတ်များမရှိခြင်းသည် ကလေးအလုပ်သမားအဖြစ်အတင်းအကြပ်ပြုဖို့ သို့မဟုတ် လိင်လုပ်သားများအဖြစ် အမြတ်ထုတ်ခံရနိုင်စရာပိုများသည်။ ယင်းဆောင်းပါးက ဤသို့ထပ်ဆင့်သည်– “လက်တင်အမေရိက၊ ဗဟိုအာရှနှင့် မြောက်အာဖရိကအများစုတွင် မှတ်ပုံတင်မှုနှုန်းမြင့်မားခြင်းကိုကိုးကားဖော်ပြကာ ဆင်းရဲမှုတစ်ခုကြောင့်သာ မှတ်ပုံတင်ခြင်းနည်းရသည်ဟု မပိုင်းဖြတ်နိုင်ကြောင်း တွေ့ခဲ့သည်။”