စစ်မှန်သည့်ဘုရားသခင်တစ်ဆူတည်းကို ခွဲခြားသိမြင်ခြင်း

လူသားများတည်ရှိခဲ့သမျှကာလပတ်လုံးနီးပါး သူတို့တွင် ဘုရားများစွာရှိခဲ့ကြသည်။ ကမ္ဘာတစ်ဝန်းတွင် ဝတ်ပြုကိုးကွယ်ကြသည့် ဘုရားများနှင့်ဘုရားမများ များလွန်းသဖြင့် အရေအတွက်အတိအကျကိုဖော်ပြရန် ခဲယဉ်းသော်လည်း သန်းနှင့်ချီရှိသည်။

ဘုရားသခင်တစ်ပါးရှိကြောင်း အခိုင်အလုံဖော်ပြခဲ့ပြီဖြစ်ရာ မျက်မှောက်နှင့်အတိတ်ကာလ၌ ကမ္ဘာတစ်ဝန်းတွင် ကိုးကွယ်သောဘုရားအားလုံးအနက် အဘယ်ဘုရားသည် စစ်မှန်သောဘုရားသခင်ဖြစ်သနည်းဟု ယခုမေးပေမည်။ စစ်မှန်သောဘုရားသခင်ဟု ခွဲခြားသတ်မှတ်နိုင်သည့် ဘုရားတစ်ပါးတည်းရှိကြောင်းကို ကျမ်းစာ၌ ယောဟန် ၁၇:၃ တွင်ဤသို့ရှင်းလင်းစွာဖော်ပြထားသည်– “ထာဝရအသက်ဟူမူကား မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။”

ခွဲခြားသိမြင်စေသည့်နာမတော်

ပင်ကိုအရည်အသွေးရှိသည့်ဘုရားတိုင်းသည် ကိုယ်ပိုင်နာမများရှိသည့် အခြားဘုရားများမှခွဲခြားသိမြင်နိုင်ရန် အမည်နာမတစ်ခုရှိဖို့လိုသည်ဟူသောအချက်မှာ ကျိုးကြောင်းညီညွတ်ပါသည်။ ၎င်းအမည်မှာ ကိုးကွယ်သူများက ပေးထားသည့်အမည်ဖြစ်မည့်အစား ဘုရားသခင်ကိုယ်နှိုက်က မိမိကိုယ်ကိုပေးသောအမည်ဖြစ်ခြင်းသည် ပို၍ကောင်းပေလိမ့်မည်။

သို့ရာတွင် ယင်းနှင့်စပ်လျဉ်း၍ အလွန်စိတ်ရှုပ်ထွေးစေသည့်အချက်တစ်ခု ပေါ်ထွက်လာ၏။ ကာလကြာမြင့်စွာတည်ရှိခဲ့သည့် ဘာသာတရားအများစုသည် သူတို့ကိုးကွယ်သောဘုရားများကို ကိုယ်ပိုင်နာမများဖြင့်မှတ်ယူကြသော်လည်း ဂျူးများနှင့် ခရစ်ယာန်ဘောင်၏ အဓိကချာ့ခ်ျများမူကား သူတို့ကိုးကွယ်သည့်ဘုရားကို သိသာထင်ရှားသည့်ကိုယ်ပိုင်နာမတော်ဖြင့် ခွဲခြားဖော်ပြရန် ပျက်ကွက်ကြသည်။ ထိုသို့ပြုမည့်အစား သူတို့သည် သခင်၊ ဘုရားသခင်၊ တန်ခိုးကြီးရှင်နှင့် ခမည်းတော်စသည့်ဘွဲ့များကို အသုံးပြုကြသည်။

စာရေးဆရာ ဒေးဗစ် ကလိုင်းက သီအိုလိုဂျီစာအုပ်တွင် အောက်ပါအတိုင်းတင်ပြရေးသားခဲ့သည်– “ဘီ.စီ. ငါးရာစုနှင့်နှစ်ရာစုကြား တစ်ချိန်ချိန်တွင် ကြေကွဲဖွယ်မတော်တဆဖြစ်မှုတစ်ခု ဘုရားသခင်အပေါ်ကျရောက်ခဲ့၏– ကိုယ်တော်သည် နာမတော်ကိုဆုံးရှုံးခဲ့ရသည်။ ပို၍တိတိကျကျပြောရလျှင် ဂျူးများသည် ဘုရားသခင်၏ကိုယ်ပိုင်နာမတော် ယာဝေးကိုအသုံးမပြုတော့ဘဲ ယာဝေးအစား ဘုရားသခင်၊ သခင်၊ နာမတော်၊ သန့်ရှင်းသောဘုရား၊ အဖြစ်တော်၊ ဌာနတော်ဟူ၍ပင် စကားစုအမျိုးမျိုးဖြင့် စတင်ရည်ညွှန်းဖော်ပြခဲ့ကြသည်။ ကျမ်းစာတွင် ယာဝေးဟူ၍ရေးထားသည့်နေရာများတွင်ပင် စာဖတ်သူများသည် အဒိုးနေးဟု နာမတော်ကိုအသံထွက်ဖတ်ခဲ့ကြသည်။ ဗိမာန်တော်နောက်ဆုံးကျရှုံးပြီးနောက် နာမတော်ကိုအသုံးပြုသည့် ကြုံတောင့်ကြုံခဲသော ဘာသာရေးအခမ်းအနားများတွင်ပင် အသုံးမပြုတော့ပေ၊ သို့ဖြင့် နာမတော်၏အသံထွက်ကိုပင် မေ့လျော့ခဲ့ကြသည်။” သို့ရာတွင် ရှေးရိုးလိုက်သောဂျူးများက ဘုရားသခင်၏နာမတော်ကို အသံထွက်မရွတ်ဆိုကြတော့ဘဲ ယင်းအစား ဘုရားသခင်၊ ပိုင်သအုပ်စိုးရှင်ဟူသည့် ဟေဗြဲစကားလုံးများကို အဘယ်အချိန်တွင် အစားထိုးအသုံးပြုခဲ့ကြောင်း မည်သူမျှမပြောနိုင်ပေ။

ထို့ကြောင့် “စစ်မှန်သည့်ဘုရားသခင်တစ်ဆူတည်း” ကိုခွဲခြားသိမြင်နိုင်ရန် ရှာဖွေရာ၌ ပထမဆုံးအခြေခံလိုအပ်ချက်မှာ ကိုယ်တော်အား နာမည်ဖြင့်သိလာနိုင်ရန် ပြုလုပ်ရမည့်ပုံဖြစ်နေသည်။ ဤသို့ရှာဖွေခြင်းသည် မခက်ခဲပါ။ အကြောင်းမှာ၊ တန်ခိုးကြီးရှင်၊ ဖန်ဆင်းရှင်၏နာမတော်ကို ဆာလံ ၈၃:၁၈ [ကဘ] တွင်ဤသို့ရိုးရှင်းစွာဖော်ပြထား၏– “ယေဟောဝါဟူ၍နာမတော်ရှိသော ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသောဘုရားဖြစ်တော်မူကြောင်းကို သိကြပါစေသော။”—⁠ဂျိမ်းဘုရင်ဘာသာပြန်ကျမ်း။

ယေဟောဝါလော၊ ယာဝေးလော

ယေဟောဝါဟူသောအမည်ကို ဂျိမ်းဘုရင်ဘာသာပြန်ကျမ်းနှင့် အခြားဘာသာပြန်ကျမ်းများတွင် တွေ့ရစေကာမူ အချို့သူများက ယေဟောဝါအစား ယာဝေးကိုအသုံးပြုရန် ပို၍နှစ်သက်ကြသည်။ မည်သည့်နာမတော်သည် အမှန်ဖြစ်သနည်း။

ရှေးအကျဆုံး ကျမ်းစာစာမူများကို ဟေဗြဲဘာသာဖြင့်ရေးသားခဲ့သည်။ ဟေဗြဲကျမ်းစာစောင်များတွင် မြင့်မြတ်သောနာမတော်ကို အကြိမ်ပေါင်း ၇,၀၀၀ နီးပါးတွေ့ရှိရပြီး ဗျည်းလေးလုံး—⁠ယဟဝဟ သို့မဟုတ် JHVH ဖြင့်စာလုံးပေါင်းထားသည်။ ထိုဗျည်းလေးလုံးပါစကားလုံးများကို များသောအားဖြင့် “ဗျည်းလေးလုံး” ဟုအဓိပ္ပာယ်ရသည့် ဂရိစကားလုံးနှစ်လုံးမှဆင်းသက်လာသော တက်တြာဂရမ်မီတမ် သို့မဟုတ် တက်တြာဂရမ်ဟုခေါ်လေ့ရှိကြသည်။ ယခု မှန်မှန်ကန်ကန်အသံထွက်ခြင်းနှင့်ပတ်သက်၍ မေးခွန်းပေါ်လာသည်။ အစောပိုင်းဟေဗြဲစာတွင် ဗျည်းများသာပါပြီး စာဖတ်သူအတွက်လမ်းညွှန်ဖြစ် သည့် သရမပါသောကြောင့် ယခု မှန်မှန်ကန်ကန်အသံထွက်ခြင်းနှင့်ပတ်သက်၍ မေးခွန်းပေါ်လာသည်။ ထို့ကြောင့် တက်တြာဂရမ်မီတမ်၏အသံထွက်သည် ယာဝေး သို့မဟုတ် ယေဟောဝါဖြစ်လာခြင်းမှာ စာဖတ်သူက ဗျည်းလေးလုံးတွင် မည်သည့်သရများကိုပေါင်းထည့်ခြင်းအပေါ် မူတည်သည်။ ယနေ့ ဟေဗြဲကျမ်းပညာရှင်အများက ယာဝေးကို အသံထွက်မှန်အဖြစ်အသုံးပြုရန် ပို၍နှစ်သက်ကြသည်။

သို့ရာတွင် တစ်သမတ်တည်းဖြစ်ခြင်းအတွက် ယေဟောဝါကား အခွင့်သာသည်။ မည်သည့်နည်းဖြင့်နည်း။ ယေဟောဝါဟူသည့်အသံထွက်ကို အင်္ဂလိပ်ဘာသာစကားတွင်ရာစုနှစ်ချီ၍ လက်ခံပြီးဖြစ်သည်။ ဤအသံထွက်ကိုအသုံးပြုရန် ငြင်းဆိုသူများသည် ယေရမိနှင့် ယေရှုစသည့် အများလက်ခံထားသော အသံထွက်များကိုပင် လက်ခံအသုံးပြုရန် ငြင်းဆိုသင့်ပေသည်။ ယေရမိကို ဟေဗြဲမူရင်းအသံထွက်ဖြစ်သည့် ယီရ်မီယာ သို့မဟုတ် ယီရ်မီယာဟု၊ ယေရှုကို ယီရှဝါ (ဟေဗြဲ) သို့မဟုတ် အီစော့စ် (ဂရိ) သို့ပြောင်းခေါ်ရန် လိုပေလိမ့်မည်။ ထို့ကြောင့် ယေဟောဝါသက်သေများအပါအဝင် ကျမ်းစာကျောင်းသားအများစုသည် တစ်သမတ်တည်းရှိစေရန် လူသိများနှင့်ပြီးသားဖြစ်သော အင်္ဂလိပ်ဘာသာစကားဖြင့် “ယေဟောဝါ” နှင့် အခြားဘာသာစကားများတွင် ယင်းနှင့်ဆင်တူသည့်အသံထွက်ကို အသုံးပြုဖို့သဘောတူကြသည်။

အမှန်ပင်အရေးကြီးသလော

အချို့သူများက တန်ခိုးကြီးရှင်ဘုရားသခင်ကို ကိုယ်ပိုင်နာမတော်ဖြင့်ခေါ်ဆိုသည်ဖြစ်စေ၊ မခေါ်သည်ဖြစ်စေ အရေးမကြီးပါဟုဆိုကြပြီး ဘုရားသခင်ကို ခမည်းတော် သို့မဟုတ် ဘုရားသခင်ဟူ၍သာ ပြောဆိုခေါ်ဝေါ်ရန်ကျေနပ်သည်ဟု ဆင်ခြေပေးကြပေမည်။ သို့ရာတွင် ထိုစကားလုံးနှစ်ခုစလုံးသည် နာမည်များဖြစ်မည့်အစား ဘွဲ့များဖြစ်ပြီး ကိုယ်ပိုင်အမည်မဟုတ်သကဲ့သို့ ခွဲခြားဖော်ပြသည့်အသုံးအနှုန်းများလည်းမဟုတ်ပါ။ ကျမ်းစာခေတ်က ဘုရားသခင် (အီလိုဟင်၊ ဟေဗြဲ) ဟူသည့်စကားလုံးကို မည်သည့်ဘုရားကိုဖြစ်စေ—⁠ဒါဂုန်အမည်ရှိသော ဖိလိတ္တိဘုရားကိုပင်—⁠ဖော်ပြရန်အသုံးခဲ့ကြသည်။ (တရားသူကြီး ၁၆:၂၃၊ ၂၄) ထို့ကြောင့် ဟေဗြဲတစ်ယောက်က မိမိသည် “ဘုရားသခင်” ကိုကိုးကွယ်သည်ဟု ဖိလိတ္တိတစ်ယောက်ကိုပြောပါက သူကိုးကွယ်သည့် စစ်မှန်သည့်ဘုရားကို ခွဲခြားဖော်ပြလိမ့်မည်မဟုတ်ပေ။

စိတ်ဝင်စားစရာမှာ ၁၈၇၄ ခုနှစ်ထုတ် အင်ပီရီယယ်လ် ကျမ်းစာ-အဘိဓာန်တွင်ပါသော ဤမှတ်ချက်ဖြစ်သည်– “[ယေဟောဝါ] သည်နေရာတိုင်းတွင် တစ်ပါးဆိုင်အမည်ဖြစ်၍ ပုဂ္ဂိုလ်တစ်ပါးဖြစ်သောဘုရားသခင်၊ ကိုယ်တော်တစ်ပါးတည်းကိုသာရည်ညွှန်း၏။ အီလိုဟင်မှာမူ အများဆိုင်နာမ်၏လက္ခဏာများစွာပါရှိ၍ အများအားဖြင့် အမြင့်မြတ်ဆုံးဘုရားကိုရည်ညွှန်းသော်လည်း ထိုသို့အမြဲဖြစ်ချင်မှဖြစ်မည်။ ဟေဗြဲတစ်ဦးက မှားယွင်းသည့်ဘုရားအားလုံးတစ်ဖက်၌ရှိ စစ်မှန်သည့်ဘုရားသခင်ကိုအညွှန်းပုဒ် (the) တပ်၍ အီလိုဟင်ဟုခေါ်ဆိုမည်ဖြစ်သော်လည်း အညွှန်းပုဒ် (the) တပ်၍ ယေဟောဝါဟုဘယ်သောခါမျှမဆိုပါ။ အကြောင်းမှာ ယေဟောဝါသည် စစ်မှန်သောဘုရားသခင်တစ်ပါးတည်း၏ အမည်နာမဖြစ်သည်။ ကျွန်ုပ်၏ဘုရားသခင်ဟု သူအထပ်ထပ်ဆိုမည်ဖြစ်သော်လည်း . . . ကျွန်ုပ်၏ ယေဟောဝါဟုဆိုမည်မဟုတ်ပါ။ အကြောင်းမှာ ကျွန်ုပ်၏ဘုရားသခင်ဟု သူဆိုသည့်အခါ ယေဟောဝါကိုဆိုလိုသောကြောင့်ဖြစ်သည်။ ယေဟောဝါမှအခြားတစ်ပါးမရှိသောကြောင့် ဣသရေလအမျိုး၏ဘုရားသခင်ဟု သူပြောဆိုမည်ဖြစ်သော်လည်း ဣသရေလအမျိုး၏ယေဟောဝါဟု ဘယ်သောအခါမျှမပြောပေ။ ယေဟောဝါနှင့်ပတ်သက်၍ အသက်ရှင်ခြင်းမှလွဲလျှင် အခြားအဘယ်အရာကိုမျှ မတွေးနိုင်သောကြောင့် အသက်ရှင်တော်မူသောဘုရားသခင်ဟု ခေါ်ဆိုမည်ဖြစ်သော်လည်း အသက်ရှင်တော်မူသောယေဟောဝါဟု မည်သည့်အခါမျှမဆိုနိုင်ပါ။”

စစ်မှန်သောဘုရား၏အရည်အချင်းများ

တစ်စုံတစ်ယောက်၏အမည်ကိုသိရုံဖြင့် ကျွန်ုပ်တို့သည် သူနှင့်အလွန်ရင်းနှီးကျွမ်းဝင်သည်ဟု မဆိုလိုပေ။ ကျွန်ုပ်တို့အများစုသည် ထင်ပေါ်ကျော်ကြားသော နိုင်ငံရေးသမားများ၏အမည်များကို သိထားကြသည်။ အခြားနိုင်ငံများမှ ထင်ပေါ်ကျော်ကြားသောယောက်ျား၊ မိန်းမများ၏အမည်များကိုပင် ကျွန်ုပ်တို့ကောင်းစွာသိထားပေမည်။ သို့သော် သူတို့၏နာမည်များကို—⁠မှန်ကန်စွာအသံထွက်တတ်သည်ကိုပင်—⁠သိထားရုံဖြင့် ထိုသူတို့နှင့် ကိုယ်တိုင်အကျွမ်းဝင်သည် သို့မဟုတ် သူတို့သည် မည်ကဲ့သို့သောလူစားများဖြစ်သည်ကို သိသည်ဟုမဆိုလိုပါ။ ထိုနည်းတူပင် စစ်မှန်သည့်ဘုရားသခင်တစ်ဆူတည်းကိုသိကျွမ်းရန် ကျွန်ုပ်တို့သည် ကိုယ်တော်၏အရည်အချင်းများကို သိရှိရန်နှင့် ၎င်းတို့ကိုမြတ်နိုးရန်လိုအပ်သည်။

စစ်မှန်သည့်ဘုရားသခင်ကို လူသားများ ဘယ်သောအခါမျှ မြင်နိုင်မည်မဟုတ်သော်လည်း ဘုရားသခင်သည် ကိုယ်တော်၏ပင်ကိုအရည်အသွေးတော်နှင့်ပတ်သက်၍ အသေးစိတ်အချက်အလက်များစွာကို ကျွန်ုပ်တို့အတွက် ကျမ်းစာထဲတွင် ကြင်နာစွာမှတ်တမ်းတင်ထားခဲ့သည်။ (ထွက်မြောက်ရာ ၃၃:၂၀; ယောဟန် ၁:၁၈) ဟေဗြဲပရောဖက်အချို့တို့သည် တန်ခိုးကြီးရှင် ဘုရားသခင်၏ ကောင်းကင်ညီလာခံများ၏ မှုတ်သွင်းခံအဆင်းအာရုံများကို တွေ့ခဲ့ကြရသည်။ သူတို့ဖော်ပြကြရာတွင် ကြီးမားသောဂုဏ်ကျက်သရေ၊ အံ့သြထိတ်လန့်ဖွယ်၊ ကြီးကျယ်ခမ်းနားဖွယ် အစွမ်းတန်ခိုးတို့သာမက အေးချမ်းမှု၊ အစီအစဉ်ကျနမှု၊ တင့်တယ်လှပမှုနှင့် နှစ်သက်ဖွယ်စသည်တို့ကိုပါဖြစ်သည်။—⁠ထွက်မြောက်ရာ ၂၄:၉-၁၁; ဟေရှာယ ၆:၁; ယေဇကျေလ ၁:၂၆-၂၈; ဒံယေလ ၇:၉; ဗျာဒိတ် ၄:၁-၃။

ယေဟောဝါဘုရားသခင်သည် ထွက်မြောက်ရာ ၃၄:၆၊ ၇ တွင်မှတ်တမ်းတင်ထားသည့် ကိုယ်တော်၏ဆွဲဆောင်မှုရှိသော နှစ်လိုဖွယ်အရည်အချင်းအချို့ကို မောရှေအားဤသို့ဖော်ပြခဲ့သည်– “ထာဝရဘုရား၊ ထာဝရဘုရား၊ ချစ်သနားခြင်းမေတ္တာကရုဏာနှင့်ပြည့်စုံ၍ စိတ်ရှည်ခြင်း၊ ကျေးဇူးပြုခြင်း၊ သစ္စာစောင့်ခြင်းနှင့်ကြွယ်ဝတော်မူထသော၊ အထောင်အသောင်းများသောသူတို့အား သနားခြင်းကျေးဇူးတရားကို စောင့်တော်မူထသော၊ အဓမ္မကျင့်ခြင်း၊ တရားတော်ကိုလွန်ကျူးခြင်း၊ ပြစ်မှားခြင်းအပြစ်တို့ကို ဖြေလွှတ်တော် . . . မူ၏။” ဘုရား သခင်၏ဤအရည်အချင်းများကိုသိရှိလာခြင်းက ကျွန်ုပ်တို့ကို ကိုယ်တော်ထံသို့ဆွဲဆောင်ပြီး ပုဂ္ဂိုလ်တစ်ပါးအနေနှင့် ကိုယ်တော်အားပိုမိုသိလိုစိတ်ဖြစ်ပေါ်လာစေသည်ကို သင်သဘောမတူပေလော။

အဘယ်လူသားမျှ ယေဟောဝါဘုရားသခင်ကို ကိုယ်တော်၏ဘုန်းတန်ခိုးအာနုဘော်တော်ဖြင့် မြင်နိုင်မည်မဟုတ်သော်လည်း ယေရှုခရစ်တော်သည် မြေကြီးပေါ်တွင်ရှိစဉ် ကိုယ်တော်၏ကောင်းကင်ခမည်းတော် ယေဟောဝါဘုရားသခင်၏ ပင်ကိုအရည်အသွေးကို အမှန်ပင်ရောင်ပြန်ဟပ်ခဲ့သည်ဟု မှတ်တမ်းတင်ထား၏။ တစ်ချိန်တစ်ခါတွင် ယေရှုကဤသို့မိန့်တော်မူခဲ့သည်– “ခမည်းတော်ပြုတော်မူသောအမှုကို သားတော်သည်မြင်၍သာပြု၏။ မိမိအလိုအလျောက် အဘယ်အမှုကိုမျှမပြုနိုင်။ ခမည်းတော်ပြုတော်မူသမျှအတိုင်း သားတော်လည်းပြု၏။”—⁠ယောဟန် ၅:⁠၁၉။

ထို့ကြောင့် ယေရှု၏ ကြင်နာမှု၊ ထောက်ထားစာနာမှု၊ နူးညံ့သိမ်မွေ့မှုနှင့် နွေးထွေးလှိုက်လှဲမှုသာမက ဖြောင့်မတ်ခြင်းတရားကိုချစ်မြတ်နိုးပြီး မတရားမှုကိုမုန်းတီးခြင်းစသည့် အရည်အချင်းအားလုံးသည် မြေကြီးပေါ်သို့ လူသားအဖြစ်မရောက်လာမီ ကောင်းကင်ညီလာခံများတွင် ခမည်းတော်နှင့်အတူရှိစဉ် ကိုယ်တော်၏ခမည်းတော် ယေဟောဝါဘုရားသခင်၌ ရှိခဲ့သောအရည်အချင်းများဖြစ်သည်ဟု ကျွန်ုပ်တို့တွက်ဆနိုင်သည်။ ထို့ကြောင့် ယေဟောဝါနာမတော်၏ အဓိပ္ပာယ်အပြည့်အစုံကို ကျွန်ုပ်တို့အမှန်တကယ်နားလည်ပြီးသိကျွမ်းလာသည့်အခါ ထိုမြင့်မြတ်သည့်နာမတော်ကို ချစ်မြတ်နိုးပြီး ကောင်းချီးပေးရန်၊ ချီးမွမ်းဂုဏ်တင်ရန်နှင့် ယုံကြည်အားထားရန် အကြောင်းများစွာအမှန်ပင်ရှိသည်။

ဤနည်းဖြင့် စစ်မှန်သည့်ဘုရားသခင်တစ်ဆူတည်းကို သိကျွမ်းလာခြင်းသည် ကျမ်းစာစောင်များ၏ ကမ္ဘာသစ်ဘာသာပြန်ကျမ်းမှ ယောဟန် ၁၇:၃ တွင်ရှင်းလင်းစွာဖော်ပြထားသကဲ့သို့ အမှန်ပင် အစဉ်အဆက်လိုက်လျှောက်လုပ်ကိုင်သွားရမည့် လမ်းစဉ်ဖြစ်သည်။ ဤကျမ်းချက်တွင် ပစ္စုပ္ပန်ကာလပြရိုးရိုးကြိယာပုံသဏ္ဌာန်ကို အသုံးပြုမည့်အစား ပစ္စုပ္ပန်ဖြစ်ဆဲကာလပြကြိယာပုံသဏ္ဌာန်ကို အသုံးပြုထားသောကြောင့် “သိကျွမ်းသည်” ဟူသည့်ကာလအမှန်ပြကြိယာသည် များစွာအကူအညီပေးသည်။ ထို့ကြောင့် ကျွန်ုပ်တို့ဖတ်ရသည်မှာ– ‘ထာဝရအသက်ဟူမူကား၊ မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုနှင့် စေလွှတ်တော်မူသောယေရှုခရစ်တို့၏ အသိပညာကိုဆည်းပူးခြင်းတည်း။’ မှန်၏၊ စစ်မှန်သည့်ဘုရားသခင်တစ်ဆူတည်းဖြစ်သော ယေဟောဝါနှင့် ကိုယ်တော်၏သားတော် ယေရှုခရစ်တို့၏အသိပညာကို ဆက်၍ဆည်းပူးနေခြင်းသည် အဆုံးမရှိသင့်သည့်လုပ်ငန်းစဉ်တစ်ခုဖြစ်သည်။

စစ်မှန်သည့်ဘုရားသခင် ပေါ်လွင်ထင်ရှားလာ

ထို့ကြောင့် စစ်မှန်သည့်ဘုရားသခင်ကို မှားယွင်းသည့်ဘုရားများစွာမှ အလွယ်တကူခွဲခြားသိမြင်နိုင်သည်။ ကိုယ်တော်သည် ကမ္ဘာမြေကြီးနှင့် ၎င်းပေါ်ရှိလူသားများအပါအဝင် စကြဝဠာကိုဖန်ဆင်းသည့် တန်ခိုးကြီးအရှင်ဖြစ်သည်။ ကိုယ်တော့်တွင် ပြိုင်ဘက်ကင်းသောကိုယ်ပိုင်နာမတော်—⁠ယေဟောဝါ သို့မဟုတ် ယာဝေး—⁠ရှိသည်။ ကိုယ်တော်သည် နားမလည်နိုင်သည့် သုံးပါးပေါင်းတစ်ဆူဘုရားများအဝင်မဟုတ်ပါ။ ကိုယ်တော်သည် မေတ္တာရှင်ဘုရားသခင်ဖြစ်ပြီး ဖန်ဆင်းထားရာလူသားများအတွက် အကောင်းဆုံးကိုသာလိုလားတော်မူသည်။ သို့ရာတွင် ကိုယ်တော်သည် တရားမျှတသည့်ဘုရားသခင်လည်းဖြစ်တော်မူပြီး မြေကြီးကိုဖျက်ဆီးပြီး စစ်များနှင့် အဓမ္မမှုဖြစ်ပေါ်စေရန် အမြဲလှုံ့ဆော်သူများကို ထာဝစဉ်သည်းခံနေမည်မဟုတ်ပါ။

ယေဟောဝါသည် မြေကြီးပေါ်မှ ဆိုးသွမ်းမှုနှင့် ဆင်းရဲခြင်းဝေဒနာများကိုပယ်ရှားရန် မိမိ၏စိတ်ဆုံးဖြတ်ချက်ကို ဖော်ပြရုံသာမက စိတ်နှလုံးရိုးဖြောင့်သူများသည် ထာဝစဉ်ပျော်ရွှင်စွာနေထိုင်နိုင်မည့် ပရဒိသုတစ်ခုပြုလုပ်ပေးမည်အကြောင်းကိုပါ ဖော်ပြတော်မူသည်။ (ဆာလံ ၃၇:၁၀၊ ၁၁၊ ၂၉၊ ၃၄) တန်ခိုးအကြီးမြတ်ဆုံးအရှင်ဘုရားသခင်သည် ယခု မိမိ၏သားတော်ယေရှုကို ဘုရားသခင့်နိုင်ငံတော်၏ကောင်းကင်ဘုရင်အဖြစ် နန်းတင်ခဲ့ပြီဖြစ်၍ မကြာမီ ယေရှုသည် ဖြောင့်မတ်ခြင်းတရားတည်ရာ ကမ္ဘာသစ်ကိုဆောင်ကြဉ်းပေးမည်ဖြစ်ရာ ကျွန်ုပ်တို့၏ကမ္ဘာပေါ်တွင် ပရဒိသုအခြေအနေ ပြန်ရှိလာစေတော့မည်ဖြစ်သည်။—⁠ဒံယေလ ၂:၄၄၊ ၄၅; မဿဲ ၆:၉၊ ၁၀။

ယခု သင်သည် ဘုရားသခင်တကယ်ရှိသလောဟူသည့်မေးခွန်းကို ပို၍လွယ်ကူစွာဖြေဆိုနိုင်ပြီး စစ်မှန်သည့်ဘုရားကိုခွဲခြားသိမြင်နိုင်ပေလိမ့်မည်ဟု ကျွန်ုပ်တို့မျှော်လင့်ပါသည်။

[စာမျက်နှာ ၉ ပါ ရုပ်ပုံ]

ယေဟောဝါသည် စစ်မှန်သည့်ဘုရားတစ်ဆူတည်း ဖြစ်ကြောင်း ယေရှုခရစ်တော်ခွဲခြားဖော်ပြခဲ့