မင်္ဂလာဆောင်သည့်နေ့—ပျော်လည်းပျော်ရ အဘက်ဘက်မှလည်း အားစိုက်ထုတ်ရ
မင်္ဂလာဆောင်သည့်နေ့—ပျော်လည်းပျော်ရ အဘက်ဘက်မှလည်း အားစိုက်ထုတ်ရ
ပထမဆုံးထိမ်းမြားမင်္ဂလာပွဲကို ဦးစီးကျင်းပပေးခဲ့သောအရှင်မှာ လူသားများအား အခြားမည်သူထက်မဆို သာ၍သိတော်မူသော ယေဟောဝါဘုရားသခင်ဖြစ်သည်ဟု သမ္မာကျမ်းစာကဖော်ပြ၏။ ကိုယ်တော်သည် လူ့ဘောင်အဖွဲ့အစည်း၏ အခြေခံအုတ်မြစ်အဖြစ် အိမ်ထောင်ကို စတည်ပေးခဲ့သည်။ (ကမ္ဘာဦး ၂:၁၈-၂၄) လက်ထပ်ထိမ်းမြားဖို့အစီအစဉ်ဆွဲသည့်အခါ ကျွန်ုပ်တို့အား ကူညီလမ်းညွှန်ပေးနိုင်သည့် မူအမျိုးမျိုးကို ဘုရားသခင့်မှုတ်သွင်းခံစကားတော်၊ သမ္မာကျမ်းစာတွင် တွေ့ရှိရသည်။
ဥပမာ၊ ယေရှုက ခရစ်ယာန်များသည် “ကဲသာဘုရင်၏ဥစ္စာကို ကဲသာဘုရင်အားဆက်ပေး” ရမည်ဟု မိန့်ဆိုတော်မူခဲ့သည်။ (မဿဲ ၂၂:၂၁) သို့ဖြစ်၍ သူတို့သည် နိုင်ငံ့ဥပဒေကို လိုက်နာရမည်ဖြစ်၏။ ဥပဒေတောင်းဆိုချက်များနှင့်အညီပြုသည့် အိမ်ထောင်မှုသည် သားသမီးများအတွက် တာဝန်ဝတ္တရားများ (စားဝတ်နေရေးနှင့် ပညာရေးအပါအဝင်) ပြဋ္ဌာန်းခြင်း၊ အမွေဆက်ခံပိုင်ခွင့်ပေးခြင်းကဲ့သို့သော အကျုံးဝင်နေသူတို့ကို အဘက်ဘက်မှ အကာအကွယ်ပေးသည်။ ထို့အပြင် မိသားစုဝင်များကို မတော်မတရားပြုခြင်းနှင့် ခေါင်းပုံဖြတ်ခြင်းတို့မှ အကာအကွယ်ပေးရန် စီစဉ်ဖွဲ့စည်းထားသည့် ဥပဒေများလည်းရှိပါသည်။ *
ပြင်ဆင်မှုများ
မောင်နှံတစ်စုံသည် အိမ်ထောင်ပြုမည်၊ ကျမ်းစာပညတ်များ၊ မူများနှင့်သာမက နိုင်ငံ့ဥပဒေနှင့်လည်း ကိုက်ညီမည့် အိမ်ထောင်ရေးဖြစ်ဖို့ ဆုံးဖြတ်လိုက်သည်ဆိုလျှင် အဘယ်လက်တွေ့ကျကိစ္စရပ်များကို ထည့်စဉ်းစားရမည်နည်း။ ယင်းကိစ္စရပ်များတွင် နေ့စွဲနှင့် မည်သို့သော မင်္ဂလာအခမ်းအနားပုံစံမျိုး ကျင်းပလိုသည်တို့ ပါဝင်သည်။
အဆိုပါကိစ္စနှင့်ပတ်သက်၍ “ဇနီးမောင်နှံ၏ အယူအဆသည် မိဘများ၏အယူအဆနှင့် အတိအကျ မကိုက်ညီဘဲဖြစ်ပေမည်၊ မိမိတို့ဖြစ်ချင်ရာအတိုင်း တိတိကျကျ ရွေးချယ်ရမည်လော၊ မိသားစုရိုးရာအစဉ်အလာ လိုက်မည်လောဆိုသည်ကို မဝေခွဲနိုင် ဖြစ်နေပေမည်” ဟု စာအုပ်တစ်အုပ်ကဆို၏။ အဘယ်အရာကို လုပ်ဆောင်နိုင်သနည်း။ “ယင်းအတွက် အလိုက်သင့် နားထောင်ပေးခြင်း၊ ပြဿနာများကို တိုင်ပင်ဆွေးနွေးခြင်းနှင့် အလျှော့ပေးလိုက်လျောခြင်းမှတစ်ပါး လွယ်ကူသည့်ဖြေရှင်းနည်းကားမရှိချေ။ ဤအချိန်သည် အားလုံး စိတ်လှုပ်ရှားနေသည့်အချိန်ဖြစ်သည်၊ အနည်းငယ်ကြိုတင်စဉ်းစားထားခြင်းနှင့် နားလည်ပေးခြင်းတို့သည် အစီအစဉ်များကို အလွယ်တကူဆွဲနိုင်ရန် များစွာအထောက်အကူပြုသည်။”—ပြီးပြည့်စုံလင်သည့် မင်္ဂလာပွဲစီစဉ်သူနှင့်မှတ်တမ်း။
အဆိုပါနေ့ရက် ကျိန်းသေအောင်မြင်ရန် မေတ္တာပြည့်ဝသည့်မိဘများက များစွာစွမ်းဆောင်နိုင်မည်ဖြစ်သော်လည်း မိမိတို့စိတ်ကြိုက် စိုးမိုးခြယ်လှယ်ဖို့ မကြိုးစားသင့်ပေ။ အခြားတစ်ဖက်တွင် အပြီးသတ်ဆုံးဖြတ်ချက်များကို သတို့သမီးနှင့် သတို့သားက ဆုံးဖြတ်မည်ဖြစ်သော်လည်း သူတို့သည် ကောင်းသောရည်ရွယ်ချက်ဖြင့် အကြံပေးခြင်းကိုမူ နားထောင်သင့်သည်။ အဘယ်အကြံပြုချက်များအား လက်ခံမည်ကို ဆုံးဖြတ်သောအခါ ဇနီးမောင်နှံသည် ဤကျမ်းစာသွန်သင်ချက်ကို သတိရသင့်သည်– “. . . ခပ်သိမ်းသောအမှုအရာကို ပြုနိုင်သည်မှန်စေတော့။ ခပ်သိမ်းသောအမှုအရာကို ပြုသင့်သည်မဟုတ်။ ခပ်သိမ်းသောအမှုအရာကို ပြုနိုင်သည်မှန်စေတော့။ ခပ်သိမ်းသောအမှုအရာများသည် ဆောက်တည်တတ်သည်မဟုတ်။ ကိုယ့်အကျိုးကို အဘယ်သူမျှမရှာစေနှင့်။ သူ့အကျိုးကို လူတိုင်းရှာစေ။”—၁ ကောရိန္သု ၁၀:၂၃၊ ၂၄၊ သမ္မာ။
ပြင်ဆင်မှုများတွင် လုပ်ကိုင်စရာအမျိုးမျိုးပါဝင်သည်၊ ဖိတ်စာဝေခြင်းမှအစ ဧည့်ခံပွဲစီစဉ်ခြင်းအထိဖြစ်၏။ အိပ်ခ်ျ. ဘိုးမန်းက သူ၏ ခေတ်မီသူတို့၏အိမ်ထောင်ရေးစာအုပ်တွင် “ဤပြင်ဆင်မှုကို စနစ်တကျလုပ်ဆောင်လေ၊ ကြိုတင်စဉ်းစားစီစဉ်ထားလေ စိတ်နွမ်းလူပန်းဖြစ်ရနည်းလေဖြစ်မည်” ဟုဆိုသည်။ သူက “အကောင်းဆုံးအခြေအနေများအောက်တွင်ပင် ပင်ပန်းမှုအနည်းငယ်ရှိနိုင်သည်၊ ယင်းကိုလျော့နည်းသွားစေရန် အရာရာတိုင်းကို အကျိုးသင့်အကြောင်းသင့်ရှိရှိ အားသွန်ခွန်စိုက်လုပ်ဆောင်သွားခြင်းက ပြုသင့်သည့်အရာဖြစ်သည်” ဟုသတိပေးသည်။
တောက်တိုမည်ရလုပ်ဆောင်ခြင်းနှင့် ဧည့်သည်များကို ဧည့်ဝတ်ပြုခြင်းတို့ရှိပေမည်။ မိတ်ဆွေများနှင့် မိသားစုများက အကူအညီပေးနိုင်ပါမည်လော။ သတို့သမီးနှင့် သတို့သား လုပ်ဆောင်ဖို့မလိုအပ်သည့် ကိစ္စအချို့ကို အခြားတာဝန်ရှိသူများအား လွှဲထားပေးနိုင်ပါမည်လော။
ကုန်ကျစရိတ်
အကျိုးသင့်အကြောင်းသင့်ရှိသည့် ဘတ်ဂျက်တစ်ခုလိုအပ်ပေသည်။ မိမိတို့တတ်နိုင်သည်ထက် ပိုကုန်ကျမည့် မင်္ဂလာဆောင်ပွဲအတွက် စရိတ်ခံရန် ဇနီးမောင်နှံ သို့မဟုတ် ၎င်းတို့၏မိဘများကို အကြွေးတင်စေခြင်းသည် မေတ္တာပြရာမကျပါ၊ အကျိုးသင့်အကြောင်းသင့်လည်းမရှိချေ။ ပို၍အသေးစိတ်ကျသည့် မင်္ဂလာပွဲကို စီစဉ်နိုင်သူများစွာတို့သည် အဆိုပါပွဲကို ရိုးရိုးရှင်းရှင်းထားဖို့ ရွေးချယ်ကြသည်။ မည်သို့ပင်ဖြစ်ပါစေ ဇနီးမောင်နှံအချို့သည် ခန့်မှန်းကုန်ကျငွေနှင့် အမှန်တကယ်ကုန်ကျမည့်စရိတ်အတွက် စာရင်းတစ်ခုထားရှိခြင်းသည် အထောက်အကူဖြစ်ကြောင်း တွေ့ရှိခဲ့ကြပြီ။ ထို့ပြင် စနစ်တကျစီမံဖို့လိုအပ်သည့် အရာမှန်သမျှအတွက် အချိန်ကန့်သတ်ထားဖို့ စာရင်းတစ်ခု ရှိထားမည်ဆိုလျှင်လည်း အကူအညီရနိုင်ပေသည်။ ကန့်သတ်ထားသည့်အချိန်များကို စိတ်ဖြင့် အလွတ်မှတ်သားထားဖို့ကြိုးစားခြင်းသည် စိတ်ပင်ပန်းဖို့အကြောင်းများသည်။
မင်္ဂလာပွဲသည် မည်မျှကုန်ကျမည်နည်း။ တစ်နေရာနှင့်တစ်နေရာ ကုန်ကျစရိတ်ချင်းမတူကြပေ၊ သို့သော် မည်သည့်အရပ်၌ပင် သင်နေထိုင်ပါစေ ကိုယ့်ကိုယ်ကို ဤသို့မေးကြည့်ခြင်းက ပညာရှိရာရောက်မည်– ‘ငါတို့စီစဉ်ထားသမျှအရာအားလုံးကို ငါတို့တတ်နိုင်ပါ့မလား။ အဲဒါတွေ တကယ်ပဲလိုအပ်လို့လား။’ ပူပူနွေးနွေးသတို့သမီးဖြစ်သူ တီနာကဤသို့ဆိုခဲ့သည်– “ ‘မရှိမဖြစ်’ ပုံပေါက်တဲ့ အရာတချို့ဟာ အချိန်လည်းရောက်ရော မလိုအပ်တဲ့အရာအဖြစ် ပြောင်းသွားခဲ့တယ်။” ယေရှုဤသို့အကြံပေးခဲ့ရာကို သုံးသပ်ကြည့်ပါ– “သင်တို့တွင်တစ်ယောက်သောသူသည် တိုက်ကိုတည်မည်ဟုအကြံရှိလျှင်၊ ထိုတိုက်ပြီးအောင် ငွေလောက်မည်မလောက်မည်ကိုသိခြင်းငှာ၊ ရှေးဦးစွာထိုင်၍ ကုန်စရိတ်ကိုမချင့်တွက်ဘဲနေမည်လော။” (လုကာ ၁၄:၂၈) သင်နှစ်သက်ရာတိုင်းကို လုပ်ဆောင်ဖို့မတတ်နိုင်ပါက တချို့သောအရာကို ပယ်လိုက်ပါ။ ပို၍တတ်နိုင်သည့်တိုင် ကိစ္စရပ်များကို ရိုးရိုးရှင်းရှင်း သင်ထားလိုပေမည်။
အီတလီနိုင်ငံတွင် မင်္ဂလာပွဲများအတွက် ရရှိနိုင်သည့် ဝန်ဆောင်မှုများနှင့် ပစ္စည်းများကို အရောင်းမြှင့်တင်ရန် ကျင်းပခဲ့သည့် ကုန်စည်ပြပွဲတစ်ခုသည် စံပြအီတာလျန်သတို့သမီးတစ်ဦး မည်မျှသုံးစွဲနိုင်ပုံနှင့်ပတ်သက်၍ ခန့်မှန်းတွက်ချက်ပေးခဲ့သည်။ မိတ်ကပ်နှင့်ဆံပင်အလှပြုပြင်ခြင်း ဒေါ်လာ ၄၅၀; ဇိမ်ခံကားငှားရမ်းခြင်း ဒေါ်လာ ၃၀၀; မင်္ဂလာပွဲမှတ်တမ်းတင်ဓာတ်ပုံရိုက်ကူးခြင်း ဒေါ်လာ ၆၀၀; မင်္ဂလာပွဲအမှတ်တရအယ်လဘမ်စာအုပ် (ဓာတ်ပုံများမပါ) ဒေါ်လာ ၁၂၅-၅၀၀; ပန်းများ ဒေါ်လာ ၆၀၀; အကျွေးအမွေး လူတစ်ဦးလျှင် ဒေါ်လာ ၄၅-၉၀; ဂါဝန်ရှည် ဒေါ်လာ ၁,၂၀၀ နှင့်အထက်။ အရေးကြီးသောနေ့ထူးအဖြစ်သဘောထားကာ အထူးကျင်းပလိုစိတ်ဖြစ်ပေါ်မည်ဆိုလျှင်လည်း ဖြစ်ပေါ်လောက်ပေသည်။ သို့သော် အဘယ်အရာကိုပင် ဆုံးဖြတ်ပြုလုပ်ပါစေ ချင့်ချင့်ချိန်ချိန်ရှိသင့်ပေသည်။
အချို့က ငွေအမြောက်အမြား သုံးစွဲကြသော်လည်း အခြားသူများကမူ ချွေတာသုံးလိုကြသည်—သို့မဟုတ် မချွေတာလျှင်မရ၍ ထိုသို့ချွေတာကြခြင်းဖြစ်သည်။ “ကျွန်မတို့နှစ်ယောက်စလုံးက ရှေ့ဆောင်တွေ [အချိန်ပြည့်ဧဝံဂေလိတရားဟောသူများ] ဖြစ်ကြတော့ ငွေတစ်ပြားတစ်ချပ်မှမရှိဘူး၊ ဒါပေမဲ့ အဲဒါက အရေးမကြီးပါဘူး။ ကျွန်မရဲ့ ယောက္ခမက ဝတ်စုံအတွက် ပိတ်စတစ်စဝယ်ပေးတယ်၊ အဲဒီပိတ်စကို သူငယ်ချင်းတစ်ယောက်က မင်္ဂလာလက်ဖွဲ့အဖြစ် ချုပ်ပေးခဲ့တယ်။ ဖိတ်စာတွေကို ကျွန်မခင်ပွန်းက လက်ရေးနဲ့ပဲရေးတယ်၊ ခရစ်ယာန်မိတ်ဆွေတစ်ယောက်က ကားငှားပေးပါတယ်။ ဧည့်ခံပွဲအတွက် လိုအပ်တာတွေပဲဝယ်ပြီး တစ်ယောက်က ကျွန်မတို့ကို ဝိုင်လက်ဆောင်ပေးတယ်။ ဖြုန်းတီးရာလည်းမကျ၊ လုံလုံလောက်လောက်လည်းရှိတယ်လေ” ဟု သတို့သမီးတစ်ဦးကဆိုခဲ့သည်။ သတို့သားတစ်ဦး၏အဆိုအရ မိသားစုနှင့် မိတ်ဆွေများက လက်တွေ့ကျကျ အကူအညီပေးသောအခါ “ကုန်ကျစရိတ်မှာ အကြီးအကျယ် သက်သာသွားသည်။”
မိမိတို့၏ ငွေရေးကြေးရေးအခြေအနေ မည်သို့ပင်ရှိနေပါစေ ခရစ်ယာန်ဇနီးမောင်နှံတို့သည် တရားလွန်ဖြစ်ခြင်း၊ လောကဆန်ခြင်း သို့မဟုတ် ပလွှားဝင့်ဝါခြင်းမှန်သမျှကို ရှောင်ကြဉ်လိုကြပေမည်။ (၁ ယောဟန် ၂:၁၅-၁၇) မင်္ဂလာဆောင်ပွဲကဲ့သို့သော ပျော်ရွှင်ဖွယ်ကောင်းသည့် ဖြစ်ရပ်တစ်ခုသည် လူတစ်ဦးကို “အပြစ်တင်ခွင့်နှင့်ကင်းလွတ်သောသူ” ဟုယူမှတ်ခံရခြင်းမှ အတားအဆီးဖြစ်စေနိုင်သည့် စားကြူးခြင်း၊ သောက်ကြူးခြင်း သို့မဟုတ် အခြားမည်သည့်အမှုကိုမဆိုရှောင်ရန် သတိပေးသည့် အသင့်အတင့်ပြုမူခြင်းဆိုင်ရာ ကျမ်းစာမူများ လိုက်နာဖို့ ပျက်ကွက်စေမည်ဆိုလျှင် အလွန်ဝမ်းနည်းစရာပင်!—သု. ၂၃:၂၀၊ ၂၁; ၁ တိမောသေ ၃:၂။
အခြားသူများထက် ပို၍ကြီးကျယ်ပြီး ပို၍သာအောင်ကြိုးစားမည်ဟူသည့် စိတ်ဓာတ်မျိုးကို ရှောင်ကြဉ်ပါလေ။ နိုင်ငံတစ်နိုင်ငံမှ သတို့သမီးနှစ်ဦးဆင်မြန်းခဲ့သည့် ကြီးကျယ်လွန်းသော ဦးခေါင်းဖုံးဇာပဝါများကို စဉ်းစားဆင်ခြင်ကြည့်ပါ—ဇာပဝါတစ်ခုသည် အချင်း ၄၂ ပေရှိပြီး ပေါင် ၅၀၀ ခန့်လေး၏; နောက်ဇာပဝါတစ်ခုမှာ ပေတစ်ထောင်ရှည်လျားပြီး ယင်းကို ကိုင်ပေးဖို့ သတို့သမီးအရံ အယောက် ၁၀၀ လိုအပ်သည်။ ထိုသို့သောအခင်းအကျင်းမျိုးကို အတုယူခြင်းက အကျိုးသင့်အကြောင်းသင့်ရှိမှုနှင့်ပတ်သက်သည့် သမ္မာကျမ်းစာ၏အကြံပြုချက်နှင့် ကိုက်ညီပါမည်လော။—ဖိလိပ္ပိ ၄:၅။
ရိုးရာအစဉ်အလာကို လိုက်နာသင့်သလော
ထိမ်းမြားခြင်းဆိုင်ရာ ရိုးရာအစဉ်အလာများသည် တစ်နိုင်ငံနှင့်တစ်နိုင်ငံ မတူကြပေ၊ သို့ဖြစ်၍ ယင်းတို့အားလုံးကို ဖော်ပြရန်မှာ မဖြစ်နိုင်ချေ။ တစ်စုံတစ်ရာသော ဓလေ့ထုံးစံတစ်ခုကို လိုက်လျှောက်မည်မလိုက်လျှောက်မည်ကို ဆုံးဖြတ်သည့်အခါ ဇနီးမောင်နှံသည် မိမိတို့ကိုယ်ကို ဤသို့မေးသင့်ပေသည်– ‘ဤအစဉ်အလာသည် အဘယ်သဘောဆောင်သနည်း။ ကြင်စဦးဇနီးမောင်နှံအပေါ် ဆန်ကြဲခြင်းကဲ့သို့သော ကံကောင်းပါစေကြောင်း သို့မဟုတ် သားသမီးများများ မွေးဖွားပါစေကြောင်း ဆန္ဒပြုသည့် အယူသီးမှုတစ်ခုခုနှင့် ပတ်သက်နေသလော။ သမ္မာကျမ်းစာ ရှုတ်ချထားသည့် အယူမှားဘာသာ သို့မဟုတ် အခြားထုံးတမ်းများနှင့် ဆက်နွှယ်နေသလော။ ယင်းက မလျော်ကန်ရာကျနေသလော သို့မဟုတ် မေတ္တာမဲ့ရာကျနေသလော။ အခြားသူများကို အနေရခက်စေနိုင်သလော သို့မဟုတ် ထိမိလဲစေနိုင်သလော။ ကျွန်ုပ်တို့ဇနီးမောင်နှံ၏ သဘောထားများနှင့်ပတ်သက်၍ သံသယများ ပေါ်လာနိုင်သလော။ မနှစ်မြို့ဖွယ်ရာများဖြစ်နေသလော။’ အဆိုပါအချက် တစ်ချက်ချက်တွင် သံသယဖြစ်စရာရှိနေလျှင် ထိုရိုးရာအစဉ်အလာကို ရှောင်လိုက်ခြင်းကပိုကောင်းမည်ဖြစ်ပြီး လိုအပ်မည်ဆိုလျှင် ဧည့်သည်များအား အဆိုပါဆုံးဖြတ်ချက်ကို ကြိုတင်အသိပေးထားပါ။
ရွှင်လန်းမှုနှင့် စိတ်လှုပ်ရှားမှု
အရေးပါသောနေ့တွင် ဖြစ်ပေါ်သည့် စိတ်လှုပ်ရှားမှုများမှာ ဝမ်းသာကြည်နူးမှုမှသည် မျက်ရည်ကျရသည်အထိ အမျိုးမျိုးရှိနိုင်သည်။ “စိတ်ကူးယဉ်အိပ်မက် အကောင်အထည်ပေါ်လာတော့ ပျော်လိုက်တာ မပြောပါနဲ့တော့ရှင်” ဟု သတို့သမီးတစ်ဦးကဆိုသည်။ သို့သော် သတို့သားတစ်ဦးက ဤသို့ပြန်ပြောပြသည်– “ကျွန်တော့်ဘဝမှာ အဆိုးဝါးဆုံးနေ့ဖြစ်သလို အကောင်းဆုံးနေ့လည်းဖြစ်ပါတယ်။ ကျွန်တော့်ရဲ့ ယောက္ခမတွေဟာ သူတို့ရဲ့ သမီးဦးကို ကျွန်တော်ယူလိုက်တဲ့အတွက် မျက်ရည်ဖြိုင်ဖြိုင်ကျ ငိုကြွေးခဲ့ကြတယ်၊ ကျွန်တော့်ဇနီးလည်း သူ့မိဘတွေငိုနေတာကိုတွေ့တော့ လိုက်ငိုတယ်၊ နောက်ဆုံး ကျွန်တော်လည်း မခံနိုင်တော့တာနဲ့ ချုံးပွဲချငိုလိုက်မိတယ်။”
ဤသို့သော တုံ့ပြန်မှုများကြောင့် အထိတ်တလန့်ဖြစ်စရာအကြောင်းမရှိပါ—ယင်းတို့သည် စိတ်တင်းကျပ်မှုကြောင့်သာဖြစ်၏။ မိသားစုဆက်ဆံရေး၊ ဇနီးမောင်နှံချင်းပင် တစ်ခါတစ်ရံ ဆက်ဆံရေးအနည်းငယ်တင်းနေမည်ဆိုလျှင် အံ့ဩစရာမဖြစ်သင့်ချေ။ “စင်စစ်မူ၊ ယင်းသည် ဖြစ်ရပ်ကြီးတစ်ခုကို အတူတကွ အစီအစဉ်ဆွဲခြင်းတွင် ၎င်းတို့၏ ဦးဆုံးတွေ့ ကြုံမှုဖြစ်ပေမည်၊ ဤစိတ်လှုပ်ရှားမှုသည် သူတို့၏ဆက်ဆံရေးအပေါ် တစ်နည်းနည်းဖြင့် အကျိုးသက်ရောက်ဖို့ အကြောင်းများသည်” ဟု ပြီးပြည့်စုံလင်သည့် မင်္ဂလာပွဲစီစဉ်သူနှင့်မှတ်တမ်းကဆို၏။ မျှော်လင့်ထားသလို ဖြစ်မလာသည့်အတွက် စိတ်ပျက်စရာမဟုတ်ပါ; ဤသို့ဤနှယ်ဖြစ်နေစဉ် အကြံဉာဏ်နှင့် ထောက်မမှုကိုရှာဖွေခြင်းသည် အကျိုးအရှိဆုံးဖြစ်ပေမည်။
သတို့သားတစ်ဦးက ဤသို့ထုတ်ဖော်ပြောဆိုခဲ့သည်– “ကျွန်တော်အင်မတန်မှ တန်ဖိုးထားမယ့်အရာနဲ့ မရှိလို့ အမြဲတသသဖြစ်နေခဲ့ရတဲ့ အရာကတော့ ကိုယ်ရင်ဖွင့်နိုင်၊ ရင်ထဲကခံစားချက်တွေကို ဝေမျှခံစားပေးနိုင်မယ့် အကြံပေးသူတစ်ဦးပါပဲ။” ထိုသို့သောကဏ္ဍကိုဖြည့်ဆည်းပေးရန် ရင့်ကျက်သည့်မိတ်ဆွေတစ်ဦး သို့မဟုတ် ဆွေမျိုးတစ်ဦး၊ ခရစ်ယာန်အသင်းတော်ရှိ အတွေ့အကြုံရှိအခြားသူတစ်ဦးထက် သာ၍ကောင်းသောသူ ရှိပါဦးမည်လော။
မိမိတို့၏ရင်သွေးက မိသားစုအသိုက်အမြုံကို ခွဲခွာသွားတော့မည်ဖြစ်ကြောင်း သိလိုက်ရသောအခါ မိဘတို့မှာ ရွှင်လန်းခြင်း၊ ဂုဏ်ယူဝမ်းမြောက်ခြင်း၊ လွမ်းဆွတ်ခြင်းနှင့် ရင်တဒိတ်ဒိတ်ခုန်ခြင်းတို့ကို ရောထွေးခံစားရနိုင်သည်။ သို့ရာတွင် ဖန်ဆင်းရှင်ရည်ရွယ်ထားသည့်အတိုင်း မိမိတို့၏ရင်သွေးတို့ “ကိုယ့်မိဘကိုစွန့်” ကာ သူ့အိမ်ထောင်ဖက်နှင့် တွဲဖက်၍ “တစ်သားတစ်ကိုယ်တည်းဖြစ်လာ” မည့်အချိန်ရောက်လာပြီဖြစ်ကြောင်း တစ်ကိုယ်ကောင်းစိတ်ကင်းစွာ နားလည်သင့်ပေသည်။ (ကမ္ဘာဦး ၂:၂၄) မိမိ၏သားဦး အိမ်ထောင်ပြုသွားခြင်းကို မိမိကိုယ်နှိုက်တုံ့ပြန်ရာနှင့်ပတ်သက်၍ မိခင်တစ်ဦးက ဤသို့ပြန်ပြောပြသည်– “ကျွန်မမျက်ရည်ကျခဲ့ရတယ်၊ ဝမ်းနည်းပြီးကျတဲ့မျက်ရည်သာမကဘဲ တကယ့်ကို ချစ်စရာကောင်းတဲ့ သမီးချွေးမတစ်ယောက်ရလိုက်လို့ ဝမ်းသာပြီးကျတဲ့မျက်ရည်လည်းပါ,ပါတယ်။”
အဆိုပါအခါသမယကို နှစ်လိုဖွယ်နှင့် တည်ဆောက်မှုဖြစ်စေရန် မိဘများသည်—သတို့သမီးနှင့် သတို့သားကဲ့သို့ပင်—ပူးပေါင်းဆောင်ရွက်မှု၊ တည်ငြိမ်မှု၊ တစ်ကိုယ်ကောင်းမဆန်မှုနှင့် သဘောထားကြီးမှုစသည့် ခရစ်ယာန်အရည်အသွေးများကို ပြသဖို့လိုအပ်ပေသည်။—၁ ကောရိန္သု ၁၃:၄-၈; ဂလာတိ ၅:၂၂-၂၄; ဖိလိပ္ပိ ၂:၂-၄။
အချို့သော သတို့သမီးများသည် မိမိတို့မင်္ဂလာဆောင်သည့်နေ့တွင် တစ်ခုခု ဆိုးဆိုးဝါးဝါး ချွတ်ချော်တိမ်းစောင်းသွားမည်—ကားတာယာပြားသွားပြီး အခမ်းအနားသို့ နောက်ကျမှရောက်မည်၊ ရာသီဥတုဆိုးဝါးမည် သို့မဟုတ် အချိန်အနားကပ်မှ မင်္ဂလာဝတ်စုံက ပြင်၍မရအောင် ပျက်စီးသွားမည်—ကို စိုးထိတ်ကြသည်။ ဤအရာများ ဖြစ်ဖို့အကြောင်းမရှိနိုင်ပါ။ သို့ရာတွင် လက်တွေ့ကျပါလေ။ အရာရာတိုင်း အစဉ်ချောမွေ့နေမည်ကားမဟုတ်ချေ။ အဟန့်အတားများရှိမည်ကို လက်ခံရမည်ဖြစ်၏။ (ဒေ. ၉:၁၁) အခက်အခဲများနှင့် ရင်ဆိုင်ကြုံတွေ့ရာတွင် သင့်ဟာသဉာဉ်ကို မပျောက်ဆုံးသွားဖို့နှင့် အပြုသဘောထားကို ဆက်ထိန်းထားဖို့ ကြိုးစားပါ။ တစ်ခုခု တလွဲတချော်ဖြစ်သွားခဲ့သော် နောက်ပိုင်းတွင် ယင်းကို သင်စားမြုံ့ပြန်သည့်အခါ ရယ်စရာပုံပြင်တစ်ခု ဖြစ်သွားပေမည်။ မင်္ဂလာပွဲ၏ရွှင်လန်းမှုကို အသေးအဖွဲသာဖြစ်သော အမှတ်မထင်ဖြစ်ပျက်ခဲ့မှုများကြောင့် အပျက်စီးမခံပါနှင့်။
[အောက်ခြေမှတ်ချက်]
^ အပိုဒ်၊ 3 ယင်းနှင့်စပ်လျဉ်း၍ နိုင်ငံအသီးသီးသည် လင်ပြိုင် မယားပြိုင်ထားခြင်း၊ သွေးနီးချင်းသံဝါသပြုခြင်း၊ လိမ်လည်လှည့်ဖြားခြင်း၊ အိမ်ထောင်ရေးအကြမ်းဖက်ခြင်းနှင့် ဥပဒေအရ အရွယ်မရောက်သေးသူများနှင့် အိမ်ထောင်ပြုခြင်းတို့ကို တားမြစ်ထားသည်။
[စာမျက်နှာ ၇ ပါ အကျဉ်းဖော်ပြချက်]
“‘မရှိမဖြစ်’ ပုံပေါက်တဲ့ အရာတချို့ဟာ အချိန်လည်းရောက်ရော မလိုအပ်တဲ့အရာအဖြစ် ပြောင်းသွားခဲ့တယ်။”—တီနာ၊ သတို့သမီး
[စာမျက်နှာ ၇ ပါ လေးထောင့်ကွက်/ရုပ်ပုံ]
ပြင်ဆင်မှုစာရင်းနမူနာပုံစံ *
၆ လ သို့မဟုတ် ယင်းထက်စောစွာ
❑ အစီအစဉ်များကို ခင်ပွန်းလောင်း သို့မဟုတ် ဇနီးလောင်း၊ တစ်ဖက်၏မိဘမောင်ဖွားများ၊ မိဘများနှင့် ဆွေးနွေးပြောဆိုပါ
❑ ဆန္ဒရှိသည့် မင်္ဂလာပွဲအမျိုးအစားကို သတ်မှတ်ဆုံးဖြတ်ပါ
❑ ဘတ်ဂျက်ကို တွက်ချက်ပါ
❑ တရားဥပဒေတောင်းဆိုချက်များကို စစ်ဆေးပါ
❑ ဧည့်ခံပွဲကျင်းပမည့်နေရာကို ကြိုတင်ငှားထားပါ
❑ ဓာတ်ပုံဆရာနှင့်ဆက်သွယ်ပါ
၄ လ
❑ မင်္ဂလာပွဲတွင်ဆင်မြန်းမည့် အဝတ်အစားများကို ရွေးချယ်ပါ (ဗီရိုထဲမှ)၊ ဝယ်ပါ သို့မဟုတ် ချုပ်ပါ
❑ ပန်းများ ကြိုတင်မှာထားပါ
❑ ဖိတ်စာများ ရွေးချယ်၍ကြိုတင်မှာထားပါ
၂ လ
❑ ဖိတ်စာများပို့ပါ
❑ လက်စွပ်များဝယ်ထားပါ
❑ လိုအပ်သောစာရွက်စာတမ်းများ ရယူထားပါ
၁ လ
❑ မင်္ဂလာဝတ်စုံများကို အစမ်းဝတ်ကြည့်ပါ
❑ မှာထားသည့်ပစ္စည်းများနှင့် အချိန်းအချက်များကို အတည်ပြုပါ
❑ လက်ခံထားပြီးသား မည်သည့်လက်ဆောင်မဆိုအတွက် ကျေးဇူးတင်စာများရေးပါ
၂ ပတ်
❑ ကိုယ်ပိုင်ပစ္စည်းများကို နေထိုင်ရာအသစ်သို့ ပြောင်းရွှေ့ပါ
၁ ပတ်
❑ အကူအညီပေးမည့်သူအားလုံးကို သူတို့လုပ်ဆောင်ပေးရမည့်အရာနှင့်ပတ်သက်၍ သိစေပါ
❑ မည်သည့် ငှားရမ်းထားသည့်ပစ္စည်းများကိုမဆို ပြန်ပေးဖို့စီစဉ်ပါ
❑ အခြားသူများကို အတတ်နိုင်ဆုံး တာဝန်ခွဲပေးပါ
[အောက်ခြေမှတ်ချက်]
^ အပိုဒ်၊ 31 ယင်းကို ဒေသခံ တရားဥပဒေတောင်းဆိုချက်များ၊ ကိုယ်ရေးကိုယ်တာအခြေအနေများနှင့်အညီ ပြုပြင်ချိန်ညှိနိုင်ပါသည်။
[စာမျက်နှာ ၈ ပါ ရုပ်ပုံ]
“ဘုရားသခင်ဖက်စပ်၍ ထမ်းပိုးတင်တော်မူသောအရာကို လူမခွဲမခွာစေနှင့်”