ကမ္ဘာ့ဖြစ်ရပ်အကဲခတ်
ကမ္ဘာ့ဖြစ်ရပ်အကဲခတ်
မျက်လုံးကြီးတစ်လုံး
မြွေကြယ်ငါးဟုလည်းလူသိများသည့် ကြွပ်ဆတ်သောကြယ်ငါးသည် မှောင်မည်းသော သမုဒ္ဒရာရေနက်ပိုင်းများတွင် မျက်လုံးများမပါဘဲ အသက်ရှင်နေနိုင်သည်ဟူ၏။ ကြယ်ငါးမျိုးရင်းဝင်ဖြစ်သော အဆိုပါငါးသည် သားစားကောင်များကို မည်သို့တွေ့ မြင်နိုင်ပြီး ယင်းတို့မှ မည်သို့တိမ်းရှောင်သွားနိုင်ပုံနှင့်ပတ်သက်၍ သုတေသီများ စဉ်းစားရကျပ်နေကြသည်။ “ယခု ၎င်း၏လျှို့ဝှက်ချက်ကို သိပ္ပံပညာရှင်များ တွေ့ ရှိကြပြီဖြစ်၏။ ၎င်း၏အခြေခံသွင်ပြင်တစ်ခုလုံးမှာ ကြီးမားသောမျက်လုံးတစ်လုံးဖြစ်နေလေသည်” ဟု နယူးယောက်တိုင်းမ်စ်က အစီရင်ခံသည်။ ကြွပ်ဆတ်သောကြယ်ငါးသည် ကြီးမားသော ပေါင်းစပ်မျက်လုံးတစ်လုံးဖြစ်သည်ဟု ထင်ရပုံပေါ်စေရန် ပုတီးစေ့သဏ္ဌာန် မှန်ဘီလူးများကို အသုံးပြုသည်။ ထို့အပြင် ၎င်း၏အလွန်သေးငယ်သော မှန်ဘီလူးများသည် “ယနေ့ခေတ် ဓာတ်ခွဲခန်းသုံး အဏုကြည့်မှန်ဘီလူးများ၏ အလင်းစုဆုံနိုင်အားထက် ဆယ်ဆ အလင်းစုဆုံ” နိုင်သည်ဟု အဆိုပါသတင်းကဆို၏။ “အံ့ချီးဖွယ်အရာဝတ္ထုများကို လက်ရှိနည်းပညာရပ်ထက် သဘာဝက အတိုင်းထက်အလွန် ပုံစံပြုလုပ်ပေးနိုင်ပုံကို ဤလေ့လာမှုက ဖော်ပြပေးသည်” ဟု အဆိုပါလေ့လာရေး၏ ခေါင်းဆောင် စာရေးဆရာမ ဒေါက်တာ ဂျိုအန်နာ အီဇင်ဘာ့ဂ်က ပြောဆိုလိုက်သည်။
ကြံ့ခိုင်သန်မာသော ဗက်တီးရီးယား
ကမ္ဘာမြေကြီးသည် မြေအောက်မိုင်ပေါင်းများစွာထိတိုင် သက်ရှိများနှင့် ပြည့်နှက်နေသည်ဟု ကနေဒါနိုင်ငံ နေရှင်နယ်လ်ပို့စ်သတင်းစာက အစီရင်ခံလိုက်သည်။ “ထိုဗက်တီးရီးယားပိုးများသည် ကမ္ဘာ့မြေမျက်နှာပြင်အတွင်း နက်နက်ရှိုင်းရှိုင်းရှိနေနိုင်ကြရာ ယင်းပိုးမွှားများထံ မိုးရေရောက်ရှိရန်အတွက် နှစ်ပေါင်း ၅၀,၀၀၀ ကြာညောင်းမည်” ဟု ဂါ့လ်ဖ်တက္ကသိုလ်မှ ပါမောက္ခ တယ်ရီ ဘီဗာရဒ်ခ်ျကဆို၏။ “အစာမှီဝဲရန် အလင်းရောင်မရှိ၊ အလင်းမှီစုဖွဲ့ခြင်းမရှိ၊ သကြား သို့မဟုတ် ပရိုတိန်းဒြပ်ပေါင်းများလည်းမရှိချေ။” အဆိုပါဗက်တီးရီးယားပိုးများ မည်သို့အသက်ရှင်ကြသနည်း။ ပို့စ်သတင်းစာ၏အဆိုအရ၊ ရှီဝမ်နဲလ်လ (shewanella) ဟုခေါ်သည့် ဗက်တီးရီးယားပိုးသည် သံအောက်ဆိုဒ်တွင်တွယ်ကပ်နေပြီး “၎င်းတို့အသက်ရှင်သန်ဖို့ လိုအပ်သော ဇီဝတွင်းဖြစ်ပျက်မှုစွမ်းအင်ကိုရရှိရန် သတ္တုအီလက်ထရွန်များကို” စုပ်ယူကြသည်ကို ကနေးဒီးယန်းနှင့် ယူ.အက်စ်. သုတေသီများက လေ့လာတွေ့ ရှိခဲ့ကြသည်။ ထောင်သောင်းချီသော အဏုဇီဝရုပ်အမျိုးမျိုးသည် နက်ရှိုင်းသည့်မြေကြီးအောက်တွင် အသက်ရှင်နေထိုင်ကြသည်၊ သို့သော် သိသိသာသာ ခွဲခြား၍ရခဲ့သည့်ပိုးမွှားမှာ ၁၀ ရာခိုင်နှုန်းပင်မပြည့်ကြောင်း သိပ္ပံပညာရှင်တို့က ခန့်မှန်းကြ၏။
အိပ်ချင်သည့်ရောဂါ ပြန်ထလာခြင်း
“အိပ်ချင်သည့်ရောဂါသည် အာဖရိကနိုင်ငံများတွင် ပြန်ထလာခဲ့သည်မှာ အန္တရာယ်အဆင့်သို့ ရောက်ရှိနေပြီဖြစ်ကြောင်း သုတေသီများက သတိပေးခဲ့ကြ၏” ဟု ဗြိတိသျှ ဆေးဘက်ဆိုင်ရာဂျာနယ်က အစီရင်ခံလိုက်သည်။ အာဖရိကနိုင်ငံရှိ အိပ်ချင်သည့်ရောဂါ (Trypanosomiasis) တိုက်ဖျက်ရေးအသင်းအဖွဲ့မှ ပီးယား ကာတန်ကဤသို့ဆိုသည်– “လူပေါင်း သန်းခြောက်ဆယ်သည် ဘေးသင့်နေသည်ဟုယူမှတ်ရ၏၊ သို့သော် သုံးသန်းမှ လေးသန်းအထိကိုသာ စောင့်ကြပ်ကြည့်ရှုနေရပြီး တစ်နှစ်လျှင် ၄၅,၀၀၀ ခန့်ရှိ လူနာအသစ်များကို ကုသပေးနေရသည်။ လက်ရှိကူးစက်ခံနေရသည့် လူပေါင်းမှာ အနည်းဆုံး ၃၀၀,၀၀၀ မှ ၅၀၀,၀၀၀ အထိရှိမည်ဟုခန့်မှန်းရသည်။” ၁၉၆၀ ပြည့်လွန်နှစ်များက ပျောက်ကွယ်လုနီးနီးဖြစ်ခဲ့သည့် အဆိုပါရောဂါကို သုံးသပ်ကြည့်ရာ ယင်းသည် စီစီယင်ကောင်မှတစ်ဆင့် လူတို့ထံကူးစက်သွားခြင်းဖြစ်သည်။ အန္တရာယ်အများဆုံး ကျရောက်နေသည်ဟုဆိုရမည့် ဒေသများနှင့် နိုင်ငံတကာအကူအညီ လိုအပ်သည့်ဒေသများမှာ အင်ဂိုလာနိုင်ငံ၊ ကွန်ဂိုဒီမိုကရက်တစ် ပြည်သူ့သမ္မတနိုင်ငံနှင့် ဆူဒန်နိုင်ငံတောင်ပိုင်းဒေသတို့ ဖြစ်ကြပေသည်။
ဘာသာရေးကို ချက်နိုင်ငံသားများ ငြင်းပယ်
ချက်ပြည်သူ့သမ္မတနိုင်ငံ၏ စာရင်းအင်းရုံးမှထုတ်ပြန်ကြေညာသည့် ကိန်းဂဏန်းများက ချက်လူမှုအဖွဲ့အစည်းအတွင်း လူများစွာတို့ ဘာသာတရားကိုငြင်းပယ်ခဲ့ကြသည်မှာ လွန်ခဲ့သောဆယ်နှစ်ကျော်လောက်ကဟု ထောက်ပြသည်။ ဥပမာ၊ ၂၀၀၁ ခုနှစ်၌ ချက်နိုင်ငံသား ၂.၇ သန်းကသာ သူတို့ကိုယ်သူတို့ ရိုမန်ကက်သလစ်များဖြစ်ကြောင်း ဖော်ပြခဲ့ကြရာ ၄ သန်းရှိခဲ့သည့် ၁၉၉၁ ခုနှစ်နှင့် နှိုင်းယှဉ်ကြည့်နိုင်ပေသည်။ ထပ်တူကာလအတွင်း ဧဝံဂေလိချာ့ခ်ျနှင့် ဟူးဆိုက်ချာ့ခ်ျတို့သည်လည်း ၃၂ ရာခိုင်နှုန်းနှင့် ၄၆ ရာခိုင်နှုန်း အသီးသီးဆုံးရှုံးမှုများကြုံခဲ့ရ၏။ အဘယ်ကြောင့် ကျဆင်းသွားရသနည်း။ ကွန်မြူနစ်ဝါဒကျဆုံးပြီးနောက်များမကြာမီ ချက်နိုင်ငံသားများသည် မိမိတို့ကိုယ်ကို ချာ့ခ်ျအဖွဲ့ဝင်များဟု လွတ်လွတ်လပ်လပ် ဖော်ပြခဲ့ကြသည်။ သို့သော် ယနေ့တွင်မူ နိုင်ငံ့လူဦးရေ၏ ၆၀ ရာခိုင်နှုန်းနီးပါးက ဘာသာတရားမရှိဟု ပြောဆိုနေကြ၏။ တစ်ချိန်က နာမည်ကြီး ဘာသာရေးပြုပြင်ပြောင်းလဲရေးသမား ရန်ဟူးစ်၏ဇာတိဖြစ်သည့် ယခု ချက်ပြည်သူ့သမ္မတနိုင်ငံဟုခေါ်သောနိုင်ငံသည် ဥရောပရှိ ဘာသာတရားအနည်းဆုံးနိုင်ငံတစ်နိုင်ငံ ဖြစ်လာနေပေပြီ။
အလုပ်ကျင့်ဝတ် ပျောက်ခြင်းမလှ ပျောက်လျက်နေ
“အလုပ်ကျင့်ဝတ် လုံးပါးပါးလာခြင်းသည် အနာဂတ်တွင် စုပေါင်းဆောင်ရွက်မှုအပေါ် ဆိုးကျိုးကြီးကြီးမားမား သက်ရောက်လာလိမ့်မည်ဖြစ်ကြောင်း [ယူနိုက်တက်စတိတ်တွင်] လူတွေ့မေးမြန်းခံခဲ့ရသည့် ထိပ်တန်းအမှုဆောင်များမှ ငါးဆယ့်ငါးရာခိုင်နှုန်းကဆို၏” ဟု The Futurist မဂ္ဂဇင်းက အစီရင်ခံလိုက်သည်။ ထိုကဲ့သို့သော လုံးပါးပါးလာခြင်းကို ဖြစ်ပေါ်စေနိုင်သည့် အကြောင်းရင်းများတွင် “အလုပ်သမားအင်အားကို လျှော့ချသည့်အခါတွင် မိမိတို့၏အလုပ်ရှင်များအပေါ် သစ္စာရှိကြသည့် မိဘများ အလုပ်ဖြုတ်ခံကြရခြင်းကို ဂရုတစိုက်စောင့်ကြည့်နေကြ” သည့် ကလေးများကြောင့်လည်းပါဝင်သည်ဟု အဆိုပါမဂ္ဂဇင်းကပြောဆိုလိုက်သည်။ ယင်းက ၁၉၆၀ ပြည့်လွန်နှစ်များနှင့် ယင်းနှစ်နောက်ပိုင်းတွင် မွေးဖွားသောလူမျိုးဆက်အား အလုပ်ကို “မိမိတို့၏ရည်မှန်းချက်များဖြစ်သည့် ငွေ၊ ပျော်ရွှင်မှုနှင့် အားလပ်ချိန်တို့အတွက် ရရှိရန်နည်းတစ်နည်း” အဖြစ် ရှုမြင်စေခဲ့၏။ ယင်းအကြောင်းရင်းကြောင့် “တစ်ချိန်ကရှိခဲ့သော အလုပ်စိတ်ချရေးနှင့် လစာမြင့်မားရေးဟူသည့် လှုံ့ဆော်မှုမျိုးမရှိတော့” ဟူ၍ ဆောင်းပါးကဖော်ပြလိုက်သည်။ ပျောက်ခြင်းမလှပျောက်နေသည့် အလုပ်ကျင့်ဝတ်၏ ယနေ့လက်ရှိလက္ခဏာနှစ်ရပ်မှာ လုပ်ငန်းခွင်နောက်ကျမှု တိုးများလာခြင်းနှင့် အလုပ်သမားများစပ်ကြား ဆေးခွင့်ကို အလွဲသုံးစားလုပ်ခြင်းတို့ဖြစ်သည်။
On-Line သင်္ချိုင်းဝန်ဆောင်မှူလုပ်ငန်း
On-line ဝန်ဆောင်မှုလုပ်ငန်းတစ်ခုသည် ယခုအခါ စိုင်းဘာစပေ့တွင် တကယ့်သင်္ချိုင်းများသို့ သွားရောက်ကြည့်ရှုနိုင်သည့်အလား အစွမ်းရှိကြောင်း ဂျပန်တိုင်းမ်စ်ကအစီရင်ခံလိုက်သည်။ မိတ်ဆွေများနှင့် ဆွေမျိုးများသည် မိမိတို့၏ကွယ်လွန်သွားသူတို့ကို အင်တာနက်ပေါ်တွင် ဂါရဝပြုနိုင်ကြသည်။ ကွယ်လွန်သူ၏ ဓာတ်ပုံတစ်ပုံ၊ အတ္ထုပ္ပတ္တိအကျဉ်းနှင့်အတူ အုတ်ဂူကျောက်ပြားပုံတစ်ပုံသည် ကွန်ပျူတာဖန်သားပြင်ပေါ်တွင် ပေါ်လာသည်။ လည်ပတ်ကြည့်ရှုသူများ အမှာစကားပါးနိုင်ရန် နေရာလပ်တစ်ခုလည်း စီမံပေးထားသည်။ . . . ကြည့်ရှုသူတို့၏ဆန္ဒကို ဖြည့်ဆည်းပေးရန်အတွက် သစ်သီး၊ ပန်းများ၊ အမွှေးတိုင်များနှင့် အရက်ယမကာများအစရှိသည့် လှူဖွယ်ရာများကိုလည်း ကွန်ပျူတာမောက်စ်နှိပ်လိုက်ရုံနှင့် တကယ့်သင်္ချိုင်း၌ ကပ်လှူသကဲ့သို့ ကပ်လှူနိုင်ပေသည်။ On-line အောက်မေ့ဖွယ်ဝန်ဆောင်မှုလုပ်ငန်း၏ ဥက္ကဋ္ဌဖြစ်သူ တာဒါရှီ ဝါတာနာဘီ၏အဆိုအရ “နိုင်ငံရပ်ခြားတွင်နေထိုင်ကြသူတို့ကဲ့သို့သော
သင်္ချိုင်းများသို့ မကြာခဏ မသွားရောက်နိုင်သည့် လူတို့အတွက် ယင်းသည် အလွန်လက်တွေ့ကျသည့် စိတ်ကူးတစ်ခုဖြစ်ကြောင်း တချို့ကပြောဆိုကြသည်။”အာတိတ်ဒေသ သတိပေးချက်
“ဤကမ္ဘာဂြိုဟ်၏ အခြေပျက်နေသော အာတိတ်ဒေသသည် စက်မှုဖွံ့ ဖြိုးတိုးတက်မှုကို မလျှော့ချပါက ဤရာစုနှစ်အလယ်ပိုင်းလောက်တွင် ၈၀ ရာခိုင်နှုန်းအထိ အကြီးအကျယ် ပျက်စီးသွားလိမ့်မည်” ဟု ကနေဒါနိုင်ငံထုတ် သည် ဂလုပ်ဘ် အဲန် မေးလ် သတင်းစာက ဖော်ပြလိုက်သည်။ အာတိတ်ဒေသတစ်ခုလုံးရှိ လူ့ဖွံ့ ဖြိုးတိုးတက်မှု၏ ဆင့်ကဲအကျိုးဆက်ကို ယူအဲန် ပတ်ဝန်းကျင်ဆိုင်ရာ ပရိုဂရမ်မှ အစီရင်ခံစာတစ်ခုက မှတ်ချက်ချလိုက်သည်။ အဆိုပါအစီရင်ခံစာအရ၊ အကယ်၍ စက်မှုဖွံ့ဖြိုးတိုးတက်မှုသည် ၁၉၄၀ ပြည့်နှစ်မှ ၁၉၉၀ ပြည့်နှစ်အထိ ဖြစ်ပေါ်လာခဲ့သည့် ထပ်တူနှုန်းထားအတိုင်း ဆက်၍တိုးတက်နေမည်ဆိုလျှင် အကျိုးရလဒ်များမှာ အကြီးအကျယ်ပျက်စီးခြင်းဖြစ်ပေလိမ့်မည်။ အာတိတ်ဒေသရှိ တိရစ္ဆာန်များစွာတို့သည် နေရပ်ပြောင်းရွှေ့နေကြသောကြောင့် ပျက်စီးခြင်းမှာ အခြားဒေသများသို့လည်း ပျံ့နှံ့သွားဖို့ အလားအလာရှိသည်ဟုဆိုကြသည်။ “လက်ရှိတွင်၊ ၁၀ ရာခိုင်နှုန်းနှင့် ၁၅ ရာခိုင်နှုန်းစပ်ကြားရှိ ကမ္ဘာ့အာတိတ်ဒေသသည် စက်မှုဖွံ့ဖြိုးတိုးတက်မှုကြောင့် [အကျိုးယုတ်စွာ] ထိခိုက်ခံနေရသည်” ဟု အဆိုပါသတင်းစာကဆို၏။
ကလေးဘဝတွင် အဝလွန်မှု မြင့်မားလာခြင်း
မကြာသေးမီက ဗြိတိသျှ ဆေးဘက်ဆိုင်ရာ ဂျာနယ်တွင် ထုတ်ပြန်ကြေညာထားသည့် စစ်တမ်းကောက်ယူချက်ကို ဝေဖန်ရာ၌ “ဝလွန်းသည့် လမ်းလျှောက်တတ်ခါစကလေးများ အရေအတွက်သည် လွန်ခဲ့သောဆယ်စုနှစ်တွင် နှစ်ဆနီးပါးရှိခဲ့သည်။ အသက်လေးနှစ်အောက် ကလေးငါးယောက်တွင် တစ်ယောက်ထက်မကသည် ဝလွန်းနေပြီး ဆယ်ယောက်တွင် တစ်ယောက်လောက်မှာ အလွန်ဝသောကလေးဟု သတ်မှတ်ခံနေရသည်” ဟု လန်ဒန်သည်တိုင်းမ်စ်က ပြောဆိုလိုက်သည်။ မိခင်များစွာတို့သည် မိမိတို့၏ လမ်းလျှောက်တတ်ခါစကလေးများကို “အဆီပါဝင်မှု အလွန်မြင့်မားသည့် အဆင်သင့်စားသုံးနိုင်သောအစားအစာများ” ကျွေးကြကြောင်းနှင့် သူတို့လေးများအား ရုပ်မြင်သံကြားကြည့်စေခြင်းဖြင့် အပျင်းပြေစေကြကြောင်း လီဗာပူးတက္ကသိုလ်မှ ဒေါက်တာ ပီတာ ဘာန်ဒရက်ကဆိုသည်။ သူတို့လေးများ ကျောင်းနေအရွယ်ရောက်လာကြသောအခါ အဆိုပါကလေးများစွာတို့သည် ကျောင်းသို့ လမ်းလျှောက်သွားမည့်အစား ကားဖြင့်သွားကြမည်ဖြစ်ကာ ကျောင်းမှပြန်လာလျှင်လည်း အိမ်ပြင်၌ ဆော့ကစားကြမည့်အစား ရုပ်မြင်သံကြားထိုင်ကြည့်ကြပေလိမ့်မည်။ “ကလေးဘဝကာလတစ်လျှောက် အလေးချိန် လျင်မြန်စွာ တိုးလာခြင်းကို ပထမဆုံးအကြိမ်အနေနှင့် ကျွန်ုပ်တို့တွေ့ မြင်နေရသည်” ဟုဘာန်ဒရက်ကပြောဆိုလိုက်သည်။
ထပ်မံအတည်ပြုခြင်းခံရသော အသိပညာရှိရှိ သဘောတူညီမှု
၁၉၉၁ ခုနှစ် ဇန်နဝါရီလရက်စွဲတပ်ထားသည့် အမိန့်ဒီဂရီကို ဦးဆုံးချမှတ်ပြီး နောက်ဆယ်နှစ်အကြာတွင် အီတာလျံကျန်းမာရေးဝန်ကြီးဌာနက လူနာသည် မိမိ၏အသိပညာရှိရှိသဘောတူညီမှုကို မပေးမချင်း သွေးသွင်းမှုများ ပြုလုပ်ပေး၍မရနိုင်ကြောင်း အဖန်တလဲလဲပြောဆိုခဲ့၏။ ဂေဇက်တာ ယူဖစ်ရှာလီ ဒဲလာ ရီပတ်ဘလစ်ကာ အီတာလျံနာ (အီတာလျံ ရီပတ်ဘလစ်၏ အစိုးရဂေဇက်ပြန်တမ်း) တွင် ထုတ်ပြန်ကြေညာထားသည့် ၂၀၀၁ ခုနှစ်၊ ဇန်နဝါရီ ၂၅ ရက်စွဲပါ အမိန့်ဒီဂရီက ဤသို့ဖော်ပြလိုက်သည်– “သွေး သို့မဟုတ် သွေးအစိတ်အပိုင်းများသွင်းခြင်း နှင့်/သို့မဟုတ် သွေးမှထုတ်လုပ်သည့် ပစ္စည်းများသွင်းခြင်းသည် အန္တရာယ်မကင်းဟု အကြောင်းကြားခြင်းနှင့်စပ်လျဉ်း၍ ထိုသို့သော လုပ်ထုံးလုပ်နည်းများကို လက်ခံသောသူတို့သည် တင်ကြိုသဘောတူညီချက် သို့မဟုတ် သဘောမတူညီချက်ကို စာဖြင့်ရေးသားဖော်ပြရမည်။”
ကိုယ်ထိလက်ရောက်ကျူးလွန်ခံနေရသော ကိုယ်ဝန်ဆောင်မိခင်များ
“ကိုယ်ဝန်ရှိစဉ်အတွင်း ဆေးဘက်ဆိုင်ရာအခြေအနေများထက် အတူနေယောက်ျားဖော်များ၏ ကိုယ်ထိလက်ရောက်ကျူးလွန်မှုများက မိခင်နှင့်ကလေးအပေါ် ပို၍အန္တရာယ်ရှိစေကြောင်း ယခုသိရှိလာသည်” ဟု လန်ဒန်မြို့ထုတ် သည်အင်ဒီပဲန်ဒင့်သတင်းစာက ပြောဆိုလိုက်သည်။ “ဗြိတိန်နိုင်ငံရှိ အိမ်တွင်းအကြမ်းဖက်မှုနှင့်ပတ်သက်၍ တော်ဝင်ကောလိပ်မှ သားဖွားဆရာဝန်များပြုလုပ်သော စစ်ဆေးလေ့လာမှုတစ်ခုက . . . အမျိုးသမီးများအပေါ် ကိုယ်ထိလက်ရောက်ကျူးလွန်မှုများ၏ သုံးပုံတစ်ပုံသည် ကိုယ်ဝန်ဆောင်သည့်အချိန်တွင် ဦးဆုံးအကြိမ်ဖြစ်ခဲ့ကြောင်း ဖော်ပြခဲ့ကြ၏။ ကလေးတစ်ဦးရောက်လာမည့် အလားအလာကြောင့် မနာလိုဖြစ်လာကာ အမျိုးသားအချို့အား အကြမ်းဖက်စေသည်ဟူသော အထောက်အထားမှာ ကြီးထွားလျက်ရှိသည်။” “ယူကေ ရဲ့ စာရင်းဇယားတွေကို တွေ့လိုက်တဲ့အခါ ကျွန်တော်တို့မှင်တက်မိသွားတယ်” ဟု သားဖွားဆရာဝန်များ၏ တော်ဝင်ကောလိပ်မှ ပါမောက္ခ ဂျိမ်းစ် ဒရစ်ဖ်ကဆိုခဲ့သည်။ ယူနိုက်တက်စတိတ်မှပြုလုပ်သည့် အလားတူလေ့လာမှုတစ်ရပ်တွင် နိုင်ငံတွင်းမှ ကိုယ်ဝန်ဆောင်အမျိုးသမီးများစပ်ကြား သေဆုံးမှု ၅ ခုအနက် ၁ ခုသည် အသတ်ခံရခြင်းဖြစ်ကြောင်း၊ ယင်းသည် “[ထိုနိုင်ငံရှိ] ကိုယ်ဝန်ဆောင်အမျိုးသမီးများတွင် ဖြစ်နေကျအကြောင်းရင်းအများစု” ဖြစ်သည်ကို တွေ့ရှိလိုက်ရ၏။