မမွေး​သေး​သောက​လေး​ကို ကျွန်မ​ဆုံးရှုံး​ခဲ့

၂၀၀၀ ပြည့်နှစ်၊ ဧပြီ ၁၀ ရက်၊ တနင်္လာ​နေ့ဟာ နေသာ​တဲ့​နေ့​တစ်နေ့​ပါ၊ ဒါ​ကြောင့် ကျွန်မ​အိမ်ပြင်ထွက်​ပြီး လုပ်စရာ​ရှိတာ​လေး​တွေ​လုပ်ခဲ့တယ်။ ကျွန်မ​ရဲ့​ကိုယ်ဝန်​က ဒုတိယ​သုံးလ​ပိုင်း​ကို ဝင်​ခါ​စ​ပဲ​ရှိသေးတယ်၊ ကျွန်မ​ဟာ သိပ်​ပြီး သွက်သွက်​လက်​လက်မ​ရှိပေမဲ့ အိမ်ပြင်ထွက်​ရတာကို​ပျော်​တယ်။ ဒါနဲ့ ကုန်​ခြောက်​ဆိုင်​တစ်ဆိုင်​မှာ ငွေပေး​ချေ​ဖို့​စောင့်နေ​တုန်း ကျွန်မ တစ်မျိုး​ကြီး​ခံစား​လိုက်ရတယ်။

အိမ်​ပြန်​ရောက်တော့ ကျွန်မ​စိုးရိမ်​တဲ့​အတိုင်း​ပါ​ပဲ။ ကျွန်မ​သွေးသွန်​နေတယ်—အရင်​နှစ်ခါ ကိုယ်ဝန်​ရှိတုန်းက မဖြစ်ခဲ့​ဖူး​တဲ့​အရာ—မို့​လို့ ထိတ်လန့်​သွားတယ်! ကျွန်မ​ရဲ့​ဆရာဝန်​ကို ခေါ်​လိုက်တယ်၊ ဒါပေမဲ့ မနက်ဖြန်​ပြဖို့ ချိန်း​ထား​တာ​ကြောင့် စောင့်​ပြီး မနက်ဖြန်​မှ​ပဲ တစ်ခါတည်း​လာဖို့ သူ​အကြံပြု​တယ်။ အဲဒီ​ည​မှာ ခင်ပွန်း​သည်​နဲ့​ကျွန်မ​ဟာ ကလေး​နှစ်ယောက်ကို မ​သိပ်​ခင် ကျွန်မ​တို့​လိုအပ်​သလို နည်း​အမျိုးမျိုးနဲ့​ခွန်အား​ပေးဖို့ ယေဟောဝါ​ထံ အတူတကွ​ဆုတောင်း​ခဲ့​ကြတယ်။ နောက်တော့ ကျွန်မ​အိပ်ပျော်​သွားတယ်။

ဒါပေမဲ့ နှစ်နာရီ​လောက်​မှာ မချိမဆံ့​နာကျင်မှုနဲ့ ကျွန်မ​လန့်နိုး​ခဲ့တယ်။ တဖြည်းဖြည်း နာ​တာ​သက်သာ​သွားပေ​မဲ့ ပြန်​အိပ်ပျော်​ခါနီး​မှာ နာ​လာ​ပြန်​ရော၊ ဒီ​တစ်ခါ​တော့ နာ​လိုက် ပျောက်​လိုက်​ပဲ။ သွေးသွန်​တာ​လည်း များ​လာတယ်၊ မီးဖွား​ဖို့ ဝမ်း​နာ​လာပြီ​ဆိုတာ ကျွန်မ​သိလိုက်တယ်။ ဒီလို​ဖြစ်အောင် ကျွန်မ​တစ်ခုခု​များ​လုပ်ခဲ့​မိ​သလား​ဆိုတာ အမြန်​ပြန်​စဉ်းစား​ကြည့်​တယ်၊ ဒါပေမဲ့ အမှားအယွင်း​တစ်ခု​မှ စဉ်းစား​လို့​မရနိုင်​ခဲ့​ဘူး။

မနက်​ငါး​နာရီ​ရောက်တော့ ကျွန်မ​ဆေးရုံ​သွားရမယ်​ဆိုတာ သိလိုက်တယ်။ ခင်ပွန်း​သည်​နဲ့​ကျွန်မ ဆေးရုံ​ကို​ရောက်တော့ သိပ်​ပြီး​ကြင်နာ​တတ်၊ ကူညီ​တတ်​ပြီး စာနာ​တတ်​တဲ့ အရေးပေါ်​အခန်း​က အမှုထမ်းတွေရဲ့​လက်​မှာ သက်သာရာ​ရခဲ့တယ်။ ဒါနဲ့ နှစ်နာရီ​ကြာပြီး​နောက် ဆရာဝန်​က ကျွန်မ​တို့​မကြားချင်​တဲ့​သတင်းကို လာ​ပြောပြ​တယ်– ကျွန်မ​ကလေး​ကို ဆုံးရှုံး​လိုက်ရ​ပြီ​တဲ့။

အစောပိုင်း​လက္ခဏာတွေ​ကြောင့် ကျွန်မ​ဟာ ဒီလို​ဖြစ်​မှာ​ကို ကြိုတွေး​ထားပြီး သတင်းကို အေးဆေး​တည်ငြိမ်​စွာ လက်ခံခဲ့တယ်။ ဒါ့အပြင် ကျွန်မ​ရဲ့​ခင်ပွန်း​သည်​က ကျွန်မ​နဲ့​အတူ တစ်ချိန်​လုံး​ရှိ​နေခဲ့​ပြီး အများကြီး​အားပေး​ထောက်မ​ခဲ့တယ်။ အခုတော့ ကလေး​မပါဘဲ အိမ်ပြန်​ရတော့မယ်၊ ကလေး​နှစ်ယောက်​ဖြစ်​တဲ့ ခြောက်​နှစ်​သမီး ခေ့သ​လင်း​နဲ့ လေးနှစ်​သား​ဒေးဗစ်​တို့ကို ဘယ်လို​ပြော​ရ​ပါ့​မလဲ​ဆိုတာ ကျွန်​မတို့​တွေး​နေ​မိတယ်။

သားသမီး​များ​ကို ကျွန်မ​တို့​ဘာ​ပြောပြ​သနည်း

တစ်ခုခု​ဖြစ်​နေတယ်​ဆိုတာ​သိ​ပြီး ကလေး​တွေ​အိပ်ရာဝင်​သွား​ကြပြီ၊ ဒါပေမဲ့ သူတို့ရဲ့​ညီလေး ဒါမှ​မဟုတ် ညီမလေး​ဖြစ်​မယ့်​သူ ဆုံးသွား​ပြီ​ဆိုတာ ကျွန်မ​တို့ ဘယ်လို​ပြောပြ​ရမလဲ။ ပွင့်ပွင့်လင်းလင်း၊ အမှန်​တိုင်း​ပြောပြ​ဖို့ ကျွန်မ​တို့​ဆုံးဖြတ်​လိုက်တယ်။ ကျွန်မ​တို့​နဲ့​အတူ ကလေး​လေး အိမ်ပြန်လာ​မှာ​မဟုတ်ဘူးဆိုတာ​ကို ကျွန်မ​ရဲ့​အမေက ကလေး​တွေ​ကို ကူ​ပြောပြ​ပေး​ခဲ့တယ်။ ကျွန်မ​တို့​ရောက်တော့ သူတို့​ကျွန်မတို့ကို ပြေး​လာ​ဖက်ပြီး နမ်း​ကြတယ်။ သူတို့ရဲ့​ပထမ​ဆုံး​မေးခွန်း​က “ကလေး​လေး​နေကောင်း​ရဲ့​လား” ဆိုတာ​ပဲ။ ကျွန်မ မဖြေနိုင်​ခဲ့​ဘူး၊ ဒါပေမဲ့ ကျွန်မ​ရဲ့​ခင်ပွန်း​က ကျွန်မတို့ကို သိုင်းဖက်​လိုက်ပြီး “ကလေး​လေး​သေသွား​ပြီ” ဆိုပြီး​ပြော​တယ်။ ကျွန်မ​တို့ တစ်ယောက်ကို​တစ်ယောက်​ဖက်ပြီး​ငို​ကြတယ်၊ အဲဒါက စိတ်​သက်သာမှု​ရလာဖို့ အကူအညီ​ဖြစ်စေ​ခဲ့တယ်။

ဒါပေမဲ့ ကလေး​တွေ​ရဲ့ နောက်ပိုင်း​တုံ့ပြန်မှု​တွေ​အတွက် ကျွန်မ​တို့ လုံးဝ​မ​ပြင်ဆင်​ထားခဲ့​ကြဘူး။ ဥပမာ​အနေ​နဲ့ ကျွန်မ​ကိုယ်ဝန်ပျက်​ကျ​ပြီး နှစ်ပတ်​လောက်​အကြာမှာ အသက်ကြီးသူ​သက်သေခံ​တစ်ယောက်​နဲ့ ကျွန်မ​တို့​မိသားစုရဲ့ ရင်းနှီးတဲ့​မိတ်ဆွေ​တစ်ယောက် ဆုံးသွား​ကြောင်း ယေဟောဝါသက်သေ​တွေ​ရဲ့ ဒေသခံ​အသင်းတော်မှာ​ကြေညာ​ခဲ့တယ်။ လေးနှစ်​သား​ဒေးဗစ်​ဟာ ရှိုက်ကြီးတငင် ငိုချ​လို့ ခင်ပွန်း​သည်​က အပြင်​ကို​ချီ​သွားရတယ်။ အ​ငို​တိတ်​ပြီး​နောက် ဒေးဗစ်​က သူ့​မိတ်ဆွေ​ဘာကြောင့်​သေရ​သလဲ​လို့​မေးတယ်။ အဲဒီနောက် ကလေး​လေး ဘာကြောင့်​သေသွား​တာလဲ​ဆိုပြီး မေးတယ်။ ပြီး​တော့ “အဖေ​ကော သေ​မှာ​လား” ဆိုပြီး သူ့​အဖေ​ကို​မေးတယ်။ ယေဟောဝါ​ဘုရားသခင်ဟာ စာတန်​ကို​ဖျက်ဆီး​ပြီး ကိစ္စရပ်​တွေ​ကို ဘာဖြစ်​လို့ မဖြေရှင်း​သေး​တာလဲ​ဆိုတာ​ကိုလည်း သူသိ​ချင်​တယ်။ တကယ်​ပါ​ပဲ၊ သူ့ရဲ့​နုနယ်​တဲ့​စိတ်​ထဲမှာ ဘယ်လောက်တောင် ဝင်ရောက်​သွားတယ်​ဆိုတာ​တွေ့​ရလို့ ကျွန်မ​တို့ အံ့အားသင့်​ခဲ့​ကြတယ်။

ခေ့သ​လင်း​လည်း မေးခွန်းတွေ​အများကြီး​မေးတယ်။ ကလေး​အရုပ်တွေနဲ့ သူက​စား​တဲ့​အခါ အရုပ်​တစ်ခု​က​ဖျားနေ​သ​ယောင် တခြား​အရုပ်​တွေ​ကို သူနာပြု​တွေ ဒါမှ​မဟုတ် မိသားစုဝင်​တွေ​ပုံစံ​နဲ့ သူ​ဆော့​ကစား​လေ့​ရှိတယ်။ ကတ်​ထူ​ပုံး​တစ်လုံး​ကို ဆေးရုံ​ပုံစံ သူ​ပြင်ဆင်​ပြီး တစ်ခါ​တ​လေ သူ့​အရုပ်​တစ်ရုပ် သေဆုံး​သွား​သ​ယောင်​ပြု​တယ်။ ကလေး​တွေ​ရဲ့​မေးခွန်း​နဲ့ ကစား​ပုံ​တွေ​က အသက်​အကြောင်း၊ စုံစမ်းမှု​တွေ​ကို​ရင်ဆိုင်​ဖြေရှင်း​ဖို့ ကျမ်းစာ​က ဘယ်လို​ကူညီ​ပေး​နိုင်​ကြောင်း သူတို့ကို​သင်ပေးဖို့ ကျွန်မတို့ကို အခွင့်အရေး​အများကြီး​ရစေ​ခဲ့တယ်။ ပြီး​တော့ ကမ္ဘာ​မြေကြီးကို ဆင်းရဲ၊ နာကျင်မှု​အမျိုးမျိုး​ကင်း​ပြီး သေခြင်း​တောင်​မရှိတော့တဲ့ လှပတဲ့​ပရဒိသု​ဖြစ်စေ​မယ် ဆို​တဲ့ ဘုရားသခင့်​ရည်ရွယ်ချက်ကို သူတို့ကို ပြန်သတိရ​စေ​ခဲ့တယ်။—ဗျာ. ၂၁:၃၊ ၄။

ဆုံးရှုံးမှု​ကို ကျွန်မ အောင်မြင်​နိုင်နင်း​ခဲ့​ပုံ

ဆေးရုံ​က​ပြန်ရောက်​ခါ​စ​မှာ ကျွန်မ​ရဲ့​စိတ်​တွေ တွေဝေ​ပြီး ရှုပ်ထွေး​နေခဲ့တယ်။ လုပ်စရာတွေ​ရှိပေမဲ့ ဘယ်က​စ​လုပ်​ရ​မှန်း မသိခဲ့ဘူး။ အလားတူ​တွေ့ကြုံ​ခဲ့​ဖူး​တဲ့ မိတ်ဆွေ​တချို့​ကို ကျွန်မ​ဖိတ်ခေါ်​ခဲ့​ပြီး သူတို့ဟာ တကယ်​နှစ်သိမ့်​ပေး​သူတွေပါ​ပဲ။ ချစ်ခင်​ရတဲ့​မိတ်ဆွေ​တစ်ယောက်​ဆိုရင် ကျွန်မတို့ကို ပန်း​တွေ​ပို့ပေး​ပြီး နေ့လယ်​ပိုင်း​မှာ ကလေး​တွေ​ကို​ခေါ်​သွားဖို့ စကား​ကမ်း​လှမ်း​ခဲ့တယ်။ သူ့ရဲ့​အရေးတယူ​ရှိ​မှု​နဲ့ လက်တွေ့ကျတဲ့​အကူအညီ​အတွက် ကျွန်မ​အထူး​ကျေးဇူး​တင်​မိ​ပါ​တယ်!

မိသားစု​ဓာတ်​ပုံ​တွေ​ကို အယ်လဘမ်​တွေ​ထဲ ကျွန်မ​စီ​ထည့်​တယ်။ မ​ဝတ်​ရသေးတဲ့ ကလေး​အဝတ်တွေကို ကျွန်မ​ကိုင်ကြည့်​တယ်—အဲဒါတွေ​က ကလေး​နဲ့​ပတ်သက်ပြီး တစ်ခု​တည်း​သော ထိတွေ့​ကိုင်တွယ်​လို့​ရတဲ့ သတိရ​စ​ရာတွေ​ပါ​ပဲ။ အပတ်​ပေါင်း​များစွာ စိတ်ဓာတ် ထိုး​ကျ​သွား​လိုက် ပြန်​တက်လာ​လိုက်​ဖြစ်​နေတယ်။ မိသားစုနဲ့ သူငယ်ချင်းတွေ​ဆီက ဒီလောက်​အားပေး ထောက်မမှု​ရတာ​တောင်—တချို့​နေ့​များ​ဆိုရင် ကျွန်မ​ငို​လို့​မပြီး​နိုင်ဘူး။ တစ်ခါ​တ​လေ ကျွန်မ​ရူး​သွားပြီ​လို့​တောင် ထင်​မိတယ်။ ကိုယ်ဝန်ဆောင်​မိတ်ဆွေ​တွေ အနားမှာ​ရှိရင် အခက်ဆုံး​ပဲ။ အရင်တုန်းက ကိုယ်ဝန်ပျက်​ကျ​တယ်​ဆိုတာ မိန်းမသား​တစ်ယောက်​ရဲ့​ဘဝမှာ “အသေးအဖွဲ” ပါ​ပဲ၊ လွယ်လွယ်နဲ့ ပြန်​နာလန်ထူ​နိုင်​တဲ့​အရာလို့ ကျွန်မ​ထင်​ခဲ့​မိ​တာ။ မှား​လိုက်​လေ​ခြင်း! *

ချစ်ခြင်း​မေတ္တာ—အကောင်းဆုံး​ကုထုံး

အချိန်ကုန်​လာတာ​နဲ့​အမျှ ထိရောက်တဲ့​ကုထုံး​တစ်ခု​က​တော့ ကျွန်မ​ရဲ့​ခင်ပွန်း​သည်​နဲ့ ခရစ်ယာန်​ရောင်းရင်း​တွေ​ပြ​တဲ့ မေတ္တာပါပဲ။ သက်သေခံ​တစ်ယောက် ဆိုရင် ညနေ​စာ​ချက်​ပြီး အိမ်ကို​ယူလာ​ပေးတယ်။ အသင်းတော်​အကြီးအကဲ​တစ်ယောက်​နဲ့ သူ့​ဇနီးသည်​က ပန်း​တွေ​နဲ့ ကတ်​လှလှလေး​တစ်ခု​ယူလာ​ပြီး ညနေပိုင်း​မှာ လာ​နေ​ပေး​ခဲ့​ကြတယ်။ သူတို့​ဘယ်လောက်​အလုပ်​ရှုပ်​တယ်​ဆိုတာ ကျွန်မ​တို့​သိထားတဲ့​အတွက် သူတို့ရဲ့​ထောက်ထား​စာနာမှု​က ကျွန်မ​တို့​နှလုံးကို ထိမိ​ခဲ့တယ်။ မိတ်ဆွေ​အတော်များများ​က ကတ်​တွေ၊ ပန်း​တွေ​ပို့ပေး​ကြတယ်။ “မင်းကို ဒို့​တစ်​တွေ​သတိရပါ​တယ်” ဆို​တဲ့​စကား​လေး​တွေ​က ဘာမှ​မဟုတ်ပေမဲ့​လို့ တော်တော်လေး​အရာရောက်​တာ​ပဲ! အသင်းတော်က ညီအစ်မ​တစ်ယောက် ဒီလို​ရေးခဲ့တယ်– “အသက်ကို အဖိုးတန်​ဆုံး​အရာ​အဖြစ် ယေဟောဝါ​ရှုမြင်သလို ကျွန်မ​တို့​ရှုမြင်​ကြတယ်။ ကိုယ်တော်​ဟာ စာငှက်​တစ်ကောင် မြေပေါ်​ကျ​သွားတာကို သိတယ်​ဆိုရင် လူ့​သန္ဓေသား​ပျက်​ကျ​သွားတာကို သိ​မှာ​အမှန်​ပဲ။” ကျွန်မ​ရဲ့​ဝမ်းကွဲ​က ဒီလို​ရေးခဲ့တယ်– “အံ့ဖွယ်ကောင်း​တဲ့ မွေးဖွားခြင်းနဲ့ အသက်ကို ကျွန်မ​တို့​သိပ်​အံ့သြမိတယ်၊ သန္ဓေသား​ပျက်​ကျ​သွားတဲ့အခါ​မှာလည်း အံ့အားသင့်​စ​ရာ​ပဲ။”

အပတ်​အနည်းငယ်​ကြာပြီး​နောက် ကျွန်မ​ဟာ ဘုရားသခင့်​နိုင်ငံတော်​ခန်းမ​မှာ ငို​ချင်စိတ်​ပေါ်လာ​လို့ အစည်းအဝေး​မစ​ခင် အပြင်ထွက်​ခဲ့​ရတယ်။ ကျွန်မ မျက်ရည်​နဲ့​ထွက်သွား​တာ​ကို သတိပြုမိ​တဲ့ မိတ်ဆွေ​နှစ်ယောက်​က ကား​ထဲမှာ ကျွန်မ​နဲ့​အတူ​လာ​ထိုင်၊ ကျွန်မ​ရဲ့​လက်ကို​ကိုင်​ပြီး ရ​ယ်​အောင်​လုပ်ပေးခဲ့​ကြတယ်။ မကြာခင် ကျွန်မ​တို့​သုံးယောက်စလုံး ခန်းမ​ထဲ​ပြန်ဝင်​ခဲ့​ကြတယ်။ “ညီအစ်ကို​စွဲကပ်​သည်ထက် သာ၍​စွဲကပ်” တဲ့​မိတ်ဆွေ​သူငယ်ချင်းတွေ​ရှိတာ တကယ်​ပျော်စရာ​ပဲ!—သု. ၁၈:၂၄။

သတင်း​ပျံ့သွား​တဲ့​အခါ ထပ်တူ​အဖြစ်မျိုး​ကြုံတွေ့​ခဲ့​ရတဲ့ သက်သေခံ​ရောင်းရင်း​တွေ ဘယ်​နှစ်ယောက်​ရှိတယ်ဆိုတာ သိလိုက်​ရလို့ ကျွန်မ​အံ့အားသင့်မိ​တယ်။ အရင်က ကျွန်မ​နဲ့​သိပ်​မ​ရင်းနှီးတဲ့​သူ တချို့က​တောင် အထူး​နှစ်သိမ့်​အားပေးနိုင်​ခဲ့​ကြ​တာ။ ကျွန်မ​လိုအပ်​နေချိန်မှာ သူတို့ရဲ့​မေတ္တာပါ​တဲ့ အားပေး​ထောက်မမှု​က “အဆွေ​ခင်ပွန်း​သည် အခါ​ခပ်သိမ်း​ချစ်တတ်​၏။ ညီအစ်ကို​သည် [ဆင်းရဲ​ခက်ခဲ​သော] ကာလ​အဖို့ မွေးဖွား​လျက်​ရှိ၏” ဆို​တဲ့​ကျမ်း​စကား​ကို ပြန်သတိရ​စေ​ခဲ့တယ်။—သု. ၁၇:၁၇။

ဘုရားသခင့်​စကားတော်​မှ နှစ်သိမ့်မှု

ကျွန်မ​ကိုယ်ဝန်ပျက်​ကျ​ပြီး နောက်​တစ်ပတ်​မှာ ခရစ်တော်​ရဲ့​သေခြင်း အောက်မေ့ရာပွဲ​နေ့​ရောက်​လာတယ်။ တစ်​ညနေခင်း​မှာ ယေရှုရဲ့​နောက်ဆုံး​နေ့ရက်​များ​အကြောင်း ကျမ်းစာ​မှတ်တမ်း​ကို ကျွန်မ​တို့​ဖတ်နေ​ရင်း​နဲ့ ‘ယေဟောဝါ​ဟာ ဆုံးရှုံး​ခြင်း​ရဲ့ နာကျင်မှု​ဝေဒနာ​ကို နားလည်​တော်​မူ​တယ်။ မိမိရဲ့​သားတော်​အရင်း​ကို ကိုယ်တော်​ဆုံးရှုံး​ဖူး​ခဲ့​တာ​ပဲ’ ဆိုပြီး ရုတ်တရက် စိတ်ထဲ​ပေါ်လာ​တယ်။ ယေဟောဝါ​ဟာ ကျွန်မ​တို့​ရဲ့ ကောင်းကင်​ခမည်းတော်​ဖြစ်​တဲ့​အတွက် ကိုယ်တော်​ဟာ ဘယ်လောက်​နားလည်မှု​ရှိပြီး မိမိရဲ့​ကျေးကျွန်—ကျားမ မ​ဟူ​အပေါ် ဘယ်လောက်​အထိ စာနာမှု​ရှိကြောင်း တစ်ခါ​တ​လေ ကျွန်မ​မေ့လျော့​သွားခဲ့တယ်။ ပြန်သတိရ​လိုက်တဲ့​အချိန်​လေးမှာ စိတ်​သက်သာမှု အကြီးအကျယ်​ရရှိခဲ့တယ်။ တစ်ခါ​နဲ့​မှ​မတူ​အောင် ယေဟောဝါ​နဲ့ ကျွန်မ​ပို​ရင်းနှီး​လာ​သလို ခံစားရ​ပါ​တယ်။

ကျမ်းစာ​အခြေပြု​စာပေ​စာတမ်း​တွေ​ကနေ​လည်း ကျွန်မ အားပေးမှု​ရရှိခဲ့တယ်၊ အထူးသဖြင့် ချစ်ရသူ​တစ်ဦး​ကို ဆုံးရှုံး​ခြင်း​အကြောင်း​ဖော်ပြ​ထား​တဲ့ ကင်းမျှော်စင်​နဲ့ နိုးလော့!မဂ္ဂဇင်း​အဟောင်း​တွေ​ကနေ​ဖြစ်တယ်။ ဥပမာ၊ ၁၉၈၇၊ ဩဂုတ် ၈ ရက်ထုတ်​နိုးလော့! [လိပ်] ထဲ​က “ကလေး​တစ်ဦး​ဆုံးရှုံး​ရခြင်း​ကို ရင်ဆိုင်​ခြင်း” အကြောင်း​ဆောင်းပါး​တွေ​အပြင် သင်​ချစ်​မြတ်နိုး​ရသူ​တစ်ဦး သေလွန်​သောအခါ ဆို​တဲ့​ဘရိုရှာ​တွေ​က သိပ်​ပြီး​တော့ အထောက်အကူ​ပြု​တယ်။ *

ပူဆွေး​ဝမ်းနည်းမှု​အဆုံးသတ်

အချိန်​ကြာ​လာတော့ ကျွန်မ စိတ်​ရှင်းရှင်း​နဲ့ ရ​ယ်​ရွှင်​နိုင်​တဲ့​အခါ​နဲ့ ဆုံးသွား​တဲ့​ကလေး​အကြောင်း​မပြော​ဘဲ စကားစမြည်​ပြောဆို​နိုင်​တဲ့​အခါ ကျွန်မ​သက်သာရာ​ရပြီ​ဆိုတာ သိခဲ့တယ်။ ဒါတောင်မှ၊ ကိုယ်ဝန်ပျက်​ကျ​တာ မကြား​မိ​တဲ့ မိတ်ဆွေတွေကို ဒါမှ​မဟုတ် မိသားစု​တစ်ခု​က ဘုရားသခင့်​နိုင်ငံတော်​ခန်းမ​ကို ကလေး​ပေါက်စ​လေး​နဲ့​လာတာ ကျွန်မ​တွေ့​မိ​တဲ့​အခါ​မျိုး​တွေ​မှာ စိတ်ပိုင်း​ဆိုင်ရာ မြေ​မြှုပ်​မိုင်း​တွေ​ကို ကျွန်မ​ဝင်​တိုး​မိ​သေး​တယ်။

ဒီလိုနဲ့ တစ်မနက်​မှာ အိပ်ရာ​က​နိုး​တော့ တိမ်​ကင်းစင်​သွား​သလိုပဲ ခံစား​မိတယ်။ မျက်စိ​မ​ဖွင့်​ခင်​မှာ​ကို စိတ်​သက်သာမှု​ရရှိခဲ့တယ်—လ​နဲ့​ချီ​ပြီး ကျွန်မ မခံစား​ရတဲ့ ငြိမ်သက်မှု​နဲ့ တည်ငြိမ်မှု​ဖြစ်တယ်။ ဒါပေမဲ့ ကလေး​ဆုံး​သွားတာ တစ်နှစ်​ကြာပြီး​နောက် ကျွန်မ​ကိုယ်ဝန်​ရှိလာတဲ့​အခါ နောက်ထပ်​ကိုယ်ဝန်ပျက်​ကျ​နိုင်တယ်​ဆို​တဲ့​အတွေး ပေါ်လာ​သေး​တယ်။ ဝမ်းသာစရာက ၂၀၀၁၊ အောက်တိုဘာ​လမှာ ကျန်းမာ​တဲ့​သား​ယောက်ျားလေး​ကို ကျွန်မ​မွေးဖွားခဲ့တယ်။

ဆုံးရှုံး​ခဲ့​ရတဲ့​ကလေး​အတွက် ကျွန်မ ဝမ်းနည်း​ကြေကွဲ​နေတုန်းပဲ။ ဒါပေမဲ့ ဖြစ်​ခဲ့​တဲ့​ဖြစ်ရပ်​တစ်ခုလုံး​က အသက်၊ ကျွန်မ​ရဲ့​မိသားစု၊ ခရစ်ယာန်​ရောင်းရင်း​တွေ​နဲ့ ကျွန်မတို့ကို​နှစ်သိမ့်မှု​ပေး​တဲ့—ဘုရားသခင်​ကို ပို​ပြီး​လေးမြတ်​တန်ဖိုး​ထား​စိတ်​ပေါ်​စေ​ခဲ့တယ်။ ဒီ​တွေ့ကြုံမှု​က ဘုရားသခင်ဟာ ကျွန်မ​တို့​ရဲ့​ရင်သွေး​တွေ​ကို ခေါ်​သွားတာ​မဟုတ်ဘဲ ‘ခပ်သိမ်း​သော [ကျွန်ုပ်] တို့​၌ အချိန်​နှင့်​ကြိုတင်​မမြင်​ရသော​ဖြစ်ပျက်​မှု ကျရောက်​တတ်’ တယ်​ဆို​တဲ့ ထိမိ​လှတဲ့​အမှန်တရားကိုလည်း ပေါ်လွင်​စေ​ခဲ့တယ်။—ဒေ. ၉:၁၁။

ကိုယ်ဝန်ပျက်​ကျ​ခြင်း​ရဲ့ ကိုယ်​စိတ်​နာကျင်မှု​အပါအဝင် ဝမ်းနည်းပူဆွေး​ခြင်း၊ အော်ဟစ်​ခြင်း​နဲ့ နာကျင်မှု​ရှိသမျှကို ဘုရားသခင်​ဖယ်ရှားပစ်​မယ့်​အချိန်ကို ကျွန်မ​စောင့်မျှော်​နေ​မိတယ်! (ဟေရှာယ ၆၅:၁၇-၂၃) အဲဒီအခါ​ကျ​ရင် နာခံမှု​ရှိတဲ့​လူသား​အပေါင်း ဒီလို​ပြော​နိုင်​ပါ​လိမ့်မယ်– “အို​သေ​မင်း သင်၏​အောင်​ခြင်း​သည် အဘယ်​မှာ​ရှိ​သနည်း။ အို​သေ​မင်း သင်၏​လက်နက်​သည် အဘယ်​မှာ​ရှိ​သနည်း။”—၁ ကောရိန္သု ၁၅:၅၅၊ သမ္မာ; ဟေရှာယ ၂၅:၈။—ဆောင်းပါး​ရှင်​ရေးသား​ပေး​ပို့​သည်။

[အောက်ခြေ​မှတ်ချက်များ]

[စာမျက်နှာ ၁၉ ပါ လေးထောင့်ကွက်]

ကိုယ်ဝန်ပျက်​ကျ​သည့် ကြိမ်နှုန်း​နှင့်​အကြောင်းရင်း​များ

“ကိုယ်ဝန်​ဆောင်​မှု​အားလုံး​၏ ၁၅ မှ ၂၀ ရာခိုင်နှုန်း​သည် ကိုယ်ဝန်ပျက်​ကျ​ခဲ့​ကြောင်း လေ့လာမှု​များ​က​ဖော်ပြ​သည်” ဟု ကမ္ဘာ့​စာအုပ်​စွယ်စုံ​ကျမ်း​က​ဆို​သည်။ “သို့သော် မိမိတို့​ကိုယ်ဝန်​ရှိ​နေသည်​ကို အမျိုးသမီး​အများစု သိ​ပင်မ​သိ​ကြသော​အချိန်၊ သန္ဓေတည် (သန္ဓေ​အောင်) ပြီး ပထမ​နှစ်ပတ်​အတွင်း​တွင် ကိုယ်ဝန်ပျက်​ဖို့​အလားအလာ အများဆုံး​အချိန်​ဖြစ်သည်။” “ကိုယ်ဝန်ပျက်​ကျ​မှု ၈၀ ရာခိုင်နှုန်း” ကျော်​မှာ “သန္ဓေတည်​ပြီး ပထမ ၁၂ ပတ်​အတွင်း ဖြစ်ပျက်” ကြောင်း၊ ၎င်း​မှ ထက်ဝက်​ခန့်​မှာ သန္ဓေသား​၏​ခရိုမိုဆုမ်း​များ ချွတ်ယွင်း​သောကြောင့်​ဟု​ယူဆ​ကြောင်း ကိုးကား​ဖော်ပြချက်​နောက်တစ်ခု​က ဆို​၏။ အဆိုပါ​ချွတ်ယွင်းချက်​များ​မှာ မိခင် သို့​မဟုတ် ဖခင်​၏​ခရိုမိုဆုမ်း​များ​၌ အလားတူ​ချွတ်ယွင်းချက်​များ​ရှိသောကြောင့် မဟုတ်​ချေ။

ကိုယ်ဝန်ပျက်​ရသည့် အခြား​အကြောင်းရင်း​များ​မှာ မိခင်၏​ကျန်းမာ​ရေး​မှ အစပြု​နိုင်​သည်။ ဆေး​ဘက်​ဆိုင်ရာ​အာဏာပိုင်​အဖွဲ့က ဟော်မုန်း​ဆိုင်ရာ​နှင့် ရောဂါ​ပြီး​စနစ်​ချို့ယွင်းမှု၊ ကူးစက်​ရောဂါ​များနှင့် မိခင်၏​သား​အိမ်​ခေါင်း သို့​မဟုတ် သား​အိမ်​တွင် မူမမှန်​မှုများ​ကို ထောက်ပြ​ကြသည်။ ဆီး​ချို​ရောဂါ (ကောင်းစွာ​မထိန်းချုပ်​ပါ​က) နှင့် သွေး​တိုး​ရောဂါ​ကဲ့သို့​သော နာတာရှည်​ရောဂါ​များ​ကြောင့်​လည်း ကိုယ်ဝန်ပျက်​ကျ​နိုင်​သည်။

ကျွမ်းကျင်​သူများ​၏​အဆို​အရ ကိုယ်လက်​လေ့ကျင့်ခန်း​လုပ်ခြင်း၊ လေးလံ​သော​ပစ္စည်း​များ​မ​ခြင်း သို့​မဟုတ် လိင်ဆက်ဆံခြင်း​တို့​ကြောင့် ကိုယ်ဝန်ပျက်​ကျ​ဖို့​အကြောင်း​မရှိပေ။ ချော်လဲခြင်း၊ အရှိန်​မ​ပြင်း​သော​ရိုက်ချက် သို့​မဟုတ် ရုတ်တရက်​ထိတ်လန့်​မှု​တို့​ကြောင့် ကိုယ်ဝန်ပျက်​ကျ​နိုင်​ဖွယ်​မရှိ​ချေ။ ကိုးကား​ဖော်ပြချက်​တစ်ခု​က ဤသို့​ဆို​၏– “သင်​ကိုယ်တိုင်​၏ အသက်​အန္တရာယ် စိုးရိမ်ဖွယ်​မဖြစ်​သ၍ ဒဏ်ရာ​ရခြင်း​သည် သန္ဓေသား​ကို အန္တရာယ်​ပြု​စ​ရာ​အကြောင်း​မရှိပါ။” သား​အိမ်​ဖွဲ့စည်းပုံ​က ဉာဏ်ပညာ​နှင့် မေတ္တာ​ရှိသော​ဖန်ဆင်း​ရှင်​ဖြစ်​ကြောင်း အမှန်​ထင်ရှားစေ​သည်​တကား!—ဆာလံ ၁၃၉:၁၃၊ ၁၄။

 [စာမျက်နှာ ၂၁ ပါ လေးထောင့်ကွက်/ရုပ်ပုံ]

မိသားစု​နှင့် မိတ်ဆွေများ ထောက်မ​ကူညီ​နိုင်​ပုံ

တစ်ခါတစ်ရံ မိသားစုဝင်​တစ်ဦး သို့​မဟုတ် မိတ်ဆွေ​တစ်ဦး ကိုယ်ဝန်ပျက်​ကျ​သောအခါ အဘယ်အရာ​ပြောဆို၊ လုပ်ကိုင်​ပေး​ရ​မှန်း​မသိ ဖြစ်တတ်​သည်။ ထိုသို့​သော​ဆုံးရှုံးမှု​ကို လူ​တို့​အမျိုးမျိုး​တုံ့ ပြန်​ကြသည်၊ ထို့​ကြောင့် နှစ်သိမ့်မှု​နှင့် အကူအညီ​ပေး​ရန် ပုံသေ​မရှိပါ။ သို့သော် အောက်ပါ​အကြံပေး​ချက်​များ​ကို သုံးသပ်ကြည့်​ပါ​လေ။ *

လက်တွေ့ကျကျ သင်​ကူညီ​ပေး​နိုင်သော​အရာများ–

◆ အသက်​ပို​ကြီးသော​ကလေး​များ​ကို ကြည့်ရှု​စောင့်ရှောက်​ထား​ပေး​မည်​ဟု စကား​ကမ်း​လှမ်း​ပါ။

◆ အစားအစာ​ချက်ပြုတ်​ပြီး မိသားစု​ထံ ယူသွား​ပေး​ပါ။

◆ ကလေး​၏​ဖခင်​ကိုလည်း အားပေးပါ။ ဖခင်​တစ်ဦး​ပြော​ခဲ့​သည့်​အတိုင်း​ပင် “ဒီလို​အခြေအနေ​မျိုးမှာ အဖေ​ဖြစ်သူ​တွေ​အတွက်​ပို့ပေး​တဲ့ ကတ်​တွေ သိပ်​မရှိဘူး။”

အထောက်အကူ​ပြုသော ပြောဆို​စ​ရာ​များ–

◆ “ရှင်​ကိုယ်ဝန်ပျက်​ကျ​သွားတာ​ကြား​ရလို့ စိတ်မကောင်း​ပါ​ဘူး။”

ဤ​စကား​ရိုးရိုးလေး​က များစွာ​အရာရောက်​သည်၊ နှစ်သိမ့်​စကား​များ​ထပ်​ပြော​ဖို့ လမ်းဖွင့်​နိုင်​သည်။

◆ “ကိစ္စ​မရှိဘူး ငိုချ​ပစ်လိုက်။”

ကိုယ်ဝန်ပျက်​ကျ​ပြီး ပထမ​အပတ် သို့​မဟုတ် လ​များ​ကြာပြီး​နောက်​ပင် ငို​ချင်စိတ်​ပေါ်​လေ့​ရှိသည်။ သူ၏​ခံစားချက်​များ​ကို ဖော်ပြ​သည့်​အတွက် သူ့ကို သင်​အထင်မသေး​ကြောင်း စိတ်ချ​စေပါ။

◆ “ရှင်​ဘယ်လို​နေတယ်​ဆိုတာ သိရ​အောင် နောက်​အပတ်​ကျ​ရင် ကျွန်မ ဖုန်း​ပြန်​ဆက်​လို့​ရမလား။”

အစပိုင်း​တွင်၊ ခံစားရ​သူများ​သည် စာနာစိတ်​ဖြင့်​အားပေးမှု အမြောက်အမြား​ကို ရရှိ​ပေမည်၊ သို့သော် အချိန်​ကုန်လွန်​လာပြီး သူတို့​စိတ်ထိခိုက်​နေဆဲ​အချိန်တွင် မိမိတို့ကို မေ့လျော့​သွား​ကြပြီ​ဟု သူတို့​ခံစား​ရနိုင်​သည်။ သင်​အားပေးနေ​ဆဲ​ဖြစ်​ကြောင်း သူတို့ကို​သိစေ​လျှင် ကောင်း​၏။ အပတ်​နှင့်​ချီ​၍ သို့​မဟုတ် လ​နှင့်​ချီ​၍ ခံစားချက်​များ​ပေါ်လာ​နိုင်​သည်။ ထို​ခံစားချက်​များသည် ကိုယ်ဝန်​ပြန်​ရရှိ​ပြီး​နောက်​၌​ပင် ပေါ်ထွက်​လာနိုင်​သည်။

◆ “ဘာ​ပြော​ရ​မှန်း​တောင် တကယ်​မသိတော့ဘူး။”

ဘာမှ​မပြောခြင်း​ထက် ထိုသို့​မသိကြောင်း​ပြော​ခြင်း​က သာ၍​ကောင်း​လေ့​ရှိသည်။ သင်၏ ရိုးသားမှု​နှင့် ထို​တွင် သင်​ရှိနေ​သည့်​အဖြစ်​က သင်​စိုးရိမ်မကင်း​ဖြစ်​ကြောင်း ပေါ်လွင်​စေ​သည်။

မပြော​သင့်​သော​အရာ–

◆ “ရှင် ကလေး​နောက်​တစ်ယောက် ရနိုင်​သေး​တာ​ပဲ။”

ထိုသို့​မှန်​သော်လည်း ကိုယ်ချင်းစာ​နာ​စိတ်​မရှိ​ဟု ထင်မှတ်​သွား​နိုင်​သည်။ မိဘတို့​သည် ကလေး​ဆိုလျှင် ပြီး​ရော သဘော​မျိုး​မရှိ၊ ထို​ကလေး​ကို​သာ သူတို့​လိုချင်​ကြသည်။ ဆုံးပါး​ခဲ့​သောက​လေး​အတွက် သူတို့​ဝမ်းနည်းပူဆွေး​ဖြစ်​ကျန်​ခဲ့​သဖြင့် ကလေး​နောက်​တစ်ယောက်​ယူဖို့ သူတို့​မစဉ်း​စား​နိုင်​သေး​ပါ။

◆ “တစ်ခုခု​ချွတ်ယွင်းမှု ရှိလို့​ဖြစ်​ရမယ်။”

ထိုသို့​ဖြစ်​နိုင်​သော်လည်း နှစ်သိမ့်မှု​သိပ်​မဖြစ်​ပါ။ မိခင်​ဖြစ်သူ​၏​စိတ်​တွင်​မူ သူသည် ကျန်းမာ​သောက​လေး​ကို လွယ်​ထား​သည်​ဟု ယူမှတ်​ထား​သည်။

◆ “ကလေး​ကို ရှင်​တကယ်​သိကျွမ်း​သေး​တာ​မှ​မဟုတ်​ပဲ။ နောက်ပိုင်း​မှ ဒီလိုမျိုး​ဖြစ်​ရင် ပို​ပြီး​ခံစား​ရမှာ။”

အမျိုးသမီး​အများစု​သည် စောစော​ပိုင်း​ကတည်းက သူတို့​မမွေး​သေး​သောက​လေး​တို့​နှင့် သံယောဇဉ်​တွယ်​ပြီး​ဖြစ်သည်။ ထို့​ကြောင့် ထို​ကလေး​သေဆုံးသော​အခါ ဝမ်းနည်းပူဆွေး​ခြင်း​သည် ဓမ္မတာ​ပင်။ ကလေး​ကို မည်သူမျှ မိခင်​လောက် မ “သိခဲ့” ဟူသော​အဖြစ်​က ပို​၍​ဝမ်းနည်းပူဆွေး​စေ​သည်။

◆ “ရှ​င့်​မှာ တခြား​ကလေး​တွေ​ရှိပါ​သေး​တယ်။”

ဝမ်းနည်းပူဆွေး​နေသော​မိဘတို့​အဖို့ ယင်း​သို့​ပြောလိုက်​ခြင်း​သည် ခြေလက်​တစ်ဖက် ဆုံးရှုံး​သွား​သူ​တစ်ဦး​အား “ရှ​င့်​မှာ တစ်ဖက်​ကျန်​ပါ​သေး​တယ်” ဟု​ပြောလိုက်​သည်​နှင့် မ​ခြား​ပေ။

မှန်ပါသည်၊ အလွန်​ဂရုစိုက်​တတ်​ပြီး စိတ်ရင်းမှန်​သော​သူတို့​ပင်​လျှင် တစ်ခါတစ်ရံ အပြော​မှား​တတ်​ကြောင်း အသိအမှတ်ပြု​ရ​ပေမည်။ (ယာကုပ် ၃:၂) ထို့​ကြောင့် ပိုင်းခြား​သိမြင်​တတ်သော ကိုယ်ဝန်ပျက်​အမျိုးသမီးများ​သည် စိတ်ရင်း​စေတနာ​မှန်​ဖြင့်​ဖြစ်​သော်လည်း အပြောအဆို လိမ္မာပါးနပ်မှု​မရှိသူ​တို့​အပေါ် ခရစ်ယာန်​မေတ္တာ​ပြပြီး စိတ်ခု​လို​ကြ​မည်​မဟုတ်ပါ။—ကောလောသဲ ၃:၁၃။

[အောက်ခြေမှတ်ချက်]