ကျွန်ုပ်​တို့၏​စာရှုသူ​များ​ထံ​မှ

ဟ​ယ်​လို​ဝိမ်း​ပွဲ “ခေတ်​စား​သော​အထိမ်းအမှတ်ပွဲ​များ—ဘေးကင်း​သည့်​ပျော်ရွှင်စရာ​လော” (အောက်တိုဘာ ၈၊ ၂၀၀၁၊ [လိပ်]) ဆို​တဲ့ သင်တို့ရဲ့​ဆောင်းပါး ရည်ညွှန်းချက်​နဲ့​ပတ်သက်​လို့ အနည်းငယ်​ရှင်းပြ​လို​ပါ​တယ်။ ဗြိတိန်​နိုင်ငံ​မှာ မီးပုံပွဲ​ည (bornfire night) ဆိုပြီး လူသိ​များတဲ့ အဝတ်​ဟောင်း​နဲ့​လူရုပ်​မီးရှို့​ပွဲ​ည (Guy Fawkes Night) ကို သင်တို့​ရည်ညွှန်း​ထား​ပါ​တယ်။ အဝတ်​ဟောင်း​နဲ့​လူရုပ်​မီးရှို့​ပွဲ​ညဟာ ခရစ်ယာန်​တွေ တကယ်​ရှောင်သင့်​တဲ့ ပွဲနေ့​တစ်နေ့​ဖြစ်ပါ​တယ်။ အဲဒီ​ပွဲ​ဟာ လူတစ်ယောက်​ကွပ်မျက်​ခံရ​တာ​ကို ဂုဏ်တင်တဲ့ နိုင်ငံရေး​ပွဲနေ့​တစ်နေ့​ဖြစ်တယ်။ တကယ်​ဆိုရင် အဲဒီ​ပွဲနေ့ (နိုဝင်ဘာ ၅) ဟာ ဟ​ယ်​လို​ဝိမ်း​ပွဲနေ့​နဲ့ ရက်​ချင်း​ကပ်​နေပြီး မီးပုံပွဲ​ည​နဲ့ ဟ​ယ်​လို​ဝိမ်း​ပွဲနေ့​တို့​ဟာ ရက်​ချင်း​ထပ်​တတ်​ပေမဲ့ မီးပုံပွဲ​ညဟာ ဟ​ယ်​လို​ဝိမ်း​နတ်​ဆိုင်ရာ​ပွဲနေ့​ရဲ့ အစိတ်အပိုင်း​တစ်ခု မဟုတ်ပါဘူး။

ပီ. ဘီ.၊ ဗြိတိန်

“နိုးလော့!” ပြန်ကြားချက်– မနှစ်မြို့ဖွယ်​ဇာစ်​မြစ်​ရှိ ခေတ်​စား​သော​ထုံးတမ်း​စဉ်​လာ ပုံ​နမူနာ​တစ်ခု​အဖြစ် ဟ​ယ်​လို​ဝိမ်း​ပွဲ​ကို ရွေးချယ်​ထား​ပါ​သည်။ အချို့​ကဏ္ဍ​များ​တွင် ဟ​ယ်​လို​ဝိမ်း​ပွဲ​နှင့် “ဆင်တူ” သည့် အထိမ်းအမှတ်ပွဲ​များ​အဖြစ် ထိုင်ဝမ်​မှ မီး​ပုံး​ပွဲ​နှင့် အဝတ်​ဟောင်း​နှင့်​လူရုပ်​မီးရှို့​ပွဲ​ည​တို့ကို ရည်ညွှန်း​ဖော်ပြ​ထား​ပါ​သည်။ သို့ရာတွင် ၎င်း​အထိမ်းအမှတ်ပွဲ​များသည် စင်စစ်​အားဖြင့် ဟ​ယ်​လို​ဝိမ်း​ပွဲ​၏​တစ်စိတ်​တစ်ပိုင်း​ဖြစ်သည် သို့​မဟုတ် ဇာစ်​မြစ်​တူ​သည်​ဟု ကျွန်ုပ်​တို့​မဆိုလို​ပါ။ သို့​တိုင် ဟ​ယ်​လို​ဝိမ်း​ပွဲ—နတ်​ဆိုင်ရာ​အရိပ်​နိမိတ်​များ အထင်အရှား​ပါရှိ​သော အထိမ်းအမှတ်ပွဲ​တစ်ခု—နှင့် ၎င်း​ပွဲ​တို့၏​ဆင်တူချက်​များ​ကို​ထောက်၍ ယင်း​တို့​၌ ပါဝင်​သင့်၊ မသင့်​ဆုံးဖြတ်​ရာ​တွင် စာရှုသူ​များသည် အဆိုပါ​ပွဲ​များ​၏​ဇာစ်​မြစ်များ​ကို သုံးသပ်ကြည့်​ခြင်း​သည်​ပညာရှိ​၏။

ဟ​ယ်​လို​ဝိမ်း​ပွဲ​ဟာ နတ်​ပညာ​နဲ့​ဆက်စပ်​ကြောင်း ဖော်ပြ​ပေး​တဲ့​အတွက် ကျေးဇူး​တင်​ပါ​တယ်။ အဲဒီ​ပွဲ​ကို အန္တရာယ်ကင်း​ပြီး ပျော်စရာ​ကောင်းတယ်​လို့ လူတွေ​မြင်ကြ​ပေမဲ့ တချို့​သူတွေဟာ အဲဒီ​ပွဲ​ကြောင့် အကြီးအကျယ်​ဘေးရောက်​ခဲ့​ကြတယ်။ ည​မှာ လမ်း​သလား​ကြ​တဲ့​ကလေး​တွေ​ဟာ ဒဏ်ရာ​ရနိုင် ဒါမှ​မဟုတ် မကောင်း​တော့​တဲ့​သကြား​ခဲ​ချောင်း​တွေ ရ​တတ်ကြ​တယ်။ ကျွန်မ​တို့​ရပ်ကွက်​ထဲ​က မိန်းကလေး​တစ်ယောက်​ဆို ဆေးရုံတင်​လိုက်ရတယ်။ ဟ​ယ်​လို​ဝိမ်း​ဆိုတာ လမ်း​သလား​ပြီး လူတွေရဲ့​နေအိမ်​တွေ​ကို လက်​သ​ရမ်း​ဖျက်ဆီး​တဲ့​အချိန်​အခါ​ဖြစ်တယ်လို့ တချို့​ဆယ်ကျော်သက်​တွေ ယူမှတ်​ကြတယ်။ သကြား​ခဲ​ချောင်း​ကျွေး​တဲ့ အိမ်ရှင်​တစ်ယောက်​ဆိုရင် သူ့ရဲ့​စေတနာ​ဟာ ဝေဒနာ​ဖြစ်​ခဲ့​ရတယ်; မကောင်းတဲ့​သကြား​ခဲ​ချောင်း​တွေ​ပေး​ပါ​တယ်​ဆိုပြီး ကောင်လေး​တစ်ယောက်​က သူ့ကို​လိမ်လည်​စွပ်စွဲ​ခဲ့တယ်​လေ။ ဒီလိုမျိုး​တွေ​ရှိပေမဲ့​လည်း ဟ​ယ်​လို​ဝိမ်း​ဟာ ကျွန်မ​တို့​ရပ်ကွက်​ထဲမှာ အထိမ်းအမှတ်ပွဲ​ကြီး​တစ်ခု ဖြစ်​နေတုန်းပါပဲ။ သိပ်​ကောင်း​တဲ့ ရှင်တို့​ရဲ့​ဆောင်းပါး​ကို ကျွန်မ​ရဲ့​အိမ်နီးချင်းတွေ​အားလုံး ဖတ်​ကြ​မယ်​လို့ မျှော်လင့်​ပါ​တယ်။

ဂျီ. အိပ်ခ်ျ.၊ အမေရိကန်​ပြည်ထောင်စု

ကစားစရာ​များ “ကမ္ဘာ့​ဖြစ်ရပ်​အကဲခတ်” အပိုင်းကဏ္ဍ​က “ကစားစရာ​များလွန်းခြင်း” (အောက်တိုဘာ ၈၊ ၂၀၀၁၊ [လိပ်]) ဆို​တဲ့​ခေါင်းစဉ်​နဲ့ အကြောင်းအရာ​အတွက် ကျေးဇူး​တင်​ပါ​တယ်။ ၁၅ လ​အရွယ်​ရှိတဲ့ ကျွန်မ​သမီးရဲ့​အခန်းမှာ ကစားစရာ​တွေ​ထည့်​ထား​တဲ့ သေတ္တာ​လေးလုံး​ရှိတယ်။ ကစားစရာ​တွေ​အားလုံး ပြန့်ကျဲ​နေတတ်​ပြီး ဘာနဲ့​ကစား​ရမယ်ဆိုတာ​ကို သူ​တစ်ခါ​မှ မဆုံးဖြတ်​နိုင်​ခဲ့​ဘူး။ နိုးလော့! ထဲ​က အဲဒီ​အချက်​ကို ကျွန်မ​ရဲ့​အဖေ​ထောက်ပြ​တဲ့​အခါ ချက်ချင်း​ဖတ်​ကြည့်​ပြီး သူ့ရဲ့​ကစားစရာ​တွေ​ကို သေတ္တာ​တစ်ဝက်​အထိ ကျွန်မ​လျှော့ချ​လိုက်တယ်။ အခု ကျွန်မ​သမီးဟာ သူ့ရဲ့​ကစားစရာ​တွေ​နဲ့ ဆော့​ရတာကို ပျော်​နေပါ​ပြီ။

ပီ. ဂျီ.၊ ဂျာမနီ

လိ​ဖ် အဲရစ်​ခ်​ဆင် “လိ​ဖ် အဲရစ်​ခ်​ဆင်—အမေရိက​တိုက်​ကို ရှာဖွေ​တွေ့ရှိ​သူ​လော” (စက်တင်ဘာ ၂၂၊ ၂၀၀၁၊ [လိပ်]) ဆို​တဲ့​ဆောင်းပါး​အတွက် ရှင်တို့​ကို​ကျေးဇူး​တင်​လို​ပါ​တယ်။ သမိုင်း​သင်ခန်းစာ​မှာ ကိုလံဘတ်စ်​အကြောင်းကို ကျွန်မ​တို့​လေ့လာ​နေတယ်။ အမေရိက​တိုက်​ကို ကိုလံဘတ်စ်​ရှာဖွေ​တွေ့ရှိ​ခဲ့တယ်​လို့ ဆရာ​က​ပြော​တော့ ကျွန်မ​က လိ​ဖ် အဲရစ်​ခ်​ဆင်​ဟာ အနှစ် ၅၀၀ စော​ပြီး အမေရိက​တိုက်​ကို ရှာဖွေ​တွေ့ရှိ​ခဲ့​တာ​ဖြစ်​နိုင်တယ်​လို့ ကျွန်မ​ဖတ်ဖူး​ကြောင်း လက်ထောင်​ပြီး​ပြော​လိုက်တယ်။ ကျွန်မ​နောက်ထပ်​သုတေသန​ပြုလုပ်​ပြီး ကိုလံဘတ်စ်​အကြောင်းပါ​တဲ့ တခြား နိုးလော့! ဆောင်းပါး​တွေ​ကို မိတ္တူ​ပွား​တယ်။ ကျွန်မ​ရဲ့​ဆရာ​က အဲဒီ​ဆောင်းပါး​တွေ​ကို​ဖတ်​ပြီး ကျွန်မ​တွေ့ရှိ​ထား​သမျှ​ကို သူ​တော်​တော်​သဘောကျခဲ့​တယ်။

အမ်. ဒီ.၊ ဂျာမနီ

ကျမ်းစာ​ဖတ်ရှုခြင်း “လူငယ်များ​အမေး . . . ကျမ်းစာ​ဖတ်ရှုခြင်း​ကို ကျွန်ုပ်​မည်သို့ ပို​၍​မွေ့လျော်​စ​ရာ​ဖြစ်စေ​နိုင်​သနည်း” (ဩဂုတ် ၂၂၊ ၂၀၀၁၊ [လိပ်]) ဆို​တဲ့​ဆောင်းပါး​အတွက် ကျေးဇူးပါ​ပဲ။ ကျမ်းစာ​ဖတ်​ရတာ ပျင်း​စ​ရာ​ဖြစ်​ပြီး ဒီလောက်​ထူ​တဲ့​စာအုပ်​ကို ကျွန်တော်​ဘယ်တော့မှ ဖတ်​လို့​ပြီး​နိုင်​မှာ​မဟုတ်ဘူးလို့ အမြဲ​ထင်​ခဲ့​တာ။ ဒါပေမဲ့ အဲဒီ​ဆောင်းပါး​ကြောင့် ကျမ်းစာ​ကို​ကြိုးစား​ဖတ်​ကြည့်​တဲ့​အခါ သိပ်​စိတ်ဝင်စားစရာ​ကောင်း​တာ​ကို ကျွန်တော်​တွေ့ရှိ​ခဲ့တယ်။ အခု ကျွန်တော်​ကျမ်းစာ​ကို မှန်မှန်​ဖတ်နေ​ပါ​ပြီ။

အမ်. အက်စ်.၊ ဂျာမနီ