“ပြည့်ဝ​ကောင်းမွန်သော အလင်း”

အတန်ကြာ​ထွန်းထား​သော လျှပ်စစ်မီး​သီး​ကို သင်​ထိတွေ့​ဖူး​ပါ​က၊ ၎င်း​သည် အလွန်​ပူ​နိုင်​ကြောင်း သင်​သိရှိ​သည်။ မီးသီး​မှ​ထုတ်လွှတ်​သော​အပူ​သည် ကုန်ခန်း​စွမ်းအင်​မှ ဖြစ်ပေါ်​လာ​သည်။ သာမန်​မီးသီး​တစ်လုံး​သည် သူ့​စွမ်းအင်​၏ ၁၀ ရာခိုင်နှုန်း​ကို​သာ အလင်း​အဖြစ်​ထုတ်လွှတ်​ကာ ၉၀ ရာခိုင်နှုန်း​သည် အပူရှိန်​အဖြစ်​ကုန်ခန်း​သွား​သည်။ နှိုင်းယှဉ်​ကြည့်​လျှင်၊ ပိုးစုန်းကြူး​ဟု​ခေါ်​သော အလင်း​ထုတ်လွှတ်​သည့် ပိုးကောင်​ငယ်​ကလေး​သည် (ပုံကြီးချဲ့​ထားသော အပေါ်​ပုံ​ကို​ရှု) ၁၀၀ ရာခိုင်နှုန်း​နီးပါး​ခန့်​အလင်း​ကို ထုတ်လွှတ်​ပေး​နိုင်​သည်။

သူတို့​ထုတ်လွှတ်​သော​အလင်း​ကို “ပြည့်ဝ​ကောင်းမွန်သော​အလင်း” ဟု အမည်ပေး​ထား​ရာ ပိုးစုန်းကြူး​ကလေး​များသည် အပူရှိန်​အဖြစ် အလွန်​နည်းသော​စွမ်းအင်​ကို​သာ ကုန်​စေ​ကြသည်။ မည်သို့​အားဖြင့်​နည်း။ ပိုးစုန်းကြူး​လေး​တစ်ကောင်​၏ ဝမ်းဗိုက်​ပိုင်း​သည် လူ​ဆီ​ဖာရင် (luciferin) ဟု​ခေါ်​သော ဇီဝ​အခြေခံ​ဝတ္ထု ပါဝင်​သည်။ အောက်​စီ​ဂျင်​သည် ဝမ်းဗိုက်​လေ​ပြွန် (The abdominal trachea) ဟု​ခေါ်​သော ပြွန်​တစ်ခု​ကို ဖြတ်သန်း​ကာ ဝမ်းဗိုက်​အတွင်းပိုင်း​သို့​ရောက်ရှိချိန်​တွင် လူ​ဆီ​ဖာရင်​ဖြင့် ပေါင်းစပ်​သွားပြီး၊ ဓာတု​တုံ့ပြန်မှု​သည် အဝါရောင်​ဖျော့​မှ နီ​ကျင်​ကျင်​အစိမ်းရောင်​ရှိ​အလင်း​မျိုး ထုတ်လွှတ်​ပေး​သည်။

ပိုးစုန်းကြူး​၏​အလင်း​ကို​ထုတ်​သော​ဆဲလ်​များ​တွင် ယူရ​စ်​အက်​ဆစ် ဖန်​သတ္တုများ​လည်း​ပါဝင်​သည်၊ ယင်းက ပိုးကောင်​၏​ဝမ်းဗိုက်​ပိုင်း​မှ အခြား​သို့ အလင်းရောင်​ပြန်​ဟပ်​စေရန် ကူညီ​ပေး​သည်။ ပိုးစုန်းကြူး​လေး​များသည် သူတို့၏​အလင်း​ကို မိတ်ဖက်​များ​အား​ဆွဲဆောင်​ရန် အသုံးပြုပြီး ထို​ကွဲပြား​သော ပိုးစုန်းကြူး​မျိုးစိတ်များ​သည် ကွဲပြား​သော​ပုံစံ​များနှင့် ပုံမှန်​စည်းချက်​များ​ဖြင့် ထွန်းလင်း​သည်​ဟု သိပ္ပံ​ပညာရှင်​များ​က​ဆို​သည်။

ဤ​သေးငယ်သော​သတ္တဝါ​လေး​များ​ကို ပြုလုပ်​ထား​ပုံ​က သူတို့၏​ဖန်ဆင်း​ရှင် ယေဟောဝါ​ဘုရားသခင်​အား ချီးမွမ်း​နေကြောင်း သင်​သဘောတူ​မည်​မဟုတ်ပေ​လော။ မှန်ပါသည်၊ ဆာလံဆရာ ကြွေးကြော်​ခဲ့​သကဲ့သို့ “အသက်​ရှိသောသူ​အပေါင်းတို့သည် ထာဝရ​ဘုရား​ကို​ချီးမွမ်း​ကြ​စေ။”—ဆာလံ ၁၅၀:၆။

[Picture Credit Line on page 23]

© Darwin Dale/Photo Researchers, Inc.