တစ်မူထူးခြားသောအလုပ်—သို့သော် ကျွန်တော် နှစ်သက်
တစ်မူထူးခြားသောအလုပ်—သို့သော် ကျွန်တော် နှစ်သက်
ဂစ်ဘ်ဆန်မြို့၏ ဆိတ်ငြိမ်နေသောဆိပ်ကမ်းမှ ထွက်ခွာလာသည့်အခါ အထူးတီထွင်ထားသော ကျွန်တော့်စက်လှေ၏အသံသည် အရုဏ်ဦး၏တိတ်ဆိတ်မှုကို ဖြိုခွင်းလိုက်သည်။ ဤအရုဏ်ဦးအချိန်တွင် ကျွန်တော်၏ “သားကောင်” ကိုရှာဖွေရန် စတင်ထွက်ခွာလာလေသည်။
ကနေဒါနိုင်ငံ၏ အနောက်ဘက်ပင်လယ်ကမ်းရိုးတန်းတွင် သစ်တောလုပ်ငန်းနှင့် သစ်ထုတ်လုပ်ငန်းအပြင် သတ္တုတွင်းလုပ်ငန်းတို့နှင့် ဆက်စပ်နေသည့် အလုပ်များစွာရှိ၏။ သို့သော် အလုပ်အချို့သည် သတ္တုတွင်းလုပ်ငန်းကဲ့သို့ တစ်မူထူးခြားသည်။ ကျွန်တော်သည် သစ်လုံးများကို ဆယ်ယူသူဖြစ်၏။ ယင်းအလုပ်သည် အသစ်အဆန်းမဟုတ်ပါ။ ဤအလုပ်ကို လုပ်ကိုင်နေကြသော ကျွန်တော်တို့ထဲမှအချို့သည် မျိုးဆက်လေးဆက်မြောက် သစ်လုံးဆယ်ယူသူများဖြစ်ကြ၏။ အဆိုပါအလုပ် ရေပန်းမစားမီကတည်းက ကျွန်တော်တို့ လုပ်ဆောင်ခဲ့ကြသည်ဟု ပြောရပေမည်! ဗဲန်ကူးဗားကျွန်းနှင့် ဗြိတိသျှကိုလံဘီယာကမ်းရိုးတန်းစပ်ကြားရှိ ဟော့ဆောင်နှင့် ဂျော်ဂျီယာရေလက်ကြားဒေသတွင် ကျွန်တော် လုပ်ကိုင်သည်။ ဤဒေသသည် ဗဲန်ကူးဗားသစ်လုံးဆယ်တင်ခရိုင်၏ အပိုင်းတစ်ခုသာဖြစ်သည်။
သစ်လုံးများဟုခေါ်သည့် ခုတ်လှဲထားသောသစ်ပင်များကို သစ်ကုမ္ပဏီများက သယ်ယူသည့်အဓိကနည်းတစ်နည်းမှာ ဖောင်ဖွဲ့မျောခြင်း သို့မဟုတ် ယင်းတို့ကို စုစည်း၍ လှေများဖြင့် ဆွဲယူကြခြင်းဖြစ်သည်။ သစ်များကို ရေကြောင်းမှတစ်ဆင့် သယ်ယူခြင်းသည် စီးပွားရေးအရ တွက်ခြေကိုက်သည်။ ထို့ ပြင် ဤနေရာသည် ပစိဖိတ်သမုဒ္ဒရာကြောင့် ရေပေါများသည်။ သို့သော် ထိုတွင် မှန်းဆရခက်သော ဖြစ်စဉ်များစွာရှိ၏။ တိုက်လေနှင့် ဒီရေတို့သည် လျှပ်တစ်ပြက် ပြောင်းလဲသွားပြီး ရုတ်တရက် မိုးသက်မုန်တိုင်း ကျရောက်တတ်သည်။ သို့နှင့် သစ်လုံးများစွာ ပြုတ်ထွက်ကုန်၏။ ဤတွင် သစ်လုံးဆယ်သူများ၏ အပိုင်းရောက်ရှိလာလေသည်။
ပြုတ်ထွက်သွားသော သစ်လုံးများကို ပြန်ဆယ်ခြင်း
လိုင်စင်ရပင်လယ်သစ်လုံးဆယ်သူများသာ ဖောင်ဖွဲ့မျောသည့် သို့မဟုတ် လှေများမှ ပြုတ်ထွက်သွားသည့် ဈေးကွက်ဝင်သစ်လုံးများကို ဆယ်ယူနိုင်၏။ ဆယ်ယူသူများသည် တစ်ဦးတည်းပိုင် လိုင်စင်နံပါတ်ပါရှိသော တံဆိပ်ရိုက်တူ ပထမဦးဆုံး ရရှိသည့်အချိန်မှစ၍ နှစ်စဉ် လိုင်စင်ခပေးဆောင်ရသည်။ ဒီရေတက်ချိန်၌ ကမ်းစပ်တွင် မျောနေသော သို့မဟုတ် သောင်တင်နေသော မည်သည့်သစ်လုံးကိုမဆို ဆယ်ယူနိုင်သည်။ ကျွန်တော်တို့ရရှိသည့် သစ်လုံးပေါ်တွင် ဦးဆုံး ကိုယ်ပိုင်လိုင်စင်နံပါတ်ကို ရိုက်လိုက်သည်။
ပစ္စည်းကိရိယာပြည့်စုံသည့် လှေတစ်စင်းလည်း လိုအပ်သည်။ ဤလှေသည် အပျော်စီးလှေနှင့်မတူချေ။ ကျွန်တော်တို့ အသုံးပြုသည့် လှေငယ်များသည် ပဲ့ချိတ်အဆင့်မှ ဆွဲသင်္ဘောအထိဖြစ်ပြီး မာကျောခိုင်ခံ့၍ ကိုယ်ထည်အလွန်ထူသည်။ သစ်လုံးများကိုတွန်းယူသွားရန် လှေဦးပိုင်းတွင် သံခွေးသွားစိပ်များကို အသုံးပြုပြီး သံချိတ်ကြိုးများကိုလည်း အမြဲတမ်း အလုံအလောက်ထားရှိသည်။ သံချိတ်ကြိုးကား အဘယ်နည်း။ အစွန်းတွင် သံချွန်တစ်ခုတပ်ထားသော ၁၅ ပေနီးပါးရှိ ခိုင်ခံ့သည့်ကြိုးဖြစ်သည်။ ဆယ်ယူနိုင်သော သစ်လုံးကို ကျွန်တော်တို့ တွေ့ ရှိသည့်အခါ သစ်လုံးကို သံချိတ်နှင့် အသေအချာချိတ်ယူ၍ သံချိတ်ကြိုးကို လှေတိုင်မနှင့် ရစ်ပတ်ချည်လိုက်သည်။ လိုအပ်သော လုံခြုံရေးကိရိယာအားလုံးကိုလည်း ကျွန်တော်တို့ ယူဆောင်သွားကြသည်။
ဤလုပ်ငန်းသည် လွယ်သယောင်ယောင်နှင့် အလွန်ခက်ကြောင်း သစ်ဆယ်သူလူသစ် မကြာမီ သိမြင်လာမည်။ မည်သည့်ရာသီဥတုပင်ဖြစ်ပါစေ တစ်နှစ်ပတ်လုံး နံနက်အရုဏ်ဦးမှစ၍ လုပ်ဆောင်ကြသည်။ ဆောင်းရာသီတွင် ဆိပ်ကမ်းမှထွက်ခွာနိုင်ရန် ရေခဲပြင်အချို့ကို ခွဲရသည်။
မည်သည့်နေရာတွင် သစ်များကို တွေ့ရှိရသနည်း။ အဓိကအချက်နှစ်ချက်ဖြစ်သည့် ဒီရေနှင့် တိုက်လေအပေါ် များစွာမူတည်၏။ အတွေ့အကြုံရှိသစ်ဆယ်သူသည် နံနက်ပိုင်း အလုပ်မစမီ ဒီရေအတက်အကျပြကားချပ်ကို ကြည့်ရှုသည်။ ဒီရေသည် သစ်များကို ပိုမိုသယ်ဆောင်လာပေးသောကြောင့် ဒီရေတက်ချိန်သည် အကောင်းဆုံးဖြစ်၏။ ထို့ပြင် ဒီရေတက်ချိန်တွင် သစ်များကို ကမ်းစပ်မှဆွဲချရန် ပို၍လွယ်ကူသည်။
ရာသီဥတုကို အမြဲဂရုစိုက်ဖို့ အရေးကြီးသည်။ ကျွန်တော်တို့သည် တိုက်လေကို ခန့်မှန်းခြင်း၊ ကောင်းကင်နှင့် မိုးတိမ်ရွေ့ရှားမှုများကို ကြည့်ရှုခြင်းနှင့် ရေအရောင်ကို စစ်ဆေးခြင်းတို့ အမြဲတစေပြုလုပ်ကြရ၏။ အရှေ့တောင်လေတိုက်လျှင် မိုးရွာလေ့ရှိပြီး အနောက်လေတိုက်လျှင်မူ ကောင်းကင်တွင် တိမ်ကင်းစင်သော်လည်း လှိုင်းကြီးလိမ့်မည်။ ဆောင်းတွင်း၌ အရှေ့မြောက်လေ၊ ဒေသအခေါ် စကွားမီရှ်လေတိုက်သည့်အခါ အလွန်ချမ်းစိမ့်ပြီး လှိုင်းကြီးကာ နှင်းများကျလာပေမည်၊ ထို့ပြင် ပျောက်နေသောသစ်လုံးများ မျောပါလာပေမည်။
မျောနေသောသစ်တစ်လုံးကို သံချိတ်နှင့်လှမ်းချိတ်ခြင်းသည် စိတ်လှုပ်ရှားစရာကောင်းသော်လည်း သစ်များကို ကမ်းစပ်မှ ဆွဲချသည့်အခါ အမှန်ပင် ဝမ်းသာပီတိဖြစ်ရ၏။ ရေအောက်တွင် ဖုံးကွယ်နေသော ကျောက်ဆောင်များက ကျွန်တော်တို့၏လှေကိုယ်ထည်ကို ထိခိုက်စေနိုင်ပြီး လုံးဝပျက်စီးသွားစေနိုင်သည်။ ထို့ကြောင့် ကျွန်တော်တို့ သတိရှိနေဖို့လို၏။
သစ်လုံးများကို စုဆောင်းပြီး ၎င်းတို့ကို စုထားနိုင်သည့်နေရာများသို့ ဆွဲယူသွား၍ ချည်ထားသည်။ အပတ်စဉ် ဆွဲယူသွားမည့်နေ့မရောက်မီ သစ်လုံးများကို ထိုတွင်ထားရှိ၏။ နေရာအသီးသီးမှ ဆယ်ယူထားသောသစ်လုံး ၅၀ မှ ၁၀၀ ကိုစုဆောင်းရရှိသောအခါ လက်ခံဌာနသို့ ဆွဲယူသွားကြပြီး ထိုတွင် သစ်လုံးများကိုချိန်၍ ဈေးနှုန်းဖြတ်ကြသည်။ ထို့နောက် ကျွန်တော်တို့ ဆယ်ယူထားသော သစ်လုံးများ၏တန်ဖိုးအလိုက် ကျွန်တော်တို့ကို ငွေပေးချေသည်။
ထိုသို့အသက်မွေးဝမ်းကျောင်းပြုခြင်းသည် ပျော်ရွှင်နှစ်သက်ဖွယ်ကောင်းသော်လည်း သတိရှိရသည်! ဤအလုပ်သည် သတ္တိနည်းသောသူများနှင့် မကိုက်ချေ။ ထိုတွင် အန္တရာယ်များစွာရှိ၏။ ရာသီဥတုဆိုးရွားလျှင် အန္တရာယ်ရှိနိုင်သည်။ ဝမ်းသာစရာမှာ၊ မုန်းတိုင်စဲသွားသည့်အထိ စောင့်နေရန် ကျွန်တော်တို့ ခိုအောင်းနိုင်သည့်နေရာများစွာ ဟော့ဆောင်ဒေသတွင်ရှိခြင်းဖြစ်၏။ အန္တရာယ်နောက်တစ်ခုမှာ ပေါ့ဆသောသစ်ဆယ်သူတစ်ဦးသည် ဆောင်းတွင်း၌ လှေမှ မတော်တဆပြုတ်ကျသွားလျှင် အေးခဲနေသောရေတွင် မိနစ်ပိုင်းအတွင်း သေသွားနိုင်သည်။ အစောပိုင်းတွင် ဖော်ပြထားသော သံချိတ်ကြိုးများကို မှတ်မိသလော။ သံချိတ်သည် သစ်လုံးတွင် အသေအချာမချိတ်လျှင် သစ်လုံးမှပြုတ်ထွက်ပြီး လှေပေါ်သို့ ပြန်ကန်လာနိုင်သည်။ ဝမ်းသာစရာမှာ၊ သစ်ဆယ်သူအနည်းငယ်ကိုသာ သံချိတ်နှင့်ပြန်ထိုးမိသည်၊ သို့သော် ယင်းသည် မမေ့ပျောက်နိုင်သော အတွေ့အကြုံတစ်ခုဖြစ်သည်။
မိမိကိုယ်တိုင်နှင့် ပတ်ဝန်းကျင်အတွက် အကျိုးရှိ
ကျွန်တော်သည် မိမိ၏အလုပ်ကို အဘယ်ကြောင့် နှစ်သက်ရသနည်း။ ဟော့ဆောင်တူးမြောင်းသည် လူကြိုက်များသော အနားယူအပန်းဖြေရာနေရာတစ်ခုဖြစ်ပြီး ဤတွင် လူတို့သည် ရွက်လှေများနှင့် ဘော့တန်းလှေများ ပြိုင်စီးလေ့ရှိကြသည်။ ကျွန်းများစွာရှိသည်ဖြစ်၍ ထိုတွင် နွေရာသီအပန်းဖြေအိမ်များ ရာနှင့်ချီရှိသည့်အပြင် မော်တော်ဘုတ်များစွာလည်းရှိ၏။ ကူးတို့ရေယာဉ်များသည် ပုံမှန်ခရီးဝေးအလုပ်ဆင်းသူများနှင့် ဧည့်သည်များကို တစ်နေ့လုံး သယ်ယူပို့ဆောင်ပေးလျက်ရှိသည်။ သစ်လုံးများရှိနေသည့်အန္တရာယ်များကြောင့် ကျွန်တော်တို့လုပ်ငန်း၏ အရေးပါမှုကို အလွယ်တကူသိရှိနိုင်၏။
ကျွန်တော်တို့သည် မျောနေသောသစ်လုံးများကို ဆယ်ယူလိုက်သောအခါ လှေများသည် ဘေးမသီရန်မခ သွားလာနိုင်ကြသည်။ ရေထဲတွင် အချိန်ကြာမြင့်စွာရှိနေသည့် သစ်လုံးအချို့သည် နစ်မြှုပ်သွားလေသည်။ သစ်လုံးသည် ရေပေါ်တွင် လက်မအနည်းငယ်သာ ပေါ်ထွက်နေရာ လှေသမားများအတွက် အန္တရာယ်ကြီးလှ၏။ သို့သော်လည်း ထိုသစ်ကို ဆယ်တင်ပြီး ရောင်းချနိုင်ရာ ကျွန်တော်တို့အတွက် တန်ဖိုးရှိသည်။ ထိုသို့ပြုခြင်းဖြင့် ကျွန်တော်တို့သည် ရေလမ်းကြောင်းများကို အန္တရာယ်ကင်းရှင်းစေသည့်အပြင် ပတ်ဝန်းကျင်ကိုလည်း သန့်ရှင်းစေ၏။
ဤလုပ်ငန်းသည် စိတ်လှုပ်ရှားစရာကောင်းသည့်ပြင် စိတ်ဝင်စားစရာလည်းကောင်းသည်ကို ကျွန်တော်တွေ့ ရှိရ၏။ တစ်ရက်နှင့်တစ်ရက် မတူချေ။ ရေပြင်ပေါ်မှ ကျွန်တော်ရပ်ကြည့်နေစဉ် ကျွန်တော်ပတ်လည်ရှိ ၃၆၀ ဒီဂရီမြင်ကွင်းကျယ်သည် မိနစ်တိုင်း ပြောင်းလဲနေသည်။ ရင်သပ်ရှုမောဖွယ် ဆောင်းရာသီနေထွက်ချိန်တွင် တောင်တန်းများပေါ်မှ နှင်းများသည် ပန်းရောင်ပြောင်းသွားသည်ကို ကျွန်တော်တွေ့ မြင်ခဲ့ရသည်။ ဤအချိန်အခါမျိုးတွင် ချမ်းစိမ့်သောလေ၏ အေးမြမှုကို ကျွန်တော်နှစ်သက်သည်။
တောရိုင်းတိရစ္ဆာန်များကို တွေ့ရလေ့ရှိသည်။ ဖျံများ၊ မြွေပါနှင့် ပင်လယ်ဖျံအမျိုးမျိုးကို ကျွန်တော်တွေ့ ဖူးသည်။ ငါးဖမ်းနေကြသော လင်းယုန်ငှက်များနှင့် ကမ်းခြေမှ ကျွန်းများအထိ ခေါက်တုံ့ခေါက်ပြန် ရေကူးနေကြသော သမင်များကို ကျွန်တော် စောင့်ကြည့်ခဲ့၏။ ကျွန်တော့်လှေ၏ငါးမန်းတောင်ဘေးတွင် မြူးထူးစွာဆော့ကစားနေသော လင်းပိုင်ငါး၊ ဘေးနားမှဖြတ်သွားသော မီးခိုးရောင်ဝေလငါးများ သို့မဟုတ် လှိုင်းစီးနေသော အသားစားဝေလငါး အစုလိုက်အပြုံလိုက်ကို တွေ့လိုက်ရခြင်းသည် တကယ့်ကို စိုးရွံ့ထိတ်လန့်စရာပင်!
ကျွန်တော်၏အဘိုးသည် ၁၉၃၀ ပြည့်လွန်နှစ်များတွင် သစ်ဆယ်ခြင်းအလုပ်ကို စတင်ခဲ့သည်။ သူနှစ်သက်သော ရေနှင့်ကမ်းခြေပေါ် အသက်မွေးဝမ်းကျောင်းပြုခြင်းကို သူ၏သားများအား လက်ဆင့်ကမ်းပေးခဲ့သည်။ စကားမစပ်ဆိုရလျှင်၊ ကမ်းခြေပေါ် အသက်မွေးဝမ်းကျောင်းပြုသူကို “အသုံးပြုနိုင်သော သို့မဟုတ် ရောင်းချနိုင်သော သင်္ဘောပျက်အပိုင်းအစများကို ပင်လယ်ကမ်းခြေတစ်လျှောက် ရှာဖွေသူ” ဟု အဓိပ္ပာယ်ဖွင့်နိုင်သည်။ ကျွန်တော်၏အဖေသည် သူမြတ်နိုးလေးစားသည့် ဤအလုပ်ကို တစ်ဖန် သူ၏သားသမီးများအား လက်ဆင့်ကမ်းပေးခဲ့သည်။ ကျွန်တော် အရွယ်ရောက်လာသောအခါ ဤအလုပ်ကို ရွေးချယ်ခဲ့သည်။ အမှန်ဆိုရသော် ဤအလုပ်သည် ကျွန်တော်၏အသက်တာတွင် အရေးကြီးဆုံးအလုပ်မဟုတ်ပါ။ ဘုရားသခင်၏အမှုတော်ကို ထမ်းဆောင်ခြင်းသည်သာ အရေးကြီးဆုံးဖြစ်ပြီး ပို၍ပင်အကျိုးရရှိသည်။ သို့သော် ကျွန်တော်သည် အကြောင်းသင့်၍ ဤအလုပ်တွင်လည်း ရွှင်လန်းမှုရရှိခဲ့ပြီး ယခုဆိုလျှင် အနှစ် ၅၀ နီးပါးရှိပြီဖြစ်သည်။ ကျွန်တော်သည် သစ်လုံးများကို ဇွဲရှိရှိ ဆက်ရှာဖွေနေဆဲပင်။
ကျွန်တော့်မိသားစုလည်း ကျွန်တော်နှင့်အတူ အလုပ်လုပ်ကြသည်။ တစ်ခါတစ်ရံ ပူအိုက်သောနွေရာသီညနေခင်းတွင် ကျွန်တော်တို့အားလုံး ကမ်းခြေသို့သွား၍ အလုပ်လုပ်ကြသည်။ ဆယ်ယူထားသော ကျွန်တော်တို့၏သစ်လုံးများကို ကမ်းခြေသို့ ဆွဲလာစဉ် ကျွန်တော်တို့အနောက်ဘက်မှ နေဝင်ဆည်းဆာ၏အလှသည် ရင်သပ်ရှုမောဖွယ်ကောင်းလှသည်၊ တေးကျူးရင့်နေကြသော စင်ရော်ငှက်များ၊ ကျွန်တော်တို့၏လှေနောက်လိုက်ပါလာသည့် အရောင်တလက်လက်ယက်ကြောင်းများနှင့် ကမ်းခြေပေါ်တွင် လင်းလက်စပြုနေသည့် မှိတ်တုတ်မှိတ်တုတ်အလင်းရောင်များ—ယင်းတို့အားလုံးသည် စိတ်ငြိမ်သက်မှုကို ခံစားရစေသည့်ပြင် ဖန်ဆင်းရှင်နှင့်လည်း နီးကပ်စေ၏။ ကျွန်တော်၏အလုပ်ကို နှစ်သက်ရသည့်အကြောင်းတွင် ယင်းထက်ကောင်းသည့် အကြောင်းပြချက်မရှိနိုင်ဟု ကျွန်တော်ထင်ပါသည်။—ဆောင်းပါးရှင်ရေးသားပေးပို့သည်။
[စာမျက်နှာ ၁၀ ပါ ရုပ်ပုံ]
ကမ်းပေါ်တင် သစ်လုံးတစ်လုံးကို ချည်နေသော သစ်ဆယ်သူတစ်ဦး
[စာမျက်နှာ ၁၀ ပါ ရုပ်ပုံ]
သစ်ဆယ်တင်သည့် လုပ်ငန်းစဉ်အတွင်း တွေ့ရလေ့ရှိသော တောရိုင်းတိရစ္ဆန်များ
[စာမျက်နှာ ၁၁ ပါ ရုပ်ပုံ]
ဟော့ဆောင် သစ်လက်ခံဌာနသည် ဆောင်းရာသီ၌ပင် အလုပ်လုပ်ဆောင်လျက်ရှိ