ရွယ်တူချင်းဖိအားကို ဘယ်လို ကိုင်တွယ်နိုင်မလဲ
လူငယ်များအမေး . . .
ရွယ်တူချင်းဖိအားကို ဘယ်လို ကိုင်တွယ်နိုင်မလဲ
“ရွယ်တူချင်းဖိအားက နေရာတိုင်းမှာရှိတယ်။”–ဂျက်စီ၊ ၁၆ နှစ်။
“ကြီးပြင်းလာစဉ်မှာ ကျွန်တော်ရင်ဆိုင်ရအခက်ဆုံးအရာတစ်ခုကတော့ ကျောင်းနေဖက်တွေရဲ့ ရွယ်တူချင်းဖိအားပါပဲ။”—ဂျော်နသန်၊ ၂၁ နှစ်။
ရွယ်တူချင်းဖိအားဟူသည် ထည့်တွက်ရမည့်ဖိအားတစ်မျိုးဖြစ်သည်မှာ အမှန်ပင်။ သို့သော် ယင်းကို သင်ခုခံတွန်းလှန်နိုင်ကြောင်း စိတ်ချပါလေ။ အမှန်ဆိုလျှင် ယင်းကို သင်ကိုင်တွယ်နိုင်ပြီး သင့်အကျိုးအတွက်ပင် အသုံးပြုနိုင်သည်။ မည်သို့အားဖြင့်နည်း။
ဤလူငယ်များအမေး ယခင်ဆောင်းပါးတစ်ပုဒ်တွင် ရွယ်တူချင်းဖိအား၏စွမ်းပကားနှင့် ယင်း၏သြဇာကို သင်ခုခံနိုင်မှုအားနည်းကြောင်း အသိအမှတ်ပြုခြင်းဟူသည့် အရေးပါသော ပထမအဆင့်ကို ကျွန်ုပ်တို့ဆွေးနွေးခဲ့သည်။ * အကျိုးပြုသော အဘယ်ထပ်ဆင့်ခြေလှမ်းများကို သင်လှမ်းနိုင်သနည်း။ ဘုရားသခင့်နှုတ်မြွက်စကားတော်တွင် သင်လိုအပ်သော အထောက်အကူပြုလမ်းညွှန်ချက်များ ပါရှိသည်။ နယပုံပြင် ၂၄:၅ ကဤသို့ဆို၏– “ပညာအတတ် [“အသိပညာ၊” ကဘ] နှင့်ပြည့်စုံသောသူသည် ခွန်အားတိုးပွားတတ်၏။” ရွယ်တူချင်းဖိအားအပေါ် သင်အနိုင်ယူလွှမ်းမိုးရန် အဘယ်အသိပညာက အားဖြည့်ပေးနိုင်မည်နည်း။ ယင်းကိုမဖြေဆိုမီ သင့်အပေါ် ရွယ်တူချင်းဖိအားသက်ရောက်စေနိုင်သည့် ပြဿနာတစ်ရပ်ကို ဦးစွာဆွေးနွေးကြစို့။
ယုံကြည်စိတ်ချမှုကင်းမဲ့ခြင်း—အန္တရာယ်တစ်ရပ်
ယေဟောဝါသက်သေလူငယ်များ၏ ဘဝလမ်းစဉ်တွင် မိမိတို့၏ယုံကြည်ခြင်းကို အခြားသူများအားပြောပြကြရသောကြောင့် ရွယ်တူချင်းဖိအားသည် တစ်ခါတစ်ရံ အထူးစိန်ခေါ်ချက်တစ်ရပ် ဖြစ်တတ်သည်။ (မဿဲ ၂၈:၁၉၊ ၂၀) ရံဖန်ရံခါ၊ သင်တွေ့ဆုံသည့် အခြားလူငယ်များအား သင့်ယုံကြည်ခြင်းအကြောင်း ပြောပြရန် ခက်ခဲသလော။ သင်တစ်ဦးတည်း မဟုတ်ပါ။ မယ်လာနီ အမည်ရှိ ၁၈ နှစ်အရွယ်မိန်းကလေးတစ်ဦးက ဤသို့ပြောပြသည်– “ကျွန်မဟာ သက်သေခံတစ်ယောက်ပါလို့ လူငယ်တွေကိုပြောရမယ့်အခါတွေမှာ ထင်တာထက်တောင် ပိုခက်နေတတ်တယ်။” သူဆက်၍ပြောသည်မှာ “ကျွန်မဟာ သက်သေခံတစ်ယောက်ပါလို့ ပြောဖို့ သတ္တိမွေးလိုက်တာနဲ့ ကြောက်စိတ်ကဝင်လာပြန်ရော။” အပျက်သဘောဆောင်သော ရွယ်တူဖိအားက သူ့အားတားဆီးနေပုံရသည်။
ထင်ရှားသည့်ယုံကြည်ခြင်းရှိ အမျိုးသား၊ အမျိုးသမီးများပင် လူတို့အား ဘုရားသခင်အကြောင်းပြောပြဖို့ တွန့်ဆုတ်ခဲ့ကြကြောင်း သမ္မာကျမ်းစာကဆို၏။ ဥပမာ၊ လူငယ်ယေရမိသည် ရဲရင့်စွာဟောပြောဖို့ ဘုရားသခင့်မိန့်မှာချက်ကို နာခံမည်ဆိုလျှင် ပြောင်လှောင်သရော်မှုနှင့် ညှဉ်းပန်းနှိပ်စက်မှု ခံရမည်ကို သိထားသည်။ ထို့ပြင် ယေရမိသည် ယုံကြည်စိတ်ချမှုကင်းမဲ့ခဲ့သည်။ အဘယ်ကြောင့်နည်း။ ဘုရားသခင်အား သူဤသို့ဆို၏– “အကျွန်ုပ်သည် မဟောမပြောတတ်ပါ။ သူငယ်ဖြစ်ပါ၏။” ယေရမိ၏ငယ်ရွယ်မှုက ဟောပြောရန် အရည်အချင်းမပြည့်မီစေဟု ဘုရားသခင် လက်ခံခဲ့သလော။ လက်မခံခဲ့ပါ။ ယေဟောဝါသည် ပရောဖက်ကို ဤသို့အားပေးခဲ့သည်– “‘အကျွန်ုပ်သည် သူငယ်ဖြစ်ပါ၏’ ဟုမပြောနှင့်။” ယေဟောဝါသည် ရည်ရွယ်ထားသည့်အတိုင်း ဆက်လက်လုပ်ဆောင်ကာ တွန့်ဆုတ်သောလူငယ်ကို အရေးကြီးသောတာဝန်တစ်ရပ် ပေးအပ်ခဲ့သည်။—ယေရမိ ၁:၆-၇။
ကျွန်ုပ်တို့တွင် ယုံကြည်စိတ်ချမှုကင်းမဲ့သည့်အခါ မိမိကိုယ်ကိုစိတ်မချသောကြောင့် ရွယ်တူချင်းဖိအားကို တွန်းလှန်ရန် အလွန်ခက်ခဲနိုင်သည်။ သုတေသနပြုချက်များက ထိုအချက်ကို ထောက်ပြခဲ့သည်။ သာဓကအနေနှင့်၊ လွန်ခဲ့သော ၁၉၃၇ ခုနှစ်တွင် မြူဇဖာ ရှဲရစ်ဖ် အမည်ရှိ သိပ္ပံပညာရှင်တစ်ဦးသည် ကျော်ကြားသည့်စမ်းသပ်မှုတစ်ခု ပြုလုပ်ခဲ့သည်။ လူများကို မှောင်နေသည့်အခန်းတစ်ခန်းထဲထည့်ကာ အလင်းပြောက်တစ်ခုကိုပြခဲ့သည်၊ ထို့နောက် အလင်းပြောက်သည် မည်မျှအကွာအဝေးသို့ ရွေ့လျားခဲ့သနည်းဟု သူတို့အားမေးမြန်းခဲ့သည်။
အမှန်သော်၊ အလင်းသည် ရွေ့လျားခြင်းလုံးဝမရှိပေ; ယင်းသည် စက္ခုအာရုံလှည့်စားမှုသာဖြစ်သည်။ တစ်ဦးစီကိုစမ်းသပ်ခဲ့ရာ ရွေ့လျားဟန်ရှိမှုနှင့်စပ်လျဉ်း၍ လူများက ခန့်မှန်းချက်အသီးသီး ပေးခဲ့ကြသည်။ သို့သော်၊ အုပ်စုလိုက်တွင်မူ သူတို့၏ခန့်မှန်းချက်ကို အသံထွက်၍ပြောရန် တောင်းဆိုခဲ့ရသည်။ မည်သို့ဖြစ်သွားသနည်း။ မိမိတို့၏ကိုယ်ပိုင်ထင်မြင်ချက်အပေါ် ယုံကြည်စိတ်ချမှုမရှိကြခြင်းကြောင့် သူတို့သည် အချင်းချင်း၏လွှမ်းမိုးမှု ခံခဲ့ကြရသည်။ အထပ်ထပ်စမ်းသပ်မှုပြုခြင်းဖြင့် “အုပ်စုစံ” တစ်ခု သတ်မှတ်ခဲ့သည်အထိ အဖြေများတူညီလာသည်။ နောက်ပိုင်း တစ်ဦးချင်းစီ ပြန်လည်စမ်းသပ်သောအခါ၌ပင် တစ်ဦးစီကို အုပ်စု၏စုပေါင်းယူဆချက်က ဩဇာလွှမ်းမိုးဆဲဖြစ်သည်။
ထိုစမ်းသပ်မှုက အရေးကြီးသောအချက်တစ်ချက်ကို ဖော်ပြသည်။ ယုံကြည်စိတ်ချမှုကင်းမဲ့ခြင်းက လူများကို ရွယ်တူချင်းဖိအားခံရရန်အကြောင်း ပိုများစေသည်။ အလေးအနက်စဉ်းစားစရာ မဟုတ်ပေလော။ သို့ဖြစ်စေကာမူ လက်မထပ်မီသံဝါသပြုခြင်း၊ မူးယစ်ဆေးအလွဲသုံးခြင်း၊ ဘဝပန်းတိုင်များအပေါ်ရှုမြင်ပုံတို့အပါအဝင် အလွန်အရေးကြီးသောကိစ္စများနှင့်ပတ်သက်လာလျှင် ရွယ်တူချင်းဖိအားသည် လူတို့အပေါ် အကျိုးသက်ရောက်နိုင်သည်။ ထိုသို့သောကိစ္စများနှင့်ပတ်သက်၍ “အုပ်စုစံ” ချမှတ်ရန် ကျွန်ုပ်တို့ကိုယ်ကိုခွင့်ပြုလျှင် ကျွန်ုပ်တို့၏အနာဂတ်အပေါ် ပြင်းပြင်းထန်ထန် ထိခိုက်မှုရှိနိုင်သည်။ (ထွက်မြောက်ရာ ၂၃:၂) အဘယ်အရာပြုလုပ်နိုင်သနည်း။
အလင်းပြောက်သည် လှုပ်ရှားခြင်းမရှိဟူသည့်အဖြစ်မှန်ကို သင်သိခဲ့လျှင် သင့်အားစမ်းသပ်မှုပြုမည်ဆိုပါက မည်သို့ယူဆမည်နည်း။ လူအုပ်စု၏လွှမ်းမိုးမှုကို သင်ခံရမည်မဟုတ်ပေ။ မှန်ပါသည်၊ ယုံကြည်စိတ်ချမှုလိုအပ်သည်။ သို့ရာတွင် အဘယ်ယုံကြည်စိတ်ချမှုမျိုး ပါဝင်ပတ်သက်နေပြီး ယင်းကို မည်သို့ရရှိနိုင်မည်နည်း။
ယေဟောဝါကို သင့်ယုံကြည်စိတ်ချရာဖြစ်စေပါ
မိမိကိုယ်ကိုယုံကြည်စိတ်ချမှု ပျိုးထောင်ပုံအကြောင်း အတော်များများပြောကြသည်ကို သင်ကြားဖူးပေမည်။ သို့သော် ယင်းကိုမည်သို့ရရှိနိုင်သည်၊ သင်မည်မျှလိုအပ်သည်နှင့်ပတ်သက်လျှင် ရှုမြင်ပုံများမတူကြပေ။ သမ္မာကျမ်းစာတွင် မျှတမှုရှိသောအကြံပြုချက် ပါရှိသည်– “သင်တို့သည် ကိုယ်ကို ထင်သင့်သည်အတိုင်းထက်လွန်၍မထင်ဘဲ၊ . . . ကိုယ်ကို လျောက်ပတ်စွာထင်ရမည်အကြောင်း သင်တို့တွင်ရှိသမျှသောသူတို့ကို မှာထား၏။” (ရောမ ၁၂:၃) နောက်ဘာသာပြန်ကျမ်းတွင် ထိုအခန်းငယ်ကို ဤသို့ဖတ်ရသည်– “သင်တို့သည် မိမိတို့ကိုယ်ကို အရှိတန်ဖိုးထက်ပို၍ အကဲမဖြတ်ကြဘဲ လျောက်ပတ်သောတန်ဖိုးဖြင့် ပိုင်းဖြတ်ရမည့်အကြောင်း သင်တို့အပေါင်းတို့အား ငါမှာကြားလိုပါ၏။”—ချားလ်စ် ဘီ၊ ဝီလျမ်စ်။
ရောမ ၁၂:၁၊ ကဘ) ထိုအချက်ကို စိတ်စွဲမှတ်ထားခြင်းဖြင့် သင့်ဝန်းကျင်ရှိသူများက သင့်အတွက်ဆုံးဖြတ်ချက်ချရန် ခွင့်ပြုလိုက်ခြင်းမှ ကာကွယ်ဖို့ ကူညီပေးနိုင်သည်။ သို့သော် သင့်အားကာကွယ်ပေးရုံထက်မက အကျိုးပြုမည့် ယုံကြည်စိတ်ချမှုတစ်မျိုးရှိသည်။
သင်၏ “အရှိတန်ဖိုး” ကို “လျောက်ပတ်သောတန်ဖိုးဖြင့် ပိုင်းဖြတ်ခြင်း” က စိတ်ကြီးဝင်လာခြင်း သို့မဟုတ် ဘဝင်မြင့်လာခြင်းကို ခွင့်မပြုချေ။ တစ်ဖက်တွင်မူ၊ ထိုသို့သော မျှတမှုရှိသည့်ရှုမြင်ပုံက သင်အမှန်တကယ်တွေးတော၊ ဆင်ခြင်နိုင်စွမ်းနှင့် အမြော်အမြင်ရှိရှိ ဆုံးဖြတ်ချက်များချနိုင်စွမ်းတို့၌ ယုံကြည်စိတ်ချမှု အတော်အတန်ရှိစေမည်ဖြစ်သည်။ ဖန်ဆင်းရှင်သည် သင့်အား “စဉ်းစားဆင်ခြင်နိုင်စွမ်း” ဖြင့်ဖန်ဆင်းထားကာ ယင်းသည် အလွန်အရေးပါသည်။ (“အရှင်ထာဝရဘုရား[သခင်] ကိုယ်တော်သည် အကျွန်ုပ်မျှော်လင့်ရာဖြစ်တော်မူ၏။ အကျွန်ုပ်ငယ်သောအရွယ်မှစ၍ အကျွန်ုပ်ကိုးစား [“ယုံကြည်စိတ်ချ၊” ကဘ] ရာဖြစ်တော်မူ၏” ဟုရေးသားရန် ဘုရင်ဒါဝိဒ် မှုတ်သွင်းခံခဲ့ရသည်။ (ဆာလံ ၇၁:၅) မှန်ပါသည်၊ ဒါဝိဒ်သည် ကောင်းကင်ခမည်းတော်အား အပြည့်အဝယုံကြည်စိတ်ချခဲ့သည်၊ ငယ်ရွယ်စဉ်ကတည်းက ထိုသို့ ယုံကြည်စိတ်ချခဲ့သည်။ ဖိလိတ္တိလူသန်ကြီးဂေါလျတ်က ဣသရေလစစ်သားမည်သူမဆိုနှင့် တစ်ဦးချင်းယှဉ်ပြိုင်တိုက်ခိုက်ရန် စိန်ခေါ်ခဲ့ချိန်တွင် သူသည် ဆယ်ကျော်သက်အရွယ်ဖြစ်ကောင်းဖြစ်မည့် “ငယ်ရွယ်သေးသူ” ဖြစ်သည်။ စစ်သားများမှာ ကြောက်ရွံ့တုန်လှုပ်နေခဲ့ကြ၏။ (၁ ဓမ္မရာဇဝင် ၁၇:၁၁၊ ၃၃၊ သမ္မာ) သူတို့အတွင်း၌ အပျက်သဘောဆောင်သော ရွယ်တူချင်းဖိအား ရှိနေပုံပေါက်သည်။ ဂေါလျတ်၏အရွယ်အစားနှင့် ရဲစွမ်းသတ္တိကို အပျက်သဘောပြောဆိုကြပြီး ထိုစိန်ခေါ်ချက်ကိုလက်ခံသူ မည်သူမဆိုသည် စိတ်မနှံ့သူဖြစ်ရမည်ဟု အခိုင်အမာပြောဆိုခဲ့ကြမည်မှာ သေချာသည်။ ထိုသို့သောဖိအားသည် ဒါဝိဒ်အပေါ်မသက်ရောက်ကြောင်း ထင်ရှားသည်။ အဘယ်ကြောင့်နည်း။
ဂေါလျတ်အား ဒါဝိဒ်ပြောသည့် စကားများကို သတိပြုပါ– “သင်သည် ဓား၊ လှံ၊ ကိဒုန်ပါလျက် ငါ့ထံသို့လာ၏။ ငါသည် သင်ကြိမ်းပသော ဣသရေလဗိုလ်ခြေတို့၏ဘုရားသခင်၊ ကောင်းကင်ဗိုလ်ခြေအရှင်ထာဝရဘုရား[သခင်]၏ နာမတော်ပါလျက် သင်ရှိရာသို့လာ၏။” (၁ ဓမ္မရာဇဝင် ၁၇:၄၅) ဒါဝိဒ်သည် ဂေါလျတ်၏အရွယ်အစား၊ ခွန်အားဗလ သို့မဟုတ် လက်နက်များကို သတိမပြုမိဘဲမနေပါ။ သို့သော် သူ့အထက်တွင် ကောင်းကင်ရှိကြောင်း သူအသေအချာသိထားသကဲ့သို့သော သူသိထားသည့်အရာတစ်ခုရှိသည်။ ဂေါလျတ်သည် ယေဟောဝါဘုရားသခင်နှင့် နှိုင်းယှဉ်လောက်သည့်သူမဟုတ်ကြောင်း သူသိထားခြင်းပင်။ ဒါဝိဒ်ဘက်၌ ယေဟောဝါရှိနေလျှင် ဂေါလျတ်ကို အဘယ်ကြောင့် ကြောက်ရွံ့ရမည်နည်း။ ဘုရားသခင်အား ထိုသို့ယုံကြည်စိတ်ချမှုက ဒါဝိဒ်ကိုကာကွယ်မှုပေးခဲ့သည်။ အဘယ်ရွယ်တူချင်းဖိအားကမျှ သူ့အား မယိမ်းယိုင်စေနိုင်ပေ။
ယေဟောဝါအား ထပ်တူယုံကြည်စိတ်ချမှုမျိုး သင်၌ရှိသလော။ ဒါဝိဒ်အချိန်နောက်ပိုင်း၌လည်း ကိုယ်တော်သည် ပြောင်းလဲခြင်းမရှိပေ။ (မာလခိ ၃:၆; ယာကုပ် ၁:၁၇) ကိုယ်တော့်အကြောင်းပို၍သိရှိလေ ကိုယ်တော့်နှုတ်မြွက်တော်၌မိန့်ဆိုထားရာတိုင်းကို သင်ပို၍စိတ်ချလေဖြစ်လာမည်။ (ယောဟန် ၁၇:၁၇) သင့်အသက်တာကိုလမ်းပြညွှန်ကြားရန်နှင့် ရွယ်တူချင်းဖိအားကိုတွန်းလှန်ရာတွင် သင့်အားထောက်မပေးရန် အပြောင်းအလဲမရှိသော၊ ယုံကြည်စိတ်ချရသော စံနှုန်းများကို သမ္မာကျမ်းစာ၌တွေ့ရမည်။ ယေဟောဝါကို သင့်ယုံကြည်စိတ်ချရာဖြစ်စေခြင်းအပြင် သင်လုပ်ဆောင်နိုင်သည့် အရာတစ်ခုရှိသေးသည်။
အကြံကောင်းဉာဏ်ကောင်းပေးသူများကို ရွေးချယ်ပါ
ဘုရားသခင့်စကားတော်က လမ်းညွှန်မှုကောင်းရှာဖွေရန် လိုအပ်မှုကို မီးမောင်းထိုးပြထားသည်။ “ဉာဏ်ကောင်းသောသူသည် ကျွမ်းကျင်သည့်ညွှန်ကြားချက်ကို ဆည်းပူး၏” ဟု နယပုံပြင် ၁:၅ (ကဘ) ကဆိုသည်။ သင်၏အကောင်းဆုံးအကျိုးကို အလွန်လိုလားသည့် သင့်မိဘများသည် လမ်းညွှန်မှုရင်းမြစ်တစ်ခုဖြစ်နိုင်သည်။ ယင်းကို အင်ဒီရာကောင်းစွာသိသည်။ သူဤသို့ပြန်ပြောပြသည်– “ကျွန်မမိဘတွေဟာ ကျွန်မနဲ့အတူ ကျမ်းစာကိုနှီးနှောဆင်ခြင်လေ့ရှိပြီး ကျွန်မဘဝမှာ ယေဟောဝါကို တကယ့်ပုဂ္ဂိုလ်တစ်ပါးဖြစ်စေခဲ့တာကြောင့် ခုချိန်ထိ အမှန်တရားလမ်းစဉ်မှာ လျှောက်လှမ်းနေပါတယ်။” လူငယ်များစွာလည်း အလားတူခံစားကြရသည်။
သင်သည် ခရစ်ယာန်အသင်းတော်ဝင်တစ်ဦးဖြစ်လျှင် ထူးကဲသောအားကိုးအားထားပြုစရာများ—ခန့်အပ်ခံကြီးကြပ်မှူးများ သို့မဟုတ် အကြီးအကဲများအပြင် ရင့်ကျက်သောအခြားခရစ်ယာန်များ—ကို ရရှိထားသည်။ နဒီးအာ အမည်ရှိမိန်းမငယ်တစ်ဦး ဤသို့ပြန်ပြောပြသည်– “ကျွန်မတို့အသင်းတော်မှာရှိတဲ့ အကြီးအကဲတွေကို ကျွန်မတကယ်ပဲ ရိုသေလေးစားတယ်။ ဦးစီးကြီးကြပ်မှူးရဲ့ ဟောပြောချက်တစ်ခုကို ကျွန်မမှတ်မိနေတယ်၊ အဲဒါက လူငယ်တွေအတွက် အထူးရည်ရွယ်ထားတာဖြစ်တယ်။ သူဟောခဲ့တာတွေဟာ ကျွန်မတို့ကြုံတွေ့ခံစားနေရတာတွေဖြစ်လို့ စည်းဝေးပြီးတဲ့နောက် ကျွန်မနဲ့ ကျွန်မသူငယ်ချင်းဟာ စိတ်လှုံ့ဆော်မှုဖြစ်ခဲ့ကြတယ်။”
အပျက်သဘောဆောင်သောရွယ်တူချင်းဖိအားကို တွန်းလှန်နိုင်သည့် အစွမ်းထက်လက်နက်နောက်တစ်မျိုးမှာ အပြုသဘောဆောင်သော ရွယ်တူချင်းဖိအားဖြစ်သည်။ သင်သည် အပေါင်းအသင်းကို ပညာရှိရှိရွေးချယ်လျှင် သင်၏ကောင်းမွန်သောပန်းတိုင်များနှင့် တော်မှန်သောစံများကို တွယ်ကပ်နေစေဖို့ သူတို့က ကူညီပေးနိုင်သည်။ ကောင်းမွန်စွာ မည်သို့ရွေးချယ်နိုင်သနည်း။ ဤညွှန်ကြားချက်ကို စိတ်စွဲထားပါ– “ပညာရှိတို့နှင့်ပေါင်းဖော်သောသူသည် ပညာရှိတတ်၏။ လူမိုက်တို့နှင့်ပေါင်းဖော်သောသူမူကား ပျက်စီးတတ်၏။” (သု. ၁၃:၂၀) နဒီးအာသည် ကျောင်း၌ သူငယ်ချင်းများကို ပညာရှိစွာရွေးချယ်ပေါင်းသင်းခဲ့သည်—သူနှင့်အကျင့်စံနှုန်းတူသော ယုံကြည်သူချင်းများဖြစ်သည်။ သူဤသို့ပြောပြသည်– “ကျောင်းမှာ ယောက်ျားလေးတွေက ကျွန်မတို့ကို ‘စကားပြော’ ဖို့ အနားကပ်လာတဲ့အခါ ကျွန်မတို့ဟာ တစ်ယောက်နဲ့တစ်ယောက် အကူအညီပေးကြတယ်။” သူငယ်ချင်းကောင်းများသည် ကျွန်ုပ်တို့၏အကောင်းဆုံးအရည်အသွေးများကို ပေါ်လွင်စေဖို့ ကူညီပေးနိုင်သည်။ သူတို့ကိုရှာတွေ့ရန် ကြိုးစားရကျိုးနပ်ပါသည်။
ယေဟောဝါ၌ ယုံကြည်စိတ်ချမှုကို ပြုစုပျိုးထောင်၍ ရင့်ကျက်သောခရစ်ယာန်များထံမှ လမ်းညွှန်မှုရှာယူပြီး အပေါင်းအသင်းကို ပညာရှိရှိရွေးချယ်လျှင် ရွယ်တူချင်းဖိအား၏စိန်ခေါ်ချက်ကို သင်အောင်မြင်စွာရင်ဆိုင်နိုင်မည်ကို စိတ်ချပါလေ။ အမှန်ဆိုသော်၊ သင်သည် သင့်မိတ်ဆွေများအပေါ် အပြုသဘောဆောင်သြဇာလွှမ်းမိုးကာ သင်နှင့်အတူ အသက်လမ်းပေါ်တွင် လျှောက်လှမ်းရန် ကူညီပေးနိုင်ပါသည်။
[အောက်ခြေမှတ်ချက်]
^ အပိုဒ်၊ 6 နိုဝင်ဘာ ၂၂၊ ၂၀၀၂ [လိပ်]၊ ထုတ် နိုးလော့! “ရွယ်တူချင်းဖိအား—ယင်းသည် အမှန်ပင်အစွမ်းထက်သလော” ဆောင်းပါးကိုရှု။
[စာမျက်နှာ ၁၈ ပါ အကျဉ်းဖော်ပြချက်]
ဘုရားသခင်နှင့် ကိုယ်တော့်စံနှုန်း များကိုချစ်သည့် သင့်မေတ္တာကိုဝေမျှ ခံစားမည့် သူငယ်ချင်းကောင်းကိုရှာပါ
[စာမျက်နှာ ၁၈ ပါ ရုပ်ပုံများ]
“မကောင်းသောသူတို့နှင့်ပေါင်းဖော်ခြင်း အားဖြင့် ကောင်းသောအကျင့်ဓလေ့ ယိုယွင်း တတ်၏။”—၁ ကောရိန္သု ၁၅:၃၃
“ပညာရှိတို့နှင့်ပေါင်းဖော်သော သူသည် ပညာရှိတတ်၏။”—သု. ၁၃:၂၀