တာယာများ သင့်အသက်သည် ၎င်းတို့အပေါ် တည်မှီနိုင်!
တာယာများ သင့်အသက်သည် ၎င်းတို့အပေါ် တည်မှီနိုင်!
အနီးအနားတွင် အက်ဆစ်နှင့် မီးလောင်လွယ်သောအရည်ပုံးများရှိကာ ဂဟေဆက်ထားသည့်သံမဏိနှင့် ဖန်လှောင်အိမ်တစ်ခုထဲတွင် သင့်အား သားရေကြိုးဖြင့် ပတ်ချည်ထားသည်ဟု မြင်ယောင်ကြည့်လိုက်ပါ။ ယခု ဤသေစေနိုင်ဖွယ်တည်ဆောက်ထားသည့်အရာကို မြေပြင်မှ လက်မအနည်းငယ်ကြွကာ တစ်စက္ကန့်လျှင် ပေ ၁၀၀ ခန့် အရှိန်ဖြင့်လွှတ်လိုက်ပါ။ ထို့နောက် သင့်မျက်နှာချင်းဆိုင်မှ အခြားစက်များက အရှိန်ပြင်းပြင်း ဖြတ်သွားစဉ် သင့်စက်ကို အလားတူစက်များအကြားတွင် ထားလိုက်ပြီး အရှိန်မြင့်ပြေးစေပါ!
ယင်းသည် ယာဉ်တစ်စီးပေါ်တက်ပြီး အဝေးပြေးလမ်းမပေါ်မောင်းနှင်တိုင်း သင်လုပ်ဆောင်ရပုံဖြစ်၏။ ကားမောင်းနေစဉ် အန္တရာယ်ကင်းကင်းနှင့် ထိန်းမောင်းနိုင်ရန် အဘယ်အရာက ထောက်ကူပေးသနည်း။ တာယာများသည် အကြီးအကျယ်ကူညီပေးသည်။
တာယာ၏လုပ်ဆောင်ချက်
တာယာများသည် အရေးပါသည့်လုပ်ငန်းအမျိုးမျိုး လုပ်ဆောင်ကြ၏။ ၎င်းတို့သည် ကား၏အလေးချိန်ကို ပင့်မပေးထားရုံမက လမ်းပေါ်ရှိအဖုအထစ်များ၊ ချိုင့်ခွက်များနှင့် အခြားမညီညာမှုများကြောင့် ကားဆောင့်ခါသည့်ဒဏ်မှလည်း ကာကွယ်ပေးသည်။ ပိုအရေးပါသည်မှာ တာယာများသည် အရှိန်မြှင့်ခြင်း၊ ထိန်းမောင်းခြင်း၊ အရှိန်လျော့ခြင်းတို့အတွက် မရှိမဖြစ်လိုအပ်သော ကုပ်အားကိုဖြစ်စေပြီး လမ်းအခြေအနေအမျိုးမျိုးတွင် လိုသလိုမောင်းနှင်စေနိုင်သည်။ သို့သော် အချိန်တိုင်းတွင် ပို့စကတ်အရွယ်အစားလောက်ရှိသည့် တာယာသားလေးသာ မြေပြင်နှင့်ထိတွေ့ထားလေသည်။
တာယာတို့၏အရေးပါမှုကြောင့် သင့်တာယာများသည် ဘေးကင်းစိတ်ချရပြီး အရည်အသွေးပြည့်ပြည့်လုပ်ဆောင်စေရန် ဘာလုပ်နိုင်မည်နည်း။ တာယာရွေးချယ်ပြီဆိုလျှင် သင့်ကားနှင့်ကိုက်ညီမည့်တာယာကို မည်သို့ရွေးချယ်မည်နည်း။ ဤမေးခွန်းများကိုမဖြေဆိုမီ တာယာ၏သမိုင်းကြောင်းကို အကျဉ်းချုပ်သုံးသပ်ကြည့်ကြစို့။
ရော်ဘာ၏ ကနဦးရှေ့ဆောင်လမ်းပြများ
နှစ်ထောင်ပေါင်းများစွာကပင် ဘီးများကို အသုံးပြုခဲ့ကြသော်လည်း ကားဘီးခွေ၏အပြင်နှုတ်ခမ်းကို ရော်ဘာနှင့်တွဲကပ်ထားခြင်းမှာမူ မကြာသေးမီကမှ တိုးတက်လာခြင်းဖြစ်သည်။ ၁၈၀၀ ပြည့်လွန်နှစ်များအစောပိုင်းတွင် သဘာဝရော်ဘာတုံးကို သစ်သားဘီး သို့မဟုတ် သံမဏိဘီးတို့တွင် ဦးဆုံးတွဲကပ်အသုံးပြုခဲ့သည်။ သို့သော် ရော်ဘာတုံးသည် ပွန်းစားမြန်သောကြောင့် ရော်ဘာအုပ်သည့်ဘီးမှာ အမေရိကန်ပြည်ထောင်စု၊ ကွန်နက်တီကက်ပြည်နယ်မှ ဇွဲကောင်းသောတီထွင်သူ ချားလ် ဂွဒ်ရီးယားလက်ထက်မတိုင်မီအထိ အနာဂတ်မကောင်းခဲ့ချေ။ ၁၈၃၉ ခုနှစ်တွင် ဂွဒ်ရီးယားသည် ရော်ဘာကို အပူနှင့်ဖိအားပေးပြီး ကန့်နှင့်စိမ်ထားရသည့်ပေါင်းတင်နည်းကို ရှာဖွေတွေ့ရှိခဲ့သည်။ ဤနည်းစနစ်သည် ရော်ဘာကို ပုံသွင်းရ ပိုလွယ်ကူစေပြီး ပွန်းပဲ့ပျက်စီးသည့်ဒဏ်မှ လွန်စွာခံနိုင်ရည်ရှိစေသည်။ ရော်ဘာတာယာ အမာစားသည် လူသုံးများလာသော်လည်း လမ်းကြမ်းများအတွက်သာဖြစ်၏။
၁၈၄၅ ခုနှစ်တွင် စကော့တလန်လူမျိုးအင်ဂျင်နီယာ ရောဘတ် ဒဗ္ဗလျူ. တောမ်ဆမ်သည် ပထမဆုံးလေသွင်းတာယာ သို့မဟုတ် လေဖြည့်တာယာကို မူပိုင်ခွင့်ရခဲ့၏။ သို့သော် နောက်ထပ် စကော့တလန်လူမျိုး ဂျွန်ဘော့ ဒန်းလော့ပ်သည် သူ့သား၏စက်ဘီးတွင် လေသွင်းတာယာတပ်ဆင်လိုက်သည့်အခါ ၎င်းတာယာမှာ ရောင်းအားကောင်းလာသည်။ ၁၈၈၈ ခုနှစ်တွင် ဒန်းလော့ပ်သည် တာယာအသစ်ကို မူပိုင်ခွင့်ရယူပြီး ကိုယ်ပိုင်ကုမ္ပဏီထူထောင်လိုက်သည်။ သို့သော် ဤလေသွင်းတာယာမှာလည်း သိသာသည့်ချို့ယွင်းချက်များရှိနေဆဲပင်။
၁၈၉၁ ခုနှစ်၊ တစ်နေ့တွင် ပြင်သစ်စက်ဘီးစီးသမားတစ်ဦးသည် ဘီးပေါက်သွားလေသည်။ ဘီးဖာရန် ကြိုးစားခဲ့သော်လည်း ဘီးကို တာယာနှင့်အသေကပ်ထားခြင်းကြောင့် ဖာ၍မရခဲ့ပေ။ ကန့်နှင့်ရော်ဘာပေါင်းတင်လုပ်ငန်းတွင် နာမည်ရနေသည့် သူ၏ရောင်းရင်းပြင်သစ်လူမျိုး အက်ဝဒ် မီရှယ်လင်အား အကူအညီတောင်းခဲ့သည်။ မီရှယ်လင်သည် တာယာကို ကိုးနာရီကြာပြင်ခဲ့ရ၏။ ယင်းအတွေ့အကြုံကြောင့် သူသည် တာယာကို ဘီးမှ အလွယ်တကူဖြုတ်ယူ၊ ပြုပြင်နိုင်သော လေထိုးတာယာကို တီထွင်ခဲ့သည်။
မီရှယ်လင်၏တာယာသည် အလွန်ရောင်းအားကောင်းခဲ့ရာ နောက်နှစ်တွင် စက်ဘီးစီးသမား ၁၀,၀၀၀ သည် ၎င်းတာယာကို သဘောကျစွာအသုံးပြုနေကြလေသည်။ မကြာမီပင် ပါရီမြို့ရှိ မြင်းလှည်းများတွင် လေသွင်းတာယာတပ်ဆင်လိုက်ရာ ပြင်သစ်လူမျိုးခရီးသည်တို့ များစွာအကြိုက်တွေ့ခဲ့ကြ၏။ ၁၈၉၅ ခုနှစ်တွင် အက်ဝဒ်နှင့် သူ၏အစ်ကို အန်ဒရူးတို့သည် ပြိုင်ကားတွင် လေထိုးတာယာတပ်ဆင်ပြီး မော်တော်ကားများတွင် တပ်ဆင်အသုံးပြုနိုင်ကြောင်းပြသခဲ့သော်လည်း ယင်းသည် ရေရှည်မခံခဲ့ပေ။ မည်သို့ပင်ဖြစ်စေ၊ ဤထူးဆန်းသည့်တာယာကို လူတို့အံ့အားသင့်ခဲ့ကြပြီး မီရှယ်တို့ညီအစ်ကို ဘာများဝှက်ထားသည်ကိုသိလို၍ တာယာကိုခွဲကြည့်ရန် ကြိုးစားကြသည်ဆို၏!
၁၉၃၀ နှင့် ၄၀ ပြည့်လွန်နှစ်များတွင် ပျက်စီးလွယ်သောချည်၊ သဘာဝရော်ဘာတို့အစား ရေယွန်၊ နိုင်လွန်နှင့် ပေါ်လီအက်စတာအစရှိသည့် ကြာရှည်ခံပစ္စည်းသစ်တို့ကို သုံးလာကြသည်။ ဒုတိယကမ္ဘာစစ်ကြီးပြီးသည့်နောက် ဘီးတွင် တိုက်ရိုက်တပ်ထားနိုင်သည့် လေလုံသော တာယာလုပ်ငန်းများထွန်းကားလာရာ အတွင်းလေလုံးကျွတ် မလိုအပ်တော့ပေ။ နောက်ပိုင်းတွင် ထို့ထက်ပင် တိုးတက်လာခဲ့သည်။
ယနေ့၊ တာယာတစ်ခုပြုလုပ်ရာတွင် ကုန်ကြမ်းပစ္စည်းအမျိုးပေါင်း ၂၀၀ ကျော်အသုံးပြုနေကြပြီ။ ခေတ်သစ်နည်းပညာကြောင့် အချို့တာယာများသည် မိုင် ၈၀,၀၀၀ သို့မဟုတ် ထို့ထက်မက မောင်းနှင်နိုင်ပြီး ပြိုင်ကားတစ်စီး၏တာယာမှာ တစ်နာရီလျှင် မိုင်ရာနှင့်ချီမောင်းနှင်နိုင်ပြီဟု ဝင့်ကြွားခဲ့သည်။ ထိုအတောအတွင်း တာယာများသည် သာမန်သုံးစွဲသူများ ဝယ်ယူနိုင်လောက်အောင် ဈေးချိုသည်ထက် ချိုလာသည်။
တာယာများကို ရွေးချယ်ခြင်း
သင့်တွင် ကိုယ်ပိုင်ကားရှိလျှင် တာယာအသစ်ကို ခက်ခက်ခဲခဲရွေးချယ်ရပေမည်။ သင့်တာယာ လဲချိန်တန်ပြီဖြစ်ကြောင်း မည်သို့ဆုံးဖြတ်မည်နည်း။ သင့်တာယာပွန်းစားနေကြောင်း သို့မဟုတ် ပျက်စီးနေကြောင်း မြင်သာသည့်အမှတ်အသားများကို မှန်မှန်ကြည့်ရှုစစ်ဆေးခြင်းအားဖြင့် ဖြစ်သည်။ * ထုတ်လုပ်သူတို့သည် တာယာသက်တမ်းကုန်ဆုံးသွားကြောင်းဖော်ပြသည့် ပွန်းခံတုံးများဟုခေါ်သော ပွန်းခံအသားတံဆိပ်များကို ထည့်ပေးထားတတ်သည်။ ပွန်းခံတုံးများသည် တာယာပန်းမျက်နှာပြင်တွင် ကန့်လန့်ဖြတ်ရော်ဘာအပတ်အဖြစ် ပေါ်နေသည်။ တာယာပန်းကွာထွက်နေခြင်း၊ နန်းကြိုးစများထွက်နေခြင်း၊ ဘေးနံရံဖုဖောင်းထွက်နေခြင်းနှင့် အခြားမညီမညာဖြစ်မှုတို့ကိုလည်း စစ်ဆေးဖို့ကောင်းသည်။ အထက်ပါချို့ယွင်းချက်တစ်ခုခုကို တွေ့ရလျှင် တာယာကို မပြုပြင်မချင်း၊ အသစ်မလဲမချင်း မမောင်းသင့်ပေ။ သင်သည် တာယာအသစ်ဝယ်ခဲ့ခြင်းဖြစ်ပြီး အာမခံချက်လည်းပါရှိပါက လက်လီရောင်းသူသည် ဤပျက်စီးနေသည့်တာယာကို ဈေးနှုန်းသက်သက်သာသာဖြင့် အစားထိုးပေးနိုင်သည်။
ဝင်ရိုးတစ်ခုတည်းတွင် အမျိုးအစားတူသော တာယာအစုံလိုက် အစားထိုးတပ်ဆင်ခြင်းသည် အကောင်းဆုံးဖြစ်သည်။ တာယာအသစ်တစ်ခုတည်းကို တပ်ဆင်ပါက ဘရိတ်ဖမ်းသည့်အခါ ကုပ်အားညီမျှရန် တွဲဖက်တာယာတွင် တာယာပန်းများများရှိရမည်။
တာယာအမျိုးအစား၊ အရွယ်အစားနှင့် မော်ဒယ်အမျိုးမျိုးကို စိစစ်ရွေးချယ်ရခြင်းသည် စိတ်ရှုပ်စရာဖြစ်နိုင်သည်။ သို့ရာတွင် အဓိကမေးခွန်းအနည်းငယ်ကိုဖြေဆိုခြင်းဖြင့် အရွေးရလွယ်ကူသွားပါလိမ့်မည်။ ဦးဆုံး၊ ထုတ်လုပ်သူ၏ထောက်ခံချက်များကို ပြန်ဆန်းစစ်ကြည့်ပါ။ သင့်ကားတွင် တာယာနှင့် ဘီးအရွယ်အစား၊ ကားဝမ်းနှင့် မြေပြင်အကွာအဝေး၊ ကုန်ချိန်ခံနိုင်အားစသော ထည့်စဉ်းစားဖို့လိုသည့် အထူးလိုအပ်ချက်များရှိမည်။ ကား၏ဒီဇိုင်းသည်လည်း အရေးပါသည်။ ဘရိတ်အရှင်၊ ကုပ်အားထိန်းနှင့် လေးဘီးယက်စနစ်တို့ပါရှိသော ခေတ်သစ်ကားများသည် အထူးလုပ်ဆောင်ချက်များပါသည့်တာယာကို တပ်ဆင်အသုံးပြုရန် ဒီဇိုင်းပြုလုပ်ထားခြင်းဖြစ်၏။ တာယာ၏အသေးစိတ်အချက်အလက်များသည် သင့်ကားပိုင်ရှင်လက်စွဲစာအုပ်တွင် ပါလေ့ရှိသည်။
နောက်အချက်မှာ လမ်း၏အခြေအနေဖြစ်သည်။ သင့်ကားကို အဓိကအားဖြင့် လမ်းကြမ်း သို့မဟုတ် ခင်းထားသည့်လမ်းပေါ်တွင် မောင်းမည်လော၊ မိုးရာသီ သို့မဟုတ် ခြောက်သွေ့ရာသီတွင် သုံးမည်လော။ အခြေအနေအမျိုးမျိုးတွင် မောင်းနှင်ခြင်းဖြစ်နိုင်သည်။ ထိုအခြေအနေမျိုးတွင် လမ်းအနေအထားစုံ သို့မဟုတ် ရာသီစုံအသုံးပြုနိုင်သည့် တာယာများလိုပေမည်။
တာယာ၏သက်တမ်းနှင့် ကုပ်အားအခြေအနေတို့ကိုလည်း ထည့်စဉ်းစားသင့်ပေသည်။ အများအားဖြင့် တာယာပန်းအပျော့စားသည် ကုပ်အားပိုကောင်းသော်လည်း ပွန်းစားနှုန်းမြန်သည်။ အခြားတစ်ဖက်တွင်မူ တာယာပန်းအမာစားသည် ကုပ်အားနည်းသော်လည်း ရေရှည်အသုံးခံ၏။ အမျိုးအစားများကို အရောင်းဆိုင်များရှိအရောင်းစာရင်းတွင် တွေ့ရလေ့ရှိသည်။ တာယာအမျိုးအစားများသည် ထုတ်လုပ်သူတစ်ဦးနှင့်တစ်ဦး မတူကြောင်း သတိပြုရမည်။
သင်၏လိုက်စစ်ရှာဖွေမှုကို ဘောင်ကျဉ်းလိုက်ပြီးနောက် ဈေးနှုန်းသည် သင် နောက်ဆုံးရွေးချယ်မှုအတွက် အဆုံးအဖြတ်ဖြစ်နိုင်သည်။ နာမည်ရထုတ်လုပ်သူတို့သည် သာ၍အရည်အသွေးကောင်းကောင်းနှင့် သာ၍အာမခံချက်ကောင်းကောင်း ပေးလေ့ရှိသည်။
သင့်တာယာများကို ပြုပြင်ထိန်းသိမ်းခြင်း
တာယာကို သင့်လျော်စွာပြုပြင်ထိန်းသိမ်းရသည့် အချက်သုံးချက်မှာ တာယာလေပေါင်မှန်စေရမည်၊ ပုံမှန်ဘက်ပြောင်းပေးရမည်၊ ဘက်ညီပြီး အလိုင်းမင်းမှန်နေစေရမည်တို့ဖြစ်၏။ လေပေါင်မှန်အောင် ထိန်းခြင်းသည် အလွန်အရေးကြီးသည်။ တာယာလေတင်းလွန်းပါက တာယာ၏အလယ်ပန်းသည် အပါးမြန်သွားလိမ့်မည်။ အခြားတစ်ဖက်တွင်မူ တာယာသည် လေပေါင်အလွန်နည်းပါက တာယာ၏ဘေးစွန်းများသည် ပွတ်တိုက်မှုများကာ လောင်စာဆီကုန်သလောက် ခရီးမရောက်ဖြစ်တတ်သည်။
ရော်ဘာသားထဲမှတစ်ဆင့် လေစိမ့်ထွက်နေခြင်းကြောင့် တာယာသည် လစဉ် လေအားတစ်ပေါင် သို့မဟုတ် ထိုထက်မက လျော့သွားပေမည်။ တာယာ၏ပုံပန်းကိုကြည့်ကာ သင့် တာယာသည် လေပေါင်ပြည့်နေသည်ဟု မယူမှတ်လိုက်ပါနှင့်။ ရော်ဘာထုတ်လုပ်သူများအဖွဲ့၏အဆိုအရ “တာယာသည် လေပေါင်တစ်ဝက်ရှိလျှင်ပင် ပြားနေသည်ဟု မထင်ရပါ!” ထို့ကြောင့် လေပေါင်တိုင်းကိရိယာဖြင့် အနည်းဆုံး တစ်လလျှင်တစ်ကြိမ် တိုင်းတာရမည်။ ကားပိုင်ရှင်များသည် ထိုကိရိယာကို အလွယ်တကူယူသုံးနိုင်ရန် ကားရှေ့အကန့်လေးတွင် ထားတတ်ကြသည်။ အင်ဂျင်ဝိုင်လဲသည့်အခါနှင့် တာယာအေးနေသည့်အခါမျိုးတွင်သာ သင့် ကားတာယာများကို အမြဲစစ်ဆေးပါ၊ တာယာအေးနေသည့်အခါဆိုသည်မှာ အနည်းဆုံး သုံးနာရီကြာရပ်ထားပြီးသောအခါ သို့မဟုတ် တစ်မိုင်ထက်မပိုဘဲ မောင်းနှင်ပြီးသောအခါမျိုးဖြစ်သည်။ ပိုင်ရှင်လက်စွဲစာအုပ်၊ ယာဉ်မောင်းတံခါးတိုင်နှင့် ကားရှေ့ခန်းအကန့်တွင် တာယာလေပေါင်အနီး ဆိုင်ရာအချက်များ သတ်သတ်မှတ်မှတ် ဖော်ပြလေ့ရှိသည်။ ကားမောင်းစဉ် အဆောင့်သက်သာစေလိုလျှင် တာယာဘေးဘက်ပါ ဖောင်းကြွအသားတံဆိပ်ဖြင့်ဖော်ပြထားသည့် အများဆုံးလေပေါင်အထိ လေမထိုးထားပါနှင့်။
တာယာများကို ပုံမှန်ဘက်ပြောင်းပေးလျှင် ပိုကြာရှည်ခံပြီး အပွန်းလည်း တညီတည်းဖြစ်နေမည်။ ကားထုတ်လုပ်သူ၏အကြံပေးချက်များနှင့် တစ်မူကွဲနေသည်မှလွဲ၍ တာယာများကို မိုင် ၆,၀၀၀ မှ ၈,၀၀၀ အထိမောင်းပြီးတိုင်း ဘက်ပြောင်းပေးလျှင် ကောင်းသည်။ ဤတွင်လည်း အကြံပြုထားသည့်ဘက်ပြောင်းပုံစံကို ကားပိုင်ရှင်လက်စွဲစာအုပ်တွင် ကြည့်ပါ။
နောက်ဆုံးအနေနှင့် ကားစတီယာရင် အလွန်တုန်ခါခြင်း၊ မူမမှန်ဖြစ်ခြင်းကို သတိပြုမိသည့်အခါတိုင်း သို့မဟုတ် နှစ်စဉ် သင့်ကားတာယာကို အလိုင်းမင်းချိန်ပေးပါ။ သင့်ကား၏ဆိုင်းထိန်းစနစ်သည် ဝန်စည်စလယ်အမျိုးမျိုး တင်ဆောင်ချိန်တွင် တာယာဘီး အလိုင်းမင်းညီနေစေရန် ပုံစံပြုထားသော်လည်း သာမန်ပွန်းစားခြင်းနှင့် ပေါက်ပြဲခြင်းတို့ကို စစ်ဆေးပေးဖို့လိုပြီး အခါအားလျော်စွာ တာယာပြန်ချိန်ပေးဖို့လိုမည်။ ဆိုင်းထိန်းနှင့် ဘီးအလိုင်းမင်းချိန်ရာတွင် လက်မှတ်ရကားပြင်ဆရာများက သင့်ကားကို တိတိကျကျ အလိုင်းမင်းချိန်ညှိပေးရန်၊ တာယာကို ရေရှည်အသုံးခံစေရန်နှင့် ညက်ညောညင်သာစွာမောင်းနှင်နိုင်ရန်တို့ကို ဝန်ဆောင်ပေးနိုင်ကြသည်။
“အခြေအနေကို တုံ့ပြန်တတ်သော” တာယာများ
ကွန်ပျူတာထိန်းချုပ်မှုပါသော ကားအချို့တွင် အန္တရာယ်ရှိနိုင်လောက်သည့် တာယာလေလျော့သွားသည့်အခါ ယာဉ်မောင်းကို အချက်ပေး၏။ အချို့တာယာများသည် လေပေါင်မပြည့်ဘဲ အချိန်အတန်ကြာ ဘေးကင်းစွာဆက်မောင်းနိုင်ပြီး အချို့တာယာမှာ အချွန်နှင့်ထိုးဖောက်မိပြီးနောက် ၎င်းတို့ဘာသာ ပြန်ပိတ်သွားသည်။ အင်ဂျင်နီယာတို့သည် တာယာများစွမ်းဆောင်နိုင်မှု ကောင်းသည်ထက်ကောင်းလာစေရန် ပုံစံဆွဲလျက်ရှိ၏။
ခေတ်သစ်ကားများတွင်တပ်ဆင်ထားသည့် ပစ္စည်းများ၊ တာယာပန်းဒီဇိုင်း၊ ဆိုင်းထိန်း၊ စတီယာရင်နှင့် ဘရိတ်စနစ်တို့တိုးတက်လာခြင်းက ကားမောင်းရာတွင် လွယ်ကူစေရုံသာမက ပိုဘေးကင်းစေသည်။
[အောက်ခြေမှတ်ချက်]
^ အပိုဒ်၊ 15 တာယာကြည့်ရှုစစ်ဆေးခြင်းအတွက် စာမျက်နှာ ၁၇ မှဇယားကိုရှု။
[စာမျက်နှာ ၁၇ ပါ ဇယား/ရုပ်ပုံ]
တာယာပြုပြင်ထိန်းသိမ်းမှု စာရင်း
မျက်မြင်စစ်ဆေးခြင်း–
□ တာယာဘေးနံရံတွင် အဖုအဖောင်းများရှိသလော။
□ တာယာပန်းမျက်နှာပြင်တွင် ဝါယာစများပေါ်နေသလော။
□ တာယာပန်းသည် အန္တရာယ်မရှိလောက်အောင် ဇောက်နက်သလော၊ သို့မဟုတ် တာယာ၏ပွန်းခံတုံးများ ပေါ်နေပြီလော။
ထည့်သွင်းစဉ်းစားရန်–
□ တာယာ၏လေပေါင်သည် ကားထုတ်လုပ်သူအကြံပြုထားသော လေပေါင်ထိုးထားသလော။
□ တာယာများကို ဘက်ပြောင်းပေးဖို့ အချိန်တန်ပြီသလော။ (ကားထုတ်လုပ်သူအကြံပြုထားသည့် မောင်းပြီးခရီးမိုင်နှင့် ဘက်ပြောင်းပေးသည့်ပုံစံကို အသုံးပြုပါ။)
□ ရာသီအပြောင်းအလဲကြောင့် အခြားတာယာမျိုးကို တပ်ဆင်သင့်သလော။
[ရုပ်ပုံ]
ပွန်းခံတုံး
[စာမျက်နှာ ၁၆ ပါ ဇယား]
(ကားချပ်အပြည့်အစုံကို စာစောင်တွင်ကြည့်ပါ)
တာယာတစ်ခု၏ အစိတ်အပိုင်းများ
တာယာပန်းသည် ကုပ်ဆွဲအားဖြစ်စေသည်
အပတ်များသည် တာယာပန်းကို ခိုင်ခံ့မြဲမြံစေသည်
ဘေးနံရံသည် တာယာ၏ဘေးသားကို လမ်းနှင့်ပွတ်တိုက်ပျက်စီးခြင်းမှ ကာကွယ်ပေးသည်
ကြိုးထိုးတာယာသားသည် တာယာကို ခိုင်ခံ့စေပြီး လျော့တင်းနိုင်စွမ်းရှိစေသည်
အတွင်းလိုင်နာသည် တာယာအတွင်းရှိ လေကို ထိန်းပေးသည်
အနားသားသည် ဘီးအတွင်း လေလုံစေသည်
[စာမျက်နှာ ၁၅ ပါ ရုပ်ပုံများ]
လေထိုးတာယာဖြင့် အစောပိုင်း စက်ဘီးနှင့် ကား; အစောပိုင်းတာယာစက်ရုံရှိ လုပ်သားများ
[Credit Line]
The Goodyear Tire & Rubber Company