‘ငါ​ဘာတွေ​ဖြစ်နေ​ပါ​လိမ့်’

“တစ်နေ့​မှာ ကျွန်တော်​အိပ်ရာ​က နိုး​လာတော့ အရာ​ရာ​ဟာ ပြောင်းလဲ​သွား​သလိုပဲ။ကျွန်တော်​ဟာ တခြား​ပုဂ္ဂိုလ်​တစ်ယောက်လို​ဖြစ်​နေတယ်။”—စ​မ်။

မြီး​ကောင်​ပေါက်​အရွယ်​ဟူသည် အဘယ်နည်း။ ရိုးရိုးလေး​ဖော်ပြ​ရ​လျှင် ကလေး​ဘဝ​နှင့် လူကြီး​ဘဝ​ကြား​အရွယ် ဖြစ်သည်။ ကာယပိုင်း၊ စိတ်ပိုင်း​နှင့် လူမှု​ဆက်ဆံ​ရေး​တို့​တွင်​ပင် ထူးခြားသော​အပြောင်းအလဲ​များ တွေ့ကြုံ​ရသည့်​ကာလ​ဖြစ်သည်။ မြီး​ကောင်​ပေါက်​အရွယ်​ဝင်​စ​သည် တစ်နည်း​အားဖြင့် စိတ်​လှုပ်ရှား​ဖွယ်​ဖြစ်၏။ အမှန်​မှာ၊ သင်သည် လူ​လား​မြောက်​လာရန် အဆင့်ဆင့်​တက်လှမ်း​နေခြင်း​ဖြစ်သည်။ အခြား​တစ်ဖက်​တွင်​မူ ဤ​ကာလ​အတွင်း ခံစားချက်​အသစ်​တို့ ဖြစ်ပေါ်​လာ​ရာ တချို့သော​ခံစားချက်​မှာ စိတ်ရှုပ်​စေပြီး ထိတ်လန့်​ခြင်း​ပင် ဖြစ်စေ​နိုင်​သည်။

မြီး​ကောင်​ပေါက်​ချိန်​ကို စိုးရွံ့​နေစရာ​မလိုပါ။ အတော်လေး စိတ်သောက​ရောက်​နိုင်​သည်​မှာ မငြင်း​သာ​ပေ။ သို့သော်၊ ယင်းက သင် လူကြီး​ဘဝသို့ လုံးလုံးလျားလျား ရောက်သွား​စေသည့် အံ့ဖွယ်​အခွင့်ထူး​လည်း​ဖြစ်သည်။ မြီး​ကောင်​ပေါက်​များ​ရင်ဆိုင်​ရသည့် စိန်ခေါ်ချက်​တချို့​ကို ဦးစွာ​ဆန်းစစ်ခြင်း​အားဖြင့် ယင်း​တို့ကို မည်သို့​ဖြေရှင်း​နိုင်​ကြောင်း ကြည့်​ကြ​စို့။

လူပျို​အပျို​ဖော်​စ​ဝင်​ခြင်း

မြီး​ကောင်​ပေါက်​ချိန်​အတွင်း သင့်ကိုယ်​ခန္ဓာ​တွင် လိင်ဆိုင်ရာ​မျိုးပွားခြင်း​အတွက် အသင့်ပြင်​ဆင်​ပေး​သည့် အပြောင်းအလဲ​များ​ဖြစ်လာ​သည်။ ဤ​ဖြစ်​စဉ်​ကို လူပျို​အပျိုဖော်ဝင်​ခြင်း​ဟု​ခေါ်​ပြီး နှစ်ချီ​ကြာ​တတ်​သည်၊ ယင်း​တွင် သင့်​မျိုးပွား​အင်္ဂါများ ဖွံ့​ထွား​လာ​ရုံ​ထက်မက​ကြောင်း အောက်ပါ​အချက်အလက်​များ​မှ ကျွန်ုပ်​တို့​သိရှိ​ရ​ပါ​လိမ့်​မည်။

မိန်းကလေး​များသည် အသက် ၁၀ မှ ၁၂ နှစ်​ကြား​တွင် အပျို​ဖော်​စ​ဝင်လေ့​ရှိပြီး ယောက်ျားလေး​များ​မှာ အသက် ၁၂ မှ ၁၄ နှစ်​ကြား​တွင် လူပျို​ဖော်​စ​ဝင်​သည်။ ယင်း​တို့သည် ပျမ်းမျှ​သာ​ဖြစ်သည်။ ဆယ်ကျော်သက်​ကိုယ်ခန္ဓာ​အသစ် စာအုပ်​အရ “လူပျို​အပျိုဖော်ဝင်​ခြင်း​ဆိုင်ရာ​အပြောင်းအလဲ​များ အဘယ်​အချိန်တွင်​ဖြစ်​မည်​ကို လမ်းညွှန်​စေ​စား​ပေး​သော အထူး​ကိုယ်​တွင်း​ဇီဝ​နာရီ​သည် ယောက်စီ​ယောက်​တိုင်း​တွင် ရှိ​နေသည်” ဟု​ဖော်ပြ​သည်။ “ပုံမှန် လူပျို​အပျို​ဖော်​စ​ဝင်​ချိန်မှာ အလွန်​ကွာခြား​ကြသည်” ဟု​ထပ်ဆင့်​ဖော်ပြ​ထား​၏။ အကယ်၍ သင်၏​လူပျို​အပျို​ဖော်​စ​ဝင်ချိန်​သည် သင့်​ရွယ်တူချင်း​များ​ထက် စောလွန်း​သည်​ဖြစ်စေ၊ နောက်ကျ​သည်​ဖြစ်စေ ဘာ​ပြဿနာ​မျှ မရှိပါ။

မည်သည့်​အချိန်တွင် လူပျို​အပျို​ဖော်​စ​ဝင်ပါ​စေ၊ ထို​အချိန်​သည် သင့်​ခန္ဓာကိုယ်​ပုံပန်း၊ သင့်​ခံစားချက်​နှင့် သင့်​ဝန်းကျင်​ကို ရှုမြင်ပုံ​တို့​အပေါ် အကျိုး​သက်ရောက်​နိုင်​သည်။ ဤ​သူ​မတူ​သော​အသက်အရွယ်​၏ နှစ်​လို့​ဖွယ်​လည်း​ဖြစ်၊ စိန်ခေါ်ချက်​လည်း​ဖြစ်သည့်​အရာ​တချို့​ကို သုံးသပ်ကြည့်​ကြ​စို့။

‘ငါ ဘာ​ပုံ​ထွက်​နေပါ​လိမ့်’

မိန်းကလေး​များ​တွင် အီစထရိုဂျင်​ဟော်မုန်း​နှင့် ယောက်ျားလေး​တွင် တက်​စ​တို​စ​တီ​ရု​န်း​ဟော်မုန်း​တို့ မြင့်တက်​လာ​ခြင်း​မှာ လူပျို​အပျိုဖော်ဝင်​ခြင်း​၏​အစ ဖြစ်သည်။ ဟော်မုန်း​အပြောင်းအလဲ​များ​ကြောင့် အံ့ဖွယ် ကိုယ်ခန္ဓာ​ပုံပန်း​သဏ္ဌာန်​ပြောင်းလဲခြင်း လိုက်ပါ​လာ​သည်။ အမှန်​မှာ၊ လူပျို​အပျို​ဖော်​စ​ဝင်ပြီး​နောက် သင့်​ခန္ဓာကိုယ်​သည် လူ​မ​မည်​အရွယ်​နောက်ပိုင်း အမြန်ဆုံး​နှုန်း​ဖြင့် ကြီးထွား​လေ​တော့​သည်။

ထို​အချိန်တွင် သင့်​မျိုးပွား​အင်္ဂါများ​သည် စတင်​ကြီးရင့်​ဖွံ့ဖြိုး​လာ​ရာ ယင်းသည် ခန္ဓာကိုယ်​ကြီးထွားမှု တစ်ခု​သာ​ဖြစ်သည်။ သင်သည် ချက်ချင်း​ပင် အရပ်​ထိုး​ထွက်​လာ​မည်။ ကလေး​ဘဝက တစ်နှစ်​လျှင် နှစ်​လက်မ​ခန့်​အရပ်​ထွက်​ပြီး မြီး​ကောင်​ပေါက်​အချိန်တွင် ထို​နှုန်း​၏​နှစ်ဆ​ဖြင့် အရပ်​ထိုး​ထွက်​လာ​ခြင်း​သည် အထူးအဆန်း​မဟုတ်ပေ။

ထို​ကြီးထွား​ချိန်​တစ်လျှောက်​လုံး​တွင် ခန္ဓာကိုယ်​သည် အတော်ပင် အချိုးအစား​မကျ​ဟု သင်​ခံစားရ​ပေမည်။ ယင်းသည် သဘာဝ​ပင်။ သင့်​ခန္ဓာကိုယ် အစိတ်အပိုင်း​အသီးသီး​သည် မတူညီသည့်​နှုန်း​များ​ဖြင့် ကြီးထွား​နေ​မည်​ကို သတိရပါ။ အတော်ပင် ကိုးရိုးကားရား​နိုင်​ပေမည်။ သို့သော်၊ စိတ်ရှည်ပါ၊ မတော်တဆ တစ်သက်လုံး ဤသို့​ဆက်​ဖြစ်သွား​မည်​လော​ဟု စိုးရိမ်​စ​ရာ​မလို​ပေ။ မြီး​ကောင်​ပေါက်​အချိန်​၏ ခန္ဓာပိုင်း​ဆိုင်ရာ ကိုးရိုးကားရား​ဖြစ်​ချိန်မှာ ကုန်ဆုံး​သွားပါ​လိမ့်​မည်။

မိန်းကလေး​များသည် အပျို​ဖော်​စ​ဝင်ချိန်​တွင် သား​အိမ်​အတွင်းမှ သွေး၊ အရည်​နှင့် အသားစ​များ လစဉ်​ထုတ်လွှတ်​သည့် ရာသီ​ပန်း​ပွင့်​လာ​သည်။ * ရာသီ​ပန်း​ပွင့်ချိန်​တွင် ဆီး​စပ်​ကိုက်​တတ်​သည့်​အပြင် ဟော်မုန်း​ဓာတ်​များ လျော့နည်း​သွားလေ့​ရှိ၏။ ယင်းသည် ကာယပိုင်း​ရော စိတ်ပိုင်း​အရ​ပါ ထိခိုက်မှု​များ​ရှိသောကြောင့် ရာသီ​စ​လာချိန်​တွင် အတော်ပင် ထိတ်လန့်​သွား​နိုင်​သည်။ ယခု​အသက် ၁၇ နှစ်​ရှိပြီ​ဖြစ်သည့် ထ​ရီ​ဇာ​က ဤသို့​ပြန်​ပြော​ခဲ့​၏– “ရုတ်တရက်​ဖြစ်လာတဲ့ ဒီ​အတွေ့အကြုံ​သစ်​ကို ကိုင်တွယ်​ဖြေရှင်း​ရတယ်။ အဲ့ဒါက ကျွန်မ​ကို စိတ်​အနှောင့်အယှက်​ဖြစ်စေ​ပြီး နာကျင်​စေတယ်။ ပြီး​တော့ လစဉ်​လတိုင်း​ဖြစ်​နေတယ်!”

ရာသီ​ပန်း​စ​ပွင့်​သည့်​အခါ ထိတ်လန့်စရာ​မလိုပါ။ အမှန်​မှာ၊ ယင်းသည် သင့်​ခန္ဓာကိုယ် ပုံမှန်​လုပ်ဆောင်​နေကြောင်း ဖော်ပြခြင်း​ဖြစ်သည်။ နောက်ဆုံး​တွင်၊ ရာသီ​လာချိန်​၏ ကသိကအောက်​ဖြစ်မှု​များ​ကို အောင်မြင်စွာ ကိုင်တွယ်​ဖြေရှင်း​တတ်​သွားပါ​လိမ့်​မည်။ အချို့​က လေ့ကျင့်ခန်း​မှန်မှန်​လုပ်ခြင်း​သည် ဆီး​စပ်​ကိုက်​သည်ကို သက်သာ​စေ​ကြောင်း သိရှိ​ကြသည်။ သို့ရာတွင်၊ တစ်ယောက်​နှင့်​တစ်ယောက် မတူကြ​ပါ။ ရာသီ​လာချိန်​အတွင်း ကိုယ်လက်​လှုပ်ရှားမှုများ​ကို သိသိသာသာ​လျော့​ပစ်​ဖို့​လို​ကြောင်း သင်​သိထား​ပေမည်။ သင့်​ခန္ဓာကိုယ်​က ဘာ​ပြော​နေသည်​ကို “နားထောင်” တတ်​ရန်​သင်ယူပြီး လိုအပ်​သလို ဖြည့်ဆည်း​ပေး​ပါ။

မြီး​ကောင်​ပေါက်​အချိန်တွင် မိန်းကလေး​ရော ယောက်ျားလေး​များ​ပါ မိမိတို့၏​ပုံပန်း​သဏ္ဌာန်​ကို ပို​ဂရုစိုက်​လာ​တတ်​သည်။ “ကြီးကောင်​စ​ဝင်​ချိန်မှာ ကျွန်မ​ရဲ့​ပုံပန်း​ကို တခြား​သူတွေ ဘယ်လို​မြင်ကြ​မယ်​ဆိုတာ စပြီး​သတိပြု၊ စိုးရိမ်​တတ်​လာတယ်” ဟု​ထ​ရီ​ဇာ ဖွင့်ပြော​ခဲ့​သည်။ “ကျွန်မ​ရဲ့​ပုံပန်း​ကို တစ်ချိန်​လုံး အလိုမကျ​ဖြစ်နေ​မိတယ်၊ ဆံပင်​က ပုံစံ​မကျ၊ အဝတ်အစား​တွေ​က မလိုက်ဖက်၊ ကျွန်မ​နဲ့​လိုက်ဖက်​တဲ့​အဝတ်​တွေ မရှိတော့​သလိုပဲ!” ဟု​သူ​ဆက်​ပြော​ခဲ့​သည်။

သင့်ကိုယ်​ခန္ဓာ​က​လည်း တစ်နည်း​တစ်​ဖုံ​ဖြင့် သင့်​စိတ်​အလိုမကျ​အောင်​ဖြစ်စေ​နိုင်​သည်။ ဥပမာ၊ လူပျို​အပျိုဖော်ဝင်​ချိန်​အတွင်း သင့်​ချွေးဂလင်း​များ ပို​အလုပ်လုပ်​လာပြီး ချွေး​ထွက်​သန်​မည်။ မှန်မှန်​ရေချိုးခြင်း​အပြင် အဝတ်အစား​များ​ကို လောလောလတ်လတ်​လျှော်ဖွပ်​မီး​ပူ​တိုက်​ထားခြင်း​က သင့်​ခန္ဓာကိုယ်​အနံ့​အသက်​များ​ကို ထိန်း​နိုင်​လိမ့်​မည်။ ချွေးနံ့​ပျောက်ဆေး သုံး​ခြင်း​ဖြင့်​လည်း အနံ့​အသက်ကို ထိန်းထား​နိုင်​ပါ​သည်။

လူပျို​အပျိုဖော်ဝင်​ချိန်​အတွင်း သင့်​အသားအရေ​ထဲ​မှ အဆီ​ဂလင်း​များသည် ပို​အလုပ်လုပ်​လာပြီး ဝက်​ခြံ​နှင့် ဝက်​ခြံ​ပုန်း​များ ထွက်​စေ​သည်။ အဲ​န်း​အမည်​ရှိ​မိန်းကလေး​က “ကျွန်မ အလှ​ချင်​ဆုံး​ဖြစ်​လို​တဲ့​အချိန်​ရောက်ပြီ​ဆိုရင် ဝက်​ခြံ​က အမြဲ​ထွက်​ထွက်​လာ​နေတယ်။ ကျွန်မ​က​ပဲ စိတ်ထင်​လို့လား၊ ဒါမှ​မဟုတ် မလိုချင်​ဆုံး​အချိန်​မှာ​ထွက်​ထွက်​လာဖို့ ဝက်​ခြံ​တွေ​မှာ ဆ​ဋ္ဌ​အာရုံ​မျိုး​ရှိနေ​ရော့​သလား” ဟု​ညည်းညူ​ခဲ့​သည်။ ဝက်​ခြံ​ပုန်း​သည် ထ​ရီ​ဇာ​အတွက်​လည်း အခက်အခဲ​တစ်ခု​ဖြစ်​ခဲ့​သည်။ “ကျွန်မ​ကို အကျည်းတန်​စေပြီး ဝက်​ခြံ​တွေ​ကိုပဲ လူတွေ​ကြည့်​နေတယ်လို့ စိတ်မလုံ​မလဲ​ဖြစ်​ရတယ်!” ဟု​သူ​ပြော​ခဲ့​သည်။

ယောက်ျားလေး​များသည်​လည်း အလားတူ​အသားအရေ​ပြဿနာ​များ ခံစား​ရနိုင်​သည်။ အမှန်​မှာ၊ ယောက်ျားလေး​များသည် မိန်းကလေး​များ​ထက် ပို​၍​အသားအရေ​ပြဿနာ​ဖြစ်​နိုင်​သည်​ဟု ကျွမ်းကျင်​သူ​အချို့​က ပြော​ကြသည်။ သင်သည် ယောက်ျားလေး​ဖြစ်စေ၊ မိန်းကလေး​ဖြစ်စေ သင့်​မျက်နှာ၊ လည်ပင်း၊ ပခုံး၊ နောက်ကျော​နှင့် ရင်ဘတ်​စ​သည့် အဆီ​ပြန်နေ​သော ခန္ဓာကိုယ်​အစိတ်အပိုင်း​များ​ကို မှန်မှန်​ဆေးကြော​သန့်စင်ခြင်း​ဖြင့် အကျိုး​ခံစား​နိုင်​ပါ​သည်။ မကြာခဏ​ခေါင်းလျှော်​ခြင်း​က သင့်​အသားအရေ​သို့ အဆီ​ပြန့်​မသွား​စေရန် ကာကွယ်​နိုင်​ပေ​သည်။ ထို့​ပြင်၊ ဝက်​ခြံ​နှင့် ဝက်​ခြံ​ပုန်း​များ​ပျောက်စေ​ရန် ထုတ်လုပ်​ထား​သည့်​ပစ္စည်း​များလည်း​ရှိ၏။ “ကျွန်မ​မိဘတွေက အရေပြား​သန့်စင်​ဆေး​တွေ၊ သင့်တော်​တဲ့​ဆေး​အဆီ​တွေ ရှာပေး​ကြတယ်။ အစာ​ဖျင်း​တွေ အများကြီး​မစားဖို့​လည်း ကူညီ​ပေးတယ်။ အစာ​ဖျင်း​တွေ​မစား​ဘဲ ရေ​အများကြီး​သောက်​တဲ့​အခါ ဝက်​ခြံ​ပုန်း​တွေ​ပျောက်​သွား​တတ်တယ်” ဟု​ထ​ရီ​ဇာ​ပြော​ခဲ့​သည်။

ယောက်ျားလေး​များ​တွင်​ဖြစ်ပေါ်​သည့် နောက်ထပ်​ခန္ဓာကိုယ်​အပြောင်းအလဲ​တစ်ခု​မှာ အသံ​ဖြစ်သည်။ လူပျို​ဖော်​ဝင်ချိန်​အတွင်း သင့်​အသံကြိုး​များသည် ထူ​ပြီး​ရှည်​လာ​ရာ တဖြည်းဖြည်း အသံ​အော​လာ​သည်။ ယင်း​သို့​ဖြစ်နေ​သည်ကို ဘီလ် သတိ​မထား​မိ​ခဲ့​ချေ။ “ကျွန်တော်​ဖုန်း​ပြော​တဲ့​အခါ လူတွေက ကျွန်တော့်​အမေ​လား ဒါမှ​မဟုတ် ညီမလေး​လားလို့ ထင်​နေကြ​တဲ့​အချိန်အထိ ကျွန်တော့်​အသံပြောင်း​သွားတာ မသိလိုက်ဘူး” ဟု သူ​ပြော​ခဲ့​သည်။

တစ်ခါတစ်ရံ၊ အသံပြောင်း​နေစဉ်​တွင် အနိမ့်​သံ​မှ အမြင့်​သံ​သို့ ရုတ်ခြည်း​ပြောင်း​သွား​ကာ အသံ​ခပ်​အက်​အက် ဖြစ်နေ​တတ်​သည်။ တိုင်​ရွန်​က မိမိ​ငယ်​စဉ်​အချိန်ကို ပြန်တွေး​တော​ရင်း “ဒါက စိတ်​အို​က်​စ​ရာ​အကောင်းဆုံး​ပဲ။ ကျွန်တော်​စိတ်​လှုပ်ရှား​တဲ့​အခါတိုင်း အသံ​အက်​လာတယ်။ သိပ်​စိတ်​မ​လှုပ်ရှား​ဖို့ ကြိုးစား​ပေမဲ့ မရဘူး” ဟု​ပြော​ခဲ့​၏။ “တစ်နှစ်၊ နှစ်နှစ်​ကျော်​ပြီး​တဲ့​နောက် အသံ​အက်​တာ ပျောက်​သွားတယ်” ဟု​တိုင်​ရွန်​ဆက်​ပြော​ခဲ့​သည်။ သင်လည်း အလားတူ​ဖြစ်​နေလျှင် စိတ်မပျက်​ပါ​နှင့်! မကြာမီ၊ သင့်​အသံ​လည်း အတက်အကျ ပုံမှန်​ပြန်​ဖြစ်သွား​ပါ​လိမ့်​မည်။

‘ငါ​ဘာကြောင့် ဒီလို​ခံစား​ရသလဲ’

မြီး​ကောင်​ပေါက်​တို့သည် စိတ်ဖိစီးမှု​မျိုးစုံ​နှင့် ကြုံတွေ့​ရသည်မှာ မ​ဆန်း​ပါ။ ဥပမာ၊ သင့်​ကလေး​ဘဝက အခင်ဆုံး​မိတ်ဆွေ​တို့​နှင့် တဖြည်းဖြည်း ဆက်ဆံ​ရေး​ကျဲ​သွား​သည်။ အကြီးအကျယ် က​တောက်​က​ဆ​ဖြစ်​ခြင်း​ကြောင့် မဟုတ်ပါ။ စရိုက်​ကွဲ​သွား​ကြ​၍ ဖြစ်​နိုင်​သည်။ တစ်ချိန်က နှစ်သိမ့်မှု​နှင့် လုံခြုံ​စိတ်ချမှု​အတွက် ပြေးဝင်​ခိုလှုံ​သော သင့်​မိဘများ​ပင် ချက်ချင်း​ဆို​သလို ခေတ်​နောက်ကျ​ပြီး ချဉ်းကပ်​ရန် ခက်ခဲ​ပုံ​ပေါက်​လာ​မည်။

ဤ​အရာအားလုံး​က ဆယ်ကျော်သက်​များ​ကို အထီးကျန်​စိတ်​ခံစားရ​စေ​သည်။ “မြီး​ကောင်​ပေါက်​အရွယ်​သည် ကလေး​ဘဝ သို့​မဟုတ် လူကြီး​ဘဝတွင်​ထက် အထီးကျန်​စိတ်​ကို ပို​၍​အကြိမ်များများ၊ ပို​၍​ပြင်းပြင်းထန်ထန် ခံစားရ​ကြသည်​ဟု သုတေသီ​အချို့​က​ဆို​ကြောင်း” စွယ်စုံ​ကျမ်း​တစ်ကျမ်း​က ကိုးကား​ဖော်ပြ​ထား​သည်။ အခြားသူများ​က သင့်​အား လူ​ထူး​လူ​ဆန်း​အဖြစ် ရှုမြင်ကြ​မည်​စိုး​သောကြောင့် သင့်​သဘောထား၊ ခံစားချက်​များ​ကို မျိုသိပ်​ထား​ပေမည်။ သို့​မဟုတ် မည်သူမျှ သင်​နှင့်​အဖော်​မ​လုပ်ချင်​ဟု စွဲမြဲ​ခံစားရ​နေ​ကာ အခြား​သူများကို အပေါင်းအသင်း​မ​လုပ်​ရဲ​ဘဲ ဖြစ်နေ​ပေမည်။

မြီး​ကောင်​ပေါက်​အများစု​သည် အထီးကျန်​စိတ်​ခံစား​ကြ​ရပြီး လူကြီး​များစွာ​လည်း ထို​အတိုင်း​ပင်​ဖြစ်၏။ စိတ်​စွဲမှတ်​ထား​ရမည့် အရေးကြီးဆုံး​အချက်​မှာ အချိန်တန်သော် ဤ​ခံစားချက်​များ ကင်း​ပျောက်​သွား​နိုင်​သည်။ * သင်သည် မြီး​ကောင်​ပေါက်​တစ်ဦး​ဖြစ်သော​ကြောင့် သင်၌ အရာ​ရာ​ပြောင်းလဲ​နေကြောင်း စိတ်စွဲ​မှတ်​ပါ​လေ။ ဘဝကို ရှုမြင်ပုံ၊ အခြား​သူများကို ရှုမြင်ပုံ၊ သင့်ကိုယ်​သင် ရှုမြင်ပုံ​တို့သည် အမြဲ​ပြောင်းလဲ​နေသည်။ အမှန်​မှာ၊ မှန်​ထဲမှာ ဘယ်သူ​ကြီး​ပါ​လိမ့်​ဟု သူစိမ်း​တစ်ဦး​ပ​မာ သင့်ကိုယ်​သင် ထင်​နေသည့်​အခါ​များ​ပင်​ရှိ​မည်! “အပြောင်းအလဲ​မြန်​လွန်းလို့ ကိုယ့်​ကိုယ်ကို​တောင် နားမလည်​နိုင်အောင်​ဖြစ်​နေတယ်” ဟု​ပြော​ခဲ့​သည့် ၁၇ နှစ်အရွယ် စတိဗ်​ကဲ့သို့ အသင်​လည်း ခံစား​ရနိုင်​သည်။

အထီးကျန်​စိတ်​ကို တွန်းလှန်​နိုင်​ရန် အကောင်းဆုံးနည်း​မှာ အခြား​သူများ​နှင့် အပေါင်းအသင်း​လုပ်ခြင်း​ဖြစ်သည်။ ယင်းက သင်​နှင့် သက်တူရွယ်တူ​မဟုတ်​သူတို့ကို သိကျွမ်း​အောင်​လုပ်​ရမည်​ဖြစ်သည်။ ရင်းရင်းနှီးနှီး​လည်ပတ်​နိုင်​သည့် သက်ကြီးရွယ်အို​တစ်ဦးဦး ရှိသလော။ အထူးသဖြင့်၊ အကူအညီ​လို​နေချိန်​တွင် သူတို့၏​ဝေယျာဝစ္စ​များ​ကို လုပ်ဆောင်ပေး​နိုင်​မည်​လော။ သမ္မာကျမ်းစာ​က အခြားသူများ​အား ချစ်​သည့်​မေတ္တာ “ကျယ်ဝန်း​စေ” ရန် ကြီးငယ်မဟူ​အားလုံး​ကို တိုက်တွန်း​ထား​ပါ​သည်။ (၂ ကောရိန္သု ၆:၁၁-၁၃) ထိုသို့​ပြုလုပ်ခြင်း​ဖြင့် ကောင်းမြတ်​သည့်​အခွင့်ထူး​များ​အတွက် လမ်းပွင့်​သွား​နိုင်​ပါ​သည်။

အထက်တွင်​ကိုးကား​ထား​သည့်​ကျမ်းပိုဒ်​မှာ မြီး​ကောင်​ပေါက်​အရွယ်၏ စိန်ခေါ်ချက်​များ​ကို ကိုင်တွယ်​ဖြေရှင်း​ရန် လူငယ်​တချို့​ကို အကူအညီ​ဖြစ်စေ​သည့် မူများ​စွာ​ထဲ​မှ တစ်ခု​သာ​ဖြစ်သည်။ နောက်​ဆောင်းပါး​ကို ဖတ်ရှု​သည့်​အခါ သင်သည် လူကြီး​ဖြစ်လာ​သည်​နှင့်​အမျှ ဘုရားသခင့်​နှုတ်မြွက်တော်​သည် သင့်​အသက်တာကို မည်သို့ အကြီးအကျယ်​သြဇာလွှမ်း​မိုး​နိုင်​ကြောင်း စဉ်းစား​သုံးသပ်ပါ​လေ။

[အောက်ခြေမှတ်ချက်]

 [စာမျက်နှာ ၆ ပါ လေးထောင့်ကွက်]

မိဘများ မစုံလင်​ကြ

“ကျွန်မ​ငယ်ငယ်​တုန်း​က မိဘတွေကို စုံလင်​တယ်လို့ ထင်​ခဲ့​တာ။ ကျွန်မ ဆယ်ကျော်သက်​အရွယ်ရောက်​လာတော့ အင်း၊ သူတို့ သိပ်​မတော်​ကြ​တော့​သလိုပဲ။ ဆိုလို​တာ​က မိဘတွေဟာ မစုံလင်​ကြ​မှန်း သဘောပေါက်​လာတော့ ကျွန်မ စိတ်​ကသိကအောက်​ဖြစ်​မိတယ်။ ပို​ဆိုး​တာ​က မိဘတွေရဲ့​အယူအဆ​တွေ၊ ဆုံးဖြတ်ချက်​တွေ​ဟာ မှန်​နိုင်​ပါ့​မလားလို့ ကျွန်မ သံသယ​ဝင်​လာတယ်။ အထိ​နာ​တဲ့​သင်ခန်းစာ​တွေ​ရ​လိုက်​တော့​မှ မိဘတွေကို အပြည့်အဝ ပြန်​ရိုသေ​လေးစား​လာတယ်။ သူတို့လည်း မစုံလင်​ကြ​ပေမဲ့၊ အများအားဖြင့် သူတို့​မှန်​ကြတယ်။ သူတို့​မမှန်​ရင်တောင်​မှ ကျွန်မ​ရဲ့​မိဘတွေ ဖြစ်နေ​ကြ​တုန်း​ပဲ။ ကျွန်မ​တို့ တဖြည်းဖြည်း​နဲ့ မိတ်ဆွေ​တွေ​လို ပို​ပြီး​ရင်းနှီး​လာကြတယ်၊ ကလေး​နဲ့​မိဘ​စပ်ကြား ဖြစ်လေ့​ရှိတဲ့​အရာ​မျိုး​လို့ ကျွန်မ​ထင်​တယ်။”—ထ​ရေ​ဇာ၊ ၁၇ နှစ်။

 [စာမျက်နှာ ၇ ပါ ရုပ်ပုံ]

လူငယ်များစွာသည် သက်ကြီးရွယ်အို​များနှင့် ရင်းနှီး​ကျွမ်းဝင်​ရန် ဖန်တီး​ကြ