ဆယ်ကျော်သက်မိခင်ဘဝ စိန်ခေါ်ချက်များကို ရင်ဆိုင်ခြင်း
ဆယ်ကျော်သက်မိခင်ဘဝ စိန်ခေါ်ချက်များကို ရင်ဆိုင်ခြင်း
ဆယ်ကျော်သက်ကိုယ်ဝန်ဆောင်မှုသည် လူကြီးဆန်ဆန် ဆုံးဖြတ်ချက်များချရမည့်ဝန်ကို ဖြစ်ပေါ်စေသည်။ “အသက် ၄၀ အရွယ်ရှိနေပြီလို့ ကျွန်မခံစားရတယ်။ ကျွန်မရဲ့ ကလေးဘဝတစ်ခုလုံးကို ဆုံးရှုံးလိုက်ရတယ်” ဟု ဆယ်ကျော်သက်မိခင်တစ်ဦးက ဆိုရှာသည်။ မိန်းကလေးတစ်ဦးသည် မိမိတွင် ကိုယ်ဝန်ရှိနေကြောင်း သိသည်နှင့် ကြောက်ရွံ့မှုနှင့် စိုးရိမ်ပူပန်မှုတို့ကြောင့် လုံးလုံးလျားလျား စိတ်ဖိစီးမှုခံရပေမည်။
သင်သည် ကိုယ်ဝန်ဆောင်ဆယ်ကျော်သက်တစ်ဦး ဖြစ်မည်ဆိုလျှင် ထိုသို့ခံစားရပေမည်။ သို့ရာတွင် အပျက်သဘောဆန်သည့် စိတ်လှုပ်ရှားမှုများကြောင့် အားအင်မဲ့သွားမည်ဆိုလျှင် အဘယ်အရာမျှ ဖြစ်မြောက်မည်မဟုတ်ပေ။ ကျမ်းစာက “လေကို မှတ်တတ်သောသူသည် မျိုးစေ့ကိုမကြဲ။ မိုးတိမ်တို့ကို ပမာဏပြုတတ်သောသူသည်လည်း စပါးကိုမရိတ်ရာ” ဟု ဆိုသည်။ (ဒေ. ၇:၈; ၁၁:၄) ရာသီဥတုကို စိုးရိမ်ပူပန်ပြီး အလုပ်သိမ်းလိုက်သည့် လယ်သမားတစ်ဦးသည် လိုအပ်သလို လုပ်ဆောင်ရန် ပျက်ကွက်ပါလိမ့်မည်။ မှိုင်တွေမနေပါနှင့်။ အနှေးနှင့်အမြန်ဆိုသလို သင့်ဘဝခရီးကို ရှေ့ဆက်ရမည်ဖြစ်ကာ တာဝန်တစ်လှေကြီး ထမ်းဆောင်ရပါမည်။—ဂလာတိ ၆:၅။
သင်ရွေးချယ်စရာများကား အဘယ်နည်း။ တချို့က ကိုယ်ဝန်ဖျက်ချဖို့ ပြောကြပေမည်။ သို့သော် ဘုရားသခင့်မျက်နှာသာရလိုသူတို့အတွက် ယင်းသည် ရွေးချယ်စရာမဟုတ်ချေ၊ ကိုယ်ဝန်ဖျက်ချခြင်းသည် ဘုရားသခင့်ပညတ်တော်ကို ဆန့်ကျင်ကြောင်း သမ္မာကျမ်းစာက အတိအလင်း ဆိုထားသောကြောင့်ဖြစ်၏။ (ထွက်မြောက်ရာ ၂၀:၁၃; ၂၁:၂၂၊ ၂၃; ဆာလံ ၁၃၉:၁၄-၁၆) လက်မထပ်ဘဲရသည့် သန္ဓေသားအပါအဝင် အဘယ်သန္ဓေသားမဆို ဘုရားသခင့်အမြင်တွင် အလွန်တန်ဖိုးရှိသည်။
ကလေးအဖေနှင့် လက်ထပ်ပြီး ကလေးကို အတူတူကျွေးမွေးပြုစုမည်ဆိုလျှင်ကော အသို့နည်း။ ယုတ်စွအဆုံး ထိုသို့ထိမ်းမြားခြင်းသည် သင့်အား အရှက်တကွဲဖြစ်ခြင်းမှ အနည်းငယ် သက်သာစေပေမည်။ သို့သော် ငယ်ရွယ်သည့် ဖခင်တစ်ဦးက မိမိရင်သွေးအား ပြုစုပျိုးထောင်ဖို့တာဝန်ရှိသည်ဟု ယူဆသည့်တိုင် ထိမ်းမြားလိုက်ခြင်းက ပညာရှိသည့်ရွေးချယ်မှု အမြဲမဟုတ်ချေ။ * လူရွယ်တစ်ဦးတွင် မျိုးပွားနိုင်စွမ်းရှိသည့်အတွက် ခင်ပွန်းကောင်းနှင့် ဖခင်ကောင်းတစ်ဦးဖြစ်ရန် လိုအပ်သည့် စိတ်လှုပ်ရှားမှုပိုင်းနှင့် စိတ်ပိုင်းဆိုင်ရာ အရည်အချင်းများ သူ၌ရှိသည်ဟူသည့်သဘော လုံးဝမသက်ရောက်ပေ။ ဇနီးသည်နှင့် ကလေးကို ငွေရေးကြေးရေး ထောက်ပံ့ပေးနိုင်သည်ဟူသည့် သဘောလည်းမသက်ရောက်ချေ။ ထို့အပြင် ယင်းလူရွယ်သည် သင်၏ဘာသာရေးယုံကြည်ချက်ကို လက်မခံပါက သူနှင့်လက်ထပ်လိုက်ခြင်းသည် “သခင်ဘုရား၌သာ” ထိမ်းမြားပါဟူသော ကျမ်းစာသတိပေးချက်ကို ဖီဆန်ရာရောက်သွားနိုင်သည်။ (၁ ကောရိန္သု ၇:၃၉) အချိန်မတန်ဘဲ အလောတကြီးလက်ထပ်လိုက်ခြင်းသည် တစ်ခဏသာတည်တတ်ပြီး နာကျင်မှုနှင့် စိတ်ဆင်းရဲခြင်းကိုသာ ထပ်ဆင့်စေနိုင်ကြောင်း အတွေ့အကြုံက ဖော်ပြ၏။
ကလေးကို မွေးစားဖို့ ပေးလိုက်မည်ဆိုလျှင်ကော အသို့နည်း။ ယင်းသည် ကိုယ်ဝန်ဖျက်ချခြင်းထက် သာ၍ကောင်းဟန်တူသော်လည်း အခွင့်မသာသည့်ကြားမှ မိမိကလေးကို ကျွေးမွေးပြုစုခွင့်ရှိသည်ဟူသော အချက်ကို သင်သုံးသပ်သင့်သည်။
စိန်ခေါ်ချက်များကို ရင်ဆိုင်ခြင်း
အိမ်ထောင်ဖက်မရှိဘဲ ကလေးကို ကျွေးမွေးပြုစုခြင်းသည် မလွယ်ကူကြောင်း ဝန်ခံရပေမည်။ သို့ရာတွင် သင့်အစွမ်းအစရှိသလောက် ကျမ်းစာမူများကို လိုက်လျှောက်ပြီး ခွန်အားနှင့် လမ်းညွှန်မှုအတွက် ဘုရားသခင်အား ယုံကြည်ကိုးစားခြင်းအားဖြင့် စိန်ခေါ်ချက်များစွာကို အောင်မြင်စွာ ရင်ဆိုင်နိုင်ပါသည်။ အောင်မြင်စွာကိုင်တွယ်စေရန် သင့်အား အကူအညီပေးနိုင်မည့် ခြေလှမ်းတချို့ကို ဤတွင်ဖော်ပြထားပါသည်။
• ဘုရားသခင်နှင့် သင့်ဆက်ဆံရေးကို ပြုပြင်ပါ။ လက်မထပ်မီ လိင်ဆက်ဆံခြင်းသည် ဘုရားသခင်အား ပြစ်မှားခြင်း—ကိုယ်တော်၏ မြင့်မားသော ကျင့်ဝတ်စံနှုန်းများကို ကျူးလွန်ဖောက်ဖျက်ခြင်း—ဖြစ်ကြောင်း သိမှတ်ပါ။ (ဂလာတိ ၅:၁၉-၂၁; ၁ သက်သာလောနိတ် ၄:၃၊ ၄) သို့ဖြစ်၍ အရေးပါသောခြေလှမ်းတစ်ရပ်မှာ နောင်တယူပြီး ဘုရားသခင်၏ခွင့်လွှတ်မှုကို တောင်းခံရန်ဖြစ်သည်။ (ဆာလံ ၃၂:၅; ၁ ယောဟန် ၂:၁၊ ၂) ကိုယ်တော်၏ကူညီမစမှုကို မရထိုက်ဟု သင်ခံစားရမည်မှာ မှန်ပါသည်။ သို့သော် ယေဟောဝါက ခွင့်လွှတ်မည်ဟု ကတိပြုထားပြီး မိမိတို့၏အမှားများကြောင့် နောင်တယူသူတို့ကို ကိုယ်တော်ကူညီပေးတော်မူသည်။ (ဟေရှာယ ၅၅:၆၊ ၇) ဟေရှာယ ၁:၁၈ တွင် ယေဟောဝါ ဤသို့မိန့်တော်မူ၏– “သင်တို့အပြစ်သည် နီသောအဆင်း [လေးလံသော၊ ကြီးလေးသော] ရှိသော်လည်း မိုးပွင့် (လုံးဝသန့်စင်ထားပြီး) ကဲ့သို့ ဖြူလိမ့်မည်။” ထို့အပြင် ခန့်အပ်ခံ အသင်းတော်အကြီးအကဲများ ကမ်းလှမ်းသည့် ဝိညာဉ်ရေးအကူအညီကို ရှာယူဖို့လည်း အမှားပြုသူများကို သမ္မာကျမ်းစာကအားပေးထားပါသည်။—ယာကုပ် ၅:၁၄၊ ၁၅။
• လက်မထပ်မီ လိင်ဆက်ဆံခြင်းကို ရပ်တန့်လိုက်ပါ။ ယင်းက ကလေးအဖေနှင့် သင့်ဆက်ဆံရေးကို ဖြတ်တောက်ပစ်ရမည့်သဘောပင်။ အိမ်ထောင်ပြင်ပ ဆက်ဆံရေးကို ဆက်ပြုခြင်းက ဘုရားသခင်မနှစ်သက်သည့် အမူအကျင့်ကို ဆက်ပြုလုပ်နေရန် သင့်အားဖိအားပေးရာရောက်မည်။ ဘုရားသခင့်ပညတ်တော်များသည် တင်းကျပ်သော်လည်း ကျွန်ုပ်တို့ကို ကာကွယ်ပေးကြောင်း ဘယ်တော့မျှ မမေ့ပါနှင့်။ ဤအခန်းဆက်ဆောင်းပါးများတွင် အစပိုင်းက ကိုးကားဖော်ပြခဲ့သည့် နီကိုးလ်က “ဘုရားသခင်မှန်တယ်ဆိုတာကို ကျွန်မသိလာခဲ့တယ်။ ကိုယ်တော်ဟာ ကျွန်မတို့ကို အကျိုးခံစားစေချင်ပါတယ်” ဟု ပြန်ပြောင်းပြောပြသည်။—ဟေရှာယ ၄၈:၁၇၊ ၁၈။
• သင်၏မိဘများကို ပြောပြပါ။ သင့်အား မိဘများ စိတ်ဆိုးကြမည်ကို ကြောက်လန့်သင့်ပါသည်။ သင်၌ ကိုယ်ဝန်ရှိနေကြောင်း သူတို့သိရှိသည့်အခါ ဝမ်းနည်းပြီး စိုးရိမ်ပူပန်ကြမည်မှာ မှန်ပါသည်။ မိဘများအနေနှင့် သင့်အပေါ် တာဝန်မကျေဟုပင် သူတို့ခံစားရပြီး သင်၏အကျင့်ပျက်ပြားမှုအတွက် သူတို့ကိုယ်သူတို့ အပြစ်တင်ကြပေမည်။ သို့ရာတွင်၊ သင်၏မိဘများသည် ဘုရားသခင်အား အမှန်တကယ် ကြောက်ရွံ့ ကြမည်ဆိုလျှင် ထိခိုက်နာကျင်မှုမုန်တိုင်းသည် အချိန်တန်သော် စဲသွားပါလိမ့်မည်။ သူတို့သည် သင်၏မိဘများဖြစ်ကြသဖြင့် သင်အမှားပြုမိလင့်ကစား သင့်အား သူတို့ချစ်မြတ်နိုးကြပါသည်။ သင်နောင်တရသည်ကို သူတို့တွေ့မြင်သောအခါ ယေရှု၏ဖြုန်းတီးသောသားပုံဥပမာမှ ဖခင်ကို အတုယူပြီး မေတ္တာပါပါ ခွင့်လွှတ်ကြမည်မှာ သံသယမရှိချေ။—လုကာ ၁၅:၁၁-၃၂။
• ကျေးဇူးသိတတ်ပါ။ မိဘများ၊ ဆွေမျိုးများနှင့် မိတ်ဆွေများသည် အကူအညီနှင့် ထောက်မမှုတို့အတွက် ကြီးမားသည့် ရင်းမြစ်တစ်ခုဖြစ်လေ့ရှိ၏။ ဥပမာ၊ သင်၏မိဘများသည် သင်အတွက် ဆေးကုသမှုခံယူရန် စီစဉ်ပေးပေမည်။ သင်ကလေးမွေးပြီးနောက် အခြေခံမွေးကင်းစကလေးငယ်အား ပြုစုစောင့်ရှောက်မှုကို တတ်မြောက်ရန် သင့်အားကူညီပေးမည်; သည့်အပြင် သူတို့သည် ကလေးဝိုင်းထိန်းပေးကြပေမည်။ သူ၏မိခင်အကြောင်းကို နီကိုးလ်က “ကျွန်မ ကလေးရသွားပေမဲ့ ကျွန်မကို အမေ အများကြီး ကူညီပေးခဲ့တယ်” ဟု ပြောပြသည်။ အလားတူ မိတ်ဆွေများကလည်း ကလေးအနှီးများနှင့် အသုံးတည့်သည့် အခြားပစ္စည်းပစ္စယများကို ပညာသတိနှင့် ထောက်ပံ့ပေးကြပေမည်။ (သု. ၁၇:၁၇) သင်သည် သနားကြင်နာမှုပြခံရသည့်အခါ သမ္မာကျမ်းစာ အကြံပေးချက်ကို လိုက်လျှောက်၍ ‘ကျေးဇူးသိတတ်ကြောင်း ဖော်ပြ’ ပါလေ။ (ကောလောသဲ ၃:၁၅) ကျေးဇူးတင်စကားများက သူတို့၏ မေတ္တာပါသည့် လုပ်ရပ်များ တန်ဖိုးထားမခံရဟူ၍ ခံစားစေမည်မဟုတ်ပေ။
• သားသမီးပြုစုပျိုးထောင်ခြင်း စွမ်းရည်များကို သင်ယူပါ။ သင်သည် သင်၏မိသားစုနှင့် မိတ်ဆွေများအပေါ် အမြဲမှီခိုလိုမည်မဟုတ်ပါ။ ထို့ကြောင့် ကလေးကြည့်ရှုစောင့်ရှောက်ခြင်းနှင့် အိမ်ထောင်စီမံခန့်ခွဲခြင်းတို့တွင် အတိုင်းအတာတစ်ခုအထိ လုပ်ရည်ကိုင်ရည်ရှိစေမည့် ကျွမ်းကျင်မှုများကို စတင်ပျိုးထောင်ပါ။ စောင့်ရှောက်ရန် အလွန်လိုအပ်နေသည့် လူသားတစ်ဦးကို ကြည့်ရှုရန် သင်ယူတတ်မြောက်ဖို့ကား မလွယ်ကူပေ။ အစာအာဟာရ၊ ကျန်းမာရေးနှင့် ကလေးပြုစုရေးဆိုင်ရာ အခြားသောကဏ္ဍများနှင့်ပတ်သက်၍ သင်ယူစရာ များစွာရှိပေသည်။ စိတ်ဝင်စားစရာမှာ အမျိုးသမီးငယ်များအား “အိမ်ကို ပြုစုသောသူများ” ဖြစ်ကြရန် တိုက်တွန်းပေးဖို့ သမ္မာကျမ်းစာက သက်ကြီးအမျိုးသမီးများကို အားပေးခြင်းဖြစ်သည်။ (တိတု ၂:၅) ယင်းနှင့်စပ်လျဉ်း၍ သင်၏မိခင်နှင့် ခရစ်ယာန်အသင်းတော်ရှိ အခြားအသက်ကြီးသူများသည် သင့်အား အဖိုးတန်သည့် လေ့ကျင့်မှုအချို့ ပေးနိုင်ကြပါသည်။
• ငွေကို ပညာရှိရှိ သုံးစွဲပါ။ သမ္မာကျမ်းစာက “ငွေသည်လည်း ကွယ်ကာတတ်၏” ဟုဆိုသည်။ (ဒေ. ၇:၁၂) ကလေးရလာခြင်းက ကုန်ကျစရိတ် အတော်အတန်ရှိလာပေမည်။
ဦးဆုံးအနေနှင့် သင်သည် တရားဥပဒေအရ သင်ခံစားထိုက်သည့် အစိုးရအထောက်အပံ့ကို ရလိုပေမည်။ သို့သော် တစ်ခါတစ်ရံတွင် မိန်းကလေးတစ်ဦးသည် မိမိ၏မိသားစုအပေါ် ငွေကြေးအရ မှီခိုနေရဆဲရှိမည်။ သင်လည်း ထိုသို့မှီခိုနေမည်ဆိုလျှင် သင့်ဘက်မှ အသုံးစရိတ်ကို အတတ်နိုင်ဆုံး လျှော့ချခြင်းက ပညာရှိရာရောက်ပြီး ထောက်ထားစာနာမှုပြရာရောက်ပေမည်။ သင့်ကလေးအတွက် အသုံးအဆောင်သစ်များရှိလိုမည်မှန်သော်လည်း အဟောင်းဆိုင်များနှင့် အိမ်ဆိုင်များတွင် ဈေးဝယ်ခြင်းအားဖြင့် ငွေချွေတာနိုင်ပေမည်။
• ပညာကိုကြိုးစား၍ဆည်းပူးပါ။ “ပညာရှိသောသူတို့သည် ကြားသိသောအရာကို သိမ်းထားတတ်၏” ဟု နယပုံပြင် ၁၀:၁၄ ကဆိုသည်။ ယင်းသည် ကျမ်းစာအသိပညာနှင့်စပ်လျဉ်း၍ အထူးသဖြင့် မှန်ကန်သော်လည်း လောကပညာရေးနှင့်ပတ်သက်၍လည်း မှန်ကန်ပါသည်။ အသက်မွေးဝမ်းကျောင်းပြုဖို့ လိုအပ်သည့် စွမ်းရည်များကို မွေးမြူကျင့်ယူဖို့လိုသည်။
ကလေးကို ကြည့်ရှုပြုစုနေရင်း ကျောင်းတက်ဖို့မလွယ်သည်ကို ဝန်ခံရပေမည်။ သို့ရာတွင် အခြေခံပညာမရှိထားလျှင် သင်နှင့် သင့်ကလေးအား ဆင်းရဲမွဲတေခြင်း၊ အစိုးရအေဂျင်စီကို အားကိုးရခြင်း၊ ဝင်ငွေနည်းခြင်း၊ အနေချို့တဲ့ခြင်း သို့မဟုတ် အာဟာရချို့တဲ့ခြင်းဘဝသို့ ရောက်စေတတ်သည်။ ထို့ကြောင့် တတ်နိုင်သ၍ ကျောင်းဆက်တက်ပါလေ။ နီကိုးလ်၏မိခင်သည် သူ့အား ကျောင်းပြီးအောင်တက်ရန် တိုက်တွန်းခဲ့ရာ ရလဒ်အနေနှင့် နီကိုးလ်သည် နောက်ပိုင်းတွင် ရှေ့နေ၏အကူတစ်ဦးအဖြစ် မိမိကိုယ်ကိုထောက်ပံ့ဖို့ လေ့ကျင့်နိုင်ခဲ့သည်။
အဘယ်ပညာရေးဆိုင်ရာ အခွင့်အရေးများ ရနိုင်သည်ကို အတော်အသင့် စူးစမ်းရှာဖွေကြည့်လျှင် မကောင်းပေလော။ အတန်းတက်ရခြင်းက ခက်ခဲလွန်းမည်ဆိုလျှင် အိမ်၌ လေ့လာ၍ရနိုင်၊ မရနိုင်ကို စုံစမ်းကြည့်နိုင်ပေသည်။ စာပေးစာယူသင်တန်းများ တက်ရောက်ခြင်းက သင့်အခြေအနေအတွက် လက်တွေ့ကျကြောင်း တွေ့ရပေမည်။
သင်အောင်မြင်နိုင်
လက်မထပ်ဘဲရလာသည့် ကလေးအား ကျွေးမွေးပြုစုခြင်းက မိန်းမငယ်လေးတစ်ဦးအတွက် စိန်ခေါ်ချက်ဖြစ်ပေသည်။ သို့သော် သင့်အတွက် အောင်မြင်နိုင်စရာအကြောင်းရှိပါသည်! စိတ်ရှည်ခြင်း၊ စိတ်ဓာတ်ကြံ့ခိုင်ခြင်းနှင့် ယေဟောဝါဘုရားသခင်၏ အကူအညီဖြင့် သင်သည် မေတ္တာပြည့်ဝ၍ လုပ်ရည်ကြံရည်ရှိသော မိဘကောင်းတစ်ဦးဖြစ်လာနိုင်ပါသည်။ ထို့အပြင် လက်မထပ်ထားသော မိခင်များ၏ ကလေးများသည်လည်း အလိုက်အထိုက်နေတတ်သောလူကြီးများအဖြစ် ကြီးပြင်းလာနိုင်ပေသည်။ သင်၏ကလေးသည် သင်ပုံသွင်းလေ့ကျင့်ပေးသည်ကို တုံ့ပြန်ပြီး ဘုရားသခင်အားချစ်သူဖြစ်လာသည်ကို တွေ့မြင်ရခြင်း၏ ရွှင်လန်းမှုကိုပင် သင်ခံစားရပေမည်။—ဧဖက် ၆:၄။
ယင်းကို နီကိုးလ်က ဤနည်းဖြင့် ဖော်ပြသည်– “ဘုရားသခင့်အကူအညီနဲ့ အတားအဆီးမှန်သမျှကို ဆန့်ကျင်လိုက်တဲ့အခါ ကျွန်မရဲ့သမီးလေးဟာ ကြင်နာတတ်၊ ယဉ်ကျေးပြီး တာဝန်ယူတတ်တဲ့ အမျိုးသမီးလေးဖြစ်လာအောင် ကူညီပေးလိုက်ရတဲ့ရွှင်လန်းမှုကို ကျွန်မရရှိခဲ့တယ်။ သူ့ကို ကြည့်နေရင်းနဲ့ အိပ်မပျော်တဲ့ညတွေကို ပြန်သတိရစေသလို ပျော်လည်းပျော်ရွှင်စေပါတယ်။”
သို့သော် လူကြီးများသည် ဆယ်ကျော်သက်မိခင်များနှင့် ၎င်းတို့၏သားသမီးကို မည်သို့ဆက်ဆံသင့်သနည်း။ အစကတည်းက ဆယ်ကျော်သက်ကိုယ်ဝန်ဆောင်ခြင်း၏ နာကျင်မှုကို လူငယ်လူရွယ်များ ရှောင်ကြဉ်ရန် ကူညီပေးနိုင်သည့် နည်းလမ်းရှိပါသလော။
[အောက်ခြေမှတ်ချက်]
^ အပိုဒ်၊ 5 လက်မထပ်ထားသော လူငယ်ဖခင်များရင်ဆိုင်ရသည့် တာဝန်များနှင့် စိန်ခေါ်ချက်များအကြောင်း ဆွေးနွေးချက်ကို ၂၀၀၀ ပြည့်နှစ် ဧပြီလ ၂၂ နှင့် မေလ ၂၂ ရက်နေ့ထုတ် နိုးလော့! [လိပ်] ရှိ “လူငယ်များအမေး . . . ” ကဏ္ဍတွင် တွေ့နိုင်ပါသည်။
[စာမျက်နှာ ၈ ပါ ရုပ်ပုံ]
ဆယ်ကျော်သက်မိခင်များသည် ၎င်းတို့၏ကလေးများကို ကျွေးမွေးပြုစုရာတွင် စိန်ခေါ်ချက်များစွာ ရင်ဆိုင်ရ
[စာမျက်နှာ ၉ ပါ ရုပ်ပုံ]
အချိန်မတန် အလောတကြီးလက်ထပ်ခြင်းသည် ဖြေရှင်းနည်းမဟုတ်
[စာမျက်နှာ ၁၀ ပါ ရုပ်ပုံ]
ဘုရားသခင်နှင့် သူတို့၏ဆက်ဆံရေးကို ပြုပြင်ရန် အမှားပြုသည့်လူငယ်များအား ခရစ်ယာန်အကြီးအကဲများ ကူညီပေးနိုင်
[စာမျက်နှာ ၁၁ ပါ ရုပ်ပုံ]
မိမိတို့၏အခြေခံပညာရေးကို ဆုံးခန်းတိုင်အောင် ဆည်းပူးခြင်းက ကြင်ဖော်မဲ့ မိခင်များအတွက် ပညာရှိရာရောက်