ဖခင်ကောင်းတစ်ဦး ဖြစ်နိုင်ပုံ
ဖခင်ကောင်းတစ်ဦး ဖြစ်နိုင်ပုံ
မိသားစုဘဝယိုယွင်းပျက်စီးမှုအကြောင်း အီကောနောမစ်မဂ္ဂဇင်းပါ ဆောင်းပါးတစ်ပုဒ်က “အိမ်ထောင်သားမွေး အလွယ်လေး၊ ဖခင်ကောင်းဖြစ်ရေး အလှမ်းဝေး” ဟူ၍ အာရုံစိုက်ချင်စဖွယ်စကားဖြင့် အစပျိုးထားသည်။
ဘဝအသက်တာတွင် ခဲရာခဲဆစ်လုပ်စရာများစွာရှိသည့်အနက် အခက်ခဲဆုံးနှင့် အရေးအပါဆုံးအလုပ်တစ်ခုမှာ ဖခင်ကောင်းတစ်ဦးဖြစ်ရေးတည်း။ ဖခင်ကောင်းတစ်ဦးဖြစ်ခြင်းသည် မိသားစုဘဝ သာယာချမ်းမြေ့ရေးကို အဆုံးအဖြတ်ပေးသည့်အတွက် ဖခင်ဖြစ်သူတိုင်း ဖခင်ကောင်းတစ်ဦးဖြစ်ရေးကို စိတ်ဝင်စားသင့်သည်။
ခက်ခဲရသည့်အကြောင်း
ရိုးရိုးရှင်းရှင်း ဖော်ပြရလျှင် ဖခင်ကောင်းတစ်ဦးဖြစ်ဖို့ မလွယ်ကူရသည့် အဓိကအကြောင်းရင်းမှာ မိဘနှစ်ပါးနှင့် သားသမီးတို့ပါ မစုံလင်မှုကို အမွေခံထားရခြင်းကြောင့်ဖြစ်သည်။ “လူတို့သည် ငယ်သောအရွယ်မှစ၍ စိတ်နှလုံးအကြံအစည်ဆိုးကြ၏” ဟု ကျမ်းစာကဆို၏။ (ကမ္ဘာဦး ၈:၂၁) သို့ဖြစ်၍ ကျမ်းရေးသူတစ်ဦးက “အမိဝမ်းထဲမှာ ပဋိသန္ဓေယူစဉ်ပင် အပြစ်စွဲပါ၏” ဟု အသိအမှတ်ပြု ရေးသားခဲ့သည်။ (ဆာလံ ၅၁:၅; ရောမ ၅:၁၂) မွေးရာပါအပြစ်တရားကြောင့် မကောင်းမှုပြုလိုခြင်းသည် ဖခင်ကောင်းတစ်ဦးဖြစ်ရေးအတွက် အတားအဆီးတစ်ခုသာဖြစ်သည်။
ဤလောက သို့မဟုတ် ဤအစီအစဉ်စနစ်သည်လည်း အလွန်ကြီးမားသော အတားအဆီးတစ်ခုဖြစ်၏။ အဘယ်ကြောင့်နည်း။ သမ္မာကျမ်းစာရှင်းပြသည့်အတိုင်း ‘တစ်လောကလုံးသည် စာတန်၏လက်၌ရှိ’ သောကြောင့်တည်း။ ထို့ပြင် ကျမ်းစာက စာတန်ကို “ဤလောကကိုအစိုးရသောဘုရား” ဟုလည်း ခေါ်ဆိုထားသည်။ ထို့ကြောင့် မိမိ၏နောက်လိုက်များသည် မိမိကဲ့သို့ပင် “ဤလောကနှင့်မဆက်ဆံ” သင့်ကြောင်း ယေရှုမိန့်ဆိုခဲ့ရခြင်းမှာ အံ့ဩစရာမဟုတ်ပေ!—၁ ယောဟန် ၅:၁၉၊ သမ္မာ; ဗျာ. ၁၂:၉; ၂ ကောရိန္သု ၄:၄; ယောဟန် ၁၇:၁၆။
ဖခင်ကောင်းတစ်ယောက်ဖြစ်ရေးအတွက် မိမိတို့၏မွေးရာပါမစုံလင်မှု၊ စာတန်နှင့် စာတန်ခြယ်လှယ်နေသည့် ဤလောကတို့ကို မပြတ်သတိပြုနေဖို့ အရေးကြီးသည်။ ဤအတားအဆီးများသည် စိတ်အထင်သက်သက်မဟုတ်ပေ။ ၎င်းတို့ အမှန်တကယ်ရှိကြ၏! ထိုအတားအဆီးများကို ကျော်လွှားအနိုင်ယူကာ ဖခင်ကောင်းတစ်ဦးဖြစ်နိုင်ဖို့ မည်သည့်နေရာတွင် ပညာသွားသင်ရမည်နည်း။
ဘုရားသခင်ထံမှလာသော စံနမူနာများ
အထက်ပါအတားအဆီးများကို ကျော်လွှားနိုင်ရန် ဖခင်တစ်ဦးသည် သမ္မာကျမ်းစာမှ သင်ယူနိုင်ပါသည်။ သမ္မာကျမ်းစာတွင် အလွန်ထူးခြားကောင်းမွန်သည့် စံနမူနာများ ပါရှိ၏။ ယေရှုက မိမိ၏နောက်လိုက်များအား “ကောင်းကင်ဘုံ၌ရှိတော်မူသော ကျွန်ုပ်တို့၏အဘ” ဟူ၍ ဆုတောင်းကြရန် သွန်သင်ပေးချိန်တွင် ကျွန်ုပ်တို့တုပရမည့် အကောင်းဆုံးပုံနမူနာကို ဖော်ပြခဲ့သည်။ ကျွန်ုပ်တို့၏ကောင်းကင်ခမည်းတော်ကို ဖော်ပြရာတွင် သမ္မာကျမ်းစာက “ဘုရားသခင်သည် ချစ်ခြင်းမေတ္တာဖြစ်တော်မူ၏” ဟု ရိုးရိုးလေးဆိုသည်။ လူသားဖခင်တစ်ဦးသည် ဤမေတ္တာဆိုင်ရာစံနမူနာကို မည်သို့တုံ့ပြန်သင့်သနည်း။ တမန်တော်ပေါလုက “ဘုရားသခင်ကျင့်တော်မူသည်နည်းတူ ကျင့်ကြလော့။ . . . မေတ္တာတရား၌ကျင်လည်ကြလော့” ဟု တိုက်တွန်းအားပေးခဲ့သည်။—မဿဲ ၆:၉၊ ၁၀; ၁ ယောဟန် ၄:၈; ဧဖက် ၅:၁၊ ၂။
သင်သည် ဖခင်တစ်ဦးဖြစ်မည်ဆိုလျှင် သားတော်ယေရှုနှင့် ဘုရားသခင်ဆက်ဆံခဲ့ချိန်က အဖြစ်အပျက်လေးတစ်ခုမှ အဘယ်အရာသင်ယူနိုင်သည်ကို သုံးသပ်ကြည့်ပါ။ ယေရှုနှစ်ခြင်းခံချိန်တွင် “ဤသူကား ငါနှစ်သက်မြတ်နိုးရာ၊ ငါ၏ချစ်သားပေတည်း” ဟု ကောင်းကင်မှ ဘုရားသခင့်အသံတော်ကို ကြားခဲ့ရကြောင်း မဿဲ ၃:၁၇ တွင် ဖော်ပြထားသည်။ ယင်းမှ ကျွန်ုပ်တို့အဘယ်အရာ သင်ယူနိုင်သနည်း။
ဦးဆုံး၊ ဖခင်တစ်ဦးက တစ်စုံတစ်ယောက်အား ‘ဒါ ကျွန်တော့်သားလေ သို့မဟုတ် ‘ဒါ ကျွန်တော့်သမီးလေ’ ဟု ဂုဏ်ယူဝင့်ကြွားစွာ ပြောလိုက်ချိန်တွင် ရင်သွေးဖြစ်သူ မည်သို့ခံစားလိုက်ရမည်ကို တွေးဆကြည့်လိုက်ပါ။ မိဘ၏ဂရုစိုက်မှု အထူးသဖြင့် အပြုသဘောဆောင်သည့် အသိအမှတ်ပြုမှုကို ခံနေရလျှင် သူတို့လေး၏ဘဝ လှပဖွံ့ဖြိုးနေတတ်သည်။ မိဘ၏နှစ်သက်လက်ခံမှု ရထိုက်သူဖြစ်အောင်လည်း ပို၍ကြိုးစားလိုစိတ်ရှိလာမည်။
ဒုတိယအနေနှင့် “နှစ်သက်မြတ်နိုးရာ” ဟုခေါ်လိုက်ခြင်းက ယေရှုအပေါ်ထားရှိသည့် ဘုရားသခင်၏ခံစားချက်ကို ဖော်ထုတ်ပြနေသည်။ ခမည်းတော်ထံမှ ချစ်ခင်မြတ်နိုးကြောင်း ထုတ်ဖော်ပြောဆိုချက်သည် ယေရှု၏စိတ်နှလုံးကို ပီတိဖြာဝေသွားစေပေမည်။ သင်သည် ထုတ်ဖော်ပြောဆိုဖို့ အချိန်ပေး၍တစ်မျိုး အလေးထားဂရုစိုက်၍တစ်ဖုံ သူတို့လေးများကို အလွန်ချစ်မြတ်နိုးကြောင်း ပြသမည်ဆိုလျှင် သူတို့လည်း စိတ်အားတက်လာကြမည်။
တတိယအချက်မှာ၊ ဘုရားသခင်သည် သားတော်အား “ငါ၏ချစ်သား” ဟူ၍ မိန့်တော်မူခဲ့၏။ (မာကု ၁:၁၁) ယင်းသည်လည်း ဖခင်တစ်ဦး အရေးတကြီးလုပ်ဆောင်ရမည့် အရာတစ်ခုဖြစ်၏၊ ဆိုလိုသည်မှာ သူတို့လေးများနှင့်နေရသည်မှာ ကြည်နူးစရာဖြစ်ကြောင်း သားသမီးတို့အား ပြောပြရန်ဖြစ်သည်။ ကလေးတစ်ဦးသည် ရံဖန်ရံခါ အမှားပြုတတ်သည်မှာ မှန်ပါသည်။ ကျွန်ုပ်တို့အားလုံး အမှားပြုတတ်ကြ၏။ သို့သော် ဖခင်တစ်ဦးအနေနှင့် သင်သည် သင့်သားသမီးများ၏ ချီးမွမ်းဖွယ်အပြုအမူ၊ အပြောအဆိုလေးများကို ရှာဖွေထုတ်ပြောတတ်သူဖြစ်ပါသလော။
ယေရှုသည် မိမိ၏ကောင်းကင်ခမည်းတော်ထံမှ ကောင်းကောင်းသင်ယူခဲ့သည်။ ခမည်းတော်သည် မြေကြီးသားသမီးများအပေါ် အဘယ်သို့ခံစားပေးကြောင်း ကိုယ်တော်ကမ္ဘာပေါ်ရှိစဉ် အပြောအားဖြင့်ဖြစ်စေ၊ စံနမူနာပြ၍ဖြစ်စေ ဖော်ပြတော်မူခဲ့သည်။ (ယောဟန် ၁၄:၉) ယေရှုသည် အလုပ်များကာ စိတ်ဖိစီးခံနေရချိန်၌ပင် ကလေးသူငယ်များနှင့်ထိုင်စကားပြောရန် အချိန်ပေးခဲ့သည်။ “ထိုသူငယ်တို့ကို ငါ့ထံသို့လာပါလေစေ။ မဆီးတားကြနှင့်” ဟု တပည့်နောက်လိုက်များအား ကိုယ်တော်မိန့်ဆိုခဲ့၏။ (မာကု ၁၀:၁၄) ယေဟောဝါဘုရားသခင်နှင့် ကိုယ်တော့်သားတော်တို့၏ စံနမူနာကို အသင်ဖခင်များ အပြည့်အဝလိုက်လျှောက်နိုင်ပါမည်လော။
စံနမူနာ အရေးပါ
သင့်သားသမီးများအတွက် စံနမူနာကောင်းပြသရန် အလွန်အရေးကြီး၏။ သင်ကိုယ်တိုင်က ဘုရားသခင်၏ဆုံးမပဲ့ပြင်မှုကို လက်အောက်မခံ၊ ကိုယ်တော်၏စည်းမျဉ်းအတိုင်းမသွားလျှင် သားသမီးများအား ‘ယေဟောဝါ၏ ပဲ့ပြင်ဆုံးမခြင်းနှင့် စိတ်သဘောတော်အတိုင်း သူတို့ကို ဆက်၍ပြုစုပျိုးထောင်ပေး’ ရန် သင်၏ကြိုးပမ်းမှုများမှာ အရာထင်မည်မဟုတ်ချေ။ (ဧဖက် ၆:၄၊ ကဘ) သို့ရာတွင် သားသမီးများကို ကြည့်ရှုစောင့်ရှောက်ပါဟူသော ဘုရားသခင့်မိန့်မှာချက်ကို လိုက်နာဆောင်ရွက်ရန် အဘယ်အတားအဆီးကိုမဆို ကိုယ်တော်၏အကူအညီဖြင့် သင်ကျော်လွှားနိုင်ပါသည်။
ယခင်ဆိုဗီယက်ပြည်ထောင်စုမှ ယေဟောဝါသက်သေတစ်ဦးဖြစ်သူ ဗစ်ခ်တာ ဂူရှ်မစ်တ်၏ ပုံနမူနာကို သုံးသပ်ကြည့်ပါ။ ၁၉၅၇ အောက်တိုဘာလတွင် မိမိ၏ယုံကြည်ခြင်းအကြောင်း ဟောပြောသည့်အတွက် ထောင်ဒဏ်ဆယ်နှစ်ချခံခဲ့ရ၏။ ဇနီးသည် ပါလီနာနှင့် သမီးငယ်နှစ်ဦးကို သူထားရစ်ခဲ့ရ၏။ အကျဉ်းထောင်ထဲတွင်ရှိစဉ် မိသားစုထံ သူစာရေးခွင့်ရသော်လည်း ဘုရားသခင်အကြောင်းဖြစ်စေ၊ ဘာသာရေးအကြောင်းဖြစ်စေ ရေးသားခွင့်မရှိချေ။ ဤအခက်အခဲများကြားမှ ဗစ်ခ်တာသည် ဖခင်ကောင်းတစ်ဦးဖြစ်ရန် ဆုံးဖြတ်ထားသည်၊ မိမိ၏ကလေးများအား ဘုရားသခင်အကြောင်း သွန်သင်ပေးဖို့လည်း အလွန်အရေးကြီးသည်ကို ဗစ်ခ်တာသိရှိထားသည်။ သို့နှင့် သူအဘယ်အရာပြုခဲ့သနည်း။
“ငယ်ရွယ်သော သဘာဝပညာရှင်နှင့် သဘာဝတရားဆိုတဲ့ ဆိုဗီယက်မဂ္ဂဇင်းမှာ အခြေခံအကြောင်းတွေ ကျွန်တော်ရှာတွေ့သွားတယ်။ ပို့စကတ်တွေပေါ်မှာ တိရစ္ဆာန်ပုံတွေ၊ လူပုံတွေဆွဲပြီး ဇာတ်လမ်းတစ်ပုဒ် ဒါမှမဟုတ် သဘာဝလောကနဲ့ပတ်သက်တဲ့ အတွေ့အကြုံတစ်ခုကို ထည့်သွင်းဖော်ပြလိုက်တယ်” ဟု ဗစ်ခ်တာက ပြန်ပြောပြသည်။
“အဲဒီပို့စကတ်တွေကို ကျွန်မတို့ရတာနဲ့ သမ္မာကျမ်းစာအကြောင်းအရာတွေနဲ့ ချက်ချင်းပဲ ဆက်စပ်လိုက်ကြတယ်။ ဥပမာ၊ ပို့စကတ်တွေမှာ ရေမြေတောတောင်သဘာဝရဲ့ အလှအပတွေ ပါလာတဲ့အခါ ကမ္ဘာကြီးကို ပရဒိသုဖြစ်အောင် လုပ်ပေးမယ်ဆိုတဲ့ ဘုရားသခင်ရဲ့ကတိတော်အကြောင်းပါတဲ့ ဟေရှာယ အခန်းကြီး ၆၅ ကို ကျွန်မဖတ်တယ်” ဟု ပါလီနာကဆိုသည်။
“အဲဒီအချိန်ရောက်ရင် ကျွန်မတို့နဲ့အတူ အမေဆုတောင်းတတ်တယ်၊ ပြီးတော့ ကျွန်မတို့ ငိုကြတယ်။ ကျွန်မတို့ကြီးပြင်းလာရေးမှာ အဲဒီကတ်လေးတွေက အဓိကကဏ္ဍမှာ ပါဝင်ခဲ့တယ်” ဟု ဗစ်ခ်တာ၏သမီးဖြစ်သူ ယူလီရာက ပြန်ပြောပြသည်။ အကျိုးရလဒ်အနေနှင့် “သမီးလေးတွေဟာ ကလေးဘဝကစပြီး ဘုရားသခင်ကို အရမ်းချစ်တတ်လာကြတယ်” ဟု ပါလီနာကဆို၏။ ယခု မိသားစု၏အခြေအနေကော အသို့နည်း။
“အခု ကျွန်တော့်သမီးတွေဟာ ခရစ်ယာန်အကြီးအကဲတွေနဲ့ အိမ်ထောင်ကျပြီး သူတို့အားလုံးမှာ ယေဟောဝါရဲ့အမှုတော်ကို တည်တည်ကြည်ကြည် ထမ်းဆောင်နေတဲ့ သားသမီးတွေရှိကြတဲ့ ဝိညာဉ်ရေးခိုင်မာတဲ့မိသားစုတွေ ရှိနေကြပြီ” ဟု ဗစ်ခ်တာက ရှင်းပြသည်။
စံနမူနာကောင်းပြရာတွင် ဖန်တီးတီထွင်တတ်ရုံသာမက အားထုတ်မှုလည်းလိုလေ့ရှိ၏။ မိမိတို့၏ဖခင်သည် အမှန်တကယ် အင်တိုက်အားတိုက်ကြိုးစားနေကြောင်း သားသမီးများ တွေ့မြင်ရသည့်အခါ သူတို့၏စိတ်နှလုံးကို သွား၍ရိုက်ခတ်ဖို့အကြောင်းရှိသည်။ အချိန်ပြည့်ဓမ္မအမှုလုပ်ငန်းတွင် နှစ်ပေါင်းများစွာ ပါဝင်ခဲ့သည့် သားဖြစ်သူက “တစ်ခါတလေ အဖေဟာ အလုပ်ကနေ အရမ်းပင်ပန်းလာတဲ့အတွက် တက်တက်ကြွကြွ မရှိနိုင်တော့ဘူး၊ ဒါပေမဲ့ သူဘယ်လောက်ပဲပင်ပန်းနေပါစေ ကျွန်တော်တို့နဲ့ ကျမ်းစာလေ့လာတယ်။ အဲဒါကနေ မိသားစုလေ့လာမှုဟာ အရမ်းအရေးကြီးတယ်ဆိုတာကို ကျွန်တော်တို့ သိမြင်ခဲ့ကြတယ်။”
ရှင်းနေသည်မှာ ဖခင်ကောင်းတစ်ဦးဖြစ်ရေးသည် အပြောနှင့်ကော အလုပ်ဖြင့်ပါ စံနမူနာကောင်းပြဖို့အရေးကြီးသည်။ “သူငယ်သွားရာလမ်းဝ၌ ဆုံးမသွန်သင်လော့။ သို့ပြုလျှင် သူသည် အိုသောအခါ ထိုလမ်းမှမလွှဲ လိုက်သွားလိမ့်မည်” ဆိုသည့် နယပုံပြင်ကျမ်း မှန်ကန်ကြောင်း သင်သိမြင်လိုလျှင် ထိုသို့ပြုလုပ်ရန်လိုပေသည်။—သု. ၂၂:၆။
သင့်အပြောကသာ အရေးပါသည်မဟုတ်၊ အထူးသဖြင့် သင်လုပ်ဆောင်သည့်အရာ၊ သင်ပြသည့်ပုံနမူနာပါ အရေးပါကြောင်း သတိရပါ။ ကလေးတို့၏ပညာရေးနှင့်စပ်လျဉ်း၍ ကနေဒါလူမျိုးပညာရှင်တစ်ဦးက ဤသို့ရေးသားခဲ့သည်– “ကျွန်ုပ်တို့၏သားသမီးများအား [ကျွန်ုပ်တို့ဖြစ်စေချင်သည့်ပုံစံအတိုင်း] ပြုမူစေသည့် အကောင်းဆုံးနည်းလမ်းမှာ မိမိလိုချင်သောအပြုအမူကို မိမိကိုယ်တိုင် ပြသခြင်းဖြစ်ပေသည်။” သင်သည် သားသမီးများအား ဝိညာဉ်ရေးရာများကို တန်ဖိုးထားစေလိုလျှင် အသင်ကိုယ်တိုင် တန်ဖိုးထားဖို့အရေးကြီး၏။
သူတို့လေးများအတွက် အချိန်ရှာယူပါ!
သင်၏သားသမီးများသည် သင်၏စံနမူနာကောင်းကို တွေ့မြင်ရဖို့ လိုသည်။ ဆိုလိုသည်မှာ သူတို့လေးများကို ခဏတစ်ဖြုတ်သာမဟုတ်ဘဲ အချိန်များစွာပေးဖို့လိုသည်။ သူတို့လေးများနှင့်အတူနေနိုင်ရန် ‘အချိန်ကိုဝယ်ယူပါ၊’ တစ်နည်းဆိုရလျှင် အရေးမကြီးလှသည့်အရာများကို စွန့်လွှတ်ပါဟူသော ကျမ်းစာအကြံပေးချက်ကို အမြော်အမြင်ရှိရှိလိုက်နာပါ။ (ဧဖက် ၅:၁၅၊ ၁၆၊ ကဘ) အမှန်တကယ်တွင် အဘယ်အရာသည် မိမိ၏သားသမီးများထက် ပိုအရေးကြီးအံ့နည်း။ တီဗွီကြီးကြီးတစ်လုံးလော၊ ကြေးစားဂေါက်သီးရိုက်တံတစ်စုံလော၊ အိမ်လှလှလေးတစ်လုံးလော၊ အလုပ်အကိုင်လော။
‘အငယ်တည်းက မဆုံးမသော်၊ မိဘတစ်လည် ရန်သူမည်၏’ ဟူသော အကျွမ်းဝင်သည့် ဆိုရိုးစကားတစ်ခွန်းရှိ၏။ ဖခင်များသည် သားသမီးများ အကျင့်ယိုယွင်းမှု သို့မဟုတ် ဝိညာဉ်ရေးစိတ်ထားကင်းမဲ့သည့် ဘဝပုံစံဖြင့် လေလွင့်သွားသည့်အချိန်ကျမှ နောင်တကြီးစွာရလေ့ရှိသည်။ အများအားဖြင့် ဖခင်ကို အမှန်တကယ်လိုအပ်ချိန်တွင် သူတို့လေးများဘေးတွင် မရှိခဲ့မိသည့်အတွက် သူတို့ ယူကျုံးမရဖြစ်ရလေသည်။
သင့်သားသမီးများ ငယ်နုချိန်သည် မည်သည့်အကျိုးဆက်များအား သင်ရွေးယူမည်ကို စဉ်းစားရမည့်အချိန်ဖြစ်ကြောင်း သတိရပါလေ။ သမ္မာကျမ်းစာက သင့်သားသမီးများကို ယေဟောဝါ “ဆုချ၍ ပေးသနားတော်မူသော အမွေဥစ္စာ” ဟုဆိုထားရာ ဘုရားသခင်ကိုယ်တော်တိုင် သင့်ထံ အပ်နှင်းခဲ့ရာဖြစ်ပေသည်။ (ဆာလံ ၁၂၇:၃) ထို့ကြောင့် သူတို့လေးများအတွက် ဘုရားသခင်ထံ သင် စာရင်းရှင်းရမည်ကို ဘယ်တော့မျှ မမေ့ပါနှင့်!
အကူအညီက အရန်သင့်
ဖခင်ကောင်းတစ်ဦးသည် သားသမီးများအတွက် အကျိုးရှိစေမည့် အကူအညီကို လက်ခံယူလိုစိတ်ပြင်းပြသည်။ ကောင်းကင်တမန်တစ်ပါးက မာနော်၏ဇနီးအား ကလေးရတော့မည့်အကြောင်း ပြောပြပြီးနောက် မာနော်က “အကျွန်ုပ်တို့သည် ဖွားမြင်လတ္တံ့သောသူငယ်၌ အဘယ်သို့ပြုရမည်ကို ဘုရားသခင်၏တမန်တော်သည် တစ်ဖန်လာ၍ သွန်သင်စေတော်မူပါ” ဟု ဘုရားသခင်ထံ တောင်းလျှောက်ခဲ့သည်။ (တရားသူကြီး ၁၃:၈၊ ၉) မျက်မှောက်ခေတ် မိဘများကဲ့သို့ပင် မာနော်လည်း အဘယ်အကူအညီမျိုး လိုအပ်ခဲ့သနည်း။ သုံးသပ်ကြည့်ကြစို့။
တောင်အာဖရိကနိုင်ငံ၊ ကိပ်တောင်းတက္ကသိုလ်မှ ဆရာတစ်ဦးဖြစ်သူ ဘရန့်တ် ဘာဂိုနီက “ကလေးတစ်ဦးကို ပေးနိုင်သည့် အကြီးမားဆုံးလက်ဆောင်တစ်ခုမှာ မြင့်မားသည့်စံနှုန်းများ သွန်သင်ပေးခြင်းဖြစ်သည်” ဟု ထုတ်ဖော်ပြောဆိုခဲ့၏။ ယင်းသို့သော အစီအစဉ်တစ်ခုကို သားသမီးများ သွန်သင်ခံရဖို့လိုသည်ဟူသောအချက်ကို ဂျပန်နိုင်ငံထုတ် ဒေးလီး ယိုမီယူရီသတင်းစာပါ သတင်းတစ်ပုဒ်တွင် တွေ့ရှိနိုင်သည်၊ ဤသတင်းစာက “ဂျပန်ကလေးသူငယ် ၇၁ ရာခိုင်နှုန်းသည် လိမ်မပြောရဟူသော ဖခင်၏ပြောဆိုဆုံးမမှုကို တစ်ခါမျှ မခံခဲ့ရကြောင်း ဆန်းစစ်လေ့လာချက် [တစ်ရပ်] က ဖော်ပြသည်” ဟု မှတ်ချက်ချထားသည်။ အမှန်ပင် ဝမ်းနည်းစရာမကောင်းပေလော။
အားထားလောက်သော စံနှုန်းအစီအစဉ်ကို မည်သူပေးစွမ်းနိုင်သနည်း။ မာနော်အား လမ်းညွှန်ပေးခဲ့သည့် ဘုရားသခင်ကိုယ်တိုင်ပင်တည်း! အကူအညီပေးရန် မိမိချစ်မြတ်နိုးရသည့်သားတော်ယေရှုကို မိမိအား ခေါ်ဆိုလေ့ရှိသည့် အသုံးအနှုန်းဖြစ်သော သွန်သင်သူအဖြစ် ဘုရားသခင်စေလွှတ်တော်မူခဲ့၏။ ယခုအခါ ငယ်ရွယ်သူများအား သွန်သင်ပေးရာတွင် သင်အသုံးပြုရန် ယေရှု၏သွန်သင်ချက်များစွာပါရှိသည့် ကြီးမြတ်သောဆရာထံမှ သင်ယူလော့စာအုပ်ကို ဘာသာစကားများစွာဖြင့် ရရှိနိုင်ပါသည်။
ကြီးမြတ်သောဆရာထံမှ သင်ယူလော့စာအုပ်သည် သမ္မာကျမ်းစာအပေါ်အခြေပြုသည့် စံနှုန်းများအကြောင်း ရှင်းပြပေးသည်သာမက မေးခွန်းများကို ရည်ညွှန်းသည့် ရုပ်ပုံ ၁၆၀ ကျော်နှင့်အတူ စာသားများကို သရုပ်ဖော်ပေးထားပါသည်။ ဥပမာ၊ “ဘာကြောင့် လိမ်မပြောသင့်တဲ့အကြောင်း” ဟူ၍ ခေါင်းစဉ်တပ်ထားသည့် အခန်း ၂၂၊ စာမျက်နှာ ၁၁၇ ၌တွေ့ရသည့် ရုပ်ပုံပါရှိသော စာမျက်နှာပေါ်တွင် ဤစာသားပါရှိသည်– ယောက်ျားလေးတစ်ယောက်က သူ့ဖေဖေကို “အိမ်ထဲမှာ ဘောလုံး မကစားပါဘူး” ဆိုပြီးပြောတယ် ဆိုကြပါစို့။ ဒါပေမဲ့ တကယ်တမ်းကျတော့ ကစားခဲ့တယ်ဆိုရင်ကော။ မကစားပါဘူးလို့ ပြောတာဟာ မှားတယ် မဟုတ်လား။
အဆိုပါစာအုပ်တွင် အခန်း ၄၈ ခန်းပါရှိသည့်အနက် အနည်းငယ် ဖော်ပြရမည်ဆိုလျှင် “နာခံမှုက အကာအကွယ်ပေးတယ်၊” “စုံစမ်းသွေးဆောင်မှုတွေကို ခုခံရမယ်၊” “ကြင်နာတတ်ဖို့ သင်ခန်းစာ၊” “ဘယ်တော့မှ သူခိုး မဖြစ်စေပါနဲ့၊” “ပါတီပွဲအားလုံးကို ဘုရားသခင် ကြိုက်သလား၊” “ဘုရားသခင် ပျော်ရွှင်အောင် ဘယ်လိုလုပ်နိုင်တဲ့အကြောင်း” နှင့် “အလုပ်လုပ်ဖို့ လိုအပ်ရတဲ့အကြောင်း” ဟူ၍ ခေါင်းစဉ်တပ်ထားသည့် အခန်းများကလည်း ထိရောက်သည့် သင်ခန်းစာများ သွန်သင်ပေးပါသည်။
အဆိုပါစာအုပ်၏ နိဒါန်းက ဤသို့ကောက်ချက်ချသည်– “ကလေးများသည် ခပ်သိမ်းသောဉာဏ်ပညာ၏ ရင်းမြစ်ဖြစ်သည့် ကောင်းကင်ခမည်းတော်၊ ယေဟောဝါ ဘုရားသခင်ထံသို့ ဦးတည်ညွှန်ပြပေးခြင်းကို အထူးသဖြင့် လိုအပ်ကြသည်။ ကြီးမြတ်သောဆရာ ယေရှုသည် ဤသို့ပင် အမြဲတစေ ပြုလုပ်တော်မူ၏။ ဤစာအုပ်သည် သင်နှင့် သင့်မိသားစုဘဝကို ယေဟောဝါ၏စိတ်တော်နှင့်တွေ့သော ပုံစံဖြစ်လာအောင် ပုံသွင်းပေးခြင်းဖြင့် ထာဝရ ကောင်းချီးမင်္ဂလာ ရရှိစေမည်ဟု ကျွန်ုပ်တို့ ရိုးသားစွာဖြင့် မျှော်လင့်ပါသည်။ *
ဖခင်ကောင်းတစ်ဦးဖြစ်ရေးတွင် သင့်သားသမီးများအတွက် စံနမူနာကောင်းပြခြင်း၊ သူတို့နှင့်အတူ အချိန်များစွာအသုံးပြုခြင်းနှင့် သမ္မာကျမ်းစာ၌ ဖော်ပြထားသည့်အတိုင်း ဘုရားသခင့်စံနှုန်းများနှင့်အညီ အသက်ရှင်နေထိုင်ရန် သူတို့လေးများကို ကူညီပေးခြင်းတို့ ပါဝင်သည်မှာ ရှင်းနေပါသည်။
[အောက်ခြေမှတ်ချက်]
^ အပိုဒ်၊ 35 ကျွန်ုပ်၏ကျမ်းစာပုံပြင်စာအုပ်၊ လူငယ်များအမေး—တာသွားသည့်အဖြေနှင့် မိသားစုပျော်ရွှင်မှု၏ လျှို့ဝှက်ချက်စာအုပ်တို့သည် မိသားစုများကို ကူညီပေးရန် ယေဟောဝါသက်သေများထုတ်ဝေသည့် အခြားသောစာအုပ်များဖြစ်ကြပါသည်။
[စာမျက်နှာ ၁၈ ပါ ရုပ်ပုံ]
ထောင်ကျနေသော်လည်း ဗစ်ခ်တာ ဂူရှ်မစ်တ်သည် ဖခင်ကောင်းတစ်ဦး ဖြစ်နိုင်ခဲ့
[စာမျက်နှာ ၁၉ ပါ ရုပ်ပုံ]
မိမိ၏ယုံကြည်ခြင်းကြောင့် အကျဉ်းချခံနေရစဉ် ဗစ်ခ်တာသည် ဤရုပ်ပုံများကို ရေးဆွဲကာ မိမိ၏ကလေးများကို သွန်သင်ပေးခဲ့
[စာမျက်နှာ ၁၉ ပါ ရုပ်ပုံ]
၁၉၆၅ ခုနှစ်က ဗစ်ခ်တာ၏သမီးများ
[စာမျက်နှာ ၂၀ ပါ ရုပ်ပုံ]
ဖခင်များသည် မိမိတို့၏သားသမီးများအား သွန်သင်ပေးရာတွင် တက်တက်ကြွကြွ ပါဝင်သင့်