အမည်ခံ နတ်ဘုရားများ
အမည်ခံ နတ်ဘုရားများ
တမန်တော်ပေါလုသည် လုတ္တရမြို့တွင် ခြေမစွမ်းသူတစ်ဦးကို ကုသပေးသည့်အခါ လူတို့က “နတ်ဘုရားတို့သည် လူအယောင်ကိုဆောင်၍ ငါတို့ရှိရာသို့ ဆင်းသက်ပါသည်တကား!” ဟုဟစ်အော်ကြ၏။ သူတို့က ပေါလုကို ဟေရမေ၊ အဖော်ဖြစ်သူ ဗာနဗကို ဇုသဟုခေါ်ဆိုကြ၏။ (တမန်တော် ၁၄:၈-၁၄) ဧဖက်မြို့တွင် ဒေမေတရိအမည်ရှိသော ပန်းထိမ်သမားတစ်ဦးက ပေါလုသာ ဆက်ဟောပြောနေမည်ဆိုလျှင် ‘ကြီးမြတ်သောနတ်ဘုရားမ အာတေမိ၏ဗိမာန်တော် . . . ဘုန်းအသရေတော်မှ ရှုတ်ချခြင်းသို့ရောက်မည်’ ဟုသတိပေးခဲ့သည်။—တမန်တော် ၁၉:၂၄-၂၈၊ သမ္မာ။
ပထမရာစုရှိလူများသည် ယနေ့ခေတ်လူများကဲ့သို့ပင် “ကောင်းကင်နှင့်မြေကြီးပေါ်၌ အမည်ခံ ‘နတ်ဘုရားများ’” ကိုကိုးကွယ်ကြသည်။ ထို့ကြောင့် “‘ဘုရားသခင်များ’ နှင့် ‘အရှင်သခင်’ အမြောက်အမြား” ရှိကြောင်း ပေါလုဆိုခဲ့ခြင်းဖြစ်၏။ သို့သော် သူဤသို့ရှင်းပြခဲ့သည်– “ငါတို့အဖို့မှာ အဖခမည်းတော်ထာဝရဘုရားသခင် တစ်ပါးတည်းသာလျှင် ရှိတော်မူ၏။” ၎င်းအပြင် “ငါတို့မှာ အရှင်သခင်တစ်ပါးတည်းသာလျှင်ရှိ၏၊ ထိုအရှင်ကား သခင်ယေရှုခရစ်ပေတည်း။”—၁ ကောရိန္သု ၈:၅၊ ၆၊ သတင်းကောင်း။
ယေရှုကို ဘုရားသခင်ဟုလည်း ခေါ်သည်မဟုတ်လော
ယေရှုက မိမိကိုယ်ကို ဘုရားသခင်ဖြစ်သည်ဟု တစ်ခါမျှမဆိုခဲ့သော်လည်း ဟေရှာယပရောဖက်ပြုချက်တွင် ယေဟောဝါ၏ ခန့်အပ်ခံရှင်ဘုရင်အနေနှင့် ကိုယ်တော်အား “တန်ခိုးကြီးသောဘုရားသခင်၊” “ငြိမ်သက်ခြင်းအရှင်” ဟုခေါ်ဆိုထားသည်။ “အာဏာတော်တိုးတက်ခြင်းနှင့် ငြိမ်သက်တော်မူခြင်းသည် . . . အမြဲရှိလိမ့်မည်” ဟုဟေရှာယ ပရောဖက်ပြုချက်က ဆက်ဖော်ပြ၏။ (ဟေရှာယ ၉:၆၊ ၇) ထို့ကြောင့် ကြီးမြတ်သောရှင်ဘုရင် ယေဟောဝါ၏သားတော်ဖြစ်သော “အရှင်” အနေနှင့် ယေရှုသည် ‘အတိုင်းအဆမဲ့တန်ခိုးရှင်ဘုရားသခင်၏’ ကောင်းကင်အစိုးရဘုရင်အဖြစ် အသုံးတော်ခံပါလိမ့်မည်။—ထွက်မြောက်ရာ ၆:၃။
သို့သော် ‘ယေရှုကို “တန်ခိုးကြီးသောဘုရားသခင်” လို့ခေါ်တာ ဘာသဘောလဲ၊ ယေရှုကိုယ်တော်တိုင် ဘုရားသခင်ဖြစ်တယ်လို့ တမန်တော်ယောဟန် ပြောနေတာမဟုတ်လား’ ဟုတစ်စုံတစ်ဦးက မေးပေမည်။ ယောဟန် ၁:၁ တွင် ဤသို့ဆိုထားသည်– ‘အစအဦး၌ နှုတ်မြွက်စကားတော်ရှိ၏။ နှုတ်မြွက်စကားတော်သည် ဘုရားသခင်နှင့်အတူရှိ၏။ နှုတ်မြွက်စကားတော်သည်လည်း ဘုရားသခင်ဖြစ်တော်မူ၏။’ ယင်းက ကမ္ဘာပေါ်တွင် သူငယ်ယေရှုအဖြစ် မွေးဖွားခဲ့သော ‘နှုတ်မြွက်စကားတော်’ သည် အတိုင်းအဆမဲ့တန်ခိုးရှင် ဘုရားသခင်ဖြစ်သည်ဟုဆိုလိုကြောင်း အချို့က စောဒကတက်ကြ၏။ ယင်းသည် မှန်ပါသလော။
ဤကျမ်းချက်က ယေရှုကိုယ်တော်တိုင် အတိုင်းအဆမဲ့တန်ခိုးရှင်ဘုရားသခင်ဖြစ်သည်ဟု အဓိပ္ပာယ်ရပါက “နှုတ်ကပါဌ်တော်သည် ဘုရားသခင်နှင့်အတူရှိ၏” ဟူသော အစပိုင်းဖော်ပြချက်နှင့် ဆန့်ကျင်နေပေမည်။ တစ်စုံတစ်ဦးသည် အခြားပုဂ္ဂိုလ်တစ်ဦး “နှင့်အတူ” ရှိနေပါက ထိုသူတို့သည် တစ်ဦးတည်းမဖြစ်နိုင်ပေ။ ထို့ကြောင့် ဘာသာပြန်ကျမ်းများစွာက နှုတ်ကပါဌ်တော်သည် အတိုင်းအဆမဲ့တန်ခိုးရှင်ဘုရားသခင် မဟုတ်ကြောင်း ရှင်းလင်းနားလည်စေရန် ခွဲခြားဖော်ပြကြ၏။ ဥပမာ၊ ဘာသာပြန်ကျမ်းတစ်ခုတွင် အောက်ပါအတိုင်းဆိုထားသည်– “နှုတ်ကပါဌ်တော်သည် ဘုရားသခင်ဖြစ်တော်မူ၏၊” “နှုတ်မြွက်စကားတော်သည် ဘုရားတစ်ပါးဖြစ်တော်မူ၏၊” “နှုတ်မြွက်စကားတော်သည် ဘုရားပမာဖြစ်တော်မူ၏။” *
ဂရိကျမ်းစာများတွင် ယောဟန် ၁:၁ ကို အလားတူပင် “ဘုရားတစ်ပါး” ဟုဖော်ပြထားသည်။ ဥပမာ၊ ဟေရုဒ်အန္တိပမင်း၏အသံကို “ဤအသံသည် ဘုရားသခင်တစ်ပါး၏အသံဖြစ်၏” ဟုလူအုပ်ကြွေးကြော်ခဲ့သည်။ ပေါလု မြွေပွေးကိုက်ခံရပြီးနောက် လူတို့က “ဤသူကား ဘုရားတစ်ပါးဖြစ်သည်” ဟုဆိုကြ၏။ (တမန်တော် ၁၂:၂၂၊ ကဘ; ၂၈:၃-၆၊ ကဘ) ဂရိသဒ္ဒါနှင့် သမ္မာကျမ်းစာသွန်ချက်နှစ်မျိုးစလုံးက နှုတ်ကပါဌ်တော်သည် ဘုရားသခင်မဟုတ်ဘဲ ‘ဘုရားသခင်တစ်ပါး’ ဖြစ်ကြောင်း တညီတညွတ်တည်းဆိုထား၏။—ယောဟန် ၁:၁။
ယောဟန်က မိမိ၏ခရစ်ဝင်ကျမ်း ပထမအခန်းကြီးတွင် “နှုတ်ကပါဌ်တော်” သည် အဘယ်အရာဖြစ်ကြောင်း ဖော်ပြထားပုံကို သုံးသပ်ကြည့်ပါ– “နှုတ်ကပါဌ်တော်သည်လည်း လူ့ဇာတိအဖြစ်ကိုခံယူ၍ . . . ငါတို့တွင်တည်နေတော်မူ၍ [ဘုရားသခင်မဟုတ်] ခမည်းတော်၌ တစ်ပါးတည်းသောသားတော်၏ဘုန်းကဲ့သို့ ကိုယ်တော်၏ဘုန်းတော်ကို ငါတို့သည် ရှုမြင်ရကြပြီ။” ထို့ကြောင့် လူ့ဇာတိအဖြစ်ကိုခံယူသော “နှုတ်ကပါဌ်တော်” သည် လူသားယေရှုအဖြစ် မြေကြီးပေါ်အသက်ရှင်ခဲ့ကာ လူတို့မြင်တွေ့ခဲ့ကြသည်။ သို့သော် “ဘုရားသခင်ကို အဘယ်သူမျှမမြင်စဖူး” ဟုယောဟန်ဖော်ပြထားရာ ယေရှုသည် အတိုင်းအဆမဲ့တန်ခိုးရှင်ဘုရားသခင် မဖြစ်နိုင်ပေ။—ယောဟန် ၁:၁၄၊ ၁၈။
‘ရှင်ပြန်ထမြောက်လာတဲ့ ယေရှုကို သောမတွေ့တဲ့အခါ “အကျွန်ုပ်၏အရှင်၊ အကျွန်ုပ်၏ဘုရားသခင်” လို့ခေါ်ခဲ့တာပဲ’ ဟုတစ်စုံတစ်ဦးက မေးပေမည်။ ဖော်ပြခဲ့ပြီးသည့်အတိုင်း ယေရှုသည် ဘုရားသခင်အဖြစ်တော်ရှိသည့်သဘောမျိုးဖြင့် ဘုရားသခင်တစ်ပါးဖြစ်သော်လည်း ခမည်းတော်မဟုတ်ပါ။ ယေရှုက မာဂဒလမာရိကို “ငါ၏ခမည်းတော်တည်းဟူသော သင်တို့၏ခမည်းတော်၊ ငါ၏ဘုရားသခင်တည်းဟူသော သင်တို့၏ဘုရားသခင်ထံတော်သို့ ငါတက်ရမည်” မိန့်ဆိုခဲ့၏။ ယောဟန်သည် မိမိ၏ခရစ်ဝင်ကျမ်းကို အဘယ်ကြောင့်ရေးခဲ့ကြောင်းကိုလည်း သတိရပါလေ။ သောမအကြောင်းမှတ်တမ်းတင်ပြီး နောက်အခန်းငယ်သုံးခုမြောက်တွင် “ယေရှုသည် ခရစ်တော်တည်းဟူသော ဘုရားသခင်၏သားတော်ဖြစ်တော်မူသည်ကို သင်တို့သည် ယုံ” စေရန် ရေးခဲ့ခြင်းဖြစ်သည်ဟုဆိုကာ ကိုယ်တော်သည် ဘုရားသခင်မဟုတ်ကြောင်း ရှင်းပြခဲ့သည်။—ယောဟန် ၂၀:၁၇၊ ၂၈၊ ၃၁။
‘ဤလာကကိုအစိုးရသောဘုရားသခင်’ ကား မည်သူနည်း
နတ်ဘုရားများစွာရှိနေသည်မှာ ရှင်းနေပါသည်။ ကျွန်ုပ်တို့တွေ့ခဲ့ကြသည့်အတိုင်း သမ္မာကျမ်းစာတွင် အချို့နတ်ဘုရားများကို အမည်နာမဖြင့် ဖော်ပြထားသည်။ သို့တိုင် ရှေးအချိန်က ယေဟောဝါ၏တန်ခိုးတော်ကို မြင်တွေ့ခဲ့သူများက “ယေဟောဝါသည် စစ်မှန်သော ဘုရားသခင်ဖြစ်တော်မူ၏။ ယေဟောဝါသည် စစ်မှန်သော ဘုရားသခင်ဖြစ်တော်မူ၏” ဟုဟစ်အော်ခဲ့ကြသည်။ (၃ ဓမ္မရာဇဝင် ၁၈:၃၉၊ ကဘ) သို့သော် အခြားနတ်ဘုရားတစ်ပါး၌လည်း တန်ခိုးရှိ၏။ ‘ဤလောကကိုအစိုးရသော ဘုရားသခင်သည် သူတို့၏ဉာဏ်မျက်စိကိုကွယ်စေ၏’ ဟုသမ္မာကျမ်းစာက ဆိုထားသည်။—၂ ကောရိန္သု ၄:၄။
ယေရှုမသေဆုံးမီညက မိမိတပည့်များအား “ဤလောကကိုအစိုးရသောမင်း” ဟုကိုယ်တော်ခေါ်ဆိုခဲ့သည့် နတ်ဘုရားအကြောင်း သုံးကြိမ်တိုင်သတိပေးခဲ့သည်။ ဤတန်ခိုးကြီးသောမင်း သို့မဟုတ် နတ်ဘုရားသည် “ပြင်သို့နှင်ထုတ်ခြင်းကိုခံရလိမ့်မည်” ဟုယေရှုမိန့်ဆိုတော်မူခဲ့သည်။ (ယောဟန် ၁၂:၃၁; ၁၄:၃၀; ၁၆:၁၁) ဤနတ်ဘုရားကား မည်သူနည်း၊ သူအုပ်စိုးနေသည့်လောကကား အဘယ်နည်း။
ထိုနတ်ဘုရားမှာ ပုန်ကန်သူကောင်းကင်တမန် စာတန်ပင်ဖြစ်၏။ ကျွန်ုပ်တို့ မည်သို့သိရှိရသနည်း။ စာတန်သည် ယေရှုကိုသွေးဆောင်သောအခါ “ဤလောက၌ရှိသမျှသော တိုင်းနိုင်ငံတို့ကိုလည်းကောင်း၊ ထိုတိုင်းနိုင်ငံတို့၏ ဘုန်းစည်းစိမ်ကိုလည်းကောင်း ပြညွှန်၍ ကိုယ်တော်သည် ငါ့ကိုညွတ်ပျပ်ကိုးကွယ်လျှင် ယခုပြလေသမျှတို့ကို ငါပေးမည်” ဟုသမ္မာကျမ်းစာက ဆိုထားသည်။ (မဿဲ ၄:၈၊ ၉) စာတန်က မိမိ,မပိုင်ဆိုင်ရာကို ယေရှုအား ကမ်းလှမ်းမည်ဆိုလျှင် ယင်းသည် သွေးဆောင်မှုတစ်ရပ်ဖြစ်မည်မဟုတ်ပါ။ အမှန်ပင် ‘လောကသားအပေါင်းတို့သည် စာတန်၏လက်၌ရှိကြသည်’ ဟုတမန်တော်ယောဟန် ဖော်ပြခဲ့၏။—၁ ယောဟန် ၅:၁၉။
“ဤလောကကိုအစိုးရသောမင်းသည် ပြင်သို့နှင်ထုတ်ခြင်းကိုခံရလိမ့်မည်” ဟုယေရှု၏ကတိပေးခဲ့ကြောင်း အမှတ်ရပါလေ။ (ယောဟန် ၁၂:၃၁) အမှန်မှာ ‘လောကသည် ရွေ့သွားကွယ်ပျောက်တတ်၏’ ဟုတမန်တော်ယောဟန် ကြိုပြောထားသကဲ့သို့ ဤလောက သို့မဟုတ် ဤအစီအစဉ်စနစ်သည် ၎င်း၏အုပ်စိုးရှင်နှင့်အတူ ကွယ်ပျောက်သွားပါလိမ့်မည်။ သို့သော် “ဘုရားသခင်၏အလိုတော်နှင့်အညီ ကျင့်သောသူမူကား . . . ထာဝရတည်၏” ဟုယောဟန်ဆက်ပြောခဲ့သည်။ (၁ ယောဟန် ၂:၁၇) စစ်မှန်၍ တစ်ဆူတည်းသောဘုရားသခင်၏ ထူးမြတ်လှသောရည်ရွယ်ချက်နှင့် ယင်းမှ ကျွန်ုပ်တို့အကျိုးခံစားနိုင်ပုံကို ယခုဆန်းစစ်ကြည့်ကြစို့။
[အောက်ခြေမှတ်ချက်]
^ အပိုဒ်၊ 7 ဂျိမ်းအယ်လ် တိုမန်နက်၏ ဓမ္မသစ်ကျမ်း; ဘင်ဂျမင်ဝေလ်စင်၏ သည်အဲန်းဖက်တစ် ဒိုင်ဂလော့ထ် ကြားညှပ်ကျမ်း; ဂျေ.အမ်.ပီစမစ်နှင့် ဂျေဂွတ်စပိ၏ ကျမ်းစာ—အမေရိကန်ဘာသာပြန်ကျမ်း တို့ကိုကြည့်ပါ။
[စာမျက်နှာ ၉ ပါ ရုပ်ပုံ]
လုတ္တုရမြို့သားများသည် ပေါလုနှင့် ဗာနဗကို နတ်ဘုရား များဟု ခေါ်ခဲ့ကြ
[စာမျက်နှာ ၁၀ ပါ ရုပ်ပုံ]
ယေရှုသည် မာဂဒလမာရိအား “ငါ၏ဘုရားသခင်တည်းဟူသော သင်တို့၏ဘုရားသခင်ထံတော်သို့ ငါတက်ရမည်” ဟုပြောခဲ့