ဆက်လက်​ရှင်သန်​နိုင်​ရေး​သည် ပရိယာယ်​ဆင်​ခြင်း​အပေါ် မူတည်​သောအခါ

စပိန်​နိုင်ငံ​မှ နိုးလော့! စာရေးသူ ပေး​ပို့​သည်

အင်းဆက်​လောကတွင် နေ့စဉ်​အရေးကြီးသော ပြဿနာ​နှစ်ရပ် ရှိသည်– စားစရာ​အလုံအလောက် ရှာဖွေ​ရန်​နှင့် အစား​မခံ​ရဖို့ ရှောင်ရှား​ရန်​တို့​ဖြစ်သည်။ ငှက်​များ၊ ဖား​များနှင့် အိမ်မြှောင်၊ ပု​တ်​သင်တို့​အတွက် အင်းဆက်​များသည် မက်မော​ဖွယ်​အစာ​ဖြစ်​ကြသည်။ ထို့​ကြောင့် အင်းဆက်​များ​အတွက် ဆက်​အသက်ရှင်​သန်​ရေး​သည် ၎င်းတို့၏​ပတ်ဝန်းကျင်​နှင့် ခွဲခြား​မရနိုင်​အောင် ရော​နေခြင်း​အပေါ် မူတည်​သည်။

ဤသို့ မြင်ကွင်း​မှ ပျောက်ကွယ်​ရန် အင်းဆက်​မျိုးစိတ်များ​စွာ​သည် အံ့ဖွယ်ကောင်း​လောက်​အောင် ကိုယ်ယောင်​ဖျောက်​နိုင်​ကြသည်။ ဤ​ကိုယ်ယောင်​ဖျောက်​နည်း​၏ အကျိုး​ဖြစ်ထွန်း​မှု​သည် မည်သည့်​လူ့​ဖန်တီး​တီထွင်မှု​တို့​ထက်​မဆို ပိုမို​သာလွန်​ပါ​သည်။ ထူးခြားသော ဥပမာ​သုံးခု​ကို ဆန်းစစ်​ကြည့်​ကြ​စို့။

● ရွက်ခြောက် လိပ်ပြာများ။ ၎င်း​တို့​အ​တောင်ပံ​များ​၏ အောက်ဘက်​သည် အညို​ရော​င်​ဖြစ်၍ အရွက်​ခြောက်​နှင့် ခွဲခြား​မရနိုင်​လောက်​အောင် အလွန်​တူ​သည်။ ယင်း​၏​ပုံစံ​တွင် အရွက်​၏​အရောင်​သာမက အကြော​နှင့်​ရိုးတံ​တို့​လည်း ပါဝင်​သည်။ လိပ်ပြာ​တို့ ကိုယ်ယောင်​ဖျောက်​နည်း​သည် အလွန်​အောင်မြင်​သောကြောင့် အစိမ်းရောင်​သစ်​ရွက်​များ​ပေါ် နား​နေသည့်တိုင် ၎င်းတို့သည် သစ်တော​အမြင့်​ပိုင်း​မှ ကြွေကျ​သော အရွက်​ခြောက်​နှင့် ချွတ်စွပ်​တူ​ကြသည်။

● တော​ပုရစ်​များ သို့​မဟုတ် ကေ​တီ​ဒစ်​များ။ တော​ပုရစ်​များသည် အရွက်​ခြောက်​များ​အသွင်​ယူခြင်း​ဖြင့် မဟုတ်ဘဲ အရွက်​စိမ်း​များ​အသွင်​ယူခြင်း​ဖြင့် ဆက်​ရှင်သန်​ကြသည်။ “ဤ​အသွင်တူ​ခြင်း​သည် ပုံသဏ္ဌာန်​နှင့် အရောင်​လောက်​သာ​မဟုတ်ဘဲ အကြော​များ​၏​ပုံစံ​နှင့် မှို​တက်​သည့်​အသွင် အစက်အပြောက်​များ​အထိ​လည်း တူညီ​ကြသည်” ဟု​စာအုပ်​တစ်အုပ်​က​ရှင်းပြသည်။ ပူးတွဲ​ပါ​ပုံ​ကို သင်​အနီးကပ်​ကြည့်​လျှင် ဤ​အင်းဆက်​၏ အ​တောင်ပံ​ပေါ်​ရှိ သေးငယ်သော အစက်အပြောက်​လေး​များ သို့​မဟုတ် အကွက်​လေး​များ​ကို တွေ့မြင်​ရမည်​ဖြစ်​ပြီး ၎င်း​တို့​က ထို​အင်းဆက်​၏​ရုပ်​ဖျက်​ပုံ​ကို ပို​သဘာဝ​ကျစေ​သည်။

● နှံကောင်​များ။ ဤ​အင်းဆက်ငယ်​လေး​များ​ကို အမြဲလိုလို သတိ​မထား​မိ​ကြ​ချေ။ ယင်းက သူတို့​ဆက်​အသက်ရှင်နေ​နိုင်​သည့် အဓိက​အကြောင်းရင်း​ဖြစ်သည်။ ၎င်းတို့သည် ဆူး​တန်း​များ​အသွင် တုပခြင်း​ဖြင့် နောက်ခံ​မှ​ခွဲခြား​မရအောင် ရော​သွား​ကြသည်။ အင်းဆက်​တစ်ကောင်​စီ​သည် ဆူး​နှင့်​တူ​ပြီး သစ်ကိုင်း​ပေါ်​တွင် စီ​တန်း​နေကြ​သည့် နှံကောင်​အုပ်စု​လိုက်​သည် ယင်း​သစ်ကိုင်း​ကို ဆူး​များသော​အသွင် ရှိစေသည်။ အနီးကပ်​ပြီး အသေအချာ​ကြည့်​မှ​သာ​လျှင် ထို “ဆူး​များ” သည် သေးငယ်သော​နှံကောင်​များ ဖြစ်သည်​ကို သိရ​လိမ့်​မည်။

အင်းဆက်​ကိုယ်ယောင်​ဖျောက်​နည်း အမျိုးမျိုး​သည် အများအားဖြင့် ၎င်းတို့၏ တိကျ​မှန်ကန်မှု​ကဲ့သို့ အံ့ဩစရာ​ကောင်း​ပေ​သည်။ ကော့စတာ​ရီ​ကာ​နိုင်ငံ​မှ ခူကောင်​တစ်ကောင်​သည် ငှက်​ချေး​နှင့်​အလွန်​တူ​၏၊ တုတ်​ချောင်း​ပုံ​အင်းဆက်​များ​မူ တုတ်​ချောင်းများ​မှ ခွဲခြား​မ​ရသလောက်​ဖြစ်သည်။ တောင်​အာဖရိက​နိုင်ငံ​မှ ကျိုင်း​ကောင်​တစ်မျိုး​သည် ကျောက်တုံး​နှင့်​အလွန်​ဆင်တူ​၏၊ အစ္စရေး​နိုင်ငံ​တွင်​တွေ့ရ​သော ပိုးမွှား​တစ်မျိုး​သည် ၎င်း​စားသုံး​သော​ပန်းပင်​၏​အသွင်​နှင့် တစ်ထပ်တည်း​ဖြစ်သည်။

ပရိယာယ်​ဆင်​မှု​သည် မည်သည့်​ပုံစံ​မျိုး​ပင်​ဖြစ်ပါစေ ယင်းသည် အင်းဆက်​များ​အတွက် အကာအကွယ်​ဖြစ်စေ​ကာ အံ့ဖွယ်​ဖန်ဆင်း​ခြင်း​လက်ရာ​အမျိုးမျိုး​မှ အထူး​စိတ်ဝင်စားဖွယ် အချက်​အနည်းငယ်​ကို ရရှိစေ​ပါ​သည်။

[စာမျက်နှာ ၁၈ ပါ ရုပ်ပုံ]

တုတ်​ချောင်း​ပုံ အင်းဆက်

[စာမျက်နှာ ၁၈ ပါ ရုပ်ပုံ]

ရွက်ခြောက်​လိပ်ပြာ

[စာမျက်နှာ ၁၈ ပါ ရုပ်ပုံ]

နှံကောင်

[စာမျက်နှာ ၁၈ ပါ ရုပ်ပုံ]

တော​ပုရစ်

[စာမျက်နှာ ၁၈ ပါ ရုပ်ပုံ]

ငှက်​ချေး​နှင့်​ဆင်တူ​သည့် ခူကောင်

[Credit Line]

© Gregory G. Dimijian/Photo Researchers