ကျွန်ုပ်တို့၏ စာရှုသူများထံသို့

ဤစာစောင်မှစ၍ နိုးလော့! ၏ပုံမှန်အစီအစဉ်အချို့ ပြောင်းလဲသွားပေလိမ့်မည်။ အချို့ပြောင်းလဲသွားသော်လည်း အခြားအရာများစွာမှာ ယခင်အတိုင်းဖြစ်မည်။

နိုးလော့! ၏ဆယ်စုနှစ်များစွာကရှိခဲ့သော ရည်ရွယ်ချက်မှာ ပြောင်းလဲမသွားပါ။ စာမျက်နှာ ၄ တွင်ဖော်ပြထားသည့်အတိုင်း “ဤဂျာနယ်ကို ထုတ်ဝေရခြင်းမှာ လူ့မိသားစုကြီးတစ်ရပ်လုံးကို ပညာဉာဏ်အလင်းပေးရန်အတွက်ဖြစ်သည်။” ကမ္ဘာ့အဖြစ်အပျက်များကို ဆန်းစစ်ခြင်း၊ ယဉ်ကျေးမှုမျိုးစုံရှိလူများအကြောင်း ပြောပြခြင်း၊ ဖန်ဆင်းခြင်းအံ့ဖွယ်ရာများကို ဖော်ပြခြင်း၊ ကျန်းမာရေးအကြောင်းဆွေးနွေးခြင်း သို့မဟုတ် သိပ္ပံအကြောင်းမသိသူများအတွက် သိပ္ပံအကြောင်းများကို ဆွေးနွေးဖော်ပြခြင်း စသည့်အကြောင်းအရာများကို နိုးလော့!သည် သူ၏စာဖတ်ပရိသတ်များအား ဆက်ဖော်ပြနေမည်ဖြစ်ကာ ပတ်ဝန်းကျင်ရှိ ကမ္ဘာ့အခြင်းအရာများကို ကျွန်ုပ်တို့အား ဆက်သတိပေးနေမည်ဖြစ်သည်။

၁၉၄၆ ခုနှစ်၊ ဩဂုတ်လ ၂၂ ရက်ထုတ်စာစောင်တွင် “အမှန်တရားအပေါ် တည်ကြည်ရန်မှာ ဤမဂ္ဂဇင်း၏အဓိကပန်းတိုင်ဖြစ်ပေလိမ့်မည်” ဟုကတိပြုထားသည်။ ထိုကတိအတိုင်းပင် နိုးလော့!သည် တိကျသော သတင်းအချက်အလက်များကို ထုတ်ဝေရန်သာအစဉ်ကြိုးပမ်းခဲ့သည်။ ထိုကတိအတိုင်းဖြစ်နိုင်ရန် ဆောင်းပါးများကို တိကျမှန်ကန်မှုရှိဖို့ အသေအချာသုတေသနပြုလုပ်ပြီး ဂရုတစိုက်ဆန်းစစ်သည်။ သို့သော် ယင်းဂျာနယ်သည် ပို၍အရေးကြီးသောနည်းဖြင့် “အမှန်တရားအပေါ် တည်ကြည်” မှုကိုဖော်ပြပါသည်။

နိုးလော့!သည် သူ၏စာဖတ်ပရိသတ်များအား သမ္မာကျမ်းစာကိုသာ အမြဲတမ်းညွှန်ပြခဲ့သည်။ သို့သော် ဤစာစောင်မှစ၍ သမ္မာကျမ်းစာအခြေပြုဆောင်းပါးများကို ယခင်ကထက် ပို၍ဖော်ပြသွားပါမည်။ (ယောဟန် ၁၇:၁၇) ယနေ့အချိန်တွင် အောင်မြင်ပြီး အဓိပ္ပာယ်ရှိသောဘဝရနိုင်ရန် သမ္မာကျမ်းစာ၏လက်တွေ့ကျအကြံပြုချက်များက မည်သို့ကူညီပေးနိုင်ပုံကိုလည်း ဆက်လက်ဖော်ပြသွားပါမည်။ ဥပမာ၊ သမ္မာကျမ်းစာအခြေပြုလမ်းညွှန်ချက်အများစုကို ဤဂျာနယ်၏ပုံမှန်ဆောင်းပါးတွဲများဖြစ်သည့် “လူငယ်များအမေး . . . ” နှင့် “သမ္မာကျမ်းစာရှုထောင့်” တို့တွင်ဖော်ပြထားပြီး ယင်းတို့ကို ဤဂျာနယ်တွင် ပုံမှန်ဆက်ဖော်ပြသွားပါမည်။ ထို့ပြင် ယနေ့လက်ရှိ တရားမဲ့အစီအစဉ်ကို မကြာမီအစားထိုးတော့မည့် ငြိမ်းချမ်းသောကမ္ဘာသစ်တွင်ပြည့်စုံလာမည့် သမ္မာကျမ်းစာကတိတော်များအကြောင်းလည်း စာရှုသူများအား ဆက်လက်ဖော်ပြသွားပါမည်။—⁠ဗျာ. ၂၁:၃၊ ၄။

အဘယ်အရာ ထူးခြားဦးမည်နည်း။ ဤစာစောင်မှစ နိုးလော့! ကို ယခင်က ၈၂ ဘာသာဖြင့် ထုတ်ဝေခဲ့သောဘာသာစကားအများစုကို တစ်လတစ်ကြိမ် ထုတ်ဝေပါလိမ့်မည် (ယင်းကို ယခင်က ဘာသာစကားအများစုဖြင့် တစ်လနှစ်ကြိမ်ထုတ်ဝေခဲ့သည်)။ * ၁၉၄၆ ခုနှစ်ကတည်းက ပုံမှန်ဆောင်းပါးတစ်ခုဖြစ်ခဲ့သော “ကမ္ဘာ့ဖြစ်ရပ် အကဲခတ်” ကို စာစောင်တိုင်းတွင် နှစ်မျက်နှာအစားတစ်မျက်နှာဖြင့်ပင် ဖော်ပြသွားပါမည်။ စာမျက်နှာ ၂၃ တွင် “သင်မည်သို့ဖြေဆိုမည်နည်း” ဟူသော စိတ်ဝင်စားဖွယ်ကဏ္ဍအသစ်ကိုလည်း စတင်ထည့်ပေးပါမည်။ ယင်းတွင် အဘယ်အရာများပါဝင်ပြီး သင်မည်သို့အသုံးပြုနိုင်မည်နည်း။

ဤစာစောင်၏ စာမျက်နှာ ၂၃ ကိုကျေးဇူးပြု၍ ခေတ္တကြည့်လိုက်ပါ။ စာမျက်နှာပါ အချို့သောအပိုင်းများကို လူငယ်များနှစ်သက်လိမ့်မည်ဖြစ်ကာ အခြားအပိုင်းများမှာ ကျမ်းစာပိုမိုတတ်ကျွမ်းသော ကျောင်းသားများအတွက် ကျမ်းစာဉာဏ်စမ်းမေးခွန်းများဖြစ်သည်။ “သမိုင်းတွင် အဘယ်အချိန်၌ ဖြစ်ပျက်ခဲ့သနည်း” ဟူသောအပိုင်းသည် ကျမ်းစာဇာတ်ကောင်များ အသက်ရှင်ခဲ့ချိန်နှင့် အရေးကြီးအဖြစ်အပျက်များ ဖြစ်ခဲ့ချိန်တို့ကိုပြသော အချိန်ဇယားမျဉ်းတစ်ကြောင်းဆွဲနိုင်ရန် သင့်အားကူညီပေးလိမ့်မည်။ “ဤစာစောင်မှ” ဟူသောအပိုင်းမှမေးခွန်းများ၏ အဖြေများသည် မဂ္ဂဇင်း၏ဆောင်းပါးများတွင် ပါရှိသည်။ အခြားမေးခွန်းအများစု၏အဖြေများကို စာစောင်၏ သတ်မှတ်ထားသောစာမျက်နှာတွင် ဖော်ပြမည်ဖြစ်ပြီး ယင်းတို့ကို ပြောင်းပြန်ပုံနှိပ်ထားမည်ဖြစ်သည်။ ထိုအဖြေများကိုမဖတ်မီ သုတေသနပြုရှာဖွေကြည့်ပါလေ။ ပြီးနောက် သင်ယူသိရှိခဲ့ရာများကို အခြားသူများအားဝေမျှပေးပါ။ “သင်မည်သို့ဖြေဆိုမည်နည်း” ဟူသော ဤကဏ္ဍသစ်ကို မိသားစုလိုက် သို့မဟုတ် အုပ်စုလိုက်ကျမ်းစာဆွေးနွေးခန်းများ၏ အခြေခံအဖြစ်ပင် အသုံးပြုနိုင်သည်။

လွန်ခဲ့သောနှစ်ပေါင်း ၆၀ ခန့်က နိုးလော့! မဂ္ဂဇင်းမှ ဤသို့ကတိပြုခဲ့သည်– “ဤမဂ္ဂဇင်းသည် ဒေသခံရှုထောင့်မှ အချက်အလက်များအစား ကမ္ဘာတစ်ဝန်းလုံးအတိုင်းအတာဖြင့် အချက်အလက်များကို တင်ပြနိုင်ရန် ကြိုးစားသွားပါမည်။ ယင်းတို့ကို နေရာဒေသတိုင်းရှိ စိတ်ရိုးဖြောင့်သူများအားလုံး စိတ်ဝင်စားပေလိမ့်မည်။ . . . မဂ္ဂဇင်းတွင်ပါဝင်သော အကြောင်းအရာများသည် . . . လူကြီးလူငယ်အများစု သိသင့်သိအပ်ရာဖြစ်ပြီး ပညာပေးကာ စိတ်ဝင်စားဖွယ်ရာဖြစ်ပေလိမ့်မည်။” နိုးလော့!သည် ဤကတိအတိုင်းပြုလုပ်ခဲ့ကြောင်း ကမ္ဘာတစ်ဝန်းမှ စာရှုသူများ သဘောတူညီကြသည်။ ကျွန်ုပ်တို့သည် ထိုအတိုင်းဆက်ပြုလုပ်သွားမည်ကို သင်တို့အား စိတ်ချစေလိုပါသည်။

ထုတ်ဝေသူများ

[အောက်ခြေမှတ်ချက်]

[စာမျက်နှာ ၃ ပါ ရုပ်ပုံများ]

၁၉၁၉ ခုနှစ်တွင် “ရွှေခေတ်” ဟုခေါ်ပြီး ၁၉၃၇ ခုနှစ်၌ “နှစ်သိမ့်မှု” ဟုပြောင်းလိုက်ကာ ၁၉၄၆ ခုနှစ်တွင် “နိုးလော့!” ဟုပြောင်းခဲ့သည်

 [စာမျက်နှာ ၄ ပါ ရုပ်ပုံ]

“နိုးလော့!” သည် ကြာမြင့်စွာကပင် စာရှုသူများအား သမ္မာကျမ်းစာကိုညွှန်ပြခဲ့သည်

[Credit Lines]

Guns: U.S. National Archives photo; starving child: WHO photo by W. Cutting