ကိုယ်တော်ပြန်ရရှိစေမည့် အသက်တာ

“ကြည့်ရှုလော့။ တရားသဖြင့်အုပ်စိုးသော ရှင်ဘုရင်တစ်ပါး ပေါ်ထွန်းတော်မူလိမ့်မည်။” ယေရှု၏ ဘုရားသခင့်နိုင်ငံတော် အုပ်ချုပ်မှုအာဏာနှင့်စပ်လျဉ်း၍ ဤကဲ့သို့သော အားရှိစရာကတိတော်များသည် သမ္မာကျမ်းစာ၏ ထူးခြားချက်ဖြစ်သည်။ ယင်းသို့သောကတိတော် နောက်တစ်ခုကလည်း ဤသို့ဆိုသေး၏– “ငတ်မွတ်သောသူအော်ဟစ်သောအခါ ထိုသူကိုလည်းကောင်း၊ ကိုးကွယ်ရာမရှိ၍ ဆင်းရဲသောသူကိုလည်းကောင်း ချမ်းသာပေးတော်မူလိမ့်မည်။ ဆင်းရဲသောသူနှင့် ငတ်မွတ်သောသူကိုသနား၍ ငတ်မွတ်သောသူတို့၏အသက်ကို ကယ်တင်တော်မူလိမ့်မည်။ . . . သူတို့အသွေးကို နှမြောတော်မူလိမ့်မည်။”—⁠ဟေရှာယ ၃၂:၁; ဆာလံ ၇၂:၁၂-၁၄။

ထိုသို့သော တရားသဖြင့်အုပ်စိုးမှုကို ကမ္ဘာသူကမ္ဘာသားများ မလိုအပ်ဟု ငြင်းဆိုနိုင်ပါမည်လော။ ယေရှုသည် မိမိနောက်လိုက်များအား ဘုရားသခင့်နိုင်ငံတော်ကို စိတ်စွဲမှတ်ထားကြရန် တိုက်တွန်းခဲ့သည်။ ဘုရားသခင့် “နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာ ပြည့်စုံပါစေ” ဟုဆုတောင်းကြရန် ကိုယ်တော်သွန်သင်ခဲ့၏။—⁠မဿဲ ၆:၉၊ ၁၀။

ဘုရားသခင့်နိုင်ငံတော်နီးပြီဟူသော အထောက်အထား

ထိုဆုတောင်းချက် ပြည့်စုံသည့်အနေနှင့် ဘုရားသခင့်နိုင်ငံတော်တည်ထောင်မည့်အချိန်ကို ကျွန်ုပ်တို့မည်သို့သိရှိနိုင်သနည်း။ ယေရှု၏ အစောပိုင်းနောက်လိုက်များသည် သိလိုစိတ်ဖြင့် ဤသို့မေးမြန်းခဲ့ကြသည်– ‘ကိုယ်တော်သည် [အုပ်စိုးနေသောမင်းအဖြစ်] ကြွလာ၍ ဤကပ်ကမ္ဘာကုန်သော ပုပ္ပနိမိတ်သည် အဘယ်နိမိတ်ဖြစ်မည်ကိုလည်းကောင်း အမိန့်ရှိတော်မူပါ။’ ယေရှုဤသို့ဖြေဆိုသည်– “လူတစ်မျိုးနှင့်တစ်မျိုး . . . ရန်ဘက်ပြုကြလိမ့်မည်။ အရပ်ရပ်တို့၌ အစာခေါင်းပါးခြင်း၊ . . . မြေကြီးလှုပ်ခြင်းတို့သည် ဖြစ်ကြလိမ့်မည်။ ထိုအမှုအရာတို့သည် . . . ဆင်းရဲခြင်း၏ အစအဦးဖြစ်သတည်း။” ကိုယ်တော်က ဤသို့လည်းသတိပေးခဲ့သည်– “မတရားသောအမှုတို့သည် များပြားသဖြင့် အများသောသူတို့၏ ချစ်ခြင်းမေတ္တာသည် ခေါင်းပါးလိမ့်မည်။”—⁠မဿဲ ၂၄:၃-၁၂။

ကျမ်းစာပရောဖက်ပြုချက်နောက်တစ်ခုက ဤသို့ဆိုသည်– ‘နောင်ကာလသည် ခဲယဉ်းသောကာလဖြစ်မည်။ အဘယ်သို့နည်းဟူမူကား၊ လူတို့သည် ကိုယ်ကိုကိုယ်ချစ်သောသူ၊ ငွေကိုတပ်မက်သောသူ၊ ဝါကြွားသောသူ၊ ထောင်လွှားစော်ကားသောသူ၊ သူ့အသရေကိုရှုတ်ချသောသူ၊ မိဘစကားကိုနားမထောင်သောသူ၊ ကျေးဇူးမရှိသောသူ၊ သန့်ရှင်းခြင်းမရှိသောသူ၊ ပကတိကြင်နာစုံမက်ခြင်းနှင့်ကင်းသောသူ၊ ရန်ငြိုးဖွဲ့သောသူ၊ ချောစားတတ်သောသူ၊ ကိုယ်ဣန္ဒြေကိုမချုပ်တည်းနိုင်သောသူ၊ ပြင်းထန်သောသူ၊ သူတော်ကောင်းကိုမုန်းသောသူ၊ သစ္စာကိုဖျက်တတ်သောသူ၊ သတိပေးခြင်းကိုမခံသောသူ၊ မာန်မာနနှင့်ယစ်မူးသောသူ၊ ဘုရားသခင်ကိုနှစ်သက်သည်ထက် ကာမဂုဏ်ခံစားခြင်းကိုသာ၍နှစ်သက်သောသူ၊ ဘုရားသခင်ဝတ်၌မွေ့လျော်ယောင်ဆောင်၍ မွေ့လျော်ခြင်းတန်ခိုးကို ငြင်းပယ်သောသူဖြစ်ကြလိမ့်မည်။’—⁠၂ တိမောသေ ၃:၁-၅။

“နောင်ကာလ” ဟူသော ဤဖော်ပြချက်သည် ကျွန်ုပ်တို့အသက်ရှင်နေရသည့်အချိန်နှင့် အတိအကျ ကိုက်ညီသည်ကို သင်သဘောတူပေမည်။ ယခုအချိန်သည် ဤကျမ်းစာပရောဖက်ပြုချက် ပြည့်စုံသည့်အချိန်ဖြစ်ကြောင်း အထောက်အထားများစွာရှိ၏– ‘ပျက်စီးခြင်းသို့မရောက်နိုင်သောနိုင်ငံတစ်ခုကို ကောင်းကင်ဘုံရှင်ဘုရားသခင်သည် တည်ထောင်စေတော်မူမည်။ ထိုနိုင်ငံသည် အခြားသောလူမျိုးလက်သို့မရောက်ရဘဲ အထက်ဆိုခဲ့ပြီးသော နိုင်ငံရှိသမျှတို့ကို ချိုးဖဲ့ဖျက်ဆီး၍ အစဉ်အမြဲတည်လိမ့်မည်။’—⁠ဒံယေလ ၂:၄၄၊ ၄၅။

“ငြိမ်သက်ခြင်းအရှင်” ကျင့်သုံးသည့် ဘုရားသခင့်နိုင်ငံတော်အုပ်စိုးမှုအာဏာတော်သည် ဤကမ္ဘာ့အဆုံးကို ကပ်ကျော်ကြမည့်သူတို့၏ ငြိမ်သက်ခြင်းအား နှောင့်ယှက်မည့်အရာရာတိုင်းကို ဖယ်ရှားပစ်ပါလိမ့်မည်။ (ဟေရှာယ ၉:၆) ကျမ်းစာပရောဖက်ပြုချက်က ဤသို့ကတိပြုသည်– ‘လောကနှင့်လောကတပ်မက်ခြင်းသည် ရွေ့သွားကွယ်ပျောက်တတ်၏။ ဘုရားသခင်၏အလိုတော်နှင့်အညီ ကျင့်သောသူမူကား ထာဝရတည်၏။’ (၁ ယောဟန် ၂:၁၇) ဤကမ္ဘာ့အဆုံးသည် ဘုရားသခင့်အလိုတော်ဆောင်သူတို့အား ကျွန်ုပ်တို့၏ကနဦးမိဘ အာဒံနှင့်ဧဝတို့ ဘုရားသခင်ကိုပုန်ကန်ခဲ့ခြင်းကြောင့် လူ့မိသားစုဆုံးရှုံးခဲ့ရာကို ပြန်လည်ရရှိစေပါလိမ့်မည်။

လက်တစ်ကမ်းသာလိုတော့သည့် အသက်တာပုံစံ

“အလုံးစုံသောအရာတို့ကို အသစ်ပြုပြင်သောကာလ၌ လူသားသည် ဘုန်းရှိသောပလ္လင်တော်ပေါ်မှာ ထိုင်တော်မူ” မည်ဟု ယေရှုရှင်းပြခဲ့သည်။ (မဿဲ ၁၉:၂၈) ကျမ်းပြိုင်တစ်စောင်က ယင်းကို “ရောက်ရှိလာမည့်အစီအစဉ်စနစ်” ဟုဆိုသည်။ (လုကာ ၁၈:၃၀၊ ကဘ) ထိုအချိန်တွင် ယေရှုသည် မိမိ၏ရွေးနုတ်ဖိုးပူဇော်ရာယဇ်အား ယုံကြည်ကြောင်းတင်ပြသူအားလုံးကို ထာဝရအသက်ပေးခြင်းဖြင့် ငြိမ်သက်ခြင်းအရှင်အဖြစ် ဘုရားသခင်ပေးအပ်ထားသော အခွင့်အာဏာကို ကျင့်သုံးပါလိမ့်မည်။—⁠ယောဟန် ၅:၂၁။

ဘုရားသခင့်အစီအစဉ်စနစ်သစ်တွင် လူတို့သည် မြေကြီးပရဒိသု၌ အာဒံနှင့်ဧဝတို့အား ကိုယ်တော်ပေးခဲ့သည့် အသက်တာပုံစံမျိုးကို ရရှိကြပါလိမ့်မည်။ သားသမီးများမွေးပြီး “မြေကြီးကိုပြည့်စေ၍ နိုင်ကြ” ရန် သူတို့ကို ဘုရားသခင် ညွှန်ကြားခဲ့ကြောင်း အမှတ်ရပါလေ။ သူတို့သည် ကမ္ဘာတစ်ခွင်လုံးကို ဧဒင်ဥယျာဉ်ကဲ့သို့သောပရဒိသုဖြစ်အောင် တိုးချဲ့ဖို့တာဝန်ရှိသည်။ (ကမ္ဘာဦး ၁:၂၈) အလားတူစွာ အလုံးစုံသောအရာတို့ကို အသစ်ပြုပြင်သောကာလတွင် ကမ္ဘာမြေကြီးသည် ဤကမ္ဘာ့အဆုံးကို ကပ်ကျော်သူများ၊ ၎င်းတို့၏သားသမီးများ၊ သေဆုံးခဲ့ကြသော်လည်း ရှင်ပြန်ထမြောက်လာကြသူများနှင့် ပြည့်နှက်နေပေမည်။ ထိုသူတို့သည် ဘုရားသခင့်မူလရည်ရွယ်ချက်အတိုင်း ကမ္ဘာမြေကြီးကို ပရဒိသုဖြစ်အောင် ပူးပေါင်းလုပ်ဆောင်ကြမည်။

ထိုဖြောင့်မတ်သောကမ္ဘာသစ်တွင် နေထိုင်သူတို့သည် ကောင်းချီးများခံစားရရှိကြမည်ဟု သမ္မာကျမ်းစာကဆိုထားရာ ယင်းကောင်းချီးများမှအချို့ကို သုံးသပ်ကြည့်ပါလေ။—⁠၂ ပေတရု ၃:၁၃။

ဤစာမျက်နှာများတွင် ဖော်ပြထားသော ကတိတော်များသည် မယုံနိုင်စရာဖြစ်ပုံရသော်လည်း “ရောက်ရှိလာမည့် အစီအစဉ်စနစ်” တွင် ယင်းတို့သည် အမှန်တကယ်ဖြစ်ပျက်လာကြမည်။ အဆိုပါကောင်းချီးများခံစားနိုင်ရန် လူတို့လုပ်ဆောင်ရမည့်အရာကို ဘုရားသခင်ထံ ယေရှုဆုတောင်းရာတွင် ဤသို့ဖော်ပြခဲ့၏– “ထာဝရအသက်ဟူမူကား၊ မှန်သောဘုရားသခင်တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။” (ယောဟန် ၁၇:၃) ဤအသက်ပေးအသိပညာကို နှိမ့်ချစွာ ရှာဖွေဆည်းပူးနေကြသူတို့တွင် သင်လည်းပါဝင်နိုင်ပါစေ။

[စာမျက်နှာ ၇ ပါ အကျဉ်းဖော်ပြချက်]

‘နာမတော်ကား . . .ငြိမ်သက်ခြင်းအရှင်ဟု ခေါ်ဝေါ်သမုတ်ခြင်းကို ခံတော်မူလိမ့်မည်။ . . .အာဏာတော်တိုးတက်ခြင်းနှင့် ငြိမ်သက်တော်မူခြင်းသည် အမြဲရှိလိမ့်မည်။’—⁠ဟေရှာယ ၉:၆၊ ၇

 [စာမျက်နှာ ၈၊ ၉ ပါ လေးထောင့်ကွက်/ရုပ်ပုံများ]

လူတိုင်းအတွက် အိုးအိမ်နှင့်အလုပ်အကိုင်ရှိမည်

“သူတို့သည် ကိုယ်ဆောက်သောအိမ်၌ နေကြလိမ့်မည်။ ... သူတို့သည် စပျစ်ဥယျာဉ်ကိုစိုက်၍ အခြားသောသူစားရမည်မဟုတ်။”—⁠ဟေရှာယ ၆၅:၂၁၊ ၂၂။

အားလုံးအတွက် အစားအသောက်အလျှံပယ်ရှိမည်

“မြေသည် မိမိဘဏ္ဍာကိုပေး” မည်။ မြေကြီးပေါ်တွင် “များစွာသောစပါးရှိ” မည်။—⁠ဆာလံ ၆၇:၆; ၇၂:၁၆။

ကမ္ဘာချီငြိမ်သက်မှုသည် တိရစ္ဆာန်များ၌ပင် အကျိုးသက်ရောက်မည်

“တောခွေးသည် သိုးသငယ်နှင့်အတူနေလိမ့်မည်။ ကျားသစ်သည် ဆိတ်သငယ်နှင့်အတူအိပ်လိမ့်မည်။ . . . လူသူငယ်သည် သူတို့ကို ပို့ဆောင်လိမ့်မည်။”—⁠ဟေရှာယ ၁၁:၆။

စစ်ကင်းမဲ့ကာ ထာဝစဉ်ငြိမ်းချမ်းမည်

“တစ်ပြည်ကိုတစ်ပြည် စစ်မတိုက်၊ စစ်အတတ်ကိုလည်း နောက်တစ်ဖန်မသင်ရကြ။” ‘အာဏာတော်တိုးတက်ခြင်းနှင့် ငြိမ်သက်တော်မူခြင်းသည် အမြဲရှိလိမ့်မည်။’—⁠ဟေရှာယ ၂:၄; ၉:၇။

ချစ်မြတ်နိုးရသော သေလွန်သူများရှင်ပြန်ထမြောက်လာကြလိမ့်မည်

“သင်္ချိုင်းများမှာရှိသောသူ အပေါင်းတို့သည် [ယေရှု] ၏စကားသံကိုကြား၍ ထွက်ရမည့်အချိန်ကာလ ရောက်လတ္တံ့။”—⁠ယောဟန် ၅:၂၈၊ ၂၉။

ဖျားနာခြင်း၊ သေခြင်းရှိတော့မည်မဟုတ်

“မြို့သားကလည်း ‘ငါနာသည်’ ဟုမဆိုရ။” “နောက်တစ်ဖန် သေဘေးမရှိရ။ . . . ရှေးဖြစ်ဖူးသောအရာတို့သည် ရွေ့သွားကြပြီ။”—⁠ဟေရှာယ ၃၃:၂၄; ဗျာ. ၂၁:၃၊ ၄။