သမ္မာကျမ်းစာရှုထောင့်

အရက်ယမကာသောက်သုံးခြင်းသည် မှားသလော

‘စပျစ်ဝိုင်သည် လှည့်စားတတ်၏။ သေရည်သေရက်သည် ရုန်းရင်းခတ်ပြုခြင်းအမှုကို ဖြစ်စေတတ်၏။ ထိုသို့သောအားဖြင့် မှားယွင်းသောသူသည် ပညာမရှိ။’ နယပုံပြင် ၂၀:၁ တွင်တွေ့ရသည့် ဤစာသားက အရက်ယမကာသောက်သုံးခြင်းသည် မှား၏ဟု ညွှန်ပြသလော။ အချို့သောသူတို့ ထိုသို့ယူမှတ်ကြ၏။ အရက်ကို တလွဲအသုံးပြုခြင်းကြောင့် ဖြစ်ရသည့် အကျင့်ပျက်မှုများအကြောင်းပါသော ကျမ်းစာမှတ်တမ်းများကို ထပ်ဆင့်သာဓကအနေနှင့် သူတို့ထောက်ပြကြသည်။—ကမ္ဘာဦး ၉:၂၀-၂၅။

သို့သော် အရက်အလွန်အကျွံသောက်သုံးခြင်းက အသည်းရောင်ရောဂါ၊ ကြေကွဲဖွယ်မတော်တဆထိခိုက်မှုများ၊ စီးပွားပျက်မှု၊ မိသားစုအတွင်း မတော်မတရားပြုမှု၊ မမွေးသေးသောကလေးအားထိခိုက်မှုစသည့် ဆိုးကျိုးများဖြစ်စေသည်။ ထိုသို့သောဆိုးကျိုးများကြောင့် “ဘာသာရေးဂိုဏ်းဂဏများစွာက အရက်သောက်ခြင်းသည် အကျင့်ယိုယွင်းခြင်းဖြစ်သည်ဟု သွန်သင်ခဲ့ကြ” ဟန်ရှိကြောင်း ကမ္ဘာ့စာအုပ်စွယ်စုံကျမ်း ကဖော်ပြသည်။ သို့သော် အရက်ယမကာသောက်သုံးခြင်းသည် အကျင့်ယိုယွင်းခြင်းဖြစ်သလော။ အရက်ယမကာအမျိုးမျိုးကို အနည်းငယ်မျှပင်မသောက်ရဟု သမ္မာကျမ်းစာက တားမြစ်ပါသလော။

သမ္မာကျမ်းစာက မည်သို့ဆိုသနည်း

သမ္မာကျမ်းစာက အရက်အလွန်အကျွံသောက်ခြင်း၏ ဆိုးကျိုးများအကြောင်း သတိပေးထား ၏။ ဧဖက် ၅:၁၈ က ‘လွန်ကျူးစေတတ်သော စပျစ်ဝိုင်နှင့်ယစ်မူးခြင်းကိုရှောင်၍ ဝိညာဉ်တော်နှင့်ပြည့်စုံလျက်ရှိကြလော့’ ဟုသတိပေးသည်။ ထို့အပြင်၊ နယပုံပြင် ၂၃:၂၀၊ ၂၁ ကဤသို့တိုက်တွန်းသည်– ‘စပျစ်ဝိုင်သောက်ကြူးသောသူ၊ အမဲသားစားကြူးသောသူတို့ကို အပေါင်းအဖော်မလုပ်နှင့်။ သောက်ကြူးသောသူနှင့် စားကြူးသောသူသည် ဆင်းရဲခြင်းသို့ရောက်လိမ့်မည်။’ ဟေရှာယ ၅:၁၁ ကလည်း ဤသို့ဆို၏– ‘သေရည်သေရက်ကို သောက်အံ့သောငှာ နံနက်စောစောထ၍ စပျစ်ဝိုင်နှင့်ယစ်မူးအံ့သောငှာ ညကိုလည်း လွန်စေတတ်သောသူတို့သည် အမင်္ဂလာရှိ၏။’

တော်ရုံသင့်ရုံသောက်ခြင်း၏ ပျော်ရွှင်မှုနှင့် အကျိုးကျေးဇူးများကိုလည်း သမ္မာကျမ်းစာက ဖော်ပြပေးသည်။ ဥပမာ၊ ‘လူတို့ကိုရွှင်လန်းစေသည့် စပျစ်ဝိုင်’ သည် ဘုရားသခင်ပေးတော်မူသော ဆုကျေးဇူးတစ်ခုဖြစ်ကြောင်း ဆာလံ ၁၀၄:၁၅ ကဖော်ပြသည်။ ထို့ပြင် ‘ဝမ်းမြောက်သောစိတ်နှင့် အစာကိုစားခြင်း၊ ရွှင်လန်းသောစိတ်နှင့် စပျစ်ဝိုင်ကိုသောက်ခြင်း’ သည် ကောင်းမှုများပြုခြင်းမှရရှိသော ဆုကျေးဇူးဖြစ်သည်ဟု ဒေ. ၉:၇ ကဆို၏။ ဝိုင်သောက်သုံးခြင်း၏ ဆေးဘက်ဆိုင်ရာအကျိုးကျေးဇူးများကို ပေါလုသိရှိထားရာ ‘သင်၏ရင်ထဲ၌ အကျိုးဖြစ်စေခြင်းငှာလည်းကောင်း၊ မကြာမကြာခံရသော ရောဂါကြောင့်လည်းကောင်း ယခုမှစ၍ ရေကိုသာမသောက်ဘဲ စပျစ်ဝိုင်အနည်းငယ်ကိုသုံး’ ရန် တိမောသေအား မှာကြားခဲ့သည်။ (၁ တိမောသေ ၅:၂၃) လူတစ်ဦး၏ စိတ်သောကကို ပြေပျောက်စေနိုင်သည့် အရက်၏အစွမ်းကို သမ္မာကျမ်းစာတွင် ဖော်ပြထားသည်။—သု. ၃၁:၆၊ ၇။

သမ္မာကျမ်းစာသည် အရက်ယမကာသောက်သုံးခြင်းကို မတားမြစ်ကြောင်း ထင်ရှားပါသည်။ သို့သော် သောက်ကြူးခြင်းကိုမူ ပြစ်တင်ရှုတ်ချထား၏။ ထို့ကြောင့် ပေါလုက ခရစ်ယာန်ကြီးကြပ်မှူးများ၊ ဓမ္မအမှုထမ်းများနှင့် သက်ကြီးအမျိုးသမီးများအား ‘စပျစ်ဝိုင်ကိုသောက်ကြူးသောသူ’ မဖြစ်ရန်သတိပေးကာ တိမောသေအား ‘ဝိုင်အနည်းငယ်’ ကိုသာသုံးရန် အကြံပြုခဲ့သည်။ (၁ တိမောသေ ၃:၂၊ ၃၊ ၈; တိတု ၂: ၂၊ ၃) “သေရည်သေရက်နှင့်ယစ်မူးသောသူ” တို့သည် “ဘုရားသခင်၏နိုင်ငံတော်ကို အမွေ” ခံရမည်မဟုတ်ကြောင်း ခရစ်ယာန်အားလုံးကို သတိပေးထားသည်။—၁ ကောရိန္သု ၆:၉၊ ၁၀။

သမ္မာကျမ်းစာက သောက်ကြူးခြင်းကို စားကြူးခြင်းနှင့်ဆက်စပ်ထားကာ ယင်းတို့နှစ်မျိုးစလုံးကို ရှောင်ရန် ညွှန်ကြားထားသည်မှာ မှတ်သားထိုက်၏။ (တရားဟောရာ ၂၁: ၂၀) ဤညွှန်ကြားချက်က မည်သည့်အရက်ကိုမဆို လုံးဝမသောက်သင့်ဟုဆိုလိုလျှင် မည်သည့်အစားအစာကိုမဆို လုံးဝမစားသင့်ဟု ဖော်ပြရာမရောက်ပေလော။ ယင်းအစား မှားသည်ဟု သမ္မာကျမ်းစာဆိုသောအရာမှာ တော်ရုံသင့်ရုံစားသောက်ခြင်းကိုမဟုတ်ဘဲ မူးယစ်သည်အထိ၊ စားကြူးသည်အထိ အလွန်အကျွံစားသောက်ခြင်းကို ပြောနေခြင်းဖြစ်သည်။

ယေရှု အဘယ်အရာပြုခဲ့သနည်း

ခရစ်တော်သည် ‘ငါတို့အတွက် ခြေရာကို လျှောက်လိုက်စေခြင်းငှာ ပုံသက်သေကိုထားတော်မူပြီ။ ထိုသခင်သည် မကောင်းမှုကိုမပြု’ ဟုတမန်တော်ပေတရုကဆိုသည်။ (၁ ပေတရု ၂: ၂၁၊ ၂၂) သို့ဆိုလျှင် ယေရှုသည် အရက်ယမကာကို မည်သို့ရှုမြင်ခဲ့သနည်း။ ကိုယ်တော်ပြုခဲ့သည့် ဦးဆုံးအံ့ဖွယ်အမှုမှာ ရေမှ ဝိုင်ဖြစ်အောင် ပြုလုပ်ခြင်းဖြစ်သည်။ ယေရှုသည် ရေမှ မည်သို့သောဝိုင်အမျိုးအစားဖြစ်အောင် ပြုလုပ်ခဲ့သနည်း။ “ပွဲအုပ်သည်” အံ့ဖွယ်နည်းဖြင့် ပြုလုပ်ထားသည့် ဝိုင်နှင့်ပတ်သက်၍ သတို့သားအား ချီးမွမ်းကာ ဤသို့ဆို၏– ‘အခြားသောသူမည်သည်ကား၊ ရှေးဦးစွာ ကောင်းသောစပျစ်ဝိုင်ကိုထည့်၍ ဝစွာသောက်ကြပြီးမှ ညံ့သောစပျစ်ဝိုင်ကို ထည့်လေ့ရှိ၏။ သင်မူကား၊ ကောင်းသောစပျစ်ဝိုင်ကို ယခုတိုင်အောင်သိုထားပြီ။’—ယောဟန် ၂:၉၊ ၁၀။

ပသခါပွဲတွင် ဝိုင်သောက်သုံးခြင်းပါဝင်သည်ဖြစ်ရာ ယေရှုသည် သခင့်ညစာစားပွဲကျင်းပချိန်က ဝိုင်ကို အသုံးပြုခဲ့သည်။ မိမိ၏တပည့်များအား ဝိုင်ခွက်ကိုကမ်းပေးကာ “သင်တို့ရှိသမျှသည် သောက်ကြလော့” ဟုမိန့်တော်မူခဲ့သည်။ မိမိသေရတော့မည်ကိုသိထားရာ ဤသို့ထပ်၍မိန့်တော်မူ၏– ‘ငါဆိုသည်ကား၊ ဤစပျစ်ဝိုင်မျိုးသစ်ကို ငါ့ခမည်းတော်၏နိုင်ငံ၌ သင်တို့နှင့်အတူ ငါမသောက်မီနေ့တိုင်အောင် ယခုမှစ၍ တစ်ဖန်ငါမသောက်ရ။’ (မဿဲ ၂၆:၂၇၊ ၂၉) ယေရှုသည် ဝိုင်သောက်သုံးခဲ့ကြောင်း လူတို့သိရှိခဲ့ကြ၏။—လုကာ ၇:⁠၃၄။

ကျွန်ုပ်တို့ အဘယ်အရာပြုသင့်သနည်း

အရက်ယမကာသောက်သုံးခြင်းကို သမ္မာကျမ်းစာက မတားမြစ်သော်လည်း သောက်သုံးရမည်ဟု ယင်းကမဆိုလိုပါ။ ယင်းကို ရှောင်ကြဉ်ရန် အကြောင်းရင်းများစွာရှိသည်။ ဥပမာ၊ ယခင်ကအရက်စွဲခဲ့သူတစ်ဦးသည် တစ်ခွက်မျှသောက်ရုံဖြင့် အန္တရာယ်ရှိကြောင်း သိထားသည်။ ကိုယ်ဝန်ဆောင်အမျိုးသမီးတစ်ဦးသည် သန္ဓေသားကို ထိခိုက်မည်စိုး၍ အရက်ကိုရှောင်မည်ဖြစ်သည်။ ထို့ပြင် အရက်သည် ပိုင်းခြားဝေဖန်မှုနှင့် အလိုအလျောက်တုံ့ပြန်နိုင်မှုကို မည်မျှထိခိုက်စေနိုင်ကြောင်း ယာဉ်မောင်းတစ်ဦးသိရှိထားရာ မိမိအသက် သို့မဟုတ် အခြားသူတို့၏အသက်ကို ဘေးရောက်စေမည့် မည်သည့်အရာကိုမဆို ရှောင်ကြဉ်မည်ဖြစ်သည်။

ခရစ်ယာန်တစ်ဦးသည် အရက်သောက်ခြင်းကို ပြစ်တင်ရှုတ်ချသည့် ကိုယ်ကိုကိုယ်သိသောစိတ်ရှိသူ မည်သူကိုမဆို ထိမိလဲစေလိုမည်မဟုတ်ပေ။ (ရောမ ၁၄:၂၁) သူသည် လူထုရှေ့ဓမ္မအမှုတွင် ပါဝင်သည့်အခါ အရက်ယမကာသောက်သုံးခြင်းကို ပညာရှိစွာရှောင်ကြဉ်ပေမည်။ ရှေးဣသရေလလူမျိုးအား ပေးခဲ့သည့် ဘုရားသခင့်ပညတ်က ယဇ်ပုရောဟိတ်များ တရားဝင်အမှုထမ်းနေချိန်တွင် ‘စပျစ်ဝိုင်အစရှိသော ယစ်မျိုးကိုမသောက်’ ရန် တားမြစ်ခြင်းမှာ မှတ်သားထိုက်၏။ (ဝတ်ပြုရာ ၁၀:၉-၁၁) ထို့ပြင် အရက်သောက်ခြင်းကို တားမြစ်သည့် သို့မဟုတ် ကန့်သတ်ထားသည့်နိုင်ငံများတွင် ခရစ်ယာန်တစ်ဦးသည် ထိုနိုင်ငံ၏ဥပဒေကို လိုက်နာမည်ဖြစ်သည်။—ရောမ ၁၃:⁠၁။

သောက်မည်၊ မသောက်မည် သို့မဟုတ် မည်မျှသောက်သုံးမည်တို့ကို ကိုယ်ပိုင်ဆုံးဖြတ်ရမည်ဖြစ်သော်လည်း တော်ရုံသင့်ရုံသာသောက်သုံးရန် သမ္မာကျမ်းစာက တိုက်တွန်းသည်။ ယင်းက ဤသို့ဆိုသည်– “သင်တို့သည် စားသော်လည်းကောင်း၊ သောက်သော်လည်းကောင်း၊ မည်သည့်အမှုကိုပြုသော်လည်းကောင်း၊ ဘုရားသခင်၏ဘုန်းတော်ကိုထောက်၍ ခပ်သိမ်းသောအမှုကိစ္စကိုပြုကြလော့။”—⁠၁ ကောရိန္သု ၁၀:၃၁။

သင်စဉ်းစားဖူးသလော

▪ အရက်သောက်ခြင်းနှင့်ပတ်သက်၍ မည်သည့်သတိပေးချက်ကို သမ္မာကျမ်းစာတွင် ဖော်ပြထားသနည်း။—၁ ကောရိန္သု ၆:၉၊ ၁၀။

▪ ယေရှုခရစ်သည် အရက်သောက်ခဲ့သလော။—လုကာ ၇:⁠၃၄။

▪ အစားအသောက်ကိစ္စနှင့်ပတ်သက်၍ စစ်မှန်သောခရစ်ယာန်များကို မည်သို့လမ်းညွှန်ထားသနည်း။—၁ ကောရိန္သု ၁၀:⁠၃၁။