ငါ ဘယ်အချိန်မှာ စချိန်းတွေ့လို့ရမလဲ
လူငယ်များအမေး . . .
ငါ ဘယ်အချိန်မှာ စချိန်းတွေ့လို့ရမလဲ
“ကျောင်းမှာ တစ်ဦးဦးနဲ့ မချိန်းတွေ့သူဟာ စိတ်မနှံ့သူပဲ။”—ဘရစ်တနီ။
“ကျွန်မရဲ့ဝန်းကျင်မှာ ချိန်းတွေ့ဖို့ ဖိအားတွေအများကြီးရှိတယ်။ ရုပ်ဖြောင့်တဲ့ကောင်လေးတွေလည်း အများကြီးပဲ။”—ဝှစ်တနီ။
▪ ယောက်ျားလေးတစ်ဦးနှင့် မိန်းကလေးတစ်ဦးသည် စာသင်ခန်းများကြားရှိ ကျောင်းစင်္ကြံတွင် လက်တွဲပြီး အေးအေးဆေးဆေးလမ်းလျှောက်နေသည်ကို သင်တွေ့သည်။ သင် မည်သို့ခံစားရသနည်း။
□ ဂရုမစိုက်
□ အနည်းငယ်မနာလို
□ အလွန်မနာလို
▪ သင်သည် သူငယ်ချင်းများနှင့်အတူ ရုပ်ရှင်သွားကြည့်သည်။ သင်မှလွဲ၍ ကျန်သူအားလုံးတွင် အတွဲကိုယ်စီရှိသည်။ သင် မည်သို့ခံစားရသနည်း။
□ ဂရုမစိုက်
□ အနည်းငယ်မနာလို
□ အလွန်မနာလို
▪ မကြာသေးမီက သင်အချစ်ဆုံးသူငယ်ချင်းသည် လိင်ခြားသူတစ်ဦးကို စိတ်ဝင်စားနေကာ ယခု ချိန်းတွေ့နေသည်။ သင် မည်သို့ခံစားရသနည်း။
□ ဂရုမစိုက်
□ အနည်းငယ်မနာလို
□ အလွန်မနာလို
အထက်ပါမေးခွန်းများမှ တစ်ခုကိုဖြေဆိုရာတွင် “အနည်းငယ်မနာလို” သို့မဟုတ် “အလွန်မနာလို” ဟူ၍ဖြေဆိုလျှင် သင် တစ်ဦးတည်းမဟုတ်ပေ။ ချိန်းတွေ့သည့်ထုံးစံရှိသော နိုင်ငံများမှ လူငယ်များစွာ ထိုအတိုင်းဖြေပါလိမ့်မည်။ “တစ်ခါတလေ ကိုယ်နဲ့သက်တူရွယ်တူတွေက ရည်းစားရှိပြီး ကိုယ့်မှာမရှိဘူးဆိုရင် တစ်ခုခု လိုနေသလိုခံစားရတယ်” ဟု အသက် ၁၄ နှစ်အရွယ် အီဗက်ကဆို၏။
မိမိကချစ်ကြိုက်နေသူ သို့မဟုတ် မိမိကို ချစ်ကြိုက်နေသူတစ်ဦးနှင့် အတူရှိလိုသောဆန္ဒမှာ အလွန်ပြင်းပြနိုင်ပါသည်။ “ရည်းစားထားချင်တဲ့စိတ်ဟာ တစ်နေ့ထက်တစ်နေ့ ပိုပြင်းထန်လာလို့ ကိုင်တွယ်ဖို့ အရမ်းခက်တယ်” ဟု ဆယ်ကျော်သက်လူငယ်တစ်ဦးက ဆိုသည်။ အချို့သူတို့မှာ ငယ်ရွယ်ချိန်တွင် စတင်ချိန်းတွေ့ကြ၏။ ဥပမာ၊ အသက် ၁၃ နှစ်အရွယ်ရှိသူများအနက် ၂၅ ရာခိုင်နှုန်းသည် “ချိန်းတွေ့” ဖူးကြပြီဟု တိုင်းမ် မဂ္ဂဇင်းလေ့လာမှုတစ်ခုက ဖော်ပြသည်။ သူတို့ချိန်းတွေ့ရန် အသင့်ဖြစ်ပြီဟု သင် ယူဆသလော။ သင်လည်း ချိန်းတွေ့ရန် အသင့်ဖြစ်ပြီလော။ ယင်းကိုဖြေရန် ပို၍အခြေခံကျသော မေးခွန်းတစ်ခုကို ဦးဆုံးသုံးသပ်ဖို့လိုသည်။
“ချိန်းတွေ့ခြင်း” ဟူသည် အဘယ်နည်း
▪ သင်သည် လိင်ခြားသူတစ်ဦးနှင့် ပုံမှန်တွဲသွားသည်။
သင် ချိန်းတွေ့နေခြင်းလော။ □ ဟုတ်သည် □ မဟုတ်ပါ
▪ သင်သည် လိင်ခြားသူဖြစ်သည့် အထူးသူငယ်ချင်းတစ်ဦးထံ ဖုန်းဖြင့် တစ်နေ့လျှင် အကြိမ်ကြိမ် စာပို့သည် သို့မဟုတ် စကားပြောသည်။
သင် ချိန်းတွေ့နေခြင်းလော။ □ ဟုတ်သည် □ မဟုတ်ပါ
▪ သင်သည် လိင်ခြားသူတစ်ဦးနှင့် တိတ်တဆိတ် မိတ်ဆွေဖွဲ့၏။ ယင်းကို သင်၏မိဘများက မသိကြချေ။ မိဘများသဘောကျမည်မဟုတ်ကြောင်း သင် သိသောကြောင့် သူတို့အား ယင်းအကြောင်း မပြောဘဲနေသည်။
သင် ချိန်းတွေ့နေခြင်းလော။ □ ဟုတ်သည် □ မဟုတ်ပါ
▪ သင်သည် သူငယ်ချင်းများနှင့်စုဆုံသည့်အခါတိုင်း အဆိုပါ လိင်ခြားသူတစ်ဦးတည်းနှင့်သာ ပေါင်းသင်းသည်။
သင် ချိန်းတွေ့နေခြင်းလော။ □ ဟုတ်သည် □ မဟုတ်ပါ
သင်သည် ပထမမေးခွန်းကိုဖြေရန် အခက်အခဲရှိမည်မဟုတ်သော်လည်း ကျန်မေးခွန်းများကိုမူ ဖြေဆိုရန် တွန့်ဆုတ်နေပေမည်။ ချိန်းတွေ့ခြင်းဟူသည် အမှန်စင်စစ်အဘယ်နည်း။ ဤဆွေးနွေးခန်းတွင် တစ်ဦးကိုတစ်ဦး ချစ်ကြိုက်နေကြောင်းပြသော မည်သည့်လူမှုပေါင်းသင်းဆက်ဆံရေးကိုမဆို ချိန်းတွေ့ ခြင်းဟူ၍ အဓိပ္ပာယ်ဖွင့်ပါမည်။ အုပ်စုထဲတွင်ဖြစ်စေ၊ နှစ်ဦးတည်းဖြစ်စေ၊ ဖုန်းဖြင့်ဖြစ်စေ၊ လူကိုယ်တိုင်ဖြစ်စေ၊ လူရှေ့တွင်ဖြစ်စေ၊ လူကွယ်ရာတွင်ဖြစ်စေ သင်နှင့် လိင်ခြားသူမိတ်ဆွေတစ်ဦးတို့သည် တစ်ဦးနှင့်တစ်ဦး မေတ္တာမျှနေပါက ယင်းသည် ချိန်းတွေ့ခြင်းဖြစ်သည်။
သို့သော် သင်သည် ချိန်းတွေ့ရန်အသင့်ဖြစ်ပြီလော။ မေးခွန်းသုံးခုကို သုံးသပ်ခြင်းက ယင်းကိုသိရှိရန် အကူအညီဖြစ်စေမည်။
သင်၏ရည်ရွယ်ချက်များကား အဘယ်နည်း
ယဉ်ကျေးမှုများစွာတွင် ချိန်းတွေ့ ခြင်းကို လူနှစ်ဦးအား ပို၍ရင်းနှီးကျွမ်းဝင်လာစေသည့်နည်းအဖြစ် လက်ခံယူမှတ်ကြ၏။ သို့သော် ချိန်းတွေ့ခြင်း၏ တော်မှန်သောရည်ရွယ်ချက်မှာ ငယ်ရွယ်သည့်အမျိုးသားတစ်ဦးနှင့် အမျိုးသမီးတစ်ဦး သင့်လျော်သောအိမ်ထောင်ဖက်ဖြစ်မဖြစ်သိရှိနိုင်ရန် လေ့လာအကဲဖြတ်ခြင်းဖြစ်သင့်သည်။ အဘယ်ကြောင့်နည်း။
လိင်စိတ်၊ အချစ်စိတ်ပြင်းထန်ချိန်ကိုဖော်ပြရန် သမ္မာကျမ်းစာက “လူငယ့်အပွင့်လန်းဆုံးအရွယ်” ဟူသောစကားရပ်ကို အသုံးပြုသည်။ (၁ ကောရိန္သု ၇:၃၆၊ ကဘ) သင်သည် “လူငယ့်အပွင့်လန်းဆုံးအရွယ်” ရောက်နေချိန်တွင် လိင်ခြားသူတစ်ဦးနှင့် ရင်းနှီးစွာပေါင်းသင်းနေခြင်းက ထိုဆန္ဒများကို ပို၍ပြင်းထန်စေနိုင်ကာ “လူသည် မျိုးစေ့ကြဲသည်အတိုင်း အသီးအနှံကိုရိတ်ရလိမ့်မည်” ဟူသော ဂလာတိ ၆:၇ ပါပညာစကားကို နာကြည်းဖွယ်အတွေ့အကြုံမှ သင်ယူသိရှိစေနိုင်သည်။
သင်၏ရွယ်တူချင်းအချို့သည် အိမ်ထောင်ပြုရန် ရည်ရွယ်ချက်မရှိဘဲ ချိန်းတွေ့ ကြပေမည်။ သူတို့သည် လိင်ခြားသူမိတ်ဆွေအား လူအများရှေ့ မိမိတို့သိက္ခာကို မြှင့်တင်ပေးသည့် အောင်မြင်မှု၏သင်္ကေတ သို့မဟုတ် အဆင်တန်ဆာအဖြစ် ယူမှတ်ကြပေမည်။ ဤအကြောင်းရင်းအတွက် အခြားသူတစ်ဦးနှင့် ချစ်တမ်းကစားခြင်းသည် ရက်စက်ရာကျ၏။ ထိုသို့သောဆက်ဆံရေးသည် ကြာရှည်ခံလေ့မရှိခြင်းမှာ အံ့ဩစရာမဟုတ်ချေ။ “ချိန်းတွေ့ကြတဲ့ လူငယ်များစွာဟာ တစ်ပတ်နှစ်ပတ်အကြာမှာ အဆက်ဖြတ်လိုက်ကြတယ်။ သူတို့ဟာ ချိန်းတွေ့တာကို တဒင်္ဂသာခံတဲ့အရာအဖြစ် ရှုမြင်ကြတယ်၊ အိမ်ထောင်ပြုဖို့အတွက်မဟုတ်ဘဲ ကွာရှင်းဖို့အတွက် ပြင်ဆင်တဲ့သဘောမျိုးနဲ့ ချိန်းတွေ့ကြတယ်” ဟု ဟယ်သာအမည်ရှိ လူငယ်တစ်ဦးကဆိုသည်။
အပန်းဖြေသည့်သဘော သို့မဟုတ် ပေါ့ပေါ့တန်တန်သဘောဖြင့် ချိန်းတွေ့ခြင်း—အပျော်သဘော သို့မဟုတ် မိမိတွင်ရည်းစားရှိသည်ဟု ပြောဆိုနိုင်ရုံအတွက် တွဲခြင်း—သည် စိတ်နာစရာများ အလွယ်တကူဖြစ်စေနိုင်၏။ အသက် ၁၈ နှစ်အရွယ်တွင် မိန်းကလေးတစ်ဦးနှင့် သဘောရိုးဖြင့် ခင်မင်ရင်းနှီးစွာပေါင်းသင်းခဲ့သော အဲရစ်ခ်အကြောင်းကို သုံးသပ်ကြည့်ပါ။ ထို့နောက် မိန်းကလေးသည် သာမန်ရင်းနှီးမှုထက်ပိုလာကြောင်း အဲရစ်ခ်သတိပြုမိသည်။ “ပြဿနာပဲ! ကျွန်တော့်ကို သူ စွဲစွဲလမ်းလမ်းဖြစ်လာလို့ အံ့ဩမိတယ်။ ကျွန်တော်တို့က ရိုးရိုးသူငယ်ချင်းတွေပဲလို့ ထင်နေတာ” ဟုအဲရစ်ခ်ကဆိုသည်။
အမှန်ဆိုလျှင် တော်လျော်သောကြီးကြပ်မှုရှိသည့် အုပ်စုအခြေအနေတွင် လိင်ခြားသူများနှင့် ရောနှောပေါင်းသင်းခြင်းသည် မမှားချေ။ သို့သော် ချိန်းတွေ့ ခြင်းနှင့်ပတ်သက်လျှင်မူ လူငယ့်အပွင့်လန်းဆုံးအရွယ်ကို ကျော်လွန်ကာ အိမ်ထောင်ရေးကို အလေးထားစဉ်စားရန် အသင့်ဖြစ်ချိန်အထိ စောင့်ဆိုင်းခြင်းက အကောင်းဆုံးဖြစ်သည်။ ချယ်ဆီးအမည်ရှိ လူငယ်တစ်ဦး ထိုအတိုင်းသဘောပေါက်ခဲ့သည်။ “ချိန်းတွေ့တာဟာ ပျော်စရာလို့ တစ်ခါတလေ စဉ်းစားမိပေမဲ့ အဲဒါကို တစ်ဦးက အလေးအနက်ထားပြီး နောက်တစ်ဦးက ပေါ့ပေါ့တန်တန်သဘောထားတဲ့အခါ ပျော်စရာမဟုတ်တော့ဘူး” ဟု ချယ်ဆီးက ဝန်ခံသည်။
သင် အသက်မည်မျှရှိပြီနည်း
▪ လူငယ်တစ်ဦးသည် အသက်မည်မျှတွင် စတင်ချိန်းတွေ့သင့်သည်ဟု သင်ထင်သနည်း။ —
▪ ယခု အဆိုပါမေးခွန်းကို သင်၏ မိဘတစ်ဦး သို့မဟုတ် နှစ်ဦးစလုံးကို မေးပါ။ သူတို့၏အဖြေကို ရေးချပါ။ —
သင်ဖြေလိုက်သောအသက်က သင့်မိဘဖြေသောအသက်ထက် ပိုငယ်ပေမည်။ သို့မဟုတ် ထိုသို့ဖြစ်ချင်မှဖြစ်မည်! ကိုယ့်ကိုယ်ကို ကောင်းစွာသိနိုင်သော အသက်အရွယ်ရောက်သည်အထိ ချိန်းတွေ့ခြင်းကို ပညာရှိစွာရွှေ့ဆိုင်းထားသော လူငယ်များစွာတွင် သင်လည်း ပါဝင်ပေမည်။ ဆန်ဒရာအမည်ရှိ ခရစ်ယာန်လူငယ်တစ်ဦးသည် အိမ်ထောင်ပြုရန် အသက်ပြည့်နေပြီဖြစ်သော်လည်း ထိုသို့ပြုရန် ဆုံးဖြတ်ခဲ့သည်။ “ချိန်းတွေ့နေစဉ်ကာလမှာ တစ်ဖက်သားကို ကိုယ့်အကြောင်း ကောင်းကောင်းသိစေချင်မယ်။ ကိုယ့်အကြောင်းကို ကိုယ်တောင် မသိဘူးဆိုရင် တခြားသူက ဘယ်လိုလုပ်ပြီးသိနိုင်မှာလဲ” ဟုဆန်ဒရာက ဆင်ခြင်သုံးသပ်သည်။
အသက် ၁၇ နှစ်အရွယ်ရှိ ဒန်ယဲလ်သည် ထိုအတိုင်းခံစားရ၏။ သူက ဤသို့ဆိုသည်– “လွန်ခဲ့တဲ့နှစ်နှစ်ကို ပြန်ပြောင်းစဉ်းစားကြည့်တဲ့အခါ အဲဒီအချိန်မှာ အိမ်ထောင်ဖက်လောင်းတစ်ဦးဆီက ကိုယ်မျှော်လင့်ထားခဲ့တဲ့အရာနဲ့ အခုမျှော်လင့်တဲ့အရာ အရမ်းကွာခြားသွားပြီ။ ခုအချိန်မှာတောင် အဲလိုမျိုးဆုံးဖြတ်ချက်ချဖို့ ကိုယ့်ကိုယ်ကို စိတ်မချသေးဘူး။ နှစ်အတော်ကြာ တည်ငြိမ်ရင့်ကျက်လာပြီလို့ ယူဆရတဲ့အချိန်ကျမှ ချိန်းတွေ့ဖို့ ကျွန်မစဉ်းစားမယ်။”
သင် အိမ်ထောင်ပြုရန် အသင့်ဖြစ်ပြီလော
ချိန်းတွေ့ခြင်းသည် အိမ်ထောင်ပြုဖို့ တက်လှမ်းခြင်းဖြစ်သောကြောင့် သင်သည် ခင်ပွန်း သို့မဟုတ် ဇနီးသည်၊ ဖခင် သို့မဟုတ် မိခင်နှင့်ပါသက်ဆိုင်သော တာဝန်များကိုထမ်းဆောင်နိုင်မနိုင် မိမိကိုယ်ကိုမေးသင့်သည်။ အိမ်ထောင်ပြုဖို့ အသင့်ဖြစ်မဖြစ် သင်မည်သို့သိရှိနိုင်သနည်း။ အောက်ပါတို့ကို သုံးသပ်ပါ။
▪ ဆက်ဆံရေး သင်သည် မိဘများနှင့် မွေးချင်းများအပေါ် မည်သို့ပြုမူဆက်ဆံသနည်း။ သူတို့နှင့်ဆက်ဆံသည့်အခါ ချုပ်တည်းမှုမရှိဘဲ သင်၏သဘောထားကိုဖော်ပြရန် ရုန့်ရင်းကြမ်းတမ်း၊ ထေ့ငေါ့သောအသုံးအနှုန်းကို သုံးလေ့သုံးထရှိသလော။ ဤကိစ္စတွင် သင်နှင့်ပတ်သက်၍ သူတို့မည်သို့ပြောမည်နည်း။ မိသားစုဝင်များနှင့် သင်၏ဆက်ဆံပုံက အိမ်ထောင်ဖက်အပေါ် သင့်ပြုမူဆက်ဆံပုံကိုဖော်ပြသည်။—ဧဖက် ၄:၃၁၊ ၃၂။
▪ ငွေရေးကြေးရေး ငွေကို သင်မည်မျှ ကောင်းစွာသုံးစွဲတတ်သနည်း။ သင် အမြဲ အကြွေးတင်နေသလော။ သင် အလုပ်တစ်ခုကို အတည်တကျလုပ်နိုင်သလော။ မလုပ်နိုင်လျှင် အဘယ်ကြောင့်နည်း။ အလုပ်ကြောင့်လော။ အလုပ်ရှင်ကြောင့်လော။ သို့မဟုတ် သင့်တွင်ရှိနေသည့် ဉာဉ်ဆိုးအချို့ကြောင့်လော။ သင်၏ကိုယ်ပိုင်ငွေကြေးကို ချင့်ချင့်ချိန်ချိန်မသုံးစွဲတတ်လျှင် မိသားစုတစ်ခုကို မည်သို့ ကြည့်ရှုပြုစုနိုင်မည်နည်း။—၁ တိမောသေ ၅:၈။
▪ ဝိညာဉ်ရေး သင်သည် ယေဟောဝါသက်သေတစ်ဦးဖြစ်မည်ဆိုလျှင် သင်၏ဝိညာဉ်ရေးအရည်အသွေးများကား အဘယ်နည်း။ သမ္မာကျမ်းစာကိုဖတ်ရှုရန်၊ ခရစ်ယာန်ဓမ္မအမှုတွင်နှင့် ခရစ်ယာန်အစည်းအဝေးများတွင် ပါဝင်ရန် သင် အစပြုလုပ်ဆောင်သလော။ သင် ဝိညာဉ်ရေးမကောင်းလျှင် အိမ်ထောင်ဖက်အား ဝိညာဉ်ရေးကောင်းရန် မည်သို့အားပေးနိုင်မည်နည်း။—၂ ကောရိန္သု ၁၃:၅။
ယင်းတို့မှာ ချိန်းတွေ့ရန်နှင့် အိမ်ထောင်ပြုရန် သင် စဉ်းစားနေမည်ဆိုလျှင် သုံးသပ်ရမည့်အရာအချို့သာဖြစ်၏။ ထိုအချိန်အတောအတွင်း သင်သည် သင့်လျော်သောအုပ်စုအခြေအနေများတွင် လိင်ခြားသူများနှင့်အတူ ပေါင်းသင်းဆက်ဆံနိုင်ပေမည်။ နောင်တစ်ချိန်တွင် ချိန်းတွေ့ရန် သင်ရွေးချယ်လျှင် သင့်ကိုယ်သင်သာမက ရာသက်ပန်အိမ်ထောင်ဖက်တစ်ဦးတွင် သင် ရှိစေလိုသည့်အရာတို့ကိုပါ ကောင်းစွာသိရှိလာပါလိမ့်မည်။
ယေဟောဝါသက်သေများထုတ်ဝေသော မိသားစုပျော်ရွှင်မှု၏ လျှို့ဝှက်ချက် စာအုပ်၏စာမျက်နှာ ၁၃-၂၆ တွင် ထပ်ဆင့်အချက်အလက်များကို တွေ့နိုင်ပါသည်။
“လူငယ်များအမေး . . .” အခန်းဆက်ဆောင်းပါးများကို www.watchtower.org/ype ဝက်ဘ်ဆိုက်တွင် တွေ့နိုင်ပါသည်။
ချင့်တွေးစရာ
▪ သင့်လျော်သော မည်သည့်အခြေအနေများတွင် လိင်ခြားသူများနှင့် ရောနှောပေါင်းသင်းနိုင်သနည်း။
▪ သင့်လျော်သည့် အိမ်ထောင်ဖက်တစ်ဦးဖြစ်ရန် သင် အလိုအပ်ဆုံးအရည်အသွေးကား အဘယ်နည်း။
[စာမျက်နှာ ၂၀ ပါ လေးထောင့်ကွက်/ရုပ်ပုံများ]
သင့်ရွယ်တူချင်းအချို့ပြောဆိုသည့်အရာ
“ချိန်းတွေ့တဲ့ အတွဲတွေကိုပဲမဟုတ်ဘူး၊ အိမ်ထောင်သည်တွေကိုတောင် ကျွန်တော် တစ်ခါတလေ မနာလိုဖြစ်မိတယ်။ ဒါပေမဲ့ ချိန်းတွေ့တာဟာ ပျော်စရာအတွက်ပဲမဟုတ်ဘူး။ အဲဒီအတွက်သာဖြစ်မယ်ဆိုရင် တစ်ဦးတစ်ယောက်ရဲ့ နှလုံးသားကို ကစားနေရာကျမယ်။ ချိန်းတွေ့တယ်ဆိုတာ ကိုယ်လက်ထပ်ချင်တဲ့လူစားမျိုး အမှန်တကယ်ဖြစ်မဖြစ် သိဖို့ဖြစ်တယ်လို့ ကျွန်တော်ယူဆတယ်။”—ဘလိန်း၊ ၁၇ နှစ်။
“ကိုယ်တကယ်နှစ်သက်သူနဲ့ ချိန်းတွေ့ဖို့ ‘အစမ်း’ သဘောနဲ့ ယောက်ျားလေးတွေကို မချိန်းတွေ့သင့်ဘူးလို့ ကျွန်မထင်တယ်။ အဲလိုသာလုပ်ရင် အသည်းကွဲရုံသာရှိမယ်။”—ချယ်ဆီး၊ ၁၇ နှစ်။
“အိမ်ထောင်ပြုနိုင်တဲ့ အသက်အရွယ်ရောက်မှသာ စပြီးချိန်းတွေ့သင့်တယ်လို့ ကျွန်မထင်တယ်။ အဲလိုမဟုတ်ဘူးဆိုရင် ကျောင်းတက်နေရင်း အလုပ်လုပ်ဖို့ရည်ရွယ်ချက်မရှိဘဲ အချိန်ပြည့်အလုပ်တစ်ခုအတွက် လူတွေ့မေးမြန်းခံဖို့ သွားတာနဲ့တူမယ်။”—ဆန်ဒရာ၊ ၂၁ နှစ်။
[စာမျက်နှာ ၂၂ ပါ လေးထောင့်ကွက်]
မိဘများအတွက် မှတ်သားစရာ
သင်၏သားသမီးများသည် တစ်နေ့နေ့တစ်ချိန်ချိန်တွင် ချိန်းတွေ့ကြမည်မှာ သေချာသည်။ “ကျွန်တော်တောင် ဘာမှလုပ်ဖို့မလိုဘူး။ မိန်းကလေးတွေက ချိန်းတွေ့ဖို့တောင်းဆိုလို့ ‘အခု ကျွန်တော်ဘာလုပ်ရမလဲလို့’ စဉ်းစားနေရတယ်။ သူတို့ထဲကတချို့က အရမ်းလှတော့ ငြင်းဖို့အခက်သား” ဟု ဖိလစ်ကပြောပြသည်။
မိဘများအနေနှင့် အကောင်းဆုံးလုပ်နိုင်သောအရာမှာ ချိန်းတွေ့ခြင်းအကြောင်းကို သင်၏ဆယ်ကျော်သက်ကလေးနှင့် ဆွေးနွေးရန်ဖြစ်သည်။ ဆွေးနွေးရာတွင် ဤဆောင်းပါးကို အခြေခံအဖြစ် အသုံးပြုပါ။ ကျောင်းတွင်သာမက ခရစ်ယာန်အသင်းတော်အတွင်း၌ပင် ရင်ဆိုင်နေရသော စိန်ခေါ်ချက်များနှင့်ပတ်သက်၍ သင်၏သား သို့မဟုတ် သမီး မည်သို့ခံစားရကြောင်း သိအောင်လုပ်ပါ။ တစ်ခါတစ်ရံ ထိုသို့သောဆွေးနွေးမှုများကို ‘အိမ်၌ ထိုင်နေချိန်၊ ခရီးသွားနေချိန်’ စသော လွတ်လွတ်လပ်လပ်ရှိချိန်များတွင် ပြုလုပ်နိုင်သည်။ (တရားဟောရာ ၆:၆၊ ၇) မည်သည့်အခြေအနေပင်ဖြစ်ပါစေ ‘နားကြားခြင်းငှာလျင်မြန်ပြီး စကားပြောခြင်းငှာနှေး’ ရန် သတိရပါ။—ယာကုပ် ၁:၁၉။
သင်၏သား သို့မဟုတ် သမီးသည် လိင်ခြားသူတစ်ဦးဦးကို စိတ်ဝင်စားနေလျှင် မထိတ်လန့်ပါနှင့်။ “ကျွန်မမှာ ရည်းစားရှိတယ်ဆိုတာ အဖေလည်းသိသွားရော အရမ်းစိတ်ဆိုးတော့တာပဲ။ အိမ်ထောင်ပြုဖို့ အသင့်ဖြစ်မဖြစ်ဆိုတာနဲ့ပတ်သက်တဲ့ မေးခွန်းတွေတသီကြီးမေးပြီး ကျွန်မကို လန့်ဖျပ်သွားအောင်လုပ်တယ်။ အဲဒီလိုအချိန်မှာ အသက်ငယ်သေးတော့ ကောင်လေးနဲ့ဆက်တွဲချင်စိတ်၊ မိဘတွေပြောတာမှားနေတယ်လို့ သက်သေပြချင်စိတ် ပေါ်လာနိုင်တယ်” ဟုဆယ်ကျော်သက် မိန်းကလေးတစ်ဦးက ပြောပြသည်။
ချိန်းတွေ့ခြင်းဟူသည် ဆွေးနွေးရမည့်ကိစ္စမဟုတ်ဟု သင်၏ဆယ်ကျော်သက်ကလေး သိထားမည်ဆိုလျှင် ပိုဆိုးလာနိုင်သည်။ တိတ်တိတ်ပုန်းချိန်းတွေ့ရန် သူ့ကို တွန်းပို့ပေးရာရောက်ပေမည်။ “မိဘတွေက တစ်ဆိတ်ကိုတစ်အိတ်လုပ်တဲ့အခါ လူငယ်တွေက ပိုလို့တောင် တိတ်တိတ်ပုန်း ချိန်းတွေ့ချင်စိတ်ပေါ်လာတယ်။ ရပ်တန်းကရပ်ကြမှာမဟုတ်ဘူး။ ခိုးကြောင်ခိုးဝှက် ချိန်းတွေ့နေကြမှာပဲ” ဟု မိန်းကလေးတစ်ဦးကဆိုသည်။
ပွင့်ပွင့်လင်းလင်း ပြောဆိုဆွေးနွေးခြင်းဖြင့် အကျိုးရလဒ်ကောင်းများရရှိပေမည်။ အသက် ၂၀ အရွယ်ရှိ အမျိုးသမီးငယ်တစ်ဦးက ဤသို့ဆို၏– “ကျွန်မရဲ့မိဘတွေဟာ ချိန်းတွေ့တဲ့ကိစ္စနဲ့ပတ်သက်ပြီး ကျွန်မကို အမြဲ ပွင့်ပွင့်လင်းလင်းပြောဆိုတယ်။ ကျွန်မ စိတ်ဝင်စားနေတဲ့သူကိုသိဖို့ သူတို့အတွက်အရေးကြီးတယ်။ အဲဒါကောင်းတယ်လို့ ကျွန်မထင်တယ်! ကျွန်မရဲ့အဖေက လူချင်းတွေ့ပြီး သူနဲ့စကားပြောမယ်။ စိုးရိမ်စရာတစ်ခုခုရှိရင် ကျွန်မမိဘတွေက ကျွန်မကို ပြောပြတယ်။ အများအားဖြင့် ချိန်းတွေ့တဲ့အဆင့်မရောက်ခင်မှာပဲ ကျွန်မ စိတ်မဝင်စားတော့ဘူးလို့ ဆုံးဖြတ်လေ့ရှိတယ်။”
[စာမျက်နှာ ၂၁ ပါ ရုပ်ပုံ]
သင့်လျော်သောအုပ်စုအခြေအနေများတွင် လိင်ခြားသူများနှင့်ပေါင်းသင်းခြင်းသည် လျောက်ပတ်ပြီး အကျိုးရှိ