ဖျားနာမှု မရှိတော့ချိန်ဝယ်!
ဖျားနာမှု မရှိတော့ချိန်ဝယ်!
လူသေပြီးနောက် ကောင်းကင်ဘုံသို့ရောက်သောအခါ နာကျင်မှုနှင့် ဖျားနာမှုမှ သက်သာရာရမည်ဟု လူအများ ယုံကြည်ကြသည်။ သို့သော် ရေပန်းစားနေသည့် အဆိုပါယုံကြည်ချက်နှင့်ဆန့်ကျင်လျက် လူသားတို့အား သမ္မာကျမ်းစာ အမှန်တကယ် ကမ်းလှမ်းထားသည့် မျှော်လင့်ချက်မှာ မြေကြီးပရဒိသုတွင် အသက်ရှင်ရန်ဖြစ်သည်။ (ဆာလံ ၃၇:၁၁; ၁၁၅:၁၆) ကတိပြုထားသည့် ဤအနာဂတ်တွင် ကျန်းမာရေးဒေါင်ဒေါင်မြည်ခြင်း၊ ပျော်ရွှင်ခြင်းနှင့် ထာဝစဉ်အသက်ရှင်ခြင်းတို့ပါဝင်သည်။
ကျွန်ုပ်တို့အဘယ်ကြောင့် ဖျားနာပြီး သေဆုံးကြရသနည်း။ ဖျားနာမှုကင်းမဲ့သည့်ကမ္ဘာ မည်သို့ဖြစ်ပေါ်လာမည်နည်း။ ထိုမေးခွန်းများကို သမ္မာကျမ်းစာက ဖြေဆိုပေးပါသည်။
▪ ဖျားနာရသည့်အကြောင်းရင်းအမှန် ကျွန်ုပ်တို့၏ ကနဦးမိဘများဖြစ်ကြသော အာဒံနှင့်ဧဝတို့သည် ကျန်းမာသောကိုယ်ခန္ဓာဖြင့် စုံလင်စွာ ဖန်ဆင်းခံခဲ့ရသည်။ (ကမ္ဘာဦး ၁:၃၁; တရားဟောရာ ၃၂:၄) သူတို့သည် မြေကြီးပေါ် ထာဝစဉ်နေထိုင်သွားရန် ပုံစံပြုခံခဲ့ရ၏။ သူတို့သည် ဘုရားသခင်အား စိတ်လိုကိုယ်လျောက် ပုန်ကန်ခဲ့ကြသဖြင့် သူတို့၏ကိုယ်ခန္ဓာမှာ ရောဂါကူးစက်မှုကို ခံနိုင်စွမ်းမရှိကြတော့ချေ။ (ကမ္ဘာဦး ၃:၁၇-၁၉) သူတို့သည် ဘုရားသခင်၏အခွင့်အာဏာကို ငြင်းဆန်ကြခြင်းဖြင့် သူတို့၏စုံလင်သောအသက်ပင်ရင်းဖြစ်သည့် ဖန်ဆင်းရှင်နှင့် အဆက်ဖြတ်လိုက်ကြသည်။ သို့နှင့် သူတို့သည် မစုံလင်သူများဖြစ်လာကြရာ ဘုရားသခင်သတိပေးခဲ့သည့်အတိုင်းပင် ဖျားနာပြီး သေဆုံးကြရသည်။—ကမ္ဘာဦး ၂:၁၆၊ ၁၇; ၅:၅။
အာဒံနှင့်ဧဝတို့ ပုန်ကန်ပြီးနောက် ၎င်းတို့၏သားသမီးများကို မစုံလင်မှုသာ လက်ဆင့်ကမ်းပေးနိုင်တော့သည်။ (ရောမ ၅:၁၂) ရှေ့ ဆောင်းပါးများတွင် ဖော်ပြခဲ့သည့်အတိုင်း ဖျားနာပြီး သေဆုံးစေသည့် အကြောင်းရင်းများတွင် အမွေရလာသည့် ချွတ်ယွင်းချက်များလည်း ပါဝင်ကြောင်း မျက်မှောက်ခေတ် သိပ္ပံပညာရှင်များက အသိအမှတ်ပြုကြသည်။ သိပ္ပံပညာရှင်အုပ်စုတစ်စုသည် ကျယ်ကျယ်ပြန့်ပြန့် သုတေသနပြုပြီးနောက် မကြာသေးမီက ဤသို့ကောက်ချက်ချခဲ့ကြ၏– “အသက်စတင်သည်နှင့်တစ်ပြိုင်နက် ကိုယ်ခန္ဓာ၏ပျက်စီးခြင်းဖြစ်စဉ် အစပျိုးလာခြင်းသည် ရှောင်လွှဲ၍မရနိုင်သော ဇီဝဗေဒဆိုင်ရာ အမှန်တရားတစ်ခုဖြစ်သည်။”
▪ လူ့ကြိုးပမ်းမှုဖြင့်မဟုတ် သိပ္ပံပညာသည် ဖျားနာမှုကိုတိုက်ဖျက်ရာတွင် ထူးထူးခြားခြား အောင်မြင်လျက်ရှိ၏။ သို့သော် ရောဂါဖြစ်ရသည့်အကြောင်းရင်းသည် အလွန်တရာရှုပ်ထွေးသောကြောင့် သိပ္ပံပညာဖြင့် အပြည့်အဝမဖြေရှင်းနိုင်ကြောင်း သက်သေထူခဲ့ပြီ။ ဘုရားသခင်၏မှုတ်သွင်းခံ ဤစကားများနှင့် အကျွမ်းတဝင်ရှိသည့် ကျမ်းစာကျောင်းသားများအတွက်မူ ယင်းသည် အံ့ဩစရာမဟုတ်ချေ– “မင်းများမှစ၍ မကယ်တင်နိုင်သောလူသားကို မကိုးစားကြနှင့်။”—ဆာလံ ၁၄၆:၃။
သို့ရာတွင် သမ္မာကျမ်းစာဆိုသကဲ့သို့ပင် “လူမတတ်နိုင်သောအမှုကို ဘုရားသခင် တတ်နိုင်တော်မူသည်။” (လုကာ ၁၈:၂၇) ယေဟောဝါဘုရားသခင်သည် ဖျားနာရသည့်အကြောင်းရင်းကို ဖြေရှင်းပေးနိုင်တော်မူ၏။ ကျွန်ုပ်တို့၏အနာရောဂါမှန်သမျှကို ကိုယ်တော်ကုသပေးမည်ဟု သမ္မာကျမ်းစာကဆိုသည်။ (ဆာလံ ၁၀၃:၃) ကိုယ်တော်၏မှုတ်သွင်းခံသမ္မာကျမ်းစာက ဤသို့ကတိပြု၏– “ဘုရားသခင်၏တဲတော်သည် လူတို့တွင်ရှိ၏။ လူတို့နှင့်အတူ ကျိန်းဝပ်တော်မူမည်။ သူတို့သည် ကိုယ်တော်၏လူဖြစ်ကြလိမ့်မည်။ ဘုရားသခင်သည် ကိုယ်တော်တိုင် သူတို့နှင့်အတူရှိနေ၍ သူတို့၏ဘုရားသခင် ဖြစ်တော်မူမည်။ ဘုရားသခင်သည် သူတို့၏မျက်စိ၌ မျက်ရည်ရှိသမျှတို့ကို သုတ်တော်မူမည်။ နောက်တစ်ဖန် သေဘေးမရှိရ။ စိတ်မသာညည်းတွားခြင်း၊ အော်ဟစ်ခြင်း၊ ပင်ပန်းခြင်းလည်းမရှိရ။ အကြောင်းမူကား ရှေးဖြစ်ဖူးသောအရာတို့သည် ရွေ့သွားကြပြီ။”—ဗျာ. ၂၁:၃၊ ၄။
▪ သင်လုပ်ဆောင်ရမည့်အရာ ဖျားနာမှုမရှိတော့မည့် လာလတ္တံ့သောကမ္ဘာတွင် အသက်ရှင်နေထိုင်ရန် ကျွန်ုပ်တို့အဘယ်အရာလုပ်ဆောင်ရမည်ကို ယေရှုခရစ် ဤသို့အတိအလင်းရှင်းပြခဲ့သည်– “ထာဝရအသက်ဟူမူကား၊ မှန်သောဘုရားသခင် တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း သိကျွမ်းခြင်းတည်း။”—ယောဟန် ၁၇:၃။
ဘုရားသခင်နှင့်ဆိုင်သောအသိပညာနှင့် သားတော်ယေရှု၏သွန်သင်ချက်တို့ကို သမ္မာကျမ်းစာတွင် တွေ့ရှိရသည်။ ထိုသို့သောအသိပညာတွင် သင့်ဘဝကို ယခုပင် တိုးတက်စေနိုင်သည့် လက်တွေ့ကျအကြံဉာဏ်များ ပါဝင်၏။ သို့သော် ထိုထက်မကပေ။ လာလတ္တံ့သောကမ္ဘာတွင် နာကျင်မှုရှိတော့မည်မဟုတ်ဟု မိမိစကားကိုနားထောင်သော ဝတ်ပြုသူများအား ဘုရားသခင် ကတိပြုတော်မူ၏။ ဘုရားသခင်သည် “မြို့သားကလည်း ‘ငါနာသည်’ ဟုမဆိုရ” မည့်အချိန်ကို ကမ်းလှမ်းထားတော်မူ၏။—ဟေရှာယ ၃၃:၂၄။
[စာမျက်နှာ ၁၁ ပါ လေးထောင့်ကွက်/ရုပ်ပုံ]
ကျန်းမာရေးနှင့်ပတ်သက်သည့် မျှတသောအမြင်
အသက်ကို တန်ဖိုးထားရန် သမ္မာကျမ်းစာက တိုက်တွန်းသည်။ ယေဟောဝါသက်သေများသည် မိမိတို့၏ကျန်းမာရေးကိုဂရုစိုက်ခြင်းဖြင့် အသက်ကိုတန်ဖိုးထားကြောင်း ပြသကြသည်။ မူးယစ်ဆေးဝါးအလွဲသုံးမှုနှင့် ဆေးရွက်ကြီးသုံးစွဲမှုကဲ့သို့သော ဘေးဖြစ်စေသည့် အမူအကျင့်များကို သူတို့ရှောင်ကြဉ်ကြသည်။ တော်ရုံသင့်ရုံ စားသောက်သည့် အလေ့အထများရှိကြရန် မိမိအားဝတ်ပြုသူများထံမှ ဘုရားသခင်မျှော်လင့်တော်မူ၏။ (သု. ၂၃:၂၀; တိတု ၂:၂၊ ၃) ထိုသို့သော လက်တွေ့ကျသည့် နည်းလမ်းများအပြင် လုံလောက်စွာအနားယူပြီး ကိုယ်လက်လှုပ်ရှားကစားခြင်းက ရောဂါဝေဒနာများဖြစ်ပွားခြင်းကို နှောင့်နှေးစေနိုင် သို့မဟုတ် တားဆီးပေးနိုင်ပါသည်။ ရောဂါဝေဒနာခံစားရသူတို့သည် ယုံကြည်စိတ်ချရသည့် ကျန်းမာရေးပါရဂူများ၏အကူအညီ လိုအပ်ပေမည်။
သမ္မာကျမ်းစာက အကျိုးသင့်အကြောင်းသင့်ရှိဖို့နှင့် သတိရှိဖို့ အားပေးသည်။ (တိတု ၂:၁၂၊ ကဘ; ဖိလိပ္ပိ ၄:၅၊ ကဘ) ယနေ့ လူအတော်များများသည် ချင့်ချိန်နိုင်စွမ်းကင်းမဲ့ကာ ၎င်းတို့၏ဝိညာဉ်ရေးထိခိုက်သည်အထိပင် ကုသနည်းများကို သဲသဲမဲမဲရှာဖွေလာကြ၏။ အချို့သူတို့သည် ဘေးဖြစ်စေနိုင်သော သံသယဖြစ်ဖွယ် ကုထုံးများကိုပင် လက်ခံလာကြသည်။ အခြားသူတို့မူ ထိရောက်မှုမရှိသည့်အပြင် အန္တရာယ်ပင်ဖြစ်စေနိုင်သော ကုသမှုများနှင့် ဆေးဝါးများအတွက် ငွေနှင့်အချိန်ကို အလဟဿဖြစ်စေကြ၏။
အမှန်ဆိုရလျှင် စုံလင်သောကျန်းမာရေးကိုမရရှိနိုင်သေးပေ။ ဖျားနာမှုမရှိတော့မည့်အနာဂတ်ကို သင်စောင့်စားနေစဉ် သမ္မာကျမ်းစာတွင် တွေ့ ရှိရသည့် ဉာဏ်ပညာနှင့် အကျိုးသင့်အကြောင်းသင့်ရှိမှုတို့က သင့်အား ကျန်းမာရေးလိုက်စားရာတွင် မျှတမှုရှိရန် ကူညီပေးနိုင်ပါသည်။