လိင်တူမေထုန် ဒါကို ငါဘယ်လိုရှောင်ရမလဲ
လူငယ်များအမေး . . .
လိင်တူမေထုန် ဒါကို ငါဘယ်လိုရှောင်ရမလဲ
“ကျွန်မအသက် ၁၂ နှစ်တုန်းက ကျောင်းကမိန်းကလေးတစ်ယောက်ကို စွဲလမ်းခဲ့တယ်။ ကျွန်မဟာ လိင်တူဆက်ဆံတဲ့အမျိုးသမီးတစ်ဦး ဖြစ်နေမလားဆိုတာ ဝေခွဲမရဖြစ်ပြီး စိုးရိမ်လာတယ်။”—အန်နာ။ *
“ကျွန်တော်ဆယ်ကျော်သက်တုန်းက တခြားယောက်ျားလေးတွေအပေါ် စွဲလမ်းတာကို အပြင်းအထန်တိုက်လှန်ခဲ့ရတယ်။ အဲဒီအတွေးတွေဟာ ပုံမှန်မဟုတ်ဘူးဆိုတာ စိတ်ထဲကသိနေတယ်။”—အိုလက်ဖ်။
“ကျွန်မရဲ့မိန်းကလေးသူငယ်ချင်းနဲ့ ကျွန်မ တစ်ခါနှစ်ခါနမ်းဖူးတယ်။ ယောက်ျားလေးတွေကိုလည်း သဘောကျနေတုန်းပဲဖြစ်လို့ ကျွန်မဟာ နှစ်ဖက်ချွန်ဖြစ်နေမလားဆိုတာ သိချင်ခဲ့တယ်။”—စာရာ။
ယနေ့ ဘာကိုမဆိုလက်သင့်ခံနိုင်သော သဘောထားကြီးမှုများက လိင်တူမေထုန်ကို စမ်းကြည့်ရန် လူငယ်များစွာအား လှုံ့ဆော်ပေးခဲ့ပြီ။ “ကျွန်မတို့ကျောင်းက မိန်းကလေးအများစုဟာ လိင်တူမေထုန်သမား ဒါမှမဟုတ် နှစ်ဖက်ချွန်ဖြစ်တယ်လို့ ဆိုကြတယ်” ဟုအသက် ၁၅ နှစ်ရှိသည့် ဗက်ကီကဆို၏။ အသက် ၁၈ နှစ်အရွယ် ခရစ္စတာလည်း သူ၏ကျောင်းတွင် အလားတူအခြေအနေမျိုးနှင့် ကြုံရသည်။ “အတန်းဖော်မိန်းကလေးနှစ်ယောက် ကျွန်မကို လိင်ဆက်ဆံဖို့ မြှူဆွယ်တယ်။ တစ်ယောက်က ကျွန်မကို စာတိုလေးတစ်စောင်ရေးပြီး မိန်းကလေးတစ်ယောက်နဲ့လိင်ဆက်ဆံတာ ဘယ်လိုမျိုးလဲဆိုတာ သိချင်သလားလို့မေးတယ်။”
လိင်တူဆက်ဆံမှုများမှာ အလွန်ပေါ်ပေါ်ထင်ထင်ဖြစ်လာရာ ‘လိင်တူမေထုန်ဟာ တကယ်ဆိုးညစ်တဲ့လုပ်ရပ်လား၊ လိင်တူသူတစ်ယောက်ယောက်ကို ငါစွဲလမ်းနေရင်ကော၊ အဲဒါက ငါဟာ လိင်တူမေထုန်သမားလို့ ဆိုလိုသလား’ ဟုသင်သိလိုပေမည်။
လိင်တူမေထုန်ကို ဘုရားသခင် မည်သို့ရှုမြင်သနည်း
ယနေ့ များစွာသောသူတို့သာမက ခရစ်ယာန်ဓမ္မဆရာအချို့ပင်လျှင် လိင်တူမေထုန်ကိစ္စကို ခပ်ပေါ့ပေါ့သဘောထားကြသည်။ သို့သော် သမ္မာကျမ်းစာက ရှင်းလင်းစွာဖော်ပြထားသည်။ ယေဟောဝါဘုရားသခင်သည် ယောက်ျားနှင့် မိန်းမကိုဖန်ဆင်းကာ လင်မယားနှစ်ဦးသာ လိင်ဆန္ဒများကို ဖြည့်ဆည်းကြရန် ရည်ရွယ်ခဲ့သည်။ (ကမ္ဘာဦး ၁:၂၇၊ ၂၈; ၂:၂၄) ထို့ကြောင့် သမ္မာကျမ်းစာက လိင်တူမေထုန်ပြုခြင်းကို ပြစ်တင်ရှုတ်ချသည်မှာ အံ့ဩစရာမဟုတ်ချေ။—ရောမ ၁:၂၆၊ ၂၇။
များစွာသောသူတို့က သမ္မာကျမ်းစာသည် ခေတ်နောက်ကျသွားပြီဟု ဆိုကြပေမည်။ ဥပမာ၊ အသက် ၁၄ နှစ်အရွယ် မီဂန်က “သမ္မာကျမ်းစာမှာပါတဲ့အရာတချို့ဟာ အခုခေတ်မှာ အရေးမပါတော့ဘူး” ဟုဆို၏။ သို့သော် အချို့သူတို့ အဘယ်ကြောင့် ထိုသို့အလျင်စလို ပြောဆိုကြသနည်း။ များသောအားဖြင့် သမ္မာကျမ်းစာ၏ရှုထောင့်သည် သူတို့၏ရှုထောင့်နှင့် ကွဲလွဲနေသောကြောင့်ဖြစ်၏။ ဘုရားသခင့်စကားတော်က သူတို့ယုံကြည်လိုသောအရာနှင့်မတူ ခြားနားသည့်အရာကို သွန်သင်သောကြောင့် ယင်းကို သူတို့ငြင်းပယ်ကြသည်။ သို့သော် သမ္မာကျမ်းစာသည် ခေတ်နောက်ကျသွားပြီဟူသောရှုမြင်ချက်မှာ လွဲမှားကာ ထိုသို့ ဆင်ခြင်တုံတရားနှင့်မညီသောအတွေးအခေါ်ကို ချိုးနှိမ်ရန် ကျွန်ုပ်တို့ကို သမ္မာကျမ်းစာက တိုက်တွန်းသည်။ ယေဟောဝါဘုရားသခင်က ကျမ်းစာတွင်ပါသော ကိုယ်တော်၏မိန့်မှာချက်များသည် ကျွန်ုပ်တို့၏ကောင်းကျိုးအတွက်ဖြစ်သည်ကို သုံးသပ်ကြည့်ရန် တိုက်တွန်းထားသည်။ (ဟေရှာယ ၄၈:၁၇၊ ၁၈) ယင်းသည် အကျိုးသင့်အကြောင်းသင့်ရှိ၏။ ထို့ထက်ကား ကျွန်ုပ်တို့၏ လူ့သဘောသဘာဝကို ကျွန်ုပ်တို့၏ဖန်ဆင်းရှင်ထက် မည်သူပိုသိနိုင်မည်နည်း။
လူငယ်တစ်ဦးအနေနှင့် သင်သည် စိတ်လှုပ်ရှားမှုအမျိုးမျိုး ဖြစ်ပေါ်ခံစားနေရပေမည်။ လိင်တူသူတစ်ဦးကို သင်စွဲလမ်းနေလျှင်ကော။ ယင်းက သင်သည် လိင်တူမေထုန်သမားတစ်ဦးဖြစ်သည်ဟူသောသဘော အလိုအလျောက်သက်ရောက်သလော။ မသက်ရောက်ပါ။ သင်သည် လိင်စိတ်နှိုးကြွနေသည့် “လူငယ့်အပွင့်လန်းဆုံးအချိန်” တွင်ရောက်ရှိနေကြောင်း သတိရပါ။ (၁ ကောရိန္သု ၇:၃၆၊ ကဘ) သင်သည် လိင်တူသူတစ်ဦးအပေါ် အချိန်အတန်ကြာ အာရုံရောက်နေပေမည်။ သို့သော် ထိုသို့သောစွဲလမ်းမှုက သင်သည် လိင်တူမေထုန်သမားဖြစ်သည်ဟူသောသဘော မသက်ရောက်ချေ။ အမှန်ဆိုလျှင် ထိုသို့သောစိတ်ဝင်စားမှုများသည် တဖြည်းဖြည်းပျောက်သွားလေ့ရှိကြောင်း စာရင်းဇယားများက ဖော်ပြသည်။ သို့တိုင် ‘ဒီဆန္ဒတွေဟာ ဘယ်လိုစတင်ဖြစ်ပေါ်လာသလဲ’ ဟုသင်သိလိုပေမည်။
အချို့က လိင်တူဆက်ဆံခြင်းသည် မျိုးရိုးဗီဇကြောင့်ဟုဆို၏။ အခြားသူတို့ကမူ ယင်းသည် သိမြင်တတ်သိလာသော အမူအကျင့်တစ်ခုဟု ဆိုကြ၏။ ဤဆောင်းပါး၏ရည်ရွယ်ချက်မှာ “သဘာဝဗီဇနှင့် ပုံသွင်းခံရခြင်း” အကြောင်းကို ဆွေးနွေးရန်မဟုတ်ချေ။ အမှန်ဆိုလျှင် လိင်တူမေထုန်ပြုခြင်းသည် အကြောင်းရင်းတစ်ခုကြောင့်သာဖြစ်ရသည်ဟု ယူမှတ်မည်ဆိုလျှင် ရိုးစင်းလွန်းရာရောက်ပေမည်။ အခြားအမူအကျင့်များနည်းတူ လိင်တူဆက်ဆံခြင်းသည် ထိုထက် ပိုရှုပ်ထွေးပုံရသည်။
မည်သည့်အကြောင်းကြောင့်ပင်ဖြစ်ပါစေ လိင်တူဆက်ဆံမှုများကို သမ္မာကျမ်းစာက ပြစ်တင်ရှုတ်ချကြောင်း သိနားလည်ရန် အရေးကြီး၏။ ထို့ကြောင့် လိင်တူသူချင်းစွဲလမ်းမှုများကို တိုက်လှန်နေရသူသည် ထိုဆန္ဒများအတိုင်း မပြုလုပ်မိရန် ကြိုးစားလျှင် အောင်မြင်နိုင်ကြောင်း ဖော်ပြထားသည်။ ဥပမာအနေနှင့် လူတစ်ဦးသည် ‘ဒေါသပြင်းထန်သူ’ ဖြစ်ပေမည်။ (သု. ၂၉:၂၂) ယခင်က သူသည် ဒေါသကို မချုပ်တည်းသူဖြစ်ပေမည်။ သို့သော် သမ္မာကျမ်းစာကို လေ့လာပြီးနောက် ချုပ်တည်းဖို့လိုကြောင်း သိရှိလာသည်။ ယင်းကြောင့် သူသည် မည်သည့်အခါမျှ ဒေါသထွက်မည်မဟုတ်တော့ဟု ဆိုလိုသလော။ မဆိုလိုပေ။ သို့သော် အမျက်ဒေါသ မချုပ်တည်းခြင်းနှင့်ပတ်သက်၍ သမ္မာကျမ်းစာပြောဆိုထားရာကို သူသိရှိထားသောကြောင့် သူ၏စိတ်ခံစားမှုများကို အလျှော့ပေးလိုက်လျောမည်မဟုတ်ပေ။ အခြားသောလိင်တူသူများကို စွဲလမ်းနေသော်လည်း လိင်တူဆက်ဆံခြင်းအကြောင်း သမ္မာကျမ်းစာပြောဆိုရာများကို ယခု သိရှိလာသူတစ်ဦးနှင့်ပတ်သက်၍လည်း အလားတူပင်ဖြစ်၏။ မတော်လျော်သောဆန္ဒများ မကြာခဏပေါ်လာပေမည်။ သို့သော် ကျမ်းစာအကြံပြုချက်ကို လိုက်နာခြင်းဖြင့် လူတစ်ဦးသည် ထိုဆန္ဒအတိုင်းပြုမူခြင်းကို ရှောင်ရှားနိုင်သည်။
မှန်ပါသည်၊ လိင်တူသူချင်းစွဲလမ်းမှုများသည် ခိုင်မြဲစွာအမြစ်တွယ်နေပေမည်။ သို့သော် နက်ရှိုင်းစွာအမြစ်တွယ်နေသည့် မှားယွင်းသောဆန္ဒများကိုပင် ကျော်လွှားနိုင်ပါသည်။ (၁ ကောရိန္သု ၉:၂၇; ဧဖက် ၄:၂၂-၂၄) အဆုံးစွန်ဆိုရလျှင် သင့်အသက်ရှင်နေထိုင်ပုံကို သင် ထိန်းချုပ်နိုင်သည်။ (မဿဲ ၇:၁၃၊ ၁၄; ရောမ ၁၂:၁၊ ၂) ထိုသို့ထိန်းချုပ်နိုင်မည်မဟုတ်ဟု ဆိုကြမည်ဖြစ်သော်လည်း သင်၏စိတ်ဆန္ဒများကို ထိန်းချုပ်တတ်ရန် သင်ယူ နိုင် ပါသည်။ သို့မဟုတ် အနည်းဆုံး ထိုဆန္ဒများအတိုင်း မပြုလုပ်မိအောင် ရှောင်ရှားနိုင်ပါသည်။
မှားယွင်းသောအကျင့်များကို ငြင်းပယ်ပါ
လိင်တူမေထုန်မပြုမိရန် သင် မည်သို့ကြဉ်ရှောင်နိုင်သနည်း။
▪ ပထမ ကိုယ်တော်သည် သင့်အား “သတိနှင့်ကြည့်ရှုတော်မူ” သည်ကို ယုံကြည်စိတ်ချကာ ဆုတောင်းခြင်းဖြင့် သင်၏စိုးရိမ်မှုမှန်သမျှကို ယေဟောဝါထံ အပ်နှံပါ။ (၁ ပေတရု ၅:၇; ဆာလံ ၅၅:၂၂) ယေဟောဝါသည် “အဘယ်သူမျှ ကြံ၍မမီနိုင်သော” ငြိမ်သက်ခြင်းဖြင့် သင့်ကို ခွန်အားပေးနိုင်သည်။ ယင်းက မှားယွင်းသောဆန္ဒများအတိုင်း မပြုမိရန် သင်၏ ‘စိတ်နှလုံးကို စောင့်မ’ ကာ “သာမန်ထက်ထူးကဲသောတန်ခိုးတော်” ကိုပေးနိုင်သည်။ (ဖိလိပ္ပိ ၄:၇; ၂ ကောရိန္သု ၄:၇၊ ကဘ) မိမိသည် နှစ်ဖက်ချွန်ဖြစ်မည်ကို စိုးရိမ်နေသည့် စာရာက ဤသို့ဆိုသည်– “ကျွန်မရဲ့အတွေးတွေကြောင့် စိတ်အနှောင့်အယှက်ဖြစ်တိုင်း ကျွန်မဆုတောင်းတယ်၊ ယေဟောဝါက ကျွန်မကို ခွန်အားပေးတယ်။ ကိုယ်တော်သာမကူညီရင် ဒီပြဿနာကို ကျွန်မ ဖြေရှင်းနိုင်မှာမဟုတ်ဘူး။ ဆုတောင်းခြင်းဟာ ကျွန်မရဲ့အသက်သွေးကြောပဲ!”—ဆာလံ ၉၄:၁၈၊ ၁၉; ဧဖက် ၃:၂၀။
▪ ဒုတိယ သင်၏စိတ်ထဲတွင် ဝိညာဉ်ရေးတည်ဆောက်စရာ အတွေးများနှင့် ပြည့်နေစေပါ။ (ဖိလိပ္ပိ ၄:၈) သမ္မာကျမ်းစာကို နေ့စဉ်ဖတ်ရှုပါ။ သင့်စိတ်နှလုံးအပေါ် ကောင်းကျိုးသက်ရောက်စေနိုင်သည့် ယင်း၏အစွမ်းကို မည်သည့်အခါမျှ လျှော့မတွက်ပါနှင့်။ (ဟေဗြဲ ၄:၁၂) ဂျေစင် အမည်ရှိသည့် လူငယ်တစ်ဦးက ဤသို့ဆိုသည်– “၁ ကောရိန္သု ၆:၉၊ ၁၀ နဲ့ ဧဖက် ၅:၃ တို့လို ကျမ်းချက်တွေအပါအဝင် သမ္မာကျမ်းစာဟာ ကျွန်တော့်အပေါ် တော်တော်သြဇာညောင်းတယ်။ မှားယွင်းတဲ့ဆန္ဒတွေပေါ်လာတိုင်း အဲဒီကျမ်းချက်တွေကို ကျွန်တော်ဖတ်တယ်။”
▪ တတိယ မှားယွင်းသောအတွေးများကိုသာ လှုံ့ဆော်ပေးသည့် အပြာစာပေနှင့် လိင်တူမေထုန်ဝါဒဖြန့်မှုတို့ကို ရှောင်ပါ။ * (ဆာလံ ၁၁၉:၃၇; ကောလောသဲ ၃:၅၊ ၆) ရုပ်ရှင်နှင့် ရုပ်မြင်သံကြားအစီအစဉ်တချို့ကလည်း လိင်တူဆက်ဆံခြင်းသည် ဘဝပုံစံအပြောင်းအလဲတစ်ခုမျှသာဖြစ်သည်ဟူသော အယူအဆကို မြှင့်တင်ပေး၏။ “လောကရဲ့လွဲမှားနေတဲ့အတွေးအခေါ်က ကျွန်မကို စိတ်အနှောင့်အယှက်ဖြစ်စေရုံမက ဖိုမကိစ္စမှာလည်း ကျွန်မကို ပိုပြီးစိတ်ရှုပ်ထွေးစေတယ်။ အခုတော့ လိင်တူမေထုန်ကို အားပေးတဲ့ ဘယ်အရာကိုမဆို၊ ဘယ်သူ့ကိုမဆို ဝေးဝေးရှောင်တယ်” ဟု အဲန်နာက ဆိုသည်။—သု. ၁၃:၂၀။
▪ စတုတ္ထ ယုံကြည်စိတ်ချရသူတစ်ဦးကို ရှာဖွေကာ သင်၏အတွေးများကို သူ့အားပြောပြပါ။ (သု. ၂၃:၂၆; ၃၁:၂၆; ၂ တိမောသေ ၁:၁၊ ၂; ၃:၁၀) ခရစ်ယာန်အကြီးအကဲတစ်ဦး၏အကူအညီကို ရယူခဲ့သည့် အိုလက်ဖ် က ဤသို့ပြန်အမှတ်ရသည်– “သူ့ရဲ့အကြံပြုချက်က တော်တော်ထိရောက်တယ်။ စောစောကတည်းက သူ့ကိုပြောပြခဲ့ရင် အကောင်းသား။”
လက်လျှော့အရှုံးမပေးပါနှင့်
အချို့သူတို့က ဤအရာအားလုံးကို လုပ်ဆောင်ခြင်းသည် အဓိပ္ပာယ်မရှိ၊ သင့်လိင်ဆန္ဒအတိုင်းသာ လိုက်လုပ်သင့်သည်ဟု ပြောကြပေမည်။ သို့သော် သမ္မာကျမ်းစာက ထိုထက်ကောင်းသည့်အရာကို သင်ပြုလုပ်နိုင်သည်ဟုဆို၏! ဥပမာ၊ ယခင်က လိင်တူဆက်ဆံခဲ့သည့် ကနဦးခရစ်ယာန်အချို့သည် ပြောင်းလဲခဲ့ကြသည်ဟု ကျမ်းစာက ဖော်ပြ၏။ (၁ ကောရိန္သု ၆:၉-၁၁) သင့်တွင် ထိုဆန္ဒလွှမ်းမိုးနေလျှင်ပင် အောင်မြင်နိုင်ပါသည်။
သင်၌ ထိုဆန္ဒများရှိမြဲရှိနေလျှင် လက်လျှော့အရှုံးမပေးပါနှင့်။ အဖတ်ဆယ်မရသူဟု ကောက်ချက်မချလိုက်ပါနှင့်။ (ဟေဗြဲ ၁၂:၁၂၊ ၁၃) ကျွန်ုပ်တို့အားလုံး ရံဖန်ရံခါ မိမိတို့၏မှားယွင်းသောစိတ်ဆန္ဒများကို တိုက်လှန်ကြရသည်။ (ရောမ ၃:၂၃; ၇:၂၁-၂၃) သင်သည် မှားယွင်းသောဆန္ဒများအတိုင်း မလုပ်မိရန်ကြိုးစားလျှင် အတန်ကြာသော် ယင်းဆန္ဒများပျောက်သွားပေမည်။ (ကောလောသဲ ၃:၅-၈) ထို့ထက်ကား အကူအညီရရန် ယေဟောဝါကို အားကိုးပါ။ ကိုယ်တော်သည် သင့်ကိုချစ်တော်မူပြီး သင့်အား ပျော်ရွှင်စေမည့်အရာကို သိတော်မူ၏။ (ဟေရှာယ ၄၁:၁၀) မှန်ပါသည်၊ ‘ယေဟောဝါကိုခိုလှုံ၍ ကောင်းသောအကျင့်ကို ကျင့်လော့။ . . . သို့ပြုလျှင် စိတ်နှလုံးအလို ပြည့်စုံရသောအခွင့်ကို ပေးတော်မူမည်။’—ဆာလံ ၃၇:၃၊ ၄။
“လူငယ်များအမေး . . . ” အခန်းဆက်ဆောင်းပါးများကို www.watchtower.org/ype ဝက်ဘ်ဆိုက်တွင် တွေ့နိုင်ပါသည်။
[အောက်ခြေမှတ်ချက်]
^ အပိုဒ်၊ 3 ဤဆောင်းပါးတွင် နာမည်များကို ပြောင်းထားပါသည်။
^ အပိုဒ်၊ 19 ရေပန်းစားသည့်ဘဝပုံစံတစ်ခုမှာ အမျိုးသားများသည် သူတို့ကိုယ်ကိုနှင့် အထူးသဖြင့် သူတို့၏အသွင်အပြင်ကို အလွန်အာရုံစိုက်ခြင်းဖြစ်၏။ ယင်းက လိင်တူဆက်ဆံသူနှင့် လိင်ကွဲဆက်ဆံသူကို ခွဲခြားရန်ခက်ခဲစေသည်။ ရင်းမြစ်တစ်ခုအရ “ဤဘဝပုံစံဖြင့်နေထိုင်သူတစ်ဦးသည် လိင်တူဆက်ဆံသူ၊ လိင်ကွဲဆက်ဆံသူ သို့မဟုတ် နှစ်ဖက်ချွန်ဖြစ်နိုင်သော်လည်း ယင်းသည် အကြောင်းမဟုတ်ပေ။ အကြောင်းမှာ သူ့အားသာယာမှုပေးသောအရာပေါ်မူတည်ပြီး သူနှစ်သက်လိုလားသည့် လိင်ပိုင်းဆိုင်ရာလုပ်ရပ်ကို ပီပြင်စွာဖော်ပြခြင်းကြောင့်ဖြစ်သည်” ဟုဆိုသည်။
ချင့်တွေးစရာ
▪ လိင်တူမေထုန်ကို ဘုရားသခင် အဘယ်ကြောင့် မနှစ်သက်သနည်း။
▪ လိင်တူသူချင်းကို စွဲလမ်းနေမည်ဆိုလျှင် သင် အဘယ်အရာပြုလုပ်နိုင်သနည်း။
▪ လိင်တူဆက်ဆံလိုသောဆန္ဒများကို တိုက်လှန်နေရလျှင် သင် မည်သူ့ကိုရင်ဖွင့်နိုင်သနည်း။
[စာမျက်နှာ ၂၀ ပါ ရုပ်ပုံ]
ရင့်ကျက်သော ခရစ်ယာန်လူကြီးတစ်ဦး၏ အကူအညီကို ရယူပါ