“အပျော်တွဲ” ဖို့ကမ်းလှမ်းလာရင် ငါ ဘယ်လိုလုပ်ရမလဲ
လူငယ်များအမေး . . .
“အပျော်တွဲ” ဖို့ကမ်းလှမ်းလာရင် ငါ ဘယ်လိုလုပ်ရမလဲ
လူငယ်တွေဟာ တစ်ဦးနဲ့တစ်ဦး လိင်ဆက်ဆံတဲ့အဆင့်ထိရောက်နိုင်၊ မရောက်နိုင်ဆိုတာသိဖို့နဲ့ လူဘယ်နှစ်ယောက်နဲ့ လိင်ဆက်ဆံနိုင်တယ်ဆိုတာသိဖို့ အပျော်တွဲကြတယ်။”—ပဲန်နီ။ *
“ယောက်ျားလေးတွေဟာ အဲဒီအကြောင်းကိုပြောဖို့ ဝန်မလေးကြဘူး။ သူတို့မှာ ရည်းစားရှိပေမဲ့ တခြားမိန်းကလေးတွေအများကြီးနဲ့လည်း လိင်ဆက်ဆံနိုင်တယ်ဆိုတာကို ကြွားလုံးထုတ်ကြတယ်။”—အက်ဒ်ဝါ့ဒ်။ “အပျော်တွဲဖို့ ကျွန်မကို ကမ်းလှမ်းတဲ့သူတွေဟာ အရမ်းပွင့်လင်းတယ်။ ငြင်းရင်လည်း ကမ်းလှမ်းတာရပ်မသွားဘူး။”—အိုင်ဒါ။
အချို့သောတိုင်းပြည်များတွင် ယင်းတို့ကို အပျော်တွဲခြင်းဟုခေါ်ကြသည်။ တိုင်းပြည်အချို့တွင်မူ အခြားအသုံးအနှုန်းတစ်ခုဖြင့် သိထားကြသည်။ ဥပမာ၊ ဂျပန်နိုင်ငံတွင် ယင်းတို့ကို အဖော်အဖက်များဟုခေါ်ကြောင်း လူငယ်အာကီကို ကဆို၏။လိင်မိတ်ဆွေ’ လို့အဓိပ္ပာယ်ရှိတဲ့ ဆက်ဖ်ရာ ဆိုတဲ့ အသုံးအနှုန်းလည်းရှိတယ်။ မိတ်ဆွေဖွဲ့ရတဲ့ တစ်ခုတည်းသောအကြောင်းရင်းကတော့ လိင်ဆက်ဆံဖို့ဖြစ်တယ်” ဟုသူကပြောပြသည်။
မည်သည့်အသုံးအနှုန်းပင်ဖြစ်ပါစေ အဓိပ္ပာယ်မှာ အတူတူပင်ဖြစ်ကာ ယင်းသည် ချစ်ခင်တွယ်တာမှုမရှိဘဲ ကြုံရာကျပန်းလိင်ဆက်ဆံခြင်းဖြစ်၏။ * လူငယ်အချို့က “အကျိုးပြုမိတ်ဆွေများ” ရှိသည်ကိုပင် ကြွားဝါကြ၏။ “အကျိုးပြုမိတ်ဆွေများ” ဟူသောအသုံးအနှုန်းမှာ ကြာရှည်စွဲလမ်းတမ်းတရသည့် “ပြဿနာ” မရှိဘဲ လိင်ဆက်ဆံနိုင်သော အသိအကျွမ်းများကိုဆိုလို၏။ “အပျော်တွဲတယ်ဆိုတာ တဒင်္ဂအလိုဆန္ဒဖြည့်ဆည်းတာကို ဆိုလိုတယ်။ ကိုယ့်ဆန္ဒပြည့်ပြီဆိုရင် ဖြစ်ခဲ့တာကို တာဝန်ယူစရာမလိုဘဲ ရှောင်ထွက်သွားလို့ရတယ်” ဟု အမျိုးသမီးငယ်တစ်ဦးက ဆို၏။
ခရစ်ယာန်တစ်ဦးအနေနှင့် သင်သည် “မတရားသောမေထုန်ကို ကြဉ်ရှောင်” သင့်သည်။ (၁ ကောရိန္သု ၆:၁၈) ယင်းကိုသိထားကာ သင်သည် သွေးဆောင်မှုဖြစ်စေနိုင်သော အခြေအနေများကို ရှောင်ကြဉ်ရန် ကြိုးစားပေမည်။ သို့သော် တစ်ခါတစ်ရံ သွေးဆောင်မှုသည် သင့် ထံသို့ရောက်လာပေမည်။ “ကျောင်းမှာ ကောင်လေးတွေက သူတို့နဲ့အပျော်တွဲဖို့ ကျွန်မကို တောင်းဆိုတယ်” ဟု စင်ဒီက ဆို၏။ အလုပ်ခွင်တွင်လည်း အလားတူဖြစ်နိုင်သည်။ “ကျွန်မရဲ့မန်နေဂျာက သူနဲ့အပျော်တွဲဖို့ ကျွန်မကိုတောင်းဆိုတယ်။ သူတကျည်ကျည်လုပ်နေတဲ့အတွက် ကျွန်မ အလုပ်ထွက်လိုက်ရတယ်” ဟု မာဂရက် ကဆိုသည်။ မတရားမေထုန်တွင် ပါးစပ်ဖြင့်၊ စအိုဖြင့် လိင်ဆက်ဆံခြင်း၊ လိင်တူဆက်ဆံခြင်း၊ မိမိလက်ဖြင့် အခြားသူကို အာသာဖြေပေးခြင်း၊ မထိမ်းမြားထားသူနှစ်ဦးပြုမူသည့် လိင်အင်္ဂါများ တလွဲအသုံးပြုခြင်းအပါအဝင် အခြားလုပ်ရပ်များကဲ့သို့သော လိင်ဆက်ဆံမှုများပါဝင်သည်။
သို့သော် သင်သည် ထိုသို့ပြုလုပ်လိုစိတ် နည်းများမဆိုပေါ်ပေါက်လာပါက မအံ့သြပါနှင့်။ “စိတ်နှလုံးသည် ခပ်သိမ်းသောအရာထက် စဉ်းလဲတတ်၏။ အလွန်ယိုယွင်းသောသဘောရှိ၏။ စိတ်နှလုံးသဘောကို အဘယ်သူသိနိုင်သနည်း” ဟု သမ္မာကျမ်းစာကဆိုသည်။ (ယေရမိ ၁၇:၉) လူးဒက်စ် အမည်ရှိ မိန်းကလေးတစ်ဦးသည် ထိုအချက်မှန်ကန်ကြောင်း တွေ့ရှိခဲ့သည်။ လိင်ဆက်ဆံဖို့ ကျွန်မကို တောင်းဆိုတဲ့လူကို ကျွန်မသဘောကျတယ်” ဟုသူဝန်ခံသည်။ ဂျိန်း လည်း ထိုသို့ပင်ဖြစ်၏။ “ကျွန်မရဲ့ခံစားချက်က ပြင်းထန်တယ်။ လိင်ဆက်ဆံဖို့ ချဉ်းကပ်တာကို ငြင်းဆိုရတာ ကျွန်မအတွက် အခက်ခဲဆုံးအရာတစ်ခုပဲ” ဟုသူကဆို၏။ အစောပိုင်းတွင်ဖော်ပြခဲ့သည့် အက်ဒ်ဝါ့ဒ် ကလည်း ကိုယ်ကျင့်တရားစင်ကြယ်စွာနေဖို့ဟူသည် မလွယ်ကူကြောင်း ဝန်ခံသည်။ “မိန်းကလေးတွေက လိင်ဆက်ဆံဖို့ ကမ်းလှမ်းလာတဲ့အခါ ခရစ်ယာန်တစ်ဦးဖြစ်တဲ့ ကျွန်တော့်အတွက် အဲဒါကို ငြင်းဆိုရတာ အခက်ဆုံးပဲ” ဟုသူကဆိုသည်။
သင်လည်း လူးဒက်စ်နှင့် အက်ဒ်ဝါ့ဒ် တို့ကဲ့သို့ ခံစားရပြီး ယေဟောဝါ၏ရှေ့တော်မှောက်တွင် မှန်ရာကို ပြုလုပ်ခဲ့မည်ဆိုလျှင် ယင်းအတွက် သင့်ကို ချီးမွမ်းရပေမည်။ တမန်တော်ပေါလုလည်း မှားယွင်းသောဆန္ဒများကို အဆက်မပြတ်တိုက်လှန်ခဲ့ရကြောင်း သင်သိရသည့်အတွက် နှစ်သိမ့်မှုရရှိပေမည်။—ရောမ ၇:၂၁-၂၄။
သင်သည် ကြုံရာကျပန်းလိင်ဆက်ဆံဖို့ ဖိတ်ခေါ်ခံရမည်ဆိုလျှင် အဘယ်ကျမ်းစာမူများကို သတိရသင့်သနည်း။
ကြုံရာကျပန်း လိင်ဆက်ဆံခြင်းသည် အဘယ်ကြောင့်မှားကြောင်း သိရှိပါ
သမ္မာကျမ်းစာက အိမ်ထောင်ဖက်မဟုတ်သူနှင့် လိင်ဆက်ဆံခြင်းကို ပြစ်တင်ရှုတ်ချသည်။ အမှန်မှာ မတရားမေထုန်သည် အလွန်ကြီးလေးသောအပြစ်တစ်ခုဖြစ်ကာ ယင်းကိုပြုကျင့်သူတို့သည် ‘ဘုရားသခင်၏နိုင်ငံတော်ကို အမွေခံရကြ’ မည်မဟုတ်ပေ။ (၁ ကောရိန္သု ၆:၉၊ ၁၀) ကြုံရာကျပန်းလိင်ဆက်ဆံခြင်းတွင် ပါဝင်စေမည့်သွေးဆောင်မှုကို တွန်းလှန်ရန် သင်ကိုယ်တိုင် ထိုအကျင့်ကို ယေဟောဝါရှုမြင်သကဲ့သို့ ရှုမြင်ရမည်။ ကိုယ်ကျင့်တရားစင်ကြယ်စွာနေဖို့ဟူသည် သင်၏ ရွေးချယ်မှုဖြစ်ရမည်။
“ယေဟောဝါရဲ့နည်းလမ်းတော်ဟာ လိုက်လျှောက်အပ်တဲ့ အကောင်းဆုံးနည်းလမ်းဖြစ်တယ်ဆိုတာ ကျွန်မ အခိုင်အမာယုံကြည်တယ်။”—ကာရင်၊ ကနေဒါ။
“လူတစ်ဦးဟာ တဒင်္ဂသာယာမှုရဖို့ ကိုယ်ကျင့်တရားနဲ့ဆိုင်တဲ့ ယေဟောဝါရဲ့ပညတ်တွေကို လျစ်လျူရှုလိုက်တဲ့အခါ အများကြီးဆုံးရှုံးနိုင်တယ်။”—ဗီဗီယံ၊ မက္ကဆီကို။
“သင်ဟာ တစ်စုံတစ်ဦးရဲ့သား ဒါမှမဟုတ် သမီး၊ လူများစွာရဲ့မိတ်ဆွေနဲ့ အသင်းတော်သားတစ်ဦးဖြစ်တယ်ဆိုတာ သတိရပါ။ သင် လက်လျှော့အရှုံးပေးလိုက်ရင် အဲဒီလူတွေအားလုံး စိတ်ထိခိုက်ကြလိမ့်မယ်။”—ပီတာ၊ ဗြိတိန်။
တမန်တော်ပေါလုက “သခင်ဘုရားနှစ်သက်တော်မူသောအရာသည် အဘယ်အရာဖြစ်သည်ကို သင်ကြလော့” ဟုရေးသားခဲ့၏။ (ဧဖက် ၅:၁၀) မတရားမေထုန်သည် မစုံလင်သောအသွေးအသားအတွက် နှစ်လို့ဖွယ်ကောင်းမည်ဖြစ်သော်လည်း ယင်းနှင့်စပ်လျဉ်းသည့် ယေဟောဝါ၏ရှုမြင်ပုံကို ကြိုးစားရယူခြင်းဖြင့် သင်သည် “မကောင်းသောအမှုကိုရွံရှာ” နိုင်မည်။—ဆာလံ ၉၇:၁၀။
▪ အကြံပြုထားသည့် ဖတ်ရန်ကျမ်းပိုဒ်– ကမ္ဘာဦး ၃၉:၇-၉။ လိင်ဆိုင်ရာသွေးဆောင်မှုကို ယောသပ် သတ္တိရှိရှိတွန်းလှန်ခဲ့ပုံနှင့် ဘယ်အရာကြောင့် ထိုသို့တွန်းလှန်နိုင်ခဲ့ပုံတို့ကို သတိပြုပါ။
သင့်ယုံကြည်ချက်အတွက် ဂုဏ်ယူပါ
မိမိတို့၏ယုံကြည်ချက်အတွက် ဂုဏ်ယူစွာရပ်တည်ကာ ခုခံကာကွယ်ခြင်းသည် လူငယ်များအတွက် အဆန်းမဟုတ်ပေ။ ခရစ်ယာန်တစ်ဦးအနေနှင့် သင်သည် အတုယူအပ်သောအမူအကျင့်ဖြင့် ဘုရားသခင်၏နာမတော်ကို ဂုဏ်တင်ရန် အထူးအခွင့်အရေးရှိသည်။ လက်မထပ်မီ လိင်ဆက်ဆံခြင်းနှင့်စပ်လျဉ်းသည့် သင်၏ခိုင်မာသောရှုမြင်ပုံအတွက် မရှက်ပါနှင့်။
“အစကတည်းက သင့်မှာ ကိုယ်ကျင့်တရားနဲ့ဆိုင်တဲ့ ကျင့်ဝတ်မူတွေရှိတယ်ဆိုတာ အထင်အရှားဖော်ပြပါ။”—အယ်လဲန်၊ ဂျာမနီ။
“သင့်ယုံကြည်ချက်အတွက် ရှက်စရာမလိုဘူး။”—အက်စတာ၊ နိုင်ဂျီးရီးယား။
“‘ကျွန်မရဲ့မိဘတွေက ချိန်းတွေ့ဖို့ ကျွန်မကို ခွင့်ပြုမှာမဟုတ်ဘူး’ လို့ပြောရင် အပျော်တွဲတာနဲ့ပတ်သက်တဲ့ သင့်ရဲ့ရပ်တည်ချက်ကို ရွယ်တူချင်းတွေက လေးစားကြမှာမဟုတ်ဘူး။ ချိန်းတွေ့တာကို သင် စိတ်မဝင်စားဘူးဆိုတာ သင့်ရဲ့ရွယ်တူချင်းတွေကို သိရှိစေရမယ်။”—ဂျဲနက်၊ တောင်အာဖရိက။
“ကျွန်မ ဘယ်လိုလူစားလဲဆိုတာ ကျွန်မနဲ့ အထက်တန်းကျောင်းအတူတက်တဲ့ ကောင်လေးတွေသိကြတယ်။ သူတို့ကြိုးစားတာတွေ အောင်မြင်မှာမဟုတ်ဘူးဆိုတာ သူတို့သိကြတယ်။”—ဗစ်ကီ၊ အမေရိကန်။
သင်၏ယုံကြည်ချက်များအတွက် ရပ်တည်ခြင်းက သင်သည် ရင့်ကျက်သောခရစ်ယာန်တစ်ဦးဖြစ်လာပြီဟူသော အမှတ်အသားတစ်ခုဖြစ်၏။—၁ ကောရိန္သု ၁၄:၂၀။
▪ အကြံပြုထားသည့် ဖတ်ရန်ကျမ်းပိုဒ်– သုတ္တံ ၂၇:၁၁။ သင်၏လုပ်ရပ်များက ခေတ်ကာလတစ်လျှောက်တွင် အကြီးမားဆုံးအရေးကိစ္စဖြစ်သည့် ယေဟောဝါ၏နာမတော်အား သန့်ရှင်းမြင့်မြတ်စေခြင်းကို မည်သို့ အမှန်တကယ် ခုခံကာကွယ်နိုင်ကြောင်း သုံးသပ်ပါ။
ခိုင်မာပါ!
ငြင်းဆိုရန် အရေးကြီး၏။ သို့သော် အချို့သူတို့က သင်၏ငြင်းဆိုမှုသည် “စိတ်မဝင်စားဟန်ပြရုံသက်သက်” ဖြစ်သည်ဟု တလွဲယူမှတ်ပေမည်။
“ငြင်းဆိုတာကို အစွမ်းအစစမ်းသပ်တဲ့အရာတစ်ခုလို၊ ကျော်လွှားရမယ့်အတားအဆီးတစ်ခုလို ရှုမြင်နိုင်တယ်။ အဲဒီလိုငြင်းဆိုတဲ့အတွက် သင့်နောက်ကို ပိုလိုက်လာနိုင်စရာအကြောင်းရှိတယ်။”—လော်ရန်၊ ကနေဒါ။
“သင့်ရဲ့ဝတ်စားပုံ၊ ပြောပုံဆိုပုံ၊ သင် ဘယ်သူနဲ့စကားပြောတယ်၊ လူတွေနဲ့ ဘယ်လိုဆက်ဆံတယ်ဆိုတာတွေရော သင်နဲ့ပတ်သက်တာမှန်သမျှမှာပါ သင့်ရဲ့ငြင်းဆိုမှုထင်ရှားနေသင့်တယ်။”—ဂျွိုင်း၊ နိုင်ဂျီးရီးယား။
“သင့်ရဲ့ငြင်းဆိုမှုဟာ ခိုင်မာပြတ်သားရမယ်။”—ဒယ်နီယဲလ်၊ ဩစတြေးလျ။
“ခိုင်မာပါ! ယောက်ျားလေးတစ်ယောက်က ကျွန်မကို မသိမသာကမ်းလှမ်းလာတဲ့အခါ ‘ကျွန်မရဲ့ပခုံးကို မကိုင်နဲ့’ လို့ပြောပြီး မျက်နှာထားတင်းတင်းနဲ့ ချက်ချင်းထွက်လာလိုက်တယ်။”—အယ်လဲန်၊ ဗြိတိန်။
“အခုရော၊ နောင်ရော ဘယ်တော့မှ စိတ်ဝင်စားမှာမဟုတ်ဘူးဆိုတာ တဲ့တိုးပြောရမယ်။ ရှက်ကြောက်နေရမယ့်အချိန်မဟုတ်ဘူး။”—ဂျင်း၊ စကော့တလန်။
“ယောက်ျားလေးတစ်ယောက်က ကျွန်မကို အမြဲကမ်းလှမ်းပြီး မထိတထိစကားလုံးတွေနဲ့ နှောင့်ယှက်တယ်။ ကျွန်မ ခိုင်မာပြတ်သားဖို့လိုလာတယ်။ အဲဒီတော့မှ နှောင့်ယှက်တာရပ်သွားတယ်။”—ကွမ်နီတာ၊ မက္ကဆီကို။
“သူတို့ကို ဘယ်တော့မှအလျှော့ပေးလိုက်လျောမှာမဟုတ်ဘူး ဆိုတာ အတိအလင်းပေးသိဖို့လိုတယ်။ သင့်ကိုအယုံသွင်းဖို့ ကြိုးစားနေတဲ့ ယောက်ျားလေးတွေဆီက လက်ဆောင်ကို ဘယ်တော့မှမယူနဲ့။ သူတို့ကို တစ်ခုခုပြန်ပေးဖို့လိုနေတယ်ဆိုတဲ့ အတွေးပေါ်လာအောင် အဲဒီလက်ဆောင်ကို သူတို့အသုံးချနိုင်တယ်။”—လော်ရာ၊ ဗြိတိန်။
သင် ခိုင်မာမည်ဆိုလျှင် သင့်အား ယေဟောဝါ ကူညီပေးပါလိမ့်မည်။ ဆာလံဆရာဒါဝိဒ်သည် သူ၏ကိုယ်ပိုင်အတွေ့အကြုံအပေါ်အခြေပြု၍ ယေဟောဝါအကြောင်း ဤသို့ပြောနိုင်ခဲ့သည်– “ကိုယ်တော်သည် သစ္စာရှိသူတို့အား သစ္စာစောင့်တော်မူ၏။”—ဆာလံ ၁၈:၂၅၊ ခမ။
▪ အကြံပြုထားသည့် ဖတ်ရန်ကျမ်းပိုဒ်– ၂ ရာဇဝင်ချုပ် ၁၆:၉။ ယေဟောဝါသည် မိမိအပေါ် စုံလင်သောစေတနာစိတ်ရှိသူတို့အား ကူညီရန် စိတ်အားထက်သန်ပုံကို သတိပြုပါ။
အမြော်အမြင်ရှိပါ
သမ္မာကျမ်းစာက “သတိရှိသောသူသည် အမှုကိုမြော်မြင်၍ ပုန်းနေတတ်၏” ဟုဖော်ပြ၏။ (သု. ၂၂:၃) ထိုအကြံပြုချက်ကို သင် မည်သို့လိုက်နာနိုင်သနည်း။ အမြော်အမြင်ရှိခြင်းဖြင့်ဖြစ်၏။
“အဲဒီအကြောင်း ပြောတတ်တဲ့သူတွေနဲ့ အတတ်နိုင်ဆုံး ဝေးဝေးနေပါ။”—နာအိုမီ၊ ဂျပန်။
“အန္တရာယ်ရှိနိုင်တဲ့ အပေါင်းအသင်းနဲ့ အခြေအနေတွေကို ရှောင်ပါ။ ဥပမာအနေနဲ့ အရက်မူးနေတဲ့အချိန်မှာ သွေးဆောင်မှုကို အလျှော့ပေးလိုက်လျောခဲ့သူတချို့ကို ကျွန်မသိထားတယ်။”—အိုင်ရှာ၊ ဘရာဇီး။
“သင့်ရဲ့လိပ်စာ ဒါမှမဟုတ် ဖုန်းနံပါတ်စတဲ့ ကိုယ်ရေးကိုယ်တာအချက်အလက်တွေကို ထုတ်မပြောပါနဲ့။”—ဒိုင်ယာနာ၊ ဗြိတိန်။
“သင့်ရဲ့အတန်းဖော်တွေနဲ့ ဖက်လဲတကင်း မနေပါနဲ့။”—အက်စတာ၊ နိုင်ဂျီးရီးယား။
“သင့်ရဲ့ဝတ်စားဆင်ယင်ပုံကို ဂရုစိုက်ပါ။ လိင်စိတ်ကိုနှိုးဆွတဲ့ အဝတ်အစားမျိုးမဝတ်သင့်ဘူး။”—ဟိုင်ဒီ၊ ဂျာမနီ။
“သင့်ရဲ့မိဘတွေနဲ့ ဆက်ဆံရေးကောင်းရှိပြီး သူတို့ကို အဲဒီအခြေအနေအကြောင်း ပြောပြတာဟာ စိတ်ချရတဲ့ အကာအကွယ်တစ်ခုဖြစ်တယ်။”—အာကီကို၊ ဂျပန်။
သင်၏အပြောအဆို၊ အမူအကျင့်၊ အပေါင်းအသင်းများနှင့် သင် မကြာခဏ သွားတတ်သည့်နေရာများကို ဆန်းစစ်ပါ။ ထို့နောက် သင့်ကိုယ်သင် ဤသို့မေးပါ– ‘တခြားသူတွေ လိင်ဆက်ဆံဖို့ ကမ်းလှမ်းချင်တဲ့အနေအထားမှာ ငါရောက်နေသလား၊ ဒါမှမဟုတ် အဲဒီလိုလက္ခဏာမျိုး အမှတ်မထင်ပြနေသလား။’
▪ အကြံပြုထားသည့် ဖတ်ရန်ကျမ်းပိုဒ်– ကမ္ဘာဦး ၃၄:၁၊ ၂။ မသွားသင့်သောနေရာသို့သွားခြင်းဖြင့် ဒိနအမည်ရှိ မိန်းကလေးတစ်ဦး ဝမ်းနည်းဖွယ်ဆိုးကျိုးများခံစားခဲ့ရပုံကို သုံးသပ်ကြည့်ပါ။
ယေဟောဝါဘုရားသခင်သည် “ကြုံရာကျပန်း” လိင်ဆက်ဆံခြင်းကို ပေါ့ပေါ့တန်တန်သဘောမထားကြောင်း၊ သင်လည်း ထိုသို့ဖြစ်သင့်ကြောင်း သတိရပါ။ သမ္မာကျမ်းစာက ဤသို့ဆိုသည်– “မတရားသောမေထုန်၌မှီဝဲသောသူ၊ ညစ်ညူးစွာပြုသောသူ၊ . . . တစ်စုံတစ်ယောက်မျှ ခရစ်တော်နှင့် ဘုရားသခင်၏နိုင်ငံ၌ အမွေမခံရ။” (ဧဖက် ၅:၅) မှန်ရာအတွက်ရပ်တည်ခြင်းဖြင့် သင်သည် ကြည်လင်သည့် ကိုယ်ကိုကိုယ်သိသောစိတ်နှင့် ကိုယ့်ကိုယ်ကိုလေးစားမှု ရရှိနိုင်ပါသည်။ “တခြားသူတစ်ဦးရဲ့ တဒင်္ဂဆန္ဒပြည့်ဖို့အတွက် သင့်ကိုယ်ကို ဘာဖြစ်လို့ ‘အသုံးချ’ ခွင့်ပြုရမှာလဲ။ သင် ကြိုးစားထိန်းသိမ်းလာခဲ့တာကို ဂရုစိုက်ပါ” ဟု ကာလီ အမည်ရှိ မိန်းကလေးတစ်ဦးကဆိုသည်။
လူငယ်များအမေး . . . ” အခန်းဆက်ဆောင်းပါးများကို www.watchtower.org/ype ဝက်ဘ်ဆိုက်တွင် တွေ့နိုင်ပါသည်။
[အောက်ခြေမှတ်ချက်များ]
^ အပိုဒ်၊ 3 ဤဆောင်းပါးတွင် နာမည်များကို ပြောင်းထားသည်။
^ အပိုဒ်၊ 6 ဤအသုံးအနှုန်းများသည် ပွတ်သပ်ခြင်းနှင့် ရမ္မက်ဖြင့်နမ်းရှုပ်ခြင်းစသည့် အခြားရင်းနှီးသောအမူအကျင့်ကိုလည်း ရည်ညွှန်းသည်။
ချင့်တွေးစရာ
▪ တရားမဝင်လိင်ဆက်ဆံမှုသည် မစုံလင်သောအသွေးအသားအတွက် နှစ်လို့ဖွယ်ကောင်းမည်ဖြစ်သော်လည်း အဘယ်ကြောင့်မှားသနည်း။
▪ တစ်စုံတစ်ဦးက သင့်အား ကြုံရာကျပန်းလိင်ဆက်ဆံရန် တောင်းဆိုမည်ဆိုလျှင် သင် မည်သို့ပြုမည်နည်း။
[စာမျက်နှာ ၁၁ ပါ လေးထောင့်ကွက်]
▪ မတရားမေထုန်ပြုသူသည် “မိမိကိုယ်ကိုပင်ပြစ်မှား၏” ဟု သမ္မာကျမ်းစာကဆိုသည်။ (၁ ကောရိန္သု ၆:၁၈) ယင်းသည် မည်သို့ဖြစ်နိုင်သနည်း။ နည်းလမ်းအချို့ကို သင်စဉ်းစား၍ရမရ စမ်းကြည့်ကာ ယင်းတို့ကို အောက်တွင်ဖော်ပြပါ။
․․․․․
အကြံပြုချက်– အထက်ပါမေးခွန်းများကို ဖြေဆိုရာတွင် သင့်အတွက် အထောက်အကူဖြစ်ရန် ကျမ်းစာဖြင့် ကျိုးကြောင်းဆင်ခြင်ခြင်း၊ စာမျက်နှာ ၃၀၈-၉ နှင့် သမ္မာကျမ်းစာအပေါ်ထိုးထွင်းအမြင်၊ အတွဲ ၁၊ စာမျက်နှာ ၈၆၃ (အင်္ဂလိပ်) စာအုပ်တွင်ရှာဖွေပါ။ ထိုစာအုပ်နှစ်အုပ်စလုံးကို ယေဟောဝါသက်သေများ ပုံနှိပ်ထုတ်ဝေသည်။
[စာမျက်နှာ ၁၃ ပါ လေးထောင့်ကွက်]
မိဘများအတွက် မှတ်သားစရာ
“ကျောင်းမှာ အတန်းဖော်တစ်ယောက်က သူနဲ့ ‘အပျော်တွဲ’ ဖို့ ကျွန်မကို တောင်းဆိုတယ်။ သူ ဘာတောင်းဆိုနေသလဲဆိုတာ ကျွန်မ တော်တော်နဲ့သဘောမပေါက်ဘူး။ ကျွန်မအသက်က ၁၁ နှစ်ပဲရှိသေးတယ်။”—လေအာ။
သားသမီးများသည် အလွန်ငယ်သောအရွယ်၌ပင် လိင်အကြောင်းကိုကြားသိနေရသည်။ ‘နောက်ဆုံးသောကာလ’ သည် “ခဲယဉ်း” ကာ လူတို့သည် “ကိုယ်ကိုမချုပ်တည်းနိုင်သောသူ၊” “ဘုရားသခင်ကိုနှစ်သက်သည်ထက် ပျော်မွေ့ ခြင်းကို သာ၍နှစ်သက်သောသူ” ဖြစ်ကြလိမ့်မည်ဟု သမ္မာကျမ်းစာတွင် ကြာမြင့်စွာကတည်းက ကြိုတင်ဖော်ပြထား၏။ (၂ တိမောသေ ၃:၁၊ ၃၊ ၄၊ သမ္မာ) လူငယ်များအတွက် ဤဆောင်းပါးတွင် အသားပေးဖော်ပြထားသော “အပျော်တွဲခြင်း” သည် ဤပရောဖက်ပြုချက်မှန်ကန်ကြောင်း ညွှန်ပြသည့်အချက်များစွာမှ တစ်ခုဖြစ်၏။
မျက်မှောက်လောကသည် သင်ကြီးပြင်းခဲ့သောလောကနှင့် လုံးဝမတူတော့ချေ။ သို့သော် ပြဿနာများမှာ အတော်အတန်တူ၏။ ထို့ကြောင့် သင့်သားသမီးများကိုဝန်းရံနေသည့် မကောင်းသောသြဇာများကြောင့် မစိုးရိမ်ပါနှင့်။ ယင်းအစား လွန်ခဲ့သောနှစ်ပေါင်း ၂,၀၀၀ ခန့်က ခရစ်ယာန်များအား တမန်တော်ပေါလု တိုက်တွန်းခဲ့သည့်နည်းအတိုင်း လုပ်ဆောင်ရန် သူတို့ကိုကူညီပေးဖို့ သန္နိဋ္ဌာန်ချပါ– ‘စာတန်၏ပရိယာယ်တို့ကို ဆီးတားနိုင်မည်အကြောင်း၊ဘုရားသခင်ပြင်ဆင်တော်မူသောလက်နက်စုံကို ဝတ်ဆောင်ကြလော့။’ (ဧဖက် ၆:၁၁) ခရစ်ယာန်လူငယ်များစွာသည် မကောင်းသောသြဇာများ ဝန်းရံခံနေရသော်လည်း မှန်ရာကိုလုပ်ဆောင်ရန် ကြိုးစားနေကြသည်မှာ ချီးမွမ်းစရာပင်။ ထိုသို့လုပ်ဆောင်ရန် သင့်ကလေးများအား သင် မည်သို့ကူညီနိုင်သနည်း။
တစ်နည်းမှာ ဤဆောင်းပါးကို အသုံးပြု၍ သင်၏သား သို့မဟုတ် သမီးနှင့်အတူ အစပြုဆွေးနွေးခြင်းဖြစ်သည်။ “အကြံပြုထားသည့် ဖတ်ရန်ကျမ်းပိုဒ်” ဟူသောအပိုင်းများတွင် စဉ်းစားစေသည့် ကျမ်းချက်များကို ဖော်ပြထားသည်။ ဖြောင့်မှန်ရာအတွက် ရပ်တည်ခြင်းကြောင့် ကောင်းချီးများခံစားခဲ့ရသူတို့နှင့် ဘုရားသခင်၏ပညတ်များကို လျစ်လျူရှုခြင်းကြောင့် ဆိုးကျိုးများခံစားခဲ့ရသူတို့၏ ဘဝဖြစ်ရပ်မှန်ပုံနမူနာများကို ကျမ်းချက်အချို့က ပေါ်လွင်စေသည်။ “အကြံပြုထားသည့် ဖတ်ရန်ကျမ်းပိုဒ်” ဟူသောအပိုင်းများမှ ကျမ်းချက်အချို့တွင် ကျင့်ဝတ်မူများပါဝင်သည်။ ၎င်းတို့က သင်နှင့် သင့်သားသမီးများတွင် ဘုရားသခင့်ပညတ်တော်များနှင့်အညီ နေထိုင်ရသော အခွင့်ထူးရရှိထားသည်ကို သင့်သားသမီးများ အသိအမှတ်ပြုလာရန် ကူညီပေးနိုင်သည်။ ယင်းကို သူတို့နှင့်အတူသုံးသပ်ရန် ယခုပင် စီစဉ်ပါလေ။
ဘုရားသခင်၏စံနှုန်းများနှင့်အညီ နေထိုင်ခြင်းသည် ကျွန်ုပ်တို့အတွက် အမြဲပင်အကျိုးရှိ၏။ (ဟေရှာယ ၄၈:၁၇၊ ၁၈) ယင်းတို့ကို လျစ်လျူရှုခြင်းသည် မလွဲဧကန် စိတ်ဆင်းရဲကိန်းဆိုက်စေ၏။ ဘုရားသခင့်ပညတ်တော်များနှင့်ကျင့်ဝတ်မူများကို သင့်သားသမီးများ၏နှလုံးထဲ စွဲမှတ်နေစေရန် ကြိုးစားသွန်သင်ပေးစဉ် သင့်အား ယေဟောဝါ ကောင်းချီးပေးရန် နိုးလော့! ထုတ်ဝေသူများက ဆုတောင်းပေးပါသည်။—တရားဟောရာ ၆:၆၊ ၇။
[စာမျက်နှာ ၁၂ ပါ ရုပ်ပုံ]
သင် ဘယ်တော့မျှ အလျှော့ပေးလိုက်လျောမည်မဟုတ်ကြောင်း အတိအလင်းသိရှိစေဖို့လို