ကမ္ဘာချီ ကိုယ်ကျင့်တရားပျက်ပြားမှု
ကမ္ဘာချီ ကိုယ်ကျင့်တရားပျက်ပြားမှု
မကြာသေးမီက ထုတ်ဝေခဲ့သည့် The Cheating Culture ဟူသောစာအုပ်ကို ရေးသားခဲ့သူ ဒေးဗစ်ကာလဟန်က “နေရာတိုင်းတွင် လိမ်လည်လှည့်ဖြားမှုရှိသည်” ဟုဆို၏။ သူသည် အမေရိကန်နိုင်ငံ၌ ဖြစ်ပေါ်နေသော အခြားလိမ်လည်လှည့်ဖြားမှု အသွင်အမျိုးမျိုးအပြင် “အထက်တန်းနှင့် ကောလိပ်ကျောင်းသားများ၏ မလိမ့်တပတ်လုပ်မှု၊” တေးသီချင်းနှင့် ရုပ်ရှင်ဇာတ်ကားများကို “ခိုးကူးဖြန့်ချိမှု၊” “လုပ်ငန်းခွင်၌ အချိန်နှင့် ပစ္စည်းခိုးမှု၊” “ကျန်းမာရေးစောင့်ရှောက်မှုအစီအစဉ်များကို ခုတုံးလုပ်အမြတ်ထုတ်မှု” နှင့် အားကစားလောကတွင် တားမြစ်ဆေးသုံးစွဲမှုတို့ကို ထောက်ပြခဲ့သည်။ “လူ့ကျင့်ဝတ်နှင့် တရားဥပဒေအား ချိုးဖောက်မှုပုံစံအမျိုးမျိုးကို ပေါင်းစပ်ကြည့်လိုက်ရာ ကိုယ်ကျင့်တရားဆိုင်ရာ ကပ်ဆိုက်မှုကြီး၏နယ်ပယ်မှာ စိုးရိမ်ဖွယ်ရာပင်” ဟု သူက ကောက်ချက်ချခဲ့သည်။
၂၀၀၅ ခုနှစ်နှောင်းပိုင်း၌ အမေရိကန်နိုင်ငံတွင် တိုက်ခတ်သွားသော ကက်ထရီနာဟာရီကိန်းမုန်တိုင်းကြောင့် “ခေတ်သစ်လူ့သမိုင်း၌ အကြံအဖန်များ၊ ကျိတ်ကြံစည်မှုများနှင့် အုပ်ချုပ်မှုပိုင်း၏ အံ့သြတုန်လှုပ်ဖွယ် အလွဲလွဲအချော်ချော်ဖြစ်မှုများထဲမှ အထူးခြားဆုံးဖြစ်ရပ်တစ်ခု ဖြစ်ပျက်ခဲ့သည်” ဟု The New York Times သတင်းစာကဆို၏။ အမေရိကန်အထက်လွှတ်တော်အမတ်တစ်ဦးက ဤသို့ပြောပြခဲ့သည်– “ဗြောင်ကလိမ်ကျမှု၊ ရဲတင်းသောကျိတ်ကြံစည်မှု၊ ငွေကြေးအမြောက်အမြား ဖြုန်းတီးမှုတို့မှာ အလွန်အံ့အားသင့်ဖွယ်ကောင်းလှ၏။”
ကိုယ်ကျိုးမဖက်ဘဲ လူသားချင်းအပေါ် သနားကြင်နာမှုတင်ပြသူများ ရှိနေကြဆဲဖြစ်သည်မှာ မှန်ပါသည်။ (တမန်တော် ၂၇:၃; ၂၈:၂) သို့သော် ‘အဲဒီကနေ ငါ ဘာအကျိုးအမြတ်ရမလဲ’ ဟူသောအပြောမျိုး ကြားရလေ့ရှိ၏။ တစ်ကိုယ်ကောင်းဆန်၍ ကိုယ်ကျိုးရှာခြင်းသည် နေရာအနှံ့တွင် ရေပန်းစားနေသည့် သဘောထားဖြစ်ပုံရ၏။
ယခင်က ရောမအင်ပါယာကဲ့သို့သော ယဉ်ကျေးမှုများ ပြိုလဲသွားရခြင်းမှာ တစ်ကိုယ်ကောင်းဆန်ပြီး ဗြောင်အကျင့်ယိုယွင်းခြင်းကြောင့်ဖြစ်သည်ဟု ထောက်ပြခဲ့ကြသည်။ ယခု ဖြစ်ပျက်နေသောအရာများက ပို၍အရေးပါသောအခြေအနေများ၏ ရှေ့ပြေးနိမိတ်ဖြစ်နိုင်သလော။ ယခုအခါ ကမ္ဘာတစ်ဝန်းတွင် သမ္မာကျမ်းစာကြိုဟောထားသည့်အတိုင်း “မတရားမှုတိုးများလာခြင်း” က ဤလောကစနစ်တစ်ခုလုံး ဆုံးခန်းတိုင်တော့မည့် အမှတ်လက္ခဏာတစ်ခုလော။—မဿဲ ၂၄:၃-၈၊ ၁၂-၁၄; ၂ တိမောသေ ၃:၁-၅။
ကမ္ဘာချီယိုယွင်းမှု
ယူဂန္ဓာနိုင်ငံ၏ဒေသတစ်ခုရှိ ဆင်းရဲသားရပ်ကွက်များ၌ ဖြစ်ပွားသော “လိင်ဆိုင်ရာမတော်မတရားပြုမှုနှင့် အပြာရုပ်ပုံစာပေများအကြောင်း အလုပ်ရုံဆွေးနွေးပွဲ” နှင့်ပတ်သက်၍ ၂၀၀၆၊ ဇွန်လ ၂၂ ရက်ထုတ် Africa News သတင်းစာက “ယင်းဒေသတွင် ပြည့်တန်ဆာလုပ်ငန်းနှင့် မူးယစ်ဆေးအလွဲသုံးမှု တိုးများလာရခြင်းမှာ မိဘများ၏ လျစ်လျူရှုမှုကြောင့်ဖြစ်သည်” ဟုဆိုခဲ့သည်။ ၎င်းသတင်းစာတွင် ဤသို့ဖော်ပြထား၏– “ကာဝမ်ပီရဲဌာနရှိ ကလေးနှင့်မိသားစုကာကွယ်ရေးယူနစ်မှ တာဝန်ခံအရာရှိဖြစ်သူ မစ္စတာ ဒါဘန်ဂျီဆလွန်ဂိုက ကလေးများအား မတော်မတရားပြုသည့်နှုန်းနှင့် အိမ်တွင်းအကြမ်းဖက်သည့်နှုန်းတို့မှာ အလွန်တရာ တိုးများလာနေကြောင်း ပြောကြားသွားသည်။”
အိန္ဒိယနိုင်ငံမှ စိတ်ရောဂါအထူးကုဆရာဝန်တစ်ဦး၏အဆိုအရ “လူ့အဖွဲ့အစည်းတွင် ယင်း၏ယဉ်ကျေးမှုဆိုင်ရာအမွေအနှစ် ပျောက်ဆုံးနေသည်။” ယင်းနိုင်ငံမှ ရုပ်ရှင်ဒါရိုက်တာတစ်ဦးက “မူးယစ်ဆေးဝါးအသုံးပြုမှုနှင့် လိင်ရှုပ်ပွေမှု တိုးများလာခြင်းသည် ‘အနောက်တိုင်းပုံစံ အပျော်အပါးလိုက်စားမှု’ ထဲသို့ ကျဆင်းနေသည့် အိန္ဒိယနိုင်ငံ၏ နောက်လက္ခဏာတစ်ရပ်ဖြစ်” ကြောင်း ပြောဆိုခဲ့သည်။
ပေကျင်းမြို့တော်ရှိ ချိုင်းနားလိင်မှုဗေဒအသင်း၏ အထွေထွေအတွင်းရေးမှူးချုပ်ဖြစ်သူ ဟူပေချန်က “ယခင်က ကျွန်ုပ်တို့နိုင်ငံတွင် အမှားအမှန်သိမြင်နိုင်စွမ်းရှိခဲ့၏။ ယခုတွင်မူ ကျွန်ုပ်တို့စိတ်ကြိုက် ပြုမူနိုင်ကြ၏” ဟုဆိုသည်။ ချိုင်းနားတူဒေး မဂ္ဂဇင်းပါ ဆောင်းပါးတစ်ပုဒ်က ယင်းကို ဤသို့ဖော်ပြခဲ့သည်– “လူ့အဖွဲ့အစည်းသည် အိမ်ထောင်ရေးဖောက်ပြန်မှုကိုပင် ပို၍သည်းခံလာနေပြီ။”
“လူတိုင်း မိမိတို့၏ကိုယ်ခန္ဓာကို ဖော်ချွတ်ပြသနေကြပြီး လိင်ကိုဗန်းပြ၍ ရောင်းဝယ်ဖောက်ကားနေကြပုံရသည်။ လွန်ခဲ့သည့် လူမျိုးဆက်တစ်ဆက်ခန့်လောက်ကဆိုလျှင် ယင်းသို့သောလုပ်ရပ်အပေါ် လူအများက အလွန်အမင်း ဒေါသထွက်ခဲ့ကြ၏။ ယနေ့တွင်မူ မည်သည့်နေရာ၌မဆို ပုံစံအမျိုးမျိုးဖြင့် ရနိုင်သည့် လိင်နှင့်ပတ်သက်သောပုံရိပ်များက ကျွန်ုပ်တို့ကို တရစပ်ထိုးနှက်တိုက်ခိုက်နေပြီး အပြာရုပ်ပုံစာပေမှာ . . . လူတိုင်းလက်ခံသောအရာ ဖြစ်နေပြီ” ဟု အင်္ဂလန်နိုင်ငံထုတ် Yorkshire Post သတင်းစာတွင် မကြာသေးမီက မှတ်ချက်ချထား၏။ ယင်းသတင်းစာက ထပ်ဆိုသည်မှာ “ယခင်က အသက် ၁၈ နှစ်အထက်ရှိသူများသာ ကြည့်ခွင့်ရှိသော စာပေမဂ္ဂဇင်းနှင့် ရုပ်ရှင်များကို ယခု မိသားစုလိုက် ကြည့်ရှုနေကြပြီး အပြာရုပ်ပုံစာပေ ဆန့်ကျင်ရေးသမားများ၏အဆိုအရ ယင်းအပြာစာပေရုပ်ပုံများသည် ကလေးသူငယ်များကို အဓိကပစ်မှတ်ထားလေ့ရှိ၏။”
The New York Times မဂ္ဂဇင်းက ဤသို့ဆို၏– “[ဆယ်ကျော်သက်အချို့] သည် [၎င်းတို့၏ လိင်ဆိုင်ရာ၊ အတွေ့အကြုံများ] အကြောင်းကို စားသောက်ဆိုင်တွင် နေ့လယ်စာအတွက် မည်သည့်အစားအစာ မှာယူနိုင်ကြောင်း ပြောဆိုနေသကဲ့သို့ပင် ပွင့်ပွင့်လင်းလင်း ပြောဆိုနေကြသည်။” ၈ နှစ်မှ ၁၂ နှစ်အရွယ် ကလေးများအတွက် မိဘလမ်းညွှန်မဂ္ဂဇင်းတစ်စောင်ဖြစ်သော Tweens News တွင် ဖော်ပြထားသည်မှာ “မိန်းကလေးတစ်ဦးသည် မိမိ၏လက်ရေးဖြင့် စာတစ်စောင်ကို ဤသို့ကြေကွဲစွာ ရေးသားထား၏– ‘ကျွန်မရဲ့အမေက ကျွန်မကို အပြင်ထွက်ပြီး ယောက်ျားလေးတွေနဲ့ချိန်းတွေ့ဖို့၊ လိင်ဆက်ဆံဖို့ ဖိအားပေးနေတယ်။ ကျွန်မအသက်က ၁၂ နှစ်ပဲရှိသေးတာ။ . . . ကယ်ကြပါဦး!’ ”
ခေတ်ကာလမှာ အလွန်ပင် ပြောင်းလဲခဲ့လေပြီ! သိပ်မကြာသေးမီက “လက်မထပ်ဘဲ အတူပေါင်းသင်းနေထိုင်ကြသည့် လိင်တူဆက်ဆံသောယောက်ျား သို့မဟုတ် မိန်းမများ၏ ကိုယ်ကျင့်တရားဆိုင်ရာခံယူချက်မှာ ထိတ်လန့်တုန်လှုပ်ဖွယ်ရာဖြစ်သည်” ဟုကနေဒါနိုင်ငံထုတ် Toronto Star သတင်းစာတွင် ဖော်ပြထားသည်။ သို့သော် အော့တဝါပြည်နယ်၊ ကာလ်တန်တက္ကသိုလ်မှ လူမှုရေးဆိုင်ရာသမိုင်းဘာသာပြ ဆရာမဖြစ်သူ ဘာဘရာဖရီးမဲန်းက ဆိုလေသည်မှာ “ယခုအခါ လူတို့သည် ‘ကိုယ့်ဘဝနဲ့ကိုယ်ပဲ။ ဘယ်သူမှ ဝင်စွက်ဖက်စရာမလိုဘူး’ ဟုပြောဆိုနေကြ၏။”
လွန်ခဲ့သည့် ဆယ်စုနှစ်အနည်းငယ်တစ်လျှောက်တွင် ကမ္ဘာ့ဒေသများစွာ၌ ကိုယ့်ကျင့်တရား လျင်မြန်စွာ ပျက်ပြားလာခဲ့သည်။ အဘယ်အရာက ထိုသို့ လုံးလုံးလျားလျား ပြောင်းလဲစေခဲ့သနည်း။ ယင်းပြောင်းလဲမှုများနှင့်ပတ်သက်၍ သင် မည်သို့ခံစားရသနည်း။ ဤပြောင်းလဲမှုများက အဘယ်အနာဂတ်ကို ညွှန်ပြသနည်း။