လူငယ်များ​အမေး . . .

ဘာကြောင့် ငါ့ကို တခြား​သူတွေနဲ့ အမြဲ နှိုင်းယှဉ်​ရတာလဲ

“ကျွန်မ​ရဲ့​မိဘ ဒါမှ​မဟုတ် ဆရာ​ဆရာမ​တွေ​က ကျွန်မ​ကို တခြား​သူတွေနဲ့​နှိုင်းယှဉ်​ရင် အရမ်း​စိတ်ဆိုး​တာ​ပဲ။”—မီ​ယာ။ *

“ကျွန်မ နဂို​ကတည်းက​မှ သူ့လို​ဖြစ်ချင်​နေတာကို သူနဲ့​မှ အ​နှိုင်းယှဉ်​ခံရ​တော့ ကျွန်မ​ဟာ အသုံးမကျ​တော့​သလို ခံစား​ရတယ်။”—အေ​ပ​ရ​ယ်လ်။

ကျောင်းတွင် သင့်​အတန်းဖော်​လောက် သင်္ချာ​မတော်​သဖြင့် သင့်​ဆရာ​က သင့်ကို​ဆူ​ပေမည်။ အိမ်​တွင် သင့်​အစ်မ​လောက် သပ်ရပ်​မှုမရှိ​သည့်​အတွက် သင့်​မိဘ​က သင့်ကို​ဆူ​ပေမည်။ တစ်စုံ​တစ်ယောက်​က “နင့်​အမေ နင့်​အရွယ်​တုန်း​က​ဆိုရင် အရမ်း​လှ​တာ​ပဲ” ဟု​ပြော​သည့်​အခါ သင် အခံရခက်​ပေမည်။ ထိုသို့​ပြောဆိုခြင်း​က မိမိ​အား အကျည်းတန်​သူ​အဖြစ် ထို​သူ ရှုမြင်​နေပြီ​လော​ဟု အတွေး​ဝင်​စေ​၏။ “လူတွေက ငါ့ကို ငါ​လို့ ဘာကြောင့်​မမြင်နိုင်​ကြ​တာလဲ၊ ဘာကြောင့် ငါ့ကို တခြား​သူနဲ့ အမြဲ​နှိုင်းယှဉ်​ရတာလဲ” ဟု​အော်ဟစ်​လို​စိတ် ပေါက်​လာပေမည်။

နှိုင်းယှဉ်​ခြင်း​သည် အဘယ်ကြောင့် ဤမျှ​ခံရ​ခက်​စေ​သနည်း။ ထိုသို့​ပြုခြင်း​က ကောင်းကျိုး​တစ်စုံတစ်ရာ​ရှိစေ​နိုင်​သလော။ လူတို့သည် သင့်​အား အခြား​သူများ​နှင့်​နှိုင်းယှဉ်​သည့်​အခါ ယင်းကို သင် မည်သို့​အောင်မြင်စွာ ဖြေရှင်း​နိုင်​သနည်း။

နှိုင်းယှဉ်​ခံရ​ခြင်း​သည် အဘယ်ကြောင့် ခံရ​ခက်​သနည်း

နှိုင်းယှဉ်​ခံရ​ခြင်း​က ခံရ​ခက်​စေသည့်​အကြောင်းရင်း​တစ်ခု​မှာ ယင်းသည် တစ်ခါတစ်ရံ ပုဂ္ဂိုလ်ရေး​ကို တိုက်ရိုက်​ထိခိုက်​သောကြောင့်​ဖြစ်၏။ အမှန်ဆိုလျှင် လူ​တို့​ပြောဆို​နေသော​အရာ​သည် သင့်ကိုယ်ကို​သင် ပြော​နေသော​အရာ ဖြစ်နေ​ပေမည်။ ဥပမာ၊ “ကျောင်း​မှာ နာမည်ကြီး​နေတဲ့​လူငယ်တွေကို ကြည့်​ပြီး ‘ငါ​သာ သူတို့​လို​ဖြစ်​ရင် ငါ့ကို​လည်း လူတွေ သဘောကျ​ကြ​မှာပဲ’ လို့​စဉ်းစား​မိတယ်” ဟု ဗက်ကီ က​ဝန်ခံ​သည်။

ဤသို့​သော ကိုယ့်​ကိုယ်ကို ယုံကြည်မှု​နည်း​သည့်​ခံစားချက်​များ​ကို အဘယ်အရာက ဖြစ်ပေါ်​စေ​သနည်း။ သင်၏ ကာယပိုင်း၊ စိတ်​လှုပ်ရှားမှု​နှင့် စိတ်ပိုင်း​တို့​တွင် မည်သို့​ဖြစ်နေ​သည်ကို သုံးသပ်ကြည့်​ပါ။ သင်၏​ခန္ဓာကိုယ်​သည် ရုတ်ခြည်း ပြောင်းလဲ​သွား​နိုင်​စ​ရာ​အကြောင်း ရှိ​ပေမည်။ သင်သည် မိဘများနှင့် ပြောဆို​ဆက်ဆံ​ရ ပို​၍​ခက်​လာပေမည်။ လိင်​ခြား​သူနှင့်​ပတ်သက်​၍ သင်၏​သဘောထား​က​လည်း အတော်အတန် ပြောင်းလဲ​သွားပေ​မည်။ ထို့​ကြောင့် ‘ငါ ပုံမှန်​မှ​ဟုတ်ရဲ့လား’ ဟူ၍ သင်​တွေး​ပေမည်။

အဖြေ​ရရှိနိုင်​သည့် တစ်ခု​တည်း​သော​နည်းလမ်း​မှာ ထိုသို့​သော​ပြောင်းလဲမှု​များ​တွေ့ ကြုံနေ​သည့် အခြား​လူငယ်များနှင့် သင့်ကိုယ်​သင် နှိုင်းယှဉ်​ခြင်း​ဖြစ်သည်ဟု သင် ယူဆ​ပေမည်။ ယင်းက သင့်ကို ထင်ယောင်ထင်မှား​ဖြစ်စေ​နိုင်​သည်။ သူတို့သည် သင့်​ထက် သာ​နေ​ပုံ​ပေါက်​မည်​ဆိုလျှင် သင့်ကိုယ်​သင် ယုံကြည်မှု​နည်းလာ​ပေမည်။ ထို​အချိန်တွင် လူကြီး​အချို့​က ‘‘မင်း ဟို​တစ်ယောက်​နဲ့ ဘာကြောင့်​မတူ​နိုင်​ရတာလဲ’ ဟု​မေး​လှာ​သောအခါ သင်​စိုးရိမ်​နေသည့်​အတိုင်း မိမိ​ပုံမှန်​မဟုတ်​သည်​မှာ သေချာ​နေပြီ​ဟု ခံစားရ​ပေမည်။

နှိုင်းယှဉ်​ခံရ​ခြင်း​က ခံရ​ခက်​စေနိုင်​သည့် နောက်​အကြောင်းရင်း​တစ်ခု​ကို အေ​ပ​ရ​ယ်လ်​က ဤသို့​ထောက်ပြ​သည်– “လူတွေက သင့်ကို တခြားသူ​တစ်ဦး​နဲ့၊ အထူးသဖြင့် သင်နဲ့​ရင်းနှီး​သူ​တစ်ဦး​နဲ့ နှိုင်းယှဉ်​တဲ့​အခါ မနာလို​စိတ်​နဲ့ မခံ​ချင်စိတ်​တွေ​ဖြစ်ပေါ်​လာနိုင်တယ်။” ထိုသို့​ဖြစ်​နိုင်​သည်ကို မီ​ယာ သိထား​၏။ သူ၏​မိဘများနှင့် ဆရာ၊ ဆရာမ​များ​က သူ့ကို သူ၏​အစ်မ​နှင့် အမြဲ​နှိုင်းယှဉ်​နေ​ပုံ​ရသည်။ “ကျွန်မ​အစ်မ ကျွန်မ​အရွယ်​တုန်း​က ပြီးမြောက်​အောင်မြင်​ခဲ့​တဲ့​အရာ​တွေ​ကို သူတို့​ပြောပြ​ကြတယ်” ဟု မီ​ယာ​က​ဆို​၏။ ယင်းက သူ့ကို မည်သို့​ခံစား​စေ​သနည်း။ “ကျွန်မ​အစ်မ​နဲ့ ကျွန်မ ယှဉ်ပြိုင်​နေရ​သလို ခံစား​ရတယ်။ တစ်ခါ​တ​လေ သူ့ကို မကျေနပ်​တဲ့​အထိ​တောင် ဖြစ်လာ​တယ်။”

နှိုင်းယှဉ်​ခြင်း​သည် အမှန်ပင် ဆိုးကျိုး​ဖြစ်စေ​နိုင်၏။ ယေရှု၏ အရင်းနှီးဆုံး​အပေါင်းအဖော်​များ​တွင် မည်သို့ ဖြစ်ပျက်​ခဲ့​ကြောင်း သုံးသပ်ကြည့်​ပါ။ ယေရှု​မသေဆုံးမီ နောက်ဆုံး​ညနေခင်း​တွင် တမန်​တော်​များ​အချင်းချင်း “ငြင်းခုံ” ခဲ့​ကြသည်။ အဘယ်ကြောင့်​နည်း။ သူတို့သည် တစ်ဦး​နှင့်​တစ်ဦး​နှိုင်းယှဉ်​ကာ “မိမိတို့​တွင် အဘယ်သူ​သည် သာ၍​ကြီးမြတ်​သနည်း” ဟူ၍ ငြင်းခုံ​နေကြ​သည်။ (လုကာ ၂၂:၂၄) နှိုင်းယှဉ်​မှု​ပုံစံ​အချို့​သည် အမှန်ပင် အကျိုးယုတ်​စေနိုင်​သည်။ သို့သော် နှိုင်းယှဉ်​မှု​အားလုံး သည် အကျိုးယုတ်​စေ​သလော။

အကျိုးပြုသော နှိုင်းယှဉ်​မှုများ

ကျမ်းစာ​တွင်​ဖော်ပြ​ထား​သည့် လူငယ်​ဒံယေလ​နှင့် သူ၏​ဟေဗြဲ​အဖော်​သုံးဦး​အကြောင်း သုံးသပ်ကြည့်​ပါ။ ဤ​လူငယ်များသည် ဘုရားသခင့်​ပညတ်တော်​က တားမြစ်​ထား​သည့် ဗာဗုလုန်​ဘုရင်​၏ စားကောင်း​သောက်​ဖွယ်​များ​ကို မစားသုံး​လို​ခဲ့​ကြ​ပေ။ (ဝတ်ပြုရာ ၁၁:၄-၈) မိမိတို့ကို စား​တော်​ကဲ လက်ခံ​ယုံကြည်​လာ​စေရန် ဒံယေလ​သည် စမ်းသပ်မှု​တစ်ခု​ပြုလုပ်​ဖို့ အဆိုပြု​ခဲ့​၏။ ဘုရားသခင့်​ပညတ်တော်​က​ခွင့်ပြု​သည့် အစားအစာကို ဆယ်ရက်​စား​ပြီး​နောက်​တွင် ဟေဗြဲ​လူငယ်များနှင့် နန်းတွင်း​ရှိ အခြား​လူငယ်များ​ကို နှိုင်းယှဉ်​ရန် စား​တော်​ကဲ​အား ဒံယေလ​အဆိုပြု​ခဲ့​သည်။ ရလဒ်​ကား အဘယ်နည်း။

သမ္မာကျမ်းစာ​က ဤသို့​ရှင်းပြသည်– “ဆယ်ရက်​စေ့​လျှင် [ဟေဗြဲ​လူတို့၏] မျက်နှာ​သည် ပွဲတော်​မှ​ကြွင်း​သော​အစာကို​စား​သော လူပျို​အပေါင်း​တို့၏​မျက်နှာ​ထက် အဆင်းလှ​၍ ဖွံ့ဝ​လျက်​ရှိ၏။” (ဒံယေလ ၁:၆-၁၆) ဒံယေလ​နှင့် သူ၏​အပေါင်းအဖော်​တို့သည် အခြား​လူငယ်များ​ထက် တစ်နည်း​နည်းဖြင့် သာ​နေသော​ကြောင့် ရလဒ်ကောင်း​ရခဲ့​ခြင်း​မဟုတ်​ကြောင်း သတိပြုပါ။ ယင်းအစား အဓိက​အကြောင်းရင်း​မှာ ဟေဗြဲ​လူငယ်များသည် မိမိ၏​လူမျိုး​အား ဘုရားသခင်​ပေး​ထားသော​ပညတ်​များ​ကို လိုက်နာ​ရန် ရွေးချယ်​ခဲ့​ခြင်း​ကြောင့်​ဖြစ်၏။

ဤ​ဟေဗြဲ​လူငယ်များ​၏ အခြေအနေ​မျိုး​တွင် သင်​ရောက်ရှိ​နေ​သလော။ သင်သည် ကျမ်းစာ​ပါ ကိုယ်ကျင့်တရား​စံနှုန်း​များနှင့်​အညီ​နေထိုင်​လျှင် အခြား​လူငယ်များနှင့် လုံးဝ​ကွာခြား​နေ​ပေမည်။ ဤ​ကွာခြားမှု​ကို သတိပြုမိ​သူ​အချို့​သည် စဉ်းစား​ရ​ခက်​ပြီး “ကဲ့ရဲ့” ကြ​ပေမည်။ (၁ ပေတရု ၄:၃၊ ၄) သို့သော် အခြားသူ​တို့​မူ သင်၏​အမူအကျင့်ကောင်း​ကြောင့် ပေါ်ထွက်​လာသော ရလဒ်ကောင်း​များ​ကို တွေ့ မြင်​ကာ ယေဟောဝါ​အကြောင်း သင်ယူ​လေ့လာ​ရန်​ပင် လှုံ့ဆော်​ခံရ​ပေမည်။ (၁ ပေတရု ၂:၁၂) ဤ​အခြေအနေ​မျိုး​တွင် အခြား​သူများ​နှင့်​နှိုင်းယှဉ်​ခံရ​ခြင်း​သည် ကောင်းကျိုး​ဖြစ်စေ​နိုင်​သည်။

နှိုင်းယှဉ်​ခြင်း​သည် နောက်တစ်နည်း​ဖြင့်​လည်း အကျိုးပြု​နိုင်​သည်။ ဥပမာ၊ သင်သည် သင်၏​အစ်ကို သို့​မဟုတ် အစ်မ​နှင့် သင့်ကိုယ်​သင် နှိုင်းယှဉ်​ကြည့်​သည့်​အခါ သင်​လုပ်​ရမည့်​အိမ်​အလုပ်ကို ကျေပွန်​စွာ​လုပ်​သည်​ဟု ယူဆ​ပေမည်။ သို့သော် သင့်​မိဘများ က​မူ ထိုသို့ ရှုမြင်​ချင်​မှ ရှုမြင်​ပေမည်။ သင်၏​သဘောထားကို ပြုပြင်​တည့်မတ်​ပေး​ရန် သူတို့သည် ကျမ်းစာ​စံနမူနာ​တစ်ခု​ကို အသုံးပြု၍ သင်၏​သဘောထား​နှင့် လုပ်ရပ်များ​ကို ကျမ်းစာ​ထဲ​မှ ပုဂ္ဂိုလ်​တစ်ဦး၏ သဘောထား၊ လုပ်ရပ်များနှင့် နှိုင်းယှဉ်​ကြည့်​ရန် ပြောဆို​ပေမည်။

ဥပမာ၊ ယေရှုသည် သခင်​နှင့် ဆရာ​ဟူ၍ အခေါ်​ခံရ​သော်လည်း ကိုယ်တော်​သည် တပည့်​များ​၏​ခြေ​ကို တလိုတလား​ဆေး​ပေး​ခဲ့​သည်ကို မိဘများ​က သင့်​အား ပြန်​အမှတ်​ရစေ​ပေမည်။ (ယောဟန် ၁၃:၁၂-၁၅) ထို့နောက် ယေရှု၏ နှိမ့်ချ​ပြီး အလုပ်​ကြိုးစား​သော သဘောထားကို​တုပ​ရန် သင့်ကို သူတို့ အားပေး​ပေမည်။ အမှန်ဆိုလျှင် ခရစ်ယာန်​လူကြီး၊ လူငယ်​အားလုံး မိမိတို့​ကိုယ်ကို ခရစ်တော်​နှင့် အမြဲ​နှိုင်းယှဉ်​ကာ ကိုယ်တော်​၏ ‘ခြေရာ​ကို အနီးကပ်​လိုက်လျှောက်’ ရန် ကြိုးစား​ကြဖို့ သမ္မာကျမ်းစာ​က တိုက်တွန်း​သည်။ (၁ ပေတရု ၂:၂၁) ဤ​နှိုင်းယှဉ်​မှု​မျိုး​က ကျွန်ုပ်​တို့ကို နှိမ့်ချမှု​ရှိစေပြီး ယေဟောဝါ ပိုမို​နှစ်သက်သော အရည်အသွေးများ​ကို မွေးမြူရန် ကူညီ​ပေး​သည်။

အပျက်သဘော​နှိုင်းယှဉ်​မှုများ​ကို​ရင်ဆိုင်​ဖြေရှင်းခြင်း

သင်သည် မွေးချင်း​တစ်ဦး သို့​မဟုတ် ရွယ်တူချင်း​တစ်ဦး​နှင့် မနှစ်မြို့​စွာ​နှိုင်းယှဉ်​ခံရ​လျှင် အမှန်ပင် စိတ်ဆိုး​စ​ရာ၊ စိတ်ဓာတ်ကျ​စ​ရာ​ဖြစ်​နိုင်​သည်။ ယင်းကို သင် မည်သို့​ဖြေရှင်း​နိုင်​သနည်း။ ပညာရှိ​ရှောလမုန်​ဘုရင်​က “သတိ [“ထိုးထွင်း​သိမြင်မှု၊” က​ဘ] ရှိသောသူ​သည် မိမိ​အမျက်​ဒေါသကို ချုပ်တည်း​တတ်၏” ဟု​ဆို​သည်။ (သု. ၁၉:၁၁) ထိုးထွင်း​သိမြင်မှု​က မည်သို့​ကူညီ​ပေး​နိုင်​သနည်း။ နှိုင်းယှဉ်​မှု​ပြု​သည့် မိဘ သို့​မဟုတ် ဆရာ၊ ဆရာမ​တစ်ဦး​သည် သင်၏​ကောင်းကျိုး​ကို စိတ်ဝင်စားခြင်း​ဖြစ်​နိုင်​သော်လည်း သင်က​မူ ထိုသို့​ထင်​ချင်​မှ​ထင်​ပေမည်။ “တစ်ဦးဦး​က ကျွန်မ​ကို တခြား​သူတွေနဲ့​နှိုင်းယှဉ်​တဲ့​အခါ ‘သူတို့ ငါ့ကို​ကူညီ​ပေး​ဖို့ ကြိုးစား​နေတာ​များလား’ လို့ ကိုယ့်​ကိုယ်ကို​မေးတယ်” ဟု ကေ​သီ​က​ဆို​၏။ ယင်းကို အကောင်း​ဘက်​မှ ရှုမြင်ခြင်း​ဖြင့် စိတ်ပျက်​အားငယ်​စ​ရာ သို့​မဟုတ် စိတ်ဆိုး​စ​ရာ​အကြောင်း မရှိတော့​သည်ကို ကေ​သီ​တွေ့ရှိ​ရ၏။

သို့သော် သင်သည် အခြား​သူများ​နှင့် အမြဲ​နှိုင်းယှဉ်​ခံ​နေရ​သည်​ဟု ခံစားရ​လျှင်​ကော။ ဥပမာ၊ မိဘ​တစ်ဦး​သည် သင့်ကို မွေးချင်း​တစ်ဦး​နှင့် အပျက်​သဘောဖြင့် အမြဲ​နှိုင်းယှဉ်​နေ​ပုံ​ရ​ပေမည်။ သင်သည် မိဘ​ထံ​ချဉ်းကပ်​ကာ ထိုသို့​နှိုင်းယှဉ်​ခြင်း​က သင့်​အား မည်သို့​ခံစားရ​စေ​သည်ကို လေးစား​စွာ​ရှင်းပြ​လို​ပေမည်။ ထိုသို့​နှိုင်းယှဉ်​ခြင်း​က သင့်​အား စိတ်ဓာတ်ကျ​စေ​သည်ကို သင့်​မိဘများ သတိ​မထား​မိ​ခြင်း​ဖြစ်​နိုင်​သည်။

သို့သော် “စကားပြော​ရသော​အချိန်” သာမက “တိတ်ဆိတ်​စွာ​နေရ​သော​အချိန်” လည်း​ရှိကြောင်း သတိရပါ။ (ဒေ. ၃:၇) နောက်​တစ်ခါ နှိုင်းယှဉ်​လာ​သည့်​အခါ ဒေါသ​ပေါက်ကွဲ​မည့်​အစား စိတ်​ပြေ​သည်​အထိ​စောင့်ပါ။ ထို့နောက် မနှစ်မြို့ဖွယ်​နှိုင်းယှဉ်​မှု​ပြု​သည့် သင့်​မိဘ သို့​မဟုတ် မည်သူ​မဆို​နှင့် စကား​ပြောဆို​ပါ။ ထိုသို့ ပြု​မည်​ဆိုလျှင် သင်​ပြော​သော​စကား​သည် ပို​၍​လက်ခံနိုင်စရာ​ဖြစ်​ပေမည်။—သု. ၁၆:၂၃။

သင်သည် မိမိ​တွင်​ရှိသည့် အရည်အသွေးကောင်း​များ​ကို သိရှိ​ထားခြင်း​ဖြင့် အပျက်သဘော​နှိုင်းယှဉ်​မှု​ကြောင့် ဖြစ်ပေါ်​လာ​သည့် စိတ်ထိခိုက်မှု​ကို လျော့နည်း​စေနိုင်​ပါ​သည်။ တမန်​တော်​ပေါလု​က တိမောသေ​အား “သင်၏​အသက်အရွယ်​နုပျို​သည်ကို အဘယ်သူမျှ မထီမဲ့မြင်​မပြု​စေ​နှင့်” ဟု​မှာကြား​ခဲ့​သည်။ (၁ တိမောသေ ၄: ၁၂) တိမောသေ​သည် ခရစ်ယာန်​ကြီးကြပ်မှူး​တစ်ဦး​အဖြစ် အမှုထမ်း​ရန် ခန့်အပ်​ခံရ​ချိန်​တွင် အသက်ငယ်​သေး​သည်။ ထို့​ကြောင့် အချို့​သူတို့က တိမောသေ​ကို သူ့​ထက် အသက်​ပို​ကြီး​ပြီး အတွေ့အကြုံ​ပို​ရှိသည့် အခြား​အမျိုးသားများ​နှင့် မနှစ်မြို့ဖွယ် နှိုင်းယှဉ်​မှုများ ပြု​ခဲ့​ကြ​ပေမည်။ သို့သော် ထိုသို့​အပျက်သဘော​နှိုင်းယှဉ်​မှုများ​သည် ကျိုးကြောင်း​ညီညွတ်မှု​မရှိပေ။ တိမောသေ​သည် အသက်ငယ်​သော်လည်း ပေါလု​နှင့်အတူ နယ်လှည့်​ခရီးထွက်​စဉ် အတွေ့အကြုံ​များစွာ​ရရှိခဲ့သည်။ ဘုရားသခင့်​စကားတော်​ကို မည်သို့​ထိရောက်​စွာ​အသုံးပြု​ရမည်ကို တိမောသေ သိထား​၏။ ထို့ ပြင် သူသည် ဝိညာဉ်​ရေး​ညီအစ်ကို၊ ညီအစ်မ​များ​ကို စိတ်ရင်းမှန်​ဖြင့် ဂရုစိုက်​ကြည့်ရှု​ခဲ့​သည်။—၁ ကောရိန္သု ၄:၁၇; ဖိလိပ္ပိ ၂:၁၉၊ ၂၀။

ထို့​ကြောင့် သင်သည် နောက်​တစ်ကြိမ် အပျက်​သဘောဖြင့်​နှိုင်းယှဉ်​ခံရ​လျှင် ‘သူတို့​ပြစ်တင်​ဝေဖန်တာ​ဟာ ကျိုးကြောင်း​ညီညွတ်မှု​ရှိရဲ့လား’ ဟု သင့်ကိုယ်​သင် မေးပါ။ သူတို့​ပြော​သော​စကား​တွင် မှန်ကန်​သည့်​အရာ​တချို့​ပါ​နေလျှင် ယင်း​မှ သင်ယူ​ရန် ကြိုးစား​ပါ။ သို့သော် “မင်းရဲ့​အစ်ကို​နဲ့ ဘာကြောင့်​မတူ​နိုင်​ရတာလဲ” ဟူသော သိမ်း​ကျုံး​နှိုင်းယှဉ်​မှု​မျိုး​ဆိုလျှင် ယင်း​ပြောဆိုချက်​ကို အရှိအတိုင်း​ရှုမြင်​ရန် ကြိုးစား​ပါ။ ထိုသို့​သော​နှိုင်းယှဉ်​မှု​ကို အပြု​သဘောဖြင့် ရှုမြင်​ရန် အတတ်နိုင်ဆုံး​ကြိုးစား​ပါ။

ယေဟောဝါ​ဘုရားသခင်​သည် သင့်​အား အခြား​မစုံလင်သူ​တစ်ဦး​နှင့် နှိုင်းယှဉ်​ခြင်း​ဖြင့် သင့်​တန်ဖိုး​ကို မ​တိုင်းတာ​ပါ။ (ဂလာတိ ၆:၄) ကိုယ်တော်​သည် အပြင်ပန်း​သဏ္ဌာန်​ကို ကျော်​၍​ကြည့်​ကာ သင်၏​စိတ်ရင်း​ကို သိ​နားလည်​တော်​မူ​၏။ (၁ ဓမ္မ​ရာဇဝင် ၁၆:၇) မှန်ပါသည်၊ ယေဟောဝါ​သည် သင် မည်သို့သော​လူစား​ဖြစ်သည်​ကို​သာမက သင် ဖြစ်​လို​သည့်​အရာ​နှင့် ယင်းကို သင်​မည်သို့ ကြိုးစား​လုပ်ဆောင်နေ​သည်ကို​ပါ တွေ့ မြင်တော်မူ​၏။ (ဟေဗြဲ ၄:၁၂၊ ၁၃) ကိုယ်တော်​သည် သင်၏​ချို့ယွင်းချက်​များ​ကို ထည့်သွင်း​စဉ်းစား​ကာ သင်၌​ရှိသည့် အရည်အသွေးကောင်း​များ​ကို ရှာဖွေ​တော်​မူ​၏။ (ဆာလံ ၁၃၀:၃၊ ၄) ဤ​အမှန်တရားကို သိရှိ​ထားခြင်း​က အခြား​သူများ​နှင့် သင် နှိုင်းယှဉ်​ခံရ​သည့်​အခါ ရင်ဆိုင်​ဖြေရှင်း​နိုင်​ပေမည်။

[အောက်ခြေမှတ်ချက်]

ချ​င့်​တွေးစရာ

▪ မည်သို့သော​နှိုင်းယှဉ်​မှုများ​က သင့်ကို ဒေါသ​ထွက်​စေ​သနည်း။

▪ သင့်​မိဘများ​က သင့်ကို အခြား​သူများ​နှင့် အမြဲ​နှိုင်းယှဉ်​နေ​မည်​ဆိုလျှင် ယင်းကို သင်​မည်သို့ ဖြေရှင်း​မည်​နည်း။

 [စာမျက်နှာ ၁၂ ပါ အကျဉ်း​ဖော်ပြချက်]

“ကျွန်မ​ကို တခြားသူ​တစ်ဦး​ရဲ့​အမည်တပ်​ပြီး ‘မင်း သူ့လိုမျိုး​ဖြစ်သင့်တယ်’ လို့​အကြံပေး​တာ​ထက် ကျွန်မ​ရဲ့ ကောင်းကွက်​တွေ​ကို အရင်ဆုံး​ချီးမွမ်း​ပြီး ကျွန်မ​ရဲ့​အားနည်းချက်တွေကို သိမြင်​လာအောင် မေတ္တာပါပါ​ကူညီ​ပေး​တာ​ကို ပို​ကြိုက်တယ်။”—နာ​တာ​လီ

 [စာမျက်နှာ ၁၃ ပါ ရုပ်ပုံ]

နှိုင်းယှဉ်​မှုများ​ပြုခြင်း​က သင့်​အား​မည်သို့​ခံစားရ​စေ​သည်ကို လေးစား​စွာ ရှင်းပြ​လို​ပေမည်