ငွေနောက်လိုက်ခြင်းက သင့်ကို နာမကျန်းဖြစ်စေသလော
ငွေနောက်လိုက်ခြင်းက သင့်ကို နာမကျန်းဖြစ်စေသလော
မနက်ဖြန်တွင် သင် အလွန်ချမ်းသာကြွယ်ဝလာမည်ဆိုပါက ဘာလုပ်မည်နည်း။ အေးအေးဆေးဆေးနေကာ စည်းစိမ်ခံမည်လော။ အလုပ်မှထွက်ပြီး မိသားစု၊ မိတ်ဆွေအပေါင်းအသင်းများနှင့် အချိန်ဖြုန်းမည်လော။ သင်အလွန်နှစ်သက်သည့် သက်မွေးလုပ်ငန်းတစ်ခုကို စတင်လုပ်ကိုင်မည်လော။ စိတ်ဝင်စားစရာမှာ ချမ်းသာကြွယ်ဝလာသူများစွာသည် ယင်းသို့သောအရာများကို မလုပ်ဆောင်ကြချေ။ ယင်းအစား သူတို့၏ကျန်ရှိသောဘဝအသက်တာကို ကြွေးမြီသစ်များပေးဆပ်ရန် သို့မဟုတ် ပိုမိုချမ်းသာကြွယ်ဝရန် ငွေများများရှာခြင်းတွင် မြှုပ်နှံထားကြသည်။
သို့သော် ဤလမ်းစဉ်နောက် လိုက်ခဲ့ကြသူအချို့သည် ရုပ်ဝါဒလိုက်စားမှုကြောင့် မိမိတို့၏ကျန်းမာရေး၊ မိသားစုဘဝနှင့် သားသမီးများ၏ကိုယ်ကျင့်တရားတို့တွင် ထိခိုက်ပျက်စီးခဲ့ရသည်ကို သတိပြုမိလာကြသည်။ မကြာသေးမီက စာအုပ်များ၊ ဆောင်းပါးများ၊ ရုပ်မြင်သံကြားအစီအစဉ်များနှင့် ဗီဒီယိုများတွင် စည်းစိမ်ယစ်မူးခြင်းအန္တရာယ်ကို သတိပေးကာ ရိုးရှင်းသောဘဝပုံစံကို ရွေးချယ်ကြရန် အားပေးလှုံ့ဆော်လာကြသည်။ စည်းစိမ်ဥစ္စာရှာဖွေရေးတွင် လုံးလုံးအာရုံနစ်မြုပ်ထားခြင်းက စိတ်ပိုင်း၊ စိတ်လှုပ်ရှားမှုပိုင်းနှင့် ကာယပိုင်းတို့တွင် နာမကျန်းဖြစ်စေနိုင်ကြောင်း စာပေအတော်များများက ထောက်ပြလာကြသည်။
ရုပ်ဝါဒလိုက်စားမှု၏အန္တရာယ်များနှင့်ပတ်သက်၍ စိုးရိမ်မကင်းဖြစ်ခြင်းမှာ အသစ်အဆန်းမဟုတ်ချေ။ လွန်ခဲ့သော အနှစ် ၂,၀၀၀ နီးပါးက သမ္မာကျမ်းစာတွင် ဤသို့ဖော်ပြထားသည်– “ငွေရတတ်ခြင်းငှာ အလိုရှိသောသူတို့သည် အပြစ်သွေးဆောင်ခြင်း၊ ဖမ်းမိခြင်း၊ မိုက်မဲဖျက်ဆီးတတ်သော တပ်မက်ခြင်းများထဲသို့ ကျရောက်တတ်ကြ၏။ ထိုသို့သောအားဖြင့် လူတို့သည် အကျိုးနည်းခြင်း၊ ပျက်စီးခြင်း၌ နစ်မွန်းတတ်ကြ၏။ အကြောင်းမူကား ငွေကိုတပ်မက်ခြင်းသည် မကောင်းသောအမှုအပေါင်းတို့တွင် မူလအမြစ်ဖြစ်သတည်း။ လူအချို့တို့သည် ငွေကိုတပ်မက်သောကြောင့် ယုံကြည်ခြင်းတရားလမ်းမှလွဲသွား၍ [“နာကျင်ခြင်းဝေဒနာများစွာဖြင့် ကိုယ့်ကိုယ်ကို ထိခိုက်နစ်နာစေခဲ့၊” ကဘ] ကြပြီ။”—၁ တိမောသေ ၆:၉၊ ၁၀။
သို့သော် ယင်းအချက် မှန်ကန်ပါသလော။ ဘဝတွင် ငွေနှင့် ရုပ်ပစ္စည်းစုဆောင်းမှုများကို အဓိကထားကြသူတို့သည် အမှန်တကယ်ပင် ဝေဒနာများခံစားနေရပါသလော။ သို့မဟုတ် ဥစ္စာဓန၊ ကျန်းမာရေး၊ ပျော်ရွှင်သောမိသားစုဘဝ စသည့်အရာအားလုံးကို သူတို့ပိုင်ဆိုင်ကြပါသလော။ ဤမေးခွန်းများကို နောက်ဆောင်းပါးတွင် သုံးသပ်သွားပါမည်။