သင်သည် အရောင်​ကန်း​ခြင်း​ဝေဒနာ ခံစား​နေရ​ပါသလော

“ကျွန်တော်​အဝတ်အစား​ဝတ်​တဲ့​အခါ ကျွန်တော်​ရွေး​တဲ့​အရောင်​တွေ လိုက်ဖက်​ရဲ့​လား​ဆိုတာ​ကို ကျွန်တော့်​ဇနီး​က စစ်ဆေး​ပေး​တယ်။ မနက်စာ​စား​တဲ့​အခါ အသီး​မှည့်​မ​မှည့်​ဆိုတာ မခွဲခြား​နိုင်​တဲ့​အတွက် သူက​ပဲ ရွေး​ပေး​ရတယ်။ အလုပ်မှာ​လည်း ကွန်ပျူတာ​အချက်အလက်​တွေ​ကို အရောင်​နဲ့ ခွဲခြား​ထား​လေ့​ရှိလို့ ကွန်ပျူတာ​ဖန်သားပြင်​ပေါ်​က ဘယ်​နေရာကို​နှိပ်​ရမယ်ဆိုတာ မသိ​နိုင်တာ​က အမြဲလိုလို​ပဲ။ ကားမောင်း​နေတဲ့​အခါမှာလည်း ကျွန်တော့်​အတွက် မီး​နီ​နဲ့ မီး​စိမ်း​က အတူတူ​ဖြစ်နေ​တယ်။ ဒါ​ကြောင့်​လင်း​နေတဲ့​မီး​က အပေါ်​က​လား၊ အောက်​က​လား​ဆိုတာ​ကို ဂရုစိုက်​ရတယ်။ ဒါပေမဲ့ အလျား​လိုက်​ရှိနေတဲ့ ယာဉ်ကြော​ထိန်း​အချက်ပြ​မီး​တွေ​က ပြဿနာ​တစ်ခု​ဖြစ်​နိုင်တယ်” ဟု​ရော့ဒ်​နီ​က​ဆို​သည်။

ရော့ဒ်​နီ​တွင် အရောင်​ကန်း​ခြင်း​ဝေဒနာ ရှိနေ​၏။ မျက်စိ​အတွင်းပိုင်း​ရှိ အလင်းရောင်​ကို​အာရုံခံနိုင်​သော မြင်လွှာ​ကို ချွတ်ယွင်းမှု​ဖြစ်စေ​သည့် မျိုးရိုးလိုက်​ရောဂါ​ကို သူ​ရရှိ​ထား​သည်။ ဥရောပ​မျိုးရိုး​မှ​ဆင်းသက်လာ​သူ အမျိုးသား ၁၂ ဦး​တိုင်း​တွင် တစ်ဦး​ခန့်​နှင့် အမျိုးသမီး ၂၀၀ တိုင်း​တွင် တစ်ဦး​ခန့်​သည် ထို​အခြေအနေ​မျိုး​ရှိရာ ရော့တ်​နီ​လည်း အပါအဝင်​ဖြစ်သည်။ * ဝေဒနာသည်​အများစု​ကဲ့သို့​ပင် ရော့ဒ်​နီ​သည် အနက်​နှင့်​အဖြူရောင်​မှ​လွဲ​၍ အရောင်​အမျိုးမျိုးကို တွေ့မြင်​နိုင်​ပါ​သည်။ သို့သော် အချို့​သော​အရောင်​များ​ကို​မူ ပုံမှန်​အမြင်​အာရုံ​ရှိသူတို့​မြင်​သကဲ့သို့ မမြင်​ချေ။

လူ​၏​မျက်စိ​တွင် ပုံမှန်​အားဖြင့် မြင်လွှာ​၌ အရောင်​ကို​အာရုံခံနိုင်​သည့် က​တော့​ပုံ​ဆဲလ် သုံးမျိုး​ပါရှိ​သည်။ တစ်မျိုးစီ​သည် မူလ​အရောင်​ဖြစ်သော အ​ပြာ၊ အစိမ်း သို့​မဟုတ် အနီရောင်​တို့၏ လှိုင်း​အလျား​ကို​သိနိုင်​ရန် ပုံစံ​ပြု​ထား​ခံရ​သည်။ လှိုင်း​အလျား​အမျိုးမျိုး​၏​အလင်း​သည် ဦးနှောက်ကို​အချက်ပေး​သော သက်ဆိုင်ရာ​က​တော့​ပုံ​ဆဲလ်​များ​ကို လှုပ်ရှား​စေ​ကာ အရောင်​များ​ကို ခွဲခြား​မြင်​စေ​လေ​သည်။ * သို့သော် အရောင်​ကန်း​ခြင်း​ဝေဒနာ ခံစား​နေရသူ​တို့​တွင် အရောင်​တစ်​ရော​င် သို့​မဟုတ် ထို​ထက်​များသော​အရောင်​များ​အပေါ် က​တော့​ပုံ​ဆဲလ်​များ​၏ အာရုံခံနိုင်စွမ်း​မှာ အားနည်းနေ​ရာ သို့​မဟုတ် လှိုင်း​အလျား​အဖြစ် ပြောင်းလဲ​သွား​ရာ အရောင်​အပေါ် ယင်း​တို့၏​တုံ့ ပြန်​မှု​က​လည်း ပြောင်းလဲ​သွားလေသည်။ ဝေဒနာသည်​အများစု​သည် အဝါရောင်၊ အစိမ်းရောင်၊ လိမ္မော်​ရော​င်၊ အနီရောင်​နှင့် အညို​ရော​င်​တို့ကို ခွဲခြား​ရ​ခက်​ကြသည်။ ဤ​ချွတ်ယွင်းချက်​က အညို​ရော​င်​ပေါင်မုန့် သို့​မဟုတ် အဝါရောင်​ဒိန်​ခဲ​ပေါ်​ရှိ အစိမ်းရောင်​မှို​ကို တွေ့မြင်​ရန် အခက်တွေ့​စေနိုင်​သည်။ သို့​မဟုတ် မျက်လုံး​ပြာပြာ၊ ရွှေရောင်​ဆံပင်​ပိုင်ရှင်​ကို မျက်လုံး​စိမ်း​စိမ်း၊ အနီရောင်​ဆံပင်​ပိုင်ရှင်​နှင့် မခွဲခြား​တတ်​ဘဲ​ဖြစ်စေ​နိုင်​သည်။ လူတစ်ဦး​၏ အနီရောင်​ကို​အာရုံခံနိုင်​သော က​တော့​ပုံ​ဆဲလ်​များသည် အလွန်​အားနည်းနေ​မည်​ဆိုလျှင် အနီရောင်​နှင်းဆီ​က အနက်ရောင်​ဖြစ်သွား​ပေမည်။ ဝေဒနာသည်​အနည်းစု​မှာ အပြာရောင်​ကို မတွေ့မြင်​နိုင်​ကြ​ပေ။

အရောင်​ကန်း​ခြင်း​နှင့် ကလေး​သူငယ်​များ

အရောင်​မြင်​ခြင်း​၌ ချွတ်ယွင်းမှု​များသည် အများအားဖြင့် မျိုးရိုးလိုက်​ခြင်း​ဖြစ်​ရာ မွေး​ကတည်းက ပါ​လာ​ခြင်း​ဖြစ်သည်။ ယင်း​အခြေအနေ​ဖြင့် မွေးဖွား​လာသော ကလေး​သူငယ်​များသည် မသိ​စိတ်ဖြင့် အရောင်​ကွဲပြားမှု​ကို​ခွဲခြား​ရန် သင်ယူ​လေ့​ရှိသည်။ ဥပမာ၊ အချို့​သော​အရောင်​များ တစ်ခု​နှင့်​တစ်ခု​ကွဲပြား​ခြားနား​မှု​ကို သူတို့​မမြင်နိုင်​သော်လည်း အရောင်​များ ကွဲပြား​ခြားနား​ကြောင်း၊ တောက်ပ​မှု​ရှိကြောင်း​တို့ကို သိရှိ​နိုင်​ပြီး ဤ​ကွဲပြား​ခြားနား​မှုများ​ကို အရောင်​အမည်များ​ဖြင့် ဆက်စပ်​ပေး​နိုင်​ပေမည်။ ထို့ ပြင် အရာဝတ္ထု​များ​ကို အရောင်​ဖြင့်​မဟုတ်ဘဲ အဆင်​များ၊ အကွက်​များ​ဖြင့်​လည်း ခွဲခြား​သိမြင်​နိုင်​ပေမည်။ အမှန်​မှာ လူငယ်များစွာသည် ကလေး​ဘဝ​တစ်လျှောက်​လုံး အရောင်​မခွဲခြား​နိုင်​ခြင်း​ကို အမှုမဲ့​အမှတ်မဲ့​ဖြစ်နေ​ကြ​လေ​သည်။

အကြောင်း​မှာ ကျောင်း​များ​တွင်၊ အထူးသဖြင့် မူကြို​ကျောင်း​များ​တွင် ရောင်စုံ​သွန်သင်ခြင်း​ကိရိယာ​များ​ကို အသုံးပြုလေ့​ရှိရာ အရောင်​ကန်း​ခြင်း​ဝေဒနာ​ခံစား​ရနိုင်​သည့် ကလေး​တစ်ဦး​အား သွန်သင်ခြင်း​စွမ်းရည်​ချို့တဲ့​နေသည်​ဟု မိဘများနှင့် ဆရာများ​က မှားယွင်းစွာ ယူဆကြ​ပေမည်။ ဆရာမ​တစ်ဦး​သည် အသက်​ငါး​နှစ်အရွယ် ယောက်ျားလေး​တစ်ဦး​အား ပန်းရောင်​မိုးတိမ်​ပုံ​များ၊ အစိမ်းရောင်​လူ​ပုံ​များနှင့် အညို​ရော​င်​သစ်​ရွက်​များ​ပါ​သည့် သစ်ပင်​ပုံ​များ​ကို ဆွဲ​ထားသော​ကြောင့် အပြစ်ပေး​ခဲ့​ဖူး​သည်။ အရောင်​ကန်း​ခြင်း​ဝေဒနာ​ခံစား​နေရ​သည့် ကလေး​တစ်ဦး​အဖို့​မူ အဆိုပါ​အရောင်​များသည် မှန်ကန်သော​အရောင်​များ​ဖြစ်​ပေမည်။ ထို့​ကြောင့် အကြောင်းကောင်း​ရှိ၍ ကလေး​ဘဝက​တည်း​က ပုံမှန်​အရောင်မြင်နိုင်စွမ်း​ကို မှန်မှန်​စစ်ဆေး​ပါ​ရန် အာဏာပိုင်​တချို့က အကြံပြု​ကြ​ခြင်း​ဖြစ်သည်။

ဤ​အခြေအနေ​အတွက် ကုသ​နည်း​မရှိ​သေး​သော်လည်း ယင်းသည် အသက်အရွယ်​ကြောင့် ပို​၍​မဆိုး​ဝါး​နိုင်​သကဲ့သို့ စ​က္ခု​အာရုံ​တွင် အခြား​ချွတ်ယွင်းချက်​များ​ဖြစ်​နိုင်​သည့် အန္တရာယ်ကို​လည်း မ​တိုးများ​စေနိုင်​ပါ။ * အရောင်​ကန်း​ခြင်း​သည် ချို့တဲ့မှု​တစ်ခု​ဖြစ်​ရာ စိတ်ပျက်​စ​ရာ​ပင်။ သို့သော် ယေရှု​ခရစ်​သည် ဘုရားသခင့်​နိုင်ငံတော်​အုပ်ချုပ်မှု​အောက်တွင် မစုံလင်မှု​၏​အစ​အ​န​မှန်သမျှကို ဘုရားသခင်​အား​ကြောက်ရွံ့​သူတို့​ထံ​မှ ဖယ်ရှား​ပေး​ပါ​လိမ့်​မည်။ သို့​နှင့် မည်သည့်​အမြင်​အာရုံ ချွတ်ယွင်းမှု​မျိုးကို​မဆို ခံစား​နေရသူ​တို့သည် ယေဟောဝါ​၏​လက်ရာတော် ဘုန်းထွန်းတောက်​မှု​မှန်သမျှကို တွေ့ မြင်ရ​ပေမည်။—ဟေရှာယ ၃၅:၅; မဿဲ ၁၅:၃၀၊ ၃၁; ဗျာ. ၂၁:၃၊ ၄။

[အောက်ခြေ​မှတ်ချက်များ]

[စာမျက်နှာ ၁၄ ပါ လေးထောင့်ကွက်/ရုပ်ပုံ]

အရောင်​ကန်း​ခြင်း​ကို စမ်းသပ်ခြင်း

အရောင်​ကန်း​ခြင်း​အမျိုးအစား​နှင့် အတိုင်းအတာကို​စမ်းသပ်​ရန် လူတစ်ဦး​သည် အရောင်အသွေး​မျိုးစုံ​ပါဝင်​သည့် အစက်အပြောက်​ပုံစံ​များ​ကို အသုံးပြု​ရလေ့​ရှိသည်။ အသုံးများ​သည့် အီ​ရှီ​ဟာ​ရာ​စမ်းသပ်မှု​တွင် ပုံစံ ၃၈ မျိုး​အထိ ပါဝင်​၏။ ဥပမာ၊ ပုံစံ​တစ်မျိုး​ကို နေ့​အချိန်တွင် ကြည့်ရှု​ရာ​၌ ပုံမှန်​အမြင်​အာရုံ​ရှိသူ​တစ်ဦး​သည် (ဘယ်ဘက်​တွင်) နံပါတ် ၄၂ နှင့် ၇၄ ဟု​မြင်​သင့်​သော်လည်း အနီရောင်​နှင့်​အစိမ်းရောင်​ကို မမြင်နိုင်​သူ​တစ်ဦး​က​မူ အပေါ်​ဘက်တွင် မည်သည့်​နံပါတ်​ကို​မျှ​မမြင်​ရ​ဘဲ အောက်ဘက်​ရှိ​နံပါတ်​ကို​မူ ၂၁ ဟု​မြင်​ပေမည်။ *

စမ်းသပ်မှု​က ချွတ်ယွင်း​နေသည်​ဟု ဖော်ပြ​မည်​ဆိုလျှင် ယင်းသည် မျိုးရိုးလိုက်​ခြင်း​လော၊ အခြား​အကြောင်း​တစ်ခုခု​ကြောင့်​လော​ဟူ၍ သတ်မှတ်​နိုင်​ရန် ထပ်ဆင့်​စမ်းသပ်မှု​များ​ပြုလုပ်​ဖို့ မျက်စိ​ဆရာဝန်​တစ်ဦး​က အကြံပြု​ပေမည်။

[အောက်ခြေမှတ်ချက်]

 [စာမျက်နှာ ၁၅ ပါ လေးထောင့်ကွက်]

အဘယ်ကြောင့် အမျိုးသားများ​တွင်​အဖြစ်​များ​ရ

မျိုးရိုးလိုက်​သည့် အရောင်​ကန်း​ခြင်း​ကို X ဗီဇ​ဆောင်​မျှ​င်​က ဖြစ်ပေါ်​စေ​သည်။ အမျိုးသမီးများ​တွင် X ဗီဇ​ဆောင်​မျှ​င်​နှစ်ခု​ရှိသော်လည်း အမျိုးသားများ​၌​မူ X တစ်ခု​နှင့် Y တစ်ခုစီ​သာ​ရှိကြသည်။ ထို့​ကြောင့် အမျိုးသမီး​တစ်ဦး၏ X ဗီဇ​ဆောင်​မျှ​င်​တစ်ခု​တွင် အမြင်​အာရုံ​ချွတ်ယွင်းမှု​ကို ဆက်ခံ​ရရှိ​ထား​မည်​ဆိုလျှင် အခြား​ဗီဇ​ဆောင်​မျှ​င်​ရှိ သာမန်​မျိုးရိုး​ဗီဇ​က ယင်းကို ပယ်ဖျက်​ပေး​နိုင်​ဖွယ်​ရှိပြီး သူ၏​အမြင်မှာ ကောင်းမွန်​နေ​ပေ​လိမ့်​မည်။ သို့သော် X ဗီဇ​ဆောင်​မျှ​င်​တွင် ချွတ်ယွင်းမှု​ကို ဆက်ခံ​ရရှိ​ထား​သည့် အမျိုးသား​တစ်ဦး​အဖို့​မူ ယင်း​ချွတ်ယွင်းမှု​ကို ပယ်ဖျက်​ပေး​နိုင်​သည့် X ဗီဇ​ဆောင်​မျှ​င်​နောက်တစ်ခု​မရှိ​ချေ။

[စာမျက်နှာ ၁၄ ပါ ပုံကြမ်း/ရုပ်ပုံ]

(ကားချပ်​အပြည့်အစုံကို စာစောင်​တွင်​ကြည့်​ပါ)

အရောင်​များ​ကို တွေ့မြင်​နိုင်​ပုံ

အရာဝတ္ထု​များ​မှ​လာသော အလင်း​သည် မျက်​ကြည်​လွှာ​နှင့် မျက်တွင်း​မှန်ဘီလူး​ကို​ဖြတ်၍ မြင်လွှာ​ပေါ်​သို့ စုဆုံ​ကျရောက်

မျက်​ကြည်​လွှာ

မျက်တွင်း​မှန်ဘီလူး

မြင်လွှာ

ရုပ်ပုံ​သည် ဇောက်ထိုး​ဖြစ်နေ​သော်လည်း နောက်ပိုင်း​တွင် ဦးနှောက်​က အ​တည့်​ဖြစ်စေ

က​တော့​ပုံ​ဆဲလ်​များ သည် အ​နီ၊ အစိမ်း သို့​မဟုတ် အပြာရောင်​အလင်း​များ​ကို အာရုံခံလွယ်

မြင်လွှာ တွင် က​တော့​ပုံ​ဆဲလ်​များနှင့် ဆဲလ်​ချောင်းများ​ပါရှိ​သည်။ ယင်း​တို့အားလုံး​က မြင်ကွင်း​ကို အပြည့်အဝ တွေ့မြင်​စေ

ဆဲလ်​ချောင်းများ

က​တော့​ပုံ​ဆဲလ်​များ

စ​က္ခု​အာရုံကြော သည် အမြင်​တွန်းအား​ကို ဦးနှောက်​သို့ သယ်​ပို့ပေး

အနီရောင်

အစိမ်းရောင်

အပြာရောင်

[ရုပ်ပုံများ]

ပုံမှန်​အမြင်​အာရုံ

အရောင်​ကန်း​သော အမြင်​အာရုံ