အံ့ဖွယ် ပင်ကိုအသိဉာဏ်
အံ့ဖွယ် ပင်ကိုအသိဉာဏ်
“ပြောင်းရွှေ့နေထိုင်ခြင်းသည် အံ့ဖွယ်အကောင်းဆုံး သဘာဝဖြစ်ရပ်ဖြစ်တန်ရာ၏။”—ကောလင်း၏ ငှက်နေရာပြောင်းရွေ့ခြင်းပြမြေပုံ။
ဒီဇင်ဘာ ၉ ရက်၊ ၁၉၆၇ ခုနှစ်တွင် လေယာဉ်မှူးတစ်ဦးသည် ပေပေါင်း ၂၇,၀၀၀ အမြင့်မှနေ၍ အိုင်ယာလန်နိုင်ငံဘက်သို့ ဦးတည်ပျံသန်းနေကြသည့် ကောင်ရေ ၃၀ ခန့်ရှိ ငန်းအုပ်တစ်အုပ်ကို တွေ့လိုက်ရ၏။ လေထုအပူချိန် အနုတ် ၄၀ ဒီဂရီစင်တီဂရိတ်ခန့်ရှိ ဤမျှမြင့်မားသောနေရာမှ ၎င်းတို့ အဘယ်ကြောင့် ပျံသန်းနေကြသနည်း။ ၎င်းတို့သည် မြေနိမ့်ပိုင်းတွင် အဆက်မပြတ်တိုက်ခတ်နေသော နှင်းမုန်တိုင်းများကို ရှောင်ကွင်းသွားသည့်အပြင် မြေပြင်ရွေ့လျားနှုန်း တစ်နာရီလျှင် ၁၂၅ မိုင်ခန့်ရှိသော လေစီးကြောင်းအတိုင်း ပျံသန်းနေကြ၏။ အဆိုပါငှက်များသည် အိုင်စလန်နိုင်ငံမှ အိုင်ယာလန်နိုင်ငံသို့ မိုင်ပေါင်း ၈၀၀ ခရီးကို ခုနစ်နာရီတည်းဖြင့် အရောက်ပျံသန်းခဲ့ကြကြောင်း ခန့်မှန်းရလေသည်။
ကမ္ဘာ့အဝေးလံဆုံးနေရာသို့ ပြောင်းရွှေ့ပျံသန်းနိုင်သည့် အာတိတ်စင်ရော်ငှက်သည် အာတိတ်စက်ဝိုင်း၏မြောက်ဘက်တွင် ပေါက်ပွားကြသော်လည်း မြောက်ဝင်ရိုးစွန်းတွင် ဆောင်းဥတုကျရောက်သောအခါ အန္တာတိတ်ဘက်သို့ပြောင်း၍ ဆောင်းခိုကြသည်။ ဤပင်လယ်ပျော်ငှက်ငယ်သည် တစ်နှစ်အတွင်း မိုင်ပေါင်း ၂၅,၀၀၀ နှင့် ၃၀,၀၀၀ အကြား ပျံသန်းနိုင်၏။ ယင်းခရီးသည် ကမ္ဘာတစ်ပတ် ပတ်ခြင်းနှင့်ညီမျှသည်။
ငှက်ကျားဖြူများသည် ဥရောပမြောက်ပိုင်းတွင် ပေါက်ပွားကြပြီး အသွားအပြန် မိုင် ၁၅,၀၀၀ ခရီးရှိသည့် တောင်အာဖရိကတွင် ဆောင်းခိုကြသည်။ ထောင်နှင့်ချီရှိသော ဤငှက်များသည် သမ္မာကျမ်းစာခေတ်၌ လူသိများခဲ့သည့် အချိန်ဇယားအတိုင်းလိုက်၍ ဆောင်းဦးနှင့်နွေဦးတွင် အစ္စရေးနိုင်ငံကို ဖြတ်သန်းသွားလာကြလေသည်။—ယေရမိ ၈:၇၊ ခမ။
အဆိုပါပင်ကိုစွမ်းရည်ကို မည်သူ ထည့်သွင်းပေးခဲ့သနည်း။ လွန်ခဲ့သော အနှစ် ၃,၅၀၀ ခန့်တွင် ဘုရားသခင်သည် ဖြောင့်မတ်သူယောဘအား အောက်ပါမေးခွန်းကို မေးခဲ့သည်– “သင်ပေးသောဉာဏ်အားဖြင့် သိမ်းငှက်သည် အတောင်ကိုဖြန့်၍ တောင်မျက်နှာသို့ ပျံသွားတတ်သလော။ သင်စီရင်သောကြောင့် ရွှေလင်းတသည် အထက်သို့တက်၍ မြင့်သောအရပ်၌ အသိုက်ကိုလုပ်တတ်သလော။” ယောဘသည် ငှက်များနှင့် အခြားတိရစ္ဆာန်များ၏ အံ့သြဖွယ် စွမ်းရည်များအတွက် ဘုရားသခင်အား တော်မှန်စွာ ချီးမွမ်း၍ တုံ့ပြန်ဖြေကြားခဲ့၏။—ယောဘ ၃၉:၂၆၊ ၂၇; ၄၂:၂။
ပင်ကိုအသိစိတ်ထက်သာလွန်
ဘုရားသခင့်ဖန်ဆင်းခြင်း၏ အထွတ်အထိပ်ဖြစ်သော လူသားတို့ကို ပင်ကိုအသိစိတ်ဖြင့်သာ ထိန်းချုပ်မထားချေ။ ယင်းအစား ကျွန်ုပ်တို့သည် ကိုယ်ကိုကိုယ်သိသောစိတ်နှင့် မေတ္တာပြနိုင်စွမ်းရှိသည့် လွတ်လပ်စွာ ရွေးချယ်ပိုင်ခွင့်ရှိသူများ ဖြစ်ကြသည်။ (ကမ္ဘာဦး ၁:၂၇; ၁ ယောဟန် ၄:၈) ဤစွမ်းရည်များကြောင့် ကျွန်ုပ်တို့သည် တော်မှန်ဖြောင့်မတ်သော ဆုံးဖြတ်ချက်များကို ချနိုင်ကြပြီး တစ်ခါတစ်ရံ သာလွန်ထူးကဲသော မေတ္တာနှင့် ကိုယ်ကျိုးစွန့်မှုကို ရောင်ပြန်ဟပ်နိုင်ကြသည်။
လူတစ်ဦး၏သဘောထားနှင့် အပြုအမူတို့သည် ကလေးဘဝမှစ၍ ၎င်းသွန်သင်ခံခဲ့ရသည့် သို့မဟုတ် သွန်သင်မခံခဲ့ရသည့် ကျင့်ဝတ်စည်းမျဉ်းများနှင့် ဘာသာရေးယုံကြည်ချက်များအပေါ် များစွာမူတည်ပေသည်။ ထို့ကြောင့် လူတို့သည် အဘယ်အရာက မှန်သည်၊ အဘယ်အရာက မှားသည်၊ အဘယ်အရာကို လက်ခံနိုင်သည်၊ အဘယ်အရာကိုမူ လက်မခံနိုင်စသည်တို့တွင် ယူဆပုံချင်း ကွဲပြားကြပေမည်။ တစ်ဖန် ဤသို့သောကွဲပြားမှုများက အထင်လွဲမှားမှု၊ သည်းမခံနိုင်မှုနှင့် မုန်းတီးမှုကိုပင် ဖြစ်စေနိုင်ပါသည်။ အထူးသဖြင့် ယဉ်ကျေးမှု၊ လူမျိုးရေးဝါဒနှင့် ဘာသာတရားကဲ့သို့သော အကြောင်းတရားများက အလွန်သြဇာညောင်းသည့်အခါတွင်ဖြစ်သည်။
လူ့မိသားစုတစ်စုလုံးသည် စကြဝဠာကို ထိန်းချုပ်ထားသည့် တစ်မျိုးတည်းသော ရူပနိယာမတရားများကို လိုက်နာကြသကဲ့သို့ သမ္မာကျမ်းစာနှင့်ကိုက်ညီကာ တော်မှန်ဖြောင့်မတ်သည့် တစ်မျိုးတည်းသော ကျင့်ဝတ်စံနှုန်းများကို လိုက်နာကြမည်ဆိုလျှင် ဤကမ္ဘာကြီးသည် မည်မျှကောင်းလိုက်မည်ဖြစ်ခြင်း။ သို့သော် တစ်စုံတစ်ယောက်တွင် လူသားထုတစ်ရပ်လုံး လိုက်နာသင့်သော စံနှုန်းများကို ချမှတ်ပြဋ္ဌာန်းရန် အသိပညာနှင့် စွမ်းရည်ရှိပါသလော။ ရှိမည်ဆိုလျှင် သူ ထိုသို့လုပ်ဆောင်လိုမည်လော သို့မဟုတ် လုပ်ဆောင်ခဲ့ပြီလော။ ဤမေးခွန်းများကို နောက်ဆောင်းပါးများတွင် သုံးသပ်ပါမည်။