ကမ္ဘာ့ဖြစ်ရပ်အကဲခတ်
ကမ္ဘာ့ဖြစ်ရပ်အကဲခတ်
▪ “ယခုအခါ သာမန်အမေရိကန်အိမ်တစ်အိမ်တွင် မိသားစုဝင်အရေအတွက်ထက် ရုပ်မြင်သံကြားအရေအတွက်က ပိုများလျက်ရှိ၏။” “အမေရိကန်ရှိ အိမ်ထောင်စုများ၏ထက်ဝက်တွင် တီဗွီသုံးလုံးစီ သို့မဟုတ် ထိုထက်မကရှိသည်။”—အေပီသတင်း၊ အမေရိကန်။
▪ တောင်အာဖရိကနိုင်ငံတစ်ဝန်းရှိ တရားရုံးများတွင် နေ့စဉ် ကလေး ၈၂ ဦးသည် “အခြားကလေးများအား ဗလက္ကာရပြုမှု သို့မဟုတ် မတော်မလျော်ထိပါးမှု” ဖြင့်တရားစွဲဆိုခံနေရသည်။ သုတေသနပြုချက်အချို့အရ တရားစွဲဆိုခံရသောကလေးအများစုက ဤအကျင့်ဆိုးကိုပြုကျင့်ရခြင်းမှာ “ရုပ်မြင်သံကြားတွင် မိမိတို့ကြည့်ရှုခဲ့သည့်အရာများကြောင့်” ဟုပြောဆိုကြ၏။—THE STAR သတင်းစာ၊ တောင်အာဖရိက။
အိပ်ရေးပျက်ခြင်းက ကုန်ထုတ်စွမ်းရည်ကို ကျဆင်းစေ
စပိန်နိုင်ငံသားတချို့၏ အအိပ်အနေက သူတို့၏ ကုန်ထုတ်စွမ်းရည်ကို ဆုံးရှုံးစေလျက်ရှိသည်။ ဥရောပတိုက်သားများနှင့်နှိုင်းယှဉ်လျှင် စပိန်နိုင်ငံသားများသည် အိပ်ရာမှ စောစောထကာ ကြာရှည်စွာ အလုပ်လုပ်ကြသည်။ ညစာကို နောက်ကျမှစားပြီး ပျမ်းမျှအိပ်ချိန် မိနစ် ၄၀ လျော့၍ အိပ်စက်ကြသည်ဟု ဘာစီလိုနာမှ အိပ်စက်ခြင်းကုဆေးခန်းဖွင့်ထားသူ ဒေါက်တာ အက်ဝပ်အက်စ်တီဗီးလ်က မှတ်ချက်ချသည်။ အိပ်ချိန်လျော့နည်းခြင်းက စိတ်တိုလွယ်ခြင်း၊ မှတ်ဉာဏ်လျော့နည်းခြင်း၊ စိုးရိမ်ပူပန်ခြင်းနှင့် စိတ်ဓာတ်ကျခြင်းစသောပြဿနာများကို ဖြစ်ပေါ်စေနိုင်သည်။ ထို့ကြောင့် ဒေါက်တာ အက်စ်တီဗီးလ်က “ပညာရှင်များနှင့် အာရုံစူးစိုက်ရသောလုပ်ငန်းလုပ်ကိုင်သူများသည် နေ့စဉ် ခုနစ်နာရီမှ ရှစ်နာရီကြာ အိပ်သင့်သည်” ဟုသတိပေး၏။
လောင်စာဂျုံ
အပူစွမ်းအင်ရရှိရေးအတွက် ဂျုံများကိုမီးရှို့ ခြင်းသည် သင့်တော်ပါ၏လော။ ကျဆင်းနေသောဂျုံဈေးနှုန်းနှင့် မြင့်တက်လျက်ရှိသော လောင်စာဈေးနှုန်းတို့ကြောင့် အပူစွမ်းအင်အတွက် ဂျုံများကိုရောင်းပြီး လောင်စာဆီဝယ်ခြင်းထက် ဂျုံများကို မီးရှို့ခြင်းက လယ်သမားများအတွက် ပို၍တွက်ခြေကိုက်ကြောင်း ဂျာမန်သတင်းစာ Frankfurter Allgemeine Sonntagszeitung ကရှင်းပြသည်။ ဂျုံခြောက်ပေါင်အတွက် စိုက်ပျိုးစရိတ်မှာ ဆင့် ၂၀ ရှိသော်လည်း ယင်းကိုမီးရှို့လိုက်ပါက ရရှိမည့်အပူစွမ်းအင်မှာ ဆင့် ၆၀ ကုန်ကျသည့်လောင်စာဆီမှ ရရှိမည့်စွမ်းအင်နှင့် အတူတူပင်ဖြစ်သည်။ ထို့ကြောင့် သင်သည် “အခြားသူများငတ်မွတ်နေချိန်တွင် စားသုံးသီးနှံများကို မီးရှို့နိုင်ပါမည်လော” ဟူ၍ အဆိုပါသတင်းစာမှ ဖော်ပြခဲ့သည့်အတိုင်း အကျပ်ရိုက်စရာဖြစ်နေသည်။
ပုပ်ရဟန်းမင်းကြီးလည်ပတ်မှု ငွေရပေါက်တစ်ခု
ပုပ်ရဟန်းမင်းကြီး ဂျာမနီနိုင်ငံသို့လည်ပတ်သည့် ၂၀၀၆ ခုနှစ်တွင် ကုန်ထုတ်လုပ်သူများ၊ ကုန်သည်များနှင့် ခရီးသွားလုပ်ငန်းများသည် ထိုလည်ပတ်မှုမှအကျိုးအမြတ်ရရှိရန် ကောင်းစွာကြိုတင်ပြင်ဆင်ခဲ့ကြသည်။ ချာ့ခ်ျကလည်း ပုပ်ရဟန်းမင်းကြီး၏အဆောင်အယောင်ပစ္စည်းများကို ဈေးကွက်တင်ရန် စီးပွားဖက်ကို အထူးရွေးချယ်ခဲ့သည်။ အမှတ်တရပစ္စည်းများအဖြစ် ပုတီးများ၊ ဖယောင်းတိုင်များ၊ သန့်ရှင်းသောရေပုလင်းများ၊ ကော်ဖီခွက်များ၊ ဦးထုပ်များ၊ တီရှပ်များ၊ သော့ချိတ်များနှင့် ဗာတီကန်အလံများကို ရရှိနိုင်သည်။ Der Spiegel သတင်းမဂ္ဂဇင်းက ဤသို့မှတ်ချက်ချသည်– “ယေရှုခရစ်သည် . . . ကုန်သည်များကို ဝတ်ပြုရာအိမ်တော်မှ တစ်ခါမျှနှင်မထုတ်ခဲ့သည့်အလား ကက်သလစ်ချာ့ခ်ျသည် အကျိုးအမြတ်ရရှိရေးအတွက် စိတ်ထက်သန်လျက်ရှိ၏။”
ဗီဒီယိုဂိမ်းများကြောင့်ကြမ်းတမ်းရမ်းကားမှုတွင် အရေထူလာ
“ကြမ်းတမ်းရမ်းကားသောဗီဒီယိုဂိမ်းများကို ကစားသူများသည် တကယ့်ဖြစ်ရပ်မှန် ကြမ်းတမ်းရမ်းကားမှုများတွင် အရေထူလာနိုင်သည်” ဟုအမေရိကန်၊ အိုင်အိုဝါပြည်နယ်တက္ကသိုလ်မှ စိတ်ပညာရှင်သုတေသနအဖွဲ့ကဆိုသည်။ ဤသို့သောဂိမ်းများကို ကစားသူများသည် “ရန်လိုသောအတွေးများ၊ ဒေါသကြီးခြင်း၊ နှလုံးခုန်နှုန်းနှင့် အသက်ရှူနှုန်းမြန်ခြင်း၊ ပြင်းထန်သောအပြုအမူများ စသည်တို့ကို တိုးများစေသည်” ဟု ယခင်လေ့လာမှုများက ဖော်ပြသည်။ ဤလေ့လာမှုက ကြမ်းတမ်းရမ်းကားသောဗီဒီယိုဂိမ်းများကိုဖြစ်စေ၊ ကြမ်းတမ်းရမ်းကားမှုမပါသည့် ဗီဒီယိုဂိမ်းများကိုဖြစ်စေ ကစားပြီးလျှင်ပြီးချင်း ၎င်းတို့အား ဖြစ်ရပ်မှန်ကြမ်းတမ်းရမ်းကားသောဇာတ်ကွက်များကို ကြည့်ခိုင်းပြီး သူတို့၏ နှလုံးခုန်နှုန်းနှင့် စိတ်လှုပ်ရှားမှုဆိုင်ရာ တုံ့ပြန်မှုတို့ကို စောင့်ကြည့်မှတ်သားခဲ့သည်။ “ကြမ်းတမ်းရမ်းကားသည့် ဗီဒီယိုဂိမ်းများကို ကစားကြသူများသည် ကြမ်းတမ်းရမ်းကားမှုအားလုံးကို ရိုးသွားကာ တုံ့ပြန်မှုအာရုံမှာလည်း တဖြည်းဖြည်းထုံထိုင်းလာ” ကြောင်းရလဒ်များက ဖော်ပြသည်။