ဘုရားသခင်အား ဝတ်ပြုခြင်းသည် ပျော်ရွှင်စေနိုင်သလော
သမ္မာကျမ်းစာရှုထောင့်
ဘုရားသခင်အား ဝတ်ပြုခြင်းသည် ပျော်ရွှင်စေနိုင်သလော
“ဘုရားသခင်ကို ကျွန်မယုံကြည်တယ်။ ဒါပေမဲ့ . . . ချာ့ခ်ျတက်ရတာကို ငြီးငွေ့တယ်” ဟူ၍ ခရစ်ယာန်ဟုဆိုသူတစ်ဦးက ရေးသားခဲ့သည်။ သင်လည်း ထိုသို့ခံစားရသလော။ အမှန်ဆိုရလျှင် ငြီးငွေ့ ခြင်း၊ ကျေနပ်မှုမရှိခြင်းနှင့် စိတ်အလိုမကျဖြစ်ခြင်းတို့ကြောင့် အချို့သူတို့သည် ကိုယ်ပိုင်ဝတ်ပြုနည်းများကို တီထွင်ခဲ့ကြသည်။
ယနေ့ များစွာသောသူတို့သည် ကိုယ်ပိုင်ဝတ်ပြုမှုပုံစံများကို တီထွင်နေကြသည်ဟု မကြာသေးမီက သတင်းစာတစ်စောင်တွင် ဖော်ပြထား၏။ သို့သော် ဘုရားသခင်အား ဝတ်ပြုခြင်းမှ ပျော်ရွှင်မှုရလိုသူများအတွက်မူ ယင်းသည် ကျေနပ်ပျော်ရွှင်မှု မပေးနိုင်ချေ။ အဘယ်ကြောင့်နည်း။ ချာ့ခ်ျများကို စွန့်ခွာသွားကြသည့် အကြောင်းရင်းဖြစ်သော စိတ်ဓာတ်ကျမှုကို ထပ်မံခံစားရနိုင်သောကြောင့်ဖြစ်၏။
ယင်းက ကျမ်းစာသွန်သင်ချက်များနှင့်အညီ အသက်ရှင်ခြင်းသည် ငြီးငွေ့စရာကောင်း၍ ရွှင်လန်းမှုကင်းမဲ့စေသလော ဟူသည့်မေးခွန်းကို ပေါ်ပေါက်စေ၏။ ထိုသို့လုံးဝမဟုတ်ပေ။ ဥပမာအနေနှင့် သမ္မာကျမ်းစာပါ ဆာလံဆရာတစ်ဦး၏ ဤစကားများကို သုံးသပ်ကြည့်ပါ– ‘လာကြ။ ယေဟောဝါအား ရွှင်လန်းစွာသီချင်းဆိုကြကုန်အံ့။ . . . လာကြ။ ပျပ်ဝပ်၍ ကိုးကွယ်ကြကုန်အံ့။ ငါတို့ကိုဖန်ဆင်းတော်မူသော ယေဟောဝါ၏ရှေ့တော်၌ ဒူးထောက်ကြကုန်အံ့။’—ဆာလံ ၉၅:၁၊ ၆။
သမ္မာကျမ်းစာရေးသူ ဆာလံဆရာနောက်တစ်ဦးက ယေဟောဝါအား ကျေးဇူးတင်လေးမြတ်မှုဖြင့် ‘ကိုယ်တော်တစ်ပါးတည်းသာလျှင် မြေကြီးတစ်ပြင်လုံးအပေါ်မှာ အမြင့်ဆုံးသော ဘုရားသခင်ဖြစ်တော်မူ’ သည်ဟု သီဆိုခဲ့၏။ သမ္မာကျမ်းစာတွင် ယေဟောဝါအား “ပျော်ရွှင်သောဘုရားသခင်” ဟုခေါ်ဆိုထားကာ ကိုယ်တော်အား ဝတ်ပြုသူများသည် အတိတ်တွင်ရော မျက်မှောက်ခေတ်တွင်ပါ ရွှင်လန်းကြကြောင်း မကြာခဏဖော်ပြခဲ့ကြသည်။—ဆာလံ ၈၃:၁၈; ၁ တိမောသေ ၁:၁၁၊ ကဘ။
ရွှင်လန်းစေသည့်အကြောင်းရင်း
ယေဟောဝါအားဝတ်ပြုခြင်းမှ စစ်မှန်သောရွှင်လန်းမှုရရှိစေသည့် အကြောင်းရင်းမှာ ကျွန်ုပ်တို့အကျိုးအတွက် မေတ္တာဖြင့် ကိုယ်တော်အမှန်တကယ်လုပ်ဆောင်ပေးခဲ့ရာကို သဘောပေါက်ခြင်းဖြစ်သည်။ ထိုအရာကား အဘယ်နည်း။ ‘ဘုရားသခင်၏သားတော်ကို ယုံကြည်သောသူအပေါင်းတို့သည် ပျက်စီးခြင်းသို့မရောက်၊ ထာဝရအသက်ကိုရစေခြင်းငှာ ဘုရားသခင်သည် မိမိ၌တစ်ပါးတည်းသောသားတော်ကို စွန့်တော်မူသည်တိုင်အောင် လောကသားတို့ကိုချစ်တော်မူ၏။’—ယောဟန် ၃:၁၆။
ထို့ကြောင့် သမ္မာကျမ်းစာဖော်ပြသည့်အတိုင်း ‘လူအပေါင်းတို့သည် ကယ်တင်ခြင်းသို့ရောက်၍ အမှန်တရားကိုသိစေခြင်းငှာ ဘုရားသခင်အလိုတော်ရှိ၏။’ (၁ တိမောသေ ၂:၃၊ ၄) ယင်းက အချို့သောကျမ်းချက်များတွင် ဖော်ပြထားရာများကို သိရုံမျှသာမဟုတ်ချေ။ ယင်းအစား ကျွန်ုပ်တို့ဖတ်ရှုသည့်အရာကို “နားလည်” ဖို့လို၏။ ယင်းသို့နားလည်ရန် စိတ်ရင်းမှန်ဖြင့် စေ့စပ်သေချာစွာလေ့လာရမည်။ (မဿဲ ၁၅: ၁၀) ထိုသို့ ပြုခြင်းဖြင့် ‘ဘုရားသခင်ကိုသိသောဉာဏ်နှင့် ပြည့်စုံမည်’ ဖြစ်သည်။ ယင်းက အမှန်ပင် ပျော်ရွှင်စေနိုင်သည်။—သု. ၂:၁-၅။
ပထမရာစုတွင် မာကေဒေါနိပြည်၏မြို့တော် ဗေရိမြို့မှ လူတို့သည် ထိုသို့သောရွှင်လန်းမှုကို ခံစားခဲ့ကြရသည်။ တမန်တော်ပေါလုက သူတို့အား ဘုရားသခင့်နှုတ်မြွက်တော်ကို သွန်သင်ပေးသည့်အခါ ‘အလွန်ကြည်ညိုသောစေတနာစိတ် [“စိတ်အားထက်သန်မှု၊” ကဘ] နှင့် နှုတ်မြွက်တရားတော်ကိုခံယူ၍၊ မှန်သည်မမှန်သည်ကိုသိခြင်းငှာ၊ ကျမ်းစာကို နေ့တိုင်းအစဉ်စေ့စေ့ကြည့်ရှု’ ခဲ့ကြသည်။ သူတို့၏ကျမ်းစာလေ့လာမှုသည် ငြီးငွေ့စရာဖြစ်မည် သို့မဟုတ် ရွှင်လန်းမှုကင်းမဲ့နေမည်ဆိုလျှင် သူတို့တွင် ထိုသို့သောစိတ်အားထက်သန်မှု ရှိခဲ့မည်မဟုတ်ချေ။—တမန်တော် ၁၇:၁၁။
ယေရှုက “ဖြောင့်မတ်ခြင်းတရားကို ဆာငတ်သူတို့သည် မင်္ဂလာရှိကြ၏။ အကြောင်းမူကား ထိုသူတို့သည် ဝပြောကြလိမ့်မည်” ဟုမိန့်တော်မူခဲ့သည်။ (မဿဲ ၅:၆၊ ကဘ) ပုံမှန်စားသုံးနေရပြီဖြစ်သော အလွန်ဆာလောင်နေသူများနည်းတူ ယနေ့ များစွာသောသူတို့သည် မိမိတို့၏ဝိညာဉ်ရေးဆာလောင်မှု ဖြည့်ဆည်းခံနေရ၍ ပီတိဖြစ်ခဲ့ရပြီ။ ထို့ကြောင့် ဗေရိမြို့သားများကဲ့သို့ ‘များစွာသောသူတို့သည် ယုံကြည်သူများဖြစ်လာကြ၏။’—တမန်တော် ၁၇: ၁၂။
ဘဝလမ်းစဉ်
ပထမရာစုရှိ စစ်မှန်သောဝတ်ပြုသူများသည် ကနဦးခရစ်ယာန်များလိုက်လျှောက်ခဲ့သည့် ဘဝလမ်းစဉ်သစ်ကို ရည်ညွှန်းရန် တမန်တော် ၉:၂ (ခမ) တွင် အသုံးပြုခဲ့သည့် “လမ်းစဉ်” ကိုလိုက်လျှောက်ခဲ့ကြသည်။ ယခုအချိန်တွင် ဘုရားသခင်အား ဝတ်ပြုခြင်းမှ ရွှင်လန်းမှုခံစားလိုသူများသည် အလားတူလုပ်ဆောင်ရမည်။ သူတို့သည် မိမိတို့၏စဉ်းစားတွေးခေါ်ပုံနှင့် နေ့စဉ်အမူအကျင့်များအပေါ် ကျမ်းစာအမှန်တရားများ ဩဇာလွှမ်းမိုးစေရန် ခွင့်ပြုဖို့လိုသည်။
ထို့ကြောင့် တမန်တော်ပေါလုက ဧဖက်မြို့သားများအား “အထက်ကကျင်လည်ခဲ့သော လူဟောင်းဘဝကို စွန့်ပစ်လော့” ဟူ၍တိုက်တွန်းခဲ့သည်။ သို့သော် ထိုထက်မကလုပ်ဆောင်ဖို့လိုကြောင်း တမန်တော်ပေါလု ဤသို့ဆက်ပြောခဲ့သည်– ‘ဘုရားသခင်၏ပုံသဏ္ဌာန်တော်နှင့်အညီ ဖန်ဆင်းခြင်းကိုခံရ၍ အမှန်တရားဆိုင်ရာ ဖြောင့်မတ်သန့်ရှင်းသူလူသစ် ဖြစ်ကြရမည်။’—ဧဖက် ၄:၂၂-၂၄၊ ခမ။ *
ထိုသွန်သင်ချက်ကို လိုက်နာကာ ကျွန်ုပ်တို့၏အသက်တာကို ဘုရားသခင့်အလိုတော်နှင့်အညီ ပြုပြင်ပြောင်းလဲလျှင် များစွာသောကျေနပ်မှုနှင့် ရွှင်လန်းမှုကို ရရှိမည်ဖြစ်သည်။ ထိုသို့ရရှိစေသည့်အကြောင်းရင်းကား အဘယ်နည်း။ ‘ယေဟောဝါနှင့် ထိုက်လျောက်စွာကျင့်၍ အရာရာ၌ နှစ်သက်တော်မူစေခြင်းငှာ’ မိမိတို့၏အသက်တာကို ပြုပြင်ပြောင်းလဲဖို့လိုကြောင်း ကောလောသဲမြို့ရှိ ခရစ်ယာန်များထံ ပေါလုရေးသားခဲ့သည်။ (ကောလောသဲ ၁:၉-၁၁) ကျွန်ုပ်တို့၏အသက်တာကို ဘုရားသခင်နှစ်သက်တော်မူကြောင်း သိရခြင်းသည် ရွှင်လန်းမှုရရှိစေသောအကြောင်းရင်းဖြစ်သည်မှာ အမှန်ပင်။ ထို့ ပြင် ဘုရားသခင်သည် မိမိ၏နှစ်သက်မှုကို အပြည့်အဝရရှိစေရန် တတ်စွမ်းနိုင်၏။ မည်သို့အားဖြင့်နည်း။ ခွင့်လွှတ်မှုအားဖြင့်ဖြစ်၏။
ကျွန်ုပ်တို့တစ်ဦးစီသည် အပြစ်သားများဖြစ်ကြ၍ ဘုရားသခင်၏ခွင့်လွှတ်မှု ရရှိဖို့လိုပေသည်။ ၁ တိမောသေ ၁:၁၅ တွင် မှတ်တမ်းတင်ထားသည့်အတိုင်း ပေါလုက “ယေရှုခရစ်သည် အပြစ်ရှိသောသူတို့ကို ကယ်တင်ခြင်းငှာ၊ ဤလောကသို့ ကြွလာတော်မူသည်” ဟုဖော်ပြခဲ့သည်။ ယေရှုသည် ကျွန်ုပ်တို့အတွက် အသက်စွန့်ခဲ့ရာ ကျွန်ုပ်တို့၏အပြစ်များ ခွင့်လွှတ်ခံရရန် ပြုလုပ်ပေးနိုင်သည်။ ထို့ကြောင့် စစ်မှန်သောဝတ်ပြုသူတစ်ဦးသည် မိမိ၏နှလုံးထဲမှ လေးလံသောအပြစ်ဝန်ထုပ်ကို ဖယ်ရှားပေးခြင်းခံရ၍ စိတ်သက်သာမှုခံစားရသည်။ သူသည် ကြည်လင်သည့် ကိုယ်ကိုကိုယ်သိသောစိတ်ရှိနိုင်ရုံမက ဘုရားသခင့်အလိုတော်ကို စိတ်ထက်သန်စွာဆောင်ရွက်နေသရွေ့ မိမိ၏အပြစ်များကို ဘုရားသခင် ခွင့်လွှတ်တော်မူမည်ဟူသည့် ယုံကြည်စိတ်ချမှုကြောင့် ဝမ်းမြောက်နိုင်သည်။
ရွှင်လန်းစေသည့် နောက်အကြောင်းရင်း
စစ်မှန်သောဘုရားသခင်ကို လူတစ်ဦး စတင်ဝတ်ပြုသည့်အခါ သူတစ်ဦးတည်းသာ မဟုတ်ပါ။ သမ္မာကျမ်းစာရေးသူ ဆာလံဆရာဒါဝိဒ်က ဤသို့ရေးသားခဲ့သည်– ‘“ငါတို့သည် ထာဝရဘုရားသခင်၏အိမ်တော်သို့ သွားကြကုန်အံ့” ဟုသူတစ်ပါးတို့သည် ပြောကြသောအခါ ငါသည် ဝမ်းမြောက်ခြင်းရှိ၏။’ (ဆာလံ ၁၂၂:၁) မှန်ပါသည်၊ စစ်မှန်သောဝတ်ပြုသူများနှင့် မှန်မှန်စုဝေးခြင်းက ကျွန်ုပ်တို့၏ရွှင်လန်းမှုကို များစွာတိုးပွားစေသည်။
ယေဟောဝါသက်သေများ၏ အစည်းအဝေးတစ်ခုကို တက်ရောက်ပြီးနောက် လူတစ်ဦး ဤသို့စာရေးခဲ့သည်– “ကျွန်တော်တို့ကို တရင်းတနှီး ကြိုဆိုကြတယ်။ လူငယ်တွေရဲ့ အေးဆေးတည်ငြိမ်မှုနဲ့ ဣန္ဒြေရှိမှုက သူတို့နဲ့ သူတို့မိဘတွေကို ပျော်ရွှင်စေတဲ့အကြောင်းရင်းဖြစ်ရမယ်။ ဒီလိုပျော်ရွှင်ကြည်နူးဖို့ကောင်းတဲ့နေရာကို ဖိတ်ခေါ်တဲ့အတွက် ကျေးဇူးအများကြီးတင်ပါတယ်လို့ ပြောချင်ပါတယ်။”
သင်လည်း ရှေးအချိန်က ဒါဝိဒ်ကဲ့သို့ ယေဟောဝါအား ဝတ်ပြုခြင်းသည် ရွှင်လန်းဝမ်းမြောက်စရာဖြစ်ကြောင်း တွေ့ရပေမည်။ ဒါဝိဒ်က ‘ထာဝရဘုရားသခင်၏အမှုတော်ကို ဝမ်းမြောက်စွာဆောင်ရွက်ကြလော့။ ရွှင်လန်းစွာသီချင်းဆိုလျက် အထံတော်သို့ဝင်ကြလော့’ ဟု တိုက်တွန်းခဲ့သည်။ (ဆာလံ ၁၀၀:၂) စစ်မှန်သောဘုရားသခင်၏အမှုတော်ကို စိတ်ရင်းမှန်ဖြင့်ဆောင်ရွက်သူအားလုံး မိမိတို့၏ဝတ်ပြုမှုမှ ရွှင်လန်းမှုရရှိဖို့ မျှော်လင့်နိုင်ပေသည်။
[အောက်ခြေမှတ်ချက်]
^ အပိုဒ်၊ 14 ဧဖက် အခန်းကြီး ၄ နှင့် ကောလောသဲ အခန်းကြီး ၃ ကိုဖတ်ရှုခြင်းဖြင့် ဥပဓိရုပ်သစ်ပြောင်းလဲခြင်းတွင် အဘယ်အရာပါဝင်ကြောင်း ရှင်းလင်းစွာနားလည်လာမည်။
သင်စဉ်းစားဖူးသလော
▪ စစ်မှန်သောဝတ်ပြုရေး၏ အခြေခံကား အဘယ်နည်း။—၁ တိမောသေ ၂:၃-၆။
▪ ကျွန်ုပ်တို့ကို ရွှင်လန်းမှုရရှိစေရန် ခရစ်တော်၏ရွေးနုတ်ဖိုးပူဇော်ရာယဇ်သည် အဘယ်အခန်းကဏ္ဍမှ ပါဝင်သနည်း။—၁ တိမောသေ ၁:၁၅။
▪ ခရစ်ယာန်အစည်းအဝေးများသည် သင်၏ဝတ်ပြုမှုကို မည်သို့ပျော်ရွှင်စရာဖြစ်စေနိုင်သနည်း။—ဆာလံ ၁၀၀:၁-၅။
[စာမျက်နှာ ၁၀ ပါ ရုပ်ပုံ]
အခြားသူများနှင့်အတူ ကျမ်းစာလေ့လာခြင်းသည် ရွှင်လန်းမှုဖြစ်စေနိုင်