ဘေးဒဏ်​များ ပျောက်ကွယ် လု​နီးပြီ

မြေငလျင်၊ စစ်ပွဲ၊ အစာ​ခေါင်းပါး​မှု​နှင့် ရောဂါဘယ​တို့သည် ယေရှု​ကြိုပြော​ခဲ့​သော ယခု ကျွန်ုပ်​တို့​အသက်​ရှင်​နေကြ​သည့် “လောက​စနစ်​ကုန်ဆုံး​ခြင်း​၏​နိမိတ်” များ​မှ အချို့​မျှ​သာ​ဖြစ်သည်။ (မဿဲ ၂၄:၃၊ ၇၊ ၈၊ က​ဘ; လုကာ ၂၁:၇၊ ၁၀၊ ၁၁) မှန်ပါသည်။ အဆိုပါ​ဖြစ်ရပ်​များသည် ဘုရားသခင်​ကြောင့်​မဟုတ်​ချေ။ ယင်း​တို့အတွက် ယေရှု​တွင်​ရော ကိုယ်တော်​၏​ကောင်းကင်​ခမည်းတော် ယေဟောဝါ​ဘုရားသခင်​တွင်​ပါ တာဝန်​မရှိ​ချေ။

သို့သော် အဆိုပါ​ဖြစ်ရပ်​များ​က နိမိတ်​ပြ​သည့် ယေရှု​ခရစ်​အုပ်ချုပ်​မည့် ကောင်းကင်​အစိုးရ​ဖြစ်သော ဘုရားသခင့်​နိုင်ငံတော်​ရောက်ရှိခြင်း​နှင့် ယေဟောဝါ​၏​အကြွင်းမဲ့​ပိုင်သ​အုပ်စိုးမှု​ကို ငြင်းပယ်​သူ​မှန်သမျှ​အား ဖျက်ဆီးခြင်း​ကို​မူ ဘုရားသခင်​တာဝန်​ယူပါ​လိမ့်​မည်။ (ဒံယေလ ၂:၄၄၊ ၄၅; ၇:၁၃၊ ၁၄) ၎င်းနောက် ကမ္ဘာ​မြေကြီး​အား သဘာဝဘေးဒဏ်​များ​ကို ကြောက်ရွံ့​စ​ရာ​မလို​တော့​သည့် ငြိမ်သက်​အေးချမ်း​သော​နေရာ​အဖြစ် ပြုပြင်​ဖန်တီး​မည်​ဖြစ်သည်။ ဘုရားသခင်​၏​ကတိတော်​သည် အပြည့်အဝ ပြည့်စုံ​လာ​ပါ​လိမ့်​မည်– “ငါ​၏​လူတို့သည်​လည်း ငြိမ်သက်​သော​နေရာ၊ လုံခြုံ​သော​မြို့ရွာ၊ ဘေးလွတ်​သော ချမ်းသာ​ရာ​အရပ်​တို့​၌ နေရ​ကြလိမ့်မည်။”—ဟေရှာယ ၃၂:၁၈။

ဘုရားသခင်​၏​စကားတော်​ကို​နားထောင်​၍ ထာဝရ​အသက်ကို ရယူ​လော့

ဤ​အခန်းဆက်​ဆောင်းပါး​များ​၏ အရှေ့​ဆောင်းပါး​တစ်ပုဒ်​တွင် ရှင်းပြ​ထား​သည့်​အတိုင်း သတိပေး​ချက်​များ​ကို အလေးဂရုပြု​ခြင်း​က  အသက်ကို​ကယ်တင်​နိုင်​ပါ​သည်။ အဆိုပါ​မူ​သည် သမ္မာကျမ်းစာ​တွင် မှတ်တမ်း​တင်ထား​သည့် ဘုရားသခင်​၏​သတိပေး​ချက်​များနှင့် ပို​၍​ပင်​သက်ဆိုင်​၏။ “ငါ့​စကား​ကို နားထောင်​သော​သူ​မူ​ကား လုံခြုံစွာ​နေ၍ ဘေး​ကို​မကြောက်​ဘဲ ငြိမ်​ဝပ်​လိမ့်​မည်” ဟု​ဘုရားသခင် ကတိပြု​တော်​မူ​သည်။—သု. ၁:၃၃။

ယေဟောဝါသက်သေ​များသည် ဘုရားသခင့်​မှုတ်သွင်းခံ သမ္မာကျမ်းစာ​ကို မှန်မှန်​ဖတ်ရှု​ကာ ယင်း​တွင်​ပါရှိ​သည့် သွန်သင်ချက်​များ​ကို ကျင့်သုံး​ခြင်း​ဖြင့် ကိုယ်တော်​၏​စကား​ကို​နားထောင်​ရန် အစွမ်းကုန်​ကြိုးစား​ကြသည်။ ထပ်တူ​လုပ်ဆောင်ရန် သင့်ကို သူတို့​ဖိတ်ခေါ်ပါ​သည်။ ယေဟောဝါ​၏​စကားတော်​ကို နားထောင်သူ​အားလုံး​သည် အနာဂတ်​နှင့် ဆိုးသွမ်းသူ​တို့​အပေါ် ကျရောက်​တော့​မည့် ဘေးဆိုး​ကို ကြောက်ရွံ့​စ​ရာ​မလို​ချေ။ ယင်းအစား သူတို့သည် “များပြား​သော​ငြိမ်သက်ခြင်း​၌ မွေ့လျော်​ကြ​မည့်” နေရာ​ဖြစ်သော မြေကြီး​ပရဒိသု​တွင် ထာဝရ​အသက်ကို ရယူရန် ဝမ်းမြောက်​စွာ စောင့်စား​နိုင်​ပါ​သည်။—ဆာလံ ၃၇:၁၀၊ ၁၁။

[စာမျက်နှာ ၈ ပါ လေးထောင့်ကွက်]

ဝမ်းနည်းပူဆွေး​နေ​သူများ​အတွက် နှစ်သိမ့်မှု

သင်​ချစ်​မြတ်နိုး​ရသူ​အချို့​သည် သဘာဝဘေးဒဏ်​ကြောင့်​ဖြစ်စေ၊ အခြား​ဘေးဆိုး​တစ်ခုခု​ကြောင့်​ဖြစ်စေ သေဆုံး​ခဲ့​ရ​ပါသလော။ လွန်ခဲ့သော​အနှစ် ၂,၀၀၀ နီးပါး​က ယေရှု၏​မိတ်ဆွေရင်း လာဇရု​သည် အချိန်မတန်​ဘဲ သေဆုံး​ခဲ့​ရသည်။ ယင်း​အကြောင်းကို သိရှိ​သွားသော​အခါ ယေရှုသည် လာဇရု​နေထိုင်​သည့် ဗေသနိ​ရွာ​သို့ ထွက်သွား​ပြီး သေခြင်း​၌ “အိပ်ပျော်” နေသော လာဇရု​ကို အသက်ပြန်ရှင်​စေ​ခဲ့​၏။—ယောဟန် ၁၁:၁-၄၄။

ဤ​အံ့ဖွယ်​အမှုကို ယေရှု​ပြု​ခဲ့​ရခြင်း​မှာ လာဇရု​နှင့် ၎င်း​၏​မိသားစုကို ချစ်​ကြောင်း​ပြ​ရန်​သာမက မိမိ​အုပ်ချုပ်​မည့်​အချိန်အတွင်း “သင်္ချိုင်း​များ​မှာ ရှိသောသူ​အပေါင်း​တို့” ကို ထမြောက်​စေမည်​ဟူသော မိမိ၏​ကတိတော်​ကို ယုံကြည်​စိတ်ချ​စေရန်​လည်း​ဖြစ်သည်။ (ယောဟန် ၅:၂၈၊ ၂၉) မှန်ပါသည်။ လာ​မည့်​ပရဒိသု​တွင် ယေရှုသည် ဧဒင်ဥယျာဉ်​၌ ပုန်ကန်မှု​အစပြု​ကတည်းက ပေါ်ပေါက်​လာ​ခဲ့​သော ထိခိုက်​နစ်နာမှု​မှန်သမျှကို ပယ်ဖျက်​ပေး​ပါ​လိမ့်​မည်။ *—၁ ယောဟန် ၃:၈။

[အောက်ခြေမှတ်ချက်]

[စာမျက်နှာ ၉ ပါ လေးထောင့်ကွက်/ရုပ်ပုံ]

မြေငလျင်​တစ်ခု​က ကျွန်မ​ရဲ့ ဘဝ​ဦးတည်ချက်​ကို ပြောင်းလဲ​စေ​ခဲ့

၁၉၇၁ ခုနှစ်​တုန်း​က ကျွန်မ​ဟာ ငယ်ရွယ်​တဲ့​မိခင်​တစ်ယောက်​ဖြစ်​ပြီး အော်ပရာ​က​ဇာတ်​မှာ အဆိုကျော်​တစ်ဦး​ဖြစ်​ဖို့ ရည်မှန်း​ထားခဲ့​တယ်။ ၁၉၅၇ ခုနှစ်​မှာ ကျွန်မ​အရမ်း​စွဲလမ်း​နှစ်သက်​နေတဲ့ တေးဂီတ​အလုပ်ကို​လုပ်ဖို့​ရည်ရွယ်ချက်​နဲ့ ကနေဒါ​နိုင်ငံ၊ မ​န်​နီ​တို​ဘာ​ပြည်နယ်​က ကျွန်မ​ရဲ့​မွေးရပ်မြေ​ဖြစ်​တဲ့ ဝင်​နီ​ပက်​ခ်​မြို့ကနေ အမေရိကန်​နိုင်ငံ၊ ကယ်လီဖိုးနီးယား​ပြည်နယ်၊ ဟော​လီဝုဒ်​ဒေသ​အနားကို ပြောင်းရွှေ့​သွားတယ်။

ယေဟောဝါသက်သေ​တစ်ဦး​ဖြစ်​တဲ့ ကျွန်မ​ရဲ့​မိခင်​ဟာ ကနေဒါ​နိုင်ငံ​ကနေ ကျွန်မ​ဆီ​ကို ကိုးနှစ်​တိုင်တိုင် နွေ​ရာသီ​ရောက်​တိုင်း လာ​လည်ပတ်​ခဲ့​တယ်။ အမေ​ဟာ လာလည်တဲ့​အချိန်တိုင်းမှာ ကျွန်မ​ကို ကျမ်းစာ​အကြောင်း​တွေ​ပြောပြ​တယ်။ ပျော်ရွှင်မှု​နဲ့ မိသားစု​ဘဝ​အတွက် အကောင်းဆုံး​အကြံဉာဏ်​တွေ သမ္မာကျမ်းစာ​မှာ​ပါ​တယ်​ဆိုတာ​ကို ယုံကြည်​စိတ်ချ​စေ​ခဲ့​တယ်။ ကျွန်မ အမေ့ကို​ချစ်တဲ့​အတွက် သူပြောတာ​တွေ​ကို လေးလေးစားစား နားထောင်ပေး​လိုက်ပါ​တယ်။ ဒါပေမဲ့ သူ​ပြန်​သွားတဲ့အခါ​တိုင်း သူ​ပေး​ထားခဲ့​တဲ့ စာပေ​တွေ​ကို ကျွန်မ​လွှင့်ပစ်လိုက်​ပြီး ကျွန်မ​ဘဝဟာ လမ်းမှန်​ကို ဦးတည်​နေတယ်လို့ ယုံကြည်​မိတယ်။

အဲဒီနောက် ၁၉၇၁၊ ဖေဖော်ဝါရီ​လရဲ့ အင်္ဂါ​နေ့​မနက်စောစော​မှာ ၆.၆ ရစ်ခ်ျတာစကေး​ရှိတဲ့ မြေငလျင်​တစ်ခု​က ကျွန်မ​ကို လှုပ်​နှိုး​လိုက်တယ်။ ဆူညံသံ တွေ​က နား​ကွဲ​လု​မတတ်​ဖြစ်​ပြီး အရမ်း​ကို​လှုပ်ခါ​နေတယ်။ ကြောက်လန့်​တ​ကြား​နဲ့ ကျွန်မ​သားငယ်​ဆီ​ကို​ပြေး​သွားပြီး ပုခက်​ထဲမှာ လုံလုံခြုံခြုံ​ရှိနေတာကို တွေ့​လိုက်ရ​မှ စိတ်သက်သာရာ​ရသွားတယ်။ လှုပ်ခါ​တာ​ရပ်သွား​တော့ မှန်​ကွဲ​စ​တွေ​နဲ့ ဗီရို​တွေ​ထဲ​က ပစ္စည်း​တွေ​ဟာ ကြမ်းပြင်​မှာ​ပြန့်ကြဲ​နေပြီး ရေကူး​ကန်​ထဲ​က​ရေ​တွေ​ဟာ​လည်း အိမ်နောက်​ဘက်​ကို စင်​ထွက်​နေတယ်။ ကျွန်မ​ရဲ့​မိသားစုဟာ ဘေးကင်း​သွားပေ​မဲ့ ကျွန်မ ဆက်​အိပ်လို့မရ​တော့​ဘူး။

“နောက်ဆုံးသော​နေ့ရက်​များ” ရဲ့​လက္ခဏာ​တစ်ခု​ဖြစ်​တဲ့ “ကြီးစွာ​သော ငလျင်​လှုပ်ခြင်း” အကြောင်းကို အမေ​ပြောပြ​ခဲ့​ဖူး​တယ်။ (၂ တိမောသေ ၃: ၁၊ သမ္မာ; လုကာ ၂၁:၇-၁၁၊ က​ဘ) အဲဒီ​နှစ်​နွေ​ရာသီမှာ ကျွန်မ​ဆီ​ကို ကျမ်းစာ,စာပေ​တွေ​မပါဘဲ အမေ​ပြန်လာ​လည်တယ်။ ကိုးနှစ်​တိုင်တိုင် ကျွန်မ​ကို​သက်သေခံ​ခဲ့​တာ ဘာမှ​အကျိုး​မထူး​တဲ့​အတွက် ကျွန်မ စိတ်မဝင်စား​ဘူးလို့ အမေက ယူမှတ်​ထား​တယ်။ အမေ အရမ်း​မှားသွား​ပြီ။ အမေ​လည်း​ရောက်လာ​ရော ကျွန်မ အမေ့ကို မေးခွန်းတွေ တရ​စပ်​မေးတော့​တာ​ပဲ။ သီချင်းဆို​ခြင်း​နဲ့ ကျော်ကြား​မှု​ဟာ ချက်ချင်းပဲ အရေးမပါ​သလို​ဖြစ်သွား​တယ်။

အမေ​ရောက်လာ​တဲ့​အပတ်​မှာပဲ ဒေသခံ​ဘုရားသခင့်​နိုင်ငံတော်​ခန်းမ​က ခရစ်ယာန်​အစည်းအဝေးတွေကို အမေနဲ့​အတူ သွား​တက်တယ်။ အဲဒီ​နောက်ပိုင်း စည်းဝေး​မ​တက်​ဘဲ လွတ်​သွားတယ်​ဆိုတာ ရှားတယ်။ အမေ​ဟာ ကျွန်မ​အတွက် အိမ်တွင်း​ကျမ်းစာ​သင်အံမှု​တစ်ခု စီစဉ်​ပေး​ခဲ့​တယ်။ ၁၉၇၃ ခုနှစ်​မှာ ကျွန်မ​နှစ်ခြင်း​ခံ​ခဲ့​ပြီး က​နေ့​အထိ အခြားသူ​တွေ​ကို ဘုရားသခင့်​နိုင်ငံတော်​သတင်းကောင်း ကြွေးကြော်​တဲ့​နေရာမှာ လစဉ် ပျမ်းမျှ​နာရီ ၇၀ အသုံးပြုခဲ့တယ်။ (မဿဲ ၂၄:၁၄) မြေငလျင်​တစ်ခု​ဟာ ဘုရားသခင်​အပေါ်​ထား​ရှိတဲ့ ကျွန်မ​ရဲ့​ယုံကြည်ခြင်းကို ပျက်ပြား​သွား​စေမယ့်​အစား ကျွန်မ​ရဲ့​ယုံကြည်ခြင်းကို ခိုင်ခံ့​စေ​ခဲ့​တယ်။—ကော​လင်း​အက်စ်ပါ​စာ ပြောပြ​သည်။