ကမ္ဘာ့ဖြစ်ရပ်အကဲခတ်

▪ “အမှန်တရားဖြစ်ပုံရ၍ အသက်နှင့်ပတ်သက်သောအသိပညာကို ပိုမိုတိုးပွားစေသည့် ဆင့်ကဲဖြစ်စဉ်ကိုထောက်ခံသော သိပ္ပံအထောက်အထားများစွာရှိသည်။” —၁၆ ယောက်မြောက် ပုပ် ဘင်နီဒစ်။

▪ “မင်နီအပလစ်မြို့ [မင်နီဆိုတာ] မှ အနှစ် ၄၀ သက်တမ်းရှိ တံတားတစ်စင်းသည် ယာဉ်သွားလာမှုအများဆုံးအချိန်တွင် တံတားအောက် ပေ ၆၀ အကွာရှိ မစ္စစ္စပီမြစ်အတွင်းသို့ ရုတ်တရက်ကျိုးကျသွားပြီး [လူ ၁၃ ဦး] သေဆုံးခဲ့ပြီးနောက်ပိုင်း အမေရိကန်ရှိ ‘တည်ဆောက်မှုတွင် ချို့ယွင်းချက်’ ရှိသော တံတားအစင်းပေါင်း ၇၄,၀၀၀ ခန့်ကို စစ်ဆေးပြုပြင်ရန် ငွေရရှိရေးအတွက် . . . အာဏာပိုင်များ အလုပ်များခဲ့ကြသည်။”—THE WEEK, မဂ္ဂဇင်း၊ အမေရိကန်။

အများစုက ဥပဒေကို ချိုးဖောက်ကြ

“‘လူအများစုမှာ ဥပဒေကိုလိုက်နာကြသည်’ ဟုယုံကြည်ခြင်းသည် ယုံတမ်းစကားကို ယုံကြည်ခြင်းသာဖြစ်၏” ဟုလန်ဒန်တိုင်းမ်စ် သတင်းစာကဆိုသည်။ “ဗြိတိန်နိုင်ငံသားအများစုက မိမိတို့သည် မိမိတို့လိုက်နာလိုသောဥပဒေကို လိုက်နာလိုသောအခါမှသာ လိုက်နာသည်ဟု ဝန်ခံကြ၏။” ကင်းစ်ကောလိပ်မှ ရာဇဝတ်မှုနှင့် တရားစီရင်မှုကို လေ့လာသောဌာန၏ သုတေသနပြုချက်အရ ဥပဒေချိုးဖောက်သူအများစုသည် “ဂုဏ်အသရေရှိ” အသိုင်းအဝိုင်းမှ ပုဂ္ဂိုလ်များဖြစ်သည်ဟု ဆို၏။ မေးမြန်းခံရသူ သုံးပုံတစ်ပုံသည် အခွန်ရှောင်ရန် ငွေထိုး၍ သုံးပုံတစ်ပုံက ပိုနေသောပြန်အမ်းငွေကို ယူထားကြသည်၊ ငါးပုံတစ်ပုံက အလုပ်ခွင်တွင် ပစ္စည်းခိုးသည်ဟု ဝန်ခံသည်။ ဤအမူအကျင့်သည် “ကြမ်းတမ်းရမ်းကားမှုနှင့် လမ်းပေါ်ရာဇဝတ်မှုထက်ပင် ပို၍ဆိုးရွားကောင်းဆိုးရွားမည်ဖြစ်သော လူ့ဘောင်အဖွဲ့အစည်း၏ ကိုယ်ကျင့်တရား နိမ့်ကျမှုကို ဖော်ပြသည်” ဟုသုတေသီများက ကောက်ချက်ချကြ၏။

“ဘုရားသခင့်လက်တော်ရှိ” နျူကလီးယားလက်နက်များ

ရုရှားသြသဒေါက်စ်ချာ့ခ်ျသည် ရုရှားနျူကလီးယားလက်နက်တိုက်တွင် သိုလှောင်ထိန်းသိမ်းရေးတာဝန်ရထားသော အမျိုးသားအမျိုးသမီးများအား ၎င်းတို့၏ လုပ်ဆောင်မှုအတွက် ကောင်းချီးပေးခဲ့သည်။ မော်စကိုမြို့ရှိ ကယ်တင်ရှင်ခရစ်တော်ဘုရားကျောင်းတွင် ကျင်းပသောအခမ်းအနား၌ ဖတ်ကြားခဲ့၍ ရုရှားသတင်းစာတစ်စောင်တွင် ဖော်ပြသောသတင်း၌ ရုရှားသြသဒေါက်စ်ဂိုဏ်းအုပ် အလက်စ္စစ် ၂ က ဤသို့ပြောခဲ့သည်– “သင်တို့ ပြုလုပ်ထားသော နျူကလီးယားလက်နက်နှင့် သင်တို့ထံ အပ်နှံထားသောလက်နက်များသည် ဘုရားသခင့်လက်တော်တွင် အမြဲရှိနေရန်နှင့် အခြားနိုင်ငံများ၏တိုက်ခိုက်မှုကို ဟန့်တား၍ လက်တုံ့ပြန်နိုင်သည့်လက်နက်ဖြစ်ရန်သာ . . . ဘုရားသခင်ထံ ကျွန်ုပ်ဆုတောင်းသည်။”

ရှေးအစ္စရေးနိုင်ငံမှပျားရည်

“အစ္စရေးနိုင်ငံအား ‘နို့နှင့်ပျားရည်စီးသောပြည်’ (သို့မဟုတ် အနည်းဆုံး ပျားရည်စီးသောပြည်ဟု ခေါ်ဆိုနိုင်) ဟုခေါ်ဆိုထားသည့် ကျမ်းစာဖော်ပြချက်ကို ထောက်ခံသော ရှေးဟောင်းသုတေသနဆိုင်ရာ အထောက်အထားများကို ရှာဖွေတွေ့ ရှိခဲ့သည်” ဟု ဟီးဗရူးတက္ကသိုလ်မှ ဂျေရုဆလင်ရှေးဟောင်းသုတေသနအဖွဲ့က ဆိုသည်။ အစ္စရေးနိုင်ငံ၊ ဗက်ရှန်တောင်ကြားရှိ တဲလ်ရာကော့ဗ်၌ အနည်းဆုံး အဆင့်သုံးဆင့် ဆင့်လျက်ရှိသော ဆလင်ဒါပုံ ရွှံ့ပျားအုံတန်းသုံးတန်းကို တွေ့ရှိခဲ့ကြသည်။ ပျားများအုံဖွဲ့နေခဲ့သည့်အချိန်မှာ ဘီစီ ၁၀ ရာစုမှ ဘီစီ ၉ ရာစုအစောပိုင်းကဖြစ်ပြီး “ယင်းတွင် ပျားအုံပေါင်း ၁၀၀ ခန့်ရှိရမည်” ဟုအဆိုပါသတင်းက ဖော်ပြသည်။ ပျားမွေးမြူသူများက ယင်းနေရာတွင် တစ်နှစ်လျှင် “ပျားရည်တန်ဝက်” ထိရရှိနိုင်သည်ဟု ခန့်မှန်းကြသည်။

အိမ်မွေးတိရစ္ဆာန်သည်သာ ပထမ

အင်တာနက်မှ စစ်တမ်းကောက်ယူချက်တစ်ခုအရ “ဩစတြေးလျလူမျိုး လေးဦးလျှင်တစ်ဦးက မိမိတို့၏ ချစ်စနိုးအိမ်မွေးတိရစ္ဆာန်သည် တန်ဖိုးအရှိဆုံး မိသားစုဝင်ဖြစ်ပြီး မိမိတို့၏အိမ်ထောင်ဖက် သို့မဟုတ် မိဘများထက်ပင် ပို၍အရေးကြီးသည်ဟု ပြောပြ၏” ဟုဆစ်ဒနီမြို့ထုတ် သတင်းစာတစ်စောင်က ဆိုသည်။ ဩစတြေးလျငွေကြေးဆိုင်ရာအကြံပေးကုမ္ပဏီမှ ကောက်ယူသောစစ်တမ်းတစ်ခုအရ မေးမြန်းခံရသူ သုံးဦးလျှင် တစ်ဦးသည် “၎င်းတို့၏ ဆေးဘက်ဆိုင်ရာလိုအပ်ရာထက် ၎င်းတို့၏ ချစ်စနိုးအိမ်မွေးတိရစ္ဆာန်အတွက် အချိန်နှင့်ငွေကို ပို၍” အသုံးပြုသည်ဟုဆို၏။ ချစ်စနိုးအိမ်မွေးတိရစ္ဆာန်များအတွက် ရွေးချယ်စရာ ကုသနည်းများတွင် သံလိုက်ဓာတ်မှန်၊ ပြွန်ဖြင့်ခွဲစိတ်ခြင်း၊ အရိုးဆက်ခြင်း၊ ဓာတုကုထုံး၊ ကိုယ်အင်္ဂါအစားထိုးခြင်း၊ တင်ပါးဆုံရိုးအစားထိုးခြင်းနှင့် ဦးနှောက်ခွဲစိတ်ခြင်းတို့ပင် ပါဝင်သည်။