ကျွန်မရဲ့ ပန်းရောင်စာအုပ်လေး

စင်သီယာ နယူးဝဲလ် ပြောပြသည်

ကျွန်မအသက် ခုနစ်နှစ်အရွယ်မှာ အမေရိကန်၊ လူဝီစီယားနားပြည်နယ်၊ ရှယ်ရီပို့တ်မြို့က ကျွန်မရဲ့ကျောင်းကားထဲမှာ မိန်းကလေးတစ်ယောက်ဟာ ကြီးမြတ်သောဆရာ့စကားကို နားထောင်ခြင်း လို့ခေါ်တဲ့ ပန်းရောင်စာအုပ်လေးတစ်အုပ် ကျွန်မကို ပေးခဲ့တယ်။ သူက အဲဒီစာအုပ်ကို ဆင့် ၅၀ နဲ့ရနိုင်ကြောင်း ပြောတယ်။ အဲဒါကြောင့် သူ ကျွန်မရဲ့အိမ်ကိုရောက်လာပြီး ပဲနိ ၅၀ ကို အတူတကွ ရေတွက်ခဲ့ကြတယ်။

ကျွန်မဟာ အဲဒီပန်းရောင်စာအုပ်လေးကို အရမ်းနှစ်သက်ခဲ့တယ်။ စာအုပ်ကိုရရှိပြီး မကြာခင်မှာပဲ ကျွန်မဖျားပြီး ဆေးရုံတက်ခဲ့ရတယ်။ ကျွန်မကိုသက်သာစေဖို့အတွက် ကျွန်မမိဘတွေဟာ ကျွန်မမြတ်နိုးတဲ့စာအုပ်ထဲက အကြောင်းအရာတွေကို ဖတ်ပြခဲ့တယ်။ ဒါပေမဲ့ အဲဒီစာအုပ်က ကလေးငယ်လေးတွေအတွက် အဓိကရည်ရွယ်ထားတာကြောင့် ကျွန်မအသက်ကြီးလာတဲ့အခါ ပန်းရောင်စာအုပ်လေးကို သိပ်မဖတ်ဖြစ်တော့ဘူး။ အဲဒီစာအုပ်က ကျွန်မကို အရေးကြီးတဲ့သင်ခန်းစာတွေ သင်ပေးပေမဲ့ နက်နက်နဲနဲ နားလည်ချင်ခဲ့တယ်။ ဒါကြောင့် ကျွန်မဟာ ကျွန်မရဲ့မေးခွန်းတွေအတွက် ကျမ်းစာအဖြေတွေကို ရှာတွေ့နိုင်အောင် အပတ်စဉ် ချာ့ခ်ျအမျိုးမျိုးကိုတက်ဖို့ ဆုံးဖြတ်ခဲ့တယ်။ ဒါပေမဲ့ ကျေနပ်လောက်တဲ့ ရှင်းပြချက်တွေ မရရှိခဲ့ဘူး။

ကျွန်မ အထက်တန်းကျောင်းရောက်တဲ့အခါ ကျွန်မအတွက် ဘာသာတရားဟာ သိပ်အရေးမကြီးတော့သလို ဖြစ်လာပေမဲ့လည်း ကျမ်းစာအသိပညာအတွက် ဆုတောင်းပြီး ကျမ်းစာကို ပုံမှန်ဖတ်နေဆဲပဲ။ တစ်နေ့မှာ အတန်းဖော်တစ်ယောက်ဟာ အမျိုးသားသီချင်းသီဆိုတဲ့အခါ မပါဝင်တာကို ကျွန်မ သတိထားမိတယ်။ အဲဒါနဲ့ပတ်သက်ပြီး သူ့ကိုမေးတဲ့အခါ သူက ဒီလိုပြန်ပြောတယ်– “ကျွန်မရဲ့သစ္စာစောင့်သိမှုကို ယေဟောဝါဆီ ပေးပြီးသွားပြီ၊ ကျွန်မရဲ့သစ္စာစောင့်သိမှုကို ဘုရားသခင်ကိုရော တခြားအရာကိုပါ တစ်ပြိုင်တည်း မပေးနိုင်တော့ဘူး။” ကျိုးကြောင်းညီညွတ်လိုက်တာ။ ‘ဒါပေမဲ့ ယေဟောဝါဆိုတာ ဘယ်သူလဲ’ လို့ ကျွန်မ သိချင်ခဲ့တယ်။

ကျွန်မအတန်းဖော်ဟာ ကျွန်မမေးတဲ့မေးခွန်းတိုင်းကို ကျမ်းစာနဲ့ အဖြေပေးခဲ့တယ်။ ‘ဒီအရာတွေအားလုံးကို သူဘယ်လို သင်ယူခဲ့သလဲ။ ကျွန်မတို့ဟာ သက်တူရွယ်တူတွေပဲ၊ ဒါပေမဲ့ သူက ကျမ်းစာနဲ့ပတ်သက်တာ အားလုံးကို သိနေတယ်’ ဆိုပြီး ကျွန်မ အံ့သြခဲ့တယ်။ သူ ဒီလိုရှင်းပြခဲ့တယ်– “ကျွန်မက ဝတ်ပြုရာခန်းမမှာ ကျမ်းစာနဲ့ပတ်သက်တာတွေကို လေ့လာသင်ယူတယ်။” တနင်္ဂနွေနေ့မှာပြုလုပ်တဲ့ အစည်းအဝေးကိုတက်ဖို့ သူ့ရဲ့ ဖိတ်ခေါ်ချက်ကို ကျွန်မစိတ်အားထက်သန်စွာနဲ့ လက်ခံခဲ့တယ်။ မြို့မှာရှိတဲ့ ချာ့ခ်ျတိုင်းကို ကျွန်မ ရောက်ခဲ့ဖူးတယ်၊ ဒါပေမဲ့ ယေဟောဝါသက်သေတွေရဲ့ ဝတ်ပြုရာခန်းမကိုတော့ တစ်နည်းနည်းနဲ့ လွဲသွားခဲ့တယ်။ အဲဒီတနင်္ဂနွေနေ့မှာတော့ ကျမ်းစာအမှန်တရား သွန်သင်ပေးတဲ့ နေရာတစ်နေရာကို ကျွန်မ ရှာတွေ့သွားပြီဆိုတာ နားလည်သွားတယ်။

အစည်းအဝေးပြီးတဲ့နောက် စာအုပ်စာတမ်းဌာနကို ကျွန်မသွားတော့ အပေါ်ဆုံးအဆင့်မှာ ကျွန်မရဲ့ပန်းရောင်စာအုပ်လေး ရှိနေတယ်။ ဘတ်စ်ကားပေါ်က ကောင်မလေးတစ်ယောက်ဆီက စာအုပ်ကိုရတဲ့အချိန်ကနေ အခုအချိန်ထိဆိုရင် ဆယ်နှစ်ရှိသွားခဲ့ပြီဆိုတော့ အဲဒီစာအုပ်ပေးခဲ့တဲ့သူကို ကျွန်မမေ့သွားတယ်။ တကယ်တော့ ကျွန်မကို အစည်းအဝေးတက်ဖို့ ဖိတ်ခေါ်ခဲ့တဲ့ နန်စီဟာ အဲဒီမိန်းကလေးပဲဆိုတာ အခု ကျွန်မ ပြန်မှတ်မိသွားပြီ။

အဲဒီနောက် ကျွန်မဟာ တစ်ပတ်တစ်ကြိမ် ကျမ်းစာစလေ့လာခဲ့ပြီး မြန်မြန်ဆန်ဆန်ပဲ တိုးတက်လာတယ်။ ကျွန်မရဲ့ ပန်းရောင်စာအုပ်လေးကနေ အတော်သိရှိထားတဲ့အတွက် ကျမ်းစာသင်အံမှုကနေ ကျွန်မလေ့လာသိရှိလာတဲ့ အသိပညာတွေကို ချက်ချင်း နားလည်ခဲ့တယ်။ မကြာခင်မှာပဲ ကျွန်မရဲ့အသက်တာကို ယေဟောဝါထံ အပ်နှံပြီး ကျွန်မအသက် ၁၈ နှစ်အရွယ် ၁၉၈၅ ခုနှစ်မှာ နှစ်ခြင်းခံခဲ့တယ်။ အဲဒီအတောအတွင်းမှာ နန်စီဟာ ဖလော်ရီဒါကို ပြောင်းသွားတဲ့အတွက် ကျွန်မတို့ အဆက်အသွယ် ပြတ်သွားတယ်။

နှစ်အနည်းငယ်ကြာပြီးတဲ့နောက် ကျွန်မ အိမ်ထောင်ပြုလိုက်တယ်။ ၁၉၉၁ ခုနှစ်မှာ ကျွန်မခင်ပွန်း ဒရူးနဲ့ ကျွန်မဟာ အရှေ့တက္ကဆပ်မှာရှိတဲ့ မြို့ငယ်လေးတစ်မြို့မှာ ရှေ့ဆောင်တွေအဖြစ် အချိန်ပြည့်ဓမ္မအမှုမှာ စတင်ပါဝင်ခဲ့တယ်။ ဒါပေမဲ့ နန်စီကော ဘာဖြစ်နေသလဲ။ ကျွန်မ ဘာမှမသိဘူး။ အဲဒီနောက် တစ်ညမှာ ဒီဇင်ဘာ ၁၊ ၁၉၉၂ ထုတ် ကင်းမျှော်စင်ကို ကျွန်မဖတ်နေတုန်း ကျယ်လောင်စွာနဲ့ ဒီလိုအော်ခဲ့တယ်– “ငါ နန်စီကို တွေ့ပြီ၊ ငါ နန်စီကို တွေ့ပြီ။” နောက်ဆုံးဂိလဒ်ကျောင်းဆင်းပွဲရဲ့ ဓာတ်ပုံထဲမှာ သူပါနေတယ်။ သူနဲ့သူ့ခင်ပွန်း နစ်ခ် ဆီမနယ်လီတို့ဟာ တောင်အမေရိကတိုက်မှာရှိတဲ့ အီကွေဒေါမှာ ခန့်အပ်ခံရတယ်။

၂၀၀၆ ခုနှစ်မှာ ကျွန်မခင်ပွန်းနဲ့ ကျွန်မဟာ ယေဟောဝါသက်သေတွေရဲ့ အပြည်ပြည်ဆိုင်ရာ ဆောက်လုပ်ရေး စီမံကိန်းတွေအတွက် စေတနာ့ဝန်ထမ်းတွေအဖြစ် ပါဝင်ဖို့ လျှောက်လွှာတင်ခဲ့ကြတယ်။ ကျွန်မတို့ရဲ့ပထမဆုံး တာဝန်ခန့်အပ်ချက်က အီကွေဒေါ ဌာနခွဲ တိုးချဲ့ရေးစီမံကိန်းမှာ ဖြစ်လိမ့်မယ်ဆိုတာ သိလိုက်ရတဲ့အခါ ကျွန်မတို့ အရမ်းစိတ်လှုပ်ရှားသွားတယ်။ အီကွေဒေါဌာနခွဲကို ကျွန်မပထမဆုံး ရောက်တဲ့နေ့မှာ နန်စီအထဲကို လျှောက်လာတယ်။ အဲဒီနေ့မှာပဲ သူဟာ ဌာနခွဲကို လာလည်ပတ်နေတာဖြစ်တယ်။ ပန်းရောင်စာအုပ်လေး ရရှိပြီးနောက်ပိုင်း ၃၂ နှစ်အကြာမှာ ကျွန်မတို့တစ်ယောက်နဲ့တစ်ယောက် တွေ့သွားပြီး ပွေ့ဖက်လိုက်ကြတယ်။ အဲဒီစာအုပ်အတွက်နဲ့ စာအုပ်ကိုဝေငှခဲ့တဲ့ မိန်းကလေးအတွက် ယေဟောဝါကို ကျွန်မ ကျေးဇူးတင်လိုက်တာ။

[စာမျက်နှာ ၁၁ ပါ လေးထောင့်ကွက်/ရုပ်ပုံများ]

ယင်းစာအုပ်သည် သန်းပေါင်းများစွာသောသူတို့၏ အသက်တာအပေါ် အကျိုးသက်ရောက်ခဲ့

ကြီးမြတ်သောဆရာ့စကားကို နားထောင်ခြင်း စာအုပ်ကို ပုံနှိပ်ထုတ်ဝေပြီး ၃၂ နှစ်ကြာပြီးနောက် ၂၀၀၃ ခုနှစ်တွင် ပြန်လည်တည်းဖြတ်ထားသော စာအုပ်ကို ထုတ်ဝေခဲ့သည်။ ယင်းစာအုပ်ကို ကြီးမြတ်သောဆရာထံမှ သင်ယူလော့ ဟု အမည်ပေးထားသည်။ ယေရှု၏သွန်သင်ချက်များနှင့်ပတ်သက်၍ စုစည်းထားသော ယင်းစာအုပ်ကို ဘာသာစကားပေါင်း ၁၀၀ ကျော်ဖြင့် ၆၅ သန်းကျော် ပုံနှိပ်ထုတ်ဝေခဲ့ပြီး ဖြစ်သည်။ ကြီးမြတ်သောဆရာထံမှသင်ယူလော့ စာအုပ်ကို သင့်ဒေသရှိ ယေဟောဝါသက်သေများထံမှ ရယူနိုင်ပါသည်။

[စာမျက်နှာ ၁၁ ပါ ရုပ်ပုံများ]

ပုံငယ်များ– ကျွန်မတို့ တစ်ဦးနှင့်တစ်ဦး သိကျွမ်းခဲ့သည့် ငယ်ရွယ်စဉ်က

စင်သီယာ

နန်စီ

နောက်ခံ– နှစ်များစွာကြာပြီးနောက် အီကွေဒေါ ဌာနခွဲတွင်