ကမ္ဘာ့ဖြစ်ရပ်အကဲခတ်

▪ မကြာသေးမီကပြုလုပ်သော လေ့လာမှုတစ်ခုတွင် “ဗြိတိန်လူမျိုး ၁၀ ဦးတွင် ခြောက်ဦးက ဝတ်ပြုရေးသည် စိတ်ဝမ်းကွဲစေသည့်တွန်းအားဖြစ်လာသည်ဟု ယူဆကြောင်း တွေ့ ရှိခဲ့ရသည်။”—THE CATHOLIC HERALD, ဗြိတိန်။

▪ အလင်းမှလျှပ်စစ်စွမ်းအင်သို့ တိုက်ရိုက်ကူးပြောင်းပေးသောကမ္ဘာ့အကြီးဆုံးစက်ရုံကို ပေါ်တူဂီနိုင်ငံတွင် တည်ဆောက်ခဲ့သည်။ နေစွမ်းအင်မှလျှပ်စစ်စွမ်းအင်သို့ကူးပြောင်းပေးသောချပ်ပြားများ (solar cells) သည် ဧက ၆၀၀ နေရာယူထားပြီး ယင်းသည် အိမ်ပေါင်း ၃၀,၀၀၀ အတွက် လျှပ်စစ်ဓာတ်ကို လုံလုံလောက်လောက် ထုတ်လုပ်ပေးနိုင်ပါလိမ့်မည်။ —EL PAÍS, စပိန်။

▪ ကမ္ဘာတစ်ဝန်းတွင် နှစ်စဉ် လူငယ် ၉၀၀,၀၀၀—နေ့စဉ် ၂,၀၀၀ ကျော်—သည် ဖြစ်ရိုးဖြစ်စဉ်မဟုတ်သောအကြောင်းရင်းများကြောင့် သေဆုံးကြသည်။ ဖြစ်ရသည့်အဓိကအကြောင်းရင်းများမှာ လမ်းပေါ်မတော်တဆဖြစ်ခြင်း၊ ရေနစ်သေခြင်းနှင့် မီးလောင်ကျွမ်းခြင်းတို့ဖြစ်သည်။—DIE WELT, ဂျာမနီ။

▪ မကြာသေးမီနှစ်များတွင် တောပြုန်းသည့်နှုန်းသည် လျော့နည်းသွားခဲ့သော်လည်း ကမ္ဘာပေါ်တွင် တစ်ရက်လျှင် သစ်တော [၈၀ စတုရန်းမိုင်] ပျက်စီးဆုံးရှုံးနေဆဲဖြစ်သည်။—FOOD AND AGRICULTURE ORGANIZATION OF THE UNITED NATIONS, အီတလီ။

▪ ၂၀၀၉ ခုနှစ်၊ ဇန်နဝါရီလ၌ ပင်လယ်ဓားပြတစ်ဖွဲ့သည် ဆော်ဒီရေနံတင်သင်္ဘောကို ပြန်ပေးဆွဲရာတွင် ရွေးဖိုးငွေအဖြစ် အမေရိကန်ဒေါ်လာ ၃,၀၀၀,၀၀၀ လက်ခံရရှိကြောင်း သတင်းရပြီးမကြာမီလေးတွင် ဓားပြငါးဦး ရေနစ်သေသွားခဲ့သည်။ ယင်းသေဆုံးသူတို့ထဲမှ ကမ်းစပ်တွင်တင်နေသူတစ်ဦး၏ အိတ်ကပ်ထဲ၌ ပလက်စတစ်အိတ်ဖြင့်ထုပ်ထားသော ဒေါ်လာ ၁၅၃,၀၀၀ ကိုတွေ့ ရှိခဲ့သည်။—ASSOCIATED PRESS, ဆိုမားလီးယား။

ရွယ်တူချင်းများ ပျက်စီးနေသည်ဟု လူငယ်များသုံးသပ်ကြ

နယ်သာလန်နိုင်ငံမှ သတင်းစာတစ်စောင် (de Volkskrant) အရ ယင်းနိုင်ငံရှိလူငယ်များသည် “သူတို့၏ရွယ်တူချင်းများသည် ပျက်စီးနေကြသည်ဟု ခံစားကြရပြီး သူတို့သာကောင်းသည်ဟု ခံစားကြရန် အားပေးခံရလွန်းသောကြောင့် အခြားသူများကို ထည့်သွင်းစဉ်းစားခြင်းမရှိတော့ပါ။” အသက် ၁၆ နှစ်မှ ၂၄ နှစ်ကြားရှိ လူငယ် “၃ ဦးလျှင် အနည်းဆုံး ၂ ဦးက . . . မိမိတို့၏လုပ်ပိုင်ခွင့်များနှင့် ထမ်းဆောင်ရသည့်တာဝန်များ ဟန်ချက်မညီကြောင်း ခံစားကြရသည်” ဟု သတင်းစာကဖော်ပြသည်။ ယေဘုယျအမြင်မှာ “လူငယ်များသည် များစွာတောင်းဆိုကြသည် . . . လူ့အဖွဲ့အစည်းအတွက် မိမိတို့ဘက်မှအဘယ်အရာလုပ်ပေးနိုင်သည်ကိုမူ မစဉ်းစားသလောက်ဖြစ်သည်။”

ကလေးများ နေ့လယ်စာပြုလုပ်

ဂျပန်မှကျောင်းတစ်ကျောင်းရှိ ကျောင်းအုပ်ကြီးတစ်ဦးသည် မိဘများနှင့် ကလေးများ ပို၍အတူတကွအချိန်သုံးနိုင်သည့်နည်းကို ရှာကြံသောအခါ ကလေးများသည် တစ်လတွင် တစ်ကြိမ် မိမိတို့၏နေ့လယ်စာကို ကိုယ်တိုင်ပြင်ဆင်ကြရန်ဟူသော ကျောင်းအုပ်ကြီး၏စိတ်ကူးကို ကျောင်းကလက်ခံခဲ့သည်။ ယခုအခါ ရာနှင့်ချီသောကျောင်းများက အလားတူလုပ်လာကြသည်။ “ဤအစီအစဉ်တွင် မိဘများသည် ကလေးများကို အစပိုင်းတွင် ကူညီပေးမည်ဖြစ်ပြီး နောက်ပိုင်း သူတို့ဘာသာ တဖြည်းဖြည်းလုပ်တတ်လာမည်ဖြစ်သည်” ဟုဂျပန်သတင်းစာတစ်စောင် (IHT Asahi Shimbun) ကဖော်ပြသည်။ “အတန်းတိုင်းတွင် သူ့သတ်မှတ်ချက်နှင့်သူရှိသည်။ မူလတန်းကလေးများသည် ဟင်းလျာစာရင်းပြုလုပ်ရာတွင်နှင့် ဟင်းအမည်များဝယ်ယူရာတွင် မိဘများ၏အကူအညီရယူကြသည်။ . . . အတန်းကြီးများ အဓိကအာရုံစိုက်ရာမှာ မျှတသောဟင်းလျာတစ်ခု စီစဉ်ခြင်းဖြစ်သည်။” အကျိုးရလဒ်ကား အဘယ်နည်း။ “ကလေးများ၏ချက်ပြုတ်ခြင်းစွမ်းရည်တိုးတက်လာပြီး အစားအသောက်ဖြုန်းတီးမှုလျော့နည်းလာကာ မိသားစုတွင် အကြောင်းအရာအသစ်တစ်မျိုးမျိုးကို ပြောစရာရှိလာကြောင်း ကျောင်းများက ပြောပြခဲ့ကြသည်” ဟုသတင်းစာကဖော်ပြသည်။ ကလေးများကလည်း “မိမိတို့အတွက် မိဘများပြုလုပ်ပေးသည့်အရာများကို လေးမြတ်တန်ဖိုးထားတတ်လာကြောင်း” ဖော်ပြကြသည်။

တောင်ဝင်ရိုးစွန်း၌ သန့်ရှင်းရေးလုပ်ကြ

လွန်ခဲ့သောနှစ်တွင် ရုရှားနိုင်ငံမှ ဝင်ရိုးစွန်းကျွမ်းကျင်သူများသည် ဂေဟဗေဒဆိုင်ရာအထူးအစီအစဉ်၏ တစ်စိတ်တစ်ပိုင်းအနေနှင့် အကြမ်းဖျင်းသန့်ရှင်းရေးလုပ်ရာတွင် အန္တာတိကမှ စွန့်ပစ်ပစ္စည်းတန်ချိန်ပေါင်း ၃၆၀ ကိုဖယ်ရှားခဲ့ကြသည်။ တောင်ဝင်ရိုးစွန်းရှိ သုတေသနဌာနများအနီး၌ စုပုံနေခဲ့သောအမှိုက်သရိုက်များတွင် အသုံးမပြုသောအဆောက်အအုံပစ္စည်းများ၊ ပျက်စီးသွားသောစက်ကိရိယာများနှင့် လောင်စာစည်အလွတ်များပါဝင်သည်။ “ကမ္ဘာ့တောင်ဘက်စွန်း၏ ဂေဟစနစ်ကာကွယ်ရေးအတွက် သဘောတူစာချုပ်အရ နိုင်ငံတိုင်းသည် ကိုယ့်နိုင်ငံကစွန့်ပစ်သည့်အမှိုက်များကို ကိုယ့်နိုင်ငံကတာဝန်ယူရမည်” ဟုရုရှားမဂ္ဂဇင်းတစ်စောင် (Itogi) ကဖော်ပြသည်။ “မိမိတို့တာဝန်များကို အကောင်းဆုံးထမ်းဆောင်သူတို့မှာ ဂျပန်လူမျိုးများဖြစ်သည်။”