၃။ ချက်ပြုတ်သိမ်းဆည်းတဲ့အခါ ဂရုစိုက်ပါ

ရှေး ခေတ်အစ္စရေးအချိန်က ပေါ့ဆသူတစ်ယောက်က ‘သူမသိတဲ့’ တောဘူးသီးတွေကို ခူးတယ်။ ပြီးတော့ ဟင်းအိုးထဲကို အဲဒီမစားဖူးတဲ့အရာကို ထည့်ချက်ပြုတ်ခဲ့တယ်။ စားတဲ့သူတွေက ဒါဟာ အဆိပ်ရှိနိုင်တယ်ဆိုတာသိတော့ “အိုးထဲ၌သေဘေးရှိပါသည်” ဆိုပြီးအလန့်တကြားထအော်ကြတယ်။—၄ ရာ. ၄:၃၈-၄၁။

ဒီဥပမာမှာဖော်ပြတဲ့အတိုင်း အစားအစာကို ပေါ့ပေါ့ဆဆချက်ပြုတ်ရင် အန္တရာယ်ရှိနိုင်သလို သေတောင်သေစေနိုင်တယ်။ အစာအဆိပ်သင့်မှုမဖြစ်အောင် ကာကွယ်ဖို့ အစားအစာကို ဂရုတစိုက်ချက်ပြုတ်သိမ်းဆည်းတတ်ရမယ်။ အောက်မှာဖော်ပြထားတဲ့ အကြံပြုချက်လေးချက်ကို သုံးသပ်ကြည့်ကြရအောင်–

● ရေခဲနေတဲ့အသားကို အခန်းအပူချိန်မှာ ဒီအတိုင်းအရည်ပျော်အောင် မထားပါနဲ့။

“ရေခဲနေတဲ့အသားကို အပြင်မှာ ဒီအတိုင်း အရည်ပျော်အောင်ထားတဲ့အခါ အလယ်ကအသားက ခဲနေသေးပေမဲ့ အပြင်ဘက်ကအသားက အပူချိန် ၄ နဲ့ ၆၀ ဒီဂရီစင်တီဂရိတ်ကြားရှိနေတတ်တဲ့အတွက် အန္တရာယ်ရှိတယ်။ ဘာကြောင့်လဲဆိုတော့ အဲဒီအပူချိန်မှာဆိုရင် ပိုးတွေက အလျင်အမြန်ပေါက်ပွားတတ်လို့ဖြစ်တယ်” လို့ အမေရိကန်နိုင်ငံက စိုက်ပျိုးမွေးမြူရေးဌာနကပြောတယ်။ အဲဒါကြောင့် ခဲနေတဲ့အသားကို ဒီအတိုင်းပျော်အောင်လုပ်မယ့်အစား ရေခဲသေတ္တာထဲမှာပဲ ပျော်အောင်လုပ်ပါ၊ မိုက်ခရိုဝေ့ဖ်ထဲထည့်ပြီး ပျော်အောင်လုပ်ပါ၊ ဒါမှမဟုတ် ရေစိမ့်မဝင်နိုင်တဲ့အိတ်ထဲထည့်ပြီး ရေထဲမှာစိမ်ပြီး ပျော်အောင်လုပ်ပါ။

● ကောင်းကောင်းကျက်အောင်ချက်ပါ။

ကမ္ဘာ့ကျန်းမာရေးအဖွဲ့ကဒီလိုပြောတယ်– “အန္တရာယ်ရှိပြီး မျက်စိနဲ့မမြင်နိုင်တဲ့ ပိုးအားလုံးနီးပါးဟာ ကောင်းကောင်းချက်ပြုတ်လိုက်ရင်သေသွားတယ်။” ဒါကြောင့် အစားအစာချက်ပြုတ်တဲ့အခါ အထူးသဖြင့် စွပ်ပြုတ် ဒါမှမဟုတ် ပြုတ်ချက်,ချက်တဲ့အခါ နူးနေစေပါ။ *

● ချက်ပြုတ်ပြီးတာနဲ့စားပါ။

အစားအစာချက်ပြုတ်ပြီးပြီဆိုရင် ဒီအတိုင်း အကြာကြီးမထားသင့်ဘူး။ မြန်မြန်စားဖို့ ပြင်ဆင်ပါ။ ဒါက အစားအစာ မပျက်အောင်ကာကွယ်တာဖြစ်တယ်။ အေးအေးလေးစားရတဲ့ အစားအစာကို အေးနေအောင်ထားပါ၊ ပူပူလေးစားရတဲ့ အစားအစာကို ပူနေအောင် ထားပါ။ သင်ဟာ အပူချိန် ချိန်ညှိလို့ရတဲ့ မီးဖိုကို သုံးမယ်ဆိုရင် အပူချိန်ကို ၂၀၀ ဒီဂရီဖာရင်ဟိုက် (၉၃˚C) လောက်မှာ ချိန်ထားပြီး ချက်ပြီးသားအစားအစာကို မီးဖိုပေါ် တင်ထားနိုင်တယ်။ ဒါမှမဟုတ်ရင်လည်း မီးအေးအေးလေးပေါ်မှာ တင်ထားနိုင်တယ်။

● ပိုနေတဲ့အစားအစာကို သေချာသိမ်းဆည်းပါ။

ပိုလန်နိုင်ငံက မိခင်တစ်ယောက်ဖြစ်တဲ့ အယ်နီတာက အစားအစာချက်ပြုတ်ပြီးတာနဲ့ တစ်ခါတည်းကျွေးလိုက်တယ်။ ဒါပေမဲ့ “ပိုတဲ့အစားအစာတွေကို နည်းနည်းစီခွဲထည့်ပြီး ခဲနေအောင် လုပ်လိုက်တယ်။ အဲဒီလိုလုပ်ထားတော့ ပြန်စားချင်တဲ့အခါ အရည်ပျော်အောင် လုပ်ရတာလွယ်တယ်” လို့ပြောတယ်။ အစားအစာကျန်နေလို့ ရေခဲသေတ္တာထဲထည့်ရတယ်ဆိုရင် သုံးလေးရက်အတွင်း စားပါ။

စားသောက်ဆိုင်မှာဆိုရင်တော့ သင်စားမယ့် အစားအစာတွေကို စားသောက်ဆိုင်က တစ်ယောက်ယောက်က ပြင်ဆင်ပေးတယ်။ အဲဒီအခါမှာ သင့်မိသားစုကို ဘယ်လိုကာကွယ်ပေးမလဲ။

[အောက်ခြေမှတ်ချက်]

[စာမျက်နှာ ၆ ပါ လေးထောင့်ကွက်]

သင့်ကလေးတွေကို လေ့ကျင့်ပေးပါ– “ကလေးတွေ အစားအစာချက်ပြုတ်တော့မယ်ဆိုရင် အစားအစာထည့်ထားတဲ့ အထုပ်မှာပါတဲ့ ညွှန်ကြားချက်ကိုဖတ်ပြီး အဲဒီအတိုင်းလုပ်ဖို့ ကျွန်မသူတို့ကို သတိပေးတယ်။”—ဟောင်ကောင်မှ ယွတ်လင်း