ပင့်ကူပျံ (Jumping spider)ရဲ့ အမြင်အာရုံစနစ်က ထူးခြားတယ်၊ အဲဒီစနစ်က သူခုန်ရမယ့်အကွာအဝေးကို အတိအကျ တွက်ချက်ပေးတယ်။ ဘယ်လိုတွက်ချက်သလဲ။

သုံးသပ်ကြည့်ပါ– ပင့်ကူပျံဟာ အဓိကမျက်လုံးတစ်စုံကိုသုံးပြီး အရာတစ်ခုခုရဲ့အကွာအဝေးကို တွက်ချက်နိုင်တယ်။ အဲဒီမျက်လုံးတွေမှာ အစိမ်းရောင်အလင်းတန်းကို ဖမ်းယူတဲ့ မြင်လွှာတစ်ခုထက်မကပါတယ်။ မြင်လွှာတစ်ခုမှာ ရှင်းလင်းတဲ့ပုံရိပ်ပေါ်ပြီး နောက်မြင်လွှာတစ်ခုမှာတော့ ပုံရိပ်ဟာ ဝေဝေဝါးဝါးပဲ ပေါ်တယ်။ အရာဝတ္ထုက ပင့်ကူမျက်လုံးနဲ့ နီးကပ်လေ အဲဒီမြင်လွှာမှာပေါ်တဲ့ပုံရိပ်က ပိုဝေဝါးလေပဲ။ အဲဒီအချက်လေးကိုသုံးပြီး ပင့်ကူပျံက သားကောင်ရှိတဲ့နေရာအတိအကျကို တွက်ချက်တယ်၊ ပြီးနောက် ခုန်ဖမ်းတယ်။

သုတေသီတွေက သုံးဖက်မြင် (3-D) ကင်မရာတွေ၊ အကွာအဝေးတွက်ချက်နိုင်တဲ့ စက်ရုပ်တွေကိုတီထွင်ဖို့ ပင့်ကူပျံရဲ့ နည်းပညာကိုတုပလိုကြတယ်။ ပင့်ကူပျံရဲ့အမြင်အာရုံအကြောင်း ဝက်ဘ်ဆိုက်တစ်ခု (ScienceNOW) က ခုလိုဖော်ပြတယ်– “စင်တီမီတာ တစ်ဝက်လောက်သာရှိပြီး ဦးနှောက်က ယင်ကောင်ဦးနှောက်ထက်သေးပေမဲ့ အမြင်အာရုံကနေရလာတဲ့ အချက်အလက်တွေကို တွက်ချက်အသုံးပြုသွားပုံက လက်ဖျားခါလောက်တဲ့ နမူနာပဲ။”

သင် ဘယ်လိုထင်ပါသလဲ။ ပင့်ကူပျံရဲ့ ဝေဝါးတဲ့အမြင်အာရုံကရလာတဲ့ အချက်အလက်တွေကို တွက်ချက်အသုံးပြုမှုဟာ သူ့အလိုလို ဖြစ်လာနိုင်သလား။ ဒါမှမဟုတ် စနစ်တကျ ပုံစံရေးဆွဲခံထားရတာလား။