စီးပွားရေးကျပ်တည်းတဲ့ ဒီနေ့အချိန်မှာ အလုပ်အကိုင်နဲ့ အိမ်ဆုံးၡုံးနိုင်ခြေရှိသူတွေတောင် အများစုက ဘယ်အရာ၊ ဘာမဆို ငွေနဲ့ဝယ်လို့ရတယ်လို့ စိတ်စွဲနေကြဆဲပဲ။

အဲဒီလိုလူတွေဟာ အခုရှိတဲ့အိမ်ထက်ပိုကြီးရမယ်၊ ပိုကောင်းတဲ့ကားနဲ့ နာမည်ကြီးတံဆိပ် အဝတ်အစားတွေဝတ်ရမယ်ဆိုပြီးပြောဆိုတဲ့ အရောင်းမြှင့်တင်ရေးသမားတွေရဲ့ သားကောင်လွယ်လွယ်လေးဖြစ်သွားတယ်။ ပိုက်ဆံမရှိဘူးလား၊ ကိစ္စမရှိဘူး။ အကြွေးနဲ့ဝယ်လို့ရတာပဲ ဆိုပြီး ပြောကြတယ်။ လူအများရဲ့ စိတ်မှာ အကြွေးနွံနစ်နေရင်တောင် လူအမြင်မှာ သူဌေးပုံဖမ်းဖို့ သူတို့ရည်ရွယ်ကြတယ်။

နောက်ဆုံးတော့ အဖြစ်မှန်က အနှေးနဲ့အမြန်ပေါ်တာပဲ။ “သူဌေးဂိုက်ဖမ်းဖို့ တောက်ပ၊ ထည်ဝါတဲ့ပစ္စည်းတွေကို အကြွေးနဲ့ဝယ်သူတွေဟာ စိတ်ငြိမ်သက် ပေါ့ပါးဖို့အတွက် မူးယစ်ဆေးသုံးစွဲသူတွေနဲ့တူတယ်။ အစပိုင်းမှာတော့ ကောင်းသလိုလိုနဲ့ ရေရှည်မှာကျတော့ ဘာမှမရှိ၊ ချွတ်ခြုံကျပြီး စိတ်ကျတဲ့ ဘဝရောက်သွားတယ်” ဆိုပြီး စာအုပ်တစ်အုပ် (The Narcissism Epidemic) မှာ ဖော်ပြထားတယ်။

သမ္မာကျမ်းစာက “လောကစည်းစိမ်၌ဝါကြွားခြင်း” ဟာ မိုက်မဲရာကျတယ်ဆိုပြီး ဖော်ပြထားတယ်။ (၁ ယောဟန် ၂:၁၆) ဥစ္စာပစ္စည်းကို စွဲလမ်းတဲ့သူဟာ ငွေနဲ့ဝယ်လို့မရတဲ့၊ ဘဝမှာပိုအရေးကြီးတဲ့အရာတွေကို မရရှိနိုင်ဘူးဖြစ်နေတယ်။ ဥပမာသုံးခုကို သုံးသပ်ကြည့်ကြရအောင်။

အမေရိကန်နိုင်ငံက ၁၇ နှစ်အရွယ် ဘရယ်နီ *က သူ့အဖေဟာ အလုပ်နဲ့ ငွေအပေါ် အာရုံစိုက်လွန်းတယ်လို့ ခံစားရတယ်။ “ကျွန်မတို့မှာ ဘာမဆိုရှိတယ်၊ လိုတာထက်တောင်ပိုတယ်။ ဒါပေမဲ့ အဖေက အိမ်မှာမရှိဘဲ အမြဲလိုလို ခရီးထွက်နေတာ။ အလုပ်ကြောင့် ခရီးထွက်ရတာဆိုတာကိုတော့ နားလည်ပါတယ်။ ဒါပေမဲ့ မိသားစုကိုဂရုစိုက်ဖို့လည်း တာဝန်ရှိတယ်လို့ ကျွန်မထင်တယ်။”

စဉ်းစားစရာ– ဘရယ်နီရဲ့အဖေ နောက်ပိုင်းမှာ ဘယ်လိုဝမ်းနည်းစရာ အခြေအနေ ကြုံရနိုင်စရာရှိသလဲ။ ပစ္စည်းဥစ္စာကို အဓိကထားတဲ့အတွက် သမီးနဲ့ သူ့ရဲ့ ရင်းနှီးမှုနှောင်ကြိုး ဘယ်လိုဖြစ်လာနိုင်သလဲ။ သူ့မိသားစုက ငွေထက် သူ့ဆီက ဘာလိုချင်သလဲ။

သုံးသပ်စရာ ကျမ်းစာအကြံပြုချက်များ-

• “ငွေကိုတပ်မက်ခြင်းသည် အကျိုးပျက်စေသောအရာအမျိုးမျိုး၏ မူလအမြစ်ဖြစ်၏။ လူအချို့သည် ငွေကိုတပ်မက်ခြင်းကြောင့် . . . ဝေဒနာများစွာဖြင့် ကိုယ့်ကိုယ်ကိုယ် ထိုးနှက်ကြပြီ။”—၁ တိမောသေ ၆:၁၀။

• “အချင်းချင်းချစ်ခင်သူတို့နှင့်အတူ ဟင်းသီးဟင်းရွက်တစ်နပ်စာ စားရခြင်းသည် အချင်းချင်းမုန်းသူတို့နှင့်အတူ အကောင်းဆုံးအမဲဟင်းလျာ စားရခြင်းထက် ပို၍ကောင်း၏။”—သုတ္တံ ၁၅:၁၇၊ ခမ။

အဓိကအချက်– မိသားစုစည်းလုံးမှုကို ငွေနဲ့ မဝယ်နိုင်ဘူး။ မိသားစုနဲ့အတူတူရှိခြင်း၊ မေတ္တာနဲ့ဂရုစိုက်မှု အလုံအလောက်ပေးခြင်းကနေပဲ စည်းလုံးမှုရရှိနိုင်တယ်။—ကောလောသဲ ၃:၁၈-၂၁။

“အမေက ကျွန်မကို ချမ်းသာတဲ့လူတစ်ယောက်ယောက်နဲ့လက်ထပ်၊ ပြီးတော့ စီးပွားရေးတစ်ခုခုလုပ်၊ ဒါဆိုရင် သမီးရဲ့နောင်ရေးစိတ်အေးရပြီ ဆိုပြီး အမြဲပြောလေ့ရှိတယ်။ အမေ့စိတ်ထဲမှာ ငွေဘယ်လိုရနိုင်မလဲဆိုတာကိုပဲ စဉ်းစားနေတယ်” လို့ ၁၇ နှစ်အရွယ် စယ်ရာကပြောတယ်။

စဉ်းစားစရာ– အနာဂတ်ကို စဉ်းစားကြည့်တဲ့အခါ အမှန်တကယ်စိုးရိမ်သင့်တာ ဘာရှိသလဲ။ စိုးရိမ်သင့်တာထက် ပိုပြီးစိုးရိမ်ပူပန်နေသလား။ စယ်ရာရဲ့မိခင်က ငွေကြေးနဲ့ပတ်သက်ပြီး ဘယ်လိုမျှတစွာ ရှုမြင်သင့်သလဲ။

သုံးသပ်စရာ ကျမ်းစာအကြံပြုချက်များ-

• “သံချေး၊ ပိုးရွ ဖျက်ဆီးတတ်၍ သူခိုးထွင်းဖောက်ခိုးယူတတ်သည့် မြေကြီးပေါ်မှာ ဘဏ္ဍာကို မစုဆောင်းကြနှင့်တော့။” —မဿဲ ၆:၁၉။

• “နက်ဖြန်နေ့၌ သင်တို့အသက်သည် မည်သို့ဖြစ်မည်ကို မသိကြ။”—ယာကုပ် ၄:၁၄။

အဓိကအချက်– ငွေစုဆောင်းထားရုံနဲ့ အနာဂတ်လုံခြုံမှု မရရှိနိုင်ပါဘူး။ တကယ်တမ်းကျတော့ ငွေက အခိုးခံရနိုင်ပြီး ရောဂါဘယကင်းဝေးအောင်၊ သေခြင်းကနေ လွတ်မြောက်အောင် မလုပ်နိုင်ဘူး။ (ဒေသနာ ၇:၁၂) ဘုရားသခင်နဲ့ ကိုယ်တော့်ရည်ရွယ်ချက်ကိုသိရှိခြင်းကနေပဲ စစ်မှန်တဲ့လုံခြုံမှု ရရှိမယ်လို့ သမ္မာကျမ်းစာမှာ ဖော်ပြထားပါတယ်။—ယောဟန် ၁၇:၃။

“မိဘတွေက ကျွန်မတို့ကို ရိုးရိုးရှင်းရှင်းနေတတ်အောင် ပြုစု ပျိုးထောင်ပေးခဲ့တယ်။ များသောအားဖြင့် အခြေခံလိုအပ်ရာလေးနဲ့ပဲ နေခဲ့ရတာတောင် ကျွန်မနဲ့ ကျွန်မရဲ့အစ်မဟာ ပျော်ပျော်ရွှင်ရွှင်ပဲ ကြီးပြင်းလာခဲ့ကြတယ်” လို့ ၂၄ နှစ်အရွယ် တန်ယာကပြောတယ်။

စဉ်းစားစရာ– အခြေခံလိုအပ်ရာနဲ့ ကျေနပ်ရောင့်ရဲဖို့ ဘာကြောင့် ခက်ခဲနိုင်သလဲ။ ငွေနဲ့ပတ်သက်ပြီး မိသားစုရှေ့မှာ ဘာပုံသက်သေချမလဲ။

သုံးသပ်စရာ ကျမ်းစာအကြံပြုချက်များ-

• “ငါတို့သည် စားစရာ၊ ဝတ်စရာ၊ နေစရာရှိသမျှနှင့် ကျေနပ် ရောင့်ရဲနေကြရမည်။”—၁ တိမောသေ ၆:၈။

• “ဘုရားသခင်ကို မှီခိုရန် လိုကြောင်း သိမှတ်သူတို့ သည် ပျော်ရွှင်ကြ၏။”—မဿဲ ၅:၃။

အဓိကအချက်– ဘဝမှာ ငွေနဲ့ ငွေနဲ့ဝယ်လို့ရတဲ့အရာတွေထက် ပိုလိုအပ်တဲ့အရာရှိတယ်။ ကျမ်းစာမှာ ဒီလိုပြောထားတယ်– “လူတစ်ဦးသည် စည်းစိမ်ကြွယ်ဝသော်လည်း သူ၏စည်းစိမ်၌ အသက်မတည်။” (လုကာ ၁၂:၁၅) တကယ်တမ်းတော့ စိတ်ကျေနပ်မှုအပေးဆုံးအရာက ဒီလိုမျိုးအရေးကြီးတဲ့ မေးခွန်းတွေရဲ့အဖြေကနေ လာတာဖြစ်တယ်။ အဲဒီမေးခွန်းတွေကတော့-

• လူတွေ ဘာကြောင့် ဒီကမ္ဘာပေါ်မှာ ရှိနေရတာလဲ။

• လူသားတွေရဲ့အနာဂတ် ဘယ်လိုရှိသလဲ။

• ဘုရားတရားမှာမြဲမြံအောင် ဘယ်လိုလုပ်ရမလဲ။

ဒီမေးခွန်းတွေရဲ့အဖြေတွေကို သင်သိအောင် ဒီမဂ္ဂဇင်းကိုထုတ်ဝေတဲ့ ယေဟောဝါသက်သေတွေက လိုလိုလားလားနဲ့ ကူညီပေးချင်ပါတယ်။