လူအများပြောဆိုရာ–

တချို့ယဉ်ကျေးမှုတွေမှာ အထူးသဖြင့် အိမ်ထောင်သည်ယောက်ျားတွေက ကိုယ့်အိမ်ထောင်ဖက်မဟုတ်သူနဲ့ သံဝါသပြုတာဟာ မမှားဘူးလို့ သတ်မှတ်တယ်။ တချို့ကတော့ အိမ်ထောင်ရေးကို ရာသက်ပန်နှောင်ကြိုးလို့ မယူမှတ်ကြဘူး။

သမ္မာကျမ်းစာပြောဆိုရာ–

ကျမ်းစာအရ အိမ်ထောင်ရေးဖောက်ပြန်မှုဆိုတာဟာ အိမ်ထောင်သည်တစ်ယောက်က ကိုယ့်အိမ်ထောင်ဖက်မဟုတ်သူနဲ့ အလိုတူ အလိုပါ ကာမဆက်ဆံတာကို ရည်ညွှန်းတယ်။ (ယောဘ ၂၄:၁၅; သုတ္တံ ၃၀:၂၀) အိမ်ထောင်ရေးဖောက်ပြန်မှုကို ဘုရားသခင်က စက်ဆုပ်ရွံရှာဖွယ်ရာအဖြစ် ရှုမြင်ပါတယ်။ ရှေးအစ္စရေးအချိန်တုန်းကဆိုရင် အိမ်ထောင်ရေးဖောက်ပြန်မှုအတွက် အပြစ်ဒဏ်ဟာ သေဒဏ်ပဲ။ (ဝတ်ပြုရာ ၁၈:၂၀၊ ၂၂၊ ၂၉) ယေရှုက တပည့်တွေကို အိမ်ထောင်ရေး မဖောက်ပြန်ဖို့ မိန့်မှာခဲ့တယ်။—မဿဲ ၅:၂၇၊ ၂၈; လုကာ ၁၈:၁၈-၂၀။

ဘာကြောင့် အရေးကြီးတာလဲ–

အိမ်ထောင်ရေးဖောက်ပြန်မှုက အိမ်ထောင်ပြုချိန်မှာ တစ်ဦးကိုတစ်ဦး ပေးခဲ့တဲ့ ကတိသစ္စာကိုချိုးဖောက်ခြင်း ဖြစ်တယ်။ အဲဒါက “ဘုရားသခင်ကို ပြစ်မှား” ရာလည်း ရောက်တယ်။ (ကမ္ဘာဦး ၃၉:၇-၉၊ ခမ) မိဘနဲ့ သားသမီးတွေကိုလည်း တကွဲတပြား ဖြစ်သွားစေနိုင်တယ်။ အဲဒီအပြင်၊ “အိမ်ထောင်ရေး ဖောက်ပြန်သူကို ဘုရားသခင် စီရင်တော်မူလိမ့်မည်” လို့ ကျမ်းစာမှာ သတိပေးထားတယ်။—ဟေဗြဲ ၁၃:၄။

“လူအပေါင်းတို့ရှေ့တွင် မင်္ဂလာဆောင်ခြင်းအမှုကို ဂုဏ်အသရေရှိစေလော့။ မင်္ဂလာအိပ်ရာကို မညစ်ညူးစေနှင့်။”—ဟေဗြဲ ၁၃:၄။

သမ္မာကျမ်းစာပြောဆိုရာ–

အိမ်ထောင်နှောင်ကြိုးကို ပြတ်တောက်စေနိုင်တဲ့ တစ်ခုတည်းသော အကြောင်းအရင်းက ကိုယ့်ရဲ့အိမ်ထောင်ဖက် လိင်ကိစ္စဖောက်ပြန်တဲ့အခါမှာ ဖြစ်တယ်လို့ ကျမ်းစာမှာ ဖော်ပြထားတယ်။ (မဿဲ ၁၉:၉) အိမ်ထောင်ဖက်က သစ္စာဖောက်မိသွားတဲ့အခါ ဆက်ပေါင်းမလား၊ ကွာရှင်းမလားဆိုတာကို အပြစ်မရှိတဲ့ အိမ်ထောင်ဖက်က ရွေးချယ်ခွင့်ရှိတယ်။ အဲဒါကတော့ ကိုယ်ပိုင် ဆုံးဖြတ်ချက်ပါ။—ဂလာတိ ၆:၅။

အိမ်ထောင်ရေးဟာ ရာသက်ပန်နှောင်ကြိုးဖြစ်တယ်လို့ ဘုရားသခင် ရှုမြင်တယ်။ (၁ ကောရိန္သု ၇:၃၉) အိမ်ထောင်ဖက်ကို အလိုမကျတာနဲ့ပဲ အသေးအမွှားကိစ္စတွေကို အကြောင်းပြပြီး ကွာရှင်းဖို့ ကြိုးစားတာမျိုးကို ဘုရားသခင် စက်ဆုပ်ရွံရှာတယ်။ ဒါကြောင့် ကွာရှင်းတယ်ဆိုတာဟာ ပေါ့သေးသေးကိစ္စ မဟုတ်ဘူး။—မာလခိ ၂:၁၆; မဿဲ ၁၉:၃-၆။

“ငါဆိုသည်ကား မတရားမေထုန်ပြုခြင်းမှတစ်ပါး အခြားသောအကြောင်းကြောင့် မိမိမယားကို ကွာရှင်းသူ မည်သူမဆို မိမိမယားကို အိမ်ထောင်ရေးဖောက်ပြန်သူ ဖြစ်စေ၏။”—မဿဲ ၅:၃၂။

သမ္မာကျမ်းစာပြောဆိုရာ–

မဟုတ်ပါဘူး။ အိမ်ထောင်ရေးဖောက်ပြန်မှုအပါအဝင် ပြုလုပ်ခဲ့မိတဲ့ အပြစ်တွေအတွက် နောင်တရပြီး နောက်နောင် ထပ်မလုပ်ဖြစ်အောင် ကြိုးစားတဲ့သူကို ဘုရားသခင်က ကရုဏာပြတယ်လို့ ကျမ်းစာမှာ ဖော်ပြထားတယ်။ (တမန်တော် ၃:၁၉; ဂလာတိ ၅:၁၉-၂၁) အိမ်ထောင်ရေးဖောက်ပြန်သူတွေဟာ သူတို့အကျင့်ကို ပြုပြင်ပြောင်းလဲပြီးနောက်မှာ ဘုရားသခင့်မိတ်ဆွေ ဖြစ်လာကြတယ်ဆိုတာကို ကျမ်းစာမှာ ဖော်ပြထားတယ်။—၁ ကောရိန္သု ၆:၉-၁၁။

ရှေးခေတ် အစ္စရေးရှင်ဘုရင် ဒါဝိဒ်ရဲ့ကိစ္စမှာ ဘုရားသခင် ကရုဏာပြခဲ့တာကို အထင်အရှား တွေ့ရတယ်။ ဒါဝိဒ်ဟာ တပ်မှူးတစ်ယောက်ရဲ့ မိန်းမနဲ့ မှားယွင်းခဲ့တယ်။ (၂ ဓမ္မရာဇ၀င် ၁၁:၂-၄) ဘုရားသခင်ဟာ “ဒါဝိဒ်ပြုခဲ့သည့်အမှုကို နှစ်သက်တော်မမူ” ဆိုပြီး ကျမ်းစာမှာ ရှင်းရှင်းလင်းလင်း ဖော်ပြထားတယ်။ (၂ ဓမ္မရာဇဝင် ၁၁:၂၇၊ ခမ) ဒါဝိဒ်ဟာ ဆုံးမခံရပြီးနောက် နောင်တရကြောင်းပြတာကြောင့် သူ့ကို ဘုရားသခင် ခွင့်လွှတ်ခဲ့တယ်။ ဒါပေမဲ့ သူ့လုပ်ရပ်ကြောင့်ဖြစ်ပေါ်လာတဲ့ ဝမ်းနည်းဖွယ် အကျိုးဆက်ကိုတော့ ခံစားခဲ့ရတယ်။ ‘အိမ်ထောင်ရေးဖောက်ပြန်သူဟာ ဆင်ခြင်ဉာဏ်မရှိသူပဲ’ လို့ ဘုရင်ရှောလမုန်က နောက်ပိုင်းမှာ ရေးသားခဲ့တယ်။—သုတ္တံ ၆:၃၂၊ ကဘ။

လုပ်ဆောင်နိုင်ရာ–

ကိုယ်က အိမ်ထောင်ရေးဖောက်ပြန်တဲ့သူ ဖြစ်တယ်ဆိုရင် ဘုရားသခင်ဆီကရော ကိုယ့်အိမ်ထောင်ဖက်ဆီကပါ ခွင့်လွှတ်မှုတောင်းခံဖို့ လိုတယ်။ (ဆာလံ ၅၁:၁-၅) အိမ်ထောင်ရေးဖောက်ပြန်တာကို ဘုရားသခင် မုန်းသလို မုန်းတတ်အောင် ကြိုးစားပါ။ (ဆာလံ ၉၇:၁၀) ညစ်ညမ်းရုပ်ပုံစာပေတွေ၊ မတော်မလျော်တာကို စိတ်ကူးယဉ်တာတွေ၊ ပရောပရည်လုပ်တာတွေ၊ ကိုယ့်အိမ်ထောင်ဖက်မဟုတ်သူ တစ်ယောက်ယောက်ကို စိတ်ဝင်စားမိသွားစေနိုင်တဲ့ ဘယ်အခြေအနေမျိုးကိုမဆို ရှောင်ကြဉ်မယ်လို့ စိတ်ပိုင်း ဖြတ်ထားပါ။—မဿဲ ၅:၂၇၊ ၂၈; ယာကုပ် ၁:၁၄၊ ၁၅။

အိမ်ထောင်ဖက်က သစ္စာဖောက်သွားတယ်ဆိုရင် ကိုယ်ခံစားနေရတာကို ဘုရားသခင် နားလည်စာနာပေးတယ်ဆိုတာ စိတ်ချပါ။ (မာလခိ ၂:၁၃၊ ၁၄) နှစ်သိမ့်အားပေးမှုနဲ့ လမ်းညွှန်မှုရဖို့ ဘုရားသခင်ဆီမှာ ဆုတောင်းပါ။ ကိုယ်တော် “သင့်ကို မစတော်မူမည်။” (ဆာလံ ၅၅:၂၂) အိမ်ထောင်ဖက်ကို ခွင့်လွှတ်ပြီး ဆက်အတူနေဖို့ ဆုံးဖြတ်တယ်ဆိုရင် အိမ်ထောင်နှောင်ကြိုး ခိုင်မြဲအောင် နှစ်ယောက်စလုံး ကြိုးစားဖို့ လိုပါလိမ့်မယ်။—ဧဖက် ၄:၃၂။

အိမ်ထောင်ရေးဖောက်ပြန်ခဲ့မိတဲ့အတွက် နောင်တ ရကြောင်းတင်ပြသူ ဒါဝိဒ်ကို ‘မင်းကြီးရဲ့အပြစ်ကို ယေဟောဝါဘုရား ခွင့်လွှတ်ပါတယ်’ လို့ ပရောဖက် နာသန်က ပြောခဲ့တယ်။ —၂ ဓမ္မရာဇဝင် ၁၂:၁၃၊ ကဘ။