“စောင့်နေကြလော့”
“စောင့်နေကြလော့”
“သင်တို့အရှင်သည် အဘယ်အချိန်နာရီ၌ ရောက်လာမည်ကို သင်တို့မသိသောကြောင့် စောင့်နေကြလော့။”—မဿဲ ၂၄:၄၂။
၁။ ယေဟောဝါ၏ ရှေ့မီနောက်မီကျေးကျွန်များသည် သူတို့ဆက်ကပ်အပ်နှံအမှုထမ်းခဲ့သည့် နှစ်ပေါင်းများစွာနှင့်ပတ်သက်၍ မည်သို့ခံစားကြရသနည်း။ ဥပမာတစ်ခုတင်ပြပါ။
ယေဟောဝါ၏ ရှေ့မီနောက်မီကျေးကျွန်များစွာသည် သူတို့ငယ်ရွယ်သည့်အချိန်တွင် အမှန်တရားကို သင်ယူခဲ့ကြသည်။ အလွန်အဖိုးထိုက်သည့်ပုလဲကိုတွေ့သောအခါ ၎င်းကိုဝယ်ရန် မိမိပိုင်ဆိုင်သမျှကိုရောင်းခဲ့သောကုန်သည်ကဲ့သို့ ထိုစိတ်အားထက်သန်သော ကျမ်းစာသင်သားများသည် မိမိတို့ကိုယ်ကိုငြင်းပယ်ခဲ့ကြကာ ယေဟောဝါထံ သူတို့အသက်တာကို ဆက်ကပ်အပ်နှံခဲ့ကြသည်။ (မဿဲ ၁၃:၄၅၊ ၄၆; မာကု ၈:၃၄) ဘုရားသခင့်ရည်ရွယ်ချက် မြေကြီးပေါ်တွင်ပြည့်စုံရန် သူတို့မျှော်လင့်ထားသည်ထက် ပိုစောင့်ခဲ့ရသည့်အတွက် မည်သို့ခံစားခဲ့ကြရသနည်း။ သူတို့ဝမ်းမနည်းကြပါ! အနှစ် ၆၀ နီးပါး ဆက်ကပ်အပ်နှံအမှုတော်ထမ်းရွက်ခဲ့ပြီးနောက် ဤသို့ပြောခဲ့သော ညီအစ်ကို အေ. အိတ်ခ်ျ. မက္ကမီလန်၏စကားကို သူတို့သဘောတူကြသည်– “ယုံကြည်ခြင်းမှာဆက်တည်နေဖို့ အရင်ကထက်ပိုပြီး ကျွန်တော်စိတ်ပိုင်းဖြတ်ထားတယ်။ အဲ့ဒါက ကျွန်တော်ကို အသက်ရှင်ရကျိုးနပ်စေတယ်။ အဲ့ဒါကြောင့် အနာဂတ်ကို ကြောက်စိတ်မရှိဘဲဆက်ပြီးရင်ဆိုင်ဖို့ ကျွန်တော်အကူအညီရတုန်းပဲ။”
၂။ (က) ယေရှုသည် မိမိနောက်လိုက်များအား အဘယ်အခန့်သင့်ဆုံးမစကားကို ပေးခဲ့သနည်း။ (ခ) ဤဆောင်းပါးတွင် အဘယ်မေးခွန်းများကို သုံးသပ်မည်နည်း။
၂ အသင်ကော အသို့နည်း။ သင်သည် အသက်အရွယ်မည်မျှပင်ရှိပါစေ ယေရှု၏ဤစကားများကို သုံးသပ်ပါ– “သင်တို့အရှင်သည် အဘယ်အချိန်နာရီ၌ ရောက်လာမည်ကို သင်တို့မသိသောကြောင့် စောင့်နေကြလော့။” (မဿဲ ၂၄:၄၂) ဤဖော်ပြချက်ရိုးရိုးလေးတွင် လေးနက်သောအမှန်တရားပါရှိသည်။ ဤစနစ်ဆိုးကိုတရားစီရင်ရန် သခင်ကြွလာမည့်နေ့ကို ကျွန်ုပ်တို့မသိကြပါ၊ သိရန်လည်းမလိုအပ်ပါ။ သို့သော် သခင်ကြွလာသည့်အခါ ကျွန်ုပ်တို့ဝမ်းမနည်းရလေအောင် အသက်ရှင်နေထိုင်ဖို့ လိုအပ်သည်။ ယင်းနှင့်ပတ်သက်၍ စောင့်နေကြရာတွင် အကူအညီဖြစ်စေမည့် အဘယ်ပုံနမူနာများကို ကျမ်းစာတွင်တွေ့ရှိရသနည်း။ ဤလိုအပ်ချက်ကို ယေရှုမည်သို့ဖော်ပြခဲ့သနည်း။ ကျွန်ုပ်တို့သည် ဤဘုရားတရားမဲ့သောလောက၏ နောက်ဆုံးသောနေ့ရက်များတွင် အသက်ရှင်နေကြရကြောင်း အဘယ်သာဓကရှိသနည်း။
သတိပေးနမူနာတစ်ခု
၃။ ယနေ့ လူအများသည် နောဧခေတ်ရှိလူများနှင့် မည်သို့ဆင်တူကြသနည်း။
၃ ယနေ့ လူအများသည် နောဧခေတ်တွင်အသက်ရှင်ခဲ့ကြသည့် ယောက်ျားမိန်းမများနှင့် နည်းအမျိုးမျိုးဖြင့် ဆင်တူကြပါသည်။ ထိုအချိန်က ကမ္ဘာမြေကြီးသည် အကြမ်းဖက်မှုနှင့် ပြည့်နေခဲ့ပြီး လူတို့၏စိတ်အကြံအစည်များသည် “အစဉ်မပြတ် ဆိုးညစ်ခြင်းသက်သက်ရှိ” ခဲ့သည်။ (ကမ္ဘာဦး ၆:၅) အများစုသည် နေ့စဉ်ဘဝ လုပ်ငန်းဆောင်တာများနှင့် လုံးပန်းနေခဲ့ကြသည်။ သို့သော် ယေဟောဝါသည် ရေလွှမ်းမိုးဘေးမကျရောက်စေမီ လူသားများနောင်တရရန် အခွင့်အရေးပေးခဲ့သည်။ ကိုယ်တော်သည် နောဧကိုဟောပြောရန်တာဝန်ပေးခဲ့ပြီး နောဧသည် “ဖြောင့်မတ်ခြင်းတရားကိုဟောသော” သူအဖြစ် အနှစ် ၄၀ သို့မဟုတ် ၅၀ သို့မဟုတ် ထိုထက်ကြာမြင့်စွာ အမှုဆောင်ခြင်းအားဖြင့် နာခံမှုပြခဲ့၏။ (၂ ပေတရု ၂:၅) သို့ရာတွင် လူများသည် နောဧ၏သတိပေးချက်ကို လျစ်လျူရှုခဲ့ကြသည်။ သူတို့သည် စောင့်မနေခဲ့ကြပါ။ ထို့ကြောင့် နောက်ဆုံးတွင် နောဧနှင့် သူ၏မိသားစုသာ ယေဟောဝါ၏တရားစီရင်ခြင်းမှ လွတ်မြောက်ခဲ့သည်။—မဿဲ ၂၄:၃၇-၃၉။
၄။ နောဧ၏ဓမ္မအမှုသည် အဘယ်သဘောဖြင့် အောင်မြင်သည်ဟုဆိုနိုင်သနည်း၊ သင့်ဟောပြောခြင်းလုပ်ငန်းနှင့်ပတ်သက်၍လည်း မည်သို့ထပ်တူပြောနိုင်သနည်း။
၄ နောဧ၏ဓမ္မအမှုသည် အောင်မြင်ခဲ့ပါသလော။ တုံ့ပြန်သူလူနည်းစုကိုကြည့်ပြီး အကဲမဖြတ်ပါနှင့်။ နောဧ၏ဟောပြောခြင်းလုပ်ငန်းသည် တုံ့ပြန်မှုမရှိသည့်တိုင် ယင်း၏ရည်ရွယ်ချက် အမှန်ပင်အောင်မြင်ခဲ့ပါသည်။ အဘယ်ကြောင့်နည်း။ အကြောင်းမှာ လူများသည် ယေဟောဝါကိုဝတ်ပြုမည် ဝတ်မပြုမည်ကိုရွေးချယ်ရန် လုံလောက်သည့်အခွင့်အရေးပေးခဲ့သည်။ သင်ဟောပြောနေသည့် ရပ်ကွက်တွင်ကော မည်သို့နည်း။ အပြုသဘောပါတုံ့ပြန်မှုနည်းသည့်တိုင် သင်သည် အောင်မြင်မှုရရှိနေပါသည်။ အဘယ်ကြောင့်နည်း။ ဟောပြောခြင်းအားဖြင့် သင်သည် ဘုရားသခင့်သတိပေးချက်ကို ကြေညာနေပြီး မိမိ၏နောက်လိုက်များကို ယေရှုပေးခဲ့သည့်တာဝန်ကို ပြည့်စုံစေခြင်းတို့ကြောင့်ဖြစ်သည်။—မဿဲ ၂၄:၁၄; ၂၈:၁၉၊ ၂၀။
ဘုရားသခင့်ပရောဖက်များကို လျစ်လျူရှုခြင်း
၅။ (က) ဟဗက္ကုတ်အချိန်က ယုဒနိုင်ငံတွင် အဘယ်အခြေအနေများ ဖြစ်ပျက်နေပြီး သူ၏ပရောဖက်ပြုချက်သတင်းတရားကို လူများမည်သို့တုံ့ပြန်ခဲ့ကြသနည်း။ (ခ) ယုဒလူများသည် ယေဟောဝါ၏ပရောဖက်များကို မည်ကဲ့သို့ဆန့်ကျင်,ရန်လိုခဲ့ကြသနည်း။
၅ ရေလွှမ်းမိုးဘေးပြီး၍ ရာစုနှစ်များစွာကြာပြီးနောက် ယုဒနိုင်ငံသည် ဆိုးရွားသည့်အခြေအနေများကို ကြုံတွေ့ခဲ့ရသည်။ ရုပ်ပုံကိုးကွယ်မှု၊ မတရားမှု၊ နိုင်ထက်စီးနင်းပြုမူမှုနှင့် လူသတ်မှုများပင် သာမန်အရာများဖြစ်ခဲ့သည်။ သူတို့နောင်တမရပါက ခါလဒဲ သို့မဟုတ် ဗာဗုလုန်လူမျိုးတို့၏လက်ချက်ဖြင့် ဘေးဆိုးကြီးကျရောက်လိမ့်မည်ဖြစ်ကြောင်း လူများအားသတိပေးရန် ယေဟောဝါသည် ဟဗက္ကုတ်ကို ပေါ်ထွန်းစေခဲ့သည်။ (ဟဗက္ကုတ် ၁:၅-၇) သို့သော် လူများသည် နားထောင်ရန် ငြင်းဆိုခဲ့ကြသည်။ သူတို့က ဤသို့တုံ့ပြန်ခဲ့ပေမည်– ‘လွန်ခဲ့တဲ့အနှစ်တစ်ရာကျော်တုန်းက ပရောဖက်ဟေရှာယလည်း ဒီလိုပဲသတိပေးခဲ့တာပဲ၊ ဒါပေမဲ့ အခုထိဘာမှလည်းမဖြစ်လာပါဘူး!’ (ဟေရှာယ ၃၉:၆၊ ၇) ယုဒနိုင်ငံ၏အစိုးရအရာရှိများသည် သတင်းတရားကို လျစ်လျူရှုရုံသာမက တမန်များကို ဆန့်ကျင်,ရန်လိုခဲ့ကြသည်။ တစ်ခါက ပရောဖက်ယေရမိကိုသတ်ရန် ကြိုးစားခဲ့ကြသည်၊ အဟိကံ,သာကြားမဝင်ခဲ့လျှင် သူတို့အောင်မြင်သွားပေမည်။ နောက်ထပ်ပရောဖက်ပြုချက်သတင်းကြောင့် အမျက်ထွက်ပြီး ယောယကိမ်မင်းကြီးသည် ပရောဖက်ဥရိယကို သတ်ခဲ့လေသည်။—ယေရမိ ၂၆:၂၁-၂၄။
၆။ ယေဟောဝါသည် ဟဗက္ကုတ်ကို မည်သို့ခွန်အားပေးခဲ့သနည်း။
၆ ဟဗက္ကုတ်၏သတင်းသည် ထပ်တူရဲရင့်ခဲ့ပြီး အနှစ် ၇၀ ပျက်စီးနေမည့်ယုဒနိုင်ငံအကြောင်း ဘုရားသခင်၏မှုတ်သွင်းခြင်းအားဖြင့် ကြိုဟောခဲ့ရသော ယေရမိ၏သတင်းကဲ့သို့ လူကြိုက်မများခဲ့ပါ။ (ယေရမိ ၂၅:၈-၁၁) ထို့ကြောင့် စိတ်ပျက်စွာဖြင့် ဟဗက္ကုတ်ဤသို့ပြောခဲ့ခြင်းကို ကျွန်ုပ်တို့နားလည်နိုင်ပါသည်– “အိုထာဝရဘုရား ကိုယ်တော်သည် ကြားတော်မမူဘဲ အဘယ်မျှကာလပတ်လုံး အကျွန်ုပ်အော်ဟစ်ရပါမည်နည်း။ ကယ်တင်တော်မမူဘဲ အကျွန်ုပ်သည် အဓမ္မအမှုကိုခံ၍ ရှေ့တော်၌ အဘယ်မျှကာလပတ်လုံး အော်ဟစ်ရပါမည်နည်း။” (ဟဗက္ကုတ် ၁:၂) ယေဟောဝါသည် ဟဗက္ကုတ်ကို ယုံကြည်ခြင်းခိုင်ခံ့စေသည့် ဤစကားများဖြင့် ကြင်နာစွာအဖြေပေးခဲ့သည်– “ထို [အဆင်းအာရုံ] သည် ချိန်းချက်သောအချိန်နှင့်ဆိုင်၍ အမှုကုန်ရသောကာလကိုဆိုလို၏။ မုသာနှင့်ကင်းလွတ်၏။ ဆိုင်းသော်လည်း မျှော်လင့်လော့။ နောက်မကျဘဲဧကန်အမှန်ရောက်လိမ့်မည်။” (ဟဗက္ကုတ် ၂:၃) ထို့ကြောင့် မတရားမှုနှင့် နိုင်လိုမင်းထက်ပြုမှုတို့ကိုအဆုံးတိုင်စေမည့် “ချိန်းချက်သောအချိန်” ယေဟောဝါတွင်ရှိသည်။ ကြန့်ကြာနေပုံပေါက်သည့်တိုင် ဟဗက္ကုတ်သည် စိတ်ဓာတ်မကျခဲ့သကဲ့သို့ အရှိန်လည်းမလျော့ခဲ့ပါ။ ယင်းအစား သူသည် “မျှော်လင့်” လျက်နေပြီး အရေးတကြီးသဘောထားမျိုးနှင့် နေ့စဉ်အသက်ရှင်နေထိုင်ခဲ့သည်။ ယေဟောဝါ၏နေ့သည် နောက်ကျမည်မဟုတ်!
၇။ စီ.အီး. ပထမရာစုတွင် ယေရုရှလင်မြို့ကို ထပ်၍ဖျက်ဆီးရန် အဘယ်ကြောင့်လျာထားခံခဲ့ရသနည်း။
၇ ဟဗက္ကုတ်ကို ယေဟောဝါမိန့်မြွက်ခဲ့ပြီး အနှစ် ၂၀ ခန့်အကြာတွင် ယုဒနိုင်ငံ၏မြို့တော် ယေရုရှလင်မြို့သည် ဖျက်ဆီးခံခဲ့ရသည်။ နောက်ပိုင်းတွင် ယင်းကိုပြန်တည်ဆောက်ခဲ့ပြီး ဟဗက္ကုတ်ကို အကြီးအကျယ်စိတ်ဓာတ်ကျစေခဲ့သည့် မကောင်းမှုများစွာကို ပြုပြင်ခဲ့ကြသည်။ သို့ရာတွင် ယင်းတွင်နေထိုင်ကြသောသူများ၏ သစ္စာမဲ့မှုကြောင့် စီ.အီး. ပထမရာစုတွင် ထိုမြို့တော်ဖျက်ဆီးခံရရန် ထပ်မံလျာထားခံခဲ့ရသည်။ ယေဟောဝါသည် ဖြောင့်မတ်သောသူများကယ်တင်ခံရရန် သနားကြင်နာစွာဖြင့် အစီအစဉ်ပြုလုပ်ခဲ့သည်။ ဤအကြိမ်တွင် သတင်းဟောပြောရန် ရိုးရိုးပရောဖက်မဟုတ် ယေရှုခရစ်ကိုပင် အသုံးပြုခဲ့သည်။ စီ.အီး. ၃၃ တွင် ယေရှုသည် မိမိ၏နောက်လိုက်များကို ဤသို့ပြောခဲ့သည်– “ယေရုရှလင်မြို့ကို ဗိုလ်ခြေများဝန်းရံလျက်ရှိသည်ကို သင်တို့မြင်သောအခါ ထိုမြို့သည် ပျက်စီးခြင်းသို့ရောက်လုသည်ကို သိမှတ်ကြလော့။ ထိုအခါ ယုဒပြည်၌ရှိသောသူတို့သည် တောင်ပေါ်သို့ပြေးကြစေ။”—လုကာ ၂၁:၂၀၊ ၂၁။
၈။ (က) ယေရှုသေဆုံးပြီးနောက် အချိန်ကုန်လွန်လာသည်နှင့်အမျှ ခရစ်ယာန်အချို့သည် အဘယ်သို့ဖြစ်ခဲ့မည်နည်း။ (ခ) ယေရုရှလင်နှင့်ပတ်သက်သည့် ယေရှု၏ပရောဖက်ပြုချက်စကားများသည် မည်သို့ပြည့်စုံခဲ့သနည်း။
၈ နှစ်များကုန်လွန်လေသော် ယေရုရှလင်မြို့ရှိ ခရစ်ယာန်အချို့သည် ယေရှု၏ပရောဖက်ပြုချက် အဘယ်အချိန်၌ပြည့်စုံမည်ကို သိချင်နေကြပေမည်။ အမှန်မှာ၊ သူတို့ထဲမှအချို့သည် များစွာအနစ်နာခံစွန့်လွှတ်ခဲ့ကြမည်မှာ ယုံမှားဖွယ်မရှိချေ။ သူတို့သည် စောင့်နေကြရန်ဆုံးဖြတ်ခဲ့သောကြောင့် ဆွဲဆောင်မှုရှိသော စီးပွားများကို ငြင်းပယ်ခဲ့ကြပေမည်။ အချိန်ကုန်လွန်လာသည်နှင့်အမျှ သူတို့သည် ပင်ပန်းနွမ်းလျလာခဲ့ကြသလော။ မိမိတို့သည် အချိန်ဖြုန်းနေရုံဖြစ်ပြီး ယေရှု၏ပရောဖက်ပြုချက်မှာ မိမိတို့အချိန်နှင့်မဆိုင် အနာဂတ်လူမျိုးဆက်တစ်ခုနှင့်သက်ဆိုင်သည်ဟု ကောက်ချက်ချခဲ့ကြပါသလော။ စီ.အီး. ၆၆ ၌ရောမစစ်တပ်သည် ယေရုရှလင်မြို့ကိုဝန်းရံသည့်အချိန်တွင် ယေရှု၏ပရောဖက်ပြုချက် စတင်ပြည့်စုံခဲ့သည်။ စောင့်နေကြသူများသည် နိမိတ်အဖြစ်အသိအမှတ်ပြုခဲ့ကြပြီး မြို့ထဲမှထွက်ပြေးကြရာ ယေရုရှလင်ပျက်စီးခြင်းဘေးမှ အသက်ချမ်းသာရခဲ့ကြသည်။
သတိဝီရိယနှင့်စောင့်နေကြရန်လိုကြောင်း ပုံဥပမာတင်ပြခြင်း
၉၊ ၁၀။ (က) မင်္ဂလာဆောင်ပွဲမှပြန်လာသည့်သခင်ကို စောင့်နေကြသောကျွန်များအကြောင်း ယေရှု၏ပုံဥပမာကို အကျဉ်းချုပ် မည်သို့ဖော်ပြမည်နည်း။ (ခ) သခင်ကိုစောင့်နေရခြင်းသည် ကျွန်များအတွက် အဘယ်ကြောင့်ခက်ခဲနိုင်သနည်း။ (ဂ) စိတ်ရှည်ခြင်းက ကျွန်များအတွက် အဘယ်ကြောင့်အကျိုးရှိခဲ့သနည်း။
၉ သတိဝီရိယနှင့်စောင့်နေရန်လိုကြောင်း အလေးပေးဖော်ပြရာ၌ ယေရှုသည် မိမိ၏တပည့်တော်များအား မင်္ဂလာဆောင်ပွဲမှပြန်လာသည့်သခင်ကို စောင့်နေကြသောကျွန်များနှင့် နှိုင်းယှဉ်ခဲ့သည်။ သခင်သည် ညအချိန်တွင်ပြန်ရောက်မည်ကို သိထားကြသော်လည်း အဘယ်အချိန်တွင်နည်း။ ညတစ်ချက်တီးအချိန်အတွင်းလော။ နှစ်ချက်တီးအချိန်တွင်လော။ သုံးချက်တီးအချိန်တွင်လော။ သူတို့မသိခဲ့ကြပါ။ ယေရှုဤသို့ပြောခဲ့သည်– “နှစ်ချက်တီးအချိန် [“ဒုတိယပိုင်းကင်းချိန်၊” ကဘ] ဖြစ်စေ၊ သုံးချက်တီးအချိန် [“တတိယပိုင်းကင်းချိန်၊” ကဘ] ဖြစ်စေ၊ သခင်သည်လာ၍ ထိုသို့တွေ့လျှင် ထိုကျွန်တို့သည် မင်္ဂလာရှိကြ၏။” (လုကာ ၁၂:၃၅-၃၈) ထိုကျွန်များ၏ စောင့်မျှော်နေကြပုံကို မြင်ယောင်ကြည့်ပါ။ အသံကြားတိုင်း၊ ဖျတ်ကနဲအရိပ်မြင်လိုက်တိုင်း ‘ငါတို့သခင်များလား’ ဟုသူတို့မျှော်လင့်ချက် အမှန်တိုးလာပေမည်။
၁၀ သခင်သည် ညကိုးနာရီမှ သန်းခေါင်အချိန်အထိကြာသော ဒုတိယပိုင်းကင်းချိန်အတွင်း ရောက်ခဲ့မည်ဆိုပါက မည်သို့နည်း။ နံနက်စောစောကတည်းက ပင်ပင်ပန်းပန်းအလုပ်လုပ်ခဲ့ရသူများအပါအဝင် ကျွန်အားလုံးသည် ကြိုဆိုရန် အဆင်သင့်ဖြစ်နေမည်လော သို့မဟုတ် အချို့ အိပ်ပျော်နေမည်လော။ အကယ်၍ သခင်သည် ညသန်းခေါင်မှ မနက်သုံးနာရီအထိဖြစ်သော တတိယပိုင်းကင်းချိန်အတွင်း ပြန်ရောက်လာမည်ဆိုလျှင်ကော။ သခင်၏ကြန့်ကြာနေပုံကြောင့် ကျွန်အချို့သည် စိတ်ဓာတ်ကျပြီး မကျေမနပ်ပင်ဖြစ်လာကြမည်လော။ * သခင်ရောက်လာသည့်အချိန်တွင် စောင့်နေကြသူများကိုသာ ပျော်ရွှင်ကြ၏ဟု ကြေညာခံရကြမည်ဖြစ်သည်။ သူတို့အတွက် နယပုံပြင် ၁၃:၁၂ တွင်ပါသည့် ဤစကားများသည် အမှန်ပင်သက်ဆိုင်ခဲ့ပေမည်– “မျှော်လင့်သောအရာသည် ဖင့်နွှဲလျှင်၊ စိတ်နှလုံးကိုပူပန်စေတတ်၏။ အလိုပြည့်စုံသောအခါမူကား အသက်ပင်ဖြစ်၏။”
၁၁။ ဆုတောင်းခြင်းသည် ကျွန်ုပ်တို့အား စောင့်နေနိုင်ကြရန် မည်သို့ကူညီပေးသနည်း။
၁၁ နောက်ကျနေပုံပေါက်သည့် အချိန်အတွင်း ယေရှု၏နောက်လိုက်များကို ဆက်စောင့်နေစေရန် အဘယ်အရာကအကူအညီ ဖြစ်မည်နည်း။ ယေရှုအဖမ်းမခံရမီအချိန်လေးတွင် ဂေသရှေမန်ဥယျာဉ်၌ မိမိ၏တမန်တော်သုံးပါးကို ကိုယ်တော်ကဤသို့ပြောခဲ့သည်– “စုံစမ်းနှောင့်ယှက်ခြင်းနှင့်ကင်းလွတ်မည်အကြောင်း ဆုတောင်းလျက် စောင့်နေကြလော့။” (မဿဲ ၂၆:၄၁) ထိုအချိန်ကရှိခဲ့သူ ပေတရုသည် နှစ်အတန်ကြာပြီးနောက် ခရစ်ယာန်ချင်းများအား ထပ်တူမှာကြားခဲ့သည်။ သူကဤသို့ရေးသားခဲ့သည်– “ခပ်သိမ်းသောအမှုအရာတို့သည် အဆုံးသို့ရောက်လုသည်ဖြစ်သောကြောင့် . . . သတိရှိကြလော့။ ဆုတောင်းခြင်းအလို့ငှာ စောင့်နေကြလော့။” (၁ ပေတရု ၄:၇) စိတ်အားထက်သန်စွာဆုတောင်းခြင်းသည် ကျွန်ုပ်တို့၏ ခရစ်ယာန်ပုံမှန်လုပ်ရိုးလုပ်စဉ်တစ်ခု ဖြစ်သင့်သည်မှာ ရှင်းနေပါသည်။ ကျွန်ုပ်တို့စောင့်နေနိုင်ကြရန် အကူအညီပေးဖို့ ယေဟောဝါအား အစဉ်မပြတ်တောင်းဆိုရန် အမှန်ပင်လိုအပ်သည်။—ရောမ ၁၂:၁၂; ၁ သက်သာလောနိတ် ၅:၁၇။
၁၂။ ထင်ကြေးပေးမှန်းဆခြင်းနှင့် စောင့်မျှော်နေခြင်းတို့၏ ခြားနားမှုကားအဘယ်နည်း။
၁၂ ပေတရုက ဤကဲ့သို့ပြောခဲ့သည်ကိုလည်း သတိပြုပါ– “ခပ်သိမ်းသောအမှုအရာတို့သည် အဆုံးသို့ရောက်လု” ပြီ။ မည်မျှနီးကပ်နေသနည်း။ နေ့ရက်နာရီအတိအကျကို လူသားများ လုံးဝမထောက်ပြနိုင်ပါ။ (မဿဲ ၂၄:၃၆) သို့သော် ကျမ်းစာကအားမပေးသော ထင်ကြေးပေးမှန်းဆခြင်းနှင့် ကျမ်းစာကအားပေးထားသည့် အဆုံးကိုဆက်မျှော်လင့်နေခြင်းအမှုသည် ကွဲပြားခြားနား၏။ (၂ တိမောသေ ၄:၃၊ ၄; တိတု ၃:၉ နှိုင်းယှဉ်။) အဆုံးကိုဆက်မျှော်လင့်နေနိုင်သည့် နည်းတစ်နည်းကား အဘယ်နည်း။ အဆုံးနီးပြီဟူသော သာဓကကို အာရုံစူးစိုက်နေခြင်းဖြစ်သည်။ ထို့ကြောင့် ဤဘုရားတရားမဲ့လောက၏ နောက်ဆုံးနေ့ရက်များတွင် အသက်ရှင်နေကြရကြောင်းတင်ပြသည့် သာဓကခြောက်ခုကို ပြန်လည်သုံးသပ်ကြည့်ကြစို့။
စိတ်ချစေသောသာဓကခြောက်ခု
၁၃။ ၂ တိမောသေအခန်းကြီး ၃ တွင်မှတ်တမ်းတင်ထားသည့် ပေါလု၏ပရောဖက်ပြုချက်က ကျွန်ုပ်တို့သည် ‘နောက်ဆုံးနေ့ရက်များ’ တွင်အသက်ရှင်နေကြရကြောင်း မည်သို့ယုံကြည်စိတ်ချစေသနည်း။
၁၃ ပထမ၊ ‘နောက်ဆုံးနေ့ရက်များ’ နှင့်ပတ်သက်သော တမန်တော်ပေါလု၏ပရောဖက်ပြုချက် ပြည့်စုံနေသည်ကို ကျွန်ုပ်တို့ အထင်အရှားတွေ့မြင်ကြရသည်။ ပေါလုက ဤသို့ရေးသားခဲ့သည်– “နောင်ကာလသည် ခဲယဉ်းသောကာလဖြစ်မည်ဟု သိမှတ်လော့။ အဘယ်သို့နည်းဟူမူကား လူတို့သည် ကိုယ်ကိုကိုယ်ချစ်သောသူ၊ ငွေကိုတပ်မက်သောသူ၊ ဝါကြွားသောသူ၊ ထောင်လွှားစော်ကားသောသူ၊ သူ့အသရေကိုရှုတ်ချသောသူ၊ မိဘစကားကိုနားမထောင်သောသူ၊ ကျေးဇူးမရှိသောသူ၊ သန့်ရှင်းခြင်းမရှိသောသူ၊ ပကတိကြင်နာစုံမက်ခြင်းနှင့်ကင်းသောသူ၊ ရန်ငြိုးဖွဲ့သောသူ၊ ချောစားတတ်သောသူ၊ ကိုယ်ဣန္ဒြေကိုမချုပ်တည်းနိုင်သောသူ၊ ပြင်းထန်သောသူ၊ သူတော်ကောင်းကိုမုန်းသောသူ၊ သစ္စာကိုဖျက်တတ်သောသူ၊ သတိပေးခြင်းကိုမခံသောသူ၊ မာန်မာနနှင့်ယစ်မူးသောသူ၊ ဘုရားသခင်ကိုနှစ်သက်သည်ထက် ကာမဂုဏ်ခံစားခြင်းကို သာ၍နှစ်သက်သောသူ၊ ဘုရားဝတ်၌မွေ့လျော်ယောင်ဆောင်၍ မွေ့လျော်ခြင်းတန်ခိုးကို ငြင်းပယ်သောသူဖြစ်ကြလိမ့်မည်။ ထိုသူတို့ကိုရှောင်လော့။ ဆိုးညစ်သောသူ၊ လှည့်ဖြားသောသူတို့မူကား သူတစ်ပါးကိုလည်းကောင်း၊ ကိုယ်ကိုလည်းကောင်းလှည့်ဖြား၍ ဆိုးညစ်ခြင်း၌ တရွေ့ရွေ့တိုးပွားကြလိမ့်မည်။” (၂ တိမောသေ ၃:၁-၅၊ ၁၃) ကျွန်ုပ်တို့အချိန်တွင် ဤပရောဖက်ပြုချက်ပြည့်စုံနေသည်ကို တွေ့မြင်ရသည်မဟုတ်ပေလော။ ဤအချက်များကို လျစ်လျူရှုသူများသာ ယင်းကိုငြင်းပယ်နိုင်ကြမည်! *
၁၄။ ဗျာဒိတ် ၁၂:၉ ပါစာတန်နှင့်ပတ်သက်သောစကားများသည် ယနေ့ မည်သို့ပြည့်စုံလျက်ရှိသနည်း၊ မကြာမီ သူမည်သို့ဖြစ်မည်နည်း။
၁၄ ဒုတိယ၊ ဗျာဒိတ် ၁၂:၉ ပါပရောဖက်ပြုချက်ပြည့်စုံမှုဖြစ်သည့် စာတန်နှင့် သူ၏နတ်ဆိုးများကို ကောင်းကင်မှနှင်ချခြင်း၏ အကျိုးဆက်များကို ကျွန်ုပ်တို့တွေ့မြင်ရကြသည်။ ထိုတွင်ဤသို့ဖတ်ရသည်– “လောကတစ်နိုင်ငံလုံးကိုလှည့်ဖြား၍ . . . စာတန်အမည်ရှိသော ရှေးမြွေဟောင်းတည်းဟူသော နဂါးကြီးကိုလည်းကောင်း၊ သူနှင့်အတူ သူ၏တမန်များကိုလည်းကောင်း မြေကြီးသို့ချလိုက်ကြ၏။” ယင်းက မြေကြီးအတွက် အမင်္ဂလာကြီးဖြစ်ခဲ့ပါသည်။ အထူးသဖြင့် ၁၉၁၄ ကတည်းက လူသားများအတွက် အမှန်တကယ်ပင် အမင်္ဂလာပိုများလာခဲ့ပြီ။ သို့သော် စာတန်သည် မြေကြီးပေါ်သို့ပစ်ချခံရသည့်အခါ “မိမိကာလတစ်ခဏသာရှိသည်ကို” သိကြောင်း ဗျာဒိတ်ကျမ်းပါပရောဖက်ပြုချက်က ဆက်ဖော်ပြသည်။ (ဗျာဒိတ် ၁၂:၁၂) ဤကာလအတွင်း စာတန်သည် ခရစ်တော်၏ဘိသိက်ခံနောက်လိုက်များကို တိုက်ခိုက်လေသည်။ (ဗျာဒိတ် ၁၂:၁၇) ကျွန်ုပ်တို့အချိန်တွင် သူ၏တိုက်ခိုက်မှု၏အကျိုးဆက်များကို အမှန်တွေ့နေကြရပြီ။ * သို့ရာတွင် မကြာမီ စာတန်သည် “လူအမျိုးမျိုးတို့ကိုမလှည့်ဖြား” စေရန် အနက်ဆုံးသောတွင်းထဲတွင် ချုပ်နှောင်ခြင်းခံရမည်ဖြစ်သည်။—ဗျာဒိတ် ၂၀:၁-၃။
၁၅။ ကျွန်ုပ်တို့သည် ဆုံးခန်းကာလတွင်အသက်ရှင်နေကြရကြောင်း ဗျာဒိတ် ၁၇:၉-၁၁ ကမည်သို့အထင်အရှားဖော်ပြသနည်း။
၁၅ တတိယ၊ ဗျာဒိတ် ၁၇:၉-၁၁ တွင်မှတ်တမ်းတင်ထားသော ပရောဖက်ပြုချက်တွင်ပါသည့် ရှစ်ပါးမြောက်၊ နောက်ဆုံး “ဘုရင်” အချိန်တွင် ကျွန်ုပ်တို့အသက်ရှင်နေကြရသည်။ ဤတွင် တမန်တော်ယောဟန်သည် ကမ္ဘာ့အာဏာစက် ခုနစ်ခုကိုကိုယ်စားပြုသော ဘုရင်ခုနစ်ပါး—အီဂျစ်၊ အာရှုရိ၊ ဗာဗုလုန်၊ မီဒိုပါးရှား၊ ဂရိ၊ ရောမနှင့် အင်္ဂလိပ်-အမေရိကန်ပူးတွဲအာဏာစက်ကို ဖော်ပြထားသည်။ “ခုနစ်ပါးအဝင်” ဖြစ်သော “ရှစ်ပါးမြောက်သောရှင်ဘုရင်” ကိုလည်းသူတွေ့မြင်ခဲ့သည်။ ဤရှစ်ပါးမြောက်ဘုရင်—အဆင်းအာရုံတွင် ယောဟန်မြင်သည့် နောက်ဆုံးဘုရင်—သည်ယူအဲန်ကို ကိုယ်စားပြုသည်။ ဤရှစ်ပါးမြောက်ဘုရင်သည် “ဖျက်ဆီးခြင်းသို့ ရောက်ရလိမ့်မည်” ဟုယောဟန်ပြောပြီးနာက် မည်သည့်ဘုရင်အကြောင်းကိုမျှ မဖော်ပြတော့ချေ။ *
၁၆။ နေဗုခဒ်နေဇာမင်းကြီး၏ အိပ်မက်ပါရုပ်တုပြည့်စုံချက်ဆိုင်ရာဖြစ်ရပ်မှန်များက ကျွန်ုပ်တို့သည် နောက်ဆုံးနေ့ရက်များတွင် အသက်ရှင်နေကြကြောင်း မည်သို့ညွှန်ပြသနည်း။
၁၆ စတုတ္ထ၊ ကျွန်ုပ်တို့သည် နေဗုခဒ်နေဇာမင်းကြီးအိပ်မက်ထဲမှ ရုပ်တုကြီး၏ခြေထောက်ကိုပုံဆောင်သော အချိန်ကာလပိုင်းတွင် အသက်ရှင်နေရကြသည်။ ပရောဖက်ဒံယေလသည် လူပုံသဏ္ဌာန်ရှိသော အလွန်ကြီးမားသည့် ဤလျှို့ဝှက်ဆန်းကြယ်သော ရုပ်တုကြီးအိပ်မက်ကို အဓိပ္ပာယ်ဖွင့်ပေးခဲ့သည်။ (ဒံယေလ ၂:၃၆-၄၃) ရုပ်တုတွင်ရှိသော သတ္တုလေးမျိုးသည် ဦးခေါင်း (ဗာဗုလုန်အင်ပါယာ) မှစ၍ ခြေနှင့်ခြေချောင်းများ (ယနေ့အုပ်စိုးနေသည့်အစိုးရများ) အထိ ကမ္ဘာ့အာဏာစက်အမျိုးမျိုးကို ကိုယ်စားပြုသည်။ ထိုရုပ်တုတွင် တင်စားဖော်ပြထားသော ကမ္ဘာ့အာဏာစက်အားလုံးသည် ပေါ်လာခဲ့ကြပြီ။ ယခုကျွန်ုပ်တို့သည် ရုပ်တုကြီး၏ခြေထောက်ကပုံဆောင်သော ကာလအပိုင်းအခြားတွင် အသက်ရှင်နေရကြသည်။ အခြားအာဏာစက်များ ပေါ်လာရန်ရှိကြောင်း ဖော်ပြမထားပါ။ *
၁၇။ ဆုံးခန်းကာလတွင် ကျွန်ုပ်တို့အသက်ရှင်နေကြကြောင်း ဘုရားသခင့်နိုင်ငံတော်ဟောပြောခြင်းလုပ်ငန်းက နောက်ထပ်သာဓက မည်သို့ဖြစ်သနည်း။
၁၇ ပဉ္စမ၊ ယေရှုမိန့်တော်မူခဲ့သော ဤအစီအစဉ်စနစ် အဆုံးမရောက်မီအချိန်တွင်ဖြစ်ရမည့် ကမ္ဘာချီဟောပြောခြင်းလုပ်ငန်း ပြီးမြောက်အောင်မြင်လျက်ရှိသည်ကို ကျွန်ုပ်တို့တွေ့ရသည်။ ယေရှုကဤသို့ဖော်ပြခဲ့သည်– “လူမျိုးအပေါင်းတို့အား သက်သေဖြစ်မည်အကြောင်း နိုင်ငံတော်နှင့်ယှဉ်သောဧဝံဂေလိတရားကို လောကီနိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ အဆုံးသည်ဖြစ်လတ္တံ့။” (မဿဲ ၂၄:၁၄) ယနေ့ ဤပရောဖက်ပြုချက်သည် မဖြစ်ခဲ့ဖူးသောအတိုင်းအတာတစ်ခုအထိ ပြည့်စုံနေပါသည်။ မရောက်ရှိရသေးသည့် ရပ်ကွက်တချို့ ရှိနေဆဲဖြစ်သည်မှာ မှန်ပါသည်၊ ယေဟောဝါသတ်မှတ်ထားချိန်တွင် အကြီးအကျယ်လှုပ်ရှားဆောင်ရွက်နိုင်ရန် အလွန်ကြီးစွာသောတံခါးပွင့်လာပေမည်။ (၁ ကောရိန္သု ၁၆:၉) သို့သော် ကမ္ဘာပေါ်ရှိသူတိုင်း သက်သေခံချက်ကို တစ်ဦးစီမရရှိမချင်း ယေဟောဝါစောင့်ဆိုင်းနေလိမ့်မည်ဟု ကျမ်းစာကမဆိုပါ။ ယင်းအစား သတင်းကောင်းကို ယေဟောဝါကျေနပ်သည်အထိ ဟောပြောရမည်ဖြစ်သည်။ ထို့နောက် အဆုံးတိုင်မည်။—မဿဲ ၁၀:၂၃ နှိုင်းယှဉ်။
၁၈။ ကြီးစွာသောဆင်းရဲခြင်း စတင်သည့်အခါ ဘိသိက်ခံအချို့နှင့်ပတ်သက်၍ အဘယ်အရာအမှန်ဖြစ်မည်နည်း၊ ယင်းကို မည်သို့ပိုင်းဖြတ်နိုင်သနည်း။
၁၈ ဆဋ္ဌမ၊ ယေရှုခရစ်၏ ဘိသိက်ခံတပည့်စစ်များ၏ အရေအတွက်သည် လျော့နည်းလာသော်လည်း ကြီးစွာသောဆင်းရဲခြင်းစတင်သည့်အခါ မြေကြီးပေါ်တွင် အချို့ရှိနေဆဲဖြစ်ပေလိမ့်မည်။ အကြွင်းအကျန်အတန်းအစားအများစုသည် အသက်အတော်အတန်ကြီးနေပြီဖြစ်ကာ ဘိသိက်ခံအမှန်ဖြစ်သူများ၏အရေအတွက်သည် နှစ်ကာလတစ်လျှောက် တဖြည်းဖြည်းလျော့နည်းလာခဲ့ပေပြီ။ သို့တိုင် ကြီးစွာသောဆင်းရဲခြင်းကို ရည်ညွှန်းကာ ယေရှုကဤသို့ဖော်ပြခဲ့သည်– “ထိုကာလတာရှည်လျှင် အဘယ်သူမျှမလွတ်နိုင်ရာ။ ရွေးချယ်သောသူတို့အဖို့အလို့ငှာ ထိုကာလသည်တိုလိမ့်မည်။” (မဿဲ ၂၄:၂၁၊ ၂၂) ထို့ကြောင့် ခရစ်တော်၏ “ရွေးချယ်သောသူ” တချို့သည် ကြီးစွာသောဆင်းရဲခြင်းစတင်သည့်အခါ မြေကြီးပေါ်တွင် ရှိနေကြဦးမည်မှာထင်ရှားသည်။ *
ရှေ့တွင် အဘယ်အရာရှိသနည်း
၁၉၊ ၂၀။ နိုးနိုးကြားကြားနေ၍ သတိနှင့်ဆက်စောင့်နေရန် ယခုအချိန်သည် ယခင်ကထက် အဘယ်ကြောင့်ပို၍အရေးကြီးသနည်း။
၁၉ ကျွန်ုပ်တို့အတွက် အဘယ်အနာဂတ်ရှိသနည်း။ စိတ်လှုပ်ရှားဖွယ်ကောင်းသည့်အချိန် လာရဦးမည်ဖြစ်သည်။ ပေါလုက “သူခိုးသည် ညဉ့်အခါလာသကဲ့သို့၊ သခင်ဘုရား၏နေ့ရက်သည်လာလိမ့်မည်” ဟုသတိပေးခဲ့သည်။ လောကပညာတတ်များကိုရည်ညွှန်းကာ ဤသို့ဆက်ပြောခဲ့သည်– “‘ငြိမ်ဝပ်ခြင်းရှိ၏၊ ဘေးအန္တရာယ်နှင့်ကင်းလွတ်၏’ ဟုဆိုစဉ်တွင် . . . သူတို့အပေါ်၌ လျင်မြန်စွာသောပျက်စီးခြင်းရောက်၍ လွတ်ခြင်းအခွင့်မရှိကြ။” ထို့ကြောင့် စာရှုသူများကို ပေါလုဤသို့တိုက်တွန်းထားသည်– “အခြားသောသူတို့သည် အိပ်ပျော်သကဲ့သို့ ငါတို့သည် အိပ်မပျော်ဘဲ . . . သတိရှိ၍ စောင့်ကြကုန်အံ့။” (၁ သက်သာလောနိတ် ၅:၂၊ ၃၊ ၆) မှန်ပါသည်၊ ငြိမ်းချမ်းရေးနှင့် လုံခြုံရေးရဖို့ လူ့အဖွဲ့အစည်းများကိုမျှော်ကိုးကြသူများသည် အဖြစ်မှန်ကို လျစ်လျူရှုကြသည်။ ထိုကဲ့သို့သောသူများသည် အိပ်ပျော်နေကြ၏!
၂၀ ဤအစီအစဉ်စနစ်၏ ဖျက်ဆီးခြင်းသည် ထူးခြားစွာ ရုတ်တရက်ဖြစ်ပေါ်လာမည်။ ထို့ကြောင့် ယေဟောဝါ၏နေ့ရက်ကို မျှော်လင့်လျက်နေပါ။ ဘုရားသခင်ကိုယ်တော်တိုင်က ဟဗက္ကုတ်ကို ဤသို့ပြောခဲ့သည်– “နောက်မကျဘဲ ဧကန်အမှန်ရောက်လိမ့်မည်”! အမှန်ပင်၊ သတိနှင့်ဆက်စောင့်နေရန် ဤအချိန်ထက်ပို၍အရေးကြီးသည့်အချိန် တစ်ခါမျှမရှိခဲ့ချေ။
[အောက်ခြေမှတ်ချက်များ]
^ အပိုဒ်၊ 10 သခင်သည် သူ၏ကျွန်များနှင့် အချိန်းအချက်မလုပ်ခဲ့ပါ။ ထို့ကြောင့် သူ၏သွားလာခြင်းကို တင်ပြရန်မလိုသကဲ့သို့ နောက်ကျနေပုံပေါက်သည့်အတွက် ကျွန်များကို ရှင်းပြရန်လည်း မလိုချေ။
^ အပိုဒ်၊ 13 ဤပရောဖက်ပြုချက်နှင့်ပတ်သက်သည့် အသေးစိတ်ဆွေးနွေးချက်အတွက် ကင်းမျှော်စင် သမ္မာကျမ်းစာနှင့်ဝေစာအသင်း၊ မြန်မာမှထုတ်ဝေသော ထာဝရအသက်ရစေသော အသိပညာစာအုပ်၏ အခန်း ၁၁ ရှု။
^ အပိုဒ်၊ 14 ထပ်ဆင့်အချက်အလက်များအတွက် ကင်းမျှော်စင် သမ္မာကျမ်းစာနှင့်ဝေစာအသင်း နယူးယောက်မြို့မှ ထုတ်ဝေသော ဗျာဒိတ်ကျမ်း—ယင်း၏မဟာအထွတ်အထိပ်နီးပြီ! စာအုပ်စာမျက်နှာ ၁၈၀-၆ ရှု။
^ အပိုဒ်၊ 16 ကင်းမျှော်စင်သမ္မာကျမ်းစာနှင့်ဝေစာအသင်း၊ နယူးယောက်မှထုတ်ဝေသော ဒံယေလပရောဖက်ပြုချက်ကို အာရုံစူးစိုက်လော့! စာအုပ်အခန်း ၄ ရှု။
^ အပိုဒ်၊ 18 သိုးနှင့်ဆိတ်ပုံဥပမာအရ ကြီးစွာသောဆင်းရဲခြင်းအချိန်အတွင်း လူသားသည် ဘုန်းအာနုဘော်တော်နှင့် ရောက်ရှိမည်ဖြစ်ပြီး တရားစီရင်ရန်ထိုင်မည်ဖြစ်သည်။ ခရစ်တော်၏ဘိသိက်ခံညီတော်များအား သူတို့၏ထောက်မကူညီမှုအပေါ်အခြေခံပြီး ကိုယ်တော်သည် လူတို့ကိုတရားစီရင်မည်ဖြစ်သည်။ တရားစီရင်သည့်အချိန်တွင် ခရစ်တော်၏ညီတော်အားလုံးသည် ကမ္ဘာ့ဇာတ်ခုံမှ ကြာမြင့်စွာကပင် ထွက်ခွာသွားနှင့်ခဲ့ပြီးဖြစ်လျှင် ဤစံနှုန်းဖြင့်တရားစီရင်ခြင်းသည် အဓိပ္ပာယ်မရှိဖြစ်မည်။—မဿဲ ၂၅:၃၁-၄၆။
သင်မှတ်မိသလော
● စောင့်နေကြရန် အဘယ်ကျမ်းစာနမူနာများသည် ကျွန်ုပ်တို့ကို အကူအညီဖြစ်စေနိုင်သနည်း။
● သတိဝီရိယနှင့်စောင့်နေရန်လိုအပ်ကြောင်းကို ယေရှုမည်သို့သရုပ်ဖော်ခဲ့သနည်း။
● ကျွန်ုပ်တို့သည် နောက်ဆုံးနေ့ရက်များတွင် အသက်ရှင်နေကြကြောင်း အဘယ်သာဓကခြောက်ခုက သက်သေထူသနည်း။
[လေ့လာရန်မေးခွန်းများ]
[စာမျက်နှာ ၉ ပါ ရုပ်ပုံ]
အေ. အိတ်ခ်ျ. မက္ကမီလန်သည် အနှစ်ခြောက်ဆယ်နီးပါးတိုင် ယေဟောဝါအမှုတော်ကို သစ္စာရှိစွာထမ်းခဲ့
[စာမျက်နှာ ၁၀ ပါ ရုပ်ပုံ]
ယေရှုသည် မိမိနောက်လိုက်များကို စောင့်နေကြသည့်ကျွန်များနှင့် နှိုင်းယှဉ်ခဲ့