ယေဟောဝါနှင့်ရင်းနှီးမှုကို ပြုစုပျိုးထောင်လော့
ယေဟောဝါနှင့်ရင်းနှီးမှုကို ပြုစုပျိုးထောင်လော့
“ဘုရားသခင်၌ချဉ်းကပ်ကြလော့။ သို့ပြုလျှင်၊ သင်တို့၌ချဉ်းကပ်တော်မူလိမ့်မည်။” (ယာကုပ် ၄:၈) ထို့အပြင် ဆာလံဆရာဒါဝိဒ်က ဤသို့စပ်ဆိုသည်– “[“ယေဟောဝါ၊” ကဘ] ကိုကြောက်ရွံ့သောသူတို့သည် ကိုယ်တော်မြတ်နှင့် မိတ်သဟာယဖွဲ့ရသောအခွင့် . . . ရှိကြ၏။” (ဆာလံ ၂၅:၁၄) ယေဟောဝါဘုရားသခင်သည် ကျွန်ုပ်တို့ကို ကိုယ်တော်နှင့်ရင်းနှီးသောဆက်ဆံရေး ရှိစေလိုသည်မှာ ထင်ရှားနေပါသည်။ သို့တိုင် ဘုရားသခင်အား ကိုးကွယ်သူ၊ ကိုယ်တော်၏ဥပဒေသများကို လိုက်နာနေကြသူတိုင်းက ကိုယ်တော်နှင့်ရင်းနှီးသည်ဟု မခံစားကြရချေ။
သင့်အနေနှင့်ကော။ သင်သည် ဘုရားသခင်နှင့်ပုဂ္ဂိုလ်ရေးအရ ရင်းနှီးသောဆက်ဆံရေး ရှိပါသလော။ ကိုယ်တော်ထံ သင်ချဉ်းကပ်လိုမည်မှာ ယုံမှားဖွယ်မရှိချေ။ ဘုရားသခင်နှင့် ရင်းနှီးမှု မည်သို့ရှိနိုင်မည်နည်း။ ယင်းက ကျွန်ုပ်တို့အတွက် အဘယ်အဓိပ္ပာယ်ရှိသနည်း။ သမ္မာကျမ်းစာပါ နယပုံပြင်ကျမ်း၏ တတိယအခန်းကြီးက အဖြေများပေးပါသည်။
ချစ်ခင်ကြင်နာမှုနှင့် သစ္စာတရားကိုထင်ရှားပြခြင်း
ရှေးဣသရေလလူမျိုးတို့၏ဘုရင် ရှောလမုန်သည် နယပုံပြင်ကျမ်း၏တတိယအခန်းကြီးကို ဤစကားများဖြင့် အစပျိုးထားသည်– “ငါ့သား ငါပေးသောတရားကိုမမေ့နှင့်။ ငါ့ပညတ်တို့ကို သင်၏နှလုံးစောင့်ရှောက်ပါစေ။ အကြောင်းမူကား၊ ပညတ်တရားသည် အသက်တာရှည်သော ကာလနှစ်ပေါင်းများကိုလည်းကောင်း၊ ငြိမ်ဝပ်ခြင်းကိုလည်းကောင်း တိုးပွားစေလိမ့်မည်။” (သု. ၃:၁၊ ၂) ဘုရားသခင်၏မှုတ်သွင်းမှုအရ ရှောလမုန်ရေးသားခဲ့ခြင်းကြောင့် ဖခင်သဖွယ် ဤအကြံပေးချက်သည် အမှန်မှာ ယေဟောဝါဘုရားသခင်ထံမှဖြစ်ပြီး ကျွန်ုပ်တို့ကို ဆင့်ဆိုခဲ့ခြင်းဖြစ်သည်။ သမ္မာကျမ်းစာ၌ မှတ်တမ်းတင်ထားသော ဘုရားသခင်၏သတိပေးနှိုးဆော်ချက်များ—ကိုယ်တော့်နည်းဥပဒေသများ၊ သွန်သင်ချက်များနှင့် ကိုယ်တော့်ပညတ်တော်များ—ကိုလိုက်နာရန် ဤတွင်ကျွန်ုပ်တို့အား ညွှန်ကြားထားသည်။ ယင်းသို့ ကျွန်ုပ်တို့ပြုမည်ဆိုလျှင် ကျွန်ုပ်တို့အား “အသက်တာရှည်သော ကာလနှစ်ပေါင်းများကိုလည်းကောင်း၊ ငြိမ်ဝပ်ခြင်းကိုလည်းကောင်း တိုးပွားစေလိမ့်မည်။” မှန်ပါသည်၊ ယခုပင် ကျွန်ုပ်တို့သည် ငြိမ်းချမ်းသောအသက်တာကို ပျော်မွေ့နိုင်ကြပြီး ဆိုးယုတ်သူတို့ကြုံရလေ့ရှိသည့် အချိန်မတန်ဘဲသေဘေးသင့်ရခြင်းကို ရှောင်တိမ်းနိုင်ကြ၏။ ထိုထက်ကား ငြိမ်ဝပ်မှုရှိသောကမ္ဘာသစ်တွင်ရမည့် ထာဝရအသက်ကို မျှော်လင့်နိုင်ကြသည်။—သု. ၁:၂၄-၃၁; ၂:၂၁၊ ၂၂။
ရှောလမုန်က ဤသို့ဆက်၍ဆိုသည်– “[“ချစ်ခင်ကြင်နာမှု၊” ကဘ] နှင့်သစ္စာတရားကို သင်နှင့်မကွာစေနှင့်။ ထိုတရားတို့ကို သင်၏လည်ပင်း၌ ဆွဲထားလော့။ နှလုံးစာရင်း၌ ရေးသွင်းလော့။ ထိုသို့ပြုလျှင်၊ ဘုရားသခင့်ရှေ့၊ လူတို့ရှေ့မှာမျက်နှာရ၍၊ ကျေးဇူးကိုခံရလိမ့်မည်။”—သု. ၃:၃၊ ၄။
“ချစ်ခင်ကြင်နာမှု” အတွက် မူရင်းဘာသာစကား၌ ဖော်ပြချက်အခြားတစ်မျိုးမှာ “သစ္စာစောင့်သိသောမေတ္တာ” ဖြစ်ရာ မသွေမဖည်သစ္စာမြဲမှု၊ သွေးစည်းမှု၊ သစ္စာစောင့်သိမှုတို့ဖြစ်နိုင်သည်။ မည်သို့ပင်ဖြစ်လာပါစေ၊ ယေဟောဝါနှင့်ဆက်လက်တွယ်ကပ်နေရန် စိတ်ဆုံးဖြတ်ထားကြပါသလော။ ယုံကြည်သူချင်းတို့နှင့် ဆက်ဆံရာတွင် ချစ်ခင်ကြင်နာမှုကို တင်ပြနေပါသလော။ သူတို့နှင့်ရင်းနှီးမှုဆက်ရှိဖို့ ကြိုးပမ်းနေပါသလော။ သူတို့နှင့် နေ့စဉ်နေ့တိုင်းပေါင်းသင်းဆက်ဆံရာတွင် ခဲယဉ်းသောအခြေအနေများအောက်၌ပင် ‘မေတ္တာတရားအားဖြင့် ပြောဆိုခြင်း’ ကိုထိန်းသိမ်းသလော။—သု. ၃၁:၂၆။
ချစ်ခင်ကြင်နာမှုကြွယ်ဝခြင်းကြောင့် ယေဟောဝါသည် “အပြစ်လွှတ်လိုသောသဘောနှင့်ပြည့်စုံ . . . ၏။” (ဆာလံ ၈၆:၅၊ သမ္မာ) အတိတ်ကအပြစ်များကို နောင်တယူ၍ ယခု ကျွန်ုပ်တို့သွားဖို့ရာ ဖြောင့်မတ်သောလမ်းကို ပြင်ဆင်နေမည်ဆိုလျှင် ယေဟောဝါထံတော်မှ “ချမ်းအေးသောအချိန်ကာလသည်ရောက်လာ” မည်ဖြစ်ကြောင်း ကျွန်ုပ်တို့စိတ်ချနိုင်သည်။ (တမန်တော် ၃:၁၉) ကျွန်ုပ်တို့သည် သူတစ်ပါး၏အပြစ်ကိုလွှတ်ခြင်းအားဖြင့် ဘုရားသခင်အား အတုမယူသင့်ပေလော။—မဿဲ ၆:၁၄၊ ၁၅။
ယေဟောဝါသည် “သစ္စာစောင့်တော်မူသော ဘုရားသခင်” ဖြစ်ပြီး ကိုယ်တော်နှင့်ရင်းနှီးလိုသူတို့ထံမှ “သစ္စာတရား” ကိုကိုယ်တော်အလိုရှိတော်မူသည်။ (ဆာလံ ၃၁:၅) ကျွန်ုပ်တို့သည် မည်သို့သော လူစားဖြစ်ကြောင်း ဖုံးကွယ်တတ်ကြသည့် “လျှပ်ပေါ်သောလူတို့” ကဲ့သို့ နှစ်ဘဝစံ—ခရစ်ယာန်အပေါင်းအဖော်များရှေ့တွင် တစ်မျိုးကျင့်ကြံ၍ သူတို့၏မျက်ကွယ်၌တစ်ဖုံကျင့်ကြံ—နေမည်ဆိုလျှင် ယေဟောဝါသည် ကျွန်ုပ်တို့၏မိတ်ဆွေဖြစ်လိမ့်မည်ဟု မျှော်လင့်နိုင်ပါမည်လော။ (ဆာလံ ၂၆:၄) “ခပ်သိမ်းသောအရာတို့သည် အကွယ်အကာမရှိဘဲ” ယေဟောဝါ၏ “မျက်မှောက်တော်၌လှန်ထားလျက်ရှိ” ခြင်းကြောင့် ထိုသို့ပြုခြင်းသည် မည်မျှပင်မိုက်မဲစွတကား!—ဟေဗြဲ ၄:၁၃။
ချစ်ခင်ကြင်နာမှုနှင့် သစ္စာတရားသည် ‘ဘုရားသခင်ရှေ့၊ လူတို့ရှေ့၌ မျက်နှာသာရ’ စေသောကြောင့် ‘ကျွန်ုပ်တို့၏လည်ပင်း၌ ဆွဲထားသည့်’ အဖိုးမဖြတ်နိုင်သော လည်ဆွဲရတနာကဲ့သို့တန်ဖိုးထားရမည်။ ဤအရည်အသွေးများကို အပေါ်ယံသာဖော်ပြရန်မဟုတ်ဘဲ ကျွန်ုပ်တို့ဥပဓိရုပ်၏ပင်ကိုအရည်အသွေး ဖြစ်စေခြင်းဖြင့် ‘ကျွန်ုပ်တို့၏နှလုံး ကျောက်သားပြင်ပေါ်တွင်’ ထွင်းထုထားရန်လိုသည်။
ယေဟောဝါအား လုံးလုံးလျားလျားကိုးစားခြင်းကို ပြုစုပျိုးထောင်လော့
ပညာရှိသောရှင်ဘုရင်က ဤသို့ဆက်ပြောသည်– “ထာဝရဘုရား၌ စိတ်နှလုံးအကြွင်းမဲ့ကိုးစားလော့။ ကိုယ့်ဉာဏ်ကိုအမှီမပြုနှင့်။ သွားလေရာရာ၌ ထာဝရဘုရားကိုမျက်မှောက်ပြုလော့။ သို့ပြုလျှင် သင်၏လမ်းခရီးများကို ဖြောင့်စေတော်မူမည်။”—သု. ၃:၅၊ ၆၊ သမ္မာ။
ကျွန်ုပ်တို့၏လုံးလုံးလျားလျားကိုးစားမှုကို ယေဟောဝါ အမှန်ပင်ရထိုက်ပေသည်။ ဖန်ဆင်းရှင်အနေဖြင့် ကိုယ်တော်သည် “ခွန်အားကြီး” ၍ “တန်ခိုး” ၏အရင်းအမြစ်ဖြစ်တော်မူသည်။ (ဟေရှာယ ၄၀:၂၆၊ ၂၉) ကိုယ်တော်ရည်ရွယ်တော်မူသမျှအားလုံးကို ဖြစ်မြောက်စေနိုင်၏။ ကိုယ်တော့်နာမတော်ကိုယ်နှိုက်က “ကိုယ်တော်ဖြစ်လာစေသည်” ဟုအဓိပ္ပာယ်ရှိရာ ကတိထားတော်မူသမျှကိုပြည့်စုံစေရန် ကိုယ်တော့်စွမ်းရည်ကို ကျွန်ုပ်တို့အားယုံကြည်စိတ်ချစေသည်။ “ဘုရားသခင်သည် မုသာမသုံးနိုင်” ဟူသောအချက်က ကိုယ်တော်အား သစ္စာတရား၏ပြယုဂ်ဖြစ်စေတော်မူ၏။ (ဟေဗြဲ ၆:၁၈) ကိုယ်တော်၏ အထင်ရှားဆုံးဂုဏ်ရည်တော်မှာ မေတ္တာဖြစ်သည်။ (၁ ယောဟန် ၄:၈) ကိုယ်တော်၏ “လမ်းခရီးတော်ရှိသမျှတို့သည် ဖြောင့်မတ်၍၊ ခပ်သိမ်းသောအမှုတော်တို့သည် သန့်ရှင်းကြပါ၏။” (ဆာလံ ၁၄၅:၁၇) ဘုရားသခင်အား ကျွန်ုပ်တို့မကိုးစားနိုင်လျှင် မည်သူ့ကို ကျွန်ုပ်တို့ယုံကြည်ကိုးစားနိုင်ပါမည်နည်း။ သို့သော်၊ ကိုယ်တော်အားယုံကြည်ကိုးစားခြင်းကို ပြုစုပျိုးထောင်ရန် ကျွန်ုပ်တို့၏ကိုယ်ရေးကိုယ်တာ ဘဝအသက်တာတွင် သမ္မာကျမ်းစာမှသိရှိလာသမျှကို လက်တွေ့ကျင့်သုံး၍ ဖြစ်ပေါ်လာသောအကျိုးကျေးဇူးကို ဆင်ခြင်သုံးသပ်ခြင်းဖြင့် ‘ယေဟောဝါသည် ကောင်းမြတ်တော်မူကြောင်းကို မြည်းစမ်း၍သိမှတ်’ ရန်လိုသည်။—ဆာလံ ၃၄:၈။
ကျွန်ုပ်တို့သည် ‘သွားလေရာရာ၌ ယေဟောဝါအား မည်သို့မျက်မှောက်ပြု’ မည်နည်း။ မှုတ်သွင်းခံ ဆာလံဆရာက ဤသို့ဆိုသည်– “ပြုတော်မူသမျှတို့ကိုဆင်ခြင်၍ စီရင်တော်မူသောအရာတို့ကို မြွက်ဆိုပါမည်။” (ဆာလံ ၇၇:၁၂) ဘုရားသခင်ကို မမြင်နိုင်သောကြောင့် ကိုယ်တော်၏ကြီးမြတ်သောဆောင်ရွက်မှုများနှင့် လူမျိုးတော်နှင့်ပတ်သက်၍ ကိုယ်တော်၏စီရင်ချက်တို့ကို စဉ်းစားဆင်ခြင်ခြင်းသည် ကိုယ်တော်နှင့်ရင်းနှီးမှု ပြုစုပျိုးထောင်ရာတွင် အရေးပါသည်။
ယေဟောဝါအား မျက်မှောက်ပြုခြင်း၌ ဆုတောင်းခြင်းသည်လည်း အရေးပါသောနည်းလမ်းတစ်ရပ်ဖြစ်၏။ ဘုရင်ဒါဝိဒ်သည် ယေဟောဝါအား “အစဉ်” ဟစ်ခေါ်ခဲ့သည်။ (ဆာလံ ၈၆:၃) ဒါဝိဒ်သည် တောအရပ်၌ထွက်ပြေးတိမ်းရှောင်နေရစဉ် မကြာခဏ တစ်ညလုံးဆုတောင်းခဲ့သည်။ (ဆာလံ ၆၃:၆၊ ၇) ‘ဝိညာဉ်တော်အားဖြင့် အခါခပ်သိမ်း တောင်းလျှောက်ကြလော့’ ဟူ၍တမန်တော်ပေါလုက တိုက်တွန်းခဲ့သည်။ (ဧဖက် ၆:၁၈၊ သမ) ကျွန်ုပ်တို့ ကြိမ်ဖန်မည်မျှ ဆုတောင်းလေ့ရှိကြသနည်း။ ဘုရားသခင်နှင့် ကိုယ်တိုင်လှိုက်လှိုက်လှဲလှဲဆက်သွယ်ခြင်း၌ ပျော်မွေ့ကြပါသလော။ ခက်ခဲသောအခြေအနေများကို ကြုံတွေ့ကြရသောအခါ ကိုယ်တော့်မစမှုရရန် အသနားခံကြပါသလော။ အရေးကြီးသောဆုံးဖြတ်ချက်များမချမီ ကိုယ်တော်၏ညွှန်ကြားမှုအတွက် ဆုတောင်းကြပါသလော။ ယေဟောဝါထံ ကျွန်ုပ်တို့လှိုက်လှိုက်လှဲလှဲတောင်းသည့် ဆုတောင်းချက်များက ကိုယ်တော်နှင့်ကျွန်ုပ်တို့ကို ပိုရင်းနှီးချစ်ခင်စေ၏။ ထို့အပြင် ကိုယ်တော်သည် ကျွန်ုပ်တို့၏ဆုတောင်းချက်ကို နားညောင်း၍ ‘ကျွန်ုပ်တို့၏ လမ်းခရီးတို့ကို ဖြောင့်စေတော်မူမည်’ ဟူသည့်အာမခံချက်ရှိသည်။
ကျွန်ုပ်တို့သည် ယေဟောဝါအား အပြည့်အဝယုံကြည်စိတ်ချနိုင်လျက်နှင့် လောကရှိ အထင်ကရပုဂ္ဂိုလ်များ၊ သို့မဟုတ် ‘ကိုယ့်ဉာဏ်ကို အမှီပြုခြင်း’ မှာ မည်မျှမိုက်မဲလှလေခြင်း! “ဉာဏ်ကောင်းသည်ဟု အထင်အမြင်မရှိစေနှင့်” ဟူ၍ရှောလမုန်က ဆိုသည်။ ထိုသို့ပြုမည့်အစား သူကဤသို့သတိပေးသည်– “ထာဝရဘုရားကိုခန့်ညား၍ ဒုစရိုက်[မကောင်းမှု] ကိုကြဉ်ရှောင်လော့။ သင်၏ချက်တိုင်အဖို့ သန်မာခြင်း၊ အရိုးများအဖို့ အားပြည့်ခြင်းဖြစ်လိမ့်မည်။” (သု. ၃:၇၊ ၈၊ သမ) ဘုရားသခင်မနှစ်သက်မည်ကိုစိုးရွံ့သော အကျိုးဖြစ်ထွန်းသည့် ကြောက်ရွံ့မှုက ကျွန်ုပ်တို့၏လုပ်ရပ်များ၊ စဉ်းစားမှုများနှင့် စိတ်လှုပ်ရှားမှုများကိုထိန်းချုပ်သင့်သည်။ ယင်းသို့သော ကြည်ညိုကြောက်ရွံ့ခြင်းက အဆိုးကိုပြုလုပ်ခြင်းမှ ကျွန်ုပ်တို့ကိုကာကွယ်ပေးပြီး ဝိညာဉ်ရေးအရကုသမှုနှင့် အားသစ်လောင်းပေးခြင်းကိုဖြစ်စေသည်။
သင့်အကောင်းဆုံးကို ယေဟောဝါအား ပေးလော့
အခြားအဘယ်နည်းဖြင့် ဘုရားသခင်ထံ ကျွန်ုပ်တို့ချဉ်းကပ်နိုင်မည်နည်း။ “သင်၏ အဖိုးထိုက်သောအရာများနှင့် အဦးသီးသောအသီးအနှံရှိသမျှတို့ဖြင့် ယေဟောဝါအား ဂုဏ်ပြုလော့” ဟုမင်းကြီးကညွှန်ကြားသည်။ (သု. ၃:၉၊ ကဘ) ယေဟောဝါအားဂုဏ်ပြုခြင်းဟူ သည် ကိုယ်တော်၏နာမတော်ကို လူသူရှေ့ကြေညာခြင်းတွင်ပါဝင် ထောက်ပံ့ပေးခြင်းဖြင့် ကိုယ်တော်အား အလွန်ကြည်ညိုလေးမြတ်ခြင်း၊ လူသိရှင်ကြားချီးမြှောက်ခြင်းဖြစ်သည်။ ယေဟောဝါအား ကျွန်ုပ်တို့ဂုဏ်တင်ကြရာ၌ အသုံးပြုသည့်အဖိုးထိုက်သောအရာများမှာ ကျွန်ုပ်တို့၏အချိန်၊ စွမ်းရည်၊ ခွန်အားနှင့် ဥစ္စာဓနတို့ဖြစ်သည်။ ၎င်းတို့သည် အဦးသီးသော—ကျွန်ုပ်တို့၏အကောင်းဆုံး—အသီးများဖြစ်ရမည်။ ကျွန်ုပ်တို့၏ကိုယ်ပိုင်စွမ်းပကားကို အသုံးပြုပုံပြုနည်းက “ဘုရားသခင်၏ နိုင်ငံတော်နှင့်ဖြောင့်မတ်ခြင်းတရားတော်ကို ရှေ့ ဦးစွာရှာ” ရန် ကျွန်ုပ်တို့၏အဓိဋ္ဌာန်ပြုချက်ကို ထင်ဟပ်ပြသင့်သည်မဟုတ်ပေလော။—မဿဲ ၆:၃၃။
ကျွန်ုပ်တို့၏အဖိုးထိုက်သောအရာများနှင့် ယေဟောဝါအား ဂုဏ်တင်ခြင်းသည် အကျိုးမခံစားရဘဲနေမည်မဟုတ်ချေ။ ရှောလမုန်က “သို့ပြုလျှင်၊ သင်၏စပါးကျီတို့သည် ကြွယ်ဝ၍ စပျစ်သီးနယ်ရာတန်ဆာတို့ကို အသစ်သောစပျစ်ရည်လျှံလိမ့်မည်” ဟုအာမခံသည်။ (သု. ၃:၁၀) ဝိညာဉ်ရေးကြွယ်ဝခြင်းကိုယ်နှိုက်က ရုပ်ပစ္စည်းကြွယ်ဝမှုကို မဖြစ်စေသော်လည်း ယေဟောဝါအားဂုဏ်တင်ရန် ကျွန်ုပ်တို့၏စွမ်းပကားများကို ရက်ရက်ရောရောအသုံးပြုခြင်းသည် ကောင်းချီးမင်္ဂလာများစွာ ရရှိစေသည်။ ဘုရားသခင့်အလိုတော်ကို ဆောင်ခြင်းသည် ယေရှုအတွက် “စားစရာ” ဖြစ်ခဲ့၏။ (ယောဟန် ၄:၃၄) အလားတူ ယေဟောဝါအားဂုဏ်တင်သည့် ဟောပြောခြင်းနှင့် တပည့်ဖြစ်စေခြင်းလုပ်ငန်း၌ ပါဝင်ခြင်းက အာဟာရဖြစ်စေသည်။ ထိုလုပ်ငန်း၌ ကျွန်ုပ်တို့စွဲမြဲပါက ကျွန်ုပ်တို့၏ဝိညာဉ်ရေးဆိုင်ရာစပါးကျီတို့သည် ပြည့်လျှံနေပါလိမ့်မည်။ စပျစ်ရည်အသစ်ဖြင့်ပုံဆောင်ထားသည့် ကျွန်ုပ်တို့၏ရွှင်လန်းမှုသည် လျှံလျက်နေမည်။
တစ်နေ့တာအတွက်အစာ အလုံအလောက်ရှိဖို့ ယေဟောဝါကိုမျှော်ကိုးအားထား၍ ဆုတောင်းကြသည်မဟုတ်ပေလော။ (မဿဲ ၆:၁၁) အမှန်မှာ၊ ကျွန်ုပ်တို့ပိုင်ဆိုင်သမျှသည် ကျွန်ုပ်တို့၏မေတ္တာရှင် ကောင်းကင်ခမည်းတော်ထံတော်မှဖြစ်သည်။ ကိုယ်တော်အား ချီးမွမ်းဂုဏ်တင်စရာဖြစ်ရန် ကျွန်ုပ်တို့၏အဖိုးထိုက်သောအရာများကို အသုံးပြုပါက ယေဟောဝါသည် ကောင်းချီးများ ထပ်ဆင့်သွန်းလောင်းတော်မူမည်ဖြစ်သည်။—၁ ကောရိန္သု ၄:၇။
ယေဟောဝါ၏ဆုံးမပဲ့ပြင်ခြင်းကို ကြိုဆိုလက်ခံခြင်း
ယေဟောဝါနှင့်ရင်းနှီးမှုရရှိရေး၌ ဆုံးမပဲ့ပြင်ခြင်း၏ အရေးပါမှုကိုသတိပြုကာ ဣသရေလရှင်ဘုရင်သည်ကျွန်ုပ်တို့ကို ဤသို့အကြံပြုသည်– “ငါ့သား၊ ထာဝရဘုရားဆုံးမတော်မူခြင်းကို မမှတ်ဘဲမနေနှင့်။ ပဲ့ပြင်တော်မူသောအခါ စိတ်မပျက်စေနှင့်။ ထာဝရဘုရားသည် ချစ်တော်မူသောသူကို ဆုံးမတော်မူ၏။ နှစ်သက်တော်မူသောသားကို ရိုက်ပုတ်တော်မူ၏။”—သု. ၃:၁၁၊ ၁၂၊ သမ္မာ။
သို့သော် ဆုံးမပဲ့ပြင်ခြင်းကို လက်ခံရလွယ်ကူမည်မဟုတ်ချေ။ “ဆုံးမခြင်းမည်သည်ကား၊ ခံရစဉ်အခါ ဝမ်းမြောက်စရာမထင်၊ ဝမ်းနည်းစရာထင်တတ်၏” ဟူ၍ တမန်တော်ပေါလုကရေးသားခဲ့သည်။ “သို့သော်လည်း၊ ဆုံးမခြင်းကိုခံရသောသူတို့သည်၊ နောက်မှငြိမ်သက်ခြင်းနှင့်စပ်ဆိုင်သော ဖြောင့်မတ်ခြင်းအကျိုးကို ခံရကြ၏။” (ဟေဗြဲ ၁၂:၁၁) ဘုရားသခင်နှင့်ကျွန်ုပ်တို့ ရင်းနှီးလာဖို့ရန် လေ့ကျင့်ပေးရာတွင် ဆုံးမခြင်းနှင့် ပဲ့ပြင်မှုသည် မရှိမဖြစ်လိုအပ်သည်။ ယေဟောဝါ၏ဆုံးမခြင်းကို မိဘများထံမှဖြစ်စေ၊ ခရစ်ယာန်အသင်းတော်မှတစ်ဆင့်ဖြစ်စေ၊ ကိုယ်ပိုင်လေ့လာမှုပြုစဉ် ကျမ်းချက်များကို တွေးတောဆင်ခြင်ခြင်းအားဖြင့်ဖြစ်စေ ရရှိခြင်းသည် ကျွန်ုပ်တို့ကိုကိုယ်တော်မေတ္တာပြခြင်းဖြစ်သည်။ ယင်းကို ဝမ်းသာစွာလက်ခံခြင်းသည် ပညာရှိရာကျ၏။
ဉာဏ်ပညာနှင့် ပိုင်းခြားသိမြင်မှုကို စွဲကိုင်ထားလော့
ထို့နောက် ရှောလမုန်က ဘုရားသခင်နှင့် ရင်းနှီးသောဆက်ဆံရေးကို ပြုစုပျိုးထောင်ရာ၌ ဉာဏ်ပညာနှင့် ပိုင်းခြားသိမြင်မှု၏အရေးပါပုံကို အလေးပေးဖော်ပြခဲ့သည်။ သူက ဤသို့ပြောကြားသည်– “ဉာဏ်ပညာကိုရှာ၍ရသောသူသည် မင်္ဂလာရှိ၏။ အကြောင်းမူကား၊ ပညာကုန်သွယ်ခြင်းသည် ငွေကုန်သွယ်ခြင်းထက် သာ၍ကောင်း၏။ ပညာကုန်သွယ်၍ရသောအမြတ်လည်း ရွှေစင်ထက်သာ၍ကောင်း၏။ . . . ပညာကိုကိုင်ဆွဲသောသူသည် အသက်ပင်ကိုရပြီ။ လက်မလွတ်သောသူသည်မင်္ဂလာရှိ၏။”—သု. ၃:၁၃-၁၈။
ယေဟောဝါ၏ အံ့ချီးဖွယ်ဖန်ဆင်းခြင်းလက်ရာတော်များ၌ ဉာဏ်ပညာနှင့် ပိုင်းခြားသိမြင်မှုကို ဖော်ပြထားခြင်းအကြောင်း ကျွန်ုပ်တို့ကို သတိပေးသည့်အနေနှင့် ဘုရင်က ဤသို့ဆိုသည်– “ထာဝရဘုရားသည် ပညာတော်အားဖြင့် မြေကြီးကိုတည်၍၊ ဉာဏ်တော်အားဖြင့် မိုးကောင်းကင်ကိုပြင်ဆင်တော်မူ၏။ . . . ငါ့သား၊ ပညာရတနာနှင့်[ကောင်းသော]သတိကို သင့်မျက်မှောက်မှမကွာစေဘဲ၊ အစဉ်စောင့်ရှောက်လော့။ သို့ပြုလျှင်၊ ထိုရတနာတို့သည် သင်၏ဝိညာဉ်၌အသက်၊ သင်၏လည်ပင်း၌ ဂုဏ်အသရေဖြစ်လိမ့်မည်။”—သု. ၃:၁၉-၂၂။
ဉာဏ်ပညာနှင့် ပိုင်းခြားသိမြင်မှုမှာ ဘုရားသခင့်ရေးရာအရည်အသွေးများဖြစ်သည်။ ယင်းတို့ကို ပြုစုပျိုးထောင်ရမည်သာမက ဝီရိယရှိရှိကျမ်းစာလေ့လာခြင်းကို မည်သည့်အခါမျှမလျှော့ပေါ့စေခြင်းနှင့် သင်ယူခဲ့ရာကိုကျင့်သုံးခြင်းအားဖြင့် စွဲကိုင်ထားရန်လည်းလိုသည်။ သို့ပြုလျှင် “သင်သည် ခရီးသွားရာ၌ဘေးမရှိ။ ခြေမတိုက်မိဘဲသွားလိမ့်မည်” ဟုရှောလမုန်က ဆက်ပြောသည်။ သူက ဤသို့ထပ်ဆင့်သည်– “အိပ်သောအခါ ကြောက်စရာမရှိ။ ကောင်းမွန်စွာအိပ်ပျော်ရလိမ့်မည်။”—သု. ၃:၂၃၊ ၂၄။
မှန်ပါသည်၊ စာတန်၏ဆိုးညစ်သောလောကအပေါ် “လျင်မြန်စွာသောပျက်စီးခြင်း” ကျရာက်မည့် သူခိုးကဲ့သို့ချဉ်းကပ်လာသောနေ့ရက်ကို ကျွန်ုပ်တို့စောင့်စားနေစဉ် လုံခြုံစွာလျှောက်လှမ်းပြီး စိတ်ငြိမ်သက်စွာ အိပ်စက်နိုင်ကြမည်။ (၁ သက်သာလောနိတ် ၅:၂၊ ၃; ၁ ယောဟန် ၅:၁၉) ရောက်အံ့ဆဲဆဲရှိ ကြီးစွာသောဆင်းရဲခြင်းအတွင်း၌ပင် ကျွန်ုပ်တို့မှာဤအာမခံချက်ရှိသည်– “လျင်မြန်သောဘေးနှင့် လူဆိုးတွေ့တတ်သော ပျက်စီးရာဘေးကို ကြောက်စရာမရှိရ။ အကြောင်းမူကား၊ ထာဝရဘုရားသည် သင်ယုံကြည်ကိုးစားရာဖြစ်၍၊ သင်၏ခြေကိုမကျော့မိစေခြင်းငှာ စောင့်မတော်မူလိမ့်မည်။”—သု. ၃:၂၅၊ ၂၆; မဿဲ ၂၄:၂၁။
ကောင်းမှုပြုလော့
“ကျေးဇူးကိုခံသင့်သောသူတို့အား ကျေးဇူးပြုရသောအခွင့်ရှိလျှင် မပြုဘဲမနေနှင့်” ဟုရှောလမုန်က ဆုံးမသည်။ (သု. ၃:၂၇) သူတစ်ပါးကိုကောင်းမှုပြုခြင်းတွင် သူတို့၏အကျိုးအတွက် ကျွန်ုပ်တို့၏စွမ်းပကားကို အသွင်အမျိုးမျိုးဖြင့် ရက်ရက်ရောရောအသုံးပြုခြင်း ပါဝင်သည်။ သို့သော် ‘အမှုကုန်ရသည့်’ ဤကာလအတွင်း စစ်မှန်သောဘုရားသခင်နှင့် အခြားသူတို့ကို ရင်းနှီးသည့်ဆက်ဆံရေးရရှိစေရန် ကူညီပေးခြင်းသည် သူတို့အတွက် ကျွန်ုပ်တို့ပြုလုပ်ပေးနိုင်သော အကောင်းဆုံးအကျိုးမဟုတ်ပေလော။ (ဒံယေလ ၁၂:၄) သို့ဖြစ်၍ ဤနေ့ရက်များသည် ဘုရားသခင့်နိုင်ငံတော်အကြောင်းဟောပြောခြင်းနှင့် တပည့်ဖြစ်စေခြင်းလုပ်ငန်းတွင် ဇွဲရှိကြောင်းတင်ပြရန်အချိန်ဖြစ်သည်။—မဿဲ ၂၈:၁၉၊ ၂၀။
ပညာရှိဘုရင်က ရှောင်ရမည့်အကျင့်အချို့ကိုလည်း ဤသို့ဖော်ပြသည်– “အိမ်နီးချင်းကိုပေးစရာရှိလျက်ပင်၊ ‘သွားတော့။ တစ်ဖန်လာဦးတော့၊ နက်ဖြန်မှငါပေးမည်’ ဟုမပြောနှင့်။ စိုးရိမ်ခြင်းမရှိဘဲ သင့်အနားမှာနေသောအိမ်နီးချင်း၌ မကောင်းသောအကြံကိုမကြံနှင့်။ သင်၌အပြစ်မပြုသောသူကို အကြောင်းမရှိဘဲရန်မတွေ့နှင့်။ ညှဉ်းဆဲတတ်သောသူ၏စည်းစိမ်ကို မတောင့်တနှင့်။ သူလိုက်သောလမ်းတစ်စုံတစ်ခုကိုမျှ အလိုမရှိနှင့်။”—သု. ၃:၂၈-၃၁။
မိမိညွှန်ကြားချက်၏ အကျဉ်းချုပ်အကြောင်းရင်းကို ရှောလမုန်က ဤသို့ဖော်ပြသည်– “အကြောင်းမူကား၊ ထာဝရဘုရားသည် သဘောကောက်သောသူတို့ကို စက်ဆုပ်ရွံရှာတော်မူ၏။ ဖြောင့်မတ်သောသူတို့မူကား၊ ကိုယ်တော်နှင့်မိတ်သဟာယဖွဲ့ရသောအခွင့်ရှိကြ၏။ မတရားသောသူ၏နေရာသည် ထာဝရဘုရားကျိန်တော်မူခြင်းကိုတွေ့တတ်၏။ တရားသောသူ၏နေရာကိုကား ကောင်းချီးပေးတော်မူ၏။ အကယ်စင်စစ် ကဲ့ရဲ့တတ်သောသူတို့ကို ကဲ့ရဲ့တော်မူ၏။ စိတ်နှိမ့်ချသောသူတို့အားကား၊ ကျေးဇူးပြုတော်မူ၏။ ပညာရှိသောသူတို့သည် ဘုန်းအသရေကိုအမွေခံရ၍၊ မိုက်သောသူတို့မူကား၊ အရှက်ကွဲခြင်းကိုထမ်းသွားရကြလိမ့်မည်။”—သု. ၃:၃၂-၃၅။
ကျွန်ုပ်တို့သည် ယေဟောဝါနှင့်ရင်းနှီးလိုလျှင် မရိုးမဖြောင့်၊ မကောင်းသောအကြံအစည်များကို မကြံစည်ရ။ (သု. ၆:၁၆-၁၉) ယေဟောဝါ၏မျက်မှောက်၌ ဖြောင့်မတ်မှန်ကန်သောအမှုကို ပြုလုပ်မှသာလျှင် ကိုယ်တော်၏မျက်နှာသာတော်နှင့် ကောင်းချီးရမည်ဖြစ်သည်။ ဘုရားသခင့်ရေးရာဉာဏ်ပညာနှင့်အညီ ကျွန်ုပ်တို့လုပ်ဆောင်နေကြောင်း အခြားသူတို့တွေ့မြင်ကြသောအခါ မထင်မမှတ်ဘဲ ဂုဏ်တင်ခံရလိမ့်မည်။ ထို့ကြောင့် ဤဆိုးယုတ်၍ အကြမ်းဖက်နေသောလောက၏ မရိုးဖြောင့်သောနည်းလမ်းများကို ကျွန်ုပ်တို့ငြင်းပယ်ကြစို့။ ဖြောင့်မှန်သောလမ်းစဉ်ကိုလိုက်လျှောက်၍ ယေဟောဝါနှင့်ရင်းနှီးမှုကို အမှန်တကယ်ပြုစုပျိုးထောင်ကြစို့လေ!
[စာမျက်နှာ ၂၅ ပါ ရုပ်ပုံ]
“သင်၏ အဖိုးထိုက်သောအရာများနှင့် . . . ယေဟောဝါအား ဂုဏ်ပြုလော့”