“ခရစ်တော်​၏​စိတ်” ကို​သိကျွမ်း​လာ​ခြင်း

“‘ထို​လူကို​သွန်သင်​နိုင်​မည်​အကြောင်း အဘယ်သူ​သည် ထာဝရ​ဘုရား​၏​စိတ်တော်​ကို​သိ​သနည်း။’ ငါ​တို့​မူ​ကား ခရစ်တော်​၏​စိတ်​ကို​ခံရ​ကြ​၏။”—၁ ကောရိန္သု ၂:၁၆။

၁၊ ၂။ ယေဟောဝါ​သည် မိမိ၏​နှုတ်မြွက်​စကားတော်​၌ ယေရှု​နှင့်​ပတ်သက်​၍ အဘယ်အရာကို​ဖော်ပြ​ရန် အလိုရှိ​တော်​မူ​ခဲ့​သနည်း။

ယေရှု မည်သူ​နှင့်​တူ​သနည်း။ ကိုယ်တော့်​ဆံပင်၊ ကိုယ်တော့် အသားအရေ၊ ကိုယ်တော့်​မျက်စိ​အရောင်​ကား​အဘယ်နည်း။ အရပ်​မည်မျှ​ရှည်​သနည်း။ ကိုယ်​အလေးချိန် မည်မျှ​ရှိ​သနည်း။ ရာစုနှစ်များ​တစ်လျှောက် ပန်းချီ​ဆရာ​တို့သည် ယေရှုကို ယုတ္တိတန်​ရာ​မှ မဖြစ်​နိုင်​သည့်​အထိ အမျိုးမျိုး​ပုံဖော်​ရေးဆွဲ​ကြ​၏။ အချို့​က ယောက်ျား​ပီသ​၍​တက်ကြွ​သူ​အဖြစ် သရုပ်ဖော်​ကြ​စဉ် အခြားသူ​တို့​က ကိုယ်တော်​ကို ချူချာ​၍ ဖြူဖပ်ဖြူရော်​ပုံစံ​ဖြင့် ရေးဆွဲ​ထား​တတ်ကြ​သည်။

^၂ သို့သော် သမ္မာကျမ်းစာ​က ယေရှု၏​ရုပ်ရည်​ရူပ​ကာ​ကို အဓိက​ဖော်ပြ​မထား​ချေ။ ယင်းအစား ထို​ထက်​သာ၍​အရေးပါသည့် ယေရှုသည် အဘယ်​ပုဂ္ဂိုလ်​အမျိုးအစား​ဖြစ်​ကြောင်းကို ဖော်ပြ​ရန် ယေဟောဝါ​အလိုတော်​ရှိ​တော်​မူ​ခဲ့​၏။ ခရစ်ဝင်​ကျမ်း​မှတ်တမ်းများ​သည် ယေရှု၏​မိန့်တော်မူချက်​များနှင့် လုပ်ဆောင်မှု​တို့ကို မှတ်တမ်းတင်​ရုံ​မ​က ကိုယ်တော်​၏​မိန့်မှာချက်​များနှင့် လုပ်ရပ်များ​နောက်ဝယ်​ရှိ နက်ရှိုင်း​သော​ခံစားချက်​နှင့် တွေးခေါ်ပုံ​တို့ကို​လည်း ဖော်ပြ​သည်။ ဤ​မှုတ်သွင်းခံ​မှတ်တမ်း​လေးစောင်​အားဖြင့် တမန်​တော်​ပေါလု​ရည်ညွှန်းခဲ့​သည့် “ခရစ်တော်​၏​စိတ်” ကို​ကျွန်ုပ်​တို့​စေ့စေ့​ကြည့်ရှု​စေနိုင်​သည်။ (၁ ကောရိန္သု ၂:၁၆) ယေရှု၏​တွေးခေါ်မှု​များ၊ ခံစားချက်​များနှင့် ဥပဓိရုပ်တော်​ကို ကျွန်ုပ်​တို့ သိဖို့​အရေးကြီး​သည်။ အဘယ်ကြောင့်​နည်း။ အနည်းဆုံး အကြောင်းရင်း​နှစ်ရပ်​ကြောင့်​ဖြစ်သည်။

၃။ ခရစ်တော်​၏​စိတ်​ကို​သိကျွမ်း​လာ​ခြင်း​က အဘယ်​ထိုးထွင်း​သိမြင်မှု​ကို​ရရှိ​စေနိုင်​သနည်း။

^၃ ဦးဆုံး​ကား၊ ခရစ်တော်​၏​စိတ်​သည် ယေဟောဝါ​၏​စိတ်သဘော တော်​ကို ကျွန်ုပ်​တို့အား တစေ့တစောင်း​သိရှိ​စေ​၏။ ယေရှုသည် မိမိ၏​ခမည်းတော်​နှင့် အလွန်​ရင်းနှီး​ကျွမ်းဝင်​ခဲ့​ရာ ကိုယ်တော်​က ဤသို့​မိန့်ဆို​နိုင်​ခဲ့​သည်– “သားတော်​ကား အဘယ်သူ​ဖြစ်သည်​ကို ခမည်းတော်​မှတစ်ပါး အဘယ်သူမျှ​မသိ။ ခမည်းတော်​ကား အဘယ်သူ​ဖြစ်​တော်​မူ​သည်ကို၊ သားတော်​နှင့် သားတော်​သည် လင်း​စေ​လို​သော​သူ​မှတစ်ပါး အဘယ်သူမျှ​မသိ။” (လုကာ ၁၀:၂၂) ယင်းကြောင့် ‘ယေဟောဝါ​အား​သိ​လိုလျှင် ငါ့ကို​ကြည့်​လော့’ ဟု ယေရှု​မိန့်တော်မူ​သကဲ့သို့ပင်​ဖြစ်သည်။ (ယောဟန် ၁၄:၉) သို့​ဖြစ်၍ ခရစ်ဝင်​ကျမ်း​များ​တွင်​ဖော်ပြ​ထား​သည့် ယေရှု၏​တွေးခေါ်ပုံ၊ ခံစား​ပုံ​တို့ကို ဖတ်ရှု​လေ့လာ​သည့်​အခါ ကျွန်ုပ်​တို့သည် ယေဟောဝါ​မည်သို့​တွေးခေါ်၊ ခံစား​ကြောင်းကို တစ်နည်း​အားဖြင့် သိရှိ​လာ​နေခြင်း​ဖြစ်သည်။ ထို​အသိပညာက ကျွန်ုပ်​တို့ကို ဘုရားသခင်​ထံ သာ၍​ချဉ်းကပ်​နိုင်​စေ​သည်။—ယာကုပ် ၄:၈။

၄။ ခရစ်တော်​ကဲ့သို့ ကျွန်ုပ်​တို့​အမှန်တကယ်​ကျင့်​လိုလျှင် ဦးဆုံး​အဘယ်အရာကို သင်ယူ​ကြ​ရမည်​နည်း၊ အဘယ်ကြောင့်​နည်း။

^၄ ဒုတိယ​အနေ​ဖြင့် ခရစ်တော်​၏​စိတ်​ကို ကျွန်ုပ်​တို့​သိလာ​ခြင်း​က “ခြေ . . . ရာ​ကို​လိုက်လျှောက်​စေ” ရန် ကျွန်ုပ်​တို့ကို​ကူညီပေး​သည်။ (၁ ပေတရု ၂:၂၁) ယေရှု​နောက်လိုက်ခြင်း​သည် ကိုယ်တော့်​မိန့်ဆိုချက်​များ​ကို လိုက်​ရွတ်​ခြင်း၊ ကိုယ်တော်​ပြုမူ​သကဲ့သို့ ပြုမူခြင်း​သက်​သက်​မဟုတ်​ချေ။ စကားပြော​ဆို​ပြုမူခြင်း​သည် အတွေးအခေါ်၊ ခံစားချက်​များ​၏​တိုက်တွန်းမှု​အရ​ဖြစ်ပေါ်​လာ​ရာ ခရစ်တော်​နောက်လိုက်ခြင်း​တွင် ကိုယ်တော်၌​ရှိသော “စိတ်သဘော” ကို​မွေးမြူဖို့​လို​ပေ​သည်။ (ဖိလိပ္ပိ ၂:၅) တစ်နည်း​အားဖြင့် ခရစ်တော်​ကဲ့သို့ ကျွန်ုပ်​တို့​အမှန်တကယ်​ကျင့်​လိုလျှင် မစုံလင်သူ​များ​အနေ​နှင့် ကျွန်ုပ်​တို့​အတတ်နိုင်ဆုံး​ကြိုးစား​ကြ​ရန် ကိုယ်တော်​နည်းတူ တွေးခေါ်​ခံစား​တတ်​ဖို့ ဦးဆုံး​သင်ယူ​ကြ​ရမည်။ သို့​ဖြစ်၍ ခရစ်ဝင်​ကျမ်း​ရေးသူ​တို့၏​အကူအညီ​ဖြင့် ခရစ်တော်​၏​စိတ်​ကို စေ့စေ့​ကြည့်ရှု​ကြပါစို့။ ယေရှု​တွေးခေါ်​ခံစား​ပုံ​ကို တိုက်တွန်း​သည့် အချက်အလက်​များ​ကို ကျွန်ုပ်​တို့​ဦးဆုံး​ဆွေးနွေး​ကြ​မည်။

ကိုယ်တော်​၏ လူသား​ဘဝ​မတိုင်မီ​အသက်တာ

၅၊ ၆။ (က) ကျွန်ုပ်​တို့၏​အပေါင်းအဖော်​များသည် ကျွန်ုပ်​တို့ကို မည်သို့​အကျိုး​သက်ရောက်​နိုင်​သနည်း။ (ခ) မြေကြီးပေါ်​သို့​မကြွလာမီ ဘုရားသခင့်​သားဦး​သည် အဘယ်​ပေါင်းဖော်မှု​ရှိခဲ့​သနည်း၊ ယင်းက ကိုယ်တော်​အပေါ် အဘယ်​အကျိုး​သက်ရောက်​ခဲ့​သနည်း။

^၅ ကျွန်ုပ်​တို့​နှင့်​ရင်းနှီးသော​အပေါင်းအဖော်​များသည် ကျွန်ုပ်​တို့၏​အတွေးအခေါ်၊ ခံစားချက်​များနှင့် အပြု​အမူ​အပေါ် အကောင်း သို့​မဟုတ် အဆိုး​ဘက်​သြဇာ​သက်ရောက်​လွှမ်းမိုး​နိုင်၏။ * (သု. ၁၃:၂၀) ကမ္ဘာ​မြေကြီးပေါ်​သို့​မကြွလာမီ ကောင်းကင်​၌ ယေရှု၏​ပေါင်းသင်း​ဆက်ဆံမှု​ကို သုံးသပ်ကြည့်​ပါ။ ယောဟန်​ခရစ်ဝင်​ကျမ်း​က “နှုတ် [မြွက်​တော်]” သို့​မဟုတ် ဘုရားသခင်​၏​ပြောရေးဆိုခွင့်​ရှိသူ​အဖြစ် ယေရှု၏​လူသား​ဘဝ​မတိုင်မီ​အသက်တာကို အာရုံစိုက်​စေ​သည်။ ယောဟန်​က ဤသို့​ဆို​သည်– “အစအဦး​၌​နှုတ် [မြွက်​တော်] ရှိ၏။ နှုတ် [မြွက်​တော်] သည်​ဘုရားသခင်​နှင့်အတူ​ရှိ၏။ နှုတ် [မြွက်​တော်] သည်လည်း ဘုရားသခင်​ဖြစ်​တော်​မူ​၏။ ထို​နှုတ် [မြွက်​တော်] သည် အစအဦး​၌​ဘုရားသခင်​နှင့်အတူ​ရှိ၏။” (ယောဟန် ၁:၁၊ ၂) ယေဟောဝါ​သည် အစ​မရှိသော​ကြောင့် နှုတ်မြွက်တော်​သည် ဘုရားသခင်​နှင့်အတူ “အစအဦး​၌” ရှိ​ခြင်း​က ဘုရားသခင်​၏​ဖန်ဆင်း​ခြင်း​လုပ်ငန်းများ အစပြုချိန်​ကို ရည်ညွှန်း​နေခြင်း​ဖြစ်​မည်။ (ဆာလံ ၉၀:၂) ယေရှုသည် “ဝေနေယျ​သတ္တဝါ​အပေါင်းတို့တွင်​လည်း သားဦး​ဖြစ်​တော်​မူ​၏။” သို့​ဖြစ်၍ အခြား​နာမ်ဝိညာဉ်​သတ္တဝါများ​နှင့် မျက်မြင်ရ​လောကဓာတ်​တို့ကို မဖန်ဆင်းမီ ကိုယ်တော်​တည်ရှိ​ခဲ့​မည်​ဖြစ်သည်။—ကောလောသဲ ၁:၁၅; ဗျာဒိတ် ၃:၁၄။

^၆ သိပ္ပံ​ပညာ​ခန့်မှန်းချက်​အချို့​အရ မျက်မြင်ရ​လောကဓာတ်​တည်ရှိ​နေသည်​မှာ အနည်းဆုံး​နှစ်ပေါင်း ၁၂ ဘီလီယံ​ကြာမြင့်​ပြီ​ဖြစ်သည်။ ဤ​ခန့်မှန်းချက်​များ​သာ မှန်​မည်​ဆိုလျှင် အာဒံ​ကို​မဖန်ဆင်းမီ အဆုံးမဲ့​ကာလ​ကတည်းက ဘုရားသခင့်​သားဦး​သည် မိမိ၏​ခမည်းတော်​နှင့်အတူ ရင်းနှီးသော​ပေါင်းသင်း​ဆက်ဆံမှု​ရှိခဲ့​နှင့်​ပြီး​ဖြစ်သည်။ (မိက္ခာ ၅:၂ နှိုင်းယှဉ်။) သို့​ဖြစ်၍ သူတို့​နှစ်ပါး​ကြား​တွင် ချစ်ခင်​ကြင်နာ​တွယ်တာ​သည့်​သံယောဇဉ်​နှောင်ကြိုး ရ​စ်​ဖွဲ့​လျက်​ရှိသည်။ ဉာဏ်ပညာ​ပြယုဂ်​အဖြစ် လူသား​ဘဝ​မတိုင်မီ​အသက်တာ​၌ ထို​သားဦး​သည် ဤသို့​မိန့်ဆို​ကြောင်း​ဖော်ပြ​သည်– “ငါသည် . . . [ယေဟောဝါ] အထံတော်ပါး​တွင်​နေ၍၊ အစဉ်မပြတ်​မွေ့လျော်​တော်​မူ . . . ၏။” (သု. ၈:၃၀) မေတ္တာ​၏​ပင်ရင်း​နှင့်အတူ မရေမတွက်​နိုင်သော​ခေတ်​ကာလ​များ​တစ်လျှောက် ရင်းနှီး​စွာ​ပေါင်းဖော်​ခဲ့​ခြင်း​က ဘုရားသခင့်​သားတော်​အပေါ် အတိုင်း​ထက်​အလွန် အမှန်ပင်​အကျိုး​သက်ရောက်​ခဲ့​သည်​မှာ​မုချ​ပင်! (၁ ယောဟန် ၄:၈) ဤ​သားတော်​သည် မည်သူမျှ​မတတ်နိုင်​သည့်​အတိုင်းအတာ​ဖြင့် ခမည်းတော်​၏​တွေးခေါ်မှု၊ ခံစားချက်​များနှင့် နည်းလမ်းတော်​များ​ကို သိကျွမ်း​လာ​ကာ ရောင်ပြန်ဟပ်​လေ​သည်။—မဿဲ ၁၁:၂၇။

မြေကြီးပေါ်​အသက်တာ​နှင့် ဩဇာ​လွှမ်းမိုးမှု​များ

၇။ ကမ္ဘာ​မြေကြီးပေါ်​သို့ ဘုရားသခင်​၏​သားဦး​ကြွလာ​ရသည့် အကြောင်း​တစ်​ကြောင်း​ကား​အဘယ်နည်း။

^၇ ယေဟောဝါ​၏​ရည်ရွယ်တော်မူချက်​မှာ မိမိ၏​သားတော်​အား ‘ကျွန်ုပ်​တို့​ခံရ​သော ဆင်းရဲ​ဝေဒနာ​များ​ကို စာနာ​ထောက်ထား’ နိုင်​သည့် ကြင်နာ​သော​ယဇ်ပုရောဟိတ်မင်း​ဖြစ်စေ​လို​သောကြောင့် ဘုရားသခင့်​သားတော်​သည် ထပ်ဆင့်​သင်ယူစရာ​ရှိ၏။ (ဟေဗြဲ ၄:၁၅) လူသား​အဖြစ် ကမ္ဘာ​မြေကြီးပေါ်​သို့ သားတော်​ကြွလာ​ရသည့်​အကြောင်း​တစ်​ကြောင်း​မှာ ဤ​အခန်းကဏ္ဍ​၏​အရည်အချင်းများ​ကို ပြည့်မီ​ရန်​အတွက်​ဖြစ်သည်။ ယေရှုသည် ယခင်​က ကောင်းကင်​မှ တွေ့မြင်​ခဲ့​ရုံ​ဖြစ်သည့် အခြေအနေ​များနှင့် ဩဇာ​ညောင်း​မှုများ​ကို ဤ​ကမ္ဘာ​ပေါ်​တွင် အသွေးအသား​လူသား​တစ်ဦး​အဖြစ် ခံစား​ခဲ့​ရသည်။ ယခု ကိုယ်တော်​သည် လူ့​ခံစားချက်​များနှင့် စိတ်​လှုပ်ရှားမှုများ​ကို ကိုယ်တွေ့​ခံစား​နိုင်​လေ​ပြီ။ တစ်ခါ တစ်ရံ မောပန်း​ခြင်း၊ ရေငတ်​ခြင်း၊ ဆာလောင်​ခြင်း​တို့ကို​ခံစားရ​သည်။ (မဿဲ ၄:၂; ယောဟန် ၄:၆၊ ၇) ထို​ထက်မက အခက်အခဲ ဆင်းရဲခြင်း​ဝေဒနာ​အမျိုးမျိုးကို ကိုယ်တော်​ခံ​ခဲ့​ရ၏။ သို့​နှင့် “နားထောင်ခြင်း​အကျိုးအကြောင်းကို သင်” ယူ​ခဲ့​ပြီး မိမိ၏​ယဇ်ပုရောဟိတ်မင်း​အခန်းကဏ္ဍ​အတွက် အရည်အချင်း​ပြည့်မီ​ခဲ့​လေ​သည်။—ဟေဗြဲ ၅:၈-၁၀။

၈။ မြေကြီးပေါ် ယေရှု၏​အစောပိုင်း​အသက်တာ​အကြောင်း ကျွန်ုပ်​တို့​အဘယ်အရာကို​သိရှိ​ကြ​ရသနည်း။

^၈ ယေရှု၏​မြေကြီးပေါ် အစောပိုင်း​အသက်တာ​အတွင်း ကိုယ်တော့်​တွေ့ကြုံမှု​များ​ကား အဘယ်နည်း။ ကိုယ်တော်​၏​ကလေး​ဘဝ​မှတ်တမ်းမှာ အလွန်​တိုတုတ်​သည်။ အမှန်​မှာ မဿဲ​နှင့် လုကာ​သာ​လျှင် ကိုယ်တော်​မွေးဖွား​လာ​ခြင်း​အကျိုးအကြောင်း​များ​ကို ဖော်ပြ​သည်။ ယေရှုသည် မြေကြီးပေါ်​သို့​ကြွ​မလာ​မီ ကောင်းကင်​၌​အသက်ရှင်ခဲ့​ကြောင်းကို ခရစ်ဝင်​ကျမ်း​ရေးသူ​တို့​က သိထား​ခဲ့​ကြသည်။ အခြား​မည်သည့်​အရာ​ထက်​မဆို လူသား​ဘဝ​မတိုင်မီ ထို​အသက်တာ​က ကိုယ်တော်​သည် မည်သို့သော​ပုဂ္ဂိုလ်​အမျိုးအစား​ဖြစ်လာ​ခြင်း​ကို ဖြေရှင်း​ပေး​သည်။ သို့​တ​စေ ယေရှုသည် လူ​စင်စစ်​ဖြစ်​တော်​မူ​၏။ ကိုယ်တော်​သည် စုံလင်​သော်လည်း နို့စို့​သူငယ်​ဘဝ​မှ ကလေး​ဘဝ၊ ၎င်း​မှ​တစ်ဆင့် မြီး​ကောင်​ပေါက်​အရွယ်​မှ​သည် လူကြီး​အဖြစ်သို့ ကြီးပြင်း​လာ​ရပြီး တစ်ချိန်​လုံး​ပညာ​သင်ယူ​ခဲ့​ရသည်။ (လုကာ ၂:၅၁၊ ၅၂) သမ္မာကျမ်းစာ​က ယေရှု​အပေါ်​အမှန်ပင်​အကျိုး​သက်ရောက်​မည့် ကိုယ်တော်​၏​အစောပိုင်း​အသက်တာ​အကြောင်း အချို့​တစ်ဝက်​ကို ဖော်ပြ​ပါ​သည်။

၉။ (က) ယေရှုသည် ဆင်းရဲသော​မိသားစု​တစ်စု​အတွင်း ဖွားမြင်​ခဲ့​ကြောင်း အဘယ်အရာက​ဖော်ပြ​သနည်း။ (ခ) အဘယ်​အခြေအနေ​မျိုး​၌ ယေရှု​ကြီးပြင်း​လာ​ဖွယ်​ရှိ​သနည်း။

^၉ ယေရှုသည် ဆင်းရဲသော​မိသားစု​တစ်စု​အတွင်း မွေးဖွား​ခဲ့​သည်​မှာ ထင်ရှား​၏။ ကိုယ်တော်​ဖွားမြင်​ပြီး​နောက်​ရက် ၄၀ အကြာတွင် ဗိမာန်တော်၌ ယောသပ်​နှင့်​မာရိ​တို့​ပူဇော်​ခဲ့​သော​ယဇ်​အားဖြင့် သိရှိ​ရသည်။ မီးရှို့​ရာ​ယဇ်​အဖြစ် သိုးသငယ်​တစ်ကောင်​နှင့် အပြစ်ဖြေရာ​ယဇ်​အဖြစ်​ခို သို့​မဟုတ် ချိုး​တစ်ကောင်​ကို ယူဆောင်​လာ​မည့်​အစား သူတို့သည် ‘ခို​နှစ်ကောင်​ဖြစ်စေ၊ ချိုးကလေး​နှစ်ကောင်​ဖြစ်စေ၊ တစ်ခုခု​ကို ယဇ်​ပူဇော်​ကြ​၏။’ (လုကာ ၂:၂၄) မောရှေ၏​ပညတ်​အရ ဤ​ယဇ်​ပူဇော်​သကာ​မှာ ဆင်းရဲသားတို့​အတွက် စီစဉ်​ထားခြင်း​ဖြစ်သည်။ (ဝတ်ပြုရာ ၁၂:၆-၈) အတန်​ကြာသော် ဤ​ဆင်းရဲသော​မိသားစု​သည် လူဦးရေ​များ​လာ​ခဲ့​သည်။ ယေရှု၏​အံ့ဖွယ်​ဖွားမြင်ခြင်း​ပြီး​နောက် ယောသပ်​နှင့် မာရိ​တို့​၌ သဘာဝ​အတိုင်း​မွေး​သော​သားသမီး အနည်းဆုံး​ခြောက်​ဦး​ထွန်းကား​ခဲ့​သည်။ (မဿဲ ၁၃:၅၅၊ ၅၆) သို့​နှင့် ယေရှုသည် မိသားစုကြီး​တစ်ခု​တွင် တော်သင့်ရုံ​အခြေအနေ​၌ ကြီးပြင်း​လာ​ခဲ့​ဖွယ်​ရှိသည်။

၁၀။ မာရိနှင့်​ယောသပ်တို့သည် ဘုရားသခင်​ကို​ကြောက်ရွံ့​ရိုသေ​သူများ​ဖြစ်​ကြောင်း အဘယ်အရာက​တင်ပြ​သနည်း။

^၁၀ ယေရှုသည် မိမိကို​ချစ်ခင်​သည့် ဘုရားသခင်​ကို​ကြောက်ရွံ့​သော​မိဘများ​၏ မွေးမြူခြင်း​ကို​ခံ​ခဲ့​ရ၏။ ကိုယ်တော်​၏​မိခင် မာရိသည် ထူးခြားသော​အမျိုးသမီး​တစ်ဦး​ဖြစ်သည်။ ကောင်းကင်တမန်​ဂါဗြေလ​က သူ့ကို​နှုတ်ဆက်​သောအခါ ဤသို့​ဆို​ခဲ့​ကြောင်း သတိရပါ– “ကျေးဇူးတော်​ကို​ခံရ​သော​မိန်းမ၊ သင့်​အား​မင်္ဂလာ​ဖြစ်စေ​သတည်း။ ထာဝရ​ဘုရား​သည် သင်​နှင့်အတူ​ရှိ​တော်​မူ​၏။” (လုကာ ၁:၂၈) ယောသပ်​သည်လည်း ဘုရားသခင်​ကို​ကြည်ညို​လေးမြတ်သူ​ဖြစ်သည်။ ပသခါပွဲ​အတွက် ယေရုရှလင်​မြို့​သို့​မိုင် ၉၀ ခရီး​ကို နှစ်စဉ်​မှန်မှန်​သွားခဲ့သည်။ အမျိုးသားများ​ကို​သာ ထိုသို့​ပြု​ရန်​တောင်းဆို​ထား​သော်လည်း မာရိပါ​တက်ရောက်​ခဲ့​သည်။ (ထွက်မြောက်ရာ ၂၃:၁၇; လုကာ ၂:၄၁) ထိုသို့​သော​အချိန်​တစ်ချိန်​တွင် ယောသပ်​နှင့်​မာရိ​တို့သည် စေ့စေ့စပ်စပ်​ရှာဖွေပြီး​နောက်​မှ ၁၂ နှစ်အရွယ် ယေရှုကို ဗိမာန်တော်​ရှိ​ဆရာများ​အလယ်တွင် ရှာတွေ့ခဲ့​သည်။ စိတ်ပူ​ပန်​နေကြ​သော​မိဘများ​ကို ယေရှု​က ဤသို့​မိန့်တော်မူ​ခဲ့​သည်– “အကျွန်ုပ်သည် အဘ​၏​အိမ်​၌​နေရ​သည်ကို မသိ​ပါသလော။” (လုကာ ၂:၄၉) “အဘ” ဟူသော​စကား​သည် ငယ်ရွယ်​သော​ယေရှု​အတွက် နွေးထွေး​၍ အပြုသဘော​ပါ​သော​အဓိပ္ပာယ်ဆောင်​ခဲ့​ပေမည်။ တစ်ချက်​အနေ​ဖြင့် သူ၏​ဖခင်​အရင်း​သည် ယေဟောဝါ​ဖြစ်​ကြောင်း သူ့​အား​ပြောပြ​ထား​ကြောင်း​ထင်ရှား​သည်။ ထို့​အပြင် ယောသပ်​သည် ယေရှု၏​မွေးစား​ဖခင်ကောင်း​တစ်ဦး​ဖြစ်​ခဲ့​ပေမည်။ ယေဟောဝါ​သည် မိမိ​ချစ်​မြတ်နိုးသော​သားကို မွေးမြူ​ကြည့်ရှု​ပေး​ရန် ကြမ်းတမ်း​ခက်ထန်​သူ​တစ်ဦး​ကို အမှန်ပင်​ရွေးချယ်​ခဲ့​လိမ့်​မည်​မဟုတ်!

၁၁။ အဘယ်​အတတ်ပညာ​ကို ယေရှု​သင်ယူ​ခဲ့​သနည်း၊ ကျမ်းစာ​ခေတ်​က ဤ​အတတ်ပညာ​ဖြင့်​အသက်မွေး​ရာ​၌ အဘယ်အရာ​ပါဝင်​သနည်း။

^၁၁ ယေရှုသည် နာဇရက်​၌​နေထိုင်​သည့်​နှစ်များ​အတွင်း မွေးစား​ဖခင်​ယောသပ်​ထံ​မှ လက်သမား​အတတ်ကို တတ်လာ​ခဲ့​ပုံ​ရှိ၏။ ယေရှုသည် ထို​အတတ်ကို ပိုင်နိုင်​စွာ​တတ်မြောက်​သဖြင့် ကိုယ်တော်တိုင်​ပင် ‘လက် သ​မား​ဆရာ’ ဟု​ခေါ်ဆို​ခံ​ခဲ့​ရ၏။ (မာကု ၆:၃) ကျမ်းစာ​ခေတ်​က လက်သမား​များသည် အိမ်များ​ဆောက်လုပ်​ခြင်း၊ ပရိဘောဂ​များ (စားပွဲ​များ၊ ခွေး​ခြေ​များ၊ ခုံတန်း​ရှည်​များ​အပါအဝင်) ပြုလုပ်ခြင်း၊ လယ်ယာ​သုံး​ကိရိယာ​တန်ဆာ​များ ပြုလုပ်ခြင်း​ကို လုပ်ဆောင်ခဲ့​ကြ​၏။ စီ.အီး. ဒုတိယ​ရာစုနှစ်​မှ ဂျတ်စ်​တင်​မာ​တာ​သည် သူ၏ ထ​ရိုင်​ဖို​နှင့်​အပြန်အလှန်​ပြောဆိုခြင်း​၌ ယေရှု​နှင့်​ပတ်သက်​၍ ဤသို့​ရေးသားခဲ့​သည်– “သူသည် လူ​တို့​အကြား​တွင် ထ​ယ်​များ၊ ထမ်းပိုး​များ​ကို​ပြုလုပ်​သည့် လက်သမား​တစ်ဦး​ဖြစ်​ခဲ့​၏။” ရှေးခေတ်​လက်သမား​တစ်ဦး​သည် သစ်သား မဝယ်​နိုင်​ခြင်း​ကြောင့် ထို​လုပ်ငန်း​သည် မလွယ်ကူ​လှ​ပေ။ ဖြစ်​နိုင်​ဖွယ်​ရှိသည်​မှာ သူကိုယ်တိုင်​သစ်ပင်​တစ်ပင်​ကို သွား​ရွေးချယ်​၍ ပုဆိန်​ဖြင့်​ခုတ်လှဲ​ပြီး အိမ်​အရောက်​ပြန်​သယ်လာ​ရခြင်း​ဖြစ်သည်။ သို့​ဖြစ်၍ ယေရှုသည် အသက်မွေး​ဝမ်း​ကြောင်း​ပြုခြင်း၊ ဖောက်သည်​များနှင့်​ဆက်ဆံ​ရခြင်း​နှင့် နပ်​မှန်​အောင်​စား​ရဖို့​အတွက်​စိန်ခေါ်ချက်​များ​ကို သိထား​ပေမည်။

၁၂။ ယေရှု​မသေမီ ယောသပ်​သေဆုံး​ခဲ့​ပုံ​ရှိကြောင်း အဘယ်အရာက​ညွှန်ပြ​သနည်း၊ ယင်းက ယေရှု​အတွက် အဘယ်​အဓိပ္ပာယ်​ရှိ​သနည်း။

^၁၂ အကြီးဆုံးသား​အနေ​ဖြင့် ယေရှုသည် အထူးသဖြင့် မိမိ​မသေမီ ယောသပ်​သေဆုံး​သွား​ပုံ​ရှိ​ခြင်း​ကြောင့် မိသားစု​စား​ဝတ်​နေ​ရေး​အတွက် ဝိုင်းဝန်း​ကူညီပေး​နိုင်​ဖွယ်​ရှိသည်။ * ၁၉၀၀ ပြည့်နှစ်၊ ဇန်နဝါရီ ၁ ရက်ထုတ် ဇိအုန်​ကင်းမျှော်စင်​က ဤသို့​ဆို​သည်– “ယောသပ်​သည် ယေရှု​ငယ်ရွယ်စဉ်​၌​ပင် သေဆုံး​သွား​ကြောင်း ထုံးတမ်း​စဉ်​လာ​က​ဖော်ပြ​ပြီး ကိုယ်တော်​သည် လက်သမား​လုပ်ငန်း​ကို ဆက်လုပ်​ကိုင်​ကာ မိသားစုကို​ထောက်ပံ့​ပေး​ခဲ့​၏။ ယေရှုကို လက်သမား​တစ်ဦး​ဟု​ခေါ်ဆို​ထား​ကာ ကိုယ်တော့်​မိခင်​နှင့် ညီ​များ​ကို​ဖော်ပြ​ထား​သော်လည်း ယောသပ်​အကြောင်း​မပါ​သည့် ကျမ်း​ဆိုင်ရာ​အထောက်အထား​က ယင်းကို​ထောက်ခံ​၏။ (မာကု ၆:၃) . . . ထို့​ကြောင့် [လုကာ ၂:၄၁-၄၉ တွင်​မှတ်တမ်း​တင်ထားသော] အဖြစ်အပျက်​မှ​စ၍ ကိုယ်တော်​၏​နှစ်ခြင်း​ခံ​ချိန်​အထိ​ဖြစ်သည့် ကျွန်ုပ်​တို့​သခင်၏​ဆယ့်ရှစ်​နှစ်​တာ​ကာလရှည်​အတွင်း သာမန်​ဝတ္တရား​များ​ကို ကိုယ်တော်​ဆောင်ရွက်​ခဲ့​ကြောင်း အတော်ပင်​ဖြစ်ဖွယ်​ရှိသည်။” မာရိနှင့် ယေရှု​အပါအဝင် သူ၏​သားသမီး​များသည် ချစ်​မြတ်နိုး​ရသော​ခင်ပွန်း​နှင့် ဖခင်​ဆုံးပါး​သွားခြင်း​၏​ကြေကွဲမှု​ကို သိရှိ​ခဲ့​ပေမည်။

၁၃။ မိမိ၏​ဓမ္မ​အမှုကို ယေရှု​စတင်​ဆောင်ရွက်​ချိန်​တွင် အခြား​အဘယ်သူ​၌​မျှ​မရှိ​နိုင်​သည့် အသိပညာ၊ ထိုးထွင်း​သိမြင်မှု​နှင့် နက်ရှိုင်း​သော​ခံစားချက်​တို့ ကိုယ်တော်၌​အဘယ်ကြောင့်​ရှိ​သနည်း။

^၁၃ ယေရှုသည် သက်သောင့်သက်သာ​ဘဝ​ထဲ​တွင် မွေးဖွား​လာ​ခဲ့​ခြင်း​မဟုတ်​သည်​မှာ ထင်ရှား​ပါ​၏။ ယင်းအစား သာမန်​လူတို့၏​ဘဝကို ကိုယ်တော်​တွေ့ကြုံ​ခံစား​ခဲ့​ရသည်။ ထို့နောက် စီ.အီး. ၂၉ တွင် ယေရှုကို​စောင့်စား​လျက်​ရှိသည့် ဘုရားသခင်​ပေး​အပ်သော​တာဝန်​ကို ကိုယ်တော်​ထမ်းဆောင်​ရန်​အချိန်​ကျရောက်​လာ​ခဲ့​သည်။ ထို​နှစ်​၏​ဆောင်းဦး​ချိန်​တွင် ကိုယ်တော်​သည် ရေ​တွင်​နှစ်ခြင်း​ယူ​ခဲ့​ပြီး ဘုရားသခင်​၏​ဝိညာဉ်​ရေးသား​အဖြစ် ဖွား​တော်​မူ​ခြင်း​ခံရ​၏။ ထို​အခါ ‘ကိုယ်တော့်​ရှေ့ ကောင်းကင်​ဖွင့်လှစ်​သဖြင့်’ ယခင်​က ကိုယ်တော်၌​ရှိခဲ့​သော တွေးခေါ်ပုံ​နှင့် ခံစားချက်​များ​အပါအဝင် လူ့​ဘဝ​မတိုင်မီ​ကောင်းကင်​အသက်တာကို ယခု ပြန်လည်​အမှတ်ရခြင်း​ကို​တင်ပြ​ပုံ​ရှိသည်။ (လုကာ ၃:၂၁၊ ၂၂) သို့​နှင့် ဓမ္မ​အမှုကို​ယေရှု​စတင်ချိန်​တွင် အခြား​အဘယ်​လူသား​တစ်ဦး​၌​မျှ​မရှိ​နိုင်​သည့် အသိပညာ၊ ထိုးထွင်း​သိမြင်မှု​နှင့် နက်ရှိုင်း​သော​ခံစားချက်​တို့သည် ကိုယ်တော်၌​ရှိခဲ့​မည်​ဖြစ်သည်။ အကြောင်းကောင်း​ရှိ၍ ခရစ်ဝင်​ကျမ်း​ရေးသူ​တို့သည် သူတို့၏​အရေးအသား​အများအပြားကို ယေရှု၏​ဓမ္မ​အမှု​အတွင်း​ဖြစ်ရပ်​များ​ကို အထူး​အလေးပေး​ဖော်ပြ​ကြ​ခြင်း​ဖြစ်၏။ သူတို့သည် ကိုယ်တော်​မိန့်တော်မူ​သမျှ​နှင့် ပြုလုပ်​တော်​မူသမျှ​ကို​ပင် အကုန်အစင်​မှတ်တမ်း​မတင်​နိုင်​ခဲ့​ကြသည်​မှာ မှန်ပါသည်။ (ယောဟန် ၂၁:၂၅) သို့သော် သူတို့​မှတ်တမ်းတင်​ရန် မှုတ်သွင်းခံ​ရသည့်​အကြောင်းအရာက အသက်ရှင်ခဲ့သမျှ​တွင် အကြီးမြတ်ဆုံး​လူသား​၏​စိတ်တော်​ကို ကျွန်ုပ်​တို့အား စေ့စေ့​ကြည့်ရှု​နိုင်​စေ​သည်။

ပုဂ္ဂိုလ်​တစ်ဦး​အနေ​ဖြင့် ယေရှု အဘယ်​လူစားမျိုး​ဖြစ်

၁၄။ ယေရှုသည် နွေးထွေး​ကြင်နာ​၍ ခံစားချက်​အပြည့်​ရှိသူ​တစ်ဦး​အဖြစ် ခရစ်ဝင်​ကျမ်း​များ​က မည်သို့​သရုပ်ဖော်​သနည်း။

^၁၄ ခရစ်ဝင်​ကျမ်း​မှ​သိရှိ​ရသော ယေရှု၏​ဥပဓိရုပ်​မှာ နွေးထွေး​ကြင်နာ​၍ ခံစားချက်​အပြည့်​ရှိသူ​တစ်ဦး​ဖြစ်သည်။ ကိုယ်တော်​သည် စိတ်​လှုပ်ရှားမှု​ဆိုင်ရာ​တုံ့ပြန်မှု​အမျိုးမျိုးကို ပြသ​ခဲ့​၏– နူနာ​စွဲ​သူ​တစ်ဦး​ကို သနားခြင်း (မာကု ၁:၄၀၊ ၄၁); တုံ့ပြန်မှု​မရှိသူ​တို့အတွက် ဝမ်းနည်း​ကြေကွဲ​ခြင်း (လုကာ ၁၉:၄၁၊ ၄၂); လောဘ​ကြီး​သည့် ငွေ​လဲလှယ်​သူများကို လျော်​ကန်​စွာ​အမျက်​ဒေါသ​ထွက်​ခြင်း​တို့​ဖြစ်၏ (ယောဟန် ၂:၁၃-၁၇)။ ယေရှုသည် ဝေမျှ​ခံစား​တတ်​သူ​ဖြစ်​ရာ မျက်ရည်ကျ​သည်​အထိ စိတ်​လှုပ်ရှား​ခဲ့​ပြီး မိမိ၏​စိတ်ထိခိုက်မှု​ကို ဖုံးကွယ်​မထား​ချေ။ သူ၏​ချစ်​မိတ် ဆွေ လာဇရု​သေဆုံး​သွားသော​အခါ လာဇရု​၏​အစ်မ​မာရိ​ငိုကြွေးခြင်း​ကို ယေရှု​တွေ့မြင်​ပြီး အလွန်​စိတ်ထိခိုက်​ခဲ့​သဖြင့် လူအများရှေ့​တွင် ကိုယ်တော်​မျက်ရည်ကျ​တော်​မူ​ခဲ့​၏။—ယောဟန် ၁၁:၃၂-၃၆။

၁၅။ ယေရှု အခြား​သူတို့ကို​ရှုမြင်​ဆက်ဆံပုံ​တွင် ကိုယ်တော်​၏​သနား​ကြင်နာ​တတ်သော​ခံစားချက် မည်သို့​ထင်ရှား​သနည်း။

^၁၅ အထူးသဖြင့် ယေရှု အခြား​သူတို့ကို​ရှုမြင်​ဆက်ဆံပုံ​တွင် ကိုယ်တော်​၏​သနား​ကြင်နာ​တတ်သော​ခံစားချက်​ထင်ရှား​၏။ ကိုယ်တော်​သည် ဆင်းရဲ​၍ ဖိနှိပ်ခံ​ရသူ​တို့ ‘စိတ်နှလုံး​သက်သာခြင်း​ရှိ’ စေရန် ကိုယ်တိုင်​အစပြု​ကူညီပေး​သည်။ (မဿဲ ၁၁:၄၊ ၅၊ ၂၈-၃၀) ကိုယ်တော်​သည် သူ၏​ဝတ်လုံကို​တိတ်တဆိတ်​တို့​ထိ​ခဲ့​သည့် သွေးသွန်နာ​စွဲ​သော​အမျိုးသမီး​တစ်ဦး​ကို​ဖြစ်စေ၊ တိတ်ဆိတ်​စွာ​မနေ​ဘဲ ဟစ်ကြော်​ခဲ့​သည့် မျက်​ကန်း​သူတောင်းစား​ကို​ပင်​ဖြစ်စေ ဝေဒနာ​ခံစား​ရသူ​တို့ လိုအပ်သော​အကူအညီကို​ပေး​ရန် ကိုယ်တော်​အလုပ်​မများ​လွန်း​ပေ။ (မဿဲ ၉:၂၀-၂၂; မာကု ၁၀:၄၆-၅၂) ယေရှုသည် အခြားသူ​တို့​၌ အကောင်း​ကို​ရှာကြည့်​၍ သူတို့အား​ချီးမွမ်း​တော်​မူ​သည်; သို့​တိုင် လိုအပ်​သည့်​အခါ ပြစ်တင်​ဆုံးမ​ပေး​ရန်​လည်း နှောင့်နှေးခြင်း​မရှိ​ချေ။ (မဿဲ ၁၆:၂၃; ယောဟန် ၁:၄၇; ၈:၄၄) အမျိုးသမီးများ​အနေ​နှင့် အခွင့်အရေး​များစွာ​မရရှိ​သည့်​ခေတ်တွင် ယေရှု​က သူတို့ကို သင့်လျော်​စွာ​ဂုဏ်​တင်၍ လေးစားမှု​နှင့် ဆက်ဆံ​ခဲ့​သည်။ (ယောဟန် ၄:၉၊ ၂၇) ထို့​ကြောင့် အမျိုးသမီး​တစ်စု​သည် စိတ်လို​ကိုယ်​လျောက် ကိုယ်တော်​အား​လုပ်ကျွေး​ခဲ့​ခြင်း​မှာ အံ့ဩစရာ​မဟုတ်ပေ။—လုကာ ၈:၃။

၁၆။ ယေရှုသည် ဘဝ​နှင့် ရုပ်ပစ္စည်း​များ​အပေါ် မျှတသော​အမြင်​ရှိကြောင်း အဘယ်အရာက​ဖော်ပြ​သနည်း။

^၁၆ ယေရှု​၌ ဘဝ​အပေါ် မျှတသော​အမြင်​ရှိသည်။ ရုပ်ပစ္စည်း​များ​မှာ ကိုယ်တော်​အတွက် အဓိက​အရေးပါသည့်​အရာ​မဟုတ်​ချေ။ ကိုယ်တော့်​မှာ​ပစ္စည်း​အနည်းငယ်​သာ ရှိ​ပုံ​ရ၏။ မိမိ​၌ “ခေါင်းချ​ရာ​မျှ​မရှိ” ဟု မိန့်တော်မူ​ခဲ့​သည်။ (မဿဲ ၈:၂၀) တစ်ကြိမ်​တည်း​တွင် ကိုယ်တော်​သည် အခြား​သူတို့၏​ပျော်ရွှင်မှု​ကို ဖြည့်ဆည်း​ပေး​ခဲ့​သည်။ မင်္ဂလာ​ဧည့်ခံပွဲ—တေးဂီတ၊ သီချင်းဆို​ခြင်း​နှင့် ပျော်ရွှင်မှု​အမှန်​ရှိ​မည့်​အချိန်—တစ်ခု​ကို ကိုယ်တော်​တက်ရောက်​သောအခါ အဆိုပါ​အခါသမယ​ကို ထိန်းချုပ်​ရန် ကိုယ်တော်​သွားခဲ့​ခြင်း​မဟုတ်​သည်​မှာ ထင်ရှား​ပါ​သည်။ အမှန်​မှာ ယေရှုသည် သူ၏​ပထမဦးဆုံး​အံ့ဖွယ်​အမှုကို ထို​နေရာ၌​ပြုလုပ်​ခဲ့​၏။ စပျစ်​ရည်​ကုန်​သွား​သည့်​အခါ “လူ​တို့ကို​ရွှင်လန်း​စေ” သည့်​ဖျော်ရည်၊ ကောင်းမွန်သော​စပျစ်​ရည်​ကို ရေ​မှ​ဖြစ်စေ​ခဲ့​သည်။ (ဆာလံ ၁၀၄:၁၅; ယောဟန် ၂:၁-၁၁) သို့​နှင့် ပျော်ပွဲရွှင်ပွဲ​ကို​ဆက်​နိုင်​ကြ​ပြီး သတို့သမီး​နှင့် သတို့သား​တို့သည် အမှန်ပင်​မျက်နှာ​မပျက်​ခဲ့​ကြ​ရ​ချေ။ ယေရှုသည် မိမိ၏​ဓမ္မ​အမှုကို ကြာမြင့်စွာ​ကြိုးစားပမ်းစား​ဆောင်ရွက်​ခဲ့​သည့်​သမယ​အကြောင်း ဖော်ပြ​ထားခြင်း​က ပို​များ​သည့်​အတွက် ကိုယ်တော်​၏​မျှတသော​သဘော ထပ်၍​ထပ်​ဟပ်​သည်။—ယောဟန် ၄:၃၄။

၁၇။ ယေရှုသည် ကျွမ်းကျင်​ပိုင်နိုင်​သော ဆရာ​တစ်ပါး​ဖြစ်သည်​ကို အဘယ်ကြောင့်​အံ့သြစရာ​မဟုတ်​သနည်း၊ ကိုယ်တော်​၏​သွန်သင်ချက်​များ​က အဘယ်အရာကို​ဖော်ပြ​သနည်း။

^၁၇ ယေရှုသည် ကျွမ်းကျင်​ပိုင်နိုင်​သော ဆရာ​တစ်ပါး​ဖြစ်၏။ ကိုယ်တော်​၏​သွန်သင်ချက်​အများစု​တွင် ကိုယ်တော်​အကျွမ်းတဝင်​ရှိသော နေ့စဉ်​အသက်တာ​၏​ဖြစ်ရပ်မှန်များ ပေါ်လွင်​ထင်ရှား​သည်။ (မဿဲ ၁၃:၃၃; လုကာ ၁၅:၈) ကိုယ်တော်​၏​သွန်သင်ပုံ​သွန်သင်နည်း​မှာ ပြိုင်ဘက်​ကင်း​သည်—အမြဲ​ပင် ရိုးရှင်း၍ လက်တွေ့ကျ​၏။ ထို​ထက်​ထူးခြား​သည်​မှာ ကိုယ်တော်​သွန်သင်ပေး​သည့်​အရာ​ဖြစ်သည်။ ကိုယ်တော်​၏​သွန်သင်ချက်​များ​ကို နားထောင်သူ​တို့သည် ယေဟောဝါ​၏​တွေးတော​ဆင်ခြင်မှု​များ၊ ခံစားချက်​များနှင့် နည်းလမ်းတော်​များ​ကို သိကျွမ်း​လာ​စေ​လို​ကြောင်း ကိုယ်တော်​သွန်သင်ပုံ​က ဖော်ပြ​သည်။—ယောဟန် ၁၇:၆-၈။

၁၈၊ ၁၉။ (က) ယေရှုသည် မိမိ၏​ခမည်းတော်​ကို အဘယ်​ပီပြင်​ထင်ရှားသော​ရုပ်လုံးဖော်​ချက်​များ​ဖြင့် ဖော်ပြ​တော်​မူ​ခဲ့​သနည်း။ (ခ) နောက်​ဆောင်းပါး​တွင် အဘယ်အရာကို ဆွေးနွေး​ကြ​မည်​နည်း။

^၁၈ ယေရှုသည် ပုံ​ဥပမာ​များ​ကို​မကြာခဏ​အသုံးပြု​ကာ မိမိ၏​ခမည်းတော်​ကို​လွယ်လွယ်ကူကူဖြင့် မေ့​မသွား​နိုင်​သည့် ပီပြင်​ထင်ရှားသော​ရုပ်လုံးဖော်​ချက်​များ​ဖြင့်​ဖော်ပြ​လေ့​ရှိသည်။ ဘုရားသခင်​၏​ကရုဏာ​အကြောင်း ယေဘုယျ​သဘောဖြင့်​ပြောဆိုခြင်း​သည် တစ်​ကဏ္ဍ​ဖြစ်သည်။ သား​ပြန်လာ​သည်ကို​မြင်​သောအခါ အလွန်​စိတ်​လှုပ်ရှား​ပြီး “ပြေး​သွား​၍ သား​၏​လည်ပင်း​ကို​ပိုက်​ဖက်​လျက် နမ်းရှုပ်” သည့် ခွင့်လွှတ်​တတ်သော​ဖခင်​တစ်ဦး​နှင့် ယေဟောဝါ​အား​နှိုင်းယှဉ်​ထားခြင်း​သည် ထူးခြားသည့်​နောက် တစ်​ကဏ္ဍ​ဖြစ်သည်။ (လုကာ ၁၅:၁၁-၂၄) သာမန်​လူ​တို့ကို အထင်သေး​တတ်ကြ​သည့် ဘာသာရေး​ခေါင်းဆောင်​များ​၏ တင်းကျပ်သော​ယဉ်ကျေးမှုကို​ငြင်းပယ်​၍ ယေရှု​က မိမိ၏​ခမည်းတော်​သည် ဝါကြွား​သော​ဖာရိရှဲ​တစ်ဦး၏ ဟန်​ရေး​ပြ​ဆုတောင်းချက်​ထက် နှိမ့်ချသော​အခွန်ခံ​တစ်ဦး၏ တိုးလျှိုး​တောင်းပန်​မှု​ကို သာ၍​နှစ်သက်​သည့် ချဉ်းကပ်​ရလွယ်​ကူ​သော​ဘုရားသခင်​ဖြစ်​ကြောင်း​ရှင်းပြ​ခဲ့​သည်။ (လုကာ ၁၈:၉-၁၄) ယေဟောဝါ​သည် စာငှက်​ကလေး​တစ် ကောင် မြေပေါ်​သို့​ကျ​သွား​သည်ကို​သိတော်မူ​သည့်​အထိ ဂရုစိုက်​တော်​မူ​သော​ဘုရားသခင်​ဖြစ်​ကြောင်း ယေရှု​ဖော်ပြ​သည်။ “မကြောက်​ကြ​နှင့်။ သင်တို့သည် စာငှက်​အများ​တို့​ထက် သာ၍​မြတ်​ကြ​၏” ဟု​ယေရှု​က မိမိ၏​တပည့်တော်​များ​ကို စိတ်ချ​စေတော်မူ​ခဲ့​သည်။ (မဿဲ ၁၀:၂၉၊ ၃၁) ယေရှု “ဆုံးမ . . . တော်​မူ​ခြင်း” ကို​လူ​တို့​အလွန်​အံ့သြ​ပြီး ကိုယ်တော်​ထံ​ချဉ်းကပ်​လို​ကြ​ခြင်း​ကို ကျွန်ုပ်​တို့​နားလည်​နိုင်​ကြ​ပါ​သည်။ (မဿဲ ၇:၂၈၊ ၂၉) တစ်ကြိမ်​တွင် ‘အလွန်​များသော​စုဝေး​သူတို့’ သည် စားစရာ​ကို​သွား​မ​ရှာ​ဘဲ ကိုယ်တော်​အနား​၌ သုံးရက်​မခွာ​ဘဲ​ရှိခဲ့​ကြသည်​တကား!—မာကု ၈:၁၊ ၂။

^၁၉ ယေဟောဝါ​သည် မိမိ၏​နှုတ်မြွက်​စကားတော်​တွင် ခရစ်တော်​၏​စိတ်တော်​ကို ဖော်ပြ​ပေး​ထား​သည့်​အတွက် ကျေးဇူး​တင်​နိုင်​သည်​တကား! သို့သော် အခြားသူ​တို့​နှင့် ကျွန်ုပ်​တို့​ဆက်ဆံ​ရာ​၌ ခရစ်တော်​၏​စိတ်တော်​ကို ကျွန်ုပ်​တို့​မည်သို့​မွေးမြူ​တင်ပြ​နိုင်​ကြ​မည်​နည်း။ နောက်​ဆောင်းပါး​တွင် ယင်းကို ကျွန်ုပ်​တို့​ဆွေးနွေး​ကြ​ပါ​မည်။

[အောက်ခြေ​မှတ်ချက်များ]

သင်​မှတ်မိ​သလော

• “ခရစ်တော်​၏​စိတ်တော်” နှင့် ကျွန်ုပ်​တို့​အကျွမ်းတဝင်​ဖြစ်လာ​ရန် အဘယ်ကြောင့်​အရေးကြီး​သနည်း။

• လူသား​ဘဝ​မတိုင်မီ​က ယေရှု​၌ အဘယ်​ပေါင်းသင်း​ဆက်ဆံမှု ရှိခဲ့​သနည်း။

• ယေရှု၏​မြေကြီး​အသက်တာ​အတွင်း ကိုယ်တော်​သည် အဘယ်​အခြေအနေ​များနှင့် လွှမ်းမိုးမှု​များ​ကို ကိုယ်တိုင်​တွေ့ကြုံ​ခဲ့​ရသနည်း။

• ယေရှု၏​ပင်ကို​အရည်အသွေး​နှင့်​ပတ်သက်​၍ ခရစ်ဝင်​ကျမ်းစောင်​များ​က အဘယ်အရာကို​ဖော်ပြ​သနည်း။

[လေ့လာ​ရန်​မေးခွန်းများ]

[စာမျက်နှာ ၁၀ ပါ ရုပ်ပုံ]

ယေရှုသည် မိသားစုကြီး​တစ်ခု​တွင် ကြီးပြင်း​လာပြီး၊ သာမန်​အခြေအနေ​၌ ဖြစ်ဖွယ်​ရှိ

[စာမျက်နှာ ၁၂ ပါ ရုပ်ပုံ]

ရဗ္ဗိ​ဆရာ​တို့သည် အသက် ၁၂ နှစ်အရွယ် ယေရှု၏ နားလည်မှု​နှင့် အဖြေ​များ​ကို အံ့သြ​မိန်းမော​ခဲ့​ကြ