အန္တရာယ်နယ်မြေကထွက်ကြ!
အန္တရာယ်နယ်မြေကထွက်ကြ!
မီးတောင်ပညာရှင်များ၏တာဝန်မှာ စူးစမ်းလေ့လာပြီး နိမိတ်လက္ခဏာကို ချင့်ချိန်တွက်ချက်ကာ မီးတောင်ပေါက်ကွဲတော့မည်အကြောင်း သတိပေးရန်ဖြစ်သည်။ (ဖူဂျန်တောင်ပေါက်ကွဲသည်နှင့် ရဲသားတို့သည် အန္တရာယ်နယ်မြေမှ လူတို့ရှောင်နေရန် တာဝန်ယူကြရ၏။) ထိုနည်းတူ ကျမ်းစာကျောင်းသားများသည် “အစီအစဉ်စနစ်ဆုံးခန်း” ၏နိမိတ်ကို သတိပြုမိပြီး ကျရောက်အံ့ဆဲဆဲအန္တရာယ်အကြောင်း အခြားသူများကို သတိပေးကြရသည်။—မဿဲ ၂၄:၃၊ ကဘ။
ကျရောက်အံ့ဆဲဆဲကမ္ဘာချီကပ်ဘေးအကြောင်း သတိပေးထားသည့် ကျမ်းစာ၏အဆိုပါအခန်းကြီးတွင် ပဏာမအဖြစ်အပျက်များနှင့်ပတ်သက်၍ ဤဖော်ပြချက်ကို ကျွန်ုပ်တို့ဖတ်နိုင်သည်– “လူတစ်မျိုးနှင့်တစ်မျိုး တစ်နိုင်ငံနှင့်တစ်နိုင်ငံ ရန်ဘက်ပြုကြလိမ့်မည်။ အရပ်ရပ်တို့၌ အစာခေါင်းပါးခြင်း၊ ကာလနာများပြားခြင်း၊ မြေကြီးလှုပ်ခြင်းတို့သည် ဖြစ်ကြလိမ့်မည်။ မိစ္ဆာ[မှားယွင်းသော] ပရောဖက်အများတို့သည်ပေါ်လာ၍ လူအများတို့ကို လှည့်ဖြားကြလိမ့်မည်။ မတရားသောအမှုတို့သည် များပြားသဖြင့် အများသောသူတို့၏ချစ်ခြင်းမေတ္တာသည် ခေါင်းပါးလိမ့်မည်။ . . . လူမျိုးအပေါင်းတို့အား သက်သေဖြစ်မည်အကြောင်း နိုင်ငံတော်နှင့်ယှဉ်သော ဧဝံဂေလိတရားကို လောကီ [လောက] နိုင်ငံအရပ်ရပ်ရှိသမျှတို့၌ ဟောရလိမ့်မည်။ သို့ပြီးမှ အဆုံးသည်ဖြစ်လတ္တံ့။”—မဿဲ ၂၄:၇-၁၄။
အဆိုပါပရောဖက်ပြုချက်၏ လက်ရှိပြည့်စုံချက်ကို ပိုင်းခြားသိမြင်ရန် ကျွန်ုပ်တို့သည် သတင်းလေ့လာသူများဖြစ်ဖို့ မလိုပါ။ အထူးသဖြင့် ၁၉၁၄ ခုနှစ်ကတည်းက ၎င်းကို တွေ့ကြုံခဲ့ကြရပြီ။ ဤရာစုနှစ်အတွင်းပင် ကမ္ဘာစစ်နှစ်ခု၊ များစွာသောပြည်တွင်းစစ်များ၊ ဒေသန္တရစစ်မက်များနှင့် လူမျိုးရေး၊ ဘာသာရေးပဋိပက္ခများဖြစ်ခဲ့ပြီ။ ထိုသို့သောစစ်မှုများကြောင့် အစာငတ်မွတ်ကြရသည့်အပြင် သဘာဝဘေးဒဏ်များကြောင့် ခက်ခဲဆင်းရဲခဲ့ကြရ၏။ ငလျင်များကြောင့် အသက်ဆုံးရှုံးမှုများစွာရှိခဲ့ပြီ။ မသင်္ကာဖွယ်ခေါင်းဆောင်များနှင့် အစွဲအလမ်းကြီးသောနောက်လိုက်များ၏ ဂိုဏ်းဂဏများလည်း မှိုလိုပေါက်လာခဲ့ပြီ။ “မတရားသောအမှုတို့သည် များပြား” သဖြင့် လူတို့သည် မေတ္တာမဲ့လာကာ အိမ်နီးချင်းကောင်းပင်မရှိတော့ချေ။
နိမိတ်၏အခြားအသွင်အပြင်တစ်ခုဖြစ်သည့် ကမ္ဘာချီဟောပြောခြင်းလုပ်ငန်းကိုဆောင်ရွက်နေသည်မှာ သေချာသည်။ ဤမဂ္ဂဇင်း၏မျက်နှာဖုံးကို ပြန်ကြည့်ပါ၊ ခေါင်းစဉ်တွင် “ယေဟောဝါ၏နိုင်ငံတော်ကိုကြေညာခြင်း” ကို သင်သတိပြုမိပေလိမ့်မည်။ ၁၃၂ ဘာသာနှင့် ၂၂ သန်းကျော် ထုတ်ဝေလျက်ရှိသည့် ကင်းမျှော်စင် သည်နိုင်ငံရှိသမျှတို့၌ ‘ဘုရားသခင့်နိုင်ငံတော်သတင်းကောင်း’ ကြွေးကြော်သူများအတွက် အရေးပါသောကိရိယာတစ်ခုဖြစ်၏။ အဆိုပါသတင်းကောင်းတွင် စကြဝဠာဖန်ဆင်းရှင် ယေဟောဝါဘုရားသခင်သည် စနစ်ဆိုးကိုဖျက်ဆီးပြီး မြေကြီးပေါ်တွင် ပရဒိသုဖြစ်ပေါ်စေမည့် ကောင်းကင်နိုင်ငံတော်ကို တည်ထောင်ခဲ့သည့် သတင်းပါဝင်သည်။ ဤအစီအစဉ်စနစ်မှလူတို့သည် အသက်အန္တရာယ်ကြုံနေကြရကြောင်း ထင်ရှားစေသည့် မကြာမီ ဘုရားသခင်အရေးယူဆောင်ရွက်တော့မည်ဟူသော နိမိတ်လက္ခဏာကို ယခု ကျွန်ုပ်တို့တွေ့မြင်နေကြရသည်။—၂ တိမောသေ ၃:၁-၅; ၂ ပေတရု ၃:၃၊ ၄; ဗျာဒိတ် ၆:၁-၈ နှိုင်းယှဉ်။
ယေဟောဝါ၏ကြောက်မက်ဖွယ်ရာနေ့ကြီး
ယေဟောဝါတရားစီရင်မည့်အချိန်တန်သောအခါ အဘယ်အရာဖြစ်ပျက်မည်နည်း။ ထိုအခါ အဘယ်အရာဖြစ်မည်ကို ကိုယ်တော်တိုင် ပီပြင်ပြတ်သားစွာ သရုပ်ဖော်ပြထားချက်ကို ဂရုစိုက်ကြည့်ပါ– “မိုးကောင်းကင်၌လည်းကောင်း၊ မြေကြီးပေါ်၌လည်းကောင်း အံ့ဖွယ်သောအရာတည်းဟူသော သွေး၊ မီးလျှံ၊ မီးခိုးတိုင်တို့ကို ငါပြမည်။ ထာဝရဘုရား [“ယေဟောဝါ၊” ကဘ] ၏ကြောက်မက်ဖွယ်သောနေ့ကြီးမတိုင်မီ၊ နေသည် မှောင်မိုက်အတိဖြစ်လိမ့်မည်။ လသည်လည်း သွေးဖြစ်လိမ့်မည်။”—ယောလ ၂:၃၀၊ ၃၁။
မည်သည့်ဒေသန္တရမီးတောင်ပေါက်ကွဲခြင်း သို့မဟုတ် ငလျင်လှုပ်ခြင်းထက်မဆို သာ၍ကြောက်မက်ဖွယ်ကောင်းပြီး ပျက်စီးမှုများမည့် ထိုနေ့ရောက်လုနီးပြီ။ ပရောဖက်ဇေဖနိက ဤသို့ဆိုသည်– “ထာဝရဘုရား [“ယေဟောဝါ၊” ကဘ] ၏နေ့ကြီးနီးပြီ။ နီးပြီ။ အလျင်အမြန်လာ၏။ . . . ဒေါသအမျက်တော်မီးသည် တစ်ပြည်လုံးကို လောင်လိမ့်မည်။ ပြည်သူပြည်သားအပေါင်းတို့ကို အလျင်အမြန်စီရင်၍ အကုန်အစင်သုတ်သင်ပယ်ရှင်းတော်မူလိမ့်မည်။” “ထာဝရဘုရား [“ယေဟောဝါ၊” ကဘ] အမျက်ထွက်တော်မူသောနေ့၌ သူတို့ရွှေငွေသည် သူတို့ကို မကယ်တင်နိုင်” သော်လည်း ထိုကြောက်မက်ဖွယ်သောနေ့ကြီးကို ကပ်ကျော်ရန် နည်းတစ်နည်းရှိသည်။—ဇေဖနိ ၁:၁၄-၁၈။
မည်သို့ဖြစ်မည်ကိုဖော်ပြကာ ဇေဖနိက ဤသို့ဆိုသည်– “ထာဝရဘုရား [“ယေဟောဝါ၊” ကဘ] ၏ပြင်းစွာသောအမျက်တော်သည် သင်တို့အပေါ်သို့မရောက်၊ ထာဝရဘုရား [“ယေဟောဝါ၊” ကဘ] ၏အမျက်တော်နေ့သည် သင်တို့အပေါ်သို့ မရောက်မီ ကိုယ်ကိုစစ်ကြောကြလော့။ . . . စိတ်နှိမ့်ချသောပြည်သူပြည်သားအပေါင်းတို့၊ ထာဝရဘုရား [“ယေဟောဝါ၊” ကဘ] ကိုရှာကြလော့။ ဖြောင့်မတ်ခြင်းနှင့် စိတ်နှိမ့်ချခြင်းကိုလည်း ရှာကြလော့။ ထာဝရဘုရား [“ယေဟောဝါ၊” ကဘ] အမျက်တော်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်။” (ဇေဖနိ ၂:၂၊ ၃) ‘ယေဟောဝါကိုရှာခြင်း၊ ဖြောင့်မတ်ခြင်းကိုရှာခြင်းနှင့် စိတ်နှိမ့်ချခြင်းကိုရှာခြင်း’ အားဖြင့် ကျွန်ုပ်တို့ခိုလှုံရာရနိုင်ကြသည်။ ယနေ့ မည်သူများသည် ယေဟောဝါကို ရှာနေကြသနည်း။
ယေဟောဝါသက်သေများ၏ဟောပြောခြင်းလုပ်ငန်းကြောင့် သူတို့သည် “ယေဟောဝါ” ဟူသောစကားလုံးနှင့် ဆက်စပ်လျက်ရှိသည်ဟု သင်သံသယရှိမည်မဟုတ်ချေ။ သူတို့ထံမှ ဤမဂ္ဂဇင်းကို သင်ရရှိခဲ့ဖူးပေမည်။ သူတို့သည် ဖြောင့်မတ်စွာနေထိုင်ကြသည့် ကိုယ်ကျင့်တရားကောင်းမွန်သော နိုင်ငံသားများဖြစ်ကြောင်း လူအများသိ၏။ သူတို့သည် စိတ်နှိမ့်ချမှုအပါအဝင် “လူသစ်” ကိုယူတင်ဝတ်ဆင်ရန် ကြိုးစားနေကြသည်။ (ကောလောသဲ ၃:၈-၁၀) ၎င်းသည် ယေဟောဝါ၏မျက်မြင်ရအဖွဲ့အစည်း၏ သွန်သင်မှုကြောင့်ဖြစ်ကြောင်း သူတို့ဝန်ခံကြသည်။ ထိုအဖွဲ့အစည်းကို လူ့ပြည်အရပ်ရပ်မှယေဟောဝါသက်သေများ၏ ဒေသခံအသင်းတော်များက ကိုယ်စားပြုသည်။ မှန်၏၊ ကမ္ဘာတစ်ဝန်းရှိ ယေဟောဝါသက်သေများအကြား ‘ညီအစ်ကိုအသင်းအပင်းတစ်ခုလုံး’ နှင့်အတူ ခိုလှုံရာရရှိနိုင်ပါသည်။—၁ ပေတရု ၅:၉။
ယခု ခိုလှုံပါ
ကျွန်ုပ်တို့သည် ယေဟောဝါကိုရှာခြင်းဖြင့် ခိုလှုံမှုယူရန် ကိုယ်တော်၏မိတ်ဆွေများဖြစ်ကြရမည်။ ၎င်းတွင် မည်သည့်အရာပါဝင်သနည်း။ “မတရားသောမေထုန်၌ မှီဝဲသောယောက်ျားမိန်းမတို့၊ လော[က]မိတ်သဟာယသည် ဘုရားသခင်နှင့်ဆန့်ကျင်ဘက်ဖြစ်သည်ကို မသိကြသလော။ ဤလောကနှင့်မိတ်သဟာယဖွဲ့လိုသောသူသည် ဘုရားသခင်၏ရန်သူဖြစ်၏” ဟူ၍ သမ္မာကျမ်းစာက ဖြေဆိုသည်။ (ယာကုပ် ၄:၄) ဘုရားသခင်၏မိတ်ဆွေများဖြစ်ကြရန် ဘုရားသခင်ကိုပုန်ကန်သောသဘောထားဖြင့် ထင်ရှားသည့် . . . မည်သည့်တွယ်တာမှုကိုမဆို ကျွန်ုပ်တို့ဖယ်ရှားပစ်ကြရမည်။
သမ္မာကျမ်းစာက ကျွန်ုပ်တို့ကို ဤသို့သတိပေးသည်– “လောကကိုလည်းကောင်း၊ လောက၌ရှိသောအရာတို့ကိုလည်းကောင်း မချစ်ကြနှင့်။ လောကကိုချစ်သောသူမည်သည်ကား၊ ခမည်းတော်ကို ချစ်ခြင်းမေတ္တာမရှိ။ လောက၌ရှိသမျှသောအရာတည်းဟူသော ကိုယ်ကာယတပ်မက်ခြင်း၊ မျက်စိတပ်မက်ခြင်း၊ လော[က]စည်းစိမ်၌ ဝါကြွားခြင်းတို့သည် ခမည်းတော်နှင့်မစပ်ဆိုင်၊ လောကနှင့်သာဆိုင်ကြ၏။ လောကနှင့်လော[က]တပ်မက်ခြင်းသည် ရွေ့သွားကွယ်ပျောက်တတ်၏။ ဘုရားသခင်၏အလိုတော်နှင့်အညီ ကျင့်သောသူမူကား၊ . . . ထာဝရတည်၏။” (၁ ယောဟန် ၂:၁၅-၁၇) ယနေ့ လူအများစုသည် ကိုယ်ကာယတပ်မက်ခြင်းဖြစ်သည့် အထိန်းအကွပ်မဲ့ ကိလေသာစိတ်၊ သွေးသားတပ်မက်ခြင်း၊ လောဘလွန်ကြူးခြင်းနှင့် အခွင့်အာဏာကို တလွဲအသုံးချခြင်းတို့၏ နှိုးဆွပေးမှုကိုခံကြရသည်။ သို့သော် ယေဟောဝါဘက်၌ရှိနေရန် ဤသို့သောတပ်မက်မှုများကို ချိုးနှိမ်ကြရမည်ဖြစ်သည်။—ကောလောသဲ ၃:၅-၈။
သင်သည် အခါအားလျော်စွာ ဤဂျာနယ်ကို ဖတ်ရှုခဲ့ဖူးမည်ဖြစ်ပြီး ကျမ်းစာပရောဖက်ပြုချက်များ၏သက်ဆိုင်ပုံကို ရှင်းပြချက်အား သဘောတူပေမည်။ သို့ရာတွင် သင်သည် နောက်တစ်ဆင့်ဖြစ်သည့် ယေဟောဝါသက်သေများနှင့်ပေါင်းသင်းခြင်းကိုမူ ဆုတ်ဆိုင်းနေပေမည်။ သို့သော် ကျွန်ုပ်တို့သည် ဘေးဒုက္ခတစ်ခုကြုံရတော့မည်ဖြစ်သောအခါ သတိပေးချက်ကို နားထောင်ရုံမျှနားထောင်မည်လော။ ဖူဂျန်တောင်ပေါက်ကွဲမှုဖြစ်စဉ်မှ သိမြင်နိုင်သည့်အတိုင်း ကျွန်ုပ်တို့သည် သတိပေးချက်နှင့်အညီ ဆောင်ရွက်ရန်လိုအပ်သည်။ သတင်းဦးရလိုသည့် သတင်းထောက်နှင့်ဓာတ်ပုံဆရာအနည်းဆုံး ၁၅ ဦးအသက်ဆုံးရှုံးခဲ့ကြောင်း သတိရပါ။ အမှန်မှာ၊ ဓာတ်ပုံဆရာတစ်ဦးသည် သူ၏ကင်မရာ ရှတ္တာခလုတ်ကို နှိပ်နေရင်း သေဆုံးခဲ့သည်။ “တစ်နေ့ ကျွန်တော်သေခဲ့မယ်ဆိုရင် မီးတောင်ထိပ်ပေါ်မှာ သေချင်တယ်” ဟုပြောခဲ့သော မီးတောင်ပညာရှင်တစ်ဦးသည် သူ၏ဆန္ဒအတိုင်း သေဆုံးခဲ့၏။ သူတို့အားလုံးသည် သူတို့လုပ်ငန်းနှင့်သူတို့ဝါသနာပါရာများတွင် မိမိတို့ကိုယ်ကိုမြှုပ်နှံခဲ့ကြသည်။ သို့ရာတွင် သတိပေးချက်ကို လျစ်လျူရှုခြင်း၏အခအဖြစ် သူတို့အသက်ကို သူတို့စတေးခဲ့ကြသည်။
ယနေ့ လူအများသည် ဆိုးယုတ်မှု . . . ကိုဖျက်ဆီးပစ်မည်ဟူသည့် ဘုရားသခင့်ဆုံးဖြတ်ချက်နှင့်စပ်လျဉ်းသော သတင်းကို ကြားရကြပြီး ခြေမြစ်သောသတိပေးချက်ကိုလည်း အတော်အသင့်ပိုင်းခြားသိမြင်နေကြရ၏။ ‘နောက်ဆုံးတော့ ဖြစ်လာမှာပါ၊ ဒါပေမဲ့ ခုတော့မဟုတ်သေးဘူး’ ဟုသူတို့ဆင်ခြင်တက်ကြပေမည်။ သူတို့အတွက် လတ်တလောသာ၍အရေးကြီးပုံရသည့်အရာများမှ သွေဖည်မသွားရရန် ယေဟောဝါနေ့ကြီးကို စိတ်ကြိုက်ရွှေ့ဆိုင်းကြသည်။
ဗာရုတ်တွင် ထိုသို့သောအခက်အခဲရှိခဲ့သည်။ ရှေးပရောဖက်ယေရမိ၏ အတွင်းရေးမှူးဖြစ်သော ဗာရုတ်သည် ယေရုရှလင်အပေါ် ကျရောက်အံ့ဆဲဆဲပျက်စီးမှုအကြောင်း ဣသရေလလူများအား ရဲဝံ့စွာသတိပေးခဲ့သည်။ သို့တိုင် တစ်ခါသော် သူ၏အလုပ်တာဝန်ကိုငြီးငွေ့လာခဲ့သည်။ ထိုအခါ ယေဟောဝါက “သင်သည် ကြီးစွာသောအရာတို့ကို ကိုယ်အဖို့ရှာသလော။ မရှာနှင့်” ဟူ၍ သူ့ကိုတည့်မတ်ပေးခဲ့၏။ ဗာရုတ်သည် ချမ်းသာကြွယ်ဝခြင်း၊ အထင်ကရဖြစ်ခြင်း သို့မဟုတ် စည်းစိမ်ဥစ္စာစုဆောင်းခြင်းပင်ဖြစ်ပါစေ ‘ကြီးစွာသောအရာတို့ကို သူ့အဖို့မရှာ’ ကြံရန်ဖြစ်သည်။ သူစိတ်ဝင်စားရမည့်အရာတစ်ခုတည်းသာရှိ၍ ယင်းကား ဘုရားသခင်ဘက်ရပ်တည်ရန် လူတို့ကိုကူညီပေးခြင်းဖြစ်သည့် ကိုယ်တော်၏အလိုတော်ဆောင်ရွက်ခြင်းဖြစ်သည်။ ယင်းကြောင့် သူသည် ‘သူ၏အသက်ကို လက်ရဥစ္စာကဲ့သို့’ ရမည်ဖြစ်သည်။ (ယေရမိ ၄၅:၁-၅) ထိုနည်းတူစွာ၊ ‘ကြီးစွာသောအရာတို့ကို ကျွန်ုပ်တို့အဖို့ရှာ’ မည့်အစား ကျွန်ုပ်တို့အသက်ကိုကယ်တင်ခြင်းဖြစ်မည့် ယေဟောဝါအားရှာဖွေသင့်သည်။
ဖူဂျန်တောင်တွင် အလွန်ပူပြင်းသည့်မီးတောင်ချော်ရည် သူတို့အပေါ်ကျရောက်ချိန်၌ တာဝန်ထမ်းဆောင်နေသူ ရဲသားတစ်ဒါဇင်ကျော်နှင့် စေတနာ့ဝန်ထမ်းမီးသတ်သမားများရှိခဲ့၏။ သူတို့သည် အန္တရာယ်စက်ကွင်းထဲရောက်နေသူများကို ကြိုးစားကူညီပေး၍ ကာကွယ်စောင့်ရှောက်ပေးနေကြသည်။ သူတို့သည် ဤလောကကိုတိုးတက်လာစေရန် စိတ်ရင်းစေတနာကောင်းဖြင့် ကြိုးစားနေကြသည့် အမျိုးသား၊ အမျိုးသမီးများနှင့်တူသည်။ သူတို့၏ရည်ရွယ်ချက်များ ကောင်းမည်ဖြစ်သော်လည်း “ကောက်သောအရာကို မဖြောင့်စေနိုင်” ပါ။ (ဒေ. ၁:၁၅) ကောက်သောအစီအစဉ်စနစ်ကို ဖြောင့်၍မရနိုင်ချေ။ ထို့ကြောင့် ဖယ်ရှားပစ်ဖို့ ဘုရားသခင်ဆုံးဖြတ်ထားသည့် ကမ္ဘာချီအစီအစဉ်စနစ်ကို ကယ်တင်ရန် ကြိုးစားခြင်းဖြင့် “လောကနှင့်မိတ်သဟာယဖွဲ့” ခြင်းသည် ကျိုးကြောင်းညီညွတ်ပါသလော။
ထွက်ခွာခဲ့ပြီဆိုလျှင် ခပ်ဝေးဝေးနေ
အန္တရာယ်သင့်နေသည့်စနစ်မှ ထွက်ခွာခဲ့ခြင်းသည် တခြားဖြစ်ကာ ‘ညီအစ်ကိုအသင်းအပင်းတစ်ခုလုံး’ ၏ကာကွယ်စောင်မမှုအောက်နေခြင်းသည် တခြားဖြစ်သည်။ (၁ ပေတရု ၂:၁၇) ရွှေ့ပြောင်းသွားခဲ့ကြရပြီးနောက် ဖူဂျန်တောင်အနီးရှိ သူတို့၏လယ်များကိုပြန်စစ်ဆေးခဲ့ကြသော လယ်သမားများကိုလည်း မမေ့ပါနှင့်။ သူတို့သည် ယခင် နေထိုင်ခဲ့ကြသည့် “ပုံမှန်” ဘဝအသက်တာကိုပြန်ရလိုခဲ့ကြသည်။ သို့သော် ပြန်သွားကြဖို့ သူတို့၏ဆုံးဖြတ်ချက်သည် ပညာမဲ့ရာရောက်သည်ကို သင်သဘောပေါက်မည်။ စည်းကျော်ခဲ့သည့် ပထမဆုံးကြိုးပမ်းမှုဖြစ်ချင်မှဖြစ်မည်။ အန္တရာယ်နယ်မြေထဲသို့ ခဏတာဝင်ရောက်ခဲ့ကြရာ အဘယ်အရာမျှမဖြစ်ဘဲနေပေမည်။ နောက်တစ်ကြိမ်တွင် ပို၍ကြာကြာနေခဲ့ကြသော်လည်း မထူးခြားပေ။ သို့ဖြစ်၍ မကြာမီ သူတို့သည် ဘေးကင်းမျဉ်းကို ဖြတ်ကျော်သွားနေကျဖြစ်လာဖွယ်ရှိပြီး အန္တရာယ်နယ်မြေတွင် တဝဲလည်လည်လုပ်ရဲလာကြပေမည်။
“အစီအစဉ်စနစ်ဆုံးခန်း” အတွင်းဖြစ်ပျက်လာမည့် အလားတူအခြေအနေမျိုးကို ယေရှုခရစ်ညွှန်ပြခဲ့သည်။ ကိုယ်တော်က “ရေလွှမ်းမိုးခြင်းမဖြစ်မီကာလ၌ နောဧသည် သင်္ဘောထဲသို့ဝင်သောနေ့တိုင်အောင် လူများတို့သည် စားသောက်လျက်၊ ထိမ်းမြားစုံဖက်လျက်နေ၍၊ ရေလွှမ်းမိုးခြင်းရောက်သဖြင့် လူခပ်သိမ်းတို့ကို သုတ်သင်ပယ်ရှင်းသည့်တိုင်အောင် သတိမဲ့နေကြသည်နည်းတူ၊ လူသားကြွလာသောအခါ၌ ဖြစ်လိမ့်မည်” ဟုမိန့်တော်မူခဲ့သည်။—မဿဲ ၂၄:၃၊ ကဘ၊ ၃၈၊ ၃၉။
ယေရှုက စားသောက်ခြင်းနှင့် ထိမ်းမြားစုံဖက်ခြင်းတို့ကို ဖော်ပြခဲ့ကြောင်းသတိပြုပါ။ ယင်းတို့သည် ယေဟောဝါ၏ရှေ့မှောက်တွင် မမှားပါ။ သို့ဆိုလျှင် အဘယ်အရာကမှားသနည်း။ နောဧခေတ်မှလူတို့သည် သူတို့၏ပုံမှန်လုပ်ရိုးလုပ်စဉ်ဘဝအသက်တာကို အဓိကထားကာ “သတိမဲ့” နေခဲ့ကြ၏။ အရေးပေါ်အချိန်၌ “ပုံမှန်” ဘဝအသက်တာဖြင့် နေထိုင်နိုင်မည်မဟုတ်ချေ။ သင်သည် လက်ရှိပျက်စီးယိုယွင်းနေသောလောကမှ ထွက်ခွာခဲ့ပြီ သို့မဟုတ် သီးခြားနေခဲ့ပြီဆိုလျှင် ၎င်းမှ ရရှိနိုင်မည့်အခွင့်အရေးကိုရယူရန် ပြန်သွားဖို့လှုံ့ဆော်ခံရသမျှကို တွန်းလှန်ရမည်ဖြစ်သည်။ (၁ ကောရိန္သု ၇:၃၁) ဝိညာဉ်ရေးဘေးကင်းနယ်မြေပြင်ပတွင် ထိခိုက်ဒဏ်ရာမရှိ သွားလာခဲ့ခြင်းကိုပင် မည်သူမျှသတိမပြုမိဘဲ ပြန်လာခဲ့ပေမည်။ သို့သော် ယင်းသည် သင့်ကို သတ္တိရှိလာစေနိုင်ပြီး လောကသို့တစ်ဖန်ပြန်သွားရန် ထိုတွင်တိုး၍တဝဲလည်လည်နေစေပေမည်။ မကြာမီ “ဒီနေ့တော့ အဆုံးမရောက်သေးပါဘူး” ဟူသောစိတ်ထား ဖြစ်ပေါ်လာနိုင်သည်။
ထို့ပြင် တောင်စောင်းတစ်လျှောက် မီးတောင်မှချော်ရည်စီးဆင်းချိန်တွင် သတင်းထောက်များနှင့် ဓာတ်ပုံဆရာများကို စောင့်နေရသည့် သေဆုံးခဲ့ရသောယာဉ်မောင်းသုံးဦးကိုလည်း သတိရပါ။ ယနေ့ အချို့သည် လောကသို့ ပြန်သွားဝံ့သူများနှင့်အတူ လိုက်ပါသွားကြပေမည်။ မည်သည့်အကြောင်းကြောင့်ပင်ဖြစ်ပါစေ၊ အန္တရာယ်နယ်မြေသို့ပြန်သွားရန် မြှူဆွယ်ခံရခြင်းသည် စွန့်စားရကျိုးမနပ်သည်မှာ ထင်ရှားပါသည်။
ဖူဂျန်တောင်ပေါက်ကွဲမှုဒဏ်ခံခဲ့ရသူအားလုံးသည် ဘေးကင်းမျဉ်းကို ဖြတ်ကျော်ပြီး အန္တရာယ်နယ်မြေထဲဝင်သွားခဲ့ကြသည်။ တစ်နေ့နေ့တွင် ၎င်းတောင်ပေါက်ကွဲမည်ကို သူတို့မျှော်လင့်ခဲ့ကြသော်လည်း ထိုနေ့တွင်ပေါက်ကွဲမည်ဟု မည်သူမျှမထင်မှတ်ခဲ့ကြချေ။ အစီအစဉ်စနစ်ဆုံးခန်း၏နိမိတ်ကို သတိပြုမိခြင်းအားဖြင့် ယေဟောဝါ၏နေ့ကြီး တစ်ချိန်ချိန်တွင်ရောက်လာမည်ကို လူအများမျှော်လင့်ကြသော်လည်း ကြာဦးမည်ဟုယူမှတ်ကြသည်။ အချို့က ထိုနေ့သည် အဘယ်နည်းဖြင့်မျှ “ယနေ့” ဖြစ်နိုင်သည်ဟူ၍ မထင်မှတ်ကြချေ။ ဤသို့သောစိတ်ထားသည် အမှန်ပင်အန္တရာယ်ရှိသည်။
“သူခိုးသည် ညဉ့်အခါလာသကဲ့သို့၊ ထာဝရဘုရား [“ယေဟောဝါ၊” ကဘ] ၏နေ့ရက်သည် လာလိမ့်မည်” ဟုတမန်တော်ပေတရုက သတိပေးခဲ့သည်။ ကျွန်ုပ်တို့သည် “ဘုရားသခင်၏နေ့ရောက်လိမ့်မည်ဟု . . . မျှော်လင့်တောင့်တလျက်” “အညစ်အကြေးနှင့်ကင်းစင်၍ အဘယ်အပြစ်မျှမပါဘဲ၊ ရှေ့တော်သို့ ငြိမ်ဝပ်စွာရောက်မည်အကြောင်း ကြိုးစားအားထုတ်ကြ” ဖို့လိုသည်။ (၂ ပေတရု ၃:၁၀-၁၄) ဆိုးယုတ်မှု . . . ကိုဖျက်ဆီးပြီးနောက် ဘုရားသခင့်နိုင်ငံတော်လက်အောက်ရှိ မြေကြီးပရဒိသု စောင့်ကြိုလျက်ရှိ၏။ လောကသို့ စည်းကိုဖြတ်ကျော် ပြန်သွားသောနေ့ရက်သည် ယေဟောဝါ၏နေ့ကြီးဖြစ်နိုင်သောကြောင့် ကျွန်ုပ်တို့စိတ်ထဲပေါ်လာသည့် မည်သည့်အကြောင်းပြချက်အတွက်မဆို အန္တရာယ်နယ်မြေထဲ အရဲစွန့်သွားရန် ဘယ်သောအခါမျှ သွေးဆောင်မခံရပါစေနှင့်။
ယေဟောဝါလူမျိုးတော်နှင့်အတူ ခိုလှုံ၍ သူတို့နှင့်အတူနေပါ။
[စာမျက်နှာ ၇ ပါ ရုပ်ပုံ]
ယေဟောဝါလူမျိုးတော်နှင့် အတူ ခိုလှုံ၍ သူတို့နှင့်အတူနေပါ
[Picture Credit Line on page 4]
Iwasa/Sipa Press